مغرب سے پہلے حرمِ نبوی میں حاضر تھا ، میرے ساتھ بیٹھے دو عراقی مجھ سے بار بار دلائل الخیرات شریف کا تقاضا کرنے لگے ، لیکن میرے پاس موجود نہیں تھی میں نے انھیں کہا:
ابھی تو نہیں ہے ، انشاءاللہ جب عراق آیا تو آپ کے لیے لیتا آؤں گا ۔
اُن کی حسرت اور تقاضا دیکھ کر میرے دل میں خیال بھی آرہا تھا کہ کاش میرے پاس ابھی ہوتی تو انھیں تحفہ دے دیتا ۔

مغرب کے بعد میں حرم شریف سے نکلا ہوں تو ایک اللہ کے بندے سے ملاقات ہوئی ہے ، انھوں نے میرے تقاضہ کیے بغیر ہی مجھے دلائل الخیرات دی ہے اور کہا ہے:
ابھی میرے پاس آپ کے لیے یہی تحفہ ہے ، اسے قبول کریں ۔

حضور کی بارگاہ کے کیا کہنے ، یہاں سوال سے پہلے ۔۔۔۔۔۔ خیال پر بھی عطاہوجاتاہے ؎

منگتا کا ہاتھ اُٹھتے ہی داتا کی دَین تھی
دُوری قبول و عرض میں بس ہاتھ بھر کی ہے

خاکِ راہِ حجاز
✍️ لقمان شاہد
30-4-2022 ء

https://m.facebook.com/story.php?story_fbid=pfbid0yphcKTacBid5EPfQguYTDHLP6W7aFjURyBKEjZEzV5mn8uDGRaYofgMjLpL6cPGZl&id=100008105947430

سیدنا امام جعفر صادق رضی اللہ تعالی عنہ بڑے ہنس مکھ تھے ، مسکراتے رہتے تھے ۔۔۔۔۔۔ لیکن جب ان کے سامنے رسول اللہ ﷺ کا ذکر پاک کیا جاتا تو ( ہیبت و محبت رسول کی وجہ سے ) آپ کا رنگ زرد ہوجاتا ؛ اور ( ادب کا یہ عالم تھا کہ ) بغیر وضو حضور کا ذکر پاک نہیں کیا کرتے تھے ۔ 😥

( انظر: مصباح الظلام فی المستغیثین بخیر الانام‌ علیہ الصلاۃ والسلام فی الیقظۃ والمنام ، ص 236 ، دارالکتب العلمیۃ بیروت )

اللہ پاک ہمیں بھی ایسا کردے !!

✍️ لقمان شاہد
1-5-2022 ء

https://m.facebook.com/story.php?story_fbid=pfbid0AwUhsESAiJ7ESfbozZKwaV4EsMnSvo6tuQxXufXjEv4amEYrRmSDyvXbhwgoUxWel&id=100008105947430

صبح میری زندگی کی پہلی عید ہوگی جسے میں عید کہ سکوں گا ، حضرت امیر خسرو نے کہا تھا ؎

عید گاہِ ما غریباں کوئے تو
انبساط عید دیدن روئے تو

صد ہزاراں عید قربانت کنم
اے ہلالِ ما خمِ ابروئے تو

( مفہوم: میرے محبوب ! میری عیدگاہ تیرا کوچہ ہے ، اور میری عید کی خوشیاں تیری زیارت میں ہیں ۔
اے میرے چاند مانا کہ عید کی رات کا چاند خم دار ہوتا ہے اور اس کا خم بڑا حسین ہوتا ہے ، لیکن اس کے خم کا تیرے خمِ ابرو سے کیا مقابلہ ۔۔۔۔۔۔۔ میں سو ہزار عیدیں تیرے اَبرو کے خم پر قربان نہ کر دوں ! )

https://m.facebook.com/story.php?story_fbid=pfbid02XicR5gg7gHkugh6FgNLdFEK3CdKJHTdVDAihUPgmbAUT7rxGTxPZ1fYdudBTtNaJl&id=100008105947430

