سید محی الدین ابو نصر محمد رحمۃ اللہ علیہ

نام و نسب:
کنیت: ابو محمد ۔ لقب: محی الدین ۔ اسم گرامی: محمد بن ابو صالح نصر ۔ مکمل نام: محی الدین ابو نصر محمد ۔

سلسلۂ نسب:
محی الدین ابو نصر محمد بن سید ابو صالح عبد اللہ نصر بن سید عبد الرزاق بن غوث الاعظم سیدنا شیخ عبد القادر جیلانی ۔ رضی اللہ تعالیٰ عنہم ـ

تحصیل علم:
آپ کی تعلیم و تربیت والد گرامی کےزیر سایہ ہوئی۔فقہ و حدیث دیگر علومِ عقلیہ و نقلیہ کی تحصیل و تکمیل اپنے والد گرامی سے فرمائی ۔ ان کے علاوہ آپ نے بہت سے مشائخِ وقت اور محدثین کے سامنے زانوئے تلمذ تہ کیا ۔ جن میں حسن بن علی مرتضیٰ العلوی، ابو اسحق یوسف بن ابی حامد، ابی الفضل محمد بن عمر ارموی، وغیرھم ۔

بیعت و خلافت:
آپ اپنے والد گرامی سید ابو صالح عبد اللہ نصر سے بیعت ہوئے اور خلافت وخرقہ قادریہ سے مشرف ہوئے ۔

سیرت و خصائص:
سراج العلماء، زبدۃ الازکیاء، عمدۃ الاتقیاء، کثیر العلم حضرت سید محی الدین ابو نصر محمد ۔

آپ سلسلۂ عالیہ قادریہ رضویہ بیسویں امام و شیخ طریقت ہیں ۔ آپ اپنے جدِّ امجد سیدنا غوث الاعظم رضی اللہ تعالیٰ عنہ سے بہت مشابہت رکھتے تھے ۔

آپ اعلیٰ درجے کے محقق محدث اور مدرس تھے ۔ علم و مطالعہ کے بے حد شوقین اور اس کے متلاشی تھے ۔ آپ اپنے تمام معاملات میں سنت نبوی کے مطابق کوشش بلیغ فرماتے، اور ہر کام محنت و کوشش سے کرتے جس میں سستی و کاہلی کا نام و نشان تک نہ ہوتا تھا ۔

آپ اپنے وقت کےعظیم فقیہ تھے ۔ فقاہت کی بنیاد پر ’’ مفتی عراق ‘‘ مقرر ہوئے، اور اس وقت آپ کے والد گرامی عراق کے ’’ قاضی القضاۃ ‘‘ یعنی چیف جسٹس تھے ۔ بعد میں آپ کو دار الخلافہ بغداد میں مسند ِقضاء پر فائز ہوئے ۔ لیکن صرف ایک ہی مرتبہ عدالت تشریف لے گئے، پھر فوراً استعفیٰ دےدیا، اور بعد میں کبھی عہدۂ قضا قبول نہیں فرمایا ۔

درس و تدریس:
آپ کا گھرانہ علم و فن کا منبع تھا، اور آپ نے علم دین کے فروغ و اشاعت میں کامیاب کوشش کی، باب الازج کے مدرسے میں ابتداءً درس دیا ۔ پھر اپنے جد امجد غوث الاعظم رضی اللہ تعالیٰ عنہ کے مدرسے میں تاحیات تدریس فرماتے رہے ۔ آپ سے مشہور محدث حافظ دمیاطی وغیرہ نے احادیث کی سماعت کی ہے ۔

اولاد امجاد:
آپ کے چار فرزند تھے ۔ حضرت شیخ عبد القادر ثانی، شیخ عبد اللہ، شیخ ظہیر الدین ابو مسعود احمد، حضرت سید علی رضوان ۔

آپ کے صاحبزادے شیخ ظہیر الدین نہایت ہی فصیح و بلیغ گفتگو فرماتے، اور جامع مسجد میں خطبہ دینے کے علاوہ اپنے مدرسے میں تدریس کرتے تھے ۔ شیخ عزالدین فرماتے ہیں: کہ آپ فاضل اور واعظ تھے، اور شیخ سقری سےاحادیث سماعت کی ـ

27 ربیع الاول بروز سہ شنبہ 681ھ کو لاپتہ ہوگئے، اور بعد میں ایک کنوئیں سے آپ کی نعش ملی ۔

خلفاء کرام: آپ کےخلفاء میں صرف
حضرت سید علی کا نام موجود ہے ۔

تاریخ وصال:
آپ کے وصال کےبارے میں مختلف اقوال موجود ہیں ۔ جن میں 27 اور 22 ربیع الاول 656ھ، بروز دوشنبہ مشہور ہے ۔ ان کے علاوہ بعض نے 13 شوال / 22 ربیع الاول 12 / محرم 613ھ بھی لکھی ہے ۔

مزار مبارک:
آپ کا مزار مقدس بغداد شریف میں اپنے جد امجد حضرت غوث الاعظم رضی اللہ تعالیٰ عنہ کے مدرسے کے احاطے میں مرجع خلائق ہے ۔ (تذکرہ مشائخ قادریہ رضویہ، ص:268) ـ

شجرہ شریف میں اس طرح مذکور ہے:
نصربی صالح کاصدقہ صالح ومنصور رکھ
دے حیاتِ دیں محی جاں فزا کے واسطے

https://scholars.pk/ur/scholar/hazrat-mohiuddin-abu-nasar