ဆားလင်းကြီးမြို့နယ်တွင် လေပြင်း တိုက်ခတ်မှုကြောင့် စစ်ရှောင်တဲများနှင့် နေအိမ် တချို့ ပျက်စီး(ရုပ်/သံ)

ရန်ကုန်၊ မေ ၁

စစ်ကိုင်းတိုင်း၊ ဆားလင်းကြီးမြို့နယ်တွင် လေပြင်း တိုက်ခိုက်မှုကြောင့် စစ်ရှောင်တဲများနှင့် နေအိမ် တချို့ ပျက်စီးခဲ့ကြောင်း အညာပစ်တိုင်းထောင်လေးများ အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် မီဒီယာသို့ ပြောဆိုသည်။

ယနေ့ မေလ ၁ ရက်နေ့ ညနေပိုင်းတွင် ဆားလင်းကြီးမြို့နယ် မြောက်ပိုင်းရှိ ကျေးရွာများကို လေပြင်းတိုက်ခိုက်ခဲ့ပြီး စစ်ရှောင်တဲများနှင့် နေအိမ် တချို့ ပျက်စီးကာ ပြည်သူများ ထိခိုက်မှုမရှိကြောင့် သိရသည်။

"ဆာလင်းကြီးမြို့နယ် မြောက်ခြမ်းက ကျေးရွာတွေကို လေပြင်း တိုက်ခိုက်ခဲ့တာပါ။ စစ်ရှောင်တဲတွေနဲ့ ကျေးရွာထဲက နေအိမ် တချို့ ပျက်စီးမှုရှိတယ်။ ပြည်သူတွေ ထိခိုက်မှုကတော့ မကြားမိသေးဘူး" ဟု အညာပစ်တိုင်းထောင်လေးများ အဖွဲ့မှ တာဝန်ရှိသူ တစ်ဦးက ပြောဆိုသည်။

လက်ရှိချိန်တွင် လေပြင်းတိုက်ခတ်မှုကြောင့် ပျက်စီးသွားသော စစ်ရှောင်တဲများနှင့် နေအိမ်များ ပြန်လည် တည်ဆောက်ရေး အကူအညီများ လိုအပ်လျက်ရှိကြောင်း သိရသည်။

ဒီမိုကရေစီမရှိဘဲ မည်သည့် အခွင့်အရေးမျှ မရရှိနိုင်ခြင်းကြောင့် အလုပ်သမားထု အပါအဝင် ပြည်သူ တရပ်လုံး တော်လှန်ရေး အမြန်ဆုံး အဆုံးသတ် နိုင်ရေး ကြိုးပမ်း အားထုတ်ရန် NUG ယာယီသမ္မတ ဒူဝါလရှီးလ တိုက်တွန်း

■ အကြမ်းဖက် စစ်အုပ်စုက အခြေခံအလုပ်သမား အခွင့်အရေးနှင့် လူ့အခွင့်အရေး ချိုးဖောက်နေမှု များကို အရေးယူနိုင်ရေး NUG အစိုးရက လုပ်ဆောင်နေ

ရန်ကုန်၊ မေ ၁

ဒီမိုကရေစီမရှိဘဲ မည်သည့် အခွင့်အရေးမျှ မရရှိနိုင်ခြင်းကြောင့် အလုပ်သမားထု အပါအဝင် ပြည်သူ တရပ်လုံး တော်လှန်ရေး အမြန်ဆုံး အဆုံးသတ် နိုင်ရေး ကြိုးပမ်း အားထုတ်ရန် NUG ယာယီသမ္မတ ဒူဝါလရှီးလ က တိုက်တွန်း ပြောဆိုလိုက်သည်။

