البرنامج اليومي للـ ٣٠ يوم رمضان ان شاء الله في ١٠ خطوات

١- الـ ٥ صلاوات في المسجد للشباب.
الـ ٥ صلاوات في وقتهم بدون تأخير للبنات.
٢- السُنن الراتبة ( عندك ١٢ ركعه لازم تداوم عليهم يومياً .... ٢ قبل الفجر ... ٤ قبل الظهر و ٢ بعده .... ٢ بعد المغرب ... ٢ بعد العشاء )

٣- صلاة الضحى ( بتبدأ من بعد شروق الشمس بـ ربع ساعة ... لحد قبيل أذان الظهر بـ ربع ساعة ..... أقلّها ركعتين لحد ٨ ركعات ..إنت وهمّتك )

٤- أذكار الصباح والمساء ( أذكار الصباح بعد الفجر .... وأذكار المساء بعد العصر ... لو نسيت تقولهم في ميعادهم قولهم مجرد ما تفتكر المهم متسبهمش )

٥- صلاة التراويح
- للشباب .... في المسجد طبعًا مع الإمام.. واختار إمام يكون صوته حلو علشان تحسّ بالصلاة

- للبنات ... الافضل إنك تصليها في البيت ... بس لو عاوزه تنزلي انزلي باللبس المنضبط وبكامل وقارك ...

٦- الصدقة ( جنيه واحد يوميًا ... وانت خارج من صلاة العصر اعطيه لأول سائل يقابلك ... يبقي عندك ٣٠ جنيه في الشهر كله ....ولو انت مُيسّر الحال وربنا موسّعها عليك تصدّق بما يليقُ بك ... وافتكر في النهايه ان انت أحوج للصدقة وأجرها من الفقير )

٧- عمرة أو حج أسبوعيًا ( اختار يوم في الاسبوع بعد ما تصلي الفجر متطلعش من المسجد ... خلّيك في المسجد لحد الشروق ... قول الاذكار واقرأ قرآن ... لك بذلك أجر حجة وعمرة تامة تامة تامة ... اعمل الموضوع ده ٤ مرات في الشهر )

٨- قراءة القرآن

- لأصحاب الهمم العاليه مش أقل من ٥ ختمات في الشهر .... بواقع ٥ أجزاء يومياً ... يعني هتختم كل ٦ أيام مرة

- لأصحاب الهمم المتوسطة.. مش أقل من ٣ ختمات في الشهر ... بواقع ٣ أجزاء يوميًا .... يعني هتختم كل ١٠ أيام مرة

- للمبتدئين وأصحاب المشاغل ... مش أقل من ختمة في الشهر .... بواقع جزء كل يوم فقط.

٩- الدعاء ( عندك ٣ أوقات انا مسمّيهم وقت تحقيق المعجزات )

- الربع ساعة قبل الفطار
- الساعة اللي قبل الفجر
- اخر ساعة بعد العصر من كل جمعة

( طبعا إنت محضّر الادعيه والحاجات اللي نفسك فيها وبتتمناها في ورقه ...... لحّ علي ربنا في ال ٣ أوقات دول .... هتشوف دعائك بيتحقق بعد رمضان كفلق الصبح ) شرط انك تدعي بإخلاص ويقين وصدق.

١٠- ركعتين في جوف الليل ( عاااااارف ياسيدي والله إنك صليت التراويح .... بس ده ميمنعش انك تصلي ركعتين خفاف في وقت النزول الإلهي... علشان تبقي مُميّز مش زيك زي الناس ) .... وكمان ربنا بيقول ( وتزوّدوا فإن خير الزاد التقوى )

--------------------

دول ١٠ خطوات .... لو داومت عليها ....خلال الـ ٣٠ يوم .... إن شاء الله هيكون أحسن رمضان عيشته في حياتك ... وهتخرج من رمضان إن شاء الله إنسان نقي تقي ... كأنك لسه مولود ... مين عارف مش جايز رمضان السنة دي هو نقطة انطلاقتك اللي كنت مستنّيها من زمان ؟ جايز..

وأخيرا أرجوا تذكير كل من تستطيع اخباره بهذه التذكرة.🤍

الصحابة لما تعاملوا مع القرآن صح؛ أصبحوا الصحابة!

سمحوا للقرآن يصلح فيهم ويرشدهم ويبني إيمانهم واستغلوا الكنز الثمين اللي بين إيديهم.

لكن إحنا للأسف مش عارفين نتعامل معاه صح!
فبنخرج بعد قرآته زي ما دخلنا من غير ما يؤثر فينا أو يصلح فينا شئ!
وطبعًا المشكلة مش في القرآن، المشكلة في طريقة تعاملنا معاه.

وعشان نحاول نحل المشكلة دي، هنعيش مع بعض طول شهر رمضان في رحلة لإصلاح طريقة تعاملنا مع القرآن عشان يُصلحنا ونزود بيه إيماننا..

الرحلة دي مستفادة من كتاب "تحقيق الوصال بين القلب والقرآن" لأستاذ مجدي الهلالي جزاه الله خيرًا.

فحضَّر قلبك وتابع معانا سلسلة #القلب_والقرآن

كنت بسمع بودكاست ووقفت عند حتة معينه كان الشيخ بيقول فيها :
ولله في كل ليلة عتقاء من النار وذلك في كل ليلة! فُتحت أبواب الجنه وغُلقت أبواب النار"))
توجستُ بيني وبيني في معني الجمله وقد إيه أنا كنت بسمعها عادي لحد م استوعبت انا هحتاج إيه اكتر من أن أُعتق من النار! أن يحرم جسدي عن النار وأن يبعد وجهي عن النار وإني من اول ليلة ف رمضان فيه ناس ربنا بيعتق رقابها من النار تخيلوا نكون من الناس دي وربنا يختار إنه يعتق رقابنا من النار من أول ليلة!
يارب نعتق من النار
نفرُّ إليك مِنَّا فاعفوا عنَّا يارب:"))

خطة هتختم بيها القرآن في أول أسبوع في رمضان:

اليوم الأول: من سورة الفاتحة إلى سورة النساء
اليوم الثاني: من سورة المائدة إلى سورة التوبة
اليوم الثالث: من سورة يونس إلى سورة النحل
اليوم الرابع: من سورة الإسراء إلى سورة الفرقان
اليوم الخامس: من سورة الشعراء إلى سورة يس
اليوم السادس: من سورة الصافات إلى سورة الحجرات
اليوم السابع: من سورة ق إلى سورة الناس

خلّوا الخير دايمًا متداول بين الناس، فالدالّ على الخير كفاعله، وله أجره وأجر من عمل به.

