عورت تیڑھی پسلی

مردوں کو یہ بات ہر وقت یاد رکھنی چاہیے کہ عورت تیڑھی پسلی سے بنائی گئی ہے جیسا کہ مسلم شریف کی حدیث میں ارشاد ہوا ہے۔
عورتوں سے کبھی یہ توقع نہیں رکھنی چاہیے کہ وہ مکمل درست ہو جائے گی اور اگر کوئی اسے ہر طرح سے سیدھا کرنے کی کوشش کرے گا تو پھر اسے کھو بیٹھے گا یعنی طلاق ۔

اس کا یہ مطلب نہیں کہ آپ عورت کی اصلاح نہ کریں ۔
اصلاح کی پوری کوشش کریں لیکن نرمی اور محبت کے ساتھ ۔
عورتیں بہت جزباتی (Sensitive) ہوتی ہیں، اگر کوئی میٹھی میٹھی باتوں سے چاہے تو انھیں فوراً راضی کر لے لیکن اگر آپ تیڑھے پن پر آئیں گے تو یاد رکھیے کہ وہ پہلے سے.....

سختی بھی کرنی چاہیے لیکن شرعی معاملات میں جیسے نماز نہ پڑھے، پردہ نہ کرے یا کوئی غیر شرعی کام کرے پر اس میں بھی پہلے نرمی سے کوشش کریں اور نہ مانے تو تھوڑی سختی دکھائیں پھر بھی نہ مانے تو تھوڑا بہت مار سکتے ہیں پر آج کل ان باتوں کی وجہ سے کسی نے سختی کی ہو ایسا جلدی سننے میں نہیں آتا بلکہ اکثر لڑائی جھگڑے ایسی باتوں کی وجہ سے ہوتے ہیں جنھیں ایک مرد چاہے تو گھر میں کسی کو پتہ چلے بغیر حل کر لے ۔

عورتیں جیسی ہیں ان سے اسی طرح فائدہ اٹھائیں۔
ان کی غلط عادتوں کو نظر انداز کریں اور اچھائیوں کو دیکھیں، اسی میں فائدہ ہے ۔

عبد مصطفی

ڈاکٹر محمد اشرف آصف جلالی حق پہ پہرا دینے کی وجہ سے حق پرستوں کی آنکھوں کا تارا بن گئے ہیں
(جلالیہ علماء کونسل)

🗓 03 Jul 2020

مرکز صراط مستقیم تاج باغ لاہور اور جامعہ جلالیہ کے فضلائے کرام کی نمائندہ تنظیم ”جلالیہ علماء کونسل“ کے زیر اہتمام ”جلالیہ علماء کنونشن“ کا انعقاد کیا گیا جس میں مختلف اضلاع سے جلالیہ علماء کونسل کے علماء نے شرکت کی۔جلالیہ علماء کنونشن میں یہ کہاگیا:

ڈاکٹر محمد اشرف آصف جلالی حق پہ پہرا دینے کی وجہ سے حق پرستوں کی آنکھوں کا تارا بن گئے ہیں۔ عقائد اہل سنت کے تحفظ کے محاذوں پر ہم ہر گھڑی میں ڈاکٹر محمد اشرف آصف جلالی کے ساتھ رہیں گے۔ نظریاتی اور اعتقادی بگاڑ کے مقابلہ میں جس طرح ڈاکٹر محمد اشرف آصف جلالی سینہ سپر رہے ہیں، علمائے ربانی کا ہمیشہ سے یہی شیوہ رہا ہے۔

آپ کی سالہا سال سے یہ تحریک ہے کہ عوام علماء کی پیروی کریں نہ کہ علماء عوام کی پیروی کریں۔ آپ نے یہ جدوجہد کی کہ جو نظریہ ہمارے آئمہ کی کتابوں میں ہے وہی مجمع عام کے خطابوں میں ہونا چاہیے۔آج کچھ لوگ اہل سنت کے مخالفین ایجنڈے پر یہ کام کر رہے ہیں۔

ڈاکٹر محمد اشرف آصف جلالی کے کردار، مذہبی خدمات اور دلیل و برہان کا جن لوگوں کے پاس جواب نہیں وہ آپ کے خلاف سازشوں میں مصروف ہیں۔
شرکائے کنونشن نے چند قراردادوں کے لیے حکومت سے یہ مطالبات کیے:

ڈاکٹر محمد اشرف آصف جلالی کے کلام کو سیاق و سباق سے ہٹا کر جن لوگوں نے عوام کو گمراہ کرنے کی کوشش کی اور حضرت سیدہ فاطمہ رضی اللہ تعالی عنہا کے بارے میں اپنی طرف سے خطاکار اور غیر صدیقہ کے الفاظ گھڑ کے لکھے اوراپنی طرف سے ایک من گھڑت داستان بنا کے ایف آئی آر کٹوائی ان کا سختی سے محاسبہ کیا جائے۔

جن لوگوں نے سوشل میڈیا پر ڈاکٹر محمد اشرف آصف جلالی کو مبینہ طور قتل کی دھمکیاں دی ہیں اور سر کی قیمت مقرر کی ہےِ حکومت ان کو گرفتار کر کے ارادہ قتل کی سزا دے۔

