📖 *فیضان خلاصہ تراویح* 📖

✍🏻 *ابو بنتین محمد فراز عطاری مدنی*

🌹 الحمد للہ رمضان المبارک کے مہینے میں مسلمانوں کے اندر تلاوت قرآن کا ذوق بڑھ جاتا ہے اور ہر طرف قراءت قرآن کی بہاریں ہوتی ہیں،اور روحانیت میں مزید اضافہ اس وقت ہوجاتا ہے جب تراویح کے بعد خلاصہ تراویح کے نام سے مساجد میں بیانات ہوتے ہیں، کچھ سالوں سے اس میں مزید اضافہ ہوتا جا رہا ہے اور لوگ تقریبا ایک گھنٹہ تراویح پڑھنے کے بعد مزید کچھ دیر خلاصہ سننے کے لئے بھی بیٹھتے ہیں، اسی سے لوگوں کی اس میں دلچسپی کا اندازہ لگایا جا سکتا ہے، بس اسی شوق کو دیکھ کر میں نے بھی نیت کی اس پر کچھ کام کیا جائے، الحمد للہ پچھلے سال اس سلسلے میں آڈیو کے صورت میں کورس کروایا اور اب ان تمام بیانات کو تحریر میں لا رہا ہوں تاکہ فارغ اوقات میں اس کو موبائل میں پڑھا جا سکے اور یہ نیت بھی ہے کہ مرد حضرات تراویح کے لئے جانے سے پہلے اس کو پڑھ لیں تو لطف دوبالا ہوجائے گا، ساتھ ہی ساتھ بیان فرمانے والے حضرات بھی اس سے مدد لے سکیں گے، اللہ پاک ہمیں قرآن پاک کی مزید برکتیں عطا فرمائے، یاد رہے یہ تفسیر نہیں بلکہ جو کچھ آیات میں بیان ہوا اس کا اردو خلاصہ ہے۔

🌼 *پہلا پارہ* 🌼

☘️ *سورہ بقرہ*

🌸 *سورہ بقرہ* قرآن کریم کی سب سے بڑی سورت ہے اس میں 286 آیات ہیں۔
آگے چلنے سے پہلے ایک نکتہ عرض کروں کہ یہ تو آپ کو پتا ہوگا کہ قرآن کریم کی بعض سورتیں مکی ہیں اور بعض مدنی، اگر یہ یاد رکھنا ہو کہ کتنی مکی ہیں اور کتنی مدنی تو سورہ بقرہ کی ٹوٹل آیات یاد رکھ لی جائیں یعنی 286،اب اس میں سے پہلے دو نمبر یعنی 28 (اٹھائیس) کو الگ کرلیں تو یہ مدنی سورتوں کی تعداد ہے اور بعد والے دو نمبر یعنی 86 (چھیاسی) کو الگ کرلیں تو یہ مکی سورتوں کی تعداد ہے تو یہ ہوگئیں 114۔

⚪ قرآن مجید کی تمام سورتوں کے نام توقیفی ہیں، توقیفی کا مطلب یہ کہ جو بات قرآن و حدیث میں بیان کی گئی ہو۔
قرآن پاک کی سورتوں کے نام اس انداز پر رکھے گئے ہیں جس نام سے سورت ہے اس کا ذکر اس سورت میں ہوتا ہے یا اس کے متعلق کوئی واقعہ بیان کیا گیا ہوتا ہے تو اسی مناسبت سے اس سورت کا نام رکھ دیا گیا، لیکن دوبارہ عرض کردوں یہ نام توقیفی ہیں ہماری عقلوں کو اس میں کوئی دخل نہیں۔

📝 *وجہ:*
عربی میں گائے کو بَقَرَۃٌ کہتے ہیں اور اس سورت کے آٹھویں اور نویں رکوع کی آیت نمبر 67 تا 73 میں بنی اسرائیل کی ایک گائے کا واقعہ بیان کیا گیا ہے، اس کی مناسبت سے اسے سورۂ بقرہ کہتے ہیں۔

📙 *فضیلت:*
   اس سورت کی بہت ساری فضیلتیں بھی احادیث میں آئی ہیں، چند آپ کے سامنے عرض کرتا ہوں۔

1- نبی پاک صلی اللہ علیہ وسلم نے ارشاد فرمایا: ’’جو شخص رات کو سورۂ بقرہ کی آخری دو آیتیں پڑھ لے گا تو وہ اسے (ناگہانی مصائب سے) کافی ہوں گی۔
 📗 *(بخاری)*

