بسم الله،
بما أن لكل بداية نهاية، أعتقد خدت حبة حلوين في التفكير في الموضوع ده، وبصراحة حزين وأنا بقولكم إن مسابقة القرآن الماضية هي آخر مسابقة قرآن بالنسبة لنا هنا في خاطرة إلا أن يشاء الله إنه يكون فيه مسابقة تانية.

على مدار ٤ سنين عملنا ٥ مسابقات وبجد بجد اتعرفنا على ناس اللهم بارك محترمين جدًا -ولا عَجَب لأننا متعرفين عليهم في مسابقة قرآن- منهم حد تعرفت عليه في المسابقة هنا ودلوقتي من أقرب أصدقائي على أرض الواقع، عارفين يا ولاد؟ أوقات وأنا بتعامل مع بعضكم بقول في سري: يارب عيالي يطلعوا زيك.

كل مسابقة كنا بنحاول نعمل حاجة جديدة أو مختلفة والهدف كان إن المسابقة تبقى سهلة وتحقق أكبر فائدة بحيث إن الناس تتشجع وتحفظ وتتعلم تجويد، وأكبر عدد ياخد جوائز.

وبالنسبة للأصدقاء اللي لم يحالفهم الحظ في الجوائز: فمحدش يزعل يا ولاد بجد لو نقدر كنت أعطينا الكل جوائز.. والأهم من جوائز الدنيا هي جوائز الآخرة هناك، شوف كده أنت عدت السورة كم مرة وأنت بتحفظ وبعد كده ذاكرت تفسيرها، كل ده عند ربنا أجره كبيييير.

وأكتر رسالة كانت بتسعدني على المستوى الشخصي يعني لما حد يبعتلنا يقول أنا حفظت سورة كذه بسببكم، أو أنا تعلمت تجويد معكم أو أول مرة أذاكر تفسير سورة كذه.

وحابب أشكر زميلتنا المسؤولة عن تسميع البنات واللي تقريبًا كله كان بيثني عليها وعلى طريقتها وأنها متعاونة جدًا وحابب أشكر رجال الظل اللي كانوا بينشروا لينا الله يجزيكم جميعًا عنا خيرًا.

وأخيرًا حابب أشكر أي حد شارك في مسابقة من المسابقات بتاعتنا كنتم بتشجعونا إننا نفضل مكملين كل سنة.

ودي يا ولاد الاختبارات اللي كنا عملناها لو حد حابب يبقى يقتبس منها أو حتى مشاركش وقت المسابقة وحابب يختبر نفسه في أي وقت:
اختبار سورة يوسف
اختبار سورة النور
اختبار سورة الحج

وأي حد ناوي يعمل مسابقة قرآن يبعتلنا عشان ندعمه بالنشر ونساعده إن شاء الله لو احتاج مساعدة.

وآخر شيء بقا هطلب منكم طلب صغيور كنت حابب أي حد شارك في أي مسابقة يقولنا الفيدباك بتاعه هحتفظ بيهم لنفسي (متكسلوش بالله).
@khatera02_bot

حاولنا نسيب أثر طيب ويارب نكون قدرنا نعمل ده، سعدنا بيكم جدًا ❤️.
وأرجو تسامحونا لو حصل منا أي تقصير.
والسلام عليكم ورحمة الله وبركاته.

ده صوت صرصور الليل اللي عندي في البوت حبيت أسمعه ليكم عشان لو حد مش عارفه 😁

أكثِروا من الصلاة على النبي ﷺ.
لا تنسَوْا سورة الكهف يا رِفاق 💚.
ولا تنسَوْا إخواننا في فلسطين والسودان من دعائكم، دثروهم بدعائكم.
ومتنسوش كمان زمايلنا اللي توفاهم الله.

أول مرة أتأثر بالحديث ده كدة، في الأول كنت بعديه عادي وأول مرة أحسه دلوقتي
يعني الرسول ﷺ كان مهموم وفضل يمشي ٥٣ كيلو مش حاسس بيهم من كتر الهم، أنا مقدرتش المسافة غير لما سألت بابا قالي زي من بيتنا للكلية رايح جاي، لو مواصلات هتاخد ساعتين تقريبا، اللي هو مهما كان حد فينا شايل هم مش هيخليه ياخد الساعتين مش حاسس بيهم، ما بالك لو مشي؟!

لازم نفهم قد إيه الرسالة اللى وصلتنا غالية، وقد إيه النبي ﷺ تعب وواجه هموم وصعوبات في سبيلها، وييجي واحد دلوقتي يسب الدين وينطق بالكفر كدة وهو قاعد ويمشي حاله.