ယနေ့ မေလ ၁ ရက်နေ့ ကမ္ဘာ့အလုပ်သမားနေ့ (မေဒေး) တွင် ပြည်ထောင်စုသမ္မတ မြန်မာနိုင်ငံ တော်၊ အမျိုးသားညီညွတ်ရေးအစိုးရ၊ ယာယီသမ္မတ ဒူဝါလရှီးလ၏ အလုပ်သမားထုသို့ ပေးပို့သော သဝဏ်လွှာတွင် ထည့်သွင်း ပြောဆိုထားခြင်းဖြစ်သည်။

မြန်မာနိုင်ငံတွင် အာဏာရှင် ရှိနေသ၍ အလုပ်သမားများ အပါအဝင် တိုင်းရင်းသား ပြည်သူ တရပ် လုံး ကိုယ်၊ စိတ် ဒုက္ခမျိုးစုံ ဆတိုး ခံစားနေကြရမည်ဖြစ်ပြီး အာဏာရှင်စနစ်ကို အပြီးတိုင် ချေမှုန်း နိုင်မှ သာလျှင် အခြေခံအခွင့်အရေး၊ ကိုယ်ပိုင်လွတ်လပ်ခွင့်နှင့် တန်းတူညီမျှရေးကို အပြည့်အဝ ဖော် ဆောင်နိုင်မည် ဖြစ်ကြောင်း၊ ယခုနှစ် မေဒေးအတွက် ကြွေးကြော်သံ ဆောင်ပုဒ်ဖြစ်သည့် “ဖက်ဒရယ် ဒီမိုကရေစီ မရှိဘဲ အလုပ်သမား အခွင့်အရေး မရှိနိုင်” ၊ “No Federal Democracy, No Labour Rights.” ဆိုသကဲ့သို့ ဒီမိုကရေစီမရှိဘဲ မည်သည့် အခွင့်အရေးမျှ မရရှိနိုင်ခြင်းကြောင့် အလုပ်သမား ထုကြီး အပါအဝင် ပြည်သူတရပ်လုံးအနေဖြင့် တော်လှန်ရေး အမြန်ဆုံး အဆုံးသတ်နိုင်ရေးအတွက် ဆက်လက် ကြိုးပမ်းအားထုတ်ကြရန် နိုင်ငံတော်သမ္မတဒူဝါလရှီးလက လေးလေးနက်နက် တိုက် တွန်းထားသည်။

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီလ ၁ ရက်နေ့ အကြမ်းဖက်စစ်အုပ်စု၏ ဥပဒေမဲ့ အာဏာ လုယူပြီးနောက် အခြေခံအလုပ်သမားအခွင့်အရေးနှင့် လူ့အခွင့်အရေးများ ဆိုးရွားစွာ ဆုံးရှုံးလျက် ရှိကြောင်း၊ အလုပ်သမားသမဂ္ဂများ၊ အလုပ်သမားအရေး တက်ကြွ လှုပ်ရှားသူများ၏ ဦးဆောင်မှုဖြင့် မြန်မာအလုပ်သမားထုတစ်ရပ်လုံးသည် ဆုံးရှုံးနေသည့် အခြေခံအခွင့်အရေးများ ပြန်လည်ရရှိရေး အတွက်သာမက စစ်အာဏာရှင်စနစ် အမြစ်ဖြတ် ချေမှုန်းရေး၊ ဖက်ဒရယ် ဒီမိုကရေစီပြည်ထောင်စု တည် ဆောက်ရေး လှုပ်ရှားမှုများ၌ ပြည်သူတစ်ရပ်လုံးနှင့်အတူ ယနေ့နွေဦးတော်လှန်ရေးတွင် ရဲဝံ့ တက်ကြွစွာ ပူးပေါင်းပါဝင်နေကြောင်း သိရသည်။