2- حضرت سیدنا ابوھریرہ رضی اللہ عنہ بیان فرماتے ہیں کہ نبی کریم صلی اللہ علیہ وسلم نے ارشاد فرمایا: "اپنے گھروں کو قبرستان نہ بناؤ (یعنی اپنے گھروں میں عبادت کیا کرو) اور شیطان اس گھر سے بھاگتا ہے جس میں ’’سورۂ بقرہ‘‘ کی تلاوت کی جاتی ہے۔"
📘 *(مسلم)*

✉️ پوری سورت کا خاکہ یہ ہے کہ عقائد اسلام کی بنیاد ایمان بالغیب پر ہے، یعنی بغیر دیکھے ایمان لانا، ہم نے اللہ پاک کو نہیں دیکھا لیکن ہم اللہ پاک پر ایمان لائے اور اللہ پاک کو وحدہ لا شریک مانا، اسی طرح بغیر دیکھے اللہ کے تمام رسولوں پر ایمان لانا، تمام آسمانی کتابوں کو ماننا اور جزاء اور سزا کا اقرار کرنا کہ آخرت میں قیامت کے دن حساب کتاب ہوگا اور اس کے بعد جنت کی نعمتیں ملیں گی یا معاذ اللہ دوزخ ٹھکانہ ہوگا۔

🕌 ساتھ ہی عبادات کو ذکر کیا گیا ہے، جیسے نماز قائم کرنا زکوۃ دینا۔
پھر آگے چل کر اس سورت میں شریعت اسلامیہ کو وضاحت کے ساتھ بیان کیا گیا ہے اور عبادات و معاملات کی تفصیل بیان کی گئی ہے
جیسے تحویل قبلہ، ماہ رمضان کے روزے ،بیت اللہ کا حج ، جہاد فی سبیل اللہ ، والدین اور رشتے داروں کے حقوق ، زکوٰۃ اور صدقات کے مصارف، یتیموں کی کفالت ،
نکاح، طلاق ، رضاعت ، اور ایلاء کو بیان کیا گیا ہے،(ایلاء ایک اصطلاح ہے جس کا مطلب ہے کہ شوہر نے یہ قسم کھائی کہ عورت سے قربت نہ کریگا یا چار مہینے قربت نہ کریگا)،
قسم کھانے کا شرعی حکم، جادو کا حرام ہونا ، قتل ناحق کی ممانعت ، قاتل پر قصاص کو واجب کرنا ، ناجائز طریقوں سے لوگوں کا مال کھانے کی ممانعت پھر شراب ، جوئے ، اور سود کی حرمت ، ایام حیض میں صحبت کی ممانعت وغیرہ۔

🔺 یہ تھا اجمالی خاکہ اب سورت کے شروع میں دیکھیں تو دوسری آیت میں اللہ پاک نے ایسے کامیاب بندوں کا ذکر فرمایا ہے جن میں پانچ خوبیاں پائی جاتی ہیں۔
🟢 غیب پر ایمان رکھتے ہیں۔
🔵 نماز قائم کرتے ہیں۔
🟣 اللہ کی راہ میں مال خرچ کرتے ہیں۔
🟤 قرآن پاک کے ساتھ دوسری آسمانی کتابوں پر بھی ایمان رکھتے ہیں۔
🟠 آخرت کے حساب پر پورا یقین رکھتے ہیں۔

🔘 مکہ کے کفار ومشرکین قرآن کے کلام ال

لہ ہونے کا انکار کرتے تھے اور یہ کہتے تھے کہ معاذ اللہ یہ نبی کریم صلی اللہ علیہ وسلم کا اپنا بنایا ہوا کلام ہے،
📣 چنانچہ سورہ بقرہ کی آیت 22 اور 23 میں ایسے تمام لوگوں کو چیلنج دیا گیا کہ اگر تمہیں قرآن پاک کے کلام اللہ ہونے میں شک ہے۔
اور تمہیں اپنی فصاحت اور بلاغت پر بڑا ناز ہے تو سب مل کر اس جیسا کلام بنا کر لے آؤ، مگر کس کی مجال تھی کہ کوئی ایک لفظ بھی بنا کر لاتا، پہلے ایک سورت کا کہا گیا، پھر دس آیات کا کہا گیا، پھر ایک آیت کا کہا گیا، مگر وہ ایک آیت کی مثل بھی نہ لا سکے، شروع کی بیس آیتوں میں اللہ پاک نے انسان کی تین قسمیں بیان کی ہیں۔
مومن، کافر اور منافق۔
اہل ایمان کی نمایاں 5 صفات کو بیان کیا ہے،
کافر کے بارے میں فرمایا گیا کہ وہ قرآنی نظام کے مطابق تبدیلی کیلئے بالکل تیار نہیں ہیں۔
اور منافق یہ وہ لوگ ہیں جو دل میں اسلام کی دشمنی رکھتے ہیں اور اپنے آپ کو مسلمان ظاہر کرتے ہیں،
قابل توجہ بات یہ ہے کہ اللہ پاک نے اہل ایمان کا تذکرہ چار آیات میں کفار کا دو آیات میں اور منافقوں کا تیرہ آیات میں فرمایا، منافقوں کی بارہ بری عادتوں کو بیان کیا گیا، جھوٹ، دھوکہ، عدم شعور ،قلبی بیماریاں، (حسد،تکبر،حرص وغیرہ)مکر و فریب، جہالت ،احکام الہی کا مذاق اڑانا معاذاللہ، زمین میں فتنہ و فساد پھیلانا ، ایمان میں تذبذب کا شکار ہونا اور اہل ایمان کا مذاق اڑانا۔
ہمیں بھی اپنے گریبان میں جھانکنا چاہیے کی جھوٹ، دھوکا، حسد اور تکبر جیسی بیماریاں ہمارے اندر تو نہیں پائی جاتیں؟

