السلام علیکم و رحمۃ اللّٰہ و برکاتہ
کیا فرماتے ہیں علمائے دین و مفتیان عظام اس مسئلہ میں کہ حضرت اگر کوئی امام اپنی امامت بچانے کے چکر میں ممبر پکڑ کر قسم کھاتا کی میں ممبر رسول پر ہاتھ رکھ کر قسم کھاتا ہوں تو اس طرح کے قسم کھانے کے بارے میں کیا حکم ہے ؟
المستفتی : محمد واجد علی سبحانی موضع خردا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وعلیکم السلام و رحمۃ اللّٰہ و برکاتہ
*جواب* اللہ تعالی کے نام اور صفات کے علاوہ کسی اور ذات ، عبادت یا مقام کی قسم کھانا ناجائز و گناہ ہےاور اس سے بچنا لازم ہے جیسا کہ بدائع الصنائع میں ہے کہ " اما اليمين بغير الله و هواليمين بالآباء و الابناء و الانبياء و الملائكة صلوات الله عليهم و الصوم و الصلاة و سائر الشرائع و الكعبة و الحرم و زمزم و القبر و المنبر و نحو ذلك و لا يجوز الحلف بشئى من ذلك لما ذكرنا ۔۔ و لو حلف بذلك لا يعتد به و لا حكم له اصلا " اھ یعنی بہر حال غیر اللہ کی قسم کھانا اور وہ باپ ، بیٹوں ، انبیاء اور فرشتوں علیہم الصلوٰۃ و السلام ، روزے ، نماز اور دیگر دینی احکام ، کعبہ ، حرم ، زمزم ، قبر ، منبر اور اس کی مثل دیگر اشیاء کی قسم کھانا ہے اور ان میں سے کسی بھی چیز کی قسم کھانا جائز نہیں اس وجہ سے جو ہم نے ذکر کر دیا اور اگر اس طرح کسی نے قسم کھا بھی لی ، تو وہ قسم کھانے والا شمار نہیں ہوگا اور اس قسم کا اصلاً کوئی حکم ( کفارہ ) نہیں ہوگا " اھ ( بدائع الصنائع ج 3 ص 21 : دار الکتب العلمیہ) اور بہار شریعت میں ہے کہ " یہ الفاظ قسم نہیں اگر چہ ان کے بولنے سے گنہگار ہوگا جب کہ اپنی بات میں جھوٹا ہے اگر ایسا کروں تو مجھ پر اللہ کا غضب ہو ۔ اس کی لعنت ہو اس کا عذاب ہو خدا کا قہر ٹوٹے ، مجھ پر آسمان پھٹ پڑے مجھے زمین نگل جائے ۔ مجھ پر خدا کی مار ہو ، خدا کی پھٹکار ہو ، رسول اللہ صلی اللہ تعالٰی علیہ وسلم کی شفاعت نہ ملے ، مجھے خدا کا دیدار نہ نصیب ہو ، مرتے وقت کلمہ نہ نصیب ہو " اھ ( بہار شریعت ج 2 ص 301 قسم کا بیان )
مذکورہ باتوں سے ثابت ہوا کہ غیر خدا کی قسم کھا لینے سے شرعاً قسم منعقد ہی نہیں ہوتی لہذا اس کے خلاف کرنے کی صورت میں کفارہ بھی لازم نہیں ہوگا لیکن امام صاحب کو ایسا نہیں کرنا چاہئے لہذا امام صاحب اللہ تبارک و تعالیٰ کی بارگاہ میں رجوع کریں اور توبہ استغفار کریں آئندہ اس طرح قسم کھانے سے پرہیز کریں ۔

واللہ اعلم بالصواب
کریم اللہ رضوی
خادم التدریس دار العلوم مخدومیہ اوشیورہ برج جوگیشوری ممبئی موبائل نمبر 7666456313