ပြည်တွင်း၊ ပြည်ပရှိ မြန်မာအလုပ် သမားထုကြီးသည် စစ်အာဏာရှင်စနစ် အမြစ်ဖြတ်ချေမှုန်းရေး နွေဦးတော်လှန်ရေး ကြားကာလတွင်သာမက တိုင်းပြည်ပြန်လည်ထူထောင်ရေးနှင့် ဖွံ့ဖြိုးတိုးတက် သည့် အနာဂတ် ဖက်ဒရယ် ဒီမိုကရေစီပြည်ထောင်စု တည်ဆောက်ရေးကာလများအတွက်ပါ အရေး ပါသည့် အင်အားစုကြီး ဖြစ်ကြောင်း နိုင်ငံတော်ယာယီသမ္မတဒူဝါလရှီးလက ပြောဆိုသည်။

အမျိုးသားညီညွတ်ရေးအစိုးရ၊ အလုပ်သမားဝန်ကြီးဌာနအပါအဝင် သက်ဆိုင်ရာဝန်ကြီးဌာနများ ပူး ပေါင်း၍ အဆိုပါအလုပ်သမားထုကြီး၏ အခွင့်အရေးနှင့် ဥပဒေပါ ရပိုင်ခွင့်များကို အာမခံချက်ပေး နိုင်ပြီး ပိုမိုထိရောက်သည့် ကာကွယ်စောင့်ရှောက်မှုများ ပေးနိုင်ရေး၊ ကျွမ်းကျင်မှု ဖွံ့ဖြိုးတိုးတက်ရေး၊ စွမ်းဆောင်ရည် မြှင့်တင်ရေးတို့အတွက် လုပ်ငန်းမူဘောင်များ၊ ရေတို၊ ရေရှည် စီမံချက်များ ရေးဆွဲ အကောင်အထည်ဖော် ဆောင်ရွက်လျက်ရှိကြောင်း နိုင်ငံတော်ယာယီသမ္မတ ဒူဝါလရှီးလက အသိ ပေးထားသည်။

အခြေခံအလုပ်သမား အခွင့်အရေးနှင့် လူ့အခွင့်အရေးများ ချိုးဖောက်နေပြီး ပြည်သူအပေါ် အကြမ်း ဖက်မှုများ နေ့စဉ် ကျူးလွန်နေသည့် စစ်အုပ်စုကို အိုင်အယ်လ်အို၏ ဖွဲ့စည်းပုံစည်းမျဉ်း (ILO Constitution) နှင့်အညီ အမြင့်ဆုံး အရေးယူ ဆောင်ရွက်နိုင်ရေး၊ အမျိုးသားညီညွတ်ရေးအစိုးရကို အိုင်အယ်လ်အို (ILO) က တဆင့် ထောက်ခံအသိအမှတ်ပြုရေး၊ စစ်တပ်၏ အရေးကြီးသော နိုင်ငံခြား ဝင်ငွေရလမ်းများကို ပိတ်ဆို့ရေး စသည့်လုပ်ငန်းများကို အိုင်အယ်လ်အို (ILO) အပါအဝင် နိုင်ငံတ ကာ အလုပ်သမားရေးရာ အဖွဲ့အစည်းများနှင့် ပူးပေါင်းဆောင်ရွက်လျက်ရှိကြောင်း သိရသည်။

အကြမ်းဖက်စစ်တပ်သည် ၎င်း တို့၏ အားအင်ချည့်နဲ့နေမှုများကို ကုစားရန် အဓမ္မစစ်သားစုဆောင်း ရေး ဥပဒေတစ်ရပ်ကို အခွင့် အာဏာမရှိဘဲ ထုတ်ပြန်၍ တိုင်းပြည်၏ အလုပ်လုပ်ကိုင်နိုင်သည့် အ သက်အရွယ်ရှိသော အမျိုးသမီး၊ အမျိုးသား လူငယ်၊ လူရွယ်များကို ဖမ်းဆီးခြိမ်းခြောက်၍ အဓမ္မ လူ စုဆောင်းနေခြင်းကြောင့် စစ်မှု မထမ်းလိုသည့် လူငယ်လုပ်သားများသည် ပြည်တွင်းလွတ်မြောက် နယ် မြေများနှင့် ပြည်ပနိုင်ငံများသို့ ရရာနည်းဖြင့် ထွက်ပြေးတိမ်းရှောင်နေမှုများဖြစ်ပေါ်ကာ ပြည်တွင်းလုပ်အား ဆုံးရှုံးမှု၊ ပုံမှန်ဝင်ငွေ မရရှိ မှုနှင့် လူမှုစီးပွားဘဝ ထိခိုက်ခံစားကြရသည်ဟု ဆိုသည်။

