آقا و مولا ﷻ نے اپنے بندے کو پھر اذنِ حاضری عطا فرمایا ہے ۔۔۔۔۔۔۔ ان شاءاللہ آج رات رسولِ پاک ﷺ کے مقدس شہر مکہ مکرمہ کی طرف روانگی ہو گی ، اور ایمان و محبت کے ساتھ بیت اللہ شریف کا دیدار نصیب ہوگا ۔ اللہ اللہ 😥😥

کب کوئی درِ شاہ پہ تدبیر سے پہنچا
پہنچا تو فقط خوبیِ تقدیر سے پہنچا

احباب دعا فرمادیں کہ لمحہ بھر کی بھی غفلت نہ ہو ، دل اپنے پاک پروردگار کی یاد سے معمور رہے !

https://m.facebook.com/story.php?story_fbid=pfbid02nLX3BCSKYKK5ytPb7yNS462mmVELRfu5k9cqcHUfWjN6RUiTLzmWhcJB88gMRizbl&id=100008105947430

اللہ پاک مجھے اور آپ کو بار بار بیت اللہ شریف کی زیارت نصیب فرمائے !

آپ جب مکہ مکرمہ میں حاضرہونا چاہیں تو امام حسن بصری تابعی رحمہ اللہ کا یہ رسالہ ضرور پڑھ لیں ۔

یہ ایک خط ہے جو آپ نے اپنے بہت ہی پیارے دوست حضرت عبدالرحمان بن انس رحمہ اللہ کو لکھا تھا ۔

حضرت عبدالرحمان مکہ پاک میں رہتے تھے ، انھوں نے مکہ شریف چھوڑنے کا ارادہ کیا تو امام حسن بصری نے انھیں لکھا کہ:

اے بھائی ! اللہ تیری عمر دراز کرے ، مجھے خبر ملی ہے کہ تُو امن کی جگہ حرم الہی سے یمن کی طرف جانے کا ارادہ رکھتا ہے ۔
اللہ کی قسم ! مجھے یہ بہت برا لگا ہے ، اور میں بڑا غمگین ہوا ہوں ؛ مجھے تیرے اس فیصلے سے بڑی وحشت ہوئی ۔۔۔۔ یہ حرمِ الہی سے تجھے شیطان دور کرنا چاہتا ہے ۔

پھر آپ نے مکہ پاک زادھا اللہ شرفا کے اس طرح خصائص و فضائل بیان کیے کہ سبحان اللہ !

یہ رسالہ بار بار پڑھنے والا ہے ، ان شاءاللہ آج میرا ہم‌ سفر بھی یہی رسالہ ہوگا ۔

علماے کرام متن سے استفادہ کریں ، اور دیگر احباب کے لیے اس کا اردو ترجمہ جو حضرت مولانا محمد راشد مدنی حفظہ اللہ نے کیا ہے وہ مفید رہے گا ، ماشاءاللہ خوب صورت ترجمہ ہے ۔

خاک راہ حجاز
✍️ لقمان شاہد
24-4-2022 ء

https://m.facebook.com/story.php?story_fbid=pfbid02n9VG5VZywGoJyXbcoPwf1ePkv4gsPnwaCTWqLfyfDPifptmbokZpKrCA5VMyETxAl&id=100008105947430

مکہ معظمہ وہ پیارا شہر ہے جسے اللہ کریم ﷻ نے کثیر انبیا کا جاے سکونت اور سید الانبیا کا جاے ولادت بنایا ۔
اللہ کے حبیب اس شہر کی گلیوں میں چلتے پھرتے رہے ، آپ ﷺ کی حیاتِ ظاہری کے اکثر ماہ و سال اِسی شہر میں گزرے ۔

اکثر ائمہ و علما ( بشمول ائمہ ثلاثہ: امام اعظم ، امام شافعی و امام احمد رضی اللہ عن جمیعھم ) کے نزدیک مکہ معظمہ سب شہروں سے افضل ہے حتی کہ مدینہ پاک سے بھی افضل ہے ۔