🌷 آیات نمبر 21 کے بعد انسانوں سے اولین خطاب کیا گیا اور اس رب کی عبادت کا حکم دیا گیا جس کے سوا کوئی معبود نہیں، توحید باری تعالیٰ پر کائناتی شواہد بیان کیے گئے، ہم زمین و آسمان میں جو چیزیں دیکھتے ہیں ان کو بطور دلیل پیش کیا گیا جس میں انسان کو عدم سے وجود بخشنا اور زندگی کے گزر بسر کے لیے آسمان و زمین کی تخلیق اور بارش اور سبزیوں اور پھلوں کی پیدائش کا تذکرہ فرمایا گیا،
اس کے بعد قرآنی نظام کے منکرین کے لئے جہنم کا بدترین عذاب اور اطاعت کرنے والوں کے لیے جنت کی بہترین نعمتوں اور پھلوں کے انعام کا تذکرہ موجود ہے،

☁️ آیت 30 سے 39 تک یہ ذکر ہے کہ اللہ پاک نے فرشتوں سے فرمایا کہ میں آدم (علیہ السلام) کو زمین میں اپنا خلیفہ بنا رہا ہوں، فرشتوں نے اپنی فہم و سمجھ کے مطابق اللہ پاک کی بارگاہ میں یہ عرض کیا کہ بنی آدم تو زمین میں فساد اور خون ریزی کریں گے جبکہ ہم تو ہر وقت تیری تسبیح وتقدیس میں مشغول رہتے ہیں، اللہ پاک نے فرمایا *میں جن اسرار اور حکمتوں کو جانتا ہوں تم انہیں نہیں جانتے*، پھر نعمت الہی کے ذریعے آدم علیہ السلام کی فضیلت اور برتری کو فرشتوں پر ثابت کیا اور فرشتوں کو حکم ہوا کہ آدم علیہ السلام کو سجدہ کریں، مگر ابلیس جو جنوں میں سے تھا اس نے سجدہ نہ کیا، اس کے بعد آدم علیہ السلام و حضرت حوا رضی اللہ تعالی عنہا کو جنت میں داخل کرنے اور وہاں ان کے لئے اللہ تعالی کی تمام نعمتوں سے فائدہ حاصل کرنے کی اجازت کے ساتھ ساتھ ایک درخت سےدور رہنے کے حکم کا تذکرہ موجود ہے، یہ واقعہ آدم علیہ السلام کی عظمت و شان کو بیان کرتا ہے کہ اللہ پاک نے انہیں زمین کی خلافت عطا فرمائی، ایسے علم سے نوازا جو فرشتوں کے پاس نہیں تھا، آگے چل کر بہت ساری آیات میں بنی اسرائیل پر کیے گئے انعامات کو ذکر کیا گیا اور پہلا پارہ تقریبا پورا ہی انہیں کے ذکر پر مشتمل ہے
🌳 *اسرائیل* یہ یعقوب علیہ السلام کا لقب ہے اور یعقوب علیہ السلام حضرت اسحاق علیہ السلام کے بیٹے اور حضرت ابراہیم علیہ السلام کے پوتے ہیں، اسرائیل کے معنی ہیں عبداللہ یعنی اللہ کا بندہ، اور یعقوب علیہ السلام کی اولاد بنی اسرائیل کہلاتی ہیں یعنی اولاد یعقوب، بنی اسرائیل میں ہزاروں انبیاء و مرسلین علیھم السلام تشریف لائے ، مگر بنی اسرائیل کے لیے امتحان یہ تھا کہ آخری نبی محمد مصطفی صلی اللہ علیہ وسلم بنی اسماعیل میں سے ہیں اور بنی اسماعیل سے مراد ابراہیم علیہ السلام کے دوسرے بیٹے حضرت اسماعیل علیہ السلام کی اولاد، یہ بات یہودیوں اور عیسائیوں کو بری لگتی تھی کہ پیارے آقا صلی اللہ علیہ وسلم آخری نبی ہیں وہ بنی اسماعیل سے ہوگئے ہیں۔ واضح رہے کہ بنی اسرائیل دنیا کی منتخب قوم تھی انبیاء کی اولاد میں سے تھی اللہ پاک نے انہیں اس دور کی سیاسی اور مذہبی قیادت اور سرداری سے نوازا تھا ، مگر انھوں نے اپنے منصب کے خلاف حرکات کیں جس کی وجہ سے اللہ پاک نے انھیں معزول فرمادیا اور یہ منصب ہمارے حصے میں یوں آیا کہ جو امت محمدیہ ہے وہ اب نیکی کی دعوت اور برائی سے روکنے کا فریضہ سرانجام دیتی ہے، بنی اسرائیل کو دینی و دنیاوی نعمت عطا فرمائی یعنی کثرت سے انبیاء کرام کی پیدائش، دنیا کی خوشحالی، عقیدہ توحید اور ایمان کی نعمت، فرعون کے مظالم سے نجات، انھیں سرکار دو عالم صلی اللہ علیہ وسلم پر نازل ہونے والی کتاب پر ایمان لانے میں سبقت لے ج