حضرت ابن ابو زرعہ صوفی رحمہ اللہ کہتےہیں:

میں نے اپنے والد گرامی کے ساتھ مکہ مکرمہ کی طرف سفر کیا ، ہمیں شدید فاقے نے آگھیرا تھا ، جب ہم رسول اللہ کے شہر مدینہ شریف میں داخل ہوئے تو بھوکے پیٹ رات گزارنی پڑی ۔
میں بار بار اپنے والد صاحب کے پاس آتا اور کہتا مجھے بھوک لگی ہے ۔

میرے والد حضور کی بارگاہ میں حاضر ہوئے اور عرض کرنے لگے:

یارسول اللہ صلی اللہ علیک وسلم میں آج کی رات آپ کا مہمان ہوں !
پھر مراقبے میں بیٹھ گئے ، اور جب کچھ دیر بعد سر اٹھایا تو کبھی روتے تو کبھی ہنستے ۔
ہم‌نے سبب پوچھا تو کہنے لگے:

مجھے رسول اللہ ﷺ کی زیارت ہوئی ہے ، اور آپ نے میرے ہاتھ میں درہم‌ دیے ہیں ۔
والد محترم نے جب ہاتھ کھولا تو اس میں واقعی درہم موجود تھے ۔
اللہ پاک نے ان درہموں میں ایسی برکت ڈالی کہ ہم شیراز تک انھیں خرچ کرتے رہے ( لیکن وہ ختم نہ ہوئے ) ۔

( مصباح الظلام فی المستغیثین بخیر الانام‌ علیہ الصلاۃ والسلام فی الیقظۃ والمنام ، ص 63 ، دارالکتب العلمیۃ بیروت )

آج مدینہ پاک میں بعض فقیر رسول‌اللہ ﷺ سے عیدی مانگیں گے اور حضور ان کو عطافرمائیں گے !

ترے دَر کے ہیں بھکاری ، ملے خیر دَم قدم کی
تِرا نام سن کے داتا ہم اُمیدوار آئے ۔۔۔۔۔۔۔ !!

✍️ لقمان شاہد
2-5-2022ء

https://m.facebook.com/story.php?story_fbid=pfbid032P7i5fNAQkjd6pWtDTfPENfRreyMRLnbQEPUy56V47ujDJmaLwnu3Fmyi6NR9azLl&id=100008105947430

پاک وہند والوں کی آج عید ہے کیوں کہ انھوں نے رات کو چاند دیکھا ، جب کہ مدینہ طیبہ والوں کی ہر روز عید ہوتی ہے ۔۔۔۔۔۔ اِن پر جب سے ماہِ مدینہ نے تجلی فرمائی ہے ان کی عید ہی عید ہے ۔

شہر مدینہ تیرے بھی کیا کہنے ، تیری فضاؤں میں رسول پاک کی سانسوں کی خوشبو رچی بسی ہے ؛ تیرے ہاں آکر بندہ زیادہ عبادت و ریاضت نہ بھی کرسکے صرف سانس لیتا رہے تو یہ بھی کسی شرف سے کم نہیں ۔

خاک راہِ حجاز
✍️ لقمان شاہد
3-5-2022 ء

https://m.facebook.com/story.php?story_fbid=pfbid0274wZMKoNZ9DUVDYEcTGA8akb7dfkhT4FgsQXoLhK8Fq1X8DaUj6AwyHoF7SkMPELl&id=100008105947430

رسولِ پاک ﷺ کے شہر سے نکلنا کوئی آسان کام نہیں ، یہاں سے نکلتے وقت‌جان نکلتی ہے ۔۔۔۔۔۔۔ لیکن اللہ کریم نے جہاں جہاں رہنا لکھا ہے انسان وہی رہے گا ۔

رُفِعَت الْاَقْلَام وَ جَفَّت الصُّحُفُ ۔

مدینہ پاک سے واپسی پر دل اداس تھا ، ایئر پورٹ پر ایک کتاب پہ نظر پڑی ، خرید کر جب مطالعہ شروع کیا تو دل کو سکون ملنا شروع ہوگیا ۔

یہ کتاب سید عالم ، نور مجسم ، فخر بنی آدم ، منبع علم و حکم ، مخزن جود و کرم ﷺ کے اوصافِ حمیدہ پر لکھی گئی ہے ۔۔۔۔۔ اور جس انداز سے لکھی گئی ہے میرا نہیں گمان اس سے پہلے اس جیسی کوئی کتاب لکھی گئی ہو ۔

یہ کتاب صرف پڑھنے کے لائق ہی نہیں ، اس کا انداز تحریر بھی اپنانے کے لائق ہے !