الإجابة من هنا
@Yaqen15bot

عاوزة أنبه على كذا أمر خاص بـ صلاة الجماعة..

- إمبارح وأنا بصلّي في المسجد أخدت بالي إن اللي جانبي بتردد مع الإمام في السورة اللي بيقرأها..

وده مش صح، لا يجوز في الصلاة الجهرية القراءة مع الإمام، الواجب على المأموم -اللي هو بيصلي خلف الإمام- أن يقرأ الفاتحة فقط وينصت آي يستمع لقراءة إمامُه، لقوله تعالى: ( وَإِذَا قُرِئَ الْقُرْآَنُ فَاسْتَمِعُوا لَهُ وَأَنْصِتُوا لَعَلَّكُمْ تُرْحَمُونَ )

وهكذا أمرنا رَسُولُ اللَّهِ صَلَّى اللَّهُ عَلَيْهِ وَسَلَّمَ، قال: ( إِنَّمَا جُعِلَ الإِمَامُ لِيُؤْتَمَّ بِهِ ، فَإِذَا كَبَّرَ فَكَبِّرُوا ، وَإِذَا قَرَأَ فَأَنْصِتُوا )

ويستثنى من ذلك قراءة الفاتحة فقط للحديث، قوله صلى الله عليه وسلم : ( لا صَلاةَ لِمَنْ لَمْ يَقْرَأْ بِفَاتِحَةِ الكِتَابِ )

- الأمر الثاني: بشوف ناس كتير، كتير أويي بتطول جامد في السجود بعد الإمام، وأوقات بنطلع للركعة الثانية وهما لسه ساجدين..
وده غير صحيح، وفيه علماء قالو تبطل الصلاة، "الإطالة البالغة" ليه؟ لأن الحديث بيقول: ( إِنَّمَا جُعِلَ الإِمَامُ لِيُؤْتَمَّ بِهِ ، فَإِذَا كَبَّرَ فَكَبِّرُوا ، وَإِذَا قَرَأَ فَأَنْصِتُوا ) يعني ايه؟

يعني واجب على المأموم مُتابعة الإمام في كل أفعال الصلاة، كبر نكبر، قام نقوم، سجد نسجد، مينفعش أتأخر عنه..

هتتأخر عنه وتطول في السجود كدا مخالفة ليه، ومخالفة للسنة، وبعض العلماء قالو إن المأموم إن تخلف عن الإمام لغير عذر حتى سبقه بالركن بطلت صلاته..

مُهم جدًا جدًا..

أغلبنا هيقرأ النهاردة الجزء الخامس من القرآن، ومِش هبالغ لو قولتلك دا أهم بوست ممكن تشوفه في حياتك، وإن شاء الله هتفهم سورة النِّساء بشكل تاني خالص!

الجزء دا بيمثّل الكتالوج الحقيقي لإدارة البُيوت والعلاقات، وهتلاقي فيه روشتّة للتعافي من الذنوب، والسورة مليانة أحكام وتشريعات علشانك إنت، ومع كل حُكم بتلاقي التركيز كله تقريبًا على حاجتين: (العدل والرحمة).

الجزء الخامس بياخدنا لـ ٣ محطات أساسية، وكالعادة لو فهمناهم.. كتير جدًا من مشاكلنا هتتحل؛ لأننا بنستخرج الأحكام والحلول من دُستور ربِّ العالمين:

١. المحطة الأولى - الضعف البشري:
فيه شعور كدا أنا متأكد إنه مُشترك بينا.. أحيانًا بنحس إننا بايخين أوي مع ربنا من كُتر الذنوب! أو إننا كل مرة نتوب وخلاص دي آخر مرة، وهوب نفس الغلطة هي هي! فالاحباط واليأس من ضعفك بيركبك وبتقول: أنا مفيش مني رجا، كدا كدا ضايع!

أهو الشعور باليأس وجلد الذات دا هو أكبر زوحليقة بيعملهالك الشيطان، وعلشان كدا في بداية الجزء دا ربنا نزِّل آيات زي البلسم على قلبك وبيعمل معاك مُكاشفة نفسية جميلة ومُرعبة: (وَاللَّهُ يُرِيدُ أَن يَتُوبَ عَلَيْكُمْ) ركّز كدا في كلمة (يُرِيدُ)، ربنا مش بس هيقبل تَوبتك، لا هو الودود -سُبحانه- اللي يريد إنه يتوب عليك، حابب رجوعك مهما عكّيت وغِبت، بابه مفتوح ومفيش بينك وبينه حواجز ولا واسطة!

وفي نفس الآية بيحصل زوووم خطير على العُصاة الغرقانين: (وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُوا مَيْلًا عَظِيمًا)، إيه دا مين دول يا رب؟
دول صُحبة السُوء، وصُنّاع التريندات الفاسدة.. إلحق فلان اتجوّز، إلحق فضيحة فلانة، والبيئة التوكسيك اللي بتزيّنلك الحرام والشهوات! الناس دي ذكيّة جدًا، اليأس ركبهم حرفيًا وغرقانين في الوحل وشهواتهم سايقاهم، فهمّا عايزينك معاهم في نفس الوحل علشان مايحسّوش بعقدة النقص، ودا صراع إرادة قوي لازم تُدركه علشان بمجرد ما تقعد على طرف الزوحليقة.. زقّة صغيرة هتنزل الوحل.

