( ابو طالب عليه السلام )

الله من قبل الوجود اختارها
الوادم التنطي النبيه أعمارها

للكفاله اختارك.. يالعظيمه أنوارك

_ ١ _

يابو طالب يا مُسدد يا أبي
يا أصل شجرة البيت الطالبي
هوه مو ياهو الاجه ويكفل نبي
الباري قسّم على الناس أدوارها

مو قليله أسرارك .. يالعظيمه أنوارك

_ ٢ _

الله مختارك ويعلم بيك زين
عم نبي ووالد أمير المؤمنين
بخت عندك وأصبحت جد الحسين
قطب افلاك السمه وأسرارها

ثار الله ثارك .. يالعظيمه أنوارك

_ ٣ _

إلنبي يثق بيك ويعرفك وجيه
رأيك المحد گدر يشكل عليه
بايع الدنيا واللهك مشتريه
الدين ردته ينتشر بأقطارها

للإسلام أفكارك .. يالعظيمه أنوارك

_ ٤ _

الله جازاك بفخر يلّي النبيك
چنت خيمه يحتمي بكل شده بيك
شال دنيا وآخره وحطهن بديك
وخصك الله بعترته وانوراها

بالسماء اقمارك .. يالعظيمه أنوارك

_ ٥ _

ثابت الراي ورحت لله شهيد
يا شجاع وما عفت دينك وحيد
يا أبو حيدره اشتطلع شي أكيد
ما تخاف من الحرب وأخطارها

ثابت بأصرارك .. يالعظيمه أنوارك

مصطفى الشافعي

لحيدر المطبوره هامه
تنزف عيون اليتامه
دم بچيها.. ياهو ليها
تنزف عيون اليتامه

_ ١ _
منتظرة اليتامه بحرگه يم بابه
تتمنه الولي ينهض من اصوابه
صوّب روسهم سيف الذي صابه
ومثل نزفه، نزيف عيون احبابه

ابابه كلها اتريده يشفه
ومستمر براسه نزفه
تدعي اديها.. ياهو ليا
تنزف عيون اليتامه

_ ٢ _
فجر لو مغرب ابعين اليشوفونه
إليفارگ علي متوچد عيونه
جرح راسه بگلب كل اليحبونه
راح المايردهم من يسألونه


راح ابو اچفوف الحنينه
وعالجرح غمضها عينه
ودمعه بيها.. ياهو ليها
تنزف عيون اليتامه

_ ٣ _
عاده الينجرح بالجرح تفكيره
بس حيدر وگع ويفكر بغيره
ميريد اليتامه تصيبهم حيره
انطبر والناس كلها تعيش من خيره

عايف الطبره الثگيله
ويفگد ايتامه العليله
مروعيها ... ياهو ليها
تنزف عيون اليتامة

_ ٤ _
الليله ابلا صبر كلها أهل بيته
اشيصبرهم ودمه امخضب الحيته
النفس گوه يشهگه ويدخل لريته
علي من ينهض ايسندونه تاليته

هذي اخر لحظة عنده
لعينه تنظر كلها ولده
امراقبيها.. ياهو ليها
تنزف عيون اليتامة

_ ٥ _
علي وساعة رحيله اشصار بحساسه
يذكر كل يتيم اللي مسح راسه
وچم مكسور خاطر دنگ وباسه
اول ميت وگلبه عله ناسه

للحسن وصاه عليهم
ما أريد أسمع بچيهم
وكل حچيها.. ياهو ليها
تنزف عيون اليتامة


مصطفى الشافعي

مو هينه والله عليه
هذي الجروح البيه
كل مره اموت من انظر
شيبة علي مدميه

_ ١ _

مكسور گلبي وخاطري وموهينه هاي الكسره
زينب وسالفتي الدمع وويه المصايب عشره
تصوروا ابنيه مدلله وتنظر لبوها بحسره
شيباته مخلوطه بدمه ووصلت الراسه الطبره

بيا لوعه عيني تشاهد
مطبور راس الوالد
مابيه أكابر وأصبر
شيبة علي مدميه

_ ٢ _

هذا علي لو مو علي جا ليش أصفر لونه
معقوله اليسند السمه يحتاج اليسندونه
ايتامه كلها تجمعت تسأل عليه شلونه
تأخر ومو من عادته يترك اليحتاجونه