ڈاکٹر محمد اشرف آصف جلالی کے خلاف حکومت کی ظالمانہ کاروائیاں برداشت نہیں کر سکتے۔
ایک قرارداد کے ذریعے اسلام آباد میں مندر کی تعمیر کی مذمت کی گئی اور اسے نظریہ پاکستان کی خلاف ورزی قرار دیا گیا۔

ڈاکٹر محمد اشرف آصف جلالی صاحب حق پہ پہرا دینے کی وجہ سے حق پرستوں کی آنکھوں کا تارا بن گئے ہیں
(جلالیہ علماء کونسل)

سوال ۔۔۔۔۔۔۔ لاک ڈوان و تنخواہ

مدرس لاک ڈاؤن کے ایام کی تنحواہ کا مستحق ہوگا یا نہیں؟

المستفتی : توصیف رضا مصباحی، سنبھل، یوپی۔

بسم اللہ الرحمن الرحیم
الجواب موجودہ حالات میں دو طرح کی تنخواہ کا مسئلہ در پیش ہے، ایک تعطیل کلاں اور دوسری تعطیل کلاں کے علاوہ ایام میں لاک ڈاؤن کی تنخواہ
مدرسین کوتعطیل کلاں کی تنخواہ دی جائیےگی وہم حقدارہیں اور تعطیل کلاں کے علاوہ لاک ڈاؤن کے ایام کی تنخواہ بھی مدرس کو ملے گی؛ کیوں کہ اگرچہ چھٹی ہوگئی ہے مگر ابھی مدرس مدرسہ میں ملازم ہے اور ملازمت کی حالت میں تنخواہ ملتی ہے؛ اس لیے لاک ڈاؤن کی وجہ سے مدرس چھٹی کے ایام کی تنخواہ کا مستحق ہوگا۔
اعلی حضرت مجدد دین و ملت علیہ الرحمۃ فرماتے ہیں: ’’ایام تعطیل کی تنخواہ بحالت ملازمت ملتی ہے، شرعا عرفا یہی قاعدہ ہے‘‘۔ (فتاوی رضویہ، مجدد دین ملت، کتاب الإجارۃ، ج۱۴، ص۲۴۷، ط: امام احمد رضا اکیڈمی، بریلی شریف)
الأشباہ و النظائر میں ہے: ’’الْبَطَالَةُ فِي الْمَدَارِسِ، كَأَيَّامِ الْأَعْيَادِ وَيَوْمِ عَاشُورَاءَ، وَشَهْرِ رَمَضَانَ فِي دَرْسِ الْفِقْهِ لَمْ أَرَهَا صَرِيحَةً فِي كَلَامِهِمْ.
وَالْمَسْأَلَةُ عَلَى وَجْهَيْنِ: فَإِنْ كَانَتْ مَشْرُوطَةً لَمْ يَسْقُطْ مِنْ الْمَعْلُومِ شَيْءٌ، وَإِلَّا فَيَنْبَغِي أَنْ يَلْحَقَ بِبَطَالَةِ الْقَاضِي، وَقَدْ اخْتَلَفُوا فِي أَخْذِ الْقَاضِي مَا رُتِّبَ لَهُ مِنْ بَيْتِ الْمَالِ فِي يَوْمِ بَطَالَتِهِ، فَقَالَ فِي الْمُحِيطِ: إنَّهُ يَأْخُذُ فِي يَوْمِ الْبَطَالَةِ؛ لِأَنَّهُ يَسْتَرِيحُ لِلْيَوْمِ الثَّانِي وَقِيلَ: لَا يَأْخُذُ (انْتَهَى) وَفِي الْمُنْيَةِ: الْقَاضِي يَسْتَحِقُّ الْكِفَايَةَ مِنْ بَيْتِ الْمَالِ فِي يَوْمِ الْبَطَالَةِ فِي الْأَصَحِّ، وَاخْتَارَهُ فِي مَنْظُومَةِ ابْنِ وَهْبَانَ، وَقَالَ: إنَّهُ الْأَظْهَرُ‘‘۔ (الأشباہ و النظائر، امام ابن نجیم، الفن الأول، القائدۃ السادسۃ، ص۸۱، ط: دار الکتب العلمیۃ، بیروت)
نیز اس جہت بھی دیکھا جاسکتا ہے کہ یہاں مدرس کا عمل سے رکنا خود مدرس کی جانب سے نہیں بلکہ دوسرے کی طرف سے ہے؛ اس لیے بھی مدرس ان ایام کی تنخواہ کا مستحق ہوگا۔
رد المحتار میں ہے: ’’وَفِي فَتَاوَى الْحَانُوتِيِّ يَسْتَحِقُّ الْمَعْلُومَ عِنْدَ قِيَامِ الْمَانِعِ مِنْ الْعَمَلِ وَلَمْ يَكُنْ بِتَقْصِيرِهِ سَوَاءٌ كَانَ نَاظِرًا أَوْ غَيْرَهُ كَالْجَابِي‘‘۔ (رد المحتار مع الدر المختار، امام ابن عابدین شامی، مطلب فی قطع الجھات لأجل العمارۃ، ج۴ص۳۷۲، ط: دار الفکر، بیروت)

حاصل کلام یہ ہے کہ ہر مدرس و ملازم لاک ڈاؤن کے ایام کی چھٹی کی تنخواہ کا ضرور مستحق ہے،

و اللہ تعالی أعلم۔
کتبـــــــــــــــــــــــــــــــــــــــــــــــــه
ابوعاتکہ ازہار احمد امجدی ازہری غفرلہ خادم مرکز تربیت افتا و خانقاہ امجدیہ، اوجھاگنج، بستی، یوپی، انڈیا ۳؍ ذی القعدۃ ۱۴۴۱ھ

(مسئلہ) جو حافظ قرآن مجید یاد کرکے بھول جائیے تو کیا اس کے پیچھے نماز نہیں ہوگی؟
(جواب) اس شخص کے پیچھے نماز جائز ہے جس نے قرآن مجید یاد کیا لیکن اب اسے یاد نہیں رہا کیونکہ یہ مؤجب فسق نہیں ہے۔ انس رضی الله عنہ سے مروی ہے کہ نبی کریم ﷺ نے ارشاد فرمایا: عُرِضَتْ عَلَيَّ ذُنُوبُ أُمَّتِي فَلَمْ أَرَ ذَنْبًا أَعْظَمَ مِنْ سُورَةٍ مِنْ الْقُرْآنِ أَوْ آيَةٍ أُوتِيهَا رَجُلٌ ثُمَّ نَسِيَهَا. (سنن ابو داؤد، م: ٤٦١؛ سنن الترمذی، م: ٢٩١٦؛ میری امت کے گناہ پیش کئے گئے تو میں نے اس سے بڑا کوئی گناہ نہ دیکھا کہ کسی شخص کو قرآن کی سورت یا آیت دی جائے پھر وہ اسے بھلا دے۔) غالبا اس حدیث میں سورت بھلانے سے اس کی تعلیمات کو بھلانا مراد ہے اور گناہ عظیم اور گناہ کبیرہ میں فرق ہے لہذا وہ شخص فاسق معلن نہیں ہوتا۔ والله تعالی اعلم

*کانپور انکاؤنٹر :حکومت وانتظامیہ کی دوغلی پالیسی پر سوالیہ نشان؟؟*

غلام مصطفےٰ نعیمی
جنرل سیکریٹری تحریک فروغ اسلام دہلی

47؍سال کا ہسٹری شیٹر وِکاس دُوبے ہے لیکن کارنامے عمر سے بڑھ کر،اتنے کہ 60؍سے زیادہ سنگین مقدمے درج ہیں۔اس قدر خطرناک مجرم ہونے کے باوجود سیاسی پارٹیوں اور سیاست میں اس قدر دبدبہ کہ پچھلے 15؍سال سے گاؤں کی پردھانی اپنے ہی گھر میں ہے۔اپنی بیوی کے ساتھ ضلع پنچایت کی دو سیٹوں پر 15؍سال سے فتح یاب ہوتا آرہا ہے۔صوبے کی تین بڑی پارٹیوں،بی جے پی،سپا اور بسپا تک میں گہری پکڑ رکھنے والے وِکاس دوبے کی کہانی نے حکومت وانتظامیہ کا وہ چہرہ بے نقاب کر دیا ہے جس کے بارے میں بہت کھل کر کبھی بات نہیں ہوتی۔کانپور میں آٹھ پولیس والوں کی موت نے کچھ ایسے سوالات کھڑے کیے ہیں جن کے جواب دینا حکومت اور انتظامیہ کے لیے بے حد ضروری ہیں۔آٹھ پولیس جوانوں کا ایک تصادم میں ہلاک ہوجانا معمولی واقعہ نہیں ہے اس لیے اس سسٹم پر بھی کھل کر بات ہونا چاہیے جہاں سے ایسے مجرمین تیار ہوتے ہیں اور حکومت وانتظامیہ کی جانب سے ان کی سرپرستی کی جاتی ہے۔

یوپی کی بی جے پی حکومت بار بار یہ دعوی کرتی آئی ہے کہ ماقبل کی سپا بسپا حکومتوں میں جرائم اور مجرمین کا بول بالا تھا لیکن بی جے پی حکومت کی تشکیل کے بعد مجرمین نے یوپی چھوڑ دیا ہے۔بات سننے میں تو بہت اچھی لگتی ہے لیکن جب اس دعوے کو حقیقت کی زمین پر پرکھا جاتا ہے تو معلوم ہوتا ہے کہ سارے دعوے ہوائی ہیں۔نیشنل کرائم ریکارڈ بیورو(NCRB) کی 2019 میں جاری رپورٹ کے مطابق جرائم کے معاملے یوپی پورے ملک میں سر فہرست ہے۔خواتین کے خلاف ہونے والے جرائم میں بھی یوپی پہلے نمبر ہے۔یہاں ایک سال میں خواتین کے ساتھ ہونے والے درج شدہ جرائم کی تعداد 56011 ہے۔ ملک بھر میں ہونے والے اغوا کے واقعات کے کل 21؍فیصد کیس یوپی میں ہوئے ہیں۔اسی طرح بچوں کے ساتھ ہونے والے جرائم میں بھی یوپی پہلے نمبر پر ہے۔ایک سال میں یوپی کے اندر قتل کی 28 ہزار 653 واردات درج کی گئیں ہیں۔ یہ سارے جرائم اس وقت ہوئے ہیں جب یوپی میں ایک ہزار سے زائد انکاؤنٹر کے دعوے کیے گیے ہیں اور وزیر اعلیٰ یہ دعوی کرتے گھوم رہے ہیں کہ ان کی حکومت کے بعد مجرمین یوپی چھوڑ کر چلے گیے ہیں۔اب یہ پہیلی سمجھ سے باہر ہے کہ جب سارے مجرمین یوپی چھوڑ کر چلے گیے،جو باقی بچے انہیں انکاؤنٹر میں ہلاک کر دیا گیا تو پھر یہ جرائم کون کر رہا ہے؟

اگر چند بڑے جرائم کی بات کریں تو پچھلے سال 17؍جولائی کو سون بھدر میں 10 قبائلی افراد کو دن دہاڑے قتل کر دیا گیا تھا۔
ستمبر ۲۰۱۸ء میں راجدھانی لکھنؤ کے گومتی نگر میں دو پولیس والوں نے Apple کمپنی کے ایریا مینجر وِویک تواری کو گولی مار کر ہلاک کر دیا تھا۔
اناو ضلع میں بی جے پی ایم ایل اے کُل دِیپ سِنگھ سَینگر نے ایک نابالغہ کے ساتھ زنا بالجبر کیا، مخالفت کرنے کی پاداش میں اس کے باپ کو بری طرح مارا پیٹا اورجھوٹے کیس میں گرفتار کرایا جہاں جیل میں ہی موت ہوگئی۔
اسی کیس میں مقدمے کی پیروی کر رہی اس کی چاچی اور مَوسِی کو ایک ٹرک ایکسی ڈینٹ کے ذریعے قتل کرا دیا گیا۔خود متاثرہ شدید زخمی ہوئی۔
یوپی میں یہ سارے جرائم علی الاعلان ہوئے لیکن وزیر اعلیٰ اور یوپی انتظامیہ نے انتہائی سرد مہری سے کام لیا،اُنّاو کیس میں تمام تر ثبوتوں کے باوجود یوپی پولیس نے مجرم سینگر کو گرفتار تک نہیں کیا،کیس این آئی اے(NIA) کے ہاتھ میں آیا تب جاکر یہ خطرناک مجرم جیل کی سلاخوں کے پیچھے پہنچا۔

*حکومت وانتظامیہ کی مسلم دشمنی*
جو حکومت وانتظامیہ کھلے عام غنڈہ گردی کرنے والے مجرموں پر ہاتھ ڈالنے سے پہلے سو بار سوچتی ہے اسی یوپی حکومت اور انتظامیہ کا دوسرا چہرہ دیکھیے !!
سی اے اے اور این آر سی کے خلاف پورے ملک میں مسلمانوں نے اپنے جمہوری حق کا استعمال کرتے ہوئے اس قانون کی مخالفت میں احتجاجی مظاہرے کیے۔لیکن حکومت وانتظامیہ نے جمہوری احتجاج کی اجازت دینے سے بھی انکار کردیا اور خاموش احتجاج کر رہے مظاہرین پر پولیس نے انتہائی بے رحمی کے ساتھ گولیاں چلائیں۔پورے صوبے میں قریب ۲۲؍سے زائد مظاہرین کو بے رحمانہ طریقے سے قتل کر دیا گیا۔مظاہرین بے قابو ہو جائیں تو پولیس احتیاطاً ربڑ کی گولیاں چلا سکتی ہے مگر کمر سے نیچے تاکہ جانی نقصان نہ ہو اور مظاہرین پر قابو پایا جاسکے۔لیکن پولیس کو یہ قاعدے قانون اس وقت یاد رہتے ہیں جب مظاہرین غیر مسلم ہوں، مسلمانوں کو دیکھتے ہی پولیس کی بندوق سیدھا سینے کی جانب اٹھتی ہے اور ربڑ کی نہیں بلکہ اصلی گولی چلتی ہے۔سی اے اے مظاہروں میں اکثر مظاہرین کی موت کمر سے اوپر گولی لگنے سے ہوئی ہے۔
وزیر اعلی یوگی آدتیہ ناتھ نے "بدلہ" لینے جیسی غیر دستوری زبان استعمال کرتے ہوئے مظاہرین کو دھمکی دی جس پر عمل کرتے ہوئے پولیس انتظامیہ نے گرفتاری کے نام پر مسلم آبادیوں پر دھاوا بول دیا۔مکانوں میں توڑ پھوڑ کی گئی اور گھر میں رہنے والے بزرگ وخواتین کو اپنے ت

شدد کا نشانہ بنایا گیا۔اس قدر سفاکیت کے بعد بھی حکومت وانتظامیہ کا جوش انتقام ٹھنڈا نہیں ہوا تو مسلمانوں پر ہی توڑ پھوڑ اور تشدد کا الزام لگا کر جرمانہ وصولی کا نادر شاہی فرمان سنا کر سڑکوں چوراہوں پر مظاہرین کی تصویریں لگا کر شہری حقوق کی کھل کر پامالی کی گئی۔ایسا ظاہر کیا گیا مانو صوبے کے سب سے بڑے مجرمین سی اے اے مظاہرین ہی ہیں۔ اس وقت حکومت اور انتظامیہ دونوں نے ہی تمام تر اخلاقایات کو بالائے طاق رکھ کر مسلمانوں کی دل آزاری میں کوئی کسر باقی نہیں رکھی لیکن کانپور تصادم کے بعد یہ سوال شدت سے پیدا ہوتا ہے جو حکومت سی اے اے مظاہرین کو گلی کوچوں میں تلاشتی پھر رہی تھی اس کی نگاہوں سے 60 سے مجرمانہ واردات کرنے والا گینگسٹر کس طرح چھپا رہا؟
وزیر اعلی، جنہوں نے ہائی کورٹ کی پھٹکار کے باوجود مظاہرین کی تصویروں کو ہٹانے میں آنا کانی کی، آخر انہیں وِکاس دوبے جیسے عادی غنڈے اور مجرموں کی تصوریں لگانے کا خیال کیوں نہیں آتا؟
سی اے اے مظاہرین تو اپنے جمہوری حق کا استعمال کرنے اور جمہوری انداز میں اپنا اختلاف ظاہر کرنے آئے تھے لیکن پولیس انتظامیہ نے نِہتّے مظاہرین پر گولیاں اور لاٹھیاں برسا کر اپنی بہادری دکھانے والی پولیس ایک غنڈے کے جال میں کس طرح پھنس گئی؟
کانپور تصادم میں ایک داروغہ وِنے تِواری کا کرادر مشکوک پایا گیا ہے۔ موصولہ اطلاعات کے مطابق پولیس پارٹی کے ریڈ مارنے کی خبر داروغہ نے ہی گینگسٹر کو دی تھی جس کے بعد اس نے جال بچھا کر پولیس پارٹی پر قاتلانہ حملے کا پلان بنایا۔جہاں آٹھ بہادر جانبازوں کو اپنی جان قربان کرنا پڑی۔
ونے تواری جیسے پولیسیا افراد وِکاس دوبے جیسے گینگسٹروں کی مخبری کرتے ہیں،حکومتیں انہیں شہ دے کر پروان چڑھاتی ہیں وہی پولیس اور حکومتیں اپنے ذمہ دار شہریوں پر گولیاں برسا کر ان کے جمہوری حقوق کو بے دردی سے پامال کرتی ہیں۔ جو طاقت دوبے جیسے عادی غنڈوں کے خلاف استعمال کی جانی چاہیے وہ امن پسند عوام کے خلاف استعمال ہوتی ہے جب تک حکومت اور انتظامیہ کا یہ دوہرا کردار رہے گا وِکاس دوبے جیسے غنڈے پیدا ہوتے رہیں گے۔ اگر ملک اور سماج کو ایسے غنڈوں سے پاک کرنا ہے تو امن پسند عوام نہیں بلکہ دُوبے جیسے غنڈوں کے خلاف قانونی طاقت کا استعمال کرنا ضروری ہے۔

14 ذوالقعدہ 1441 ھ
6 جولائی 2020 بروز پیر

*کرونا وائرس! ظالم قوتوں کے لیے نمونۂ عبرت*
مسلمان رجوع الی اللہ کریں....

*مفکر اسلام علامہ قمرالزماں اعظمی کی تصنیف’’کرونا وائرس کی وبا اور قوم مسلم‘‘کا علمی تجزیہ*

"اکیسویں صدی کے آغاز کے ساتھ نیو ورلڈ آرڈر کے ذریعے دُنیا کا سیاسی، معاشی اور جغرافیائی نقشہ تبدیل کرنے والے؛ آج اپنے انجام سے خوف زَدہ ہیں۔"

✍️غلام مصطفیٰ رضوی
{نوری مشن مالیگاؤں}

دُنیا مصائب سے گزر رہی ہے۔ ترقی یافتہ قوتوں نے اسلام دُشمنی میں کئی مسلم ملکوں کو تاراج کیا، خونِ مسلم سے اپنے ہاتھ رنگے، بچوں کو یتیم بنایا۔ بناتِ حوا کا سہاگ اُجاڑا۔ ماؤں کی گودیں سونی ہو گئیں۔ شام و یمن، لیبیا و عراق، افغانستان جیسے ملکوں میں آبادیاں بموں سے کھنڈر میں بدل دی گئیں۔ مصنوعی قحط مسلط کر کے لاکھوں افراد کو موت کی آغوش میں سُلا دیا گیا۔ اِس قدر ظلم ڈھایا گیا کہ لاکھوں خانماں برباد ہوئے۔ لاکھوں ہجرت کر گئے۔ انسانی وسائل سے عاری کیمپوں میں موت و زیست کی جنگ لڑ رہے ہیں۔ کتنے ہی کشتیوں سے ہجرت کے دوران سمندروں میں غرق ہو گئے۔

آج کروناوائرس کی وبا نے طاقتوں کے نشہ اور غرّہ کو خاک میں ملا دیا ہے۔ دنیا کے بیش تر ممالک لاک ڈاؤن کے ذریعے کرونا وائرس پر قابو پانے کے لیے ہاتھ پیر مار رہے ہیں۔ سوپر پاورز تک اس وبا کے آگے گھٹنے ٹیک چکے ہیں۔ اسلامی شعائر اور دینی احکام کا مذاق اُڑانے والوں کو اِس وبا نے ان کی وقعت بتا دی ہے۔ اِس رخ سے مفکرِ اسلام علامہ قمرالزماں خان اعظمی (سکریٹری جنرل ورلڈ اسلامک مشن انگلینڈ) تحریر فرماتے ہیں:

’’برطانوی وزیر اعظم کایہ طنز کہ مسلم لڑکیوں کا نقاب لیٹر بکس معلوم ہوتا ہے۔ آج پوری قوم کو وہی لیٹر بکس پہننے پر مجبور کر رہا ہے اور خود بیمار ہو کر صحت مند ہونے کا انتظار کر رہا ہے، ہر شخص یا تو خود حفاظتی کے تحت گھروں میں مقید ہے یا قانون کے جبر نے اسے نظر بند کر رکھا ہے۔ سڑکیں سنسان، آبادیاں ویران اور برطانیہ کے عالمی اسٹور ہیرڈس جو دوسری جنگِ عظیم میں بھی بند نہیں ہوئے تھے، آج مقفل ہیں۔ تمام تفریحی مقامات سنسان ہیں۔ سمندر کے ساحل اور کھیلوں کے اسٹیڈیم ویران ہیں۔ ساحلوں، کلبوں اور رقص گاہوں میں آسودہ گھرانوں کے نا آسودہ افراد کی عریانیت کے مظاہر ختم ہوچکے ہیں۔ دُنیا کے وزراے اعظم، صدور اور چانسلرز ٹی وی اور میڈیا کے دوسرے ذرائع سے عوام کو گھروں میں بند رہنے کی تلقین کر رہے ہیں۔‘‘
(کرونا وائرس کی وبا اور قوم مسلم،ص۲)

عریانیت اور جدیدیت نے دہریت کو راہ دی۔ اسلام دُشمن قوموں نے رہِ حق سے مسلمانوں کو دور کرنے کے لیے برائیوں کی سرپرستی کی۔ شر کو نافذ کیا۔ خیر کے خلاف ماحول سازی کی۔ کرونا وائرس کی وبا نے ان کی عیش گاہوں کو سوٗنا کر دیا۔ جس برقع کے خلاف عالمی مہم چلائی گئی تھی؛ آج وہی ان ظالموں کو پناہ کا ذریعہ نظر آرہا ہے۔ وہ خود نقاب اوڑھ کر وبا سے بچنے کے جتن کر رہے ہیں۔ انھیں عملاً قبول کرنا پڑا کہ ’’پردہ‘‘ حفاظت کا ضامن ہے۔

دُنیا کی بڑی قوتوں نے برما میں مسلمانوں پر ہونے والے مظالم سے آنکھیں موند لی تھیں، خانماں بربادلُٹے پٹے قافلے نظر انداز کر دیے تھے۔ آج اس دَرد کی یاد تازہ کرنے کو کئی قافلے شاہراہوں پر نظر آ رہے ہیں، بھوک کا مشاہدہ ہو رہا ہے۔ علامہ قمرالزماں اعظمی تحریر فرماتے ہیں:

’’لاک ڈاؤن کے ماحول میں بھوک کے ہاتھوں مجبور ہوکر بڑے بڑے شہروں سے لوگ کئی کئی سو میل کا سفر کر کے اپنے گھروں کی طرف جانے والے اس اجتماعی سفر میں یا تو کرونا کا شکار ہوں گے؛ یا کچھ لوگ بھوک سے مر جائیں گے۔ کاندھوں پر اپنے ننھے بچوں کا بوجھ اُٹھائے ہوئے اور اپنی پیٹھ پر اپنی معذور بیوی یا ماں کو لادے ہوئے گھروں کو جانے والے؛ اُن اربابِ اقتدار کی آنکھیں کھول دینے کے لیے کافی ہیں؛ جنہوں نے ابھی گزشتہ دنوں میں برما کے مہاجرین کو سفر کرتے ہوئے دیکھا ہے، مگر چوں کہ وہ مسلمان تھے، اس لیے کوئی بھی ملک ان کی مدد کے لیے نہ پہنچ سکا-" (نفس مصدر، ص۲۔۳)

ممبئی اور بڑے شہروں سے اپنے وطن کی جانب سفر کرنے والے لاکھوں افراد نڈھال پائے گئے، کتنے سسک کر دَم توڑ دیے۔ ان میں کئی وہ تھے جنھوں نے کرونا سے متاثر ہو کر جانیں دیں۔ کتنے ہی کرونا کا شکار بنے۔ آبادیاں متاثر ہوئیں۔ بچے بھوک سے نڈھال ہوئے۔ آبلہ پائی نے سیکڑوں خاندانوں کو صحراؤں میں موت و زیست سے ہمکنار کیا۔ ملکی استحکام کے دعوے داروں کی ترقی کا بھرم کھل گیا۔ اس سے کیا مظلوموں کے اس درد کا احساس زندہ ہوگا جن پر اقتدار نے مدتوں سے لاک ڈاؤن مسلط کر رکھا ہے؟ابھی سوشل میڈیا اور اخبارات میں ایک دل دوز تصویر شائع ہوئی۔ کشمیری شخص کو بے دردی سے موت کے گھاٹ اتار دیا گیا، جس کا کمسن نواسہ نانا کی لاش پر بیٹھا بے چارگی سے رو رہا ہے۔ یہی انسانیت ہے کہ لاشوں پر جمہوری اقدار کے تحفظ کا دعویٰ کیا جائے، لمحۂ فکریہ ہے:

’’لاک ڈاؤن کےکرب سے بلبلاتے ہوئے لوگ؛ کاش! ان مجبور ملکوں کے بارے

میں سوچ سکیں؛ جن کو طاقت وَر اقوام نے اپنی ہوسِ اقتدار پسندی کی تسکین کے لیے مدتوں سے لاک ڈاؤن کی درد ناک صورت حال سے دوچار کررکھا ہے.....اکیسویں صدی کے آغاز کے ساتھ نیو ورلڈ آرڈر کے ذریعے دُنیا کا سیاسی، معاشی اور جغرافیائی نقشہ تبدیل کرنے والے؛ آج اپنے انجام سے خوف زَدہ ہیں۔ عالم گیریت کا نعرہ لگانے والوں کے پاس اِس عالم گیر وَبا کا فی الحال کوئی علاج نہیں ہے۔‘‘ (نفس مصدر،ص۳)

