قد لا يحتاج الإنسان إلى شيطانه ليضل، لأنه ضال بنفسه فلا يؤثر فيه تكبيل شيطانه في رمضان.

" قالَ قَرينُهُ رَبَّنا ما أَطغَيتُهُ
وَلكِن كانَ في ضَلالٍ بَعيدٍ "

• الشيخ عبدالعزيز الطريفي.

إن شاء الله تكون خلصت الجزء الثامن
النهاردة، فـ هتكون عديت على سورة
الأعراف، وعديت على الاية دي:
" وبينهما حجاب وعلى الأعراف
رجال يعرفون كلا بسيماهم ".

فـ اي هيا الأعراف ؟
ومين هما الرجال اللي عليها ؟

من الآية " وبينهما حجاب "
يقصد أن الجنة والنار بينهم حجاب
أو سور زي م ربنا قال في سورة
الحديد " وضُرب بينهما بسور "
فـ الاعراف هو المكان اللي
بين الجنة والنار،
وكلمة عُرف في اللغة يعني المكان العالي،
فـ الأعراف مكان عالي بين الجنة والنار،
واللي واقف عليه لو بص يمين أو شمال هيشوف أهل الجنه أو أهل النار.

" وعلى الأعراف رجال "
الأعراف دي واقف عليها ناس،
ورجال هنا مش معناها إنهم
رجال وليس نساء، لأ!
رجال يعني ناس واقفه على رجليها.

طيب مين الناس دي ؟
قال ابن مسعود في التفسير:
هم قوم تساوت حسانتهم مع سيائتهم. يعني حسناتهم قد سيائتهم، فـ لاهما
دخلوا الجنة بسبب حسناتهم
ولا دخلوا النار بسبب سيائتهم،
فـ هما واقفين ع الأعراف مستنيين
ربنا يحكم بينهم.

وشوف بلاغة القرآن وهو بيوصف
حالهم وهما واقفين وشايفين
أهل النار وأهل الجنة،
" وإذا صرفت أبصارهم تلقاء أصحاب
النار قالوا ربنا لا تجعلنا مع القوم الظالمين"
شايفين العذاب والجحيم فـ علشان
كدا بيستعيذوا من النار.

" ونادوا أصحاب الجنة أن سلام
عليكم لم يدخلوها وهم يطمعون "
الناحية التانيه بقى لما يبصوا لأهل الجنة يقولولهم سلام عليكم، مع إنهم مادخلوش الجنة بس بيطمعوا إنهم يدخلوها،
وواقفين يكلموا أهل النار ويقولوهم
" ما أغنى عنكم جمعكم وما كنتم تستكبرون "

طب الناس اللي ع الأعراف دي
مصيرها اي وهل هيدخلوا الجنة
ولا النار!
في قول لـ ابن مسعود:
إذا كان الله يُدخل المذنبين من المسلمين
النار، يعذبهم ثم يخرجهم ويدخلوا الجنة بعدها، فمن الأولى إنه يُدخل من تساوت سيائته مع حسناته الجنة برحمته.
وقيل: أنهم آخر أهل الجنة دخولاً
ممن لم يدخل النار.

والعجيب إنك مش هتلاقي فـ القرآن
سورة بـ اسم الجنة أو النار،
لكن هتلاقي سورة بـ اسم المكان
اللي بينهم ( الأعراف ).

المؤمن المُوحد بالله
مصيره إلى الجنة بإذن الله،
قد يُعذب ببعض ذنوبه، وقد يعفو الله عنه
ودي حاجه في مشيئة الله.

فـ كون أصحاب الأعراف يعذبوا أو لا
فـ هذا إلى الله، قد يعفوا الله عنهم
برحمته ويدخلهم الجنة من أول وهلة،
وقد يدخلوا النار ( ليسوا مُخلدين فيها )
بسيئاتهم التي لم يتوبوا منها،
فهم في مشيئة الله.

فـ أصحاب الأعراف دول مسلمين
موحدين بالله، مصريهم إلى الجنة
بإذن الله.

وليس للإنسان من بعد الأجل،
إلا الذي قدَّمه مِن عمل،
فبادر التوبة في إمكانها،
قبل أن تُصد عن إتيانها.

في الجزء السادس اللي بإذن الله
تكون قرأته، هتكون عديت ع الآية دي
" لا يحب الله الجهر بالسوء من القول
إلا من ظُلم وكان الله سميعًا عليما "

الآية دي هي أول آية فـ الجزء السادس وممكن تستغرب مكانها لأن المولى سبحانه وتعالى قبلها وبعدها بيتكلم عن المنافقين وأهل الكتاب وبيبين قد اي هما مخادعين،
وفـ النص جات الآية دي!