အလုပ်သမားများ သာမက အကျိုးဆက်အနေဖြင့် စီးပွားရေးလုပ်ငန်းများပါ ထိခိုက်ဆုံးရှုံးနေရပြီး ပြည်သူလူထုအပေါ် အကြမ်းဖက်လုပ်ရပ်များတွင် အသုံးပြုမည့် ငွေကြေးလိုအပ်ချက်များကို ဖြည့် ဆည်းရန် ပြည်ပနိုင်ငံများတွင် ရောက်ရှိနေသည့် မြန်မာနိုင်ငံသားများ၊ ရွှေ့ပြောင်းအလုပ် သမားများ ၏ လစာဝင်ငွေမှ ဝင်ငွေခွန်အဖြစ် အဓမ္မ ဖိအားပေးအကျပ်ကိုင်၍ ကောက်ခံလျက်ရှိကြောင်း သိရ သည်။

မြန်မာနိုင်ငံတွင် အာဏာရှင်ရှိနေသ၍ အလုပ်သမားများအပါအဝင် တိုင်းရင်းသားပြည်သူ တရပ်လုံး ကိုယ်၊ စိတ် ဒုက္ခမျိုးစုံ ဆတိုး ခံစားနေကြရမည်ဖြစ်ပြီး အာဏာရှင်စနစ်ကို အပြီးတိုင် ချေမှုန်းနိုင်မှ သာလျှင် အခြေခံအခွင့်အရေး၊ ကိုယ်ပိုင်လွတ်လပ်ခွင့်နှင့် တန်းတူညီမျှရေးကို အပြည့် အဝ ဖော် ဆောင် နိုင်မည် ဖြစ်ကြောင်း၊ ထို့ကြောင့် ယခုနှစ် မေဒေးအတွက် ကြွေးကြော်သံ ဆောင်ပုဒ်ဖြစ်သည့် “ဖက်ဒရယ်ဒီမိုကရေစီ မရှိဘဲ အလုပ်သမားအခွင့်အရေး မရှိနိုင်” ၊ “No Federal Democracy, No Labour Rights.” ဆိုသကဲ့သို့ ဒီမိုကရေစီမရှိဘဲ မည်သည့်အခွင့်အရေးမျှ မရရှိနိုင်ခြင်းကြောင့် အလုပ် သမားထုကြီးအပါအဝင် ပြည်သူတရပ်လုံးအနေဖြင့် တော်လှန်ရေး အမြန်ဆုံး အဆုံးသတ် နိုင်ရန် ဆက်လက် ကြိုးပမ်းအားထုတ်စေလိုကြောင်း နိုင်ငံတော်ယာယီသမ္မတ ဒူဝါလရှိးလက လေးလေး နက်နက် ထပ်မံတိုက်တွန်းထားသည်။

ကမ္ဘာ့ကုလသမဂ္ဂ (UN) နှင့် အိုင်အယ်လ်အို (ILO) အပါအဝင် နိုင်ငံတကာ အလုပ်သမားရေးရာ အဖွဲ့ အစည်းများ၊ လူ့အခွင့်အရေး၊ အလုပ်သမားအခွင့်အရေး အလေးထားသည့် နိုင်ငံတကာအစိုးရများ အနေဖြင့်လည်း လက်တွေ့ဆန်သော ကူညီမှုနှင့် ပူးပေါင်းဆောင်ရွက်မှု များကို အမြန်ဆုံးဆောင်ရွက် ပေးရန် အမျိုးသားညီညွတ်ရေးအစိုးရက အလေးအနက် ထပ်မံ တောင်းဆိုထားသည်။

