#دوخەوا
دو، وڵێشە، گیواوو ڪەشی
پوینە، خۆژە، سوورەبنە، پسڵ

دوەڪە نمەبۆ دوی تازە بۆ. نەختێو ڪونە و هەس. ڪەرمێش دلێ تیانێ و بە دانیە مەلاقه حەتا بەیوە قۆڵێ خولش مدٚەیمێ و تا نەپڕۆسقیۆ. خاستەر ئانەنە وەختیە دوەڪە چیان و هەڵمیش پەنە نەیاوێنە نەختێو جە وڵێشەڪێش ڪریۆنە. تا ئەوەڵ قۆڵش نەدٚو دەس جە شێونەیش نەکێشمێ. هەڪە ڪەوت وردە قوڵێ وردە وردە وڵێشەڪێش پەنە زیادٚە ڪەرمێ. و ئا گیواوەیچە هەر یۆ با پاو تەعبەو وێش و بیەیش جە مەحاڵەڪێشەنە ورد ورد جەنمێش و ڪەرمێشەنە و عال تێڪەڵش ڪەرمێ. دمایی گڕوو چیروو تیانەڪێ ڪەم ڪەرمێوە وەونای گریۆ تا وڵێشەڪێش تاویۆوه و نەختێو هەسەوە بۆ.

✍#شەریفی_بێساران
"#هاژە"

دەگاو جــــــۆڵانـــــــدێ

@joolandeh

🌾🌸🌾🌸🌾🌸🌾🌸🌾🌸🌾🌸🌾🌸

پیاوی بازاری خەتایەش کەردە و حاکمی زیندٚانی کەرد. ژەنەکێچش لوا لاو ڕەفێقێوەش و واتش: پەی چێشی نیشتێنیەرە هۆرزە کاریە کەرە!
پیایچ بە قسێ ژەنەکێش کەرد و شەویە قورخەو دیواروو قەڵاکێرە لوا و پاسەوانەکاو قەڵاکێش ڕەدێ کەردێ و نەزاناشا تا وێش یاونا لاو ڕەفێقەیش. کابرای زیندٚانیچ وەش‌حاڵ بی و واتش: ئافەرین براڵە دەس وەش. زوو کەرە ئا زەنجیرا کەرەوە نەکوو پاسەوانەکێ بیا.
بەڵام ڕەفێقەکەش واتش: مزانی چی سختیەم کێشاینێ؟ دیواروو قەڵایرە وێم کێشان سەر، پاڵوو پاسەوانارە ویەردێنا، پەی تۆ چن وێم وستەن خەتەر.
لوای پاڵوو دیواروو قەڵای بە تەنافە وێشا کێشا سەر، ڕەفێقەی واتش: مزانی چی سختیەم کێشاینێ؟ دیواروو قەڵایرە وێم کێشان سەر، پاڵوو پاسەوانارە ویەردێنا، پەی تۆ چن وێم وستەن خەتەر.

بە ئەزیەت وێشا کێشا سەر، پی حەدٚە گەرەکشا بێ پڕارە واری دیسان ڕەفێقەی واتوە، مزانی چی سختیەم کێشاینێ؟ دیواروو قەڵایرە وێم کێشان سەر، پاڵوو پاسەوانارە ویەردێنا، پەی تۆ چن وێم وستەن خەتەر..

کابرای زیندٚانیچ دەسش کەرد هاوار و دادٚ کەردەی واتش پاساوانا بیاودێ ئی کابرا گەرەکشا من بەرۆ و ئازادم کەرۆ.
تا پاسەوانەکێ ئامای کابرا بەرشیەبێ.
پەرساشاوە جە زیندٚانیەکەی و واتشا: پەی چێ قێڕە قێڕت کەرد خۆ تۆ تاوێنی بەرپشی؟
کابرایچ واتش: پەنج ساڵێ زیندٚانوو شمەنە بوو خاستەر چانەینە تەماموو عەمریم زیندٚانی منەتەو ئادٚینە بوو!

جە ژیوایتانە بمردێ، فەقیری تاقەت باردێ، لاشەتا وزدێ سەختی، بەڵام چیروو باروو منەتەو هیچ کەسی نەلدێ.
هیچ‌کەس
هیچ‌کەس.....

باروو حەماڵای بە کوڵ کێشتای سەخت نیا، سەخت ئانەن بلی چیروو باروو منەتەو ناپیایی...

هۆرئەوەگێڵنای:

✍#شەریفی_بێساران
"#هاژە"

دەگاو جــــۆڵانـــــــدێ

@joolandeh

کاتێ سەردانی بەریتانیام کرد
ڕۆژنامەنوسێک پێی وتم...
بۆچی ئەو پارچە قوماشە لەبەر دەکەی کە تەواوی جەستەت داناپۆشێت؟!
وتم چونکە من نوێنەری میلەتێکی ڕووت و برسی دەکەم .