انے کی دعوت دی گئی مگر بنی اسرائیل ان ذمہ داریوں کو پورا کرنے سے قاصر رہے اور زمین میں فساد پھیلانے سے باز نہ آئے اور اللہ کی عظیم الشان نعمتوں کے مقابلے میں لہسن پیاز اور دالوں کا مطالبہ کرکے اپنی ذہنی پستی کا مظاہرہ کیا اور اللہ تعالی کی نعمتوں کا شکر ادا نہ کیا، بلکہ اللہ تبارک و تعالیٰ نے ان کو من و سلویٰ (کھانے) عطا فرمائے اس کی انہوں نے قدر نہ کی بلکہ اس کی ناشکری کی،

⚖️ اسی طرح آگے چل کر ایک واقعے کو بیان کیا گیا کہ بنی اسرائیل کے ایک مالدار شخص کو اس کے بھتیجے نے مال وراثت کے لئے قتل کر دیا اور رات کی تاریکی میں اس کی لاش دروازے پر ڈال دی، پھر اس کے قتل کا مقدمہ چلایا گیا جب موسیٰ علیہ السلام کی بارگاہ میں یہ معاملہ پہنچا تو وحی کے ذریعے موسی علیہ الصلاۃ والسلام نے ان کو بتایا کہ گائے ذبح کریں اور اس کےگوشت کا کچھ حصہ اس مقتول کے جسم پر لگائیں گے، تو وہ خود اپنے قاتل کا نام بیان کر دے گا، مگر بنی اسرائیل نے اس گائے کے بارے میں سوالات کرنا شروع کردیے اور اپنے لئے راستہ تنگ کرتے چلے گئے کہ ہم کونسی گائے لائیں؟ کس رنگ کی ہو؟ کیا کرتی ہو؟ جس کی وجہ سے ان کے معاملات مشکل ہوتے چلے گئے اور یہ وہی مقام ہے جس کی وجہ سے اس سورت کا نام "بقرہ" رکھا گیا ہے۔

💡اگلی آیت میں اللہ پاک نے بنی اسرائیل کو اپنے قرب اور رضا کا ایک معیار بیان فرمایا،وہ کہا کرتے تھے ہم کو عذاب دیا بھی گیا تو فقط چالیس دن،ورنہ ہم تو اللہ کے محبوب ہیں، تو فرمایا گیا کہ اگر تم واقعی اللہ کے محبوب ہو اور آخرت میں تمہیں اعزاز و اکرام سے نوازا جائیگا تو موت کی تمنا کرو کہ جلد اپنے محبوب یعنی خالق حقیقی سے جا ملو، لیکن ظاہر ہے وہ تو ڈرتے تھے۔

⛏️ یہودیوں کی بری عادات میں سے جادوگروں کی اطاعت بھی تھی،تو اس کی مذمت بیان کی گئی، اسی طرح نبی پاک صلی اللہ علیہ وسلم کی بارگاہ میں یہودیوں کا جو غلط رویہ رہتا تھا، آیت نمبر 104 میں واضح طور پر ارشاد ہوا کہ اے اہل ایمان جب تم نبی صلی اللہ علیہ وسلم کی کوئی بات سمجھ نہ سکو تو "راعنا"(ہماری رعایت کیجئے) نہ کہو بلکہ *انظرنا* (ہم پر نظر رحمت فرمائیے) کہا کرو، کہ اگرچہ لفظ راعنا میں ویسے کوئی قباحت نہیں مگر یہودی اپنی بدباطنی کی وجہ سے اس کو بگاڑ کر کہتے ہیں تو معنی کچھ اور بن جاتا ہے، اس لئے ایسا لفظ ہی استعمال نہ کرو جو دوسروں کی خبث باطنی میں مددگار ثابت ہو۔ اللہ پاک نے اپنے محبوب صلی اللہ علیہ وسلم کی بارگاہ کے آداب سکھاتے ہوئے صحابہ کرام کو یہ حکم ارشاد فرمایا اور قیامت تک آنے والے مسلمانوں کو یہ سبق عطا فرمایا کہ نبی کی بارگاہ میں بات کرنے کے آداب کیا ہیں۔

🕌 آگے چل کر فرمایا مسجدیں اللہ کا گھر ہیں ان میں اللہ کی بات کرنے سے روکنا بدترین ظلم ہے، اور پھر آیت 122 پر پہنچ کر بنی اسرائیل سے کلام کا اختتام ہو رہا ہے، ان آیات میں ایک بار پھر اللہ کی عطا کردہ نعمتوں کی یاد دہانی کرائی جارہی ہے، اس کے بعد ابراہیم علیہ الصلاۃ والسلام کی امتحان کی داستان بیان کی گئی،انھیں جو منصب امامت ملا اس کا تذکرہ ہے، اور ان کو آزمائش میں مبتلا کرنے اور امتحان میں ان کی کامیابی کو بیان فرمایا۔
پھر ابراہیم علیہ السلام کے بیت اللہ کو تعمیر کرنے کا ذکر ہے، اور اس بات کا بیان ہے کہ انھوں نے تعمیر بیت اللہ کے بعد اللہ پاک کی بارگاہ میں دعا کی کہ " اے ہمارے رب ان اہل مکہ میں ان میں سے عظمت والے رسول کو مبعوث فرما جو ان لوگوں پر تیری آیات کی تلاوت کرے اور ان کو کتاب و حکمت کی تعلیم دے اور ان کی جانوں کا تزکیہ کرے"۔

پھر بتایا گیا کہ اہل ایمان سب انبیاء علیھم السلام پر ایمان لاتے ییں، ایمان لانے میں کوئی فرق نہیں کرتے، اور پھر انبیاء علیہ السلام کے نام بھی ذکر کیے گئے ہیں اسی پر پارے کا اختتام ہوتا ہے۔
📲 *+92-321-2094919*

📙 *فیضان خلاصہ تراویح* 📙

✍🏻 *ابو بنتین محمد فراز عطاری مدنی عفی عنہ*

📢 *دوسرا پارہ، سیقول*

🕋 دوسرا پارہ تحویل قبلہ ( یعنی قبلے کو بیت المقدس سے بیت اللہ کی طرف پھیرنے) کے ذکر سے شروع ہوتا ہے۔
مسجد الحرام شریف میں خانہ کعبہ ہے اور نبی پاک صلی اللہ علیہ وسلم کعبۃ اللہ سے محبت فرماتے تھے، اور جو صحابہ کرام شروع سے مکے شریف میں تھے ان کی عقیدت بھی خانہ کعبہ سے کچھ الگ انداز کی تھی، چونکہ ایک وقت تک بیت المقدس کو قبلہ قرار دیا گیا تھا اور یہودیوں کا قبلہ بھی بیت المقدس تھا تو جب مدینے شریف کو ہجرت ہوئی اور صحابہ کرام بظاہر خانہ کعبہ سے دور ہوگئے اور قبلہ بھی بیت المقدس کو بنا دیا گیا تھا تو ان کے لئے امتحان کا وقت تھا مگر چونکہ وہ اللہ پاک و رسول کریم صلی اللہ علیہ وسلم کے اطاعت گزار اور ان کے احکامات کی پیروی کرنے والے تھے لہذا وہ اس امتحان میں کامیاب رہے، لیکن نبی پاک صلی اللہ علیہ وسلم کی اپنی خواہش بھی یہ تھی کہ خانہ کعبہ ہی کو قبلہ مقرر کردیا جائے لہذا آپ اس کے لئے دعا فرماتے اور آسمان کی طرف نظر فرماتے تھے کہ قبلے کی تبدیلی کا حکم آجائے۔
اللہ پاک اپنے محبوب صلی اللہ علیہ وسلم کی خواہش کو کس طرح پورا فرماتا ہے اس کا مشاہدہ دوسرے پارے کی تیسری اور سورہ بقرہ کی آیت 144 میں کیا جا سکتا ہے۔
اللہ پاک نے فرمایا:
قَدْ نَرٰى تَقَلُّبَ وَجْهِكَ فِی السَّمَآءِۚ-فَلَنُوَلِّیَنَّكَ قِبْلَةً تَرْضٰهَا۪-فَوَلِّ وَجْهَكَ شَطْرَ الْمَسْجِدِ الْحَرَامِؕ
ترجمہ: ہم تمہارے چہرے کا آسمان کی طرف باربار اٹھنا دیکھ رہے ہیں تو ضرور ہم تمہیں اس قبلہ کی طرف پھیر دیں گے جس میں تمہاری خوشی ہے تو ابھی اپناچہرہ مسجد حرام کی طرف پھیر دو

