دیلبرا، درد دیلیمدن بئله عنوان ائتدیم،
کی، غم هیجریده دیل مولکونو ویران ائتدیم.

مومکون اولماز منه وصلین، بیلیرم، حشره کیمی،
اول سبب مسکنیمی کوه و بیابان ائتدیم.

عشق سلطانی منم قتلیمه فرمان گتیریب،
ائتمه‌دیم ترک وفا، طاعت فرمان ائتدیم.

سر کویونده قویوب باشیمی، بیر اوف دئمه دیم،
سر صدق ایله جانیمی قربان ائتدیم.

یا طبیب، آدینی ترک ائیله، طبابت ائتمه!
یا منیم دردیمی تاپ، گؤر نییه طغیان ائتدیم.

یوخدو بیر کیمسه مگر دردیمی بیلسین، یا رب!
کی، من اؤز قانیم ایله دردیمه درمان ائتدیم.

درد هیجرینده گوزوم یاشی توتوب دونیانی،
نوح طوفانی کیمی گؤر، نئجه طوفان ائتدیم.

ناتوان، ائتمه‌دی اول سنگ دیله ناله اثر،
گئجه – گؤندوز نه قدر ناله و افغان ائتدیم.

#خورشید_بانو_ناتوان

❀═‎‌‌‌🌼 ⃟❤ ⃟ ‌‌‌‌🌼═‎‌‌‌‌‌‌❀

بیلین یاران، بو دونیاده هره بیر کار ایلن اوینار!
کیمی خانه نشین اولموش، کیمی بازاریلن اوینار.

کیمی تخت مرسّده، باشیندا تاج شاهانه،
کیمی زیندان ایچینده ال – آیاغی دار ایلن اوینار.

کیمی طالیب دی دونیایه، کیمی عاشیق دی عقبایه،
کیمی سازه، کیمی نازه، کیمی تک تار ایلن اوینار.

کیمی مجنون سوراغینده، کیمی لیلا فراغینده،
کیمی یارین اوزرینده یاتان شاه مار ایلن اوینار.

کیمیسی شاد و خرم دیر، کیمی لیل و نهار آغلار،
فلک ده سرگران اولموش خورشید زار ایلن اوینار.

#خورشید_بانو_ناتوان

❀═‎‌‌‌🌼 ⃟❤ ⃟ ‌‌‌‌🌼═‎‌‌‌‌‌‌❀