မြန်မာနိုင်ငံတွင် အခြေခံအလုပ်သမားအခွင့်အရေးနှင့် လူ့အခွင့်အရေး အပြည့်အဝရရှိရေး၊ စစ်အာ ဏာ ရှင်စနစ် အမြစ်ဖြတ်ချေမှုန်းရေးနှင့် ဖက်ဒရယ်ဒီမိုကရေစီ ပြည်ထောင်စု တည်ဆောက် ရေးအ တွက် စွန့်လွှတ်အနစ်နာခံကာ မဆုတ်မနစ် ကြံ့ကြံ့ခံ တော်လှန်နေသည့် ပြည်တွင်း၊ ပြည်ပရှိ မြန်မာ အလုပ်သမားထုကြီးအား လေးစားဂုဏ်ပြုပါကြောင်းနှင့် အလုပ်သမားသမဂ္ဂများအပါအဝင် အင်အား စု ပေါင်းစုံဖြင့် ညီညွတ်စွာ တော်လှန်ရေးအောင်ပွဲကို အမြန်ဆုံးအရယူရန် ယနေ့ကျရောက်သည့် ကမ္ဘာ့ အလုပ်သမားနေ့တွင် ထပ်လောင်း သန္နိဋ္ဌာန်ချမှတ်လိုက်ပါကြောင်း နိုင်ငံတော်ယာယီသမ္မတ ဒူဝါလရှီးလက ကတိပြုထားသည်။

ရွှေဗျိုင်းဖြူကုမ္ပဏီ ဥက္ကဋ္ဌ၏သမီး ပြင်သစ် HEC Paris ကျောင်းတွင် တက်ရောက်နေမှုအပေါ် ဝေဖန်မှုများ မြင့်တက်လာခဲ့ပြီးနောက် ကျောင်းဘက်က စုံစမ်းစစ်ဆေးမှု စတင်တော့မည်ဟုဆို

ရန်ကုန်၊ ဧပြီ ၃၀

စစ်ကောင်စီကို လေယာဉ်ဆီ ဝယ်ယူထောက်ပံ့ကူညီပေးနေတဲ့ ရွှေဗျိုင်းဖြူကုမ္ပဏီ ဥက္ကဋ္ဌရဲ့သမီးဖြစ်သူကို ပြင်သစ်မှာ နေထိုင်ခွင့်ပေးထားခြင်းအပေါ် ပြန်လည်ရုတ်သိမ်းပေးဖို့ လူ့အခွင့်အရေးအဖွဲ့တွေက ပြီးခဲ့တဲ့ရက်သတ္တပတ်တွေအတွင်းက တောင်းဆိုခဲ့ကြပါတယ်။

မြန်မာပြည်သူ ၁၈ သန်းရဲ့ ကိုယ်ရေးအချက်အလက်တွေ ပါဝင်တဲ့ တယ်လီနော မြန်မာကုမ္ပဏီကို ဝယ်ယူခဲ့တဲ့ စစ်တပ်နဲ့ အလွန်နီးစပ်တဲ့ ခရိုနီ ရွှေဗျိုင်းဖြူကုမ္ပဏီ ဥက္ကဋ္ဌ ဦးသိန်းဝင်းဇော်ရဲ့ သမီးဖြစ်သူ မသိမ့်ဝင်းထက်ကို အမြန်ဆုံး စုံစမ်းစစ်ဆေးပြီး သူ့ရဲ့ ပိုင်ဆိုင်မှုတွေ သိမ်းဆည်းဖို့နဲ့ နေထိုင်ခွင့်ဗီဇာ ပြန်လည်ရုပ်သိမ်းဖို့ ၄င်းတို့က ပြင်သစ်အစိုးရကို တောင်းဆိုခဲ့ကြတာပါ။