ولأن ربنا الخالق العظيم يعلم تركيبتنا، ختم المعنى بآية بتغسل القلب: (يُرِيدُ اللَّهُ أَن يُخَفِّفَ عَنكُمْ وَخُلِقَ الْإِنسَانُ ضَعِيفًا) ياااه على الجَمال والرحمة! ربنا بيقولك: أنا الخالق، وأعلم إنك ابن آدم مِش مَلاك، وأعلم بتركيبتك البشرية اللي فيها ضعف قدام شهوة عابرة، ضعيف وقت الغضب، ضعيف قدام الفلوس أو كلمتين حلوين في الحرام.. ولأني أعلم الضعف دا، أنا هخفف عنّك، وهشرَّعلك اللي يسند ضعفك.

ودا مش مُبرِّر علشان نستحلى الضعف ونقول: يلا بقى ما إحنا ضُعاف! لا دا طوق نجاة وقت الذنب علشان تهرب لربنا وترجع، مِش تتمادى!

٢. المحطة التانية - بيوت المُسلمين:
مبدأيًا كدا، مفيش بيت مافيهوش مشاكل، ودا طبيعي ومُتوقع؛ لأننا شخصيات مُختلفة، جايين من بيئات وتربية وتجارب مُختلفة، وبنحط دا كله في خلاط واحد وتحت سقف واحد! حتى بيت النبي ﷺ اللي هو أطهر بيت على وجه الأرض حصل فيه غِيرة وخلافات زوجية، والسيدة سَودة بنت زمعة في وقت من الأوقات خافت على العلاقة وتنازلت عن يومها وحقّها للسيدة عائشة حبًّا في النبي ﷺ وحفاظاً على بيتها ومكانتها معاه في الجنة، فالمُشكلة عُمرها ما كانت في وجود الخلاف، المُشكلة كلها في إزاي بنتعامل مع الخلاف؟

وسورة النساء حطّت لينا المَنهج والكتالوج اللي يحمي أي بيت من الخراب، وبدأت بتأسيس الهيكل التنظيمي للبيت، وهنا هنقابل أكتر مُصطلح بيتفهم غلط:

- القوامة (الرِّجَالُ قَوَّامُونَ عَلَى النِّسَاءِ):
حبيبي الرجل المُسلم، القوامة تكليف ومسؤولية مُرعبة، مِش تشريف ولا رُخصة لأغراض استعراضية، وبعض الرجّالة -للأسف الشديد- فاكر إن القوامة هي نموذج سي السيد، وخشونة الحنجرة، والتطاول، وزفارة اللسان، وإلغاء شخصيّة الزوجة!

لكن القوامة جايّة من القيام على الأمر بكل جوانبه، يعني إنت الضهر والسند، والقلب اللي بيحتوي، إنت الشقيان المطحون في الدنيا علشان توفّر الأمان المادي والنفسي والمعنوي لأهل بيتك، وإنت الشيخ اللي بيسأل عن الصلاة والعبادة، وإنت الأستاذ اللي بتعلِّم أهلك، وإنت الأسد الحامي للأعراض، وإنت المؤدِّب والمُوجّه بما أمَرَك الله، وإنت القائد الحكيم لشؤون البيت.

على الجانب الآخر، بعض البنات -المُتأثرات بالفاسدات- بتشوف إن القوامة سُلطة وظُلم وتهميش! بس لو شيلتي النضارة السودا دي وركّزتي.. هتلاقي إن الإسلام أعفاكي من مسؤولية الإنفاق الإجباريّة والحماية وأي تكاليف مادية وجسدية، وكلِّف الراجل بكل الأعباء المُرهِقة، وأي مؤسسة ناجحة لازم يكون ليها مُدير وقائد حكيم ومُوجّه ومُصدِر للقرارات، والقوامة حماية للمرأة، فلازم تتقبلي شرع ربنا بصدر رحب علشان تُطبّقي شعار (سَمِعنَا وأَطَعنَا).

- الزوجة الصالحة (فَالصَّالِحَاتُ قَانِتَاتٌ حَافِظَاتٌ لِّلْغَيْبِ بِمَا حَفِظَ اللَّهُ):
القرآن هنا بيرسم صورة الزوجة السويّة المسؤولة اللي جايّة تبني بيت؛ (قَانِتَاتٌ) يعني مطيعة لربها ولزوجها في المعروف، مِش نِد بِنِد، وعِند ومُكابرة!
(حَافِظَاتٌ لِّلْغَيْبِ) يعني في غياب زوجها هي أسد بيحمي عِرضه، وماله، وأسرار بيته، ومشاكلها مابتخرجش برا العتبة، ومابتخونش ثقته فيها، وهي دي الست اللي الراجل بيشيلها فوق راسه.

طيب لو الزوجة اتغيّرت، ومابتسمعش الكلام و و و؟
اسمها ناشِز، والنُشوز مش معناه إنها حرقت الأكل أو قصّرت في شغل البيت، النُشوز هو التعالي والتمرُّد المُتعمّد وهدم أساسيات الحياة الزوجية.

لو دا حصل، ربنا سُبحانه وتعالى حطّ لينا روشتة مُتدرّجة من ٣ أدوية، وبتتاخد بالترتيب جوا البيت علشان نعالِج:

» العلاج الأول .. (فَعِظُوهُنَّ): الشرع والطِب النفسي اتفقوا إن البداية بتكون بالكلام واللين، يعني نفكّر بعض بفضل ربنا علينا، وإننا اتجمّعنا ومرينا بتفاصيل وحكايات ولحظات حلوة، ونتكلّم عن الحلال والحرام، نعاتب بحُب ونحُط النقط على الحروف من غير إهانة ولا تجريح.

