نیمەشەوا
و
هەوا پاییزیان
زوقم ئاوێزانوو زەوقوو شارین
جگەرییێوە
دلێڕاسەو شارینە وەرمش بێزنان
ئاخێزگەو هەورەکا
هەڵمەو دەموو موسافران!
وەشتەرین سەرگەرمی
کڵاوەنە و چایێوە داخ
موسافرێوە
بە پاڵتاوێ گەرمۆ
چۆنەری دەمنۆ سەردی لەشیرە
تاکسییەکێ هاواروو ژیوای کەرا و ...
نارنجی پۆش
ڕەنگ زەردی خیابانی تەکنۆ جە لاشەیش
وەرم و مانیاییش
وێنەو فیلمەخاوەکا مارۆوە ویر
پەنجێ دەساش
زوڵفێ زەردێ باڵابەرزاو خیابانی
پەلکە کەرا لاشانوو جەدوەلەکا و
خەزانش دان کۆڵێشەرە و
وێشنە گما!
ئاخۆ بە چێشیۆ حەواسش وڵاویان؟
پاکی خیابانی
ئاورایی و دماڕۆ زاڕۆڵاش
یا
وەرمی نەرموو ئا کابرایە
چن قولانجێ سەرتەر جە باڵایش ڕاحەتیش وەرمەنە گمیان؟
نارنجی پۆش
پاییزی گزی دێ و
چەپڵەڕێزانوو ددٚاناش ویژدانی وڕنێ
نەزانێ
چەمەو خەمی
ڕوخساروو منۆ فوارەشا!

#شارۆ

دەگاوجـــۆڵانــــدێ

@joolandeh

شـەوە دیسـان سەرش دا لام بـە بێ تۆ
پەژارە و خەم قەتارەش بەست و بی کۆ

مەبینۆ پەترۆک یەک دەم زاموو دووریت
کـەرۆ هەر شەو زامی کۆنەی پـەرێم نۆ

#شارۆ

دەگاوجــــــۆڵانــــــدێ

@joolandeh

ئەی من جە تۆنە وڕیا وەی تۆ جە مننە جاری
ئەی مەسنەوی چەماو تۆ قەسیدەو ئێنتێزاری

شل دارە چەم نێگاو من غەزەڵ ورازوو پێشدا
سۆزم سەراپا سۆچۆ پەی وەختوو بێ قەراری

چەمێت کلوورەو هەنگی با بانە قیبلێ شێعرێم
زارم بە قەندوو دیدٚەیت دوورم وزۆ جە زاری

تا کەی جە دووری تۆنە خەزان خێز بۆ هەناسەم؟
به‌شکه‌م بی هەنگوو شێعرێ پەرێم ئاوارە باری

مۆموو چه‌مات ئه‌گه‌ر بۆم کلووره‌شێعرێ سازوو
ساڵە جە سەدٚ ترازنۆ ملۆنە پەی هەزاری

سا با بدٚانێ باڵێ پەپوولێ ئا چەماتە
گه‌ڵاخه‌زانم گێڵنا پاژه‌ره‌ژوو وەهاری

هانەو چەمی وەهاریا قەڵوەزەش پێکا دەممەو
پەی وشکەساڵی مەیلیت دا بۆ بینە هەساری

شارۆ بە تۆوە گوڵیۆ چووزه‌ مدٚۆ هەناسەش
ئەی من جە تۆنە وڕیا وەی تۆ جە مننە جاری


✍️ #شارۆ

دەگاوجــــۆڵانـــــدێ

@joolandeh

بازە
وێم دەو دەموو بێ تاقەتیەکاتۆ
سێبەریتەنە لاولاوێ بوو
پێچیەو باڵایتۆ
تا وشک بیەی

بازە
با حەزم
چڵوو زوڵفاتۆ پەی ماچێوەت
ئاوێز بۆ

دەریاو بیەیتەنە شەپۆلێو بوو
بێ ئۆقرە
تا مەحف بیەی

دەمێوەن خەیاڵ
سەرەنە ڕەمان
چرکێو سەدٚ جارێ نیشۆ سیماتۆ

بازە
تۆپەڵە وەروێو بوو
سیروانوو وەشەسیاییت
بەرۆم تا تاویایۆ

گڵویتەنە گورانیێو بوو
گجار وانۆمۆ
مریچڵێ دەمیت

بە بە باخ و
منیچ باخەوان
باڵاتۆ مەزە و زەریفی تەکنوو

من
وەڵتەر جە نیۆتۆنی
وزەو جازێبەیم چەماو تۆنە دی!