🗂️ تحویل قبلہ کا معنی ہے قبلے سے پھیر دینا یعنی جس قبلے پر پہلے تھے اس سے پھیر دینا۔

تحویل قبلہ کے بعد یہودی مسلمانوں پر طعنہ کیا کرتے تھے، جس کے جواب میں فرمایا گیا کہ تحویل قبلہ کے حکم خداوندی پر ناسمجھ اور بیوقوف لوگ ہی اعتراض کریں گے۔ اور ان کے دوسرے سوال کہ مسلمان بیت المقدس کو چھوڑ کر بیت اللہ کا رخ کیوں کرنے لگے؟ تو اس کا جواب دیا گیا کہ تمام جہان مشرق اور مغرب اللہ ہی کے ہیں وہ جس طرف چاہے رخ کرکے نماز پڑھنے کا حکم ارشاد فرمادے،بندے کو تو اعتراض کا حق ہی نہیں ہے۔اہمیت کسی سمت کی نہیں اللہ کے حکم کی ہے
اللہ تعالی نے فرمانبردار اور نا فرمان میں فرق کو ظاہر کرنے کے لئے تحویل قبلہ کا حکم دیا کہ کون اللہ تبارک وتعالی کے اس حکم کی فرمانبرداری کرکے فوراً حکم کو مان لیتا ہے اور کون نافرمان بن کر اعتراض شروع کردیتا ہے۔ تو جو مخلص مسلمان تھے وہ کامیاب ہوگئے اور کافر و منافق کھل کر سامنے آگئے۔

📝 آیت نمبر 151 میں حضرت ابرہیم اور حضرت اسماعیل علیھما السلام کی دعا کی قبولیت کا بیان ہے کہ سرور عالم صلی اللہ علیہ وسلم کو حضرت اسماعیل علیہ السلام کی نسل سے مبعوث فرمایا۔ ارشاد فرمایا کہ ان کا منصب یہ ہے کہ لوگوں کو اللہ پاک کی آیتیں سنا سنا کر متوجہ کرتے ہیں پھر جو متوجہ ہوں انکا تزکیہ کرتے ہیں پھر انکی اصلاح کرتے ہیں اور انکے نفوس کو صاف کرتے ہیں۔

🌴 پچھلی امتوں کو اللہ پاک نے اپنی نعمتوں کو یاد کرنے کا حکم دیا اور فرمایا کہ اگر تم میری نعمتوں کا شکر ادا کرتے رہو گے تو میں اور عطا فرماؤں گا، مگر آیت 152 میں اس امت محمدیہ پر اللہ پاک کے ایک ایسے کرم کا ذکر ہے جو اس امت ہی کا خاصہ ہے،

اللہ پاک فرماتا ہے:
*فَاذْكُرُوْنِیْۤ اَذْكُرْكُمْ*
ترجمہ کنز العرفان:تو تم مجھے یاد کرو ،میں تمہیں یاد کروں گا

گویا ذکر الہٰی مومن کی زندگی کا سب سے بڑا وظیفہ ہے ،احادیث مبارکہ میں اس کی تفسیر یہ ہے کہ اللہ تبارک وتعالی فرشتوں کے سامنے اپنے بندوں پر فخر فرماتا ہے

⚔️ پھر آیت نمبر 153 اور 154 میں اہل ایمان سے خطاب کی ابتدا ہوتی ہے اور انہیں بتایا جارہا ہے کہ ہجرت مدینہ کے بعد اب امتحان اور آزمائش کی نئی صورتیں سامنے آئیں گی،اب تم پر جنگی فرائض لازم کئے جائیں گے اور جو لوگ اللہ کی راہ میں جہاد کرتے ہوئے شہید ہونگے وہ مردہ نہیں بلکہ ایسی شاندار زندگی پالیتے ہیں کہ جس کا تصور اس دنیا میں ممکن نہیں ہے۔

