پاکستان میں آمد اور تبلیغ دین:
ہندوستان سے ہجرت فرما کر آپ کچھ عرصہ کراچی اور خوشاب (سرگودھا) میں رہے اور پھر راولپنڈی میں مستقل طور پر رہائش پذیر ہوگئے ۔ راولپنڈی میں آپ نے خطابت کا سلسلہ شروع کیا اور اندرونِ ملک تبلیغی دورے بھی شروع کر دِیے ۔ ۱۹۵۱ء میں جمعیت علماء پاکستان راولپنڈی کے صدر منتخب ہوگئے [۱] ۔

[۱۔] اب چونکہ آپ بوجہ پیرانہ سالی کمزور ہوچکے ہیں، اس لیے آپ کی سرپرستی میں جمعیت  کی راولپنڈی شاخ کا صدر حضرت مولانا سید عبد القادر شاہ جیلانی ایم اے ایل ایل بی ۔ پی ایچ ڈی فاضل مدینہ یونیورسٹی کو منتخب کیا گیا ۔ امید واثق ہے کہ حضرت شاہ صاحب کی بال صلاحیت شخصیت جمعیت (راولپنڈی) کو بامِ عروج پر پہنچائے گی ۔ (محمد صدیق ہزاروی)

راولپنڈی میں ہی ایک دارالعلوم ’’ احسن المدارس ‘‘ قائم کیا اور مارچ ۱۹۵۳ء میں ” ماہنامہ سالک ‘‘ جاری کیا جو بارہ سال تک مذہب و ملت کی خدمات سر انجام دیتا رہا ۔

پسِ دیوارِ زنداں:
۱۹۵۳ء میں جب تحریک ختم نبوت چلی تو آپ بھی اس میں شریک ہوئے (اس تحریک کے صدر علامہ ابو الحسنات سید محمد احمد قادری رحمہ اللہ تھے اور آپ کی قیادت میں تمام مکاتبِ فکر کے علماء نے تحفظ ختمِ نبوت کی خاطر جدوجہد کی) اس سلسلے میں قید و بند کی صعوبتیں بھی برداشت کرتے رہے ۔

۱۴ اگست ۱۹۵۹ کو پہلے مارشل لاء کے نفاذ پر اس وقت کے ڈپٹی کمشنر جی ایم یزدانی ملک کے نامناسب رویے پر جامع مسجد مرکزی راولپنڈی کی خطابت سے مستعفی ہوگئے ۔ ملک کے طول و عرض سے خطابت کی پیشکش ہوئی، لیکن آپ نے باصرار جامع مسجد واہ فیکٹری کی خطابت منظور فرمالی ۔

آپ نے ہندو پاک کے علاوہ دیگر ممالک میں دینِ اسلام کی تبلیغ فرمائی اور لاتعداد غیر مسلموں کو دولتِ ایمان سے مشرف کیا۔ ۱۹۶۸ء میں آپ بغداد، نجف اشرف، کربلا اور کاظمین سے ہوتے ہوئے انگلستان پہنچے اور آٹھ ماہ تک قیام فرماکر لندن، ڈیوزبری، برمنگھم، کیتھلے، بریڈ فورڈ اور دیگر بہت سے شہروں میں خطاب کیا۔ آپ کی پُر اثر تقریر سے متاثر ہوکر بے شمار عیسائیوں نے آپ کے ہاتھ پر اسلام قبول کیا۔

۲۱؍اپریل ۱۹۷۴ء کو پھر انگلستان میں ورلڈ اسلامک مشن کی کانفرنس میں شرکت فرمائی[۱]۔ اور اگست تک مختلف شہروں اور قصبوں میں تبلیغی خدمات سر انجام دیتے رہے۔

[۱۔ اس کانفرنس کی صدارت مولانا شاہ احمد نورانی صدیقی صدر جمعیت علماء پاکستان نے کی اور آپ ہی ورلڈ اسلامک مشن کے صدر منتخب ہوئے، جبکہ جنرل سیکرٹری کے لیے علامہ ارشد القادری کا انتخاب ہوا۔ محمد صادق قصوری، اکابرِ تحریک پاکستان ص۱۰۲]

حضرت مولانا شاہ عارف اللہ قادری اپنی بیعت کے بارے میں ’’میری بیعت‘‘ کے عنوان کے تحت خود لکھتے ہیں: میرا سلسلۂ طریقت علی حسین گیلانی قدس سرہ (کچھوچھہ شریف) سے نہ صرف وابستہ ہے (۲۰؍ربیع الاوّل شریف ۱۹۵۱ء کو بیعت کاشرف حاصل ہوا) بلکہ تاج خلافت و خرقۂ اجازت بھی عطا فرمایا گیا، لیکن اعلیٰ حضرت امام احمد رضا قدس سرہ سے حسنِ عقیدت و محبت اور سلسلۂ عالیہ رضویہ کے فیوض و برکات سے بہرور ہونے کے لیے ۳۰؍جون ۱۹۴۴ء کو حضرت والد ماجد علیہ الرحمہ کے دستِ حق پرست پر بیعت ہوا، اور حضرت صاحب نے تمام اوراد و معمولات کی اجازت کے ساتھ تبرکات بھی مرحمت فرمائے جو بحمدہٖ تعالیٰ میرے پاس محفوظ ہیں۔[۱]

[۱۔ مولانا شاہ محمد عارف اللہ قادری، افکارِ حبیب رضا، ص۱۹]

( تعارف علماءِ اہلسنت )

https://scholars.pk/ur/scholar/hazrat-molana-shah-muhammad-arifullah-qadri-meerathi

مجدد الفِ ثانی حضرت شیخ احمد سرہندی رحمۃ اللہ علیہ

نام و نسب:
اسمِ گرامی: شیخ احمد ۔ کنیت: ابو البرکات ۔ القاب: بدر الدین، امامِ ربانی، مجدد الفِ ثانی، قیومِ زمان، وغیرہ ہیں ۔

سلسلۂ نسب اس طرح ہے:
آپ کا شجرۂ نسب امیر المؤمنین حضرت سیدنا عمر فاروق اعظم رضی اللہ تعالیٰ عنہ سے اس طرح ملتا ہے ـ شیخ احمد بن شیخ عبد الاحد بن شیخ زین العابدین بن شیخ عبد الحی بن شیخ محمد بن شیخ حبیب اللہ بن شیخ رفیع الدین بن شیخ نصیر الدین بن شیخ سلیمان بن شیخ یوسف بن شیخ اسحاق بن شیخ عبد اللہ بن شیخ شعیب بن شیخ احمد بن شیخ یوسف بن شیخ شہاب الدین علی الملقب بہ فرخ شاہ بن شیخ نصیر الدین بن شیخ محمود بن شیخ سلیمان بن شیخ مسعود بن شیخ عبد اللہ الواعظ الاصغر بن شیخ عبد اللہ الواعظ الاکبر بن شیخ ابوالفتح بن شیخ اسحاق بن شیخ ابراہیم بن شیخ ناصر بن شیخ عبد اللہ بن عمر بن حفص بن عاصم بن عبد اللہ بن عمر فاروق رضی اللہ تعالیٰ عنہم اجمعین ۔

تاریخِ ولادت:
آپ کی ولادت باسعادت بروز جمعۃ المبارک 14 شوال المکرم 971ھ، مطابق مئی 1564ءکو سرہند شریف میں ہوئی ۔

تحصیلِ علم:
جب آپ سنِ تعلیم کو پہنچے تو آپ کو مکتب میں داخل کر دیا گیا ۔ بعد ازاں اکثر علوم متداولہ والد بزرگوار سے حاصل کرکے سیالکوٹ تشریف لے جاکر معقولات کی بعض کتابیں حضرت مولانا کمال کشمیری رحمۃ اللہ علیہ اور حدیث کی بعض کتابیں مولانا یعقوب کشمیری رحمۃ اللہ علیہ سے پڑھیں ۔ الغرض آپ سترہ سال کی عمر میں علوم ظاہری کی تحصیل کے سب مرحلے طے کر کے اپنے والد بزرگوار کی خدمت میں حاضر ہوکر تدریس میں مشغول ہو گئے، اور طلبہ کو اپنی برکات سے بہرہ ور فرماتے رہے ۔ اسی اثنامیں آپ نے عربی فارسی میں متعدد رسالے نہایت فصاحت و بلاغت کے ساتھ تحریر فرمائے ۔ بہت سے مؤرخین نے لکھا ہے کہ آپ نے بچپن میں قرآنِ مجید حفظ کر لیا تھا ۔ لیکن آپ کے ایک مکتوب سے معلوم ہوتا ہے کہ یہ دولت قلعہ گوالیار میں نظر بندی کے زمانے میں حاصل ہوئی ۔ (سیرت مجدد الفِ ثانی:84)

بیعت و خلافت:
سلسلہ عالیہ نقشبندیہ میں حضرت خواجہ باقی باللہ علیہ الرحمہ سے بیعت ہوئے، اور خلافت سے سرفراز ہوئے ۔ سلسلۂ عالیہ قادریہ میں حضرت شاہ سکندر علیہ الرحمہ سے اجازت و خلافت حاصل تھی ۔ سلسلہ عالیہ چشتیہ صابریہ میں اپنے والدِ گرامی شیخ عبد الاحد سے اجازت و خلافت حاصل تھی ۔ سلسلہ عالیہ سہروردیہ میں اپنے استادِ محترم مولانا شیخ یعقوب کشمیری علیہ الرحمہ سے اجازت و خلافت حاصل فرمائی ۔حضرت مجدد کو تمام سلاسل میں خلافت حاصل تھی لیکن سلسلہ عالیہ نقشبندیہ سے آپ کو خاص لگاؤ تھا ۔ آپ ہی کے دم سے اس سلسلے کو پاک و ہند میں اور دیگر ممالک میں فروغ حاصل ہوا ۔

سیرت و خصائص:
عالی مرتبت، عظیم البرکت، قیومِ ملت، خزینۃ الرحمت، محدث رحمانی، غوث صمدانی، امام ربانی، مجدد الف ثانی، حضرت ابو البرکات شیخ احمد فاروقی نقشبندی سرہندی رحمۃ اللہ علیہ ۔

آپ کے والد بزرگوار کا بیان ہے کہ آپ کی ولادت سے پہلے میں نے خواب میں دیکھا کہ تمام جہان میں ظلمت پھیل گئی ہے ۔سُور، بندر اور ریچھ لوگوں کو ہلاک کر رہے ہیں، اسی اثناء میں میرے سینے سے ایک نور نکلا اور اُس میں ایک تخت ظاہر ہوا ۔ اُس تخت پر ایک شخص تکیہ لگائے بیٹھا ہے اور اُس کے سامنے تمام ظالموں، زندیقوں اور ملحدوں کو بکرے کی طرح ذبح کر رہے ہیں اور کوئی شخص بآواز بلند کہہ رہا ہے: وَ قُلْ جَآءَ الْحَقُّ وَ زَهَقَ الْبَاطِلُط اِنَّ الْبَاطِلَ كَانَ زَهُوْقًا ۔ "اور فرما دو! سچ آ گیا اور باطل مٹ گیا بے شک باطل مٹنے والا ہے " ۔ اس خواب کی تعبیر حضرت قدس سرہ نے شاہ کمال کیتھلی رحمۃ اللہ علیہ سے دریافت کی ۔ انہوں نے فرمایا کہ تمہارے ہاں ایک لڑکا پیدا ہوگا جس سےالحاد و بدعت کی تاریکی دُور ہوگی ۔ یہ تعبیر بالکل درست نکلی ۔

واقعی ایسا ہوا اللہ جل شانہ نے حضرت مجدد کو اپنے دین کی خدمت کے لئے چن لیا تھا ۔ صبر و شکر، تسلیم و رضا حسبِ حال ہر ایک کی تعظیم، لوگوں پر شفقت، صلۂ رحمی، اربابِ حقوق کی رعایت، مریضوں کی عیادت، سلام میں سبقت، کلام میں نرمی آپ کا شیوۂ حسنہ تھا ۔ آپ کا طریقۂ عمل بر عزیمت تھا ۔ عبادات و عادات میں نہایت احتیاط اور سنت کا کمال اتباع ملحوظ تھا ۔ آج یہود و نصاریٰ صوفی ازم کی بات کرتے ہیں، اور ان کے سرمائے سے " انٹرنیشنل صوفی کانفرنسز " کا انعقاد کیا جا رہا ہے ۔ اس میں پلپلے، جاہل، دین و ملت فروش نام نہاد صوفیوں کی بھر مار ہوتی ہے ۔ جن کے ہاں دینِ اسلام کی ثانوی حیثیت بھی نہیں ہے ۔ ان کی صورت و سیرت اس بات کی گواہی دے رہی ہوتی ہیں ۔

آئیے! اس صوفی کی بات کرتے ہیں، جو امام الاولیاء ہے، دین کا محافظ ہے، قرآن کا حافظ ہے، اسرارِ خدا وندی کا امین ہے، مصطفیٰ کریم ﷺ کی سنتوں کا عامل ہے، عالمِ ربانی ہے ، اور وہ مجدد الفِ ثانی ہے ۔ مغل شہنشاہِ اکبر کے عہدِ حکومت میں اسلام کے سر سبز و شاداب چمن پر ایک بار پھر کفر و الحاد، زندقہ اور بدعت و ضلالت کی گھٹا ٹوپ آندھیاں چھا گئیں ۔ اس نے دینِ حنیف میں ترمیم کرکے ایک نئے دین کی بنیاد رکھی '' دین الٰہی '' کے نام سے ایک ایسا مذہب ایجاد کیا گیا جو شریعتِ محمدیہ علیٰ صاحبھا الصلاۃ والسلام کے سرا سر مخالف اور قرآن و سنت سے انکار و انحراف کے مترادف تھا ۔

دینِ اسلام کی صداقت و عظمت کا وہ چراغ جو ایک ہزار سال سے روشن تھا، شاہِ وقت، علمائے سوء، اور جاہل صوفیوں کے ہاتھوں ٹمٹمانے لگا ۔ دینِ اسلام کی حالت زار جو شہنشاہِ اکبر اور اس کے بعد جہانگیر کے ہاتھوں رہی تھی ۔ اس کی طرف اشارہ حضرت مجدد الف ثانی نے اپنے ایک خط میں جو انہوں نے جہانگیر کے ایک مقرب کو لکھا، یوں بیان فرمائی:

" اسلام کی بے کسی کا یہ حال ہے کہ کفار کھلم کھلا اس پر طعن توڑتے ہیں اور اسلام کے نام لیواؤں کی مذمت کرتے ہیں ۔ وہ ہر کوچہ و بازار میں بے خوف و خطر کفر کے احکام جاری کرتے اور کفار کی مدح و ستائش کرتے ہیں، مسلمان اسلامی احکام کی بجا آوری سے قاصر اور شریعت محمدیہ پر عمل پیرا ہونے سے عاجز ہیں '' ۔ (ایضاً)

دینِ اکبری کو رعایا کے تمام طبقوں کے لئے قابلِ قبول بنانے کے لئے عقیدۂ توحید میں اس قدر ترمیم کی گئی کہ ہندوؤں کی بت پرستی، مجوسیوں کی آتش پرستی اور ویدوں میں بیان کردہ فلسفیانہ موشگافیوں کو نئے دین میں سمیٹ لیا گیا ہے، اس طرح اکبر کا " دینِ الٰہی " مختلف مذاہب کے عقائد و خیالات کا ایک ملغوبہ بن گیا تھا ۔ کتاب اللہ اور سنت رسول الله ﷺ جو دین کی اصل بنیاد تھی، وہ طاقِ نسیاں پر رکھ دی گئیں، سورج کی پرستش چاروں طرف لازمی قرار دی گئی، آگ، پانی، درخت اور گائے کو پوجنا جائز ٹھہرا، اکبر ہر روز خود صبح اُٹھ کر سورج کی پرستش کرتا، اس کے بعد مشتاقانِ دید کے لئے دیوانِ عام میں آ بیٹھتا تھا، لوگ شہنشاہ کے لئے سجدۂ تعظیمی بجا لاتے جسے اس وقت کے دین فروش ملاؤں نے جائز قرار دیا تھا ۔ اس کے بر عکس اسلامی شعائر کو درخورِ اعتنانہ سمجھا گیا اور بادشاہ کو یہ بتلایا گیا کہ دینِ اسلام ایک ہزار سال گزر جانے کے بعد نعوذ باللہ بالکل اسی طرح بےکار اور ناکارہ ہو گیا ہے، جس طرح کہ اسلام سے پہلے کے مذاہب اقتدارِ زمانہ کے ہاتھوں معطل ہو چکے ہیں ۔

ہندو عورتوں سے شادیاں کر لینے کے بعد اکبر کے دِل میں ہندوؤں کے لئے نرم گوشہ پیدا ہو گیا تھا ۔ حکومت کے بڑے بڑے عہدوں پر ہندو فائز تھے، اپنے اقتدار اور شاہ وقت کی نظرِ عنایت نے انہیں اس قدر دلیر کر دیا تھا کہ وہ مسلمانوں کی ہر آن ہر لمحہ دل آزاری کرتے، مسجدیں شہید کر کے وہاں مندر بنائے گئے، ہندوؤں کے برت کا دن آتا تو مسلمانوں کو دن میں کھانے پینے سے حکماً روک دیا جاتا، انہیں حکم ہوتا کہ ان کے چولہوں میں آگ نہ جلے ۔ لیکن جب رمضان المبارک آتا تو ہندو سرِ عام کھاتے، رمضان کی عزت و حرمت کی حفاظت کے لئے بادشاہ کوئی فرمان جاری نہ کرتا تھا ۔ حالات اس حد تک ناساز گار تھے کہ دین کے پنپنے کی کوئی اُمید نظر نہ آتی تھی ۔مگر ہمیشہ یہ ہوا کہ جب بھی دین اسلام پر کوئی آزمائش کا وقت آیا رحمتِ حق میں ارتعاش پیدا ہوا ۔ دین حق کی حفاظت کے لئےکوئی نہ کوئی ہستی ان تِیرہ و تاریک فضاؤں میں نمودار ہوئی جس کی نورانی کرنوں سے کفر و الحاد کی تاریکیاں چھٹ گئیں جس کی ضیاء بار تابانیوں سے بدعت و ضلالت کی آندھیاں ڈھل گئیں جس کی ضَوفشاں شعاعوں سے زند قت کے اندھیرے بھی منور ہوئے اور توحید و سنت کی مشعلیں چمک اُٹھیں ۔

جب کفر و شرک، بدعت و ضلالت اور زندقہ و الحاد کی آندھیاں اپنی تمام تاریکیوں سمیت ہندوستان کی فضا ءپر چھا گئیں تو آسمانِ '' سر ہند '' پر سنت و ہدایت کا آفتاب طلوع ہوا جس کو لوگ شیخ احمد سر ہندی کے نام سے موسوم کرتے ہیں ۔ اس آفتاب کی ضیاء پاشیوں سے ظلمت و گمراہی کے اندھیرے کافور ہوئے، اکبر نے جس دین کی بنیاد رکھی تھی اور اعوان و انصارِ حکومت جس کی تبلیغ میں ہمہ تن مصروف تھے، حضرت مجدد الف ثانی رحمۃ اللہ علیہ نے اس کو بیخ و بن سے اُکھاڑنے کا تہیہ کیا ۔ ہم دیکھتے ہیں کہ حق اپنی تمام جلوہ سامانیوں سے طلوع ہوتا ہے ۔ تو باطل کافور کی مانند تحلیل ہو جاتا ہے ۔ بادشاہ کو رعایہ سجدہ کرتی تھی ۔ جب حضرت مجدد الفِ ثانی جہانگیر کے دربار میں پہنچے، اس کو بھی آپ سے یہی توقع تھی، لیکن آپ نے سجدہ کرنے سے انکار کر دیا ۔ آپ نے فرمایا اللہ جل شانہ کی ذات کے علاوہ سجدہ کسی کے لئے جائز نہیں ہے، فرمایا: یہ گردن کٹ تو سکتی ہے لیکن باطل کے آگے جھک نہیں سکتی ۔

علامہ اقبال فرماتے ہیں: ؎
گردن نہ جھکی جس کی جہانگیر کے آگے
جس کے نفسِ گرم سے ہے گرمیٔ احرار

بادشاہ کو درباریوں نے قتل پہ ابھارا، جو شہنشاہ کو سجدہ نہ کرے وہ قتل کا مستحق ہے ۔ لیکن بادشاہ کو قتل کی جرأت نہ ہوئی۔آپ کو"قلعہ گوالیار"میں نظربندکردیا۔آپ نےان حالات میں  بھی سلسلہ تبلیغ جاری رکھا ۔بالآخر آپ کی کوششیں رنگ لائیں۔جواسلام پرپابندیاں تھیں وہ ختم کردی گئیں،اسلام کا بول بالا ہوگیا۔ہرطرف اسلام کی بہاریں پھر نظر آنے لگیں۔یہ  تھے حقیقی صوفیاء ۔

آج بھی پھروہی حالات ہیں،اسلام کے نام پر قائم ہونے والےاس ملک میں اسلام قبول کرنےپرپابندی لگادی گئی،غیرمسلموں کے تہواروں کو خصوصی طورپرمنایاجانےلگا،ہولی اوردیوالی پرعام تعطیل ہونےلگی۔مندروں اورگرجاگھروں کی تعمیروسرپرستی حکومتی وزراءکررہے ہیں۔زنا،قمار،شراب،وغیرہ کےحکومت کی طرف سےلائسنس جاری ہورہےہیں۔ناچ ڈانس،گانےباجے،بےحیائی کے کاموں کو"ثقافت "کہا جانے لگا۔ان دھندوں سےوابستہ افرادکو "ہیرو "کہا جانے لگا۔اسلام کےنام پرقائم ہونےوالےملک میں کفارکانظام نافذہے۔اسی طرح حال ہی میں " دارالعلوم دیوبند " کا " فتویٰ " آیا ہےجس میں"گائے"کی قربانی کرنےسےمنع کیاگیاہے۔معلوم نہیں ان"فتویٰ فروشوں"نےکس دلیل سےمنع کیا ہے۔ہندوستان میں صرف گائےکےگوشت کےشبہ کی بناءپردن دہاڑےمسلمانوں کوجان سےماردیاجاتاہے۔برمااوردیگرممالک میں مسلمانوں کےحالات ناگفتہ بہ ہیں،کوئی پرسانِ حال نہیں۔الغرض اس وقت جہان میں خونِ مسلم سےارزاں کوئی اورچیزنہیں ہے۔اللہ تعالیٰ مسلمانوں کی حالتِ زار پر رحم فرمائے،پھرسے امت کی راہنمائی کےلئےکوئی اور شیخ سرہندی و صلاح الدین ایوبی عطاء فرمائے،اورمسلم حکمرانوں کو حمیّتِ دینی عطاء فرمائے۔(آمین)

وصال:بروز پیر 29/صفرالمظفر1034ھ،مطابق جنوری/1625ءکو وصال فرمایا۔آپ کامزار پرانوار سرہند شریف (انڈیا)میں مرکزِ انوار وتجلیات ہے۔

ماخذمراجع: تاریخ مشائخِ نقشبندیہ۔سیرت مجددالفِ ثانی۔

حکیم الامّت حضرت علامہ اقبال علیہ الرحمہ تربتِ اطہر کے بارے میں یوں فرماتے ہیں:

وہ خاک کہ ہے زیرِ فلک مطلعِ انوار

اس خاک میں پوشیدہ ہے وہ صاحبِ اسرار

جس کے نفسِ گرم سے ہے گرمئِ احرار

اللہ نے بر وقت کیا جس کو خبردار

حاضر ہوا میں شیخِ مجدّد کی لحد پر

اس خاک کے ذرّوں سے ہیں شرمندہ ستارے

گردن نہ جُھکی جس کی جہانگیر کے آگے

وہ ہند میں سرمایۂ ملّت کا نگہباں

https://scholars.pk/ur/scholar/hazrat-sheikh-ahmed-sirhindi-imam-rabbani-mujaddid

#یوم_ولادت_ماہ_شوال_المکرم
#یوم_وصال_ماہ_صفر_المظفر
https://t.me/islaamic_Knowledge/50028