موجودہ وبا نے جس طرح ساری دنیا میں مصائب کی شام طلوع کی، ترقی یافتہ قوتوں کو لرزا بر اندام کیا، اس سے احساسِ انسانیت بیدار ہونا تھا، ظلم و ستم سے باز آنا تھا، مظلوموں اور غریبوں کے درد کا احساس جگانا تھا، لیکن شاید احساس مر چکا ہے، جبھی عذاب کی دستک ہوئی۔ علامہ اعظمی تحریر فرماتے ہیں:

’’کاش! دُنیا کے اربابِ اقتدار اُن مظلوم قوموں کے بارے میں سوچتے جو ایک عالمی سازش کے تحت مسلط کی گئی جنگوں کی بنا پر موت، بھوک، بیماری، دربدری اور بے وطنی کا شکار ہوگئیں۔ جن کے ملکوں اور شہروں کو ’تورابورا‘ میں تبدیل کر دیا گیا۔ عراق، لیبیا، شام، فلسطین، بوسینیا کی خوفناک جنگیں نام نہاد ترقی یافتہ قوموں کے سامنے ہیں، مگر دُنیا بھر کے مظلوموں کے حق میں کہیں سے کوئی آواز بلند ہوتی نظر نہیں آرہی ہے۔حقوقِ انسانی کی تنظیمیں او، آئی، سی وغیرہ خاموش تماشائی ہیں یا ظالموں کی حمایت کرتی نظر آرہی ہیں۔ ان حالات میں بے قصور مظلوموں کی آہوں نے بابِ اجابتِ الٰہی کو دستک دی، جس کے جواب میں مشیت نے آج کے نمرودوں اور فراعنہ کو مچھروں سے زیادہ غیر مرئی اور غیر محسوس وائرس کے ذریعے مبتلائے عذاب کر دیا ہے۔ کاش! کرونا وائرس دُنیا کے ظالموں کی آنکھیں کھول دے اور انہیں احساس ہو جائے کہ یہ ان کے مظالم کی سزا ہے۔‘‘ (نفس مصدر، ص۳)

افسوس ان پر ہے جنھیں خادم الحرمین کا دعویٰ ہے،وہ مغرب کی اندھی تقلید میں اپنی روایات کا خون کر رہے ہیں۔ برائیوں کے مراکز قائم کر کے اسلام دشمن قوتوں کی تقلید میں سرپٹ دوڑ رہے ہیں، ان سے متعلق علامہ اعظمی رقم طراز ہیں:

"عرب ممالک نے مغرب کی اندھی تقلید میں اپنی گرتی ہوئی معیشت کو سنبھالا دینے کے لیے سنیما گھروں، ہوٹلوں، کلبوں اور شراب خانوں کے کلچر کو رواج دیا۔ حتیٰ کہ کرونا کے عذاب سے کچھ پہلے حجازِ مقدس کے بہت سے شہروں میں ناچ رنگ اور موسیقی کی محفلیں سجائی جانے لگیں۔ جدہ جہاں مسلمان احرام پہن کر جاتا ہے؛ وہاں بھی اسی طرح کے پروگرامات اسٹیج کیے جانے لگے۔ بالآخر مشیت کو جلال آگیا اور رب کعبہ کی ناراضی کا انجام یہ ہوا کہ کعبہ اور مسجد نبوی اور روضۂ رسولﷺ کا دروازہ بھی ان پر بند کر دیا گیا۔" (نفس مصدر، ص۴)

گویا کورونا وائرس کی یہ وبا دعوتِ اصلاح ہے۔ حرمین کا تقدس پامال کرنے اورمقدس زمیں پر راگ راگنی و موسیقی کلچر کو فروغ دینے والوں کے لیے یہ موقع آنکھیں کھول دینے کو کافی ہے۔ لیکن شاید وہ بیدار ہونے کو تیار نہیں۔ انھیں معاشی زوال اور طبی بحران بھی دکھائی نہیں دے رہا۔ مغرب کی اندھی تقلید نے ان کی سوچ کو یورپین چشمے سے دیکھنے کا عادی بنا دیا ہے۔ حالاں کہ بندۂ مومن کے لیے تو یہی بس ہے کہ؎

خیرہ نہ کر سکا مجھے جلوۂ دانش فرنگ
سرمہ ہے میری آنکھ کا خاک مدینہ و نجف

علامہ اعظمی نے مقالہ میں کتاب و سنت کی روشنی میں وباؤں کے نزول کے اسباب اور ان کے تدارک پر روشنی ڈالی ہے۔ درجنوں آیات سے استدلال کیا ہے اور بتایا ہے کہ وبائیں مسلمانوں کی اصلاح کے لیے نازل ہوتی ہیں اور کفار پر عذاب الٰہی بن کر اترتی ہیں۔ ارشادِ الٰہی ہے:

’’اور تمہیں جو مصیبت پہنچی وہ اس کے سبب سے ہے جو تمہارے ہاتھوں نے کمایا اور بہت کچھ تو معاف فرمادیتا ہے۔‘‘
(سورۃ الشوریٰ:آیت ۳۰/کنزالایمان)