والحقيقه إن الآية مكانها مناسب جدّا وهتعرف ليه ف الاخر،
الآية بتقول: لا يحب الجهر بالسوء،
والجهر هو العلن، وإن الشخص يجهر بالسوء يعني يعمله في العلن سواء
كان السوء كلام أو فعل،
والكلام مثلًا زي الألفاظ والشتائم
اللي بقت أسهل حاجه الأيام دي،
أو إن الواحد يبدأ يذكر عيوب
الناس في العلن ويفضحهم،
والسوء اللي بيتعمل في العلن أكبر
وأشد ذنبًا من اللي اتعمل فـ السر،
لأن اللي اتعمل ف العلن دا مش هيضر
اللي عمله بس لأ دا هيضر اللي حواليه وهيخلي غيره يقلده،
وعشان كدا سيدنا محمد ﷺ قال:
" كل أمتي معافى إلا المجاهرون "

هيجي ف بالك سؤال الوقتي وتقول:
افرض إن في حد المفروض نقول عيوبه
علشان نحذّر الناس منه!
كمل الآية: " إلا من ظُلم "
ودا تصريح من ربنا إن اللي اتظلم
يجهر بالسوء ويقول ع اللي ظلمه.

والآية هنا مكانها مناسب زي ماقلتلك فوق علشان ربنا في سياق الآيات دي ذكر عيوب أهل الكتاب والمنافقين،
فـ محدش ياخدها حجه ويقول
م هو ربنا بيجهر بالسوء بتاعهم!!.

تـراويـح ١٠ رمـضـان ١٤٤٧هـ

في الجزء التاسع اللي انت قرأته بإذن الله
هتكون قرأت سورة الأنفال، وأول آية فيها:
" يسألونك عن الأنفال قل الأنفال لله والرسول "

• فـ اي هيا الأنفال!
الأنفال هي غنائم ومكاسب الحرب اللي بيحصل عليها المسلمون من أموال الكفار.

• ليه سُميت بالأنفال!
لأن الله نفّلها، أي أعطاها وزادها
تفضلًا منه لهذة الأمة.

• هل الغنائم دي كانت حلال قبل كدا للمسلمين! لأ، كانت مُحرمة،
أحلّها ربنا سبحانه وتعالى خصيصًا
لأمة سيدنا محمد ﷺ تفضلاً منه.
قال النبي ﷺ: أُعطيتُ خمسًا
لم يُعطَهُن أحدُ قبلي، منها:
أُحِلَّتْ لي الغنائم، ولم تحلَّ لنبيٍّ كان قبلي.

• امتى نزلت الآية دي !
نزلت فـ السنة الثانية للهجرة، بعد غزوة بدر، أولى المعارك بين الإسلام والكفر.

• سبب نزولها !
حصل خلاف بين المسلمين في كيفية تقسيم الغنائم، فنزلت الآيات لتأمرهم بتقوى الله، وإصلاح ذات بينهم،
وطاعة الرسول.

• طب الغنائم دي بتكون لمين !
قدام في نص السورة ه‍تلاقي الجواب،
قال الله سبحانه وتعالى:
" واعلموا أنما غنمتُم من شئ فأنّ للهِ
خُمُسَهُ وللرسول ولذى القُربى واليتـٰمى
والمسـٰكين وابن السبيل ".

‏يا محسنًا إلينا قبل أن نطلب،
أتيناك بظنٍ جميل و نحن نطلب،
فبإنعامك المُتقدم نتوسل إليك.

إن شاء الله تكون خلصت الجزء الثالث عشر النهاردة، فـ هتكون خلصت سورة يوسف، فـ خليني أكلمك عنها شويه،
وليه هيا أحسن القصص!

سيدنا يوسف، هو يوسف بن يعقوب.
اتولد في العراق، وهو فـ الطريق راجع
من العراق لفلسطين ماتت أمه أثناء الرحله وهو لسه صغير، كبر في فلسطين،
ونُقل كبِضاعه مُباعه،
وعاش ومات في مصر.

سورة يوسف
نزلت في سنة 10 من الرسالة، عام الحزن.
وهي السورة الوحيدة في القرآن الكريم،
التي تقص قصة كاملة بكل لقطاتها،
علشان كدا ربنا قال " أحسنَ القَصَص"
فهي تبدأ بحلم، وتنتهي بتفسير هذا الحلم،

ومن العجيب أن قميص سيدنا يوسف استُخدم كأداة براءة لإخوته،
فدل على خيانتهم.
ثم استُخدم كأداة براءة بعد ذلك
لسدينا يوسف مع إمرأة العزيز، فبرَّأه.
ثم استخدم للبشارة،
فأعاد الله تعالى به بصر والده يعقوب.

معاني القصة متجسِّدة،
وكأنك تراها بالصوت والصورة،
وهي من أجمل القصص اللي ممكن تقرأها ومن أبدع ما تتأثر به، لكنها لم تأتي
في القرآن الكريم لمجرد رواية القصص،
جاء هدفها في آخر سطر من السورة وهو:
إنَّهُ مَن يتَّقِ ويَصبر
فإنَّ اللهَ لا يُضيعُ أجرَ المُحسِنين.

فـ محور القصة الأساسي هو:
ثق في تدبير الله، اصبر، لا تيأَس.

لو تلاحظ السورة ماشية بوتيرة عجيبة،
بدايتها أن الشيء الجميل
ممكن تكون نهايته سيئة،
وأن الشئ السئ ممكن تكون نهايته جميله.
فـ سيدنا يوسف أبوه يحبه، ودي حاجه جميلة، فتكون نتيجة الحب دا أن يُلقى
في غيابات الجُب، ودي حاجه فظيعه،
وحاجه فظيعه أن يكون سيدنا يوسف
خادم صغير في بيت عزيز مصر،
فـ تكون نتيجته أن يُكرَم في بيت العزيز!
ودي حاجه جميله،
ومن بعد هذة الروعة تكون نهايته
أن يدخل سيدنا يوسف السجن!
ثم إن دخول السجن شيء بشع،
فتكون نتيجته أن يُصبح
سيدنا يوسف عزيز مصر!

الهدف من ذلك:
تعلم أن تسيير الكون شيء
فوق مستوى إدراكك،
فلا تشغل نفسك به، ودعه لخالقه
يسيِّره كما يشاء، وفق عِلمه وحِكمته.
فإذا رأيت أحداثًا تُصيبُ بالإحباط
ولم تفهم الحكمة منها، فلا تيأس
ولا تتذمَّر، بل ثِق في تدبير الله،
فهو مالك هذا المُلك وهو خير
مُدبِّر للأمور.

سورة يوسف هي أكثر السور
اللي اتكلمت عن اليأس.
قال الله تعالى:
• فلمَّا استَيأسوا منهُ خَلَصوا نَجِيّا.
• ولا تيأسوا مِن رَوحِ الله إنَّهُ لا ييأسُ
مِن رَوحِ الله إلا القومُ الكافِرون.
• حتى إذا استيأس الرسلُ وظَنُّوا
أنَّهُم قد كُذِبوا جاءَهُم نَصرُنا.
وكأن السورة بتقولك
أن الله قادر على كل شئ، فلِمَ اليأس؟

سيدنا يوسف رغم كل ظروفه الصعبة،
لم ييأس ولم يفقد الرجاء، قصة سيدنا يوسف، قصة نجاح في الدنيا والآخرة.
• في الدنيا:
حين استطاع بفضل الله ثم بحكمته
في التعامل مع الملِك، أن يُصبح عزيز مصر.
• في الآخرة: حين تصدَّى لامرأة العزيز
ورفض الفاحشة ونجح.

نزلت سورة يوسف في عام الحزن
على رسول الله ﷺ، في أشد أوقات
الضيق بوفاة زوجته السيدة خديجة،
وعمه أبو طالب.
سورة يوسف كما قال العلماء:
" ما قرأها محزون إلا سُرِّي عنه "

تولى الله أمر سيدنا يوسف،
• فـ أحوج القافلة في الصحراء للماء،
" ليخرجه من غيابات الجُب "
• ثم أحوج عزيز مصر للأولاد " ليتبناه"
• ثم أحوج الملك لتفسير الرؤيا،
" ليخرجه من السجن "
• ثم أحوج مصر كلها للطعام،
" ليصبح عزيز مصر ".

فوِّض أمرك لله.

فيه سلسلة للشيخ علاء حامد
اسمها " تعلمت من يوسف عليه السلام "
كويسه حاولوا تسمعوها.

من أهم فوائد غض البصر
أنه راحة للقلب من التعلق
بما لا سبيل للوصول إليه.

ودخل جنَّته وهو ظالمُ لِنفسه
قال مما أَظُنُّ أَن تبِیدَ هـذه أبدًا.
اي النتيجة ؟
وأُحِیطَ بِثَمَرِهِ فأصبح یُقلِّبُ كفَّیهِ على
ما أنفق فيها وهى خاوية على عروشِها
ويقولُ یلیتَنِی لم أُشرك بِرَبِّی أحدًا.