» العلاج التاني .. (وَاهْجُرُوهُنَّ فِي الْمَضَاجِعِ): لو الكلام اللين والعتاب مجابش نتيجة ولسه النُشوز موجود.. الشرع بيقول إنك تدّي مساحة هُدنة بذكاء، مساحة تهدّي الأجواء وتراجع نفسها، يعني مثلاً: تجنّبها في النوم جوا الأوضة، وبيّن استياءك بأدب، لكن ماتسيبش البيت ولا تقاطعها بالشهور، ودا أقوى رسالة نفسية، ومعناها: أنا زعلان جدًا ورافض تصرّفاتك.

» العلاج التالت .. (وَاضْرِبُوهُنَّ): وهنا هدّي أعصابك وافهم قبل ما تِسخَن، الخطوة دي كتير من الجَهَلَة والفَسَدَة بيفسّروها بالهوى، ودا جهل وتعدّي على حُدود الله!

الخُطوة دي بتيجي لمّا تكون العلاقة على حافة الهاوية، والنشوز وصل لمرحلة هيتخِرب فيها البيت، سيدنا النبي ﷺ اللي هو المُشرِّع بإذن الله والمُفسِّر للقرآن قيّد الكلمة دي وقال: (ضرباً غير مُبرِّح)، وعُمره ﷺ ما مَد إيده على امرأة قط!

وحَبْر الأمَّة ابن عباس فسّرها بإنها: (الضرب بالسِّوَاك).. إنت متخيل؟ يعني بعود فرشة الأسنان، إذن دا مش اللي في بالك خالص.

والمقصد الشرعي هنا مِش الأذى الجسدي إطلاقاً -دا مُحرّم-، والمقصد هو إظهار قمّة الاستياء والرفض؛ وكأنك بتفوّق الإنسان دا إننا في خطر والبيت بيضيع.

وأي راجل بيستغل الآية دي ويفصّلها علشان يِمِد إيده ويهينها؛ فهو جاهل، ومُخالِف لشرع الله، والنبي ﷺ بريء من فِعله.

والـ ٣ أدوية اللي فاتوا دول بياخدوا وقت، ممكن ٣ شهور أو ٦ شهور أو حتى سنة، أو أكتر أو أقل؛ لأن أي مرض بياخد وقت في العلاج، طيب إذا الحال استمر على ما هو عليه، بنخرج من العلاج الفردي وندخل على العلاج اللي بعده:

» العلاج الرابع .. تدَخُّل الحُكماء: هنا نلجأ للحل قبل الأخير (وَإِنْ خِفْتُمْ شِقَاقَ بَيْنِهِمَا فَابْعَثُوا حَكَمًا مِنْ أَهْلِهِ وَحَكَمًا مِنْ أَهْلِهَا) الشرع هنا واضح وجميل، مابنروحش محاكم، ومابننشرش غسيلنا على الفيسبوك، ومابنجيبش قرايب مشحونين ومتحيّزين يزوّدوا الطين بَلّة!

إحنا بنختار راجل عاقل وحكيم من أهله، وراجل زيّه من أهلها.. بس فيه هنا جزئية في غاية الخطورة، والسّر كله في الحتّة دي: (إِن يُرِيدَا إِصْلَاحًا يُوَفِّقِ اللَّهُ بَيْنَهُمَا) يعني التوفيق وحلّ المشكلة مرهون بنيَّة الحَكمين، ولو نيتهم وأسلوبهم وكلامهم بيهدّي النفوس، وينصر المظلوم ويعقّل الظالم.. ربنا هينزل عليهم السَكِينة ويحلّها من عنده.

» العلاج الأخير .. الإمساك أو الطلاق: لو استنفذنا كل الأدوية، ومفيش فايدة واستحالت العِشرة.. هنا الشرع بيتَدَخَّل بعملية جراحيّة لإزالة الأذى، وهي الطّلاق.

يلا بقى نُنشر الغسيل؟
مفيش غسيل أصلاً، كل دا جَهل وتعدّي على الشرع، والإسلام أمرنا بأدب الخِلاف: (وَلَا تَنسَوُا الْفَضْلَ بَيْنَكُمْ) نمشي باحترام، ندّي كل واحد حقّه، لا أذى، لا تشهير، لا محاكم، لا نستخدم العيال ككروت ضغط ومسخرة!

بالله عليكم.. شُفتوا عظمة وشُمولية في التشريع زي دي؟
دين بيعالج أدَق تفاصيل مشاعرنا، وبيحط أسوار تِحمي بيوتنا من الانهيار والعادات والأعراف اللي خربت عُقول الشباب والبنات والأهالي، اتمسّكوا ببيُوتكم، وافهموا مقاصد رب العزّة، وعدّي واتغافل علشان المراكب تِمشي.

٣. المحطة التالتة والأخيرة - فيروس النفاق:
بعد ما السورة حطّت قوانين تنضَّف بُيوتنا من المشاكل، بتاخدنا علشان ننضَّف دايرتنا ومُجتمعنا من أخطر فئة ممكن تتعامل معاها في حياتك، وهمّا المُنافقين!

النفاق دا مرض وفيروس خطير جدًا، والمُنافق أخطر عليك من العدو الواضح! لأن العدو الواضح إنت عارفه وعارف نيّته، لكن المُنافق دا عايش معاك، وبياكل معاك، وممكن يكون بيصلي جنبك وبيتكلم بلُغتك، لكن جوَّاه كُره وحقد وخيانة، ومستني أقرب فرصة يِعلِّم بيها عليك!

تعالى نشوف السورة كشفت وشوشهم إزاي، وخد بالك علشان الصفات دي موجودة في ناس كتير حوالينا النهاردة:

- (إِنَّ الْمُنَافِقِينَ يُخَادِعُونَ اللَّهَ وَهُوَ خَادِعُهُمْ):
المُنافق فاكر نفسه ذكي، بيلعب على كل الحِبال ومحدّش واخد باله! تلاقيه بِوشّين، يقعد معاك تحسّه ملاك، ويروح يقعد مع اللي بيكرهوك ويدحرج معاهم أحلى التَمَاسي، فاكر إنه بيكسب بُنَط، لكن الحقيقة إنه بيخدع نفسه، وربنا كاشفه وهيفضحه.