#گاندی ✍

🌷🌷🌷🌷🌷ــــــــــــــــــــــــــــــــ

وختێو لوانی پەی بریتانیای
ڕۆنامە نویسوێیوی پەنەش واتانی.
پەی چێ ئا تیکە پارچەیە کەری وەرەت کە گردٚوو لاشەیت پێویو؟
واتم چوونکە من ڕابەری خەڵکێوە کەروو کە ڕووت و ئاوران ..

#گاندی

هۆرئەوەگێڵنای؛
✍#شەریفی_بێساران


دەگاو جــــــۆڵانـــــــدێ

@joolandeh

بڕێیو وەختێ گنمێ دلێ گومێوە قووڵێ خۆلما مدٚۆ. بێ سەر و شۆن ملمێ، نە ئینە هەن نۆقمێ بیمێ نە ئینە هەن مەلەوانی فێرێ بیمێ ڕزگار کریەیمێ.
تەنیا هەوسیەیمێ و گێجێ گنمێ.😔

✍#شەریفی_بێساران
"#هاژە"🌷

دەگاو جـــــۆڵانـــــــدێ

@joolandeh

‍ #من_ژەنینا

ئەگەر وەشەسیاییم چەنە گێرا، دڵم ترەڪنا و ئەنجەش ڪەرا، فەرمان بدٚا و پاچەم ڪەرا و ڪەرام پەیڪەر هاڵووچنامەرە و بە زۆقم دەسێم ڕچنا و بە ئاسن داخێم ڪەرا، دەمیم گێرا، هەناسەم بڕا. دیسان هەنا و من زیننێنا، هەناسە ڪێشوو نەمەردێنا..


#من_ژەنینا

جە جنسوو من دڵ گنۆ تەپە، پەپوولێ وەڵاتی گنا فڕیەی و باخ و مێرگی ڕەنگین ڪەرا، گیانشا هەن جم و جووڵ ڪەرا، بەڵام داخەڪێم بڕێوەشا بە زۆر گیانیشا گێرا، جەرگوو من وڵ‌وڵ ڪەرا. بەڵام دیسان جەرگیم بە گڵ ساز ڪەرووە زیننێ مەنوو، شاخ کەرووە.


#من_ژەنیەنا

ئەگەر بەیا و ناقیم گێرا، پەل و پۆم ئەنجە ڪەرا، چڵ و بەرگم چەنە گێرا، چەنی خاڪی بەینما وەشا و دەسەملانوو خوڵەپۆتێ بوو چەنگیم چەنەش گیرێ ڪەروو چەمەڕوانی هەرسا نیەنا خاڪی فیسنا و تەرسیم بڕا، هەڵمەو دەمیم ڪەروو ئاوی ڕێخێم هێقم و خەمیم تاسنوو. دیسان هەنا و گەڵا مزنوو، بە خەڵفی جوان سێوەر ڪەروو بە شنەو وای گنوو لەنجە. بازی بەروو عەین هەورێشە. دڵم وەش بۆوە و گنووە گەشە..


#من_ژەنینا..

پەشتیم گێری یام نەگێری، باڵێ فڕیەیم چنە گێری، گجی وەریم بە دارەکۆڵێ وڵ‌وڵ ڪەری گوڵێش ژاڪنی و پەل‌پەل ڪەری، گردی تەڪنی و پێسەو جاڕێ باهێر ڪەری، عەتروو گوڵیم ملۆملۆ حەتا چەمێ ڪار ڪەرا گەردش بە وا سەما ڪەرۆ چۆپی ڪێشۆ و هاوار ڪەرۆ ڕۆخسارێیوی چا دوور دوورا ماچەش ڪەرۆ گیان گێرۆ، گەشش ڪەرۆ ئاوەزەنی تازە ڪەرۆ گوڵ ڪەرۆوە
زوو گەش بۆوە دڵوو خاڪی زوو تەقنۆوە، زوو گنۆ ڕا و بەر گێرۆوە، دیسان عەترش مەس کەرۆوە لووتەو ناحەزا یاس ڪەرۆوە.



#من_ژەنینا...

نە بە زۆقم تاوا ڕچنام
نە بە گڕ تاوا سـۆچنام
نە ونی زامێم هەدٚەر ملۆ
نە خاڪوو چێرپایم لافاو بەڕۆش
نە دڵم بە ئێش هەتیم گنۆ
نە زامی قووڵ جەرگیم جەنۆ
عەترم ملۆ هەزار یاگێ
جەژنە گێروو پەی ئازادی
سەروو گجیم کاڵوو بە گوڵێ
بوەی وەشە وزوو وەڵاتیم
بە ئێشق وەشی ڪەروو خەڵاتیم
گنوو سەما خەمێم ڕەما
تیجیەو وەری وزوو دەسام
شەوێ تاریڪەی ڪەروو بە ڕۆ
ڪارێ فرێ دەسم خێزیا
من پۆڵانا و ئاسن نیەنا
پەشتیم گێری یام نەگێری، وێم حەر هەنا هەمیشەی و هەتایەنا، نیمێ نیەنا و تەمامەنا........

#من_ژەنینا
#من_ژەنینا
#من_ژەنینا.......



