اليوم يبدأ العشر الأواخر من شهر ربيع الأول.

خطة قناة مشروع قدسية الجديدة ستكون من بداية ربيع الثانى إن شاء الله وحتي يوم ١ رمضان .. تستمر حتى ثلاثة أشهر.

وإلى أن نبدأ في الخطة الجديدة فنعلن أنه لن يدخلها إلا من أنهى معنا ختمة إنعاش التى سنبدأها من اليوم وكتاب صور من حياة الصحابة كاملًا.

لأنها ستكون ثلاثة أشهر تدارسية في تحدي القراءة إن شاء الله ونبدأ معها باستخراج التطبيقات العملية من الكتب حتى لا تكون حجة علينا.

ختمة الإنعاش تجدون عنها منشور منفصل في قناة الشيخ سمير مصطفى .. أما من لم يقرأ الكتاب من قبل فهو ٥٧٠ صفحة ويتضمن سيرة ٦٥ صحابيا .. ولدينا عشرة أيام يقسم الكتاب بمعدل يومي من ٤٥ إلى ٥٥ صفحة .. أو يقرأ يوميا سيرة ست أو سبع صحابة.

تحدى القراءة لمن لا يعرفه يجده هنا .

وعليكم رابط القناة أحضروا أصحابكم وابدأو معا تحديات القناة الجديدة إن شاء الله:

@Mashro3_kodoseiia

#مشروع_قدسية

••

فتحت النهاردة استثنائي لما خدت بالي إن رمضان خلاص باقي عليه ١٠٠ يوم إن شاء الله .. افتكرت بوست قرأته السنة اللي فاتت في نفس الميعاد بيقول :

" تقريبًا كل يوم بيموت أكثر من ربع مليون إنسان على وجه الكرة الأرضية، يعني من هنا لرمضان هيموت تقريبًا 17 مليون إنسان!

ممكن إنت تكون واحد من الـ هيموتوا، فتجهَّز لرمضان وبيِّت نيتك، فلو مُت هتموت وإنت ليك أجر رمضان لأنك مبيِّت النية. "

وافتكرت الفيديو بتاع الشيخ حازم شومان عن أستاذ رامي رحمه الله .. وزي ما قلت قبل كدا إنه كان السبب إن أول مرة أفكر أقعد أحط خطة للإستعداد لرمضان.

وعشان الكلام كتير والنصائح كتير والدروس أكتر .. حبيت أشارككم اقتراح واحد بس مهم جدا جدا.

في دورة اسمها { رمضان قرب يلا نقرب }

معمولة علىٰ أربع مواسم وهي بالظبط ١٠٠ حلقة .. ومدة الحلقة تبدأ من ٥ دقائق ولا تتجاوز النص ساعة .. بتتكلم عن معظم الجوانب اللي محتاج تركز فيها وإنت بتستعد .. يعني مواضيع كتير مختلفة .. واللي بيلقيها مش شيخ واحد ولا اتنين .. دي مجموعة كبيرة جدا من المشايخ والدعاة المختلفين في الأسلوب والكلام والطريقة والأهم من كدا الخبرة والأفكار ..

كل اللي بقترحه عليك .. إنك تسمع كل يوم حلقة واحدة بس من البرنامج الجميل دا وتشتغل علىٰ تطبيقها لوحدك .. خلي لرمضان ساعة واحدة بس تستعدلها .. ركعتين توبة عشان تدخله وإنت نضيف وتسمع الحلقة وتشوف هتطبقها ازاي .. وبأكدلك إنك والذي نفسي بيده لو صدقت النية واستعنت بالله وبدأت تسمع وتطبق فورًا .. هييجي رمضان وإنت إنسان مختلف تمامًا إن شاء الله.

رمضان قرب يلا نقرب ج ١
رمضان قرب يلا نقرب ج ٢
رمضان قرب يلا نقرب ج ٣
رمضان قرب يلا نقرب ج ٤

#مشروع_قدسية

هناك عبادة عظيمة اسمها " الشعور بآلام وجراحات المسلمين " .. من لم يستشعرها فليراجع إيمانه .. وقيل : « من لم يهتم بأمر المسلمين فليس منهم ».

