حضرت راجی حامد شاہ رحمۃ اللہ تعالیٰ علیہ

بیعت:
آپ شیخ حسام الدین مانک پوری کے مرید تھے، صاحب نسبت و حال صاف باطن برزگ تھے ـ

سلطان شمس الدین التمش کے دور حکومت میں سادات کردیز میں سے دو بھائی دہلی تشریف لائے، ایک کا اسم گرامی سیّد شمس الدین تھا، انہوں نے میوات کے علاقہ میں سکونت اختیار کی، ان کی بقیہ اولاد بھی وہیں رہتی ہے ـ

اور دوسرے سید شہاب الدین تھے جن کی اولاد میں راجی حامد شاہ ہیں، ان کے آباء و اجداد اپنے علاقہ کے بڑے معزز و مکرم لوگوں میں سے تھے، وہاں کی زَبان میں آپ لوگوں کو راجی کہتے تھے ۔

آپ ابتدائی عمر میں سپاہیوں کے لباس میں رَہا کرتے تھے بِالآخر شیخ حسام الدین مانک پوری کی خدمت میں حاضر ہوئے اور ان کی صحبت میں رہ کر بہت ریاضت کی جس کی وجہ سے آپ کا دل صاف و شفاف ہو گیا، باطن پاکیزہ و مطہر ہو گیا، اگرچہ آپ علوم ظاہری معمولی پڑھے ہوئے تھے مگر خدا داد علمی استعداد کی وجہ سے بڑے بڑے علماء آپ کے معتقد تھے ۔

اگر کسی کے دل میں خیال آتا کہ آپ کشف کے ذریعہ اس کے احوال ظاہر کر دیں تو آپ خود بخود ہی اس کے حالات بیان کرنا شروع فرما دیتے اور ان حالات کے ضمن میں اس کے مقصود کو بھی ظاہر کر دیتے، آپ کا مزار مانک پور میں ہے ۔

[ اخبار الاخیار ]

https://scholars.pk/ur/scholar/hazrat-raaji-hamid-shah