حضرت ابوالحسین بندار شیرازی رحمۃ اللہ تعالیٰ علیہ

آپ کی کنیت ابوالحسین تھی آپ شیخ شبلی اور عبداللہ خفیف رحمۃ اللہ علیہما کے خلفاء میں سے تھے، حضرت شیخ ابوجعفر حداد کے صحبت یافتہ تھے، اپنے وقت کے قطب زمانہ تھے، آپ نے ۳۵۳ھ میں وفات پائی، حضرت شیخ ابوذرعہ طبیری رحمۃ اللہ علیہ نے آپ کو غسل دیا، شیخ ابو علی کاتب بھی اسی سال واصل بحق ہوئے تھے ، آپ کی تاریخ وفات یوں تحریر کی گئی ہے۔

بوالحسین آن صوفیِ اہل صفاء
سالِ ترحیلش بگو مہدی فرید
۳۵۳ھ

بود در چشم دو عالم نور عین
ہم بگو سرور کہ صوفی بوالحسین
۳۵۳ھ

( خزینۃ الاصفیاء )

https://scholars.pk/ur/scholar/hazrat-abul-hussain-bindaar-sherazi

حضرت سید علیم اللہ چشتی رحمۃ اللہ تعالیٰ علیہ

آپ قصبہ جالندھر کے سادات گھرانے سے تعلق رکھتے تھے آپ کا شجرہ نسب زید بن حسن رضی اللہ عنہ سے ملتا ہے آپ شاہ ابو المعالی قدس سرہ کے مرید تھے ظاہری علوم میں کمال حاصل کیا اور علماء وقت میں ممتاز ہوئے آپ کی تصانیف میں انہار الاسرار شرح بوستان سعدی نزہتہ السالکین شرح اخلاق ناصری۔ زبدۃ الروایات نثر الجواہر جو اندر مرجان کا فارسی ترجمہ ہے جس میں بلند پایا کتابیں یاد گار زمانہ ہیں بچپن میں ہی حضرت شاہ ابوالمعالی چشتی کی خدمت میں رہنے لگے تھے مگر بڑے ہوئے تو آپ کو سید میراں بھیکھہ رحمۃ اللہ علیہ سے خرقۂ خلافت ملا۔ آپ کی ساری عمر طلبا کی تعلیم اور خدامین کی تلقین میں گزری آپ کا شعری مذاق بڑا بلند تھا اور شعر خاص انداز میں کہتے تھے ہم آپ کی ایک غزل کا مطلع و مقطع دیتے ہیں۔

یار از خلوت گہہ قدسی عیاں تاختہ
تیغ استغنا بگردن ہائے اعتبار آختہ

از تلو نہائے تو شکر لباں گا علیم
ہمچو سیخ افسردہ گاہے چوں نمک بگداختہ

آپ کی کرامات اسرار تعلیم مولّفہ شیخ عبداللہ قدس سرہ میں کثرت سے بیان کی گئی ہیں مگر ہم یہاں آپ کے تصرفات کا ایک واقعہ بیان کرتے ہیں۔ آدینہ بیگ فوجدار دوآبہ جالندھر کے زمانہ میں ایک شخص صدیق بیگ کو قصبہ نور محل کا حاکم بنا دیا گیا اس نے نور محل پہنچتے ہی سب سے پہلا اقدام یہ کیا کہ ایک سید جو جالندھر کے سادات میں سے تھا کی تمام جائیداد ضبط کرلی اور ساتھ ہی تیس روپے جرمانہ بھی طلب کرلیا اس سیّد نے حضرت شاہ علیم اللہ رحمۃ اللہ علیہ کی خدمت میں حاضر ہوکر سفارش کی استدعا کی آپ نے حاکم نور محل کے نام ایک سفارشی رقعہ لکھا مگر حاکم نے قبول نہ کیا اور بڑی بے ہودہ باتیں کیں۔ دوسرے ہی دن آدینہ بیگ نے اس حاکم کو کسی پرانے جرم میں طلب کر کے قید کردیا اور تیس ہزار تاوان بھی مقرر کر دیا گیا۔

