حضرت مولانا قاضی عزیز اللہ مٹیاروی رحمۃ اللہ علیہ

نام و نسب:
اسم گرامی: حضرت مولانا قاضی عزیز اللہ مٹیاروی رحمۃ اللہ علیہ ۔ لقب: قاضی اہلسنت، مترجم قرآن، متعلوی، مٹیاروی ۔

سلسلۂ نسب اس طرح ہے:
قاضی عزیز اللہ بن قاضی محمد ذاکر بن قاضی حافظ محمد صوف "دیتھا" قوم سے تعلق رکھتے تھے۔ آپ کے آباء و اجداد ٹھٹھہ کے باسی تھے اور بعد میں مٹیاری آکر مستقل سکونت اختیار کی۔ آپ کا خاندان دین کے علماء پر مشتمل تھا اس لئے دینی مدارس میں درس و تدریس کے شعبہ سے منسلک رہے، اس لئے آپ کے خاندان کو "آخوند" بھی کہا جاتا تھا اور علم میں ناموری، فقہ میں مہارت کے سبب سندھ کے حکمرانوں کی طرف سے آپ کے خاندان کو قضاء کا عُہدہ بھی دیا ہوا تھا جس کے سبب "قاضی" کہلائے ۔ آج بھی مٹیاری میں آپ کا محلہ "قاضی آخونداں" کے نام سے مشہور ہے ۔ (انوار علمائے اہل سنت سندھ ص:433)

تاریخ ولادت:
آپ کی ولادت باسعادت 1193ھ، مطابق 1779ء کو محلہ قاضی آخونداں، مٹیاری سندھ پاکستان میں ہوئی ۔

تحصیل علم:
قاضی صاحب نے ابتدائی تعلیم قرآن مجید، فارسی اور مروجہ سندھی اپنے والد قاضی محمد ذاکر سے حاصل کی۔ ابتدائی تعلیم حاصل کرنے کے بعد قاضی صاحب اس دور کے مشہور عالم دین مولانا مخدوم محمد عثمان مٹیاروی (متوفی 1219ھ) کے پاس تعلیم مکمل کرکے فارغ التحصیل ہوئے۔ مولانا محمد عثمان کے صاحبزادے مولانا عبدالکریم مٹیاروی 1216ھ) قاضی صاحب کے ہم عصر اور ہم درس تھے ۔ آپ کاشمار سندھ کے اکابر علماء میں ہوتا ہے۔

بیعت و خلافت:
آپ نے حدیث، تفسیر، فقہ، تصوف، معقولات و منقولات میں مہارت حاصل کرنے کے بعد نقشبندیہ سلسلہ کے عظیم بزرگ حضرت خواجہ محمد حسن صدیقی مدنی قدس سرہٗ (۱۲۹۸ھ) درگاہ لواری شریف (ضلع بدین سندھ) کے دست پر سلسلہ نقشبندیہ میں بیعت ہو کر مرشد کی خدمت میں زندگی بسر کی ۔

سیرت و خصائص:
عالم ربانی، امام العلماء، رئیس الصلحاء، جامع علوم عقلیہ ونقلیہ، راسخ فی العلوم القرآنیہ، مترجم قرآن فی اللغۃ السندیہ، عاشق خیر الوریٰ، محب غوث الاعظم حضرت علامہ مولانا قاضی عزیز اللہ مٹیاروی رحمۃ اللہ علیہ ۔

آپ علیہ الرحمہ اپنے وقت کے جید عالم دین، اور شیخ القرآن تھے ۔ قاضی صاحب علیہ الرحمہ کےعلمی کارناموں سے اسلاف کی خوشبو آتی تھی ۔ ساری زندگی تدریس و تالیف اور وعظ ونصیحت میں مصروف رہے ۔ اپنے وقت کی قدر کرتے ہوئے ایک ایک لمحہ اشاعت اسلام میں صرف کیا ۔

درس و تدریس:
درگاہ لواری شریف میں قیام کے دوران درس و تدریس ، فتاویٰ نویسی اور تصنیف و تالیف کا کام کیا۔ اس کے علاوہ مرشد کے حضور میں روزانہ بعد نماز ظہر تا نماز عصر تک روحانی محفل ہوا کرتی تھی جس میں قاضی صاحب شیخ اکبر حضرت شیخ محی الدین ابن عربی قدس سرہ کی صوفیانہ کتب کا درس دیا کرتے تھے۔

تصنیف و تالیف:
آپ کی علمی ادبی اور روحانی خدمات کا سلسلہ طویل ہے ۔ مختصر جھلک درج ذیل ہے ۔ ۱۔ قاضی صاحب کا زندگی کا عظیم کار نامہ سندھی زبان میں قرآن مجید کا نثری ترجمہ ہے۔ یہ سندھی نثر کا ابتدائی دور تھا اور قرآن مجید کاپہلا سندھی ترجمہ تھا جس سے متاثر ہو کر بعد کے علماء نے سندھی نثر میں قرآن مجید کے ترجمے کئے اور دیگر لٹریچر تیار کیا۔۲۔تفسیر عزیزی۔ قاضی صاحب نے قرآن مجید کو عربی زبان میں"تفسیر عزیزی "لکھی جو کہ غالباً مکمل نہ ہو سکی اور ہو سکتا ہے کہ شہر علم و ادب سندھ جامشورو میں محفوظ ہو۔ ۳۔حضرت امام مالک رضی اللہ عنہٗ کی حدیث شریف کی مشہور کتاب "موطا امام مالک"پر حواشی لکھی۔ ۴۔غوث اعظم پیران پیر دستگیر رضی اللہ عنہٗ کے مشہور زمانہ "قصیدہ غوثیہ" کی عربی زبان میں شرح لکھی جو کہ آپ کا لازوال کارنامہ اور تصوف کا عظیم سرمایہ ہے۔ ۵ ۔ تفسیر جلالین عربی 18 پارہ تا والناس ترجمہ کیا۔ ۶۔ آپ کو اپنے مرشد کریم سے بے حد محبت تھی اور اسی محبت کا نتیجہ کہ آپ نے پوری زندگی مرشد کے قدموں میں گزار دی آپ نے "مشائخ نقشبندیہ کا منظوم شجرہ" بھی رقم فرمایا تھا ۔ (ایضاً:434)

عظیم کارنامہ:
آپ کا سب سے بڑا کارنامہ اور تاریخی کام قرآن کریم کا"سندھی ترجمہ" ہے۔سندھی نثر کی تاریخ میں جو پہلا تحریری نثر ملا وہ ٹالپرکے دور میں قرآن مجید کا سندھی ترجمہ ہے جو کہ قاضی عزیاز اللہ مٹیاروی علیہ الرحمۃ کا عظیم کارنامہ ہے۔ سندھ کی سرزمین کا یہ پہلا خوش نصیب عالم دین ہے جس نے قدیم عربی رسم الخط میں قرآن مجید کا سندھی نثر میں ترجمہ مکمل کرنے کا شرف حاصل کیا۔اوروہ بھی اس زمانے میں جب کہ سندھی زبان کی کوئی گرائمر مدون نہیں ہوئی تھی۔حتی ٰ کہ سندھی زبان لکھی نہیں جاتی تھی ایسے وقت میں تحریری طور پر سب سے پہلا سندھی زبان میں ترجمہ کرنا یہ آپ ہی کاتاریخی کارنامہ ہے۔اس ترجمہ کی یہ بھی خصوصیت کہ مترجم کی طرف سےاس کےحاشیہ پر مختصر سی تفسیر بھی ہے،جس سےقرآن کی روح تک پہنچنے میں اور آسانی ہو جاتی ہے۔(سندھ کے صوفیائے نقشبند ص:295)

صد افسوس:
بلند پایہ عالم دین و صوفی قاضی عزیز اللہ کے فتاویٰ کا خزانہ محفوظ نہ ہوسکا اور اپنوں کی لاپرواہی سے اکثر قیمتی تحریری سرمایہ ضائع ہو گیا ۔ فی زمانہ ہمارے اکابرین کے جو مخطوطات بد مذہبوں کے ہاتھ لگ رہے ہیں، وہ ان کو اپنے مولویوں کے نام سے شائع کر رہے ہیں ۔ ہمدردان اہل سنت کی خدمت میں التجا ہے کہ اس طرف توجہ دیں، اور بزرگوں سے حقیقی عقیدت یہ ہوگی کہ ان کے علمی کار ناموں کو دنیا میں روشناس کرایا جائے ۔ دورانِ تذکرہ میں ( فقیر تونسوی غفرلہ) نے "وکیپیڈیا" پر "سندھی تراجم" کی فہرست دیکھی تو اس میں حضرت قاضی عزیز اللہ علیہ الرحمہ کا اسم گرامی شامل نہیں تھا۔بہت افسوس ہوا، کہ اتنے بڑے محسن اہل سنت کے عظیم کار ناموں کو کیسے فراموش کر دیا گیا ۔ وہ حضرات جو اس نیٹ ورک پر کام کرتے ہیں انہیں "علمی دیانت" کا ثبوت دیتے ہوئے حق بات تحریر کرنی چاہئے ۔

تاریخِ وصال:
آپ کا وصال 7 / شعبان المعظم 1273ھ، مطابق 30 مارچ 1857ء، بروز پیر صبح چاشت کے وقت ہوا ۔ خانقاہ لواری شریف کے صلحاء کے زیر سایہ آرام فرماہیں ۔ اللہ تعالیٰ آپ کی قبر پر رحمتوں اور برکتوں کا نزول فرمائے ۔ آمین ۔

ماخذ و مروجع:
انوار علمائے اہل سنت سندھ ۔ سندھ کے صوفیائے نقشبند۔

https://scholars.pk/ur/scholar/hazrat-qazi-azizullah-matiarvi

حضرت مخدوم ابو القاسم نورالحق ٹھٹھوی رحمۃ اللہ تعالیٰ علیہ

مخدوم ابو القاسم نور الحق بن درس ابراہیم ٹھٹوی سندھ کے مشاہیر علما اور معروف اولیا میں سے ہیں۔ آپ کے پیر و مرشد شاہ سیف الدین قُدِّسَ سِرُّہُ الْعَزِیْز نے آپ کو’’ نور الحق‘‘ کا لقب دیا تھا، لیکن آپ پورے سندھ میں ’’حضرت نقشبندی‘‘ کے نام سے مشہور ہوئے۔ آپ کے آنے سے پہلے سندھ میں صرف سہر وردیہ اور قادریہ سلاسل تھے ، سلسلۂ نقشبندیّہ کا وجود نہ تھا ۔ علومِ ظاہری حاصل کرنے کے بعد آپ نے مخدوم آدم کی رہبری میں منازلِ تصوّف طے کیں ۔ مخدوم آدم نے آپ کی ذات میں جو ہرِ قابل دیکھ کر آپ کو سرہند میں حضرت مجددِ الفِ ثانی کے پوتے حضرت سیف الدین رحمۃ اللہ تعالٰی علیہ کی خدمت میں بھیج دیا، کسبِ فیض کے بعد آپ واپس ٹھٹھہ تشریف لائے تو سندھ کے جلیل القدر علمانے آپ کے ہاتھ پر بیعت کی۔

مخدوم ابو القاسم جب اپنے مرشد حضرت سیف الدین سے رخصت ہونے لگے تو انہوں نے فرمایا:

’’میاں اب ہمارا تمہارا معاملہ یک ساں ہوگیا اب تم سندھ میں جاکر لوگوں کو راہ ہدایت کی طرف دعوت دو۔ اب سندھ میں تم سے رشدو ہدایت کے سر چشمے پھوٹیں گے وہاں جاؤ اور دین کو حیاتِ نو بخشو۔‘‘

سندھ میں اپنی آمد کے بعد آپ نے بہت سے بھٹکے ہوئے انسانوں کا رشتہ اللہ تعالیٰ سے جوڑا لوگوں کو نیکیوں کی ترغیب دی۔ برائیوں اور بداخلاقیوں سے بچنے کی تلقین کی۔ یہاں تک کہ سندھ کے علاوہ دور دراز سے لوگ آپ کی خدمت میں حاضر ہوتے اور دامنِ مراد بھر کر جاتے تھے۔

آپ مستجاب الدعوات تھے، جب بھی کوئی دل گرفتہ ، رنجور انسان آپ کی خدمت میں دعا کا طالب ہوتا آپ اللہ تعالیٰ سے اس کی حاجت روائی کے لیے دعا کرتے تھے۔اللہ تعالیٰ اپنی رحمتِ کاملہ سے اسے قبول فرمالیتا تھا۔ خانقاہ کے جس حجرے میں آپ کاقیام تھا وہ ’’حجرۂ حضوری‘‘ کہلاتا تھا ۔ جس کی وجہِ تسمیہ یہ ہے کہ ایک رات عشا کے بہت دیر بعد آپ کے اس حجرے سے دو آمیوں کے آہستہ آہستہ باتیں کرنے کی آواز آتی رہی؛ خانقاہ کے فقرا یہ سمجھے شاید کوئی مہمان آیا ہوگا۔ کچھ دیر کے بعد آپ حجرے سے باہر تشریف لائے تازہ وضو کیا اور خانقاہ کے ایک درویش سے فرمایا کہ حجرے میں سے ہماری دستار لاؤ۔ جب درویش حجرے میں داخل ہوا تو اسے وہاں دوسرا کوئی آدمی نظر نہ آیا وہ بڑی دیر تک حیران رہا کہ حجرے میں تو دوسرا کوئی آدمی موجود نہیں ہے۔ پھر یہ دوسری آواز اس کس کی تھی کچھ دنوں کے بعد اسی خادم نے خلوت میں آپ سے اس کےمتعلق پوچھا تو فرمایا رسول اللہ ﷺ تشریف فرما ہوئے تھے۔ جب سے اس حجرہ کا نام حجرہ حضوری پڑ گیا۔

مخدوم محمد معین ٹھٹھوی نے آپ کی کرامتوں اور فضائل پر ایک مستقل رسالہ سپرد قلم کیا ہے۔ آپ کی وفات ۷ شعبان/۱۱۳۸ھ کو ہوئی ۔ مکلی میں آپ کے مزار پر قطعۂ تاریخ کندہ ہے۔

بسالِ وصلِ او ہاتف بفرمود
ابو القاسم سراسر نورِ حق بود

تمام سندھ میں سلسلۂ نقشبندیّہ کو آپ ہی کے طفیل فروغ حاصل ہوا ، آپ کو خورشیدِ مکلی بھی کہا جاتا ہے۔ آپ بلند پایہ شاعر بھی تھے۔

(تذکرۂ مشاہیر سندھ، ص ۱۳۳؛ تحفۃ الطاہرین، ص۸۰؛ تحفۃ الکرام، جلد ۲،ص ۱۶۵، ۱۷۶،۲۲۹؛ دائرہ معارف اسلامیّہ، ص ۴۷۴)

( تذکرہِ اولیاءِ سندھ )

https://scholars.pk/ur/scholar/hazrat-makhdoom-abul-qasim-noor-ul-haq-thathvi