بازە
بە تۆوە خەم پەزێرە بۆ

من،
"من"یم تۆنە گمیان
وێتەنە وینەمۆ
عەمرێو ڕازینا بە تەناسۆخی!


✍️ #شارۆ

دەگاوجــــــۆڵانــــدێ

@joolandeh

📖 کۆرپەشێعرێ

زمسانم کەردٚەن
بە ئاڵاو ئاشتی
هیشتای چەمەکێش
ئاویر هۆرخێزنا!

................

پاسە چەماش مات کەردٚەنا
مەگەر بە خیاڵ
تەفسیروو نێگایش کێشوو جادەرە!

#شارۆ🌺

دەگاو جـــــۆڵانـــــدێ

@joolandeh

🔆 #حەکایەتێوە_پەڕ_جە_خەفەتی

مامۆسایێوە یانەنشین کەناروو خیابانێوەنە ماتڵوو ئۆتووبووسوو خەتی بێ.
جوانێوە بە bmw مودێل تازە وەروو دەموو مامۆساینە داش ترمۆز.
جوان ڕوەش کەردە مامۆسای و واتش:
مامۆسا فەرماوە سوار بە تا یاونووت مەخسەدٚ.
مامۆسای وات: بەخشە جەنابتا؟
جوانی وات: مننا فڵانی، فڵان شاگردوو جەنابیتا بێنا.
مامۆسای وات: ئاهاااا، ئاماوە هۆشم، ویرکاریت فرە لاواز بێ، چەنی تاوانت وێت دەی ئی تیپی؟
جوانی وات: هیچ، جنسێوە مسانوو دە تمەنێ، دە دەرسەدٚێ کێشوو سەرش و ورەشووش چل تمەنێ!
مامۆسای وات: بازەم هەڵە حەسابت کەرد!
دە دەرسەدێ کێشی سەرش کەرۆ یانزە تمەنێ.
جوانی وات: مامۆساگیان، ئەگەر قەرار بۆ پێسە جەنابیتا درووس حەسابش کەروو، ئەلعانە مشیۆ پێسە شمە ماتڵوو ئۆتۆبووسی بیایێنێ!

بێ سەوادٚێ بەردەنشاوە و دنیا بە کامشانە
چننە ئی قسێ ئاشنا و نزیکەنە، بێ هۆ نیا کە گردٚوو مامۆسایاو گلێرگەی جە وەزعێوە سەختەی ئێقتێسادینە ژیوا.