آپ بائیس جمادی الاوّل ۱۱۰۹ھ کو پیدا ہوئے اور سولہ (۱۶) صفر ۱۲۰۲ھ کو فوت ہوئے آپ کا مزار جالندھری شہر میں ہے آپ کے مزار پر آفتاب چشتیہ (۱۲۰۲ھ) سے تاریخ نکال کر پتھر پر لکھی ہوئی ہے۔

حضرت سید علیم اللہ پیر
صاحب صدق و صفا خیر الانام
فیض دیدار است تولیدش عیاں
سال ترحیلش بگو شیخ الکرام
۱۲۰۲ھ

https://scholars.pk/ur/scholar/hazrat-syed-aleemullah-chishti

حضرت مولانا سلطان الدین جے پوری رحمۃ اللہ تعالیٰ علیہ

حضرت مولانا سلیم الدین جے پوری قدس سرہٗ العزیز کے چھوٹے بھائی، ۲۳رجب ۱۲۶۸ھ بروز سہ شنبہ ولادت ہوئی،تعلیم کی ابتداء والد ماجد سے کی،قرآن پاک ختم کرکے فارسی شروع کی،اپنے ماموں مولانا رشید الدین فائز اور برادر بزرگ سے درسیات پڑھی،اور سند اجازت حاصل کی،ریاست جے پور کے مفتی تھے، قادر الکلام واعظ تھے، بکثرت آپ کے وعظ کی محفلیں منعقد ہوئیں ایک بار میر باع میں آپ کی تقریرکا انتظام ہوا،صاحب مجلس سید عبد الرحمٰن نےو اقعۂ معراج بیان کرنے کی گذارش کی،آپ نے سُبْحَانَ الَّذِیْ اَسْریٰ کی تفسیر بیان کرتے ہوئے جسمانی مراج کا اثبات فرمایا، ایک دوسرےعالم جو مدعو تھے،دوران تقریری میں آپ سے پوچھا کہ ‘‘اگر معراج جسمانی ہوئی تو قطع نظر معجزہ اور حکم الٰہی کے فضرتاً بربنائے عقل کرۂ نار سے صحیح وسالم گذرنائس طرح ممکن ہے؟ آپ نے فوراً جواب دیا، ‘‘بالکل! اسی طرح جیسے ایک پر کاہ بسرعت تمام آگ کی کپٹ سے صحیح وسالم گذرجاتا ہے،۔۔۔۔۔۔آپ پر گو شاعر بھی تھے،اور درجۂ استادی رکھتے تھے،مبین تخلص تھا، برادر بزرگ سے اصلاح حاصل کرتے تھے،حضرت شاہ حبیب الرحمٰن سرساو: شریف ضلع سہارن پور کے خلف اکبر و جانشین حضرت شاہ خلیل الرحمٰن کے مرید وخلیفہ اور صاحب مقامات تھے، ۱۶صفر المظفر ۱۳۳۶ھ مطابق ۵ دسمبر ۱۹۱۷ھ بروز چہار شنبہ مغرب کی اذان کے وقت فوت ہوئے۔

سید انور علی شاہ جے پوری نے ‘‘شُد مسلم رحنتِ سلطان دیں’’ اور احترام الدین شاعل عثمانی صاحب نے لَقَدْ فَازَ فَوْ زاً عَظِیْماً’’ تاریخ وفات کہی۔

( تذکرہ شعرائے جے پور )

https://scholars.pk/ur/scholar/hazrat-molana-sultanuddin-jaipuri

اولاد حضرت لعل شہباز قلندر علیہ‌الرحمہ حضرت علامہ سید مغفور القادری رحمۃ اللہ علیہ

اسمِ گرامی:
آپ رحمۃ اللہ علیہ کا اسمِ گرامی سید مغفور القادری اور والد ماجد کا اسمِ گرامی سید سرد احمد القادری تھا ۔

سلسلۂ نسب:
آپ کا سلسلۂ نسب سید عثمان مروندی مشہور بہ لعل شہباز قلندر سے جا ملتا ہے ۔ (رحمۃ اللہ علیہم) ـ

تاریخ و مقامِ ولادت:
آپ کی پیدائش 1326ھ / بمطابق 1906ء کو گڑھی اختیار خاں، ضلع رحیم یار خاں، مغربی پاکستان میں سندھ کے مشہور بزرگ حضرت سید عثمان مروندی مشہور بہٖ لعل شہباز قلندر کے خاندان میں ہوئی ۔

تحصیلِ علم:
حضرت مولانا پیر مغفور القادری نے دربار بھر چونڈی شریف میں حضرت مولانا عبد الکریم ہزاروی سے اوّلاً اکتساب علم کیا، اس کےبعد مشہور فقیہ وعالم مولانا سراج احمد مکھن بہلوی سے فقہ کا درس لیا، اور حضرت مولانا مفتی محمد حیات ساکن گڑھی اختیار خاں سے تفسیر وعلم کلام حاصل کیا، اور دورۂ حدیث مدرسہ شمس العلوم بستی مولویان سابق ریاست بھاولپور کےعلماء سے کیا ۔ 25 برس کی عمر میں 1352ھ کو درسیات کی تکمیل سے فراغت پائی ۔

بیعت و خلافت:
پیر سید مغفور القادری نے قطب الوقت حضرت شیخ محمد عبداللہ ساکن بھر چونڈی شریف ضلع سکھر صوبہ سندھ کے خلیفہ حضرت حافظ محمد صدیق قدس سرہما بھرچونڈی شریف سے بیعت کی، قطب الوقت کے خلیفہ وجانشین مجاہد اسلام حضرت پیر عبدالرحمٰن نے خلافت مرحمت فرمائی، آپ کو اپنے والد ماجد سے خاندانی پیر عبدارلرحمٰن بھی نے خلافت مرحمت فرمائی، آپ کواپنے والد ماجد سے خاندانی سلسلہ قادریہ میں اجازت بھی حاصل تھی ۔

سیرت و خصائص:
حضرت علامہ مولانا سید مغفور القادری رحمۃ اللہ علیہ کو مسلک اہل سنت کی ترویج وتبلیغ کی طرف خاص توجہ تھی، اس سلسلہ میں سندھ اور بھاول پور میں تبلیغی دورے کیے، مناظرے کیے، مسجدیں تعمیر کرائیں، مدارس قائم کرائے، مسجد منزل گاہ کے مشہور تنازعہ میں پیش پیش رہے، آپ کی قائم کردہ جماعت احیاء اسلام نے عقائد واعمال واخلاق میں نمایاں کام کیا، ‘‘الجماعۃ’’ کے نام سے اخبار جاری کیا، قیام پاکستان کے بعد مملکت کو دستور اسلامی میں ڈھالنے کےلیے تنظیم المشایخ کے نام سےمشایخ کی انجمن قائم کی۔ آپ کی ذات فقر ودرویشی کا پیکر اور عشق رسول ﷺ کا مجسمہ تھی، استغناء اور بے نیازی آپ کی خصوصی شان تھی، آواز میں بلاکا سوز و سحر تھا، قرآن پاک کی تلاوت کرتے تو خود بے خود ہوتے، اور سامعین کو بھی بے خود کر دیتے ۔ 1946ء میں سندھ کے نمائندہ کی حیثیت سے ایک سو افراد کے ہمراہ آل انڈیا سنی کانفرنس،بنارس میں شرکت کی اور کانفرنس کی خصوصی میٹنگوں میں شریک ہوئے، اسی دوران اعلیٰ حضرت امام احمد رضا بریلوی رحمۃ اللہ علیہ کے مزار پر بھی حاضر ہوئے حضرت مغفور القادری، سرور عالم صلی اللہ تعالیٰ علیہ وسم کی محبت سے پوری طرح سرشار تھے ۔ آپ نے مسلک اہل سنت و جماعت کی نا قابل فراموش خدمات سر انجام دیں ـ

تاریخ وصال:
بروز دو شنبہ 16 صفر المظفر 1390ھ میں آپ کی وفات ہوئی ۔

ماخذ و مراجع:
حدائق الحنفیہ ۔ تذکرہ اکابرِ اہلسنت

https://scholars.pk/ur/scholar/hazrat-molana-syed-maghfoor-ul-qadri