“သိမ့်ဝင်းထက် ဒါမှမဟုတ် သူ့မိသားစုဝင်တွေရဲ့ ပြင်သစ်နိုင်ငံထဲက ပိုင်ဆိုင်မှုတွေကို ပြင်သစ်အစိုးရအနေနဲ့ အမြန်စုံစမ်းစစ်ဆေးပြီး သိမ်းဆည်းပိတ်ပင်သင့်ပါတယ်” လို့ Justice for Myanmar (JFM) ရဲ့ ပြောရေးဆိုခွင့်ရှိသူ မရတနာမောင်ကလည်း ပြောဆိုထားပါတယ်။

ဒါ့အပြင် သူမတက်ရောက်နေတဲ့ ပြင်သစ်နိုင်ငံက HEC Paris ကျောင်းအနေနဲ့ သူမရဲ့ ကျောင်းတက်ရောက်ခွင့်ကို ပြန်လည်ရုပ်သိမ်းပေးဖို့နဲ့ သူမရဲ့ ငွေကြေးအရင်းအမြစ်တွေကို ပြင်သစ်အာဏာပိုင်တွေဆီ အသိပေးဖို့လည်း JFM က တိုက်တွန်းထားပါသေးတယ်။

"HEC အနေနဲ့ မသိမ့်ဝင်းထက်ကို ပညာသင်ကြားပေးခြင်း၊ ကျောင်းအသိုင်းအဝိုင်းမှာ ဝင်ဆန့်ခွင့်ပေးခြင်းဖြင့် HEC ကျောင်း၊ ကျောင်းစီမံအုပ်ချုပ်ရေးအဖွဲ့၊ ဒါရိုက်တာဘုတ်အဖွဲ့ဝင်များနဲ့ ရှယ်ယာရှင်များအနေနဲ့ အသက်ညှာဆုံး ပြောရရင် ကျောင်းဝင်ခွင့် လုပ်ငန်းစဉ်မှာ စိစစ်ဆောင်ရွက်မှု ပြောင်ပြောင်တင်းတင်း ကင်းမဲ့နေတာကို ပြသနေတာဖြစ်ပြီး၊ အဆိုးဆုံးအနေနဲ့ကတော့ လွတ်လပ်ဖို့အတွက် မြန်မာပြည်သူတွေရဲ့ ရုန်းကန်နေမှု အပေါ် မထီမဲ့မြင်ပြုလိုက်တာ ဖြစ်ပါတယ်” လို့ Info Birmanie ရဲ့ ညှိနှိုင်းရေးမှူး Johanna Chardonnieras က ပြောပါတယ်။

ပြီးခဲ့တဲ့ ၅ နှစ်အတွင်း ပြင်သစ်က စီးပွားရေးကျောင်းတွေမှာ နိုင်ငံခြားကျောင်းသားဦးရေ ၈၀ ရာခိုင်နှုန်း တိုးလာပြီး အဆင့်မြင့်ကဏ္ဍမှာ အများဆုံးဖြစ်ပါတယ်။ နိုင်ငံခြားသား စုစုပေါင်း ၄ သိန်းခန့်ကနေပြီး တနှစ်ကို ယူရို ၁.၃၅ ဘီလီယံအထိ ဝင်ငွေရရှိနေတာ ဖြစ်တယ်လို့ Campus France ရဲ့ ၂၀၂၂ နိုဝင်ဘာလက လေ့လာမှုတခုမှာ ဖော်ပြထားပါတယ်။

အဆိုပါ ကျောင်းတွေဟာ ၎င်းတို့ဝင်ငွေရရှိမှုရဲ့ အဓိက ဇာတ်မြစ်ကို စုံစမ်းစစ်ဆေးလေ့ မရှိကြောင်း Spanish University of Valencia ရဲ့ နိုင်ငံရေးသိပ္ပံပါမောက္ခ Clara Portela က မှတ်ချက်ပြုထားပါတယ်။