ان اسباب و علل بھی روشنی ڈالی ہے، جن سے مصائب اور وبائیں درپیش ہوتی ہیں۔ برائیوں، بدکرداریوں کا عام ہونا، زکوٰۃ کی ادائیگی سے چشم پوشی، ناپ تول میں کمی،کتاب و سنت کی حکم عدولی سے مصائب نازل ہوتے ہیں۔مسلم حکمرانوں نے مغرب کی اندھا دھند تقلید میں اسلامی احکام سے ایسا منھ موڑا کہ مبتلاے عذاب ہو گئے۔ علامہ اعظمی فرماتے ہیں:

’’ان تمام اعمال کے ذریعے مسلم حکمرانوں اور عوام نے خدا کے غضب کو دعوت دی ہے ۔ آج مشرق و مغرب میں اُمّتِ مسلمہ پر جو کچھ بیت رہی ہے انہی بداعمالیوں کا نتیجہ ہے۔‘‘ (نفس مصدر، ص۸)

بلاؤں کا نزول مومنوں کے لیے آزمائش ہے اور رجوع الی اللہ کا سنہرا موقع۔ اِس رخ سے بھی علامہ قمرالزماں اعظمی نے کئی آیات و احادیث درج کی ہیں۔ توبہ کے ضمن میں دلائل پیش کیے ہیں اور ترغیبی تبصرے بھی کیے ہیں، کاش! مسلمانوں میں رجوع کی فکر بیدار ہو۔ علامہ موصوف نے یہ ثابت کیا ہے کہ’’مومن کے لیے بلائیں اور مصائب ترقی درجات کا ذریعہ ہیں-‘‘ (نفس مصدر، ص۱۸)

عیسائیت کے خود ساختہ تصورِ گناہ اور اسلام کے نظامِ سزا و جزا کے متوازن و فطری اُصول پر عام فہم انداز میں روشنی ڈال

ی ہے۔ اسلام فطری تقاضوں کو پورا کرتا ہے۔ موجودہ مصائب کا واحد حل اسلام میں موجود ہے۔ سچی توبہ کے ثمرات بھی ذکر کیے ہیں۔ اخیر میں روحانی عمل بھی پیش فرمایا ہے کہ وباؤں سے حفاظت کے ظاہری و روحانی دونوں اسباب ہیں۔حضور مفتی اعظم کا محررہ (بے نظیر عمل) درج فرمایا ہے؛ جس میں کئی روحانی فوائد مضمر ہیں۔

’’کرونا وائرس کی وبا اور قومِ مسلم‘‘ مسلمانوں کی فوز و فلاح اور رجوع الی اللہ کا فکر انگیز پیغام ہے۔ یہ کتاب طباعت کے مرحلہ میں ہے۔ نوری مشن مالیگاؤں سے تقسیم ہوگی۔ مقامی افراد کے لیے ہارڈ کاپی اور بیرونی قارئین کے لیے سافٹ کاپی بِنا قیمت دستیاب ہوگی۔ اللہ تعالیٰ! ہمیں سچا مسلمان بنائے۔ احکامِ اسلامی پر عمل کا جذبۂ صالح عطا کرے۔ آمین

٭ ٭ ٭
٧؍ جولائی ۲۰۲۰ء
بروز منگل

Android Apps by ISHAN

اینڈرائڈ ایپ کیسے بنائیں!
Android App एंड्राइड ऐप
https://youtu.be/2o5tBICv11E

ایشان ٹولس ¹ایپ ¹²فیچر ...
ISHAN Tools ईशान टूल्स
https://youtu.be/LGEbaWjzNEs

ایم آدھار ایپ M Aadhar
MAadhar एम आधार
https://youtu.be/slwp4FaJB4w

ایم پریوہن ایپ M Privahan
MParivahan एम परिवहन
https://youtu.be/ZaV5VO-rf5c

ڈی جی لاکر ایپ خصوصیات
Digi Locler डिजि लॉकर
https://youtu.be/Qy8khPlSOyI

یو پی تھانے کی ²⁷سہولیات فون پر
UP Thana यूपी थाना ²⁷सुविधा
https://youtu.be/3qjk6SUFdtw

گوگل فوٹو اسکین ایپ
Google Photo Scan फोटो स्कैन
https://youtu.be/OnSVCYL-fvI

INDIAN Online ID Cards

آن لائن جنم پرمان پتر بنائیں!
Janm Praman Patra
https://youtu.be/nVLyv7YseY4

جنم پرمان پتر ڈاؤنلوڈ کیجئے!
Janm Prman Patr
https://youtu.be/dhNe4VwnFz0

آن لائن موت | وفات سرٹیفکیٹ...
Maut Certificate मौत मृत्यु
https://youtu.be/YgZruBS-mUk

آن لائن ذات پرمان پتر بنائیں!
Zaat Praman Patra ज़ात
https://youtu.be/XWOR4T7C7K0

آن لائن اِنکم سرٹیفکیٹ
income Certificate आय प्रमाण
https://youtu.be/5lscTPV4ZSA

آنلائن نِواس پرمان پتر بنائیں!
Niwas Praman Patra निवास
https://youtu.be/QjlnW5LTFzg

آن لائن سرٹیفکیٹ ڈاؤنلوڈ کیجئے
Certificate Download
https://youtu.be/HqDTbV1E7CY