ومن المنطلق دا ياريت ماتخلوش أسبوع يعدي غير وإنت كان ليك نصيب من معرفة تاريخ الأمة سواء فلسطين زي ماتكلمنا قبل كدا .. أو الأندلس زي ما بنتكلم دلوقتي .. وغيرها من الأحداث التاريخية الإسلامية اللي المفروض إنك كمسلم تكون على وعي بيها .. وللأسف فيه كتير يجهل اسمها أصلا!

كل ما هتعرف أكتر في التاريخ هتلاقي إنه بيتكرر بشكل ملاحظ جدًا وبنفس سياسة التعامل .. وهتقدر تفهم حجم التلاعبات الفكرية اللي أعداء الإسلام بيعملوها عشان يأمنوا جانبنا .. وهتبدأ تتكون عندك بصيرة تنورلك كل الأفكار الغامضة بالنسبة لك .. إحنا أصلا ماوصلناش للحالة دي من الهوان إلا بالحرب الفكرية .. لكن لا هم أقوىٰ منا ولا أي حاجة .. إحنا اللي مانعرفش حاجة عن أمتنا ولا مهتمين نعرف عشان مش فاضيين .. ودا تقصير مننا تجاه الاسلام لازم نستغفر منه ونعالجه ..

خلي ليك ورد أسبوعي حتىٰ لو ساعة اسمع أو أقرأ في التاريخ الإسلامي .. وتابع الأحداث الجارية لأخبار المسلمين في العالم كله .. واختصهم بورد دعاء وتقرب لله عز وجل بكل ما تستطيع عشان تصلح من دعائك فيستجاب إن شاء الله .. انشغل بالدين وبإخواتك في الدين .. لأن من لم يحمل هم الدين فهو علىٰ الدين هم !

وأقترح حاجات سريعًا تبدأ بيها .. الاقتراحات لفهم تاريخ فلسطين سردتها في منشور سابق .. ممكن ترجع وتختار منه كتاب أو سلسلة تبدأ بيها .. حتىٰ لو ٢٠ صفحة أسبوعيا من أي كتاب وسماع حلقة واحدة من أي سلسلة .. وأشير لاقتراح أخير وهي قناة( منبر الأقصىٰ ) ..

القناة دي بتعمل مساقات خاصة بالقضية الفلسطينية .. وبتبعت أهم الأحداث الجارية .. والمساق فيها عبارة عن ٣ محاور في يوم الأحد والثلاثاء والأربعاء .. يوم بيكون قراءة ١٥ صفحة من كتاب خاص بتاريخ القضية .. ويوم قراءة ١٠ صفحات من كتاب بيتكلم عن شخصية مؤثرة في تاريخ فلسطين .. واليوم الأخير بيكون سماع حلقة مدتها ساعة في سلسلة من السلاسل اللي بتتكلم عن فلسطين.

وبالنسبة للكلام عن الأندلس بشكل خاص فكفاية :
- كتاب يوسف بن تاشفين جميل جدا عشان يجذبك للقراءة في الأندلس أصلا.
- كتاب الأندلس من الفتح إلىٰ السقوط د/راغب السرجاني

وبالنسبة للصوتيات :
- سلسلة أيام أندلسية عبدالعزيز العويد
- علىٰ أطلال الأندلس عبدالعزيز العويد تكملة السلسلة الأولىٰ.
- تاريخ الأندلس د/ راغب السرجاني
- تاريخ الأندلس د/ طارق سويدان.

وختامًا أنصحك تشوف محاضرة مدخل إلىٰ علم التاريخ الإسلامي للشيخ أحمد السيد .. وتتبع الخطة اللي قالها في أخر المحاضرة .. وياحبذا لو تسمع سلسلة مدخل لدراسة التاريخ م/ أيمن عبدالرحيم .. وخلي ليك يوم ثابت أسبوعيا فيه ساعة أو ساعتين بس للمعرفة بالجانب دا .. خليها حتىٰ بنية نصرة الإسلام فكريًا .. لعل الفتح وعودة الخلافة الإسلامية تكون علىٰ إيد واحد من ذريتك فلازم تستعد كويس لبناء فكره.

#مشروع_قدسية

أنا عارفة إن ممكن كذا حد يكسل يحمل الفيديو عشان 13 ميجا ومدته دقيقة ..

