سَنہ 1441ہجری کا آخری مہینہ گزر رہا ہے ، رب تعالیٰ عافیت سے گزارے ۔
اِس سال بہ کثرت علما و مشائخ اس دارِ فانی سے رخصت ہوئے ہیں ۔
آج ہم نے ارادہ کیا ہے کہ اِس سال وصال فرمانے والے جملہ علما و مشائخ کے ایسے مستند علمی و عملی حالات ، کتابی شکل میں جع کردیے جائیں ، جن سے تادیر نفع حاصل کیا جاسکے ۔
اس کام کو تحریری شکل دینے کے لیے اَدیب و اَریب ، حضرت مولانا محمد حسن رضا مشرف القادری حفظہ اللہ کمر بستہ‌ہوچکے ہیں ، اللہ پاک ان کی مدد فرمائے ۔
اس سلسلے میں آپ سب کی مدد کی ضرورت ہے ، کیوں کہ یہ کام ہم سب کے مل کر کرنے والا ہے ، اور یہ ہم سب کی کوششوں سے ہی بخوبی پایہ تکمیل تک پہنچ سکتا ہے ۔
آپ کو جس جس عالمِ دین اور پیرِ طریقت کے متعلق مستند معلومات ہیں ، براہِ کرم‌ اس واٹس ایپ نمبر پر دیجیے ، اور نہ ختم ہونے والا اجر کمائیے ۔

03013189252📱

( پاکستا‌ن کے علاوہ دوسرے ممالک والے احباب: 00923013189252 )

✍️لقمان شاہد
12-12-1441 ھ

کشمیر اور بابری مسجد کا حل آنسو نہیں ، عملی اقدام ہے ؛ جیسے ترکوں نے آیا صوفیہ کے لیے کیا ۔

بچوں اور بڑوں میں خالص اسلامی فکر پیدا کریں ، اسلامی فکر رکھنے والوں کو‌ حکومتی عہدوں پر فائز کروانے کی بھر پور کوشش کریں ۔

غلبہ فکر سے حاصل ہوتا ہے ، آنسو بہانے ، نعرے مارنے ، احتجاج کرنے ، ریلیاں نکالنے اور گانے گانے سے نہیں ۔

مصطفی کمال ، جدید ترکوں کا " قائد اعظم " ہے ۔
یہ ایک بے دین اور اسلام دشمن شخص تھا ، لیکن اِسے آج بھی" اَتاتُرک " یعنی ترکوں کا باپ کہا جاتا ہے ۔

موجودہ تُرک صدر کی سوچ اور فکر اتاترک سے یکسر مختلف ہے ، اور لازمی طور پر وہ اس کے ملحدانہ عقائد و نظریات سے بھی بیزار ہوں گے ۔

لیکن .............

انھوں نے اس کی مخالفت کے بجائے ، اس کے پھیلائے ہوئے کفر و الحاد کو ختم کرنے کی کوشش کی ہے ، اور اس میں کامیاب بھی رہے ہیں ۔

اتاترک نے ہیرو بننے کے لیے جن مجاہدین اسلام سے تعلق توڑا تھا ، موجودہ‌ صدر " اتاترک کو کچھ کہے بغیر " انھی مجاہدین سے اپنی قوم‌ کا رشتہ‌بحال کررہے ہیں ۔

اللہ کرے پاک و ہند والوں کا بھی جھوٹے قائدوں ، اور جعلی ہیرووں کے بجائے :

محمد بن قاسم ، محمود غزنوی ، شہاب الدین غوری ، قطب الدین ایبک اور شیر شاہ سوری سے رشتہ جڑجائے ؛ تاکہ یہ بابری مسجد اور کشمیر پر نوحے اور ترانے نہ لکھیں ، " آیا صوفیہ " کی طرح ان سے آنکھیں ٹھنڈی کریں ۔

کئی دفعہ ایسا بھی ہوتا ہے :

" بُرے کی برائی ختم کردیں تو برا خود بہ خود ختم ہوجاتا ہے ، لیکن ............. ہاتھ دھو کر بُرے کے پیچھے ہی پڑے رہیں تو برائی ایک نئی صورت اختیار کرلیتی ہے ۔ "