ہر نئے دور کے نئے تقاضے ہوتے ہیں ، کیا ہی اچھا ہو ہم تحریر میں بھی اِن سے ہم آہنگ ہونا سیکھ لیں ۔

خاک راہِ حجاز
✍️ لقمان شاہد
4-5-2022 ء

https://m.facebook.com/story.php?story_fbid=pfbid02c1ifpjawT7QTs8hVDyi8V7NgHjgjdeJVDBGhjKBVBSLkk8LoV13WjkCk1BcZiwBZl&id=100008105947430

سیدہ طیبہ طاہرہ عائشہ صدیقہ رضی اللہ عنھا فرماتی تھیں:

رسول اللہ صلی اللہ علیہ وسلم نے جتنے عمرے ادا کیے ہیں سارے ماہِ ذِی القَعدَہ میں کیے ہیں ۔ ( ابن ماجہ ، ر2997 )

بلکہ سیدنا عبداللہ بن عمر رضی اللہ عنھما نے کہا تھا کہ رسول اللہﷺ نے رجب شریف میں عمرہ کیا ہے تو اس پر سیدہ پاک نے فرمایا:
ابو عبدالرحمان ( عبداللہ بن عمر ) کو اللہ بخشے ، ان سے بھول ہوگئی ہے ، رسول اللہ ﷺ نے ماہِ رجب میں کوئی عمرہ نہیں کیا ۔ ( مسند احمد ، ر4122 )

شوال کاپہلا عشرہ گزر رہا ہے ، ماہِ ذِی القعدہ آنے والا ہے ، جنھیں اللہ توفیق دے وہ اتباعِ رسول میں اس ماہِ مبارک میں ضرور عمرہ ادا کریں ۔

ویسے بھی بار بار حج و عمرہ غربت اور گناہ ختم ہونے کا بہترین ذریعہ ہیں ۔

آقا کریم ﷺ کافرمان ہے:
حج اور عمرہ بار بار کیا کرو ، یقیناً یہ غربت اور گناہوں کو اس طرح ختم کردیتے ہیں جیسے بھٹی ۔۔۔۔۔۔۔ لوہے ، سونے اور چاندی کا زنگ اتار دیتی ہے ۔ (سنن نسائی ، ر 2632 )

✍️ لقمان شاہد
4-5-2022 ء

https://m.facebook.com/story.php?story_fbid=pfbid0dwLGX5pmgBzfA6dLw1DcMorji1NhVnRaiLr6zozprW4F3JyzoLE4JNsrARjmWdfVl&id=100008105947430

بعض معاملات صرف گناہ ہوتے ہیں ۔۔۔۔۔۔ توہین ، بدعقیدگی اور کفر نہیں ہوتے ؛ جیسے:
کچھ دنوں پہلے مسجد نبوی شریف میں بعض لوگوں نے جو کیا وہ کسی صورت جائز نہیں تھا ، لیکن اس پر توہینِ رسالت کا اطلاق کرنا اور مرتکبین کو گستاخ رسول قرار دے دینا بھی کسی صورت درست نہیں ۔۔۔۔۔۔۔۔۔ اِس جرم کے مرتکب حد درجہ گناہ گار ہوئے ، اللہ انھیں سچی توبہ کی توفیق بخشے !