إلمن اشكيها همومي
بلا علي مظلم يومي
كلشي صفه متغير
شيبة علي مدميه

_ ٣ _

طيب وما يوصل بشر لخلاقه والحنيته
رباني بحضانه علي شمحلا حضن تربيته
ياريت لو اني بحلم بس هذا التمنيته
ياريت مابي شي علي يرد مبتسم ياريته

شمحلاها ذيج اللمه
تلوگ اعله ابوي البسمه
وهسه الدموع اتسيطر
شيبة علي مدميه

_ ٤ _

زينب شلونج صاح إلي كتله يبويه شلوني
من شفت لونك منخطف والله تغير لوني
اتقربلي أمسح هامتك وإمسح بديك عيوني
من گد دموعي والهضم يبست يبويه جفوني

انظر شصاير حالي
يا أغلى من كل غالي
گلبي بهضم متكسر
شيبة علي مدميه

_ ٥ _

توني فگدت امي وبعد ما طاب جرح البيه
واليوم ناوي اعله الهجر كافي انفجع يوميه
الله يا طاري الأبو شمحلا طعم طاريه
التفگد أبوها يا علي تفگد جبل حنيه

البنت التصير ايتيمه
تفگد أمان وخيمه
والموت إلي متحظر
شيبة علي مدميه

تمت بعون الزهراء عليها السلام
مصطفى الشافعي

سورة هل أتى طبروها هاليله
والقرأن ظل ينزف تراتيله

~~~
1

لمن طبروا علينه داحي البيبان
آيات وسور ظل ينزف القرأن
لان وي دم علي متخالط الايمان
حنان ورحمه دمه المرتضى يسيله

~~~
2

انصاب المرتضى وگلب اليتيم انصاب
وبحاديث الرساله اتخضب المحراب
داحي الباب وسفه انطبر داحي الباب
ومن بعده يتامه ظلت العيله

~~~
3

علي انفصمت العروه الوثقه بغيابه
واجوا للمسجد بصوت الوحي احبابه
لگوا متخضب ابدم راسه محرابه
وسجادة صلاته بدمعه تشكيله

~~~
4

تگله ياعلي بعدك منوا النه
أحب عندك المسجد من الف جنه
وسفه تبتعد يابه الحسن عنه
تغيب وغيبتك ياحيدر اطويله

~~~
5

وزينب لمن سمعت صوت جبرائيل
يصيح انطبر راس الشرع والتنزيل
انهدم حيل العقيله وعدها ماظل حيل
جرح حيدر كلف مدري اشتسويله

~~~
الشاعر
مصطفى الشافعي

(قصيدة للبقيع)

ينبض الوريد.. بدونك أضيع
انه وياك أريد.. أزور البقيع
نطب للحسن زوار
دعائي يراعي الثار
انه وياك أريد.. أزور البقيع

_ ١ _
إذا بالمقبره وشفنه گبر منهد
طبيعي نگول ماكو من أهل بيته أحد
الله يساعدك من تمشي للغرقد
وتشوف أهلك وناسك مالهم مرقد

بگبرهم وحيد.. دموعك تسيل
يمهدي وتزور.. الحسن والعليل
احط بيتي يمهم جار
دعائي يراعي الثار
انه وياك أريد.. أزور البقيع

_ ٢ _
يامولاي هم تغفه على وساده
وبعيونك دموع بكل وكت عاده
الله يساعدك ويصبّر الساده
شلون تنام عينه الهدمو اجداده

صباح ومساء.. بعيونك دماء
الصبح للبقيع.. المسه لكربلاء
أون مثلك وأنهار
دعائي يراعي الثار
انه وياك أريد.. أزور البقيع

_ ٣ _
الحسن روح النبي وبلا گبر وسفه
علايم ماكو حتى الزاير يعرفه
إخذني وياك لو ليه الگبر وصفه
أريد أقره نواعي كربله بصفه

دمع للحسين.. أهل يمه أريد
واگله العيال.. خذوها ليزيد
بنواعي أقره كل الصار
دعائي يراعي الثار
انه وياك أريد.. أزور البقيع

_ ٤ _
الحسن باب الحوائج والكرم عطره
والينخاه بشده ينگضي أمره
المثله يشيدوله من الذهب حظره
مو محد يزوره وينهدم قبره

ترابه البقيع.. يمهدي وتشوف
شوكت تبني ليه.. قبب كالطفوف
ضريح وقبب تنزار
دعائي يراعي الثار
انه وياك أريد.. أزور البقيع