✍️لقمان شاہد
5-8-2020 ء

اقبال مرحوم کا ایک دعائیہ‌ کلام ہے ؎

یا ربّ! دلِ مُسلِم کو وہ زندہ تمنا دے
جو قلب کو گرما دے ، جو رُوح کو تڑپا دے


اِس کا ایک شعر ہے ؎

بھٹکے ہوئے آہُو کو پھر سُوئے حَرَم لے چَل
اِس شہر کے خُوگر کو پھر وُسعتِ صَحرا دے

فارسی زبان میں ہَرَن کو آہُو کہتے ہیں ۔
آہو کئی خوبیوں کا مالک ہوتا ہے ، جن میں ایک تیز رفتاری بھی ہے ۔
کہا جاتا ہے :
ہَرن 90 کلومیٹر فی گھنٹے کی رفتار سے بھی دوڑ سکتا ہے ۔ ( واللہ اعلم )

تیز دوڑنا اگرچہ ہَرن کی فطرت کاحصہ ہے ، لیکن اسے تیز دوڑنے کے لیے صحرا ( یعنی ایسا کھلا میدان ) چاہیے ، جہاں نہ کوئی درخت ہو ، نہ کوئی فصل ہو ، نہ کوئی روک رکاوٹ ۔۔۔۔۔۔۔

ہُوا یہ کہ:
ہرن صحرا کا راستہ‌ بھول کر شہر میں آگھسا ، یہاں اِسے طرح طرح کی رکاوٹوں کا سامنا کرنا پڑا ، جنھوں نے اس کی دوڑ کوتاہ کردی ۔
یہ بے چارہ دوڑنا چاہتا تھا ، لیکن شہر کی بندشوں میں دوڑ نہیں سکتا تھا ۔

آپ بخوبی جانتے ہیں کہ گاڑی جتنی مرضی تیز رفتار ہو ، روڈ کے بغیر دوڑ نہیں سکتی ؛ اُس کی تیز رفتاری سے اُسی صورت محظوظ ہوا جا سکتا ہے جب وہ صاف ستھرے روڈ پر فراٹے بھرے ، راستے میں کوئی روک رکاوٹ نہ ہو ‌۔

اب شعر سمجھیے!

مسلمان ایک ہَرَن کی طرح تھا ، جس کی دنیا جہان فتح کرنے کی رفتار بہت تیز تھی ، لیکن یہ بھٹک گیا ۔
صحراے حرم ( اسلامی فکر کے میدان ) کی طرف جانے کے بجائے ، شہر ( فرنگی فکر ) کی طرف جا نکلا ، جہاں اِسے طرح طرح کی رکاوٹیں ( فیشن ، عیاشی ، بے راہ روی ، مایوسی ، غلامی ، بزدلی وغیرہ ) پیش آئیں ، جنھوں نے اس کی دوڑ کوتاہ کردی‌۔
افسوس اس پر بھی ہے کہ ایسا کیوں ہوا ! لیکن..........
اس سے زیادہ افسوس اس پر ہے کہ:

یہ آہُو شہر کا خُوگر ( عادی ) ہو کر ، اپنے صحرا کا راستہ بھول بیٹھا ۔

اے میرے رب! میں اس بھٹکے ہوئے آہو کی فریاد کس سے کروں ...... !!

میرے مالک ! تجھی سے عرض ہے کہ‌ اِس ؎

بھٹکے ہوئے آہُو کو ، پھر سُوئے حَرَم لے چل
اس شہر کے خُوگر کو پھر وسعتِ صحرا دے

✍️لقمان شاہد
6-8-2020 ء

کیا آپ سمجھتے ہیں کہ:

بیروت ، عَجمان ، نَجف اور جدہ میں آگ کا بھڑک اٹھنا اور ہزاروں مسلمانوں کا اس کی زد میں آجانا ، املاک تباہ ہوجانا سب " اچانک " ہوا ؟؟

ہرگز نہیں !!