بس لُطفا حملوه واسمعوه .. المقطع دا كان السبب من أربع سنين تقريبا إن أمسك ورقة وقلم وأحط خطة الإستعداد لرمضان .. فهمت وقتها ليه بنستعد من قبلها .. وعرفت إن أحسن استعداد يساعدك تاخد قرارات حازمة مع نفسك هي دروس تدبر القرآن ودروس أسماء الله الحسني .. فحاولت علي قد ما أقدر إن أركز علي التدبر والأسماء تركيز خاص .. وصدقا الأمر ليه وقع قلبي عظيم جدا ..

فكرة إنك تنشغل بمعرفة الله وفهم كلام الله من أقوي القرارات اللي حلو جدا إنك تبدأ بيها وهتلاقي أثرها في قلبك من الأيام الأولي .. بس ابدأ بداية صغيرة وبسيطة وواقعية ..

درس أو اتنين أسبوعيا في أسماء الله الحسني .. وخليك شغال في شعبان في سلسلة من سلاسل التعرف علي القرآن .. هقترح عليكم بعض الأمور تباعا .. وأهم من دا كله👇

كلمة السر .. اســتــمــر

#مشروع_قدسية

@Mashro3_kodoseiia

لو نفسك بجد تحرر الأقصي ..

حرر نفسك من احتلال هواك.

#مشروع_قدسية

اقرأوا الرسائل دي مهمة جدا ⬇️
https://t.me/Mashro3_kodoseiia/3674

معظم الناس عندها فترة الامتحانات دايمًا بتكون مرحلة الشيطان يوسوسلك فيها بحاجات كتير جدّا مش وقتها .. عشان بس يشغلك عن المذاكرة .. ودي نقطة وجدتها في نفسي وفي كتير جدا من اللي اتكلمت معاهم.

• ضميرك تجاه حفظ القرآن هيصحىٰ.
• هتحس فجأة إن نفسك اتفتحت على قراءة الكتب اللي اشتريتها .. ومافتحتهاش لحد دلوقتي.
• هتطلع في دماغك كمية أفكار دعوية رهيبة.
• هييسر ليكِ معظم العبادات اللي كانت ثقيلة عليك وبتجاهد فيها.
• أصحابك هيوحشوك فجأة .. وتحس إنك نفسك تودهم وتتواصل معاهم واحد واحد.
• هتبكي في قيام الليل .. وتستلذ بيه كما لم يحدث من قبل.
• هتلاقي ورد التلاوة بقا بياخدك في دنيا تانية .. وبيبقىٰ مش هاين عليك تسيب وتمسك كتابك وتذاكر.

وغيرها كتير جدا من الحاجات اللي مش وقتها لأن دا وقت المذاكرة بس.

° جاية أقول كدا ليه ؟

أولا : عشان أنبهك ٱن اللي إنت فيه دا مش هيفضل مكمل معاك .. ومش تغير حقيقي .. دا مجرد تلاعب بيك من الشيطان عشان يشغلك عن أولوياتك .. وأكبر دليل على كدا شوف نفسك في الأجازة بتعمل إيه من الحاجات اللي ظهرت فجأة ساعة الامتحانات.

ثانيًا : عشان أذكرك بإن المذاكرة عبادة .. وإن دلوقتي هي في الأولوية وتكاد تكون أفضل من حفظ القرآن والإكثار من النوافل .. مش بقول تبطل .. بس تخفف لأجل المذاكرة .. وازن ما بين قدر الطاعات اللي تتصبر بيها وتثبت وتنال البركة .. وبين الإكثار اللي بيكون الشيطان بيغفلك عن المذاكرة بيه .. وعشان تفهمني ارجع شوف بوستات المذاكرة من هُــنَـا :

https://t.me/Mashro3_kodoseiia/4032

ثالثًا : عشان أعرفك إن الشيطان يعرفك أكتر ما إنت تعرف نفسك .. وعارف مداخلك ودماغك وتفكيرك .. وعارف إيه الحاجات اللي هتغريك بجد دلوقتي عشان يشغلك بيها .. خليك أنصح منه بقا وخد منه خبرة الفترة دي في معرفة نفسك وقدراتك وأهدافك اللي هتيجي في الأجازة تدور عليهم عشان تعرف تحط خطة مناسبة ليكِ تستغل بيها الأجازة .. خلي جنبك ورق أو نوت أو كشكول عمومًا جنبك وإنت بتذاكر للتشتت .. كل ما يجيلك فكرة جديدة أو خطة نفسك تعملها أو خطوة نفسك تاخدها أو طاعة عايز تشوف نفسك فيها أو كتاب نفسك تقرأه أو أي قرار في صلاح دينك أو دنياك .. اكتبه بكل التفاصيل اللي تخطر على بالك .. واركن الكشكول وكمل مذاكرة .. عشان لما شيطانك يقولك الكلام دا تاني .. قوله خلاص يا عم إحنا كتبناه إن شاء الله وفي الأجازة هنفذه.

