کیا عورتیں نماز تسبیح پڑھا سکتی ہیں اس کے بارے میں جواب ارشاد فرما دیں؟
سائل : محمد ذیشان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نہیں پڑھا سکتی۔ اس مسئلہ کی تفصیل کچھ یوں ہے کہ فرائض و واجبات کی ادائیگی کے ساتھ نوافِل کی کثرت یقیناً رب تعالیٰ کے قُرب کا ذریعہ اور کثیر فضائل کے حُصول کا سبب ہے ، یہاں تک کہ کل بروزِ قیامت فرائض کی کمی بھی نوافِل سے پوری کی جائے گی۔
لیکن یاد رہے عورتوں کا مِلکر صلوٰۃ التسبیح یا کوئی بھی نماز جماعت کے ساتھ ادا کرنا ، جائز نہیں ، کیونکہ عورتوں کی جماعت مطلقاً مکروہِ تحریمی ہے ، خواہ وہ فرض نماز ہو ، صلوٰۃ التسبیح ہو یا دیگر نوافِل ہوں اور امام چاہے پہلی صف کے درمیان کھڑی ہو کر امامت کروائے یا آگے بڑھ کر ، بہرصورت مکروہ ہے ، بلکہ آگے کھڑی ہو کر امامت کروانے میں کراہت دوہری ہو جائے گی۔
عورت کا امامت کروانا مکروہ تحریمی ہے چاہے فرض نماز ہو یا نفل(جیسے صلوۃ التسبیح وغیرہ)،عورت کا صف کے درمیان کھڑا ہوکر یا صف سے آگے بڑھ کرامامت کروانا بھی مکروہ ہے۔
علامہ علاءالدین حصکفی (المتوفی1088 ھ) فرماتے ہیں:”یکرہ تحریما جماعة النساءولو فی التراویح فی غیر صلوة جنازة،،۔
ترجمہ:نماز جنازہ کےعلاوہ عورتوں کی جماعت مکروہ تحریمی ہے اگرچہ نماز تراویح ہو۔ (درمختار مع ردالمحتار ج 2،ص 365،کوئٹہ)
اس عبارت کے تحت خاتم المحققین علامہ محمد امین ابن عابدین شامی علیہ الرحمہ
(المتوفٰی 1252ھ )فرماتے ہیں:”افاد ان الکرھة فی کل ما تشرع فیہ جماعة الرجال فرضا او نفلا،،
ترجمہ:معلوم ہوا کہ ہر وہ جماعت جو مردوں کے لئے مشروع ہے وہ عورتوں کے لئے مکروہ ہے چاہے نماز فرض ہو یا نفل۔
(درمختار مع ردالمحتارج 2،ص 365، کوئٹہ)
علامہ فخر الدین عثمان بن علی الزیلعی (المتوفیٰ 743ھ) فرماتے ہیں:”اما قیام الامام وسط الصف وھو مکروہ او تقدم الامام وھو ایضاً مکروہ فی حقھن“
ترجمہ:(عورتوں کی)امام کا صف کے درمیان کھڑا ہونا یا آگے کھڑا ہونا ان کے حق میں مکروہ ہے۔
(تبیین الحقائق، باب الامامة،ج1،ص135،مکتبہ امدادیہ، ملتان)
صدر الشریعة مفتی محمد امجد علی اعظمی رحمة اللہ علیہ (المتوفیٰ 1367ھ) فرماتے ہیں:”عورت کو مطلقاً امام ہونا مکروہ تحریمی ہے فرائض ہوں یا نوافل“۔
(بہار شریعت، ج 1،ص569، مکتبة المدینہ، کراچی)
واللہ اعلم بالصواب
کتبہ:عبدہ المذنب سید کامران عطاری المدنی عفا عنہ الباری
اپنے سوالات لکھ کر(آڈیو وائس میسج میں نہیں)اس نمبر پر وٹس اپ کریں۔
03155322470
یا اس لنک پر کلک کر کے وٹس اپ پہ میسج کریں۔
https://wa.me/message/LNJS36RMGEVAD1
یا فیس بک پر اس آئی ڈی پر میسج کریں۔
https://www.facebook.com/SyedKamran786
04/09/2020
07:28 Pm