منقول

قصة أذكرها عن عمر بن عبدالعزيز
الشيخ عبدالله العسكر
#مقطع_دعوي

فَلَمْ أُلْفِ حُجَّابًا وَلَمْ أَخْشَ مَنْعَةً
وَإِنْ كَانَ سُؤْلِي فَوْقَ هَامِ الكَوَاكِبِ

الشيخ سعيد الكملي

ملحوظة: نزل ستوري قبل كده ولكن هننزلها تاني عشان لو حد عايز المقطع 😊

أكثِروا من الصلاة على النبي ﷺ.
لا تنسَوْا سورة الكهف يا رِفاق 💚.
ولا تنسَوْا إخواننا في فلسطين والسودان من دعائكم، دثروهم بدعائكم.
ومتنسوش كمان زمايلنا اللي توفاهم الله.

«لقد تجاوزنا الألف ميل، لن تهزمنا الخطوة المتبقية»
الصورة دي أنا صورتها من سنة بالضبط وهو ده اللي احنا محتاجينه دلوقتي..

الله يوفقنا جميعًا ويكتب لنا الخير ويعيننا نخلص الفترة دي على خير

قصة عبدالله بن حرام الأنصاري

الشيخ عبدالله العسكر

أكثِروا من الصلاة على النبي ﷺ.
لا تنسَوْا سورة الكهف يا رِفاق 💚.
ولا تنسَوْا إخواننا في فلسطين والسودان من دعائكم، دثروهم بدعائكم.
ومتنسوش كمان زمايلنا اللي توفاهم الله.

ييزعلني لما أشوف مَن يُكتَشَفْ أمره في الغش، فيُتَخذ في حقه إجراء دنيوي مخزٍ، ويحرم من الامتحان، وهذا مجرد خزي دنيوي، فكيف بما هو أعظم عند الله؟

الإنسان يرتقي بنفسه عن مواضع الضعف، فيجعل بينه وبين الحرام حاجزًا من تقوى الله ومراقبته؛ فيستحي أن يراه الله في موضع لا يرضاه.

والغش حرام شرعًا، وخيانة للأمانة التي استرعاك الله إياها، قال النبي -ﷺ-: «من غشنا فليس منا».

والله، الغش يجرح الحياء يا شباب، ويسود الوجه ويسقط بركة العلم وأثره، ولا أكرم للعبد من أن يحفظ نفسه بالتقوى، ويصونها عن مواطن الذل والريبة.

فحق الحياء من الله، أن تختار ما يقربك إليه ولو خالف هوى النفس، وما عند الله خيرٌ وأبقى.

كف عن قول: ليتني فعلت هذا!
كف عن جلد ذاتك، ما فات قد فات وقدر الله قد نفذ، خذ من البلاء ما يرفعك درجة ويعلمك حكمة ويهذب قلبك العصي.
وإن أصعب ما يمُر على الإنسانِ أن يجلد ذاته على فرصٍ ليس له من الأمر شيء فيها، وليس لبصيرته أن ترى غير المقدور عليها لتتجنبه!
وأكثر ما يخفف عنه؛ أن ما فاته لم يكن له، وأن قدر الله النافذ رفعة له، وأن الأمر كله لله، وما عنده خير وأبقى.

من الملفت للنظر في الامتحانات ديه إن فيه نظري بعدين ٣ أيام امتحان كمان فالدنيا كلها بتزهق منك
يعني لو قولت لحد يدعيلك في النظري وكان قلقان عليك ومستنيك تخرج من الامتحان غالبًا الشخص ده لو مش أمك هيكون زهق منك دلوقتي لإن امتحاناتك كترت فعلًا
وهنا مش هتكلم عن إن الأمهات كائنات استثنائية لا فيه حاجة أعمق من كده بكتير

عن عمرَ بنِ الخطاب رضي الله عنه قَالَ: قَدِمَ رسُولُ اللَّهِ ﷺ بِسَبْيٍ، فَإِذَا امْرَأَةٌ مِنَ السَّبْي تَسْعَى، إِذْ وَجَدَتْ صَبِيًّا في السَّبْي أَخَذَتْهُ فَأَلْزَقَتْهُ بِبَطْنِها، فَأَرْضَعَتْهُ، فَقَالَ رسُولُ اللَّه ﷺ: أَتُرَوْنَ هَذِهِ المَرْأَةَ طارِحَةً وَلَدَهَا في النَّارِ؟ قُلْنَا: لا وَاللَّهِ، فَقَالَ: للَّهُ أَرْحَمُ بِعِبادِهِ مِنْ هَذِهِ بِوَلَدِهَا متفقٌ عليه.