#مشروع_قدسية

@Mashro3_kodoseiia

تعليق خفيف :

من خلال تجربتي الشخصية أحب أعترف إن الخطط اللي فعلا ربنا من عليا بإتمامها في الأجازة كانت محطوطة أيام الامتحانات .. وأغلب القرارات الصح اللي خدتها في حياتي كانت أيام الامتحانات .. وأغلب الأهداف الخاصة اكتشفتها أيام الامتحانات .. وأصدق المشاعر اللي طلعت مني تجاه الله عز وجل أو النبي صلى الله عليه وسلم أو المسجد الأقصى أو أصحابي من بعدهم أو أي مشاعر تجاه أشخاص كانت ساعة الامتحانات .. وأكتر البوستات اللي ربنا سبحانه وتعالى فتح عليا فيها كتبتها أيام الامتحانات .. أغلب المشاريع الدعوية اللي مازلت ثابتة عليها لحد دلوقتي بفضل الله ظهرت في دماغي أيام الامتحانات.

بالنسبة لي الفترة دي من أكتر الفترات في السنة اللي بكتشف فيها نفسي على حقيقتها وبعرف أتعامل معاها بفضل الله .. وهي من أكثر الفترات المثمرة ليا .. عشان كدا اكتب ودون كل حاجة تحس بيها أو تخطر على بالك في الكام أسبوع دول قبل الإجازة .. حط الخطة من دلوقتي وخد القرارات من دلوقتي.

عشان لما الـ ١٠٠ يوم أجازة ييجو تبقى خطتك موجودة وإنت جاهز للتنفيذ إن شاء الله.

قبل أي شيئ استعن بالله .. استعن بالله .. استعن بالله ولا تعجز.

#مشروع_قدسية

@Mashro3_kodoseiia

= صح .. أنا متفقة معاكِ إن ماينفعش نحصر الفتنة فقط في التبرج والعري وغيره .. لكن مش للدرجة دي .. سبنا إيه للشباب بقا !

- ومين قالك إن الشباب مش ممكن يقعو في أمور تفتنهم .. مع إنك بردو هتشوفيها سطحية .. إنتِ ناسية فلانة صاحبتنا اللي في شاب فضل يحاول يوصل لأي طريق عشان يتقدملها من خلاله .. وبعتلها على الماسنجر فعملتله بلوك .. عمل حساب تاني وفضل يتابع المنشورات القديمة لحد ما وصل لمنشور من ٣ سنين كان فيه كومنت لخالها .. فكلمه عشان اتقدملها .. وهو كان مايعرفش غير اسمها والمنشورات بتاعتها بس !

نقولها تقفل حساب الفيس بتاعها اللي كله منشورات دعوية بحدود عشان الأخ اتفتن بأسلوبها .. أو نحرم على النساء عموما تعمل حساب دعوي عام ؟

= لأ طبعا .. هو اللي اتفتن يلغي متابعته .. وبعدين ما طبيعي لو حد بقرأله منشورات سهل أعجب بدماغه يعني .. إيه الغريب في كدا .. بس مش لدرجة الفتنة وإني أتقدملها عشان أسلوبها !

- يابنتي قسما بالله أنا أعرف واحد اتقدم لواحدة وما يعرف اسمها حتى .. وكل اللي جذبه ليها خطها في ملخصات جروب الدفعة .. بغض النظر عن إنك هتقولي مش للدرجة دي .. بس هي كانت فتنة ليه .. إنتِ كدا هتحرمي الخط وتخليه عورة .. ونقول حرام تنزلي حاجة بخط على مرأىٰ من الشباب ؟

= لأ طبعًا .. بس بصراحة أنا مش فاهمة طب المفروض نعمل إيه ؟

- يهمني نتفق سوا إن كل اللي اتكلمنا فيه دا من المباحات .. سواء نشر الفيديو الدعوي من غير تغطيته أو سماع الدروس للدعاة أو متابعة الشباب في الحدود أو نشر النساء لبوستات دعوية عامة بيطلع عليها الرجال أو نشر خطك أو غيره .. مافيهاش إنكار للمنكر .. لكن فيها وَرَع ..

