https://youtu.be/q2rQGjkA2EM
ـــــــ کرونا وائرس کے ڈر سے مسجدیں بند کرنا کیسا ہے؟
ـــــــ حدیث :صلوا فی رحالکم ــ أوــ بیوتکم کا پس منظر اور اس سے استدلال کی جہتیں کیا ہیں.؟
ـــــــ احتیاطی تدابیر کیا اپنائی جائیں.؟
ـــــــ ـــــــ ـــــــ ـــــــ ـــــــ
جانئیے :
محقق مسائل جديدہ، سراج الفقہاء، مفتی اعظم حضرت مفتی محمد نظام الدین رضوی حفظہ اللہ تعالیٰ کی زبان سے.

اسلام علیکم بخاری شریف کی حدیث ہے لاعدوی وفرالمجذوم کما تفر من الاسد کی مکمل تشریح دلائل کے ساتھ اور فی زماننا اسکا کیا حکم ہے مفتی بہ قول بتاؤ

*"کیا کرونا وائرس کے مریض کے پاس جانے سے بیماری اڑ کر لگ جائے گی ؟"*

⚡⚡⚡⚡⚡⚡⚡⚡⚡⚡

تحریر: *ذیشان ضیا مصباحی*
----------------------------------------
خادم التدریس : مرکز اہل سنت، دار العلوم فیض رضا، شاہین نگر حیدرآباد (دکن)
20/رجب المرجب 1441ھ

Gmail:
z.ziyamisbahi@gmail.com
Mobile:
9151450079

آج جب کہ ہر چہار جانب *کرونا وائرس* کی وبا عام ہوتی چلی جارہی ہے، دو چار ملک نہیں بلکہ پوری دنیا اس کی وجہ سے بے چینی اور اضطراب کے عالم میں اپنی زندگی کے شب و روز بسر کر رہی ہے، کیوں کہ کرونا وائرس جو چین سے شروع ہوا تھا اب سو سے زائد ملکوں تک پھیل چکا ہے پوری دنیا میں ایک ملین سے زائد لوگ اس سے متاثر ہیں۔ اور تقریباً پانچ ہزار لوگوں کی اموات ہوچکی ہیں۔
ایسے ماحول میں *کرونا وائرس* کے ساتھ ساتھ یہ بات بھی لوگوں کے مابین بڑی تیزی سے پھیل رہی ہے کہ *کرونا وائرس* کے مریض سے اختلاط یعنی میل جول سے وہ بیماری لگ جاتی ہے۔
*شرعی نقطۂ نظر* سے یہ بات کہاں تک درست و صحیح ہے آئیے اس کا جائزہ لیتے ہیں۔
*کسی بیماری کا اڑ کر کسی تندرست وتوانا کو لگ جانا محض خیالِ باطل ہے ، مذہب اسلام میں اس کی کوئی حقیقت نہیں۔*
صحیح البخاری میں ہے:
*حَدَّثَنَا عَبْدُ الْعَزِيزِ بْنُ عَبْدِ اللَّهِ ، حَدَّثَنَا إِبْرَاهِيمُ بْنُ سَعْدٍ ، عَنْ صَالِحٍ ، عَنْ ابْنِ شِهَابٍ ، قَالَ : أَخْبَرَنِي أَبُو سَلَمَةَ بْنُ عَبْدِ الرَّحْمَنِ وَغَيْرُهُ ، أَنَّ أَبَا هُرَيْرَةَ رَضِيَ اللَّهُ عَنْهُ ، قَالَ : إِنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ ، قَال: لَا عَدْوَى وَلَا صَفَرَ ، وَلَا هَامَةَ ، فَقَالَ أَعْرَابِيٌّ : يَا رَسُولَ اللَّهِ فَمَا بَالُ إِبِلِي تَكُونُ فِي الرَّمْلِ كَأَنَّهَا الظِّبَاءُ فَيَأْتِي الْبَعِيرُ الْأَجْرَبُ فَيَدْخُلُ بَيْنَهَا فَيُجْرِبُهَا ، فَقَالَ : فَمَنْ أَعْدَى الْأَوَّلَ ، رَوَاهُ الزُّهْرِيُّ ، عَنْ أَبِي سَلَمَةَ ، وَسِنَانِ بْنِ أَبِي سِنَانٍ.*
[صحیح البخاری۔ باب: لا عدوی الحدیث: 5717]