ربنا مش بيزهق منك ولا من شكوتك ولا من دعاءك ممكن تروحله في أي وقت وأي مكان وأي زمان
ورحمته دايمًا وسعت كل شيء
فمهما كان مقدار الدعم اللي أنت منتظره من حد من عباد الله عمومًا تأكد إن ربنا سبحانه وتعالى عنده من الرحمات ما هو أوفر وأعظم
محدش هيكون عارف أنت وضعك إيه غير ربنا ومحدش مش هيزهق من إلحاحك في الطلب غير ربنا وده من كمال رحمة ربنا يعني تصور إن كل ما يتراحم به الخلق كل الرحمة في العالم اللي بتخلي أم تصحى عشان ابنها الفجر واللي بتخليك تروح تدعم صاحبك وتطمن عليه كل الرحمة ديه اللي مالية كل حاجة حوالينا هي جزء بسيط من جزء واحد من رحمة ربنا سبحانه وتعالى والشيطان ساعات بيوهمك إنك مش مرحوم وإن الدنيا جاية عليك أوي أو ممكن يوهمك إنك بعيد عن ربنا أوي فمفيش أمل فيك خلاص الحقيقة إن دايمًا رحمة ربنا حوالينا في كل مكان إحنا اللي بنختار إننا منشوفهاش ولو مش عارف تشوفها ادعي ربنا هو يملك كل قلوبنا ولما تشوفها هتحس بلطف كبير في كل قدر وهتحس برعاية عظيمة في كل يوم بينما كله ممكن ينساك الحي القيوم معك ديه حاجة مطمئنة أوي إن فيه رب عظيم قائم علي كل أمورك وبيعاملك برحمته دايمًا
سبحان الله !
وبس كده ربنا يرحمنا جميعًا برحمته التي وسعت كل شيء♥️

هي أكبر بكتير من مجرد امتحان أو كذه درجة، دي أقل حاجة في الموقف ده هي الامتحان أو الدرجة بتاعته.

فيه حاجات أهم وهي أن ربنا يتم شفاء الأطفال دول على خير ويعين أولياء أمورهم على بهدلة المستشفيات.

والله يغفر لنا تقصيرنا ويديم علينا الصحة والعافية ويتم شفاهم على خير.

آخر أول امتحان ✅

أكثِروا من الصلاة على النبي ﷺ.
لا تنسَوْا سورة الكهف يا رِفاق 💚.
ولا تنسَوْا إخواننا في فلسطين والسودان من دعائكم، دثروهم بدعائكم.
ومتنسوش كمان زمايلنا اللي توفاهم الله.

🍀تذكير بالأيام البيض لشهر جمادى الأولى:  
  السبت: ١٣ جمادى الأولى، ٢٤ أكتوبر ٢٠٢٦.
  الأحد: ١٤ جمادى الأولى، ٢٥ أكتوبر ٢٠٢٦.
  الإثنين: ١٥ جمادى الأولى، ٢٦ أكتوبر ٢٠٢٦.

وأخيرًا إنّ لمْ تَصوُموُا فَذكّروا 💚.

الدرس ده جميل بجد وبتقولك قد ايه الناس دي ضحت عشان توصلنا الدين ده وقد ايه احنا مقصرين ومفرطين وبندور على أي حجج عشان نتعذر بيها.
م. أمجد سمير

الدرس كامل

قال النبي ﷺ: «ولموضعُ سوطٍ في الجنةِ خيرٌ من الدنيا وما عليْها....»
يعني موضع كرباج في الجنة خير من الدنيا وما فيها وفي رواية تانية بيقول: «موضع قدم أحدكم في الجنة خير من الدنيا وما فيها».

قال النبي ﷺ: «مَن قال سبحانَ اللهِ وبحمدِه غُرِسَتْ له نخلةٌ في الجنةِ»

بس هل عمرك فكرت إذا كان مجرد قول سبحان الله وبحمده يخليك تستحق نخلة في الجنة؟ يعني هل أنت شايف إنك بذلت مجهود وتعبت عشان تاخد عليه نخلة في الجنة؟ ده إذا كان موضع القدم في الجنة خير من الدنيا وما فيها فما بالك بقى بنخلة في الجنة!

وهنا يتجلى اسم الله الشكور واللي من معانيه: أنه -سبحانه وبحمده- يجزي على العمل القليل الخيرَ الكثير.