- (وَإِذَا قَامُوا إِلَى الصَّلَاةِ قَامُوا كُسَالَىٰ يُرَاءُونَ النَّاسَ):
لحظة بس.. هو المُنافِق بيصلِّي؟ أيوة وبيصوم وبيزكّي وبيحِج كمان! بس شوف ربنا وَصَفُه بالاستثقال والكسل والتعب من العِبادة، والصلاة عندة مش أولويّة، هي مجرّد إثبات حُضور وانصراف قدام النّاس، والعبادة بالنسباله دعاية مش عقيدة.

- (مُّذَبْذَبِينَ بَيْنَ ذَٰلِكَ لَا إِلَىٰ هَٰؤُلَاءِ وَلَا إِلَىٰ هَٰؤُلَاءِ):
تلاقيه معاك معاك.. عليك عليك! شخص مُذبذب وعايش في المراجيح، ملوش مبدأ ولا كلمة، دينه هو مصلحته فقط! وتلاقيه كلامنجي وبيعرف يرسمها ويِحبُكها طول ما الدنيا أمان ومفيش خساير، لكن وقت الشدة والأزمات.. أول واحد يبيعك ويهرب.

- نهاية المُنافق المُرعبة:
ربنا -سُبحانه وتعالى- توعّد ليه وعيد مخصوص: (إِنَّ الْمُنَافِقِينَ فِي الدَّرْكِ الْأَسْفَلِ مِنَ النَّارِ) يعني في قاع جهنّم، تحت أبو لهب والصُحبة اللئيمة.

علشان كدا النبي ﷺ كان دايمًا بيستعيذ من النِّفاق، فاللهم طهّر قلوبنا من النفاق، واهدنا وعلِّمنا وفهِّمنا وأدِّبنا بآياتك، واحفظ بيوتنا من كل سوء.

لو وصلت لحد هنا، ارفع البوست بتعليق وشير لعله ينفع غيرك، واستنوا الجزء السادس بكرة إن أحيانا الله.

#عبدالرحمن_مهدي #ختمة_الفهم

أغلبنا هيقرأ النهاردة الجزء السادس من القرآن، الجزء اللي بيعمل أشعة مَقطَعيّة على القلوب، علشان نشوف أكتر مرض خبيث ممكن يُصاب بيه الإنسان؛ وهو العِناد والمُكابرة!

في الجزء دا بنختم سورة النِّساء العظيمة، وبندخل على سورة المائدة اللي هي وثيقة الوداع وآخر ما نزل من الأحكام، وعندنا ٣ محطات أساسية.. لازم تفهمهم كويس جدًا، علشان الأشعة بتاعتك تطلع سليمة بإذن الله:

١. المحطة الأولى - الجِدال والعِناد:
في أواخر سورة النساء، القرآن بيورّينا مشهد عجيب جدًا عن العِناد الأعمى، لمّا المُشركين وأهل الكتاب في زمن النبي ﷺ شافوا مُعجزات تقشعر الأبدان، فكان لازم ينزلهم مُعجزة مخصوصة بتلمس واقعهم، وهمّا أصلاً كانوا صنايعية في اللغة العربية، فالقرآن نزل يتحدّى صنعتهم وفصاحتهم، والتحدّى كان إنه بس يجيبوا ولو سورة واحدة بنفس فصاحة وبيان ودقّة القرآن.. وعجزوا تمامًا!

بس لأن قلوبهم مقفولة ومريضة بالعِند والكبر، سابوا التحدّي اللي في ملعبهم، وراحوا يطلبوا طلب في قمة الاستفزاز والبجاحة، وقالوا للنبي ﷺ: إحنا مش مُقتنعين بالكلام دا، ولو عايزنا نؤمن بجد.. خلِّي ربنا ينزل علينا كتاب جاهز ومكتوب من السماء قدام عنينا علشان نمسكه بإيدينا: (يَسْأَلُكَ أَهْلُ الْكِتَابِ أَن تُنَزِّلَ عَلَيْهِمْ كِتَابًا مِّنَ السَّمَاءِ).

والرد الإلـٰهي في الآية دي هيكشفلنا إن العِناد عندهم جينات متوارثة، وربنا -سُبحانه- طَمَّن النبي ﷺ علشان مايزعلش ولا يستغرب، وقاله دول أجدادهم طلبوا من مُوسى طلب أبجح وأعجز من كدا بكتير، دول قالوله: (أَرِنَا اللَّهَ جَهْرَةً) يعني إحنا عايزين نشوف ربنا بعنينا كدا وجهًا لوجه علشان نصدق!

والنتيجة؟ (فَأَخَذَتْهُمُ الصَّاعِقَةُ بِظُلْمِهِمْ) لأن اللي بيشوف مُعجزة ويفضل يِجادل ويُراوِغ ويُكابر ويُطلب طلبات تعجيزية دا بيتسلَّى، ومابيفكرش أصلاً في الهُدى، ودي جينات وأمراض متوارثة وبتزيد مع الوقت والزمن.

تعالى بقى أورّيك لقطة مُرعبة علينا إحنا، وماحدش بياخد باله منها:
إحنا بنشوف ناس حوالينا -وممكن نكون إحنا نفسنا- بنقع في الفخ وبنجادل في ثوابت الدين الواضحة وضوح الشمس، والآيات بتكون صريحة وقاطعة والسُنّة الشريفة بتكون مفسّراها بوضوح؛ سواء في المواريث، أو الحجاب، أو الربا، أو غض البصر، أو الزواج، وتلاقي الحُكم مفيهوش ذرة شكّ، ويطلعلك واحد مُحنّك على السوشيال ميديا أو التلفزيون ويقولك: النص دا محتاج قراءة عصرية، أصل الزمن اتغيّر والقرآن بيخاطب البيئة الصحراوية! وتطلعلك واحدة شديدة الحناكة وتقول: أصل ربنا ربّ قلوب، ومُستحيل يعاقبنا على حتة قُماشة على الراس أو معاملة بنكيّة!