ကမ္ဘာ့ထိပ်တန်း စီးပွားရေးကျောင်းတွေထဲက တခုဖြစ်တဲ့ HEC Paris အနေနဲ့ သူမ (မသိမ့်ဝင်းထက်) အပေါ် ထပ်လောင်း စီစစ်အတည်ပြုတာမျိုး မရှိဘဲ လက်ခံကြိုဆိုခဲ့ပါတယ်။ အဆိုပါကျောင်းရဲ့ ၂၀၂၃ နွေရာသီ မဟာတန်းအတွက် ၂ နှစ် ကုန်ကျစရိတ်ဟာ ယူရို ၅၃,၂၀၀ (မြန်မာကျပ်ငွေ သိန်း ၂,၀၀၀ ကျော်ဝန်းကျင်) အထိ ကုန်ကျနိုင်တာ ဖြစ်ပါတယ်။

HEC ကတော့ “ကျောင်းသားတွေကို ရွေးချယ်တဲ့နေရာမှာ သူတို့ရဲ့ ပညာရေး ထူးချွန်မှုအပေါ် အခြေခံပါတယ်။ သူတို့အနေနဲ့ ဘဏ်တွေရဲ့ တာဝန်ယူမှု အခန်းကဏ္ဍကို ဦးစားပေးသလို၊ ငွေကြေးခဝါချမှုနဲ့ အကြမ်းဖက်ထောက်ပံ့မှု တိုက်ဖျက်ရေးဟာ ဘဏ်လုပ်ငန်းကဏ္ဍမှာရှိတဲ့ ကုမ္ပဏီတွေအပေါ်မှာ အများကြီး မူတည်နေပါတယ်” လို့ ဆိုခဲ့ပါတယ်။

ဒါပေမယ့် ကျင့်ဝတ်ဆိုင်ရာ ကတိကဝတ်တွေအပေါ် အလေးအနက်ထား ဆောင်ရွက်လေ့ရှိတဲ့ ကျောင်းတစိခုအနေနဲ့ ရှေ့နေတဦးနဲ့ စုံစမ်းစစ်ဆေးမှုကို စတင်ခဲ့တယ်လို့ ဆိုပါတယ်။ ဒါပေမယ့် ဒီစုံစမ်းစစ်ဆေးမှုနဲ့ ပတ်သက်ပြီး HEC ကို ဆက်သွယ်မေးမြန်းရာမှာတော့ ပြန်လည်တုံ့ပြန်ခဲ့ခြင်း မရှိပါဘူး။

“ရယ်စရာကောင်းနေတာက HEC လိုမျိုး (လူ့အခွင့်အရေးနဲ့ လွတ်လပ်ခွင့်ဆိုင်ရာ အန္တရာယ်တွေကို ကြိုတင်ပြင်ဆင် တားဆီးရေး အစီအမံတွေ လုပ်ဆောင်ရတဲ့) စည်းမျဉ်းစည်းကမ်းတွေကို သင်ကြားပို့ချနေရတဲ့ စီမံခန့်ခွဲရေးဆိုင်ရာ ကျောင်းကြီးတကျောင်းက လက်တွေ့မှာ အဲဒီနယ်ပယ်အတွက် မူဝါဒ မရှိနေတာပါပဲ” လို့ ရှေ့နေတဦးဖြစ်တဲ့ William Bourdon က ဆိုပါတယ်။

