سوانح حضرت لعل شہباز قلندر
یومِ وصال: 21 شعبان المعظم

حافظ سید محمد عثمان مروندی المعروف لعل شہباز قلندر رحمۃ اللہ علیہ

نام ونسب:
اسمِ گرامی: حافظ سید محمد عثمان مروندی ۔ لقب: لعل شہباز قلندر ۔

سلسلۂ نسب اس طرح ہے:
حافظ سید محمد عثمان بن سید کبیر الدین بن سید شمس الدین الیٰ آخرہِ ۔علیہم الرحمہ ۔

سلسلۂ نسب:
آپ کا سلسلۂ نسب چند واسطوں سے حضرت سیدنا امام جعفر صادق رضی اللہ عنہ سے ملتا ہے ۔

تاریخِ ولادت:
آپ کی ولادتِ با سعادت مشہور قول کے مطابق 538ھ بمطابق 1143ء کو آذر بائیجان کے ایک قصبہ " مروند " میں ہوئی ۔ علاقے کی نسبت سے " مروندی " کہلاتے ہیں ۔

تحصیلِ علم:
ابتدائی تعلیم و تربیت والدِ گرامی کے زیرِ سایہ حاصل ہوئی، گھر کے قریبی مسجد میں سات سال کی عمر میں حفظِ قرآن مکمل کر لیا ۔ پھر اس کے بعد دیگر علومِ دینیہ کے حصول میں مصروف ہو گئے ۔ بہت جلد ہی علومِ نقلیہ و عقلیہ اور عربی و فارسی ادب میں مہارتِ تامہ حاصل کر لی، آپ کا شمار اپنے وقت کے جید علمائے کرام میں ہوتا تھا ۔

بیعت و خلافت:
صحیح قول کے مطابق آپ حضرت ابو اسحاق محمد ابراہیم قادری علیہ الرحمہ سے بیعت ہوئے ۔ بعض مؤلفین کے قول کے مطابق آپ شیخ الاسلام غوث بہاؤ الدین زکریا ملتانی علیہ الرحمہ کے مرید تھے ۔ اس میں تطبیق اس طرح ہو سکتی ہے کہ حضرت بہاؤ الدین زکریا علیہ الرحمہ نے آپ کو خلافت سے نوازا ہو جیسا کہ مشائخ کا طریقہ ہے ۔

سیرت و خصائص:
امام العلماء والعارفین، رئیس المدرسین، قدوۃ السالکین، برہان الواصلین ، عارف بااللہ، فنا فی اللہ ، بقا بااللہ حضرت سید حافظ محمد عثمان مروندی المعروف لعل شہباز قلندر رحمۃ اللہ علیہ ۔

آپ کی ولادت کی بشارت حضرت شیر خدا علی المر تضیٰ رضی اللہ عنہ نے بایں الفاظ  ارشاد فرمائی: اے احمد کبیر: اللہ تعالیٰ تم کو بیٹا عطا فرمائےگا! مگر میری ایک بات یاد رکھنا کہ جب فرزند تولد ہو تو اس کا نام محمد عثمان رکھنا اور جب وہ تین سو چوراسی دن کا ہو جائے تو اس کولے کر مدینہ منورہ حاضری دینا اور حضور ﷺ کے حضور سلام کے بعد حضرت سیدنا عثمان غنی ذو النورین رضی اللہ عنہ کے مزار پر لے جانا اور سلام عرض کرنا، چنانچہ والد صاحب نے حسبِ وصیت ایسا ہی کیا (شہبازِ ولایت ، صفحہ: 8) ۔

آپ بہت ہی حسین و جمیل تھے ۔ آپ کا چہرۂ انور ایسے چمکتا تھا جیسے "لعل" اس لئے آپ کو لعل شہباز کہتے ہیں ۔

حضرت لعل شہباز قلندر علیہ الرحمہ جس پایہ کے صاحب علم و فضل اور صاحب تصوف و معر فت تھے، اسی پایہ کے معلم و مقرر اور ادیب و شاعر بھی تھے، عربی و فارسی علوم و ادبیات پر کامل دسترس رکھتے تھے، قرآن و حدیث و فقہ کا وسیع مطالعہ تھا، ماہر لسانیات اور ماہر قواعد زبان بھی تھے، آپ صاحبِ تصانیف بزرگ تھے، اور بالخصوص صرف و نحو اور عربی ادب کے شائقین دور دراز علاقوں سے سفر کر کے آپ کے ہاں تحصیلِ علم کے لئے حاضر ہوتے ۔

آپ شیخ الاسلام حضرت غوث بہاؤ الدین زکریا علیہ الرحمہ کے مدرسہ جو حقیقۃً اس وقت ایشیاء کی عظیم یونیورسٹی تھی، میں صدر المدرسین کے منصب پر فائز تھے ۔