ہر جرم کی ایک نوعیت ہوتی ہے جس کے مطابق شرعی سزا کا اطلاق ہوتا ہے ، اس سے کم یا زیادہ نہیں ۔

اگر مجرم کو جرم سے زیادہ سزا دی جائے تو وہ سنورنے کے بجائے بگڑجاتاہے ، اور بعض دفعہ ایسا بگڑتا ہے کہ معاشرے کے لیے ناسور بن جاتا ہے ۔

اللہ کریم‌انصاف کا دامن تھامے رہنے کی توفیق بخشے ، بات بات پر لوگوں کو اسلام اور اہل‌ سنت سے خارج کرنے والی ریت انتہائی خطرناک ہے ، اللہ نہ کرے ہمیں اس کا بھیانک نتیجہ بھگتنا پڑے ۔

شیخ الاسلام امام احمد رضا رحمہ‌اللہ نے کتنی پیاری بات ارشاد فرمائی‌ تھی کہ:

جو شخص اپنے دین میں محتاط ہے وہ تکفیر پر جسارت نہیں کرتا ، جب تک سورج کی مثل بلکہ اس سے بھی زیادہ روشن دلائل موجود نہ ہوں۔
یہاں تک کہ اگر کسی مسئلہ میں ایک جہت اسلام کی اور ننانویں جہتیں کفر کی نکلتی ہوں تو مفتی پر لازم ہے کہ وہ پہلی جہت کی طرف میلان کرے ، کیوں کہ " اسلام غالب ہوتا ہے ، مغلوب نہیں ہوتا " ۔

✍️ لقمان شاہد
7-5-2022 ء

https://m.facebook.com/story.php?story_fbid=pfbid02FyivnMCubbNrcYkyECAiHZaTFVoWQ7vmZfz3C1HjXDfFGpPMvGdJf27Furg8JkhGl&id=100008105947430

جس شخص کادل مدینۃ النبی کے ساتھ مُعلق ہو ، اس کا مدینہ طیبہ سے جدا ہونا کسی صدمہ جانکاہ سے کم نہیں ہوتا ۔

لوگ مدینہ شریف سے آنے پر جب گلے میں پھولوں کے ہار ڈالتے ہیں تو بظاہر ہم‌ مسکرا کر ان کا شکریہ ادا کردیتے ہیں ، لیکن مدینہ چھوٹنےپر دل پہ کیا بِیت رہی ہوتی ہے یہ کسی کو معلوم نہیں ہوتا ۔

رات کو عاشقِ مدینہ حضرت مولانا ابوبلال محمد الیاس عطار قادری دام ظلہ سے ملاقات ہوئی تو آپ نےکہا:

" میں آپ سے تعزیت کرتا ہوں " ، کہ آپ سے مدینہ چھوٹ گیا ۔ 😥

اللہ حضرت کو جزا دے ، یہ تعزیت صرف آپ نے ہی کی ۔۔۔۔۔۔۔ !

حضرت حاتم اصم رحمۃ اللہ علیہ فرماتے تھے:
میری جماعت چھوٹ گئی تو ایک‌ ابو اسحاق بخاری تھے جنھوں نے مجھ سے تعزیت کی ۔۔۔۔۔۔۔۔ اگر میرا بیٹا فوت ہوگیاہوتا تو دس ہزار سے زیادہ لوگ تعزیت کرنے پہنچ جاتے ؛ لوگوں کے نزدیک دُنیا کی آفت دین کی آفت سے آسان ہوگئی !

( مکاشفۃ القلوب ، الباب الثانی والثمانون ، فی فضل صلاۃ الجماعۃ ، ص 354 )

جمالِ نور کی محفل سے پروانہ نہ جائے گا
مدینہ چھوڑ کر اب ان کا دیوانہ نہ جائے گا

مِرے سرکار آ کر نقش کر دو اب کفِ پا کو
دلِ بیمار کا رہ رہ کے گھبرانا نہ جائے گا

✍️ لقمان شاہد
10-5-2022ء

https://m.facebook.com/story.php?story_fbid=pfbid02HTzxdh5xrExt6CM1PrssiLwDW3tr8qxrChfaUvHVwY4uc7xDm7SjRMqDMNCgVS8dl&id=100008105947430