ပြင်သစ်နိုင်ငံခြားရေးဝန်ကြီးဌာနက “ဒဏ်ခတ်ပိတ်ဆို့ခံနေရတဲ့ ဒါမှမဟုတ် ပဋိပက္ခဖြစ်နေတဲ့ နိုင်ငံတွေက နိုင်ငံသားတွေအနေနဲ့ ကျောင်းသား ဗီဇာလျှောက်ထားရာမှာ သီးခြားကွဲပြားနေတဲ့ အစီအမံမျိုး မရှိပေမယ့်၊ ဥရောပ ဒါမှမဟုတ် နိုင်ငံတကာ အရေးယူပိတ်ဆို့မှုတွေ ရှိနေရင်တော့ ဗီဇာမထုတ်ပေးပါဘူး” လို့ ဆိုထားပြီး “အရေးယူပိတ်ဆို့မှု အသက်မဝင်သေးရင်တော့ ဒီစည်းမျဉ်းကို ထုတ်သုံးလို့ရမှာမဟုတ်ဘူး” လို့လည်း ဆိုထားပါတယ်။

သိမ့်ဝင်းထက်ရဲ့ ကျောင်းသားဗီဇာကို ၂၀၂၃ ဇူလိုင်လ ၁၈ ရက်မှာ ထုတ်ပေးထားတာဖြစ်ပြီး၊ အဲဒီအချိန်ကတော့ လုံခြုံ‌ရေးစစ်ဆေးမှုတွေမှာ တစုံတရာ ထူးခြားဖော်ပြတာမျိုး မရှိခဲ့ဘူး လို့လည်း သိရပါတယ်။

သိမ့်ဝင်းထက်အနေနဲ့ HEC မှာ ဆုံးခန်းတိုင် တက်ရောက်နိုင်ရေး အနည်းဆုံး ၂၀၂၅ နှစ်ကုန်အထိ နေထိုင်ခွင့်ရဖို့ လိုအပ်တာဖြစ်တာကြောင့် နောက်တကြိမ် ဩဂုတ်လ ဗီဇာသက်တမ်းတိုးချိန်မှာ သူမအနေနဲ့ နေထိုင်ခွင့် ဆက်လက်ရရှိရေး ရုန်းကန်ရနိုင်တယ်လို့လည်း သိရပါတယ်။
Ref: Le Monde news

ဆားလင်းကြီးမြို့နယ်ရှိ ရက်ရှည်စစ်ရှောင်စခန်း ၄ နေရာကို ထမင်းနှစ်နပ် လှူဒါန်း

ရန်ကုန်၊ မေ ၁

စစ်ကိုင်းတိုင်း ဆားလင်းကြီးမြို့နယ်ရှိ ရက်ရှည်စစ်ရှောင်စခန်း ၄ နေရာကို အညာပစ်တိုင်းထောင်လေးများအဖွဲ့က အလှူရှင်များကိုယ်စား ထမင်းနှင့်ဟင်းများ လှူဒါန်းခဲ့ကြောင်း သိရှိရသည်။

မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၁၄ ဦးသေဆုံး

ရန်ကုန်၊ မေ ၁

မြန်မာနိုင်ငံတစ်ဝန်း မေလ ၁ ရက်နေ့ ရရှိထားသော အချက်အလက် များအရ စစ်ကောင်စီတပ်ဖွဲ့ဝင် ၁၄ ဦးသေဆုံးကြောင်း ပြည်သူ့ကာ ကွယ်ရေး တပ်ဖွဲ့များ၏ ထုတ်ပြန်ချက်နှင့်ပြောဆိုချက် များ အရ သိရှိရသည်။

ရန်ကုန်ခေတ်သစ်အနေဖြင့် နေ့စဉ် စစ်သား သေဆုံးမှု စာရင်းများကို ထုတ်ပြန် ရာတွင် ဒေသကာကွယ်ရေးတပ်ဖွဲ့များ၏ ထုတ်ပြန်ချက်များနှင့် ပြောဆိုချက် များကို စုစည်းဖော် ပြရခြင်းဖြစ်ပြီး မြေပြင် အခြေအနေတွင် အမှန်တကယ် စစ်သားများ သေဆုံးမှု ရှိ၊ မရှိ ကွင်းဆင်း အတည်ပြုနိုင်ခြင်း မရှိသည်ကို သိစေအပ်ပါသည်။