حضرت ابو ہریرہ رضی اللہ عنہ روایت کرتے ہیں کہ رسول اللہ ﷺ نےارشاد فرمایا: بیماریوں کے متعدی ہونے یعنی ایک کی بیماری اڑ کر دوسرے کو لگ جانے، صفر اور الّو کی نحوست کی کوئی اصل نہیں، اس پر ایک اعرابی بولا: کہ یا رسول اللہ! پھر میرے اونٹوں کو کیا ہو گیا کہ وہ جب تک ریگستان میں رہتے ہیں تو ہرنوں کی طرح ( صاف اور خوب چکنے ) رہتے ہیں پھر ان میں ایک خارش والا اونٹ آ جاتا ہے اور ان میں گھس کر انہیں بھی خارش زدہ کر جاتا ہے تو نبی اکرم صلی اللہ علیہ وسلم نے اس پر فرمایا: لیکن یہ بتاؤ کہ پہلے اونٹ کو کس نے خارش لگائی تھی؟ اس کی روایت امام زہری نے ابوسلمہ اور سنان بن ابی سنان کے واسطہ سے کی ہے۔
یہ حدیث صحیح بخاری کے علاوہ متعدد طرق سے مختلف الفاظ کے ساتھ کثیر کتب احادیث میں وارد ہوئی ہے۔
مذکورہ حدیث پاک میں نبی اکرم صلی اللہ علیہ وسلم نے یہ واضح فرمادیا کہ جس طرح پہلے اونٹ کو اللہ تعالیٰ کی مشیت سے خارش لگی اسی طرح دیگر اونٹوں کو بھی اللہ تعالیٰ کی مشیت ہی سے خارش لگی ایسا نہیں کہ ایک اونٹ کی بیماری (خارش) دوسرے اونٹوں کو اڑ کر لگی ہے۔
سوال یہ پیدا ہوتا ہے کہ جب بیماری متعدی نہیں ہوتی، یعنی ایک کی بیماری اڑکر دوسرے کو نہیں لگتی تو پھر نبی اکرم صلی اللہ علیہ وسلم کے اِس ارشاد : *"فر من المجذوم فرارک من الاسد"* [المسند للامام احمد بن حنبل 9683 ج: 9،ص: 292 دار الحدیث القاھرہ] کا کیا مطلب ہے؟ جس سے بظاہر معلوم ہوتا ہے کہ ایک کی بیماری اڑ کر دوسرے کو لگتی ہے کیوں کہ نبی کریم صلی اللہ علیہ وسلم نے اس حدیث میں کوڑھ کے مرض میں مبتلا شخص سے اس طرح دور بھاگنے کا حکم دیا جیسا کہ آدمی شیر سے بھاگتا ہے ۔
اس سلسے میں کہا جائے گا یہ حدیث یا تو منسوخ ہے اور اس کی ناسخ وہ احادیث ہیں جن میں بیماری کے متعدی ہونے کی نفی کی گئی ہے۔
عمدۃ القاری شرح صحیح البخاری میں امام قاضی عیاض سے منقول ہے:
" *ذھب عمر رضی اللہ عنہ و جماعۃ من السلف الی الاکل معہ وان الامر باجتنابہ منسوخ* "
[ عمدۃ القاری شرح صحیح البخاری، کتاب الطب / باب الطیرۃ ،ج:21، ص: 367 دار الکتب العلمیہ بیروت لبنان]
حضرت عمر رضی اللہ عنہ اور سلف کی ایک جماعت اس جانب گئی ہے کہ جذامی کے ساتھ کھانے میں حرج نہیں اور اس سے احتیاط و احتراز کا حکم منسوخ ہے۔
یا دونوں حدیثوں میں تطبیق و توفیق دی جائے گی۔
وہ یوں کہ حدیث: لا عدوی الخ کو اس کے اصلی معنی پر رکھا جائے گا اور کہا جائے گا کہ یقینا کوئی بیماری متعدی نہیں ہوتی اور جو جذامی (کوڑھ) کے مریض سے بھاگنے کا حکم دیا گیا ہے تو وہ اس لیے کہ کہیں ایسا نہ ہو کہ کوئی اس مریض کے پاس جائے اور بیماری اللہ کی مرضی اور تقدیر سے اس کو لگ جائے تو شی

طان اس کے دل میں وسوسہ ڈالے گا کہ اختلاطِ مریض (مریض سے ملنے جلنے) کی وجہ سے بیماری لگی ہے جب کہ معاملہ ایسا نہیں ہے تو اس طرح اس کا عقیدہ خراب ہوگا، یعنی فسادِ عقیدہ سے بچانے کے لیے اللہ کے نبی صلی اللہ علیہ وسلم نے یہ حکم فرمایا، اس وجہ سے نہیں کہ ایک کی بیماری اڑ کر دوسرے کو لگتی ہے۔
نزہۃ النظر میں ہے:
*الاولیٰ فی الجمع أن یقال ان نفیہ صلی اللہ علیہ وسلم للعدوی باق علی عمومہ و قد صح قولہ صلی اللہ علیہ وسلم : لا یعدی شئی شیئا وقولہ فمن اعدی الأول یعنی ان اللہ سبحانہ و تعالیٰ ابتدأہ ذلک فی الثانی کما ابتدأہ فی الاول۔۔۔و اما الأمر بالفرار من المجذوم فمن باب سد الذرائع لئلا یتفق للشخص الذی یخالطہ شئی من ذلک بقدر اللہ تعالی ابتدا لا بالعدوی المنفیۃ فیظن ان ذلک بسبب مخالطۃ فیعتقد صحۃ العدوی فیقع فی الحرج فأمر بتجنبہ حسما للمادۃ۔*
[ نزہۃ النظر ، ص: 43_44 دار الفکر بیروت لبنان]
دونوں حدیثوں کے درمیان تطبیق کی بہتر صورت یہ ہے کہ کہا جائے کہ نبی کریم صلی اللہ علیہ وسلم نے جو تعدیہ ( ایک کی بیماری اڑ کر دوسرے کو لگنے ) کی نفی فرمائی ہے وہ اپنے عموم پر باقی ہے اور آپ صلی اللہ علیہ وسلم سے صحیح روایت ہے کہ *کسی چیز کا تعدیہ نہیں ہوتا* اور آپ صلی اللہ علیہ وسلم کا ارشاد ہے کہ *پہلے کو کس نے پہنچایا* (اس شخص کا رد کرتے ہوئے جس نے آپ سے سوال کیا تھا کہ جب خارشی اونٹ مل جاتا ہے تو تندرست کو بھی خارشی بنا دیتا ہے) یعنی اللہ تعالیٰ نے دوسرے کو اسی طرح خارشی کیا جس طرح اس نے پہلے کو ابتداء کیا تھا۔
رہا مجذوم سے فرار کا حکم تو وہ اسباب کا دروازہ بند کرنے کی قبیل سے ہے تاکہ اختلاط کرنے والے شخص کو اس مرض میں سے کچھ اتفاقا ہوجائے، جو کہ اللہ کی تقدیر سے ہو نہ کہ تعدیہ کی وجہ سے تو وہ یہ گمان نہ کرے کہ اس اختلاط سے ہوا اور وہ یہ عقیدہ رکھ لے کہ مرض متعدی ہوتا ہے اور وہ حرج میں پڑ جائے۔
پس آپ صلی اللہ علیہ وسلم نے عادۃً جاری شدہ کی بنیاد کو ختم کرنے کے لیے احتیاط کا حکم دیا۔
فتح الباری میں ہے:
*کانت الجاھلیۃ تعتقدہ أن الامراض تعدی بطبعھا من غیر اضافۃ الی اللہ فابطل النبی صلی اللہ علیہ وسلم اعتقادھم ذلک واکل مع المجزوم لییبین لھم ان اللہ ھو الذی یمرض و یشفی*
[فتح الباری شرح صحیح البخاری ،ج: 13، ص:99 کتاب الطب/ باب الجذام ، مکتبہ دار طیبہ ،ریاض]
زمانۂ جاہلیت کے لوگ اعتقاد رکھتے تھے کہ امراض اپنی طبیعت کے اعتبار سے مُتَعَدِّی ہوتے ہیں اور وہ ان کی نسبت اللّٰہ تعالٰی کی طرف نہیں کرتے تھے، لہذا نبیِّ کریم صلَّی اللہ علیہ وسلَّم نے ان کے اعتقاد کو باطل قرار دیا اور مجذوم کے ساتھ کھانا کھایا تا کہ آپ ان کے لیے واضح فرمادیں کہ اللہ تعالیٰ ہی بیمار کرتا ہے اور شفا دیتا ہے۔
معلوم ہوا کہ بیماری اڑکر نہیں لگتی بلکہ اس میں اللہ تعالیٰ کی تقدیر کا دخل ہے۔
اور اگر بیماری متعدی ہوتی تو خود رسول اللہ صلی اللہ علیہ وسلم اور آپ کے صحابہ کرام رضوان اللہ علیہم اجمعین۔ جذام و برص وغیرہ میں مبتلا مریض کے پاس نہ جاتے اور ان کے ساتھ کھانے، پینے اور ہم کلام ہونے کا معاملہ نہ فرماتے کہ یہ اپنے آپ کو بلا پر پیش کرنا ہے جو شرعاً جائز نہیں۔
ارشاد باری تعالیٰ ہے:
*وَلَا تُلْقُوا بِأَيْدِيكُمْ إِلَى التَّهْلُكَةِ۔*
[القرآن الکریم ،سورۃ البقرہ:2، الآیۃ: 195]
اور اپنے ہاتھوں ہلاکت میں نہ پڑو( کنز الایمان)
حالاں کہ کثیر روایتوں سے ایسے مریضوں کے ساتھ ان کا مذکورہ معاملات فرمانا ثابت ہے۔
جمع الجوامع میں ہے
*عن جابر ان رسول اللہ ﷺ أخذ بید رجل مجذوم فأقعدہ معہ فقال کل ثقۃ باللہ وتوکلا علیہ۔*
[جمع الجوامع ج: 1، ص: 229،الحديث 10348 دارالکتب العلمیہ بیروت لبنان]
حضرت جابر رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ایک جذامی کا ہاتھ پکڑ کر اپنے ساتھ بٹھایا اور فرمایا: اللہ تعالیٰ پر توکل اور بھروسہ کرتے ہوئے کھاؤ۔
مصنف ابن ابی شیبہ میں ہے :
*حدثنا ابو بکر قال حدثنا وکیع عن سفیان عن عبد الرحمن بن القاسم عن ابیہ قال: قدم علی ابی بکر وفد من ثقیف، فاتی بطعام فدنا القوم ، و تنحی رجل بہ ھذا الداء یعنی الجذام فقال لہ ابو بکر ادنہ فدنا فقال :کل فأکل وجعل ابو بکر وضع یدہ موضع یدہ*
[المصنف لابن أبی شیبہ ج: 5،ص:141 الحدیث24525 دار الکتب العلمیہ بیروت لبنان]
حضرت عبد الرحمن بن قاسم کے والد روایت کرتے ہیں کہ امیر المومنین سیدنا صدیق اکبر رضی اللہ عنہ کے دربار میں قبیلہ ثقیف کا ایک وفد آیا،(ان کے لیے) کھانا حاضر لایا گیا وہ نزدیک آئے مگر ایک صاحب کہ اس مرض (جذام) میں مبتلا تھے الگ ہوگئے۔ صدیقِ اکبر رضی اللہ عنہ نے فرمایا: قریب آؤ! قریب آئے فرمایا: کھانا کھاؤ! تو انہوں نے کھایا حضرت صدیق اکبر رضی اللہ عنہ( کھانے کے دوران) اپنا دست مبارک اس جگہ رکھ رہے تھے جہاں وہ

جذامی رکھ رہے تھے۔
طبقات ابن سعد میں ہے:
*عن صالح بن کیسان قال: قال ابو زیاد حدثنی خارجہ بن زید أن عمر بن الخطاب دعاھم لغداء فھابوا وکان فیھم معیقیب و کان بہ جذام فأ کل معیقیب معھم فقال لہ عمر خذ مما یلیک و من شقک ، فلو کان غیرک مااٰ کلنی فی صفحۃ ، ہلکان بینی وبینہ قید رمح*
[کتاب الطبقات الکبیر لابن سعد ج:4،ص: 110-111 مکتبہ الخانجی القاھرہ]
حضرت خارجہ بن زید رضی اللہ عنہ بیان کرتے ہیں کہ امیر المومنین عمر فاروق رضی اللہ عنہ نے صبح کو کچھ لوگوں کی دعوت کی؛ جن میں معیقیب رضی اللہ عنہ بھی تھے جن کے ساتھ جذام کا مرض تھا وہ سب کے ساتھ کھانے میں شریک کیے گئے اور امیر المومنین نے ان سے فرمایا: اپنے قریب سے اپنی طرف سے لیجیے اگر آپ کے سوا کوئی اور اس مرض کا ہوتا تو میرے ساتھ ایک پلیٹ میں نہ کھاتا اور مجھ میں اور اس میں ایک نیزے کا فاصلہ ہوتا۔
خلاصہ یہ کہ کسی مریض کے پاس جانے سے اس کی بیماری اڑ کر نہیں لگتی۔
لیکن اگر کوئی ضعیف الیقین(کمزور عقیدے والا ) کسی کرونا وائرس کے مریض کے پاس گیا اور اللہ کی تقدیر سے کچھ مرض ہوگیا تو شیطان اس کے دل میں وسوسہ ڈالے گا کہ یہ بیماری اڑ کر لگی ہے اگر نہ جاتا تو نہ لگتی۔ اور یہ وسوسہ بہت خطرناک چیز ہے۔
اس لیے ضعیف الاعتقاد آدمی کا ایسے مریض سے دور رہنا بہتر ہے۔
