حضرت مولانا مفتی تقدس علی خان رضوی رحمۃ اللہ تعالیٰ علیہ

نام و نسب:
مفتی تقدس علی خان بن الحاج سردار ولی خاں بن مولانا ہادی علی خاں بن مولانا رضا علی خاں (علیہم الرحمہ) ۔

اعلیٰ حضرت سے رشتہ:
آپ اعلیٰ علیہ الرحمہ کے چچا زاد بھائی کے فرزندِ ارجمند تھے، اس رشتے سے آپ اعلیٰ حضرت علیہ الرحمہ کے بھتیجے ہوتے ہیں ۔ آپ کی نانی صاحبہ کی بہن اعلیٰ حضرت علیہ الرحمہ کی زوجہ محترمہ تھیں ۔ اس لئے آپ پاکستان میں " نواسۂ اعلیٰ حضرت " کی حیثیت سے مشہور ہیں ۔

تاریخِ ولادت:
ماہِ رجب المرجب 1325ھ / بمطابق اگست 1907ء میں بمقام آستانہ عالیہ رضویہ محلہ سودا گران بریلی شریف میں پیدا ہوئے ۔ مولانا حسن رضا خان نے آپ کا تاریخی نام تقدس علی خاں، 1325ھ استخراج فرمایا ۔

تحصیلِ علم:
آپ نے ابتدائی تعلیم مولانا خلیل الرحمٰن بہاری، مولانا ظہور الحسن فاروقی مجددی (صدر مدرس مدرسہ عالیہ رام پور و دار العلوم منظر اسلام بریلی شریف) اور ان کے صاحبزادے مولانا نور الحسین رامپوری سے حاصل کی ۔ متوسط کتب درس نظامی برادر زادہ اعلیٰ حضرت مولانا حسنین رضا خاں قدس سرہٗ سے پڑھیں اور اعلیٰ تعلیم حضرت مولانا رحم الٰہی، مولانا عبد المنان (مردان) مولانا عبد العزیز خاں محدث بریلی، اور حضرت صدر الشریعہ مفتی امجد علی اعظمی سے حاصل کی اور تکمیل حضرت حجۃ الاسلام مولانا حامد رضا خاں رحمۃ اللہ سے کی ۔ 1345ھ میں آپ نے دار العلوم منظر اسلام بریلی شریف سے سند فراغت حاصل کی ۔

آپ شاگردِ اعلیٰ حضرت ہیں:
اعلیٰ حضرت مولانا شاہ امام احمد رضا خاں بریلوی سے آپ نے شرح جامی کا خطبہ پڑھا ۔ چنانچہ اعلیٰ حضرت فاضل بریلوی علیہ الرحمہ سے بالواسط شرف تلمذ حاصل کرنے کے لیے مدارس کے منتہی طلباء آپ سے شرح جامی کا خطبہ پڑھتے تھے، جن میں محدث اعظم پاکستان حضرت مولانا محمد سردار احمد رضوی رحمۃ اللہ بھی ہیں ۔

بیعت و خلافت:
سات سال کی عمر میں اعلیٰ حضرت مجددِ اعظم علیہ الرحمہ سے بیعت ہوئے تھے ۔ حجۃ الاسلام حضرت مولانا حامد رضا خان علیہ الرحمہ نے سلسلۂ عالیہ قادریہ میں خرقۂ خلافت عطا فرمایا ۔قطبِ مدینہ شیخ المشائخ حضرت مولانا ضیاء الدین مدنی علیہ الرحمہ نے بھی اجازت و خلافت سے سرفراز فرمایا ۔

سیرت و خصائص:
آپ کے فضائل و خصائل کیا بیان کیے جائیں ۔ آپ بلند پایہ مفسر محدث اور فقیہ تھے ۔ شہرت و ناموری سے کوسوں دور، اور صلہ و ستائش سے ہمیشہ بے نیاز تھے ۔ دینِ متین کی خدمت میں ہمیشہ سرشار رہتے ۔ سادہ لباس، شگفتہ مزاج، اعلیٰ گفتار، سراپا شفقت و کرم، سراپا اخلاص و محبت، علم دوست، الغرض آپ صفاتِ حسنہ کا ایک حسین گلدستہ تھے ۔ آپ سچے عاشقِ رسول ﷺ تھے ۔ ساری زندگی درس و تدریس، وعظ و نصیحت، تصنیف و تالیف کے ذریعے اسی عشقِ مصطفیٰ ﷺ کے چراغ ہر سو روشن کیے ۔ یہی عشقِ مصطفیٰ ﷺ آپ کا عقیدہ، مسلک و مذہب تھا ۔ آپ کی تمام حیات عشقِ مصطفیٰ ﷺ سے عبارت تھی، اور سفرِ آخرت بھی اسی کا آئینہ دار تھا، کہ وقتِ رخصت آخری غذا مدینہ شریف کی کھجور اور آبِ زمزم تناول فرمایا، زبان پر درودِ سرورِ عالم ﷺ جاری تھا کہ واصل بحق ہوئے ۔

وصال:
بروز پیر 3 رجب المرجب 1408ھ، بمطابق 22 فروری 1988، بوقت 12:10 منٹ پر اس دارِ فنا سے رخصت ہوئے ۔

https://scholars.pk/ur/scholar/hazrat-molana-mufti-taqaddus-ali-khan-rizvi

حضرت سید صفی الدین صوفی گیلانی رحمۃ اللہ تعالیٰ علیہ

نام و نسب:
اسم گرامی: سید صفی الدین گیلانی ۔ کنیت: ابو نصر ۔ لقب: جمال الفقہاء، زین الصلحا، سید الاتقیاء ۔

سلسلۂ نسب اس طرح ہے:
حضرت شیخ سید صفی الدین گیلانی بن سیدسیف الدین عبد الوہاب گیلانی بن غوث الاعظم سیدنا شیخ عبد القادر جیلانی ۔ علیہم الرحمہ ۔

تاریخِ ولادت:
آپ کی ولادت باسعادت بوقتِ صبح صادق 8 ذو الحج 548ھ / مطابق 22 فروری 1154ء کو بغداد میں ہوئی ۔

تحصیلِ علم:
آپ نے اپنے جد امجد حضرت غوث الثقلین رحمۃ اللہ علیہ اور اپنے والد بزرگوار سے تفقہ کیا اور حدیث سُنی ۔ نیز شیخ ابی الحسن محمد بن اسحاق بن العتابی رحمۃ اللہ علیہ اور ابو الفتح محمد بن عبد الباقی احمد وغیرہ سے بھی استماعِ حدیث کیا ۔ اپنے زمانہ کے فقہاء و محدثین کے سردار اور علمائے زمان کے سالار ہوئے ۔ آپ نے اپنے چچا سید ابو اسحاق ابراہیم رحمۃ اللہ علیہ اور شیخ ابو طالب عبد الرحمٰن بن محمد ہاشمی واسطی رحمۃ اللہ علیہ سے روایت کی ہے ۔ آپ نے حدیث کا بکثرت مطالعہ کیا اور اپنے قلم سے احادیث لکھیں، اور بیان کیں اور فتوے دئیے ۔ اہل بغداد کی ایک جماعت آپ کے علوم سے مستفید ہوئی ۔ آپ بڑے ادیب، متین، سنجیدہ اور منطق، فلسفہ وغیرہ علوم میں کامل تھے ۔

بیعت و خلافت:
اپنے والدِ گرامی سید سیف الدین عبد الرزاق علیہ الرحمہ سے بیعت ہوئے اور انہوں نے تمام اسانید اور سلسلۂ عالیہ قادریہ کی اجازت عطا فرمائی ۔

سیرت و خصائص:
قدوۃ الفقہاء و المحدثین، زبدۃ العلما ءو المفسرین، فخر المشائخ والاصفیاء، ابرار الاولیاء والاتقیاء، سید الاقطاب، فرد الاحباب صاحبِ مقاماتِ بلند و کرامات، حضرت سید سیف الدین عبد الوہاب گیلانی رحمۃ اللہ علیہ کے فرزند اکبر و مرید و خلیفہ اعظم و سجادہ نشین سید صفی الدین صوفی گیلانی رحمۃ اللہ علیہ ۔ آپ اپنے جد بزرگوار کی طرح مادر زاد ولی کامل تھے ۔

تحفہ قادریہ میں ہے:
جب تک آپ والدہ ماجدہ کے شکم میں رہے حضرت سید عبد الوہاب رحمۃ اللہ علیہ آپ کی طرف پشت نہ کرتے تھے ۔ اسی طرح آپ کی تعلیم و تربیت آپ کے حضرت جد بزرگوار غوث الاعظم رحمۃ اللہ علیہ نے اپنے کنارِ عاطفت میں فرمائی ۔ آپ کو گود میں لے کر آپ کی پشت کو بوسے دیا کرتے ۔ اکثر اوقات حضور غوثیہ کو وجد ہو جایا کرتا اور بے اختیار فرمایا کرتے الحمد للہ ۔ آپ اخلاق عالیہ سے متصف تھے ۔ زیادہ تر خاموش رہنے والے، علم کو دوست رکھنے والے، کثیر الحلم، پسندیدہ اخلاق والے، اہلِ علم کا احترام کرنے والے اور صلحا کی عزت کرنے والے ۔ اپنے قول و فعل میں ثقہ تھے ۔ آثار جذب ابتداء سے ہی آپ کی طبیعت میں آثارِ جذب و ولایت پائے جاتے تھے ۔ آپ اکثر غیبی احوال بیان فرمایا کرتے جس طرح زبان مبارک پر آتا اُسی طرح ظہور میں آ جاتا تھا ۔

آپ اپنے آبا و اجداد کی طرح حنبلی مذہب کے پیروکار تھے، اور اسی مذہب کے مطابق فتویٰ دیا کرتے تھے ۔ بہت مدت تک بغداد شریف کے مفتی رہے ۔ آپ اپنے والدِ اکرم رحمۃ اللہ علیہ کے بعد سجادہ نشینِ درگاہِ عالیہ غوثیہ ہوئے اور مسند ارشاد پر متمکن ہوکر طالبانِ خدا کو منزل مقصود پر پہنچاتے رہے ۔ چونکہ آپ ہمیشہ خدا کی طرف دھیان رکھتے اور دِل کو بُری باتوں یعنی ماسوی اللہ سے پاک رکھتے تھے اس لیے آپ کا لقب صوفی پڑ گیا تھا ۔ آپ مدت دراز تک مدرسہ عالیہ غوثیہ میں درس و تدریس کرتے رہے اور خدمتِ وعظ و نصیحت کو انجام دیا اور کمالاتِ صوری و معنوی سے مالا مال ہوئے ۔ اسی طرح سیاحت بھی خوب فرمائی، بلاد عرب، افغانستان، اور پھر ہند میں بمقام ملتان تشریف لائے، اور یہاں فیضِ غوثیہ تقسیم کرنے کے بعد واپس بغداد معلیٰ تشریف لے گئے، اور پھر وہیں انتقال ہوا ۔

طالبانِ حق کو نصیحت:
آپ نصیحت فرماتے ہوئے ارشاد فرماتے ہیں: ظاہر شریعت پر عمل کرو، اور کتاب اللہ و سنت رسول اللہ ﷺ سے تمسک رکھو، سلفِ صالحین کے طریق پر چلنا اپنا شِعار بناؤ، اعتقاد اہل سنت جماعت رکھو، نفس کو ریاضت سے مطیع کرو ۔ طلبِ مولا میں صبر جمیل اختیار کرو، بلاؤں پر تحمل کرو، خدائے تعالیٰ کی قضا و قدر پر راضی رہو، اللہ تعالیٰ کے افعال میں فنا حاصل کرو، سنت کا اتباع کرو، بدعت سے اجتناب رکھو، اللہ تعالیٰ پر ہر کام میں توکل رکھو، اُسی سے مدد مانگو اور ہر حال و ہر وقت اُسی سے نصرت طلب کرو ۔

تاریخِ وصال:
آپ کا وصال 3 رجب المرجب 611ھ، مطابق 8 نومبر 1214ء بروز ہفتہ کو ہوا ۔ آپ کو مقبرہ حلبیہ بغداد معلی عراق میں دفن کیا گیا ۔

ماخذ و مراجع: شریف التواریخ ۔

https://scholars.pk/ur/scholar/hazrat-syed-safiuddin-sufi-gilani

#یوم_ولادت_ماہ_ذو_الحجہ 🌹
#یوم_وصال_ماہ_رجب_المرجب
https://t.me/islaamic_Knowledge/44236

رجب المرجب مِیںۡ وِصَالۡ ( اِنتِقالۡ )
فرمانے وَالے چند مُنتَخبۡ بُزرگانِ دِینۡ
Join @islaamic_Knowledge
🗓️  ماہ رجب المرجب کے ایام  🗓️
یوم وصال | یوم وفات | یوم اعراس
Muhammad_Jamaluddin_Khan