امام احمد رضا حنفی نوراللہ مرقدہ فرماتےہیں:

تُربت اطہر یعنی وہ زمین کہ ( رسول اللہ ﷺ کے ) جسمِ انور سے متصل ہے ، کعبہ معظمہ ۔۔۔۔۔۔ بلکہ عرش سے بھی افضل ہے ۔
باقی مزار شریف کا بالائی حصہ ( یعنی گنبد خضرا شریف فضیلت کے اعتبار سے ) اس میں داخل نہیں ۔

کعبہ معظمہ مدینہ طیبہ سے افضل ہے !

ہاں اس میں اختلاف ہے کہ:

مدینہ طیبہ سوائے موضع تُربتِ اَطہر ، اور مکہ معظمہ سوائے کعبہ مکرمہ ، ان دونوں میں کون افضل ہے ؟

اکثر جانب ثانی ہیں ( کہ مکہ پاک ہی افضل ہے ) اور اپنا مسلک اول ( کہ مدینہ طیبہ افضل ہے ) اور یہی مذہب فاروق اعظم رضی اللہ تعالیٰ عنہ ہے ، طبرانی کی حدیث میں تصریح ہے کہ:

المدینۃ افضل من مکۃ ۔
مدینہ پاک ، مکہ شریف سے افضل ہے ۔
( فتاوی رضویہ شریف )

اللہ پاک ہمیں حرمین طیبین میں جہاں بھی رکھے ، ایمان و محبت کی سلامتی کے ساتھ رکھے ، اور ہمیشہ اِن کا احترام کرتے رہنے کی توفیق بخشے !

✍️لقمان شاہد
25-4-2022 ء


https://m.facebook.com/story.php?story_fbid=pfbid058g5JCqDctpU9AFsr4Crx4Vdv4ncJ4syYABY9SNmF2UiVV113mpVzCWC7uKn98DCl&id=100008105947430

فِداکَ اَبِی واُمِی یارسول اللہ ! حضور آپ نے فرمایا تھا:

رمضان شریف میں عمرہ کرنا " میرے ساتھ " حج کرنے کے برابر ہے ۔

( صحیح البخاری ، ر 1863 )

حضور ! آپ کے فرمان پر لبیک کہتے ہوئے غلام نے یہ شرف پالیا ۔۔۔۔۔۔۔ کاشکے! ظاہری طور پر بھی " آپ کا ساتھ " نصیب ہوتا ؎

جو ہم بھی واں ہوتے خاکِ گلشن ، لپٹ کے قدموں سے لیتے اُترن
مگر کریں کیا ، نصیب میں تو یہ نامُرادی کے دِن لکھے تھے 😥

https://m.facebook.com/story.php?story_fbid=pfbid0ZQMYj4RUAQJFnAWPpvpuK94ntrhFVfXaUapA23f22wMYFgqTnsHuBFqbWaWPS56zl&id=100008105947430

جب مکے مدینے کے عاشقوں کی فہرست مرتب ہو گی تو اس میں مولانا محمد الیاس عطار قادری حفظہ اللہ کا نام ضرور آئے گا ۔

آپ نہ صرف خود بے مثال عاشق ہیں ، بلکہ عاشقوں کے مقتدا ہیں ۔
جسے اللہ کریم نے نورِ معرفت عطا فرمایا ہو وہ مکتبِ عشق کے اِس شیخ سے مستغنی نہیں ہو گا ۔

علامہ ارشد القادری رحمہ اللہ نے کسی دیوار پر یہ جملہ لکھا دیکھا:

" واہ کیا بات ہے مدینے کی ! "

تو آپ کو وجد آگیا ، اور پوچھنے لگے یہ کس کا جملہ ہے ؟
تو بتایا گیا: حضرت ! یہ مولانا الیاس قادری صاحب کا ہے ۔