_ ٥ _
نستنكر أفعال الوادم التحقد
بأيات الكتاب نريد نستشهد
لاهل الكهف وبقصتهم نردد
بكتاب الله عَلَيْهِمْ نَتَّخِذَ مَسْجِد

الحقد هذا ليش.. عله ولد البتول
تهد ودها جيش.. اعله قبر الرسول
بظهورك تطفي النار
دعائي يراعي الثار
انه وياك أريد.. أزور البقيع

مصطفى الشافعي

https://youtu.be/1H5Rq3K_I2M?si=JfDlIayDQlsRKNOF

أعظم الله اجورنا واجوركم باستشهاد الإمام الجواد عليه السلام

الرادود حيدر البياتي

الشاعر #مصطفى_الشافعي

https://youtu.be/lJtsmEwLTlI?si=WBq6z33pVDswirna

الرادود #حيدر_البياتي
الشاعر#مصطفى_الشافعي

https://youtu.be/tLI2jjqgF9M?si=Wp7eHM2k9gHCEKJB

الرادود سيد علي الكيشوان
الشاعر #مصطفى_الشافعي

بكل محنها تلتجأ ليك العباد
ماكو غيرك عالارض باب المراد
_ ١ _
سيدي شرد أذكر من المكرمات
الناس ميته وبابك يوزع حياة
انت خير الباقيات الصالحات
تجود عالعالم بخيرك يالجواد
_ ٢ _
يا كريم وسلسلة نسلك اكرام
بصحنك مأمن يبن طه الحمام
السلام عليك يا أصل السلام
الناس اجت من كل صوب وكل بلاد
_ ٣ _
سيدي بالحشر ردناك الشفيع
إذا ما لينه احظرت والله نضيع
عليك گلب حسين من شاف الرضيع
بلطفك تنجينه لو صار المعاد
_ ٤ _
جنت هيج ايام متحظر اكيد
تريد تنصب مأتم لذكر الشهيد
تحظر بموكب لمگطوع الوريد
وبيدك تعلگ يبو الهادي السواد
_ ٥ _
لجن سموك العده بعز الشباب
وشابهت جدك بلوعات المصاب
آه يا طيب واجدادك اطياب
السمه قبل الارض نصبتلك حداد


مصطفى الشافعي

https://youtu.be/HZ5LlGtjSIM?si=uidgJlNtm3v_96cs

عيد الغدير الاغر
الرادود #أحمد_الفتلاوي
الشاعر #مصطفى_الشافعي

بجسم الحسين القتيل.. ما رأيت إلا جميل

__

بالجثث اعثر اجيته من رماد مخيمه
وصحت ياربي تقبل منا قربان السمه
جروحه الف وتسمعية والضلوع مهشمه
وما عرفت حسين لو ما عطر امي فاطمه

بهذا المصاب الجليل .. ما رأيت إلا جميل

__

للذي اعله الترب نامو يصعب عليه الوصول
من مشيت لعلي الأكبر حرت يمه شرد اگول
بدر فوگ الرمل نايم نورهُ يأبى الافول
حتى بعد الموت بعده يشبه لجدي الرسول

ومن شفت دمه اليسيل .. ما رأيت إلا جميل

__

على القاسم يسألوني ومني يردون الجواب
احنه لجل الدين ننطي أطفال وكهول وشباب
برز چنه الحسن طالع مرتدي نفس الثياب
ورجع للخيمه شهيد ودمه صايرله خضاب

للحسن شكراً جزيل .. ما رأيت إلا جميل

__

سلمت للباري متني وما يمر بروحي خوف
وكلت شكراً يا الهي بكثر ما شوغات اشوف
تقبل اللهم هامة كافلي وعين وچفوف
تقبل اللهم تعبي بكثر عثرات الطفوف

بعين وچفوف الكفيل .. ما رأيت إلا جميل

__

نام جسم حسين دامي، وراسه ما يقبل ينام
عالرمح ينظر علينا نمنا برماد الخيام
والصبح جابو النوگ وحضروا سوط اللآم
تگبعت هيبة نبوه، والبست صبر الإمام

من صعدت اعله الهزيل .. ما رأيت إلا جميل

__

رحت مسبية وغريبة من بلاد ادخل بلاد
الناس عدهم عيد واني اعله اخوتي عندي حداد
والله ما يمحي ذكرنا شما ابن سفيان راد
اني والسجاد ثوره هناك بچينه الجماد

بالسبي وكيد العليل.. ما رأيت إلا جميل


مصطفى الشافعي

(أعظم الله اجورنا واجوركم باستشهاد الإمام السجاد عليه السلام)


أنساك يابويه شلون وتبرد جروح البيه
والماي ثلثين الگاع بهاي الكرة الأرضية

_ ١ _
جروحك بكل لحظه يعيشن وياي
واثنينهن انت أبوي ومولاي
وعليك ما يهدأ ونيني ومبچاي
شلون اگدر أنساك ويذكرني الماي

دمعي انمزج ويه الماي والهضم بان عليه

_ ٢ _
إلما شايفك دمعاته تجري بكل حين
شلون التربه بحضنك وانت حسين
گلبي بچه، مايكفي بس دمع العين
ما ميت وتختلف عن الميتين

يا ميت عليه الخيل تسحگ بروحه وجيه

_ ٣ _
الماي حسره بجرفه ضلت اللان
سيد شباب الجنه ذبحوا عطشان
حضنك حنين وربه أولاد إحنان
بنفس الحضن مذبوح سيد الرضعان

حضنك مهد بعد الموت لعبدالله ويه رقيه

_ ٤ _
يعجز العالم أن يكرر مثلك
ربنا خلق شمس وكواكب لجلك
وانطيت لجل إسلامه روحك وأهلك
بالتضحيه ياهو الگدر يوصلك

قدمت كلشي لله بالفاجعه الثوريه

_ ٥ _
قدمت كلشي يبو اليمه لله
وذكرك القدسي يضل خالد معناه
بعلو السمه وأكثر وأكثر علاه
وانطاك جاه أعلى وأجل من كل جاه

تنطي الإله وينطيك من قدرته ومن ضيه

مصطفى الشافعي

(قصيدة للرسول صلى الله عليه وآله وسلم)

بقواميس الحروب حيدرنه يكول
إذا اشتد الوطيس لذنا بالرسول

_ ١ _

يا نبي والحرب ترجف من صراعه
كلشي يم سيفه صرخ سمعاً وطاعه
أول المختار احچيها بقناعه
بكثر ما عنده خلق، عنده شجاعه

الشرح عنه يطول كمالاته سماء
بترتيبه يفوق جميع الأنبياء

_ ٢ _

على هامات اليتامه ايده ترفه
ومن يحارب عالكفر سجيل جفه
لمن يشتد الوطيس الكل يعرفه
اشجع الشجعان جان يلوذ خلفه

علي بضهره يلوذ يعني شگد شجاع
النبي لمن يصول متكفيله گاع

_ ٣ _

عن محمد ما يحير الذي يسأل
بالحرب يلگا بخط الصد الأول
بالشجاعه ما وصل لحدوده مرسل
الله اشجع نبي لهاي الأمه أنزل

الأول بالحروب وتجي بعده الصفوف
بحملاته أكيد يمحيها الألوف

_ ٤ _

شكثر عجّبني نبينا من قريته
والفضائل أول بكلهن لگيته
من يطب حومه نسق جانت مشيته
قائد وما ضحه فد يوم بسريته

بتخطيطه عظيم أبد ماله نظير
حصن للمسلمين ابو القاسم يصير

_ ٥ _

محد يشبهه عله مر الدنيا محد
نبي وعن كل أنبياء الله تفرّد
لون ينهض يا علي ناده وتسند
وعلي من يكوم ينده يا محمد

طه من يگوم علي أدركني يكول
وعلي لمن يگوم ينده يالرسول

_ ٦ _

النبي ينده يا علي لمن يقاتل
غير حيدر فلا يشبهله مناضل
بالحرب بيناتهم نبرة تواصل
طالع عليهم بصولاته ابو فاضل

نزل يوم الطفوف على شاطي الفرات
القطع عنه الطريق بخزره منه مات


مصطفى الشافعي

(گعده للسيدة الزهراء عليها السلام)

بالمغتسل وتلمست ضلع ام ابيها
الله يعينك يا علي شتصبر عليها
بيتك طفه بدره
من غابت الزهره
الله يعينك يا علي شتصبر عليها

_ ١ _
صارلك أيام وانته فاطمه ما تدري بيها
ليش محنيه ونحيله وگوه تتحرك اديها
الصدمه عالمغتسل صارت من تمر ايدك عليها
حست جفوفك بالضلع
وشاهدت آثار الصفع
تنحيت واجريت الدمع
وما ترد من تحاچيها

كاعد تون يابه الحسن مكسور ضهرك
انت التصبر عيلتك ياهو اليصبرك
گلبك منو يصبره
من غابت الزهره
الله يعينك يا علي شتصبر عليها

_ ٢ _
عين حمره متن ازرك صدر نازف من شفتها
سكته ماتت يبو الحمله من مشت ما ودعتها
والمسافه لحد بيتك يعينك الله من عشتها
بصف بيتك المسجد لجن
شو طولت يابه الحسن
جدامك هواي تعثرن
كوه الأنفاس شهكتها

هاي المسافه يا علي جن مستحيله
من المسجد لحد فاطمه صارت طويله
بكل خطوه جم عبره
من غابت الزهره
الله يعينك يا علي شتصبر عليها

_ ٣ _
صحت للحسنين كومو يا علي بأفجع مسيه
حنان مو مالت وداع ولا حمل فرگه الزجيه
من الكفن مدت اديها وشبگت الحسنين هيه
حركها ما اظن ميته
توها ابو اليمه شبگته
ومسحت بجفها دمعته
بينهم ماكو منيه

ام الحسن موميّته يمكن بعدها
منين اكو ميته من الكفن تشبگ ولدها
الموت اختلف أمره
من غابت الزهره
الله يعينك يا علي شتصبر عليها

_ ٤ _
ما ترد فاطمه لبيتك سلمت للباري أمرك
وانت لو بيدك يحيدر تنطي لام الحسن عمرك
صبرك يكفي العوالم بس نفذ للزهره صبرك
محد يكسرك بالحرب
بس هسه مكسور الگلب
واريت فاطم بالترب
بيها الله يعظم أجرك

ما تدري واقع لو حلم خلصت حياتك
ويه ام حسن نفس اللحد رايد مماتك
كسرك منو يجبره
من غابت الزهره
الله يعينك يا علي شتصبر عليها

_ ٥ _
يا علي بليل الاظلم فاطمة تواري جسدها
شرادت بهاي الوصية القبر تخفي قصد عدها
جنازة الرحمة ميحضر بيها ذاك الصفع خدها
واريت خدها عله الثرة
وصفعة الخد يا حيدره
تلجم خدود الطاهره
ماتت وتنزف بعدها

تراب الگبر يابه الحسن يلچم ضلعها
وليلة الوحشه بدمعتك تطفي شمعها
تتنفس بحسره
من غابت الزهره
الله يعينك يا علي شتصبر عليها

_ ٦ _
بيت مابيه الزجيه مقبره يصير اعله اهله
ومن بعد فاطمه ما ضل دمع بعيونك تهله
فاطمة ماتت عليله وبيها ما طابت العله
اثمنطعش عام من الحزن
راحت ومحمر الجفن
وازرك يبو حسين المتن
صار كالدملج عضدها من أثر ضربات قنفذ

مصطفى الشافعي

يا إلهي.. گلبي شيصبره
يا إلهي.. ماتت الزهره
راحت أيام العمر
روحي دافنها بگبر
ماتت الزهره

_ ١ _
انه الصابر وصبري يعجب العالم بقصته
بتراب الدفن رديت گلبي يسولف بونته
هذا اليوم ماكو إنسان مثلي الدنيا ظالمته
كل الشافني يسأل علي لو مو علي انته

هذا اني.. هيج متغير
هذا اني.. بحزني متحير
بيوم كبران شكثر
روحي دافنها بگبر
ماتت الزهره

_ ٢ _
انحنيت وكثر بيه الشيب وجهي منخطف لونه
تعرفه الفاگد مبين دمعة حزنه بعيونه
اليمشي ويعثر بلا لون لحد يسأل شلونه
شال بمتنه مو تابوت شايل روحه بمتونه

الدنيا كلها.. مظلمه شبيها
الدنيا كلها.. الزهره مابيها
ليل ما بعده فجر
روحي دافنها بگبر
ماتت الزهره

_ ٣ _
نحيله الزهره ادريها بس من شيعتها بليل
گوه شايل التابوت الجبل ماظنه هيج ثگيل
أول مره ياربي احس بروحي ماضل حيل
غفيت من التعب يمها قبل ما أكمل الترتيل

يم گبرها.. نامت عيوني
يم گبرها.. خل يدفنوني
صبر ما مثله صبر
روحي دافنها بگبر
ماتت الزهره

_ ٤ _
رجعت الداري گوه امشي الهموم عليه ملتمه
الدنيا بغيبة الزهراء عبرت مرحلة ظلمه
البيت بلايه ام البيت كل أركانه متهدمه
لحد ما ماتت الزهره عني اخفت اللطمه

عني جانت.. تخفي سطرتها
عني جانت.. سكته ونتها
تريدني ما انكسر
روحي دافنها بگبر
ماتت الزهره

_ ٥ _
يحتار الوصف وياي جبيره بداخلي الحسره
اعز انسانه بالدنيا ادفنتها وبالضلع كسره
ماتت بالصدر بسمار ماتت عينها حمره
زهره بدارنا ماكو بقت بس سبحة الزهره

كلشي رايح.. شفته وياها
كلشي رايح.. يشتكي لطه
يسعر بگلبي الجمر
روحي دافنها بگبر
ماتت الزهره

_ ٦ _
راحت والگلب يبچي عليها تألم هوايه
وبقيت ادخل لحجرتها وابجي اعله المصلايه
كتاب الله عليها ينوح آيه ونّت الآيه
ولحد الان بالبسمار ظل من فاطمة دمايه

ذكرياتي.. مؤلمه ابيتي
ذكرياتي.. تخنگ بريتي
الحزن بيه مستقر
روحي دافنها بگبر
ماتت الزهره

مصطفى الشافعي

|| منصة شِين
منصة إعلامية لتغطية المشاريع الثقافية لشباب شعراء النجف الأشرف التي تهدف لبناء الشخصية المعرفية للشعراء، وإتمام مسيرة السلف الصالح.

شُعراءٌ شُغلوا بالذب عن شهادتين:
الشهادة للنــبي والعتـرة بالـــولايـة
والتذكير بمصائب مَنْ نال الشهادة

t.me/Sheenplatform

موشح زينب ع

أهَل زينَب بعد مَيْعرفُونْها
التعب مدرِي احسِيَن غيَّر لَونْها

_ ١ _
طَلْعَة التَّل كبُّرَتْها اشچَم عمُر
ولمَن شافَت خيل تِسحَگ عالصدُر
اتغيِّرَت زينَب قبِل شمْسِ الظهُر
على شمْسِ احسِيَن اليْطفُّونْها

_ ٢ _
چانَت اوّل طَلعَه والموقِف صعُب
من عِيُون احسِيَن لعيُون الغرُب
وهاي أوّل مرّه زينَب تنضرُب
ومن قبَل ما سامْعَه ايشَتْمُونْها

_ ٣ _
كِل عمُرها ابخِدُر ما شافَتْها عين
وهيَّه هم ما شايِفَه غيرِ الحُسين
بقَو حتّه اَعدائْها مِستَغرُبِين
انْشافَتِ الما چانَو ايْشُوفونْهَا

_ ٤ _
زينب بعين الله مو عين الرِجال
وعايشه ابيت المْرُوّه والدَلال
إيد زينَب وينْها اوْ وين الاحبَال
ووينْها اوْ وين السِياط امتُونْها

_ ٥ _
لْيا سَبَب أوصَافْها متغيِّرَه
امْنِ الثرَه لو علىٰ النايِم عالثَرَه
عالضِلُوع الشاهِدَتْها امكَسَّرَه
امنِ الشَّمِس لُو مَن دُمُوع اِعيُونْها

_ ٦ _
امْنِ الركُض منِّ التعَب منِّ الضِمَه
امنِ الحرِگ منِّ السحِگ منِّ الدِمَه
اتغيِّرَت أشبهِ النَّاسِ ابفاطِمَه
زينَب اوْ عن زينَب ايسألُونْها

_ ٧ _
التعَب يا مرحَلَه وي زينَب وصل
الماعرفْها عجَب مِن عنْها سأل
والأشَد من ما يعِرفُوها الأهل
لمَن ياهَي هَالمَرَه اينِشدُونْهَا

_ ٨ _
تعيِش موقِف صعُب ما مَرِّ ابْسِنين
لَوَن ما عُرفَتْها حتّه امِّ البَنين
وسألَت اِخْتِ احسين عنِّ اختِ الحْسِين
وين زينَب ؟ والعقيلة اشلُونْهَا