ہاں جو کامل الیقین (پختہ عقیدے والے) ہیں وہ اگر ایسے مریض کے پاس جائیں تو حرج نہیں۔
فتاویٰ رضویہ میں ہے:
*(جذامی سے بھاگنے کا حکم ہے)* *اس دور اندیشی سے کہ مبادا کچھ پیدا ہو اور ابلیس لعین وسوسہ ڈالے کہ دیکھ بیماری اڑ کر لگ گئی اور اب معاذاللہ اس امر کی حقیقت اس کے خطرہ میں گزرے گی جسے مصطفی صلی اللہ علیہ وسلم باطل فرما چکے ، یہ اس مرض سے بھی بد تر مرض ہوگا ان وجوہ سے شرع حکیم و رحیم نے ضعیف الیقین لوگوں کو حکم استحبابی دیا ہے کہ اس سے دور رہیں۔*
*اور کا مل الایمان بندگانِ خدا کے لیے کچھ حرج نہیں کہ وہ ان سب مفاسد سے پاک ہیں۔ خوب سمجھ لیا جائے کہ دور ہونے کا حکم ان حکمتوں کی وجہ سے ہے نہ یہ کہ معاذ اللہ بیماری اڑ کر لگ جائے گی اسے تو اللہ و رسول رد فرما چکے جل جلالہ و صلی اللہ علیہ وسلم۔*
[ فتاویٰ رضویہ ،ج: 16،ص: 747، 748، ]
پھر ضعیف الاعتقاد کو جو مریض سے دور رہنے کا حکم دیا گیا ہے وہ استحبابی ہے، اس کی وجہ سے کسی واجب کو نہیں چھوڑا جائے گا۔ مثلا: کسی کو کوئی مہلک بیماری لگی اور اسے اس کے اولاد و اقارب و زوجہ چھوڑ کر چلے جائیں یہ ہرگز جائز نہیں ہے۔
فتاوی رضویہ میں ہے :
*پھر ازاں جاکہ یہ ایک استحبابی حکم ہے واجب نہیں ہر گز کسی واجب شرعی کا معارضہ نہ کرے گا۔ مثلا: معاذ اللہ جسے یہ عارضہ ہو اس کے اولاد و اقارب و زوجہ سب اس احتیاط کے باعث اس سے دور بھاگیں اور اسے تنہا و ضائع چھوڑ دیں یہ ہرگز حلال نہیں۔*
[المرجع السابق]
تفصیل کے لیے اعلی حضرت علیہ الرحمہ کے رسالہ *الحق المجتلی فی حکم المبتلی* کا مطالعہ فرمائیں۔
واضح رہے کہ ماقبل میں ہم نے جو باتیں پیش کی ہیں وہ عین بیماری کے متعدی ہونے کے بارے میں ہے۔
رہا بیماری کے جراثیم کا متعدی ہونا یعنی ایک کی بیماری کے جراثیم کا اڑ کر دوسرے کو لگنا۔ تو ہماری شریعت اسلامیہ اس کی مخالف نہیں ہے۔
اور آج کی میڈیکل سائنس کا بھی یہی کہنا ہے کہ جراثیمِ امراض ایک جگہ سے دوسری جگہ منتقل ہوتے ہیں اور ایک مریض کے جراثیم دوسرے میں بیماری کا سبب بنتے ہیں۔ نہ یہ کہ مرض متعدی اور منتقل ہوتا ہے کہ وہ تو ایک کیفیت کا نام ہے جس کے اندر انتقال کی صلاحیت ہی نہیں ہوتی ہے ۔
ہم یہاں اتنا اور واضح کرنا چاہتے ہیں کہ اگر ایک مریض کے جراثیم اڑ کر کسی دوسرے کو لگ جائیں تو کوئی ضروری نہیں کہ اسے بھی وہ بیماری لگ جائے،جب تک اللہ تعالیٰ کی مرضی نہ ہو ایک دو کیا کروڑو جراثیم کچھ اثر نہ کریں گے۔
حکیم الامت مفتی احمد یار خان نعیمی-رحمہ اللہ علیہ- رقم طراز ہیں:
*"مرض کا اُڑ کر لگنا باطل ہے مگر یہ ہوسکتا ہے کہ کسی بیمار کے پاس کی ہوا متعفن ہو اور جس کے جسم میں اس بیماری کا مادہ ہو وہ اس تَعَفُّنْ سے اثر لے کر بیمار ہوجائے اس معنیٰ سے تَعَدِّی ہوسکتی ہے"*
[مرأۃ المناجیح شرح مشکاۃ المصابیح، ج: 6، ص:219، باب الفال والطیرۃ، نعیمی کتب خانہ گجرات]