آپ حفظہ اللہ کے عشق کے کیا کہنے ۔۔۔۔۔۔۔۔ یہ آپ ہی کا شعر ہے جسے جب بھی پڑھیں نیا ذوق ملتا ہے ؎

وَہاں پیارا کعبہ ، یہاں سبز گنبد
وہ مکہ بھی میٹھا تو پیارا مدینہ

آج مکہ مکرمہ میں ، 26 اپریل ، اور 26 رمضان المبارک کی رات ہے ، اور چھبیس رمضان آپ کی تاریخِ ولادت بھی ہے ۔
حرم مکہ کی بابرکت فضاؤں اور ان بابرکت ساعتوں میں آپ کے لیے رب کعبہ کے حضور ڈھیروں دعائیں ہیں اور آپ کی بارگاہ میں عرض ہے کہ شیخ ! عشق کے کسی دائمی سبق کا یہ طالب ، بھی طالب ہے ؛ بنامِ " حضرتِ عشق " اس کی طلب پوری فرمادیں !!

پِیر و مُرشد! اگرچہ مجھ کو نہیں
ذوقِ آرائشِ سر و دستار

نہ کہوں آپ سے تو کس سے کہوں
مُدعائے ضروری الاظہار

ختم کرتا ہُوں اب دُعا پہ کلام
شاعری سے نہیں مجھے سروکار

تُم سلامت رہو ہزار برس
ہر برس کے ہوں ، دن پچاس ہزار !

خاک راہِ حجاز
✍️ لقمان شاہد
26-4-2022 ء

https://m.facebook.com/story.php?story_fbid=pfbid02VTzjFJ1fMFbZ8Euv6x8S3wHWERbgqeJHG6P8XnGmVtRum42iTXvFxUwAbYLWV7Qdl&id=100008105947430

سفرنامہ لقمان سے 🚝

آج مکہ مکرمہ سے مدینہ طیبہ کی طرف روانگی ہے ۔
سیدعالم ﷺ جب سفر سے مدینہ پاک کی طرف لوٹتے تو " دَابَّۃًحَرَّکَھَا مِنْ حُبِّھَا " مدینہ پاک سے محبت کی وجہ سے سواری کو تیز کردیا کرتے تھے ۔ ( بخاری شریف ، ر 1802 )
ہم‌ مکہ سے مدینہ اگر پیدل جائیں تو تقریباً تین چار دن لگتے ہیں ، اور گاڑی پر تین چار گھنٹے ۔
اب ایک حرمین ٹرین چلی ہے جو تقریباً دوگھنٹے میں مکہ مکرمہ سے ، مدینہ طیبہ پہنچا دیتی ہے ؛ اور اِس وقت تک مدینہ منورہ جانے والی یہی سب سے تیز رفتار‌سواری ہے ۔

میں نے تیزی سے مدینہ پاک پہنچنے کے لیے اِس کی ٹکٹ لی ہے ، اور عازم مدینہ ہونے لگا ہوں ؛ ان شاءاللہ جلدی درِ حبیب تک پہنچ جاؤں گا ؎

مجھ سے ناشاد کو پہنچا دے دَرِ احمد تک
میرے خالق ، میرے بچھڑوں کے ملانے والے ! 😥

دورانِ سفر " مصارع العشاق " کتاب زیرِ مطالعہ رہے گی جو کہ اپنے زمانے کے فقیہ ، محدث ، لغوی اور قاری ابو محمد جعفر بن احمد السراج بغدادی م 500 ھ کی ہے ، اور رات کو ہی بازارِ مکہ سے خریدی ہے ۔

بعض لوگ تو اس کتاب کو خطرناک کہتے ہیں ، لیکن میری نظر میں یہ مکتبِ عشق کی ایک نصابی کتاب ہے ۔