ایساپوری منصوبہ بندی کے ساتھ ہوتا ہےاور مسلم ممالک کے خلاف منصوبہ بندیاں عرصہ دراز سے چل رہی ہیں ‌۔

ان مظالم کاحل ، امت مسلمہ کا اتحاد اور مسلمان حکمرانوں کا شعور ہے ۔

اس سلسلے میں ہم یہ کرسکتے ہیں کہ:

جن سیاست دانوں ، حکومتی اور فوجی عہدے داروں تک ہماری‌ رسائی ہے ان کا شعور بیدار کریں ، ان میں اسلامی اور قومی فکر پیدا کریں ، انھیں سمجھائیں کہ مسلمان ہونے کا کیا معنی ہے ۔

نیز ایسے لوگ تیار کریں جو ایمانی غیرت ، اسلامی فکر ، اور سیاسی بصیرت رکھتے ہوں ؛ مردہ ضمیر ، ڈرپوک ، عیاش اور بکاؤ نہ ہوں ۔
ایسے لوگ ہی ظالموں کے ہاتھ روک سکیں گے ۔

✍️لقمان شاہد
7-8-2020 ء

کہاں گئے وہ لوگ ! 🥀

شعر گوئی بہت عمدہ فن ہے ، شعر فہمی بھی کمال کی چیز ہے ، لیکن شعر سمجھ کر اس سے کما حقہ محظوظ ہونا ہر کسی کا کام نہیں ۔

کہا جاتا ہے فَرزدق کے سامنےکسی نے حضرت لبید بن ربیعہ رضی اللہ عنہ کایہ شعر پڑھا ؎

وجَلا السیول عن الطّلول کانھا
زبرتجد متونھا اقلامھا

( سیلابوں نے کھنڈروں کومٹی میں دب جانے کے بعد ظاہر کردیا ،گویا کہ وہ کتابیں ہیں جن کے قلموں نے ان کی کتابت کودوبارہ چمکادیا )

فرزدق یہ شعر سن کرسجدے میں گر گیا -

کسی نے کہا:

ابوفراس ! یہ سجدہ کیسا ؟

کہنے لگا:

انکم تعرفون سجدۃ القران وانا اعرف سجدۃ الشعر -

تم قران کے سجدوں کوجانتے ہو ، میں شعر کے سجدوں کوجانتاہوں -

(خاص الخاص ، امام ابومنصور ثعالبی (م 429 ھ) ، ص 147 ، دارالکتب العلمیہ بیروت )


مرزا غالب نے مومن خان مومن کا یہ شعر دیکھا ؎

تم میرے پاس ہوتے ہوگویا
جب کوئی دوسرانہیں ہوتا

تو کہنے لگا:

مومن کے اس شعر کے بدلے میں اپناپورا دیوان دینے کوتیارہوں ۔

( اردوشاعری کاتنقیدی مطالعہ ، ڈاکٹر سنبل نگار ، ص 54 ، دارالنورلاہور )

مولانا غنیمت کنجاہی رحمہ‌اللہ کا شعر ہے ؎

بگفتا قیمتش ، گفتم نگاهی
بگفتا کمترک ، گفتم که گاهی

( میرے محبوب نے میرے دل کے ٹکڑوں کی قیمت پوچھی تو میں نے کہاتیری نگاہ ۔
کہنے لگا یہ قیمت زیادہ ہے ، کچھ کم کرو ۔
میں نے کہا میرے محبوب ہمیشہ نہ سہی ، کبھی کبھی نگاہ فرمادینا )

پیر نصیر الدین نصیر یہ شعر پڑھ کر ، جھوم گئے اور کنجاہ مولانا غنیمت کی قدم بوسی کے لیے حاضر ہوئے ۔

خود کہتے ہیں:

میں نےمولانا غنیمت کی اس مصرعے پر قدم بوسی کی ۔۔۔۔۔۔۔۔ مجھے اللہ نے بڑی شاعرانہ صلاحیتیں عطافرمائی ہیں ، لیکن ایک شاعر ہونے کی حیثیت سے میں نے اُن کی قبر چومی ۔

✍️لقمان شاہد
10-8-2020ء

دن بھر آپ نے فیس بک پر بہت ساری چیزیں دیکھی اور پڑھی ہوں گی ......... چلیں سوتے وقت یہ سطریں بھی پڑھ لیں ۔

سید ادیب رائے پوری مرحوم کا نعتیہ کلام ہے ؎

جو لَمحے تھے سُکُوں کے ، سب مدینے میں گُزار آئے
وَطَن میں اے دلِ مُضطَر تجھے کیسے قرار آئے

اس میں ایک شعر ہے ؎

خَزاں کو حُکم ہے داخِل نہ ہو طیبہ کی گلیوں میں
اِجازت ہے نَسیم آئے ، صَبا آئے ، بہار آئے

ادیب نے اِس شعر میں ہَوا کو چار حصوں میں تقسیم کیا ہے ۔

¹خَزاں
²نَسِیم
³صَبا
⁴بَہار

خزاں: ایسی ہوا ہوتی ہےجس سے پتے جھڑ جاتے ہیں ، پھول مرجھا جاتے ہیں ۔

نسیم: ہوا کا وہ خوش گوار جھونکا ہوتا ہے جو پاس سے گزرے تو پرسکون کرجاتا ہے ۔

صبا: اُس پیاری ہوا کو کہتے ہیں جو صبح کے وقت گوشۂ شمال و مشرق سے چلتی ہے اور غنچے تک کھلا دیتی ہے ۔

بہار: وہ ہوا ہے جو مرجھائے ہوئے پھول کھلاتی ہے ، خشک ٹہنیاں سر سبز کرتی ہے ، جس کے چلنے سے باغ میں بہار آتی ہے ، چمن میں نکھار آتا ہے ۔

اب شعر سمجھیے!

ان چاروں ہواؤں نے جب مدینہ پاک میں داخلے کی کوشش کی تو حکم ہوا:

خزاں ! تمھارا اس شہر میں داخلہ ممنوع ہے ، تم‌ طیببہ کی گلیوں سے گزرنے کی صلاحیت ہی نہیں رکھتی ۔

اے نسیم ، صبا اور بہار ! تم تینوں کوئے حبیب میں آسکتی ہو اور بار بار آسکتی ہو ۔ ؎

خَزاں کو حُکم ہے داخِل نہ ہو طَیبہ کی گلیوں میں
اِجازت ہے نَسیم آئے ، صَبا آئے ، بہار آئے

✍️لقمان شاہد
11-8-2020ء

رسول اللہ ﷺ فرماتے ہیں:

¹ معراج کی رات میں نے جنت کے دروازے پر لکھا دیکھا:

صدقہ کرنے کا ثواب دس گُنا ہے ، اور قرضہ دینے کا ثواب اٹھارہ گُنا ۔

² جو مسلمان کسی مسلمان کو ایک بار قرض دیتاہے ، اسے اُتنامال دو بار صدقہ کرنے کاثواب ملتاہے ۔

( الترغیب والترہیب ، کتاب الصدقات ، ر 1324 ، 1325 )

جب اللہ کے پیارے حبیب چاہتے ہیں کہ میرے صاحبِ ثَروت اُمتی ، میرے ضرورت مند اُمتیوں کو قرضہ دیا کریں ، تو کیوں نہ‌ ہم اپنے پیارے نبی ﷺ کی‌محبت میں ایسا کرنے والے بن جائیں !!

آپ‌ میرے لیے دعا کریں ، میں آپ کے لیے کرتا ہوں کہ:

رب تعالیٰ ہمیں ہمیشہ اخلاص اور خوش دلی کے ساتھ ، مسلمانوں کو قرضہ دینے والا بنادے ۔

✍️لقمان شاہد
12-8-2020 ء

گجرات شہر کے قریب ایک‌گاؤں ہے جس کانام " مدینہ " ہے ۔

جب اِس گاؤں کا کوئی فرد آکر کہتا ہے :

" میں مدینے سے آیا ہوں " ۔۔۔۔۔۔۔۔

تو دل ، بے ساختہ " مدینہ طیبہ‌ ، مدینہ منورہ ، مدینہ پاک ، مدینہ شریف ، مدینۃ النبی " کی طرف کھنچنے لگتا ہے ۔

اللہ اللہ ، لفظِ مدینہ کتنا پیارا ہے !!

اس لفظ میں جو لذت ہے وہ دنیا کے کسی شہر کے نام میں نہیں ۔

✍️لقمان شاہد
13-8-2020 ء

سنہ 1947ء میں پاکستان معرض وجود میں آیا تھا ۔
اس سال ، محتاط اندازے کے مطابق:

" پندرہ لاکھ مسلمان قتل ہوئے ، اور اسی لاکھ مسلمان اربوں کی جائیداد سےمحروم ہوئے تھے ، تب جا کے پاکستان بنا ۔ "

ان قربانیوں کو یاد رکھیں اور اپنے مسلمان بھائیوں کے خون سے وفا کریں ۔

یہ قربانیاں حکمران طبقے کی عیاشیوں اور فحاشیوں کے لیے نہیں دی گئیں ، " لا الہ الا اللہ " کی سربلندی کے لیے دی گئیں ۔

✍️لقمان شاہد
14-8-2020 ء