✍🎤نوویستەی و وانای؛

#شەریفی_بێساران


دەگاو جـــــــۆڵانـــــــدێ

@joolandeh

"وەتەن"

قەسەم بە ئەشقی پاکی بێ گەردت
بە هەناسەی سەرد، ڕۆخساری زەردت

قەسەم بە هەنار سەرچڵی دارت
جادەی قەمچ و پێچ ڕای دەگا و شارت

قەسەم بە وەفا و عەهد و پەیمانت
هەسارەو باخی و هانە و چەمانت

قەسەم بە هەراڵەی باخی ساوانت
بە چووزه پوینەی لای شەتاوانت

قەسەم بە سەردای سەختی زمسانت
بە یەخی ڕچیای پلوورە بانانت

قەسەم بە بەرزی باڵای دارانت
هاژەی شەقە جۆی سەر کەڵەکانت

قەسەم بە کاشتێ و هیتیارەکانت
گەڵای پایێزی و وەرزی خەزانت

حەتا مەنێنا هەر تۆ یادٚ کەروو
بە وەشی تۆوە دڵم شادٚ کەروو

✍#شەریفی_بێساران

دەگاو جـــــــۆڵانــــــــدێ

@joolandeh

‍ #هیچ_وەخت_وێت_نەواڕی👌

لوانی دلێ دووکانوو کابراێیوی کامپیوتر وەش کەری و واتم:
بەخشەم کاکە ئی تەبلێتمە هەر جە وێشوە کۆشیاوە، دووکانداری واتش:
باشەن سەرەنجێوەش مدٚوو گێرە LCD کێش سۆچیای بۆ.
ئەگەر ئانە بۆ واڕووش پەیت؟
واتم: بەڵێ زەحمەتش کێشە. بەڵام ئەگەر پەیتا کریۆ نەختێو زووتەر فرە لازممەن.
واتش: سەوای دماو نیمەڕوێ تەشریف بارە بەرشوە.
لاو وێموە واچێنا گێرە ۷۰۰ تا ٨۰۰ هەزاریە خەرجش بۆ. ڕوێ دماینش لوانیوە، کابرا تەبلێتش ساق و سالم داوە دەسموە.
واتم: هەقوو زەحمەتیت؟
واتش: هیچ، کاریێوەش نەبێ تەنیا کابلوو " فِلَتش" شل بیەبێ نەختێو تنم کردوە هەر ئانە.
دەس وەشیم کەرد و لوانی بەر، نیشتانی دلێ ماشینی و دڵم تاقەتش نەگێرت، دلێ دڵوو وێمەنە واتم خۆ تاوێ هەر چی مەیلش بیایا چەنەش سانایانی منیچ وێم حازر کەردەبێ.
پاڵوو پاساژەکێنە شیرینی وەرشێوە بێ، بەسێو شوکەڵاتێم سانای و لوانیوە پەی لایش و نیایم سەروو پیشخانەکەیش و واتم:
دنیا بە کەسانیە پێسەو تۆ نیازش هەن، هیچ وەخت وێت نەواڕی.
سەروو عەینەکەکاشرە سەرەنجێوەش دانی و یاوانە قسەکێم.
واتش: قسەکێ تاتەیم دووبارێ بیەوە پەیم، چن وەختێ چێوەڵی عەمرەو خودٚایش کەردە، ئادٚیچ هەر ئانەشە پەنە واتانی.
هەمیشە خاسەکەرە و وێت نەواڕی حەتا ئەگەر خراوەیچت چەنی کەرا.
وەختێو گێڵانیوە دلێ ڕاینە پانەیە فکر کەرێناوە کە واڕیای بنیادٚمەکا وەخت و زەمان بەرۆ. تەنیا چێوێو ئێمە هەدایت کەرۆ پەی درۆسکاری و ئەمانت داری، تاقە جمڵێوە سادێنە کە یۆ دەموو کەسێیوی عەزیزیشوە بژنەوش...

بنیادٚمی خاس هیچ وەخت نمەواڕیۆ..👌

"از هزاران، یکنفر اهل دل اند
مابقی تندیسی از آب و گِل اَند"



✍هۆرئەوەگێڵنای:
#شەریفی_بێساران

دەگاو جــــــــۆڵانــــــــدێ

@joolandeh

پرشنگوو چەمەکاتا ڕۆجیاروو حەفت ئاسماناش بەزنان...

زردە خوێ سەروو لچە سەردا بەردەکاتا ئۆمێدوو ژیوایە وەشوو دماڕوی خۆلقنۆ..

هێزوو دەسە نەمانیایەکات ڕۆحوو هەر واڵە و براڵێوە بێ‌ڕەحمی چڵەکنورە...

دەندێ پۆڵایێت قەڵەموو هەزاران مێعمارە بێ ویژداناش لەرزنانوە...

تۆ گەورەتەرین قارمانەو دنیاینێ، ئە بەهێزتەرین شاجوانەو دلێ لێنزوو دوربینەکا.

گلینەو چەمەکاتا فیلم و عەکسوو هەزاران وێنەگێراش وسەن کۆنە پەستوو دنیای ناحەزێ....



✍#شەریفی_بێساران

دەگاو جـــــۆڵانـــــــدێ

@joolandeh