في مرة صديقة ليا علمتني قاعدة جميلة جدا بتقول :

« ترك المباحات وَرَع .. والورع في العموم لا ينفع أستخف بيك لو عملته .. ولا إنتَ تنكر عليا لو ماعملتوش ».

وبالتالي لا نقلل من قدر حد لأنه فُتِن بشيئ يهون في عين غيره ولا يحرك فيه ساكنًا .. في الوقت اللي بردو مانمنعش صاحب الفتنة إنه يوقف شيئ مباح لمجرد إن كان فتنة لحد .. متفقين؟

= متفقين! .. بس مش لدرجة خط يعني؟ .. هيتجوزها تمضيله علىٰ القايمة ولا إيه؟

# بعد مرور يوم على الحوار #

- في إيه؟

= فاكرة امبارح لما قلتلك « بس مش لدرجة خط يعني؟ .. هيتجوزها تمضيله علىٰ القايمة ولا إيه؟ » ؟

النهاردة كنت في الامتحان .. وأنتِ عارفة إن الامتحان كله اختيارات .. وفيه سؤالين مقالي .. وأنا مكاني على الحرف بحيث المراقب وهو بيتحرك سهل جدا يشوف إجابتي .. فلاحظت كذا مرة إن كل ما أجي أكتب إجابة المقالي يركز معايا فاتوتر وأوقف كتابة .. ولما يتحرك من جنبي أكمل كتابة .. قبل ما أخلص لقيته وقف جنبي وماتحركش وركز في الورقة جدا .. قلت أكيد عشان بس أنا منتقبة وكدا .. راح مرة واحدة سألني « هو إنت ليه كل شوية بتيجي تكتبي في الورقة وتوقفي؟ .. بتجمعي الإجابة لسة في دماغك ولا متوترة؟ » .. استغربت بس رديت « لأ عارفاها الحمد لله .. بس بتوتر لو حد شافني وأنا بكتب شوية ».

لقيته فهم إني قصدي عليه وقال : « أنا آسف جدا لو وترتك .. ماكنش قصدي .. بس أنا كنت بمر عادي ولفتني جدا خطك وطريقة مسكة القلم بصراحة .. ما شاء الله خطك جميل جدا .. وطريقة كتابتك أصلا فيها خِفّة تجذب أي حد إنه يتفرج عليكِ وإنت بتكتبي كأنك بترسمي لوحة .. ربنا يبارك فيكِ يابنتي ».

- على ما أظن مش محتاجة أقنعك بعد الموقف دا بصراحة.

#قالتلي
#مشروع_قدسية

"ادخُلوا الجنَّة بِما كنْتم تعمَلونَ
"https://t.me/elaalla

بِذْرَةٌ مَقْدِسِيَّة.
https://t.me/lenothabeta

عَوْنٌ 🇵🇸
https://t.me/Awn555

ناصِحٌ أمِين!
https://t.me/Nasseh_Am

خمسة شرعي على تليجرام 🤍
https://t.me/khamsasharey5

إسراء عاطف.
https://t.me/esraa_atef00

زَادْ
https://t.me/ZaD1418

رَاحِـــلٌ !
https://t.me/gannt_elkodos26

"بِقلبٍ سَلِيمٍ"💙
https://t.me/bekalbsalem

رَفِيْـق.."
https://t.me/rafeek2

السَّائِحون
https://t.me/maryams1412

ميلي Milly Siryo
https://t.me/MillySiryo


وهذه قناة أختكم : مَشْرُوعُ قُدُسِيَّةٍ🇵🇸💚
https://t.me/Mashro3_kodoseiia

وباقي القنوات هي للنساء فقط لذلك لا أستطيع نشرها علىٰ العام .. ستُرسَل علىٰ فريق بنيان إن شاء الله لأن المجموعة للنساء .. ولا تستطيع الانضمام من الرابط دون موافقة المشرفات.

فَـرِيـقْ بُـنْـيَانْ"نساء"🌸
https://t.me/+2LqqTXSI-70yZGU0

#مشروع_قدسية