سالک جب اِسے پڑھے گا تو اُسے راہِ عشق پر چلنے کا شعور آجائے گا ۔۔۔۔۔۔۔ اور اُس کا عشقِ الہی اور عشقِ رسول محض دعووں کی‌حد تک نہیں رہے گا ۔

اے عشق تِرے صَدقے ، جلنے سے چُھٹے سَستے
جو آگ بجھا دے گی ، وہ آگ لگائی ہے

خاکِ راہِ حجاز
✍️ لقمان شاہد
28-4-2022 ء

https://m.facebook.com/story.php?story_fbid=pfbid02CrDWZWqUeWtip5cZtVdwki1ujz2NFiC8aBVLHanK3cPvdTWReeCgj8bYGVLjwVutl&id=100008105947430

مسجد میں آنے والا ہر شخص امن میں ہوتا ہے چاہے وہ پرلے درجے کاگناہ گار ہی کیوں نہ ہو ؛ یہاں کسی کوعار دلانا ، گالی دینا ، یاکسی سے جھگڑا کرنا جائز نہیں ۔

سیدعالم ﷺ کافرمان ہے:

خُصُومَاتكُمْ ، ‌‌‌‌‌‏ورَفعَ أَصوَاتكُمْ ، ‌‌‌‌‌‏وَإِقَامَة حدُودكُمْ
مسجدوں کو جھگڑوں ، اونچی آوازوں اور حدود قائم کرنے سے محفوظ رکھو ۔

( سنن ابن ماجہ ، ر750 )

یہ تو ہر اس مسجد کے متعلق ہے جو رسول اللہ ﷺ کے نام پر بنی ۔
رہی وہ مسجد جو رسول اللہ ﷺ نے خود بنائی ، اور قیامت تک جس کے پہلو میں تشریف فرمارہیں گے ۔۔۔۔۔۔۔۔ یہاں تو اونچا سانس لینے میں بھی احتیاط چاہیے !!

اللہ کریم دانستہ و نادانستہ غلطیاں معاف فرمائے ، اورسچی توبہ کی توفیق بخشے !

https://m.facebook.com/story.php?story_fbid=pfbid0ZTjubLpUwVktr6oqKDvoWAvrhNVMnsuMjoVqne8CGLiwb1erNvpABRwmchto6GTnl&id=100008105947430

قاری ابوالعباس احمد بن نفیس رحمہ اللہ کہتے ہیں:

میں حجاز مقدس سے مغرب کی طرف جارہا تھا تو مصر میں مجھےسیدعالم ﷺ کی زیارت نصیب ہوئی اور آپ فرمانےلگے:

ابوالعباس ! تو نے مجھے بے چین کردیا ہے ۔ ( کہ میرا شہر چھوڑ کر چلاگیا ہے )

اور حضور کا یہ فرمانا اس لیے تھا کہ میں مدینہ پاک میں قبرِ انور کےپاس کثرت سے تلاوت کرتاتھا ۔

آپ رحمہ‌اللہ کے شاگرد نے پوچھا:

استاد صاحب ! آپ نے قبرِ انور کے پاس کتنے قرآن پاک ختم کیے؟

تو فرمانےلگے: ایک ہزار قرآن پڑھے ۔

( مصباح الظلام فی المستغیثین بخیر الانام‌ علیہ الصلاۃ والسلام فی الیقظۃ والمنام ، ص104 ، دارالکتب العلمیۃ بیروت )

اللہ‌اللہ ایک‌وہ لوگ تھے جو بارگاہِ اقدس میں حاضر ہوکر ہزار ہزار قرآن پاک پڑھ دیتے تھے اور ایک ہم غافل ہیں ۔ 😥

اللہ و رسول کو قرآن پاک پڑھنے والے بہت پسند ہیں ۔
قرآن پڑھنے والوں سے رسول اللہ ﷺ بہت محبت فرماتے ہیں اور اللہ پاک‌ بھی انھیں بے مانