بادشاہِ ہند حضرت اورنگ زیب:
حضرت اورنگ زیب عالمگیر رحمۃ اللہ تعالیٰ علیہ آپ سے ملاقات کے لئے حاضر ہوئے تھے، اس وقت آپ درسِ قرآن دے رہے تھے ۔ لیکن آپ نے اپنے درس کو جاری رکھا ۔ وہ کھڑے ہو کر سنتے رہے ۔ انہوں نے آپ کو اپنی طرف متوجہ کرنے کے لئے پڑھا: اطیعو اللہ واطیعو الرسول و اولی الامر منکم ۔

آپ نے جواب میں ارشاد فرمایا:
ہم اللہ جل شانہ اور اس کے رسول ﷺ کی اطاعت میں مستغرق ہیں، ہمیں " اولی الامر " کی فرصت ہی نہیں ہے ۔

شہزادہ عالمگیر آپ کی خود داری، اور دین داری سے متاثر ہوئے ۔ آپ نے انہیں پورے ہندوستان کے بادشاہ بننے کی خوش خبری دی، اور ساتھ یہ نصیحت  بھی فرمائی کہ اللہ کی زمین پر اللہ کا نظام قائم کرنا، اور مخلوقِ خدا پر ظلم نہ کرنا، رزقِ حلال کھانا حرام سے بچنا ۔

( بادشاہ بننے کے بعد حضرت اورنگ زیب عالمگیر علیہ الرحمہ نے ان تمام باتوں پر عمل کیا ) ـ

آخر میں جب وہ نذرانہ دینے لگے، تو آپ نے فرمایا: ہمیں ان سکوں کی ضرورت نہیں ہے، اس ملک میں بھوکے بہت ہیں ان کو دے دینا ۔

یہ تھے ہمارے اسلاف اولیاء اللہ جن کی زندگی کا ایک ایک باب روشن ہے ۔ لیکن اس وقت بقول مفکرِ اسلام علامہ محمد اقبال علیہ الرحمہ ؎

زاغوں کے تصرف میں ہیں عقابوں کے نشیمن ۔ جو شاہینوں کے نشیمن تھے ، آج وہاں پہ گرگسوں نے قبضے جما لیے ہیں ۔

اسلام آباد:
قطب الاقطاب حضرت سید شاہ عبد اللطیف کاظمی المعروف امام بری نے آج (1438ھ) سے تین سو اکیس سال پہلے ارشاد فرمایا تھا کہ نور پور پوٹھوہار ( موجودہ اسلام آباد ) کا یہ خطہ ایک دن نہ صرف فرزندانِ توحید کا مرکز بلکہ عالی شان چمکتا دمکتا شہر بن جائے گا اور اس کا چرچا پوری دنیا میں ہوگا ۔

حضرت امام بری سرکار کی یہ پیش گوئی سچ ثابت ہوئی اور یہاں اسلام آباد کے نام سے ایک شہر آباد ہو گیا جو آج مملکت خدا داد پاکستان کا دار الحکومت ہی نہیں بلکہ اقوام متحدہ کی سطح پر ایک ارب سے زائد مسلمانوں کے ترجمان کے عظیم شرف سے ہمکنار بھی ہے ۔

ربِّ ذو الجلال سے دعا ہے کہ پرور دگارِ عالم! اسلام آباد کو اسم با مسمیّٰ بنا کر اس مملکتِ خدا داد کو نظامِ مصطفیٰ ﷺ کا گہوارہ بنائے ۔ (آمین ) ـ

وصال:
آپ رحمۃ اللہ علیہ نے 1117ھ، میں وفات پائی ۔ آپ کا مزار شریف اسلام آباد میں زیارت گاہ خاص و عام ہے ۔

ماخذ و مراجع:
تذکرہ اولیائے پاکستان ۔ تذکرہ مشائخِ قادریہ ۔ فیضانِ بری امام ۔

https://scholars.pk/ur/scholar/hazrat-shah-abdul-latif-imam-bari-sarkar