مصطفى الشافعي
١٤٤٧ هـ محرم

مظهر العجائب.. حاظر النوائب
يسندونه هاليوم.. اليسند الكواكب

_ ١ _
اليسند بچفه الرسالة جدمه هاليله عثر
حيدره سيف الإسلام، شلون بالسيف انطبر
شلون راس الدين كله نذل يغتاله گدر
ٱقۡتَرَبَتِ ٱلسَّاعَة أكيد الليلة وَٱنشَقَّ ٱلۡقَمَر

الرد شمس يمينه … طبرته لجبينه
ومن سجوده ميكوم…. سيد المناقب

_ ٢ _
رحمة الله الجبيره وملجأ لكل الأمم
هذا امير المؤمنين اللوح بيده والقلم
شيبته تنباس لازم مو يسيل عليها دم
اليمسح براس اليتامة، راسه هاليوم انهشم

الرائع بصفاته … هكذا جزاته ؟
بفرضه راسه مهشوم … احسن العواقب


_ ٣ _
علي من انطبر هامه گلب الايتام انجرح
حيدره بالنسبه الهم شوفته عيد وفرح
والجرح ماضن يطيب وأمره هاليله اتضح
اليمسح براس اليتامة محد براسه مسح

تندعي اليتامه … يرجع بسلامه
العنها يجلي هموم … عاليتامه غايب

_ ٤ _
علي من الباري عالي والاله امنصّبه
لو باخير الدنيه مُضطر ما يرد من يندبه
كل نبي امن اتمرّه شدّه علي چان ايجاوبه
اشعجب ظلّت يمّه تبچي وما يجاوب زينبه

تعاين لطبرته … وتبجي يمه بنته
مايتمم الصوم … ودم دمعها ساچب

_ ٥ _
اليندل بطرق السماء ويندل دروب الأرض
من بعد ما غفت عينه وسكت من عنده النبض
عيلته ما يرحموها السبي عليهم ينفرض
والحسين بكربلاء الحافر بصدره يرض

اشرف البرايا …. عيلته سبايا
وابنه صدره مهشوم … يبقى عالترايب

مصطفى الشافعي

الصلاة الصلاه ... يرحمكم الله 
هذا آخر أذان  .. من علي وكته حان
يرحمكم الله 

_  ١  _
الكوفة أهلها ما درت هالليله
آخر أذان لحيدره تصغيله
المفروض كل خطوه بدمع تمشيله
حيدر بعد ما تستمع ترتيله

ابلايه صوت الأمير .. هالدنيه شتْصير
يعني ماكو أمان .. من علي وكته حان
يرحمكم الله 

_  ٢  _
بصوته الحنيّن من يإذن حيدر
جدران كل الكوفة إله تتفسر
الله أكبر من ينادي استعبر
ولو ذكر إسم النبي صوته اتغيّر

لو ذكر صدره ضاگ .. للنبي يشتاگ
وبالخشوع استعان .. من علي وكته حان
يرحمكم الله 

_  ٣  _
ومن كثر ما صوت الأذان احنيِّن
لمّن يسمعه كل يتيم ايأمِّن
وهالمرّه حيدر لمن چان ايإذِّن
گلب اليتامه اعليه ما متطمِّن

لعلي امن ايودّعون .. بيمن يِصبْرون
ظلّوا ابيا مكان .. من علي وكته حان
يرحمكم الله 

_  ٤  _
سمعت أذانه زينب امن الحجره
شو صوت حيدر يختلف هالمرّه
حزْن المْوادع سمعته بالنبره
فرشت امصلّايتها خوف وعبره

تندعي بانكسار .. يرجع الكرّار
والدهر بيها خان .. من علي وكته حان
يرحمكم الله 

_  ٥  _
وحسين يسمع نبرته ابيا حاله
ينرسم كل طف كربلاء اگباله
امن اجل الصلاة هناك يفدي اوصاله
ويعلى الأذان ، بسحگة الخيّاله

بطفّه يأتمها راح .. بسهام ورماح
وچم علي بالسنان .. من علي وكته حان
يرحمكم الله 

_  ٦  _

مطبور هامه وصلى جالس حيدر
وحسين صلى بنص سهام العسكر
وزينب تصلي الليل من تتيسر
عذره شنو الـعن الصلاة تأخر؟ 

لدينا كـ العمود.. أساس الأعمال
وساجد لربه جان .. من علي وكته حان
يرحمكم الله 

مصطفى الشافعي