🖊جە فەزای مەجازی

✍ #شارۆ

دەگاو جـــــــۆڵانــــــــدێ

@joolandeh

وەشەسیایت دڵنە پەیم بێ ئەوپەڕا
گلێنیەو دیدٚەیم دایم پەیت تەڕا

بۆ بە ژوانێو وەهاریم دێونە
شکۆ ژیوای من تۆوە بە فەڕا

#شارۆ

دەگاو جـــــــۆڵانـــــــدێ

@joolandeh

دڵە! کەم ماڕە تۆ میناو دڵی
وێت کەرە بە گوڵ پەی ئی بوڵبوڵی

نیشۆ سەرتەڵوو خونچەی نەگوڵیایت
دەماوەش تەقۆ چوون تافوو بڵی

#شارۆ

دەگاو جــــــۆڵانـــــــدێ

@joolandeh

‍ ‍

شنەی بۆ وەشوو هەورامانی مەی
چوون بۆی وەرکەمەر پەی دامانی مەی

بەرزەڵنگوو کۆی پێچیان باڵاشەو
ساڕێش پەی زامی بێ دەرمانی مەی

پەی جەسەی مانیاو هەورامان ماوای
شنەی فێنکش پەی سامانی مەی

جەرگ و دڵ سۆچۆ وێنەی بەنزین پەیش
ئارامی پەی ڕۆح، لەش و گیانی مەی

کابەم پەی چێشی بۆنە قیبلەگام
تەوەنیش پەرێم تەختوو سانی مەی؟

کاروون و «نیل»شا فلسێو مەئێژۆ
قرمەو تافەکاو پاو سیروانی مەی

بۆوەو نان ساجیش بدٚۆ دەماخم
چوون پڵاو و گۆشتوو یانەو خانی مەی

چەم بڕی هەر کۆ سروشتش هەزار
شیرین جە وێنەو هێندووستانی مەی

پەی چێشیم دەنگوو داوودی نەبی
کە سیاچەمانەو کا عوسمانی مەی؟

کەی جەننەت تاوۆ وێش بدٚۆ نیشان
وەختەی نامێوە جە داریانی مەی؟

بەهەشتم چێگە کەردەن ئەو پاوە
پەی من کە شنەو هەورامانی مەی


✍ #شارۆ

دەگاو جـــــــۆڵانــــــدێ

@joolandeh

چوون کەویری لچ پڕووزیا بێ وەهارنا، دیدٚەکەم
دوور جە کەپر و شەوبۆ زوڵفات، بێ هەوارنا، دیدٚەکەم

خەیلێ وەختەن دڵ مەناڵۆ پەی بیەو تۆ هەو کەسم
پێسە بێمارێوە سەرعی نالەبارنا، دیدٚەکەم

ها خەزانش کەرد بە یەکجار داروو عه‌مریم دوور جه‌ تۆ
تا بزانی پێسە قەیسی زردەوارنا، دیدٚەکەم

دوورەوەختێن پەی دیەو تۆ لاعەلاجا ناوەشیم
بێ تەبیب و دا و دەرمان دەردەدارنا، دیدٚەکەم

تا کە سیمات نەگنۆ تیشکەش ئەو گلێنەو ئی چەما
دوور جە تۆ دایم بزانە ڕوو نسارنا، دیدٚەکەم

ڕۆح کە عەمرێن پەی نگاو تۆ، دڵ بەسا ئەو تان و پۆش
تا کە سەر مەجمۆنە ئەلحەدٚ ئینتیزارنا، دیدٚەکەم

من هەڵۆیێو وێڵەچەمنا عاشقەڕاوەو بەرزەکۆیت
سا شەبەقیە سەردەمانێن بێ تەوارنا، دیدٚەکەم

#شارۆ

دەگاو جــــــۆڵانــــــدێ

@joolandeh

ـ🌺 هەورامان

شنەی بۆ وەشوو هەورامانی مەی
چوون بۆی وەرکەمەر پەی دامانی مەی

بەرزەڵنگوو کۆی پێچیان باڵاشەو
ساڕێش پەی زامی بێ دەرمانی مەی

پەی جەسەی مانیاو هەورامان ماوای
شنەی فێنکش پەی سامانی مەی

جەرگ و دڵ سۆچۆ وێنەی بەنزین پەیش
ئارامی پەی ڕۆح، لەش و گیانی مەی

کابەم پەی چێشی بۆنە قیبلەگام
تەوەنیش پەرێم تەختوو سانی مەی؟

کاروون و «نیل»شا فلسێو مەئێژۆ
قرمەو تافەکاو پاو سیروانی مەی

بۆوەو نان ساجیش بدٚۆ دەماخم
چوون پڵاو و گۆشتوو یانەو خانی مەی

چەم بڕی هەر کۆ سروشتش هەزار
شیرین جە وێنەو هێندووستانی مەی

پەی چێشیم دەنگوو داوودی نەبی
کە سیاچەمانەو کا عوسمانی مەی؟

کەی جەننەت تاوۆ وێش بدٚۆ نیشان
وەختەی نامێوە جە داریانی مەی؟

بەهەشتم چێگە کەردەن ئەو پاوە
پەی من کە شنەو هەورامانی مەی

✍️ #شارۆ

🌺 سەبتی جەهانی هەورامانی پیرۆزا

دەگاو جــــــــۆڵانـــــــدێ

@joolandeh