الناس دي يا جماعة همّا الامتداد الطبيعي لـ (أَرِنَا اللَّهَ جَهْرَةً).. هو مُشكلته مش في إن الآية مش واضحة، ولا إن الحُكم محتاج تفسير، لأن كدا كدا القصور عندنا إحنا، لكن هو مشكلته الحقيقية إن الحُكم مش جاي على مقاس دماغه، فبيلف ويدور ويجادل، لدرجة إن أغلبهم بيصنّف نفسه مُفكّر ومُثقّف علشان الهبدة تبقى مُحكَمَة وليها قِيمة!

ولازم نقتنع تمامًا إن اللي قلبه سليم وبيدوّر على الحقّ بصِدق.. هتكفيه إشارة واحدة أو دليل واحد بس علشان يطاطي راسه ويقول: (سَمِعْنَا وَأَطَعْنَا).

لكن المُجادل والمُكابر المريض بالعِناد والكِبر.. هيفضل يطلب تبريرات ويجادل بالباطل، ولو نزِّلتِله مُعجزة من السماء وشافها بعينه، هيقولك دا سِحر وتهيؤات، وهيفضل يراوغ لحد ما الصاعقة تلسعه، والصاعقة ممكن تكون انتكاسة في دينه أو حياة تعيسة، مش شرط كارثة مرئية.

إيّاك حبيبي، وإيّاكِ أختي.. تِجادلي في ثوابت الدين، سَلِّم تَسْلَم، لأن العِناد مع ربنا آخرته -وربِّ الكعبة- مُهلكة، والدين ماينفعش أبدًا يكون تفصيل، ولو فيه حُكم خالِف هواك؛ إنت مش في مجلس الشعب علشان تناقِش وتتفاوض، تأدَّب.. أنت في حضرةِ ربِّ العالمين.

٢. المحطة التانية - المَكيدة العُظمى:
في نفس سياق العِناد اللي اتكلِّمنا عنه، أواخر سورة النساء بتعرضلنا قمة الفُجور في الخصومة، وبتحكيلنا قصة السيدة مريم وسيدنا عيسى -عليهما السلام- علشان تصحح وتثبِّت عقيدتنا.

أُمِّنا السيدة مريم -أطهر نساء العالمين- ربنا اختارها لمعجزة محصلتش قبلها ولا هتحصل بعدها، وهي ولادة سيدنا عيسى بدون أب، زي ما ربنا خلق آدم بدون أب ولا أم علشان يُثبت طلاقة قدرته المُطلقة، وكالعادة.. المُعاندين بدل ما يشوفوا المعجزة ويسجدوا لله، عملوا إيه؟

عملوا أكبر حملة تشويه في التاريخ، واتهموا السيدة مريم اتهام بشع، وخاضوا في عِرضها وهي من بيت النبوة الطاهر: (وَبِكُفْرِهِمْ وَقَوْلِهِمْ عَلَىٰ مَرْيَمَ بُهْتَانًا عَظِيمًا).

وهنا لازم نُقف وقفة مؤثرة جدًا في نفسي..
السيدة مريم كانت في موقف مُرعب، لوحدها، والمُجتمع كله بيهاجمها وبيغتابها بأبشع الاتهامات، بس هنا ربِّ العزة مابيسيبش أولياءَه في المِحن، ربنا ألهمها بالسكوت.

لأنك لمَّا تكون على الحق، والمُجتمع اللي قدامك مريض وجاهز ينهش فيك ومُتحفِّز يغلطك، الدفاع عن النفس بيكون تضييع وقت واستهلاك للروح.. أحيانًا السكوت وتفويض الأمر لله بيكون أقوى رد، وربنا هو اللي بيتولى الدفاع عنَّك.

وبالفعل.. هي ماردّتش وأشارت للولد الرضيع عيسى، فاستغربوا جداً وقالوا بسخرية واستهزاء: (كَيْفَ نُكَلِّمُ مَن كَانَ فِي الْمَهْدِ صَبِيًّا)؟ وهنا بتنزل الصاعقة تفلِق دِماغهم، والطفل الرضيع بيتكلم في المهد وينطق بأول وأعظم حقيقة: (قَالَ إِنِّي عَبْدُ اللَّهِ آتَانِيَ الْكِتَابَ وَجَعَلَنِي نَبِيًّا) أول كلمة قالها سيدنا عيسى في حياته هي (إِنِّي عَبْدُ اللَّهِ) علشان يقطع الشكّ باليقين، ويسد الباب قدام أي حد هييجي بعدين يغالي فيه ويدّعي إنه إلـٰه أو ابن الإلـٰه، ونطق علشان يبرَّأ أمُّه، ويُثبت رسالته للدنيا كلها.

طيب، شافوا طفل بيرضع وبيتكلم.. هيؤمنوا بقى؟
طبعاً لاء، بقولك عندهم جينات قديمة والعِناد كمّل معاهم، ولما كَبَر سيدنا عيسى وبدأ دعوته، اصطدم بـ كِبار الكهنة اللي كانوا وقتها بيحرَّفوا الدين وعاملين منه سُلطة وبِيزنس لمصالحهم الشخصية، سيدنا عيسى كشف أوراقهم وبدأ يدعو للحق، فقرَّروا يعملوا معاه المكيدة العُظمى ويتخلَّصوا منه للأبد.

راحوا للحاكم الرُوماني وقتها وسخِّنوه عليه وقالوله: دا بيفسِد علينا الناس ولازم نِخلَص منه قدام الناس! وهنا الحاكم وافق تحت الضغط، وأصدر قرار بتنفيذ الحُكم علنًا.

وهنا بتيجي الآية اللي بتأسس عقيدة كل مُسلم على وجه الأرض، وتصحح أكبر تزييف حصل في التاريخ، همّا خططوا ورتِّبوا وجهِّزوا كل حاجة، وفعلاً نفِّذوا الحُكم الباطل دا، بس نسيوا إنهم بيتعاملوا مع (الْقَوِيِّ الْعَزِيزِ) وإنه مابيسيبش أولياءَه، والراجل اللي جابوه دا مكانش سيدنا عيسى (وَلَٰكِن شُبِّهَ لَهُمْ) 😃

مهو أنا قايلك إن القوي العزيز مابيسيبش أولياءَه، وربنا ألقى شَبَه سيدنا عيسى على راجل تاني (قيل إنه الخاين اللي دلُّهم عليه)، فأخدوه ونفذوا فيه الحُكم وهمّا مُقتنعين ومَخدوعين.

طيب وسيدنا عيسى؟
(بَل رَّفَعَهُ اللَّهُ إِلَيْهِ ۚ وَكَانَ اللَّهُ عَزِيزًا حَكِيمًا) ربنا نجَّاه، ورفعه للسماء حيّ، علشان يحميه من شرُّهم، ويأجل موعِده لآخر الزمان، في وقت هينزل يملى الأرض عدل ويُنفذ علامات الساعة الكُبرى.

وافتكر إن لو الدنيا كلها اجتمعت علشان تدبَّرلك مكيدة، وإنت في مَعِيّة الله وعلى الحق.. والله مكرهم كله تحت رِجلك، ومش هيضرك غير اللي ربنا كتبه (وَيَمْكُرُونَ وَيَمْكُرُ اللَّهُ ۖ وَاللَّهُ خَيْرُ الْمَاكِرِينَ).

٣. المحطة التالتة - بداية سورة المائدة:
بندخل بقى بقلبنا على سورة المائدة، والسورة دي بالذات ليها هَيبة ورَهبة مش طبيعية، ليه؟
لأنها تُعتبر "وثيقة الوداع" بين كلام ربنا وبين الأمَّة، السورة دي نزلت في أواخر حياة النبي ﷺ، وفيها آخر الأحكام وآخر التكاليف، تِحس إنها بتلَمْلِم كل اللي فات، ومحتاجة منك تركيز مضاعف، بدليل إنها أكتر سورة في القرآن اتكرر فيها نداء (يَا أَيُّهَا الَّذِينَ آمَنُوا) ١٦ مرة يا مؤمن.. يعني ركّز، وانتبه، الكلام دا ليك إنت شخصيًا!

العنوان العريض للسورة وأول أمر فيها هو أتقل كلمة على النفس البشرية: (أَوْفُوا بِالْعُقُودِ) الكلمة دي بتعمل فورمات لأي فكرة عن الفهلوة والخِداع في ديننا، والعقود هنا مش ورقة بتمضيها في شغل أو مصلحة أو شقّة، لكن العقد دا هو عهدك مع ربنا أولاً، وبعد كدا هي كل العقود والعهود اللي بتاخدها مع الناس، سواء كلمة وعدت بيها حد ولازم تعملها، أو عهد الزواج الغليظ اللي بين الأزواج وماينفعش يِتخان، وهكذا كل العقود والعهود اللي مافيهاش شيء مُحرّم.

ومن أعظم اللقطات في السورة دي، آية تُعتبر هي تَاج النعيم، آية بتخلي قلبك يطير من الفرحة، لدرجة إن أهل الكتاب قالوا لسيدنا عُمر بن الخطاب: لو الآية دي نِزلت علينا، كنّا هنعمل اليوم دا عيد: (الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا).
يا الله! الآية دي جميلة ومُبهجة جدًا، بتقولك: خلاص الدين اكتَمَل، والدستور اتختم بالكمال والمثاليّة، إحنا مش محتاجين أفكار مُستوردة، ولا قوانين شرعية متعدّلة، كل حلال ربنا أحله ليك فهو لمصلحتك، وكل حرام اتحرّم عليك فهو لحمايتك ونجاتك.

نيجي بقى لأخطر لقطة في السورة كلها:
ربنا -سُبحانه وتعالى- بيفضح صنف من أهل الكتاب، بدَّلوا كلام ربنا ولعبوا في الأحكام علشان تناسب أفعالهم ومصالحهم: (يُحَرِّفُونَ الْكَلِمَ عَن مَّوَاضِعِهِ) يعني مش بس بيكدبوا، لاء، دول بيطوّعوا الدين على مزاجهم، والمصيبة يا جماعة إن الصنف دا موجود وسطينا..

تلاقيه بيختار من الدين اللي يعجبه، واللي مايعجبوش يقولك: دا حديث ضعيف، ورأي قديم ومحتاجين نجدد! والناس دي رفضت حُكم ربنا علشان يرضوا أهواءهم، فربنا سَلَب منهم نور الهداية، لأن اللي بيرفض شرع ربنا دا إنسان مُجرم، ومايستحقش نِعمة الهُدى.

وقت الفِتن والمواقف الصعبة اللي محتاجة ثبات وقوّة وموقف واضح، هتلاقي الصنف المريض دا بيعمل إيه؟ (فَتَرَى الَّذِينَ فِي قُلُوبِهِم مَّرَضٌ يُسَارِعُونَ فِيهِمْ).. بيجروا على الباطل، ويقفوا في النُص، خايفين، مُتردّدين، وعايزين يمسكوا العصاية من النُص، لا معاك ولا عليك، هو مع المصلحة أينما كانت، علشان كل الأطراف ترضى عنه.

بس الدين -للأسف- مافيهوش منطقة رمادية، هو يا أبيض يا أسود، يا حقّ يا باطل.. إيّاك تُقف في النُص، خليك واضح ونفِّذ عهودك مع الله ومع النّاس، وقول دايمًا: (سَمِعنَا وأطَعنَا).

وكالعادة.. لو وصلت لحد هنا، ارفع البوست بتعليق وشير لعله ينفع غيرك.

#عبدالرحمن_مهدي #ختمة_الفهم

صاحبه ماما اتجوزت وهي ١٨ سنه وكمله دراستها واتخرجت واشتغلت ف بنك وبعدها علي طول زوجها اتوفي وسابلها طفلين بعد وفاته بسنة صادفت ف شغلها رجل اعمال وعبرلها عن اعجابه ورغبته بالزواج منها خافت تجيب زوج ام لاولادها واتنقلت فرع بنك تاني وعدي سنين طويلة جدا واولادها اتجوزوا وكل فين وفين لما بتشوف حد فيهم ومن شهر ونص قابلت الشخص ده تاني واتكلم معاها وقاله انه لسه بيحبها وعاوز يتجوزها طارت من الفرحة وهو مصمم انه يعملها فرح ف اوتيل وتلبس فستان رغم ان عندها 47 سنه دلوقتي بس نصيبك هيصيبك مهما اتأخر عشان كدا بلاش ترضو باي حد تحت أي ظروف اللي مكتوبله حاجه هيشوفها♥

السلام عليكم ورحمة الله وبركاته
في الركوع قل "سبوح قدوس رب الملائكة والروح"

وفي السجود قل "سجد وجهي للذي خلقه وصوره وشق سمعه وبصره بحولهِ وقوتهِ فتبارك الله أحسن الخالقين"

خدها على صفحتك إحياءً لسُنة النبي ﷺ

رد السلام يارفيق بثلاثون حسنة.

عندما طُعِن سيدنا عمر ( رضي الله عنه ) فأتي بالحليب فشربه فخرج الحليب من خاصرته .. فقال له الطبيب : أوصِ يا أمير المؤمنين فإنك لن تعيش ...!!

فنادى ابنه عبدالله وقال له :
ائتني بحذيفة بن اليمان ...

وجاء حذيفة وهو الصحابي الذي أعطاه الرسول ( صلى الله عليه وسلم ) جدولا بأسماء المنافقين ولا يعرفهم إلا الله ورسوله وحذيفة

وقال عمر والدماء تجري من خاصرته : يا حذيفة بن اليمان اناشدك الله هل قال الرسول اسمي بين المنافقين ...؟

فسكت حذيفة ودمعت عيناه وقال : ائتمنني على سر لااستطيع أن أقوله يا عمر

قال : بالله عليك قل لي هل قال رسول الله اسمي بينهم ...؟؟

فبكى حذيفة فقال :
اقول لك ولا اقولها لغيرك والله ما ذكر اسمك عندي ...!!

فقال عمر لإبنه عبدالله :
بقي لي من الدنيا أمر واحد ؟؟
فقال له : ما هو يا ابتاه ؟

قال :
أن ادفن بجوار رسول الله
يا بني اذهب الى عائشة أم المؤمنين .. ولا تقل أمير المؤمنين بل قل عمر يستأذنك انتي صاحبة البيت إن إذنت أن يدفن عمر تحت قدمي صاحبيه ...
فقالت : نعم قد كنت أعددت هذا القبر لي واليوم اتركه لعمر ...!!

فعاد عبدالله فرحأ وقال :
يا ابتاه قد إذنت ثم رأى خد عمر على التراب فجلس عبدالله ووضع خده على فخده فنظر إلى ابنه وقال له : لم تمنع خدي من التراب ؟
قال : يا ابتاه
قال : ضع خد ابيك على التراب ليمرغ به وجهه فويل عمر أن لم يغفر له ربه غدا

ومات عمر بعد أن أوصى ابنه فقال :ان حملتني وصليت عليّ في مسجد رسول الله فأنظر إلى حذيفة فقد يكون راعني في القول فإن صلى عليّ حذيفة فاحملني باتجاه بيت رسول الله

ثم قف على الباب فقل يا أماه ولدك عمر ولا تقل أمير المؤمنين فقد تكون استحييت مني فأذنت لي فإن لم تأذن فادفني في مقابر المسلمين !!

فحمله ونظر في المسجد فجاء حذيفة وصلى عليه ...!!
فاستبشر بن عمر وحمله إلى بيت عائشة ، فقال يا أمنا ولدك عمر في الباب هل تأذنين له ؟
فقالت : ادخلوه

فدفن سيدنا عمر ( رضي الله عنه ) بجانب صاحبيه...

رحم الله عمر بن خطاب :
ملأ الارض عدلا وخاف الله خوفا شديدا مع ان الرسول صل الله عليه وسلم بشره بالجنة .. فما بالنا نحن اليوم لايدري احدنا أربُّه راضٍ عنه ام لا ؟ ومع ذلك نلهو ونضحك ولانخاف ولا نخشى ولانفكر بمصيرنا بعد الموت...!!
اللهم احسن خاتمتنا وثبتنا عند الموت
اللهم اهدنا .. ثم اهدنا .. ثم اهدنا وذرياتنا..هداية لانشقى ولانضل بعدها أبدا .

إنَّه عِيدُنا؛ وإننا لمَسرورون،
طِبتُم طَابَت أعيادُكم برِفقةِ مَن تُحبّون، ولا قطع الله عن بيت عيدًا
عيدكم مُبَارك.')

‏عندما تلبس المرأة جلبابها الواسع ولا تسمع الموسيقى وتحافظ على صلواتها وتقرأ القرآن ولاتصافح الرجال وتجاهد نفسها للبعد عن المحرمات ليس معنى هذا أنها شيخة !

بل معناه أنها مسلمة))

تخيل لو أنك تزوجت من فتاة صالحة
وكنت لها زوج صالح
فَأنجبتم ذُرّية صالحة،

وهذه الذرية كبُرت وتزوجت بأُناس صالحين، وأنجبوا ذُرية صالحة تخشى الله أينما كانت

تخيل أنك بِحُسنِ إختيارك تبني -بفضل الله- مُجتمعٌ مُتدين بدأ بك وبِزَوجِك الصالح؛
اللهم ارزقنا الزوجة الصالحة والذرية الصالحة