اللہ پاک نے فرمایا

*وَ لَا تَقُوْلُوْا لِمَنْ یُّقْتَلُ فِیْ سَبِیْلِ اللّٰهِ اَمْوَاتٌؕ-بَلْ اَحْیَآءٌ وَّ لٰكِنْ لَّا تَشْعُرُوْنَ*
اور جواللہ کی راہ میں مارے جائیں انہیں مردہ نہ کہو بلکہ وہ زندہ ہیں لیکن تمہیں اس کا شعور نہیں ۔

✈️ پھر اس کے بعد یہ بتایا گیا کہ حج و عمرہ کے موقع پر کئے جانے والے اعمال خصوصاً صفا و مروہ کی سعی،یہ شعائر اسلام میں سے ہے۔

🕌 اس کے بعد فرمایا گیا معبود حقیقی ایک ہی ہے، اس کے علاوہ کوئی عبادت کے لائق نہیں ہے، اسکی رحمت تمام مخلوقات کے لئے عام ہے ،اور اہل ایمان کے لئے اسکی نعمت مکمل ہے۔

🌍 آسمان اور زمین کی تخلیق ، دن رات کی ترتیب، اور انسانی نفع کےلئے پانی میں چلنے والی کشتیاں ، بادل ، بارش ، ز

مین سے نکلنے والے پھل اور سبزیاں اللہ تعالی کی وحدانیت کی دلیلیں ہیں جو اللہ پاک نے عقل والوں کے لئے بیان فرمائی ہیں۔ اور قرآن پاک میں مختلف مقامات پر ان باتوں پر غور کرنے اور اللہ پاک کی قدرت کی نشانیوں کا مشاہدہ کرنے کی ترغیب دلائی گئی۔

🍇🍎 آیت نمبر 172 اور 173 میں حکم ہوا کہ اللہ تعالی کی عطا کردہ پاک نعمتوں کو کھاؤ اور اس کا شکر ادا کرو۔

🚫 پھر چار ایسی چیزوں کو بیان فرمایا جو قطعی طور پر حرام ہیں
( ۱ ) مردار، ( ۲ ) خون، ( ۳ ) خنزیر کا گوشت، ( ۴ ) غیرُاللہ  کے نام پر ذبح کیا جانے والا جانور۔ ان کی تفصیل یہ ہے : 

❌ مردار : جو حلال جانور بغیر ذبح کئے مرجائے یا اس کو شرعی طریقے کے خلاف مارا گیا ہو مثلاً مسلمان اور کتابی کے علاوہ کسی نے ذبح کیا ہو یا جان بوجھ کر تکبیر پڑھے بغیر ذبح کیا گیا ہو یا گلا گھونٹ کر یا لاٹھی پتھر، ڈھیلے، غلیل کی گولی سے مار کر ہلاک کیا گیا ہو یاوہ بلندی سے گر کر مر گیا ہو یا کسی جانور نے اسے سینگ مارکر مار دیا ہو یا کسی درندے نے ہلاک کیا ہو اسے مردار کہتے ہیں اور اس کا کھانا حرام ہے البتہ مردار کا دباغت کیا ہوا چمڑا کام میں لانا اور اس کے بال  سینگ ہڈی ، پٹھے سے فائدہ اٹھانا جائز ہے۔ زندہ جانور کا وہ عضو جو کاٹ لیا گیا ہو وہ بھی مردار ہی ہے۔ 

❌ خون :  خون ہر جانور کا حرام ہے جبکہ بہنے والا خون ہو ۔ ذبح کے بعد جو خون گوشت اور رگوں میں باقی رہ جاتا ہے وہ ناپاک نہیں۔ 

❌ خنزیر :(یعنی سور) نَجس العین ہے اس کا گوشت پوست بال ناخن وغیرہ تمام اجزاء نجس و حرام ہیں ،  کسی کو کام میں لانا جائز نہیں چونکہ آیت میں اُوپر سے کھانے کا بیان ہورہا ہے اس لیے یہاں صرف گوشت کا ذکر ہوا۔ 

❌ غیر اللہ   کے نام کا ذبیحہ:  اس کا معنی یہ ہے کہ جانور ذبح کرتے وقت  اللہ  تعالیٰ کے علاوہ کسی اور کا نام  لیا جائے اور جس جانور کو  غیراللہ  کا نام لے کر ذبح کیا جائے وہ حرام و مردار ہے البتہ اگر ذبح فقط  اللہ تعالیٰ کے نام پر کیا اور اس سے پہلے یا بعد میں غیر کا نام لیا مثلاً یہ کہا کہ عقیقہ کا بکرا، ولیمہ کا دنبہ یا جس کی طرف سے وہ ذبیحہ ہے اسی کا نام لیا مثلاً یہ کہا کہ اپنے ماں باپ کی طرف سے ذبح کررہا ہوں یا جن اولیاء کے لیے ایصال ثواب مقصود ہے ان کا نام لیا تو یہ جائز ہے، اس میں کچھ حرج نہیں اور ا س فعل کو حرام کہنا اور ایسے جانور کو مردار کہنا سراسر جہالت ہے۔

🔥 اگلی آیت میں ان علماء پر اللہ تعالی کے ناراضی کا بیان ہے جو اللہ تعالی کی کتاب کی تعلیمات کو چھپاتے ہیں اور تھوڑی سی قیمت کے عوض لوگوں کی خواہشات کے مطابق فتوے دے دیتے ہیں،یہ کام اس وقت کے یہودی کیا کرتے تھے۔اور یہ وہ بد نصیب ہیں جنہوں نے ہدایت کے بدلے گمراہی خرید لی ہے اور بخشش کے بدلے عذاب کو پسند کیا۔

🌸 اس کے بعد نیکی اور اسکی مختلف اقسام کو اللہ تعالی نے بیان کیا ہے۔
نیکی دراصل ایمان کی بنیاد پر سر انجام پانے والے اعمال ہیں،وہ عزیز و اقارب ، یتیم مساکین کے ساتھ مالی تعاون کرنا ، پھر نماز ، روزہ ، زکوٰۃ کا اہتمام کرنا ، وعدے کو پورا کرنا ، مشکلات میں حق پر صبر کرنا اور ثابت قدمی اختیار کرنا، ان نیکیوں کو کرنے والے لوگوں کو قرآن نے سچے اور متقی ہونے کا لقب عطا فرمایا ہے۔

⚒️ اس کے بعد قصاص و دیت کے قانون کو بیان کر کے بلا امتیاز اس پر عمل درآمد کی تلقین فرمائی ہے، قصاص حیات انسانی کے تحفظ کا ضامن ہے۔

وَ لَكُمْ فِی الْقِصَاصِ حَیٰوةٌ یّٰۤاُولِی الْاَلْبَابِ لَعَلَّكُمْ تَتَّقُوْنَ(۱۷۹)
اوراے عقل مندو! خون کا بدلہ لینے میں تمہاری زندگی ہے تاکہ تم بچو۔

جب قصاص لیا جائے گا تو لوگ قتل وغارت گری سے بچیں گے فتنے و فساد کرنے سے بچیں گے انکو معلوم ہے کہ اگر ہم نے کسی کو قتل کردیا تو بدلے میں ہمیں بھی قتل ہونا پڑے گا، یہ اگرچہ بظاہر سزا ہے لیکن اس میں انسانی نسل اور معاشرے کا تحفظ ہے۔

📝 پھر وصیت کی تلقین کرتے ہوئے کسی پر ظلم و ناانصافی نہ کرنے کی ہدایت کی گئی، لیکن سورہ نساء میں اس کے مزید احکام آئیں گے۔

🕖 پھر عاقل بالغ مسلمان پر روزے فرض ہیں اسکا بیان ہے،روزے اگر واقعی تمام آداب کا لحاظ رکھتے ہوئے رکھے جائیں تو انسان میں تقوی پیدا کرنے کے ساتھ ساتھ انسانی احساسات کو بھی بہتر کرتے ہیں، روزے کا اصل مقصد تقوی ہے اس کو بیان کیا گیا۔ پھر فرمایا کہ جس مہینے میں روزے فرض ہیں اسے یہ خصوصیت اور فضیلت بھی حاصل ہے کہ اس میں قرآن عظیم نازل کیا گیا، اس کے بعد روزے کے مسائل پر روشنی ڈالی گئی کہ بیماری یا سفر کی حالت میں عارضی طور پر روزے کو چھوڑنے کی رخصت ہے جن کی بعد میں قضاء کی جائے گی ایسا نہیں کہ سرے سے روزہ رکھنے ہی نہیں ہیں یا فدیہ دینا ہے بلکہ مسافر اور جو سخت بیمار ہیں ان کے احکامات پھر فقہ کی کتابوں میں موجود ہیں،پھر اس بات کا بھی بیان ہے کہ ایسا بڑی عمر والا شخص جو روزہ رکھنے کی قدرت نہیں رکھتا نہ بعد میں کوئی قدرت آنے کی امید ہے تو اب وہ ایک مسکین کھانا فد