قال إنما أوتِیتُه على عِلم عِندى.
اي النتيجة ؟
فخسفنَا بِه وبِدارِه الأرض.

دائما استشعروا منة الله عليكم
وتوفيقه لكم في كُل أعمالكم
صغيرها وكبيرها.

كام واحد أصح منك ورغم دا هوا مُضيِّع للصلوات، وانت بتوفيق الله لك مُحافظ.
كام واحد أغنى منك ورغم دا لا يتصدق من ماله،
وانت بتوفيق الله لك بتخرج من مالك.
حتى الذنب اللي انت ابتعدت عنه،
بتوفيق الله وإعانته لك.
كل خير بتعمله وكل طاعة بتفعلها،
مش بشطارتك ولا علشان انت كويس،
دا محض توفيق من ربنا ليك.

عبادة " إستشعار منة الله عليك "
هتخليك دائما مُفتقر لله عز وجل.
وهتجنبك إنك تُرائي بعملك،
وتعجب بنفسك.

" ولا تكونوا كالذين نسوا الله
فأنساهم أنفسهم "

• ممكن يجيلك سؤال
ازاي ممكن الإنسان ينسى نفسه ؟
وبيبقى قدامك الناس اللي بعيدين عن الله،
حياتهم كلها رفاهية، ومش ناسيين نفسهم ولا حاجه!

المقصد من الآية نسيانهم للعبادة وللطاعة
فهو مابيعملش أي حاجه تفيده لأخرته
اللي هي الحياة الازلية الحقيقية
وإن كل اللي فيه دا متاع مؤقت لا أكثر،
فلما نسي الله، ربنا أنساه إنه يعمل الطاعه اللي هتنجده ف الاخرة، فهو لا بيصلي
ولا بيعمل أي حسنه تفيده في أخرته،
ودا قول الله تعالى: " فلما نسوا ما ذُكروا به فتحنا عليهم أبواب كل شئ "
يعني أعطيانهم كل حاجه حلوة في الدنيا!
كمل الآية
" حتى إذا فرحوا بما آوتوا
أخذنهم بغتة فإذا هم مبلسون "

اللهم آنِس وحشتَنا،
وارحم في هذه الدنيا غُربتَنا،
وفرِّج عن عبادك المكروبين،
وقِنا مصارعَ السوء.

قال ﷺ: " ادعوا الله وأنتم موقنون بالإجابة واعلموا أن الله لا يقبل دعاءً
من قلبٍ غافلٍ لاهٍ "

ـ إبراهيم أحمد، رحمه الله وغفر له.

كان رسول الله ﷺ إذا دخلَ العشرُ،
أحيَا الليلَ، وأيقظَ أهلهُ، وجدَّ وشدَّ المِئزرَ.

• أم المؤمنين عائشة رضي الله عنها.

في سورة سبأ،
يضرب المولى عز وجل أكبر مثال
عن بطران النعمة، وعدم الشكر والرضا.

كان أهل سبأ ربنا مسهل عليهم كل حاجه
والمدن بتاعتهم كلها جنب بعضها
( وجعلنا بينهم وبين القرى التي باركنا
فيها قرى ظاهرة ) وفيها كل الخيرات
اللي بيحتاجوها، يرضوا ويشكروا ؟
لأ أعرضوا عن الشكر،
وكفروا بنِعَم الله عليهم، ودعوا ربنا
فـ قالوا: " ربنا باعد بين أسفارنا "

يعني ربنا مسهل عليهم كل حاجه
وكل حاجه قريبه منهم،
لكن هما عايزين اللي يتعبهم !
فشوف بقى ربنا رد عليهم بـ اي:
" وظلموا أنفسهم فجعلناهم
أحاديث ومزقناهم كل ممزق "
فـ بعث عليهم سيول وهدم عليهم بيوتهم وبعد م كانت قريبة من بعضها تفرقت وبعُدت، لأنهم ظلموا أنفسهم بذنوبهم وبنكران نِعم الله عليهم.

ولو بصيت هتلاقي دا اللي بيحصل حوالينا فـ الواقع الوقتي، رغم نِعم الله على عبادة، إلا أن القليل منهم هم الشاكرون.

علشان كدا ربنا قال في أخر الآية:
" إن في ذلك لآيات لكل صبار شكور "

اصبر واشكر.

تهجد ليلة ٢٣ رمضان ١٤٤٧هـ
الجامع الأزهر.
الشيخ رضا السويفي.
رواية ابن وردان عن أبي جعفر.

رمضان مهلًا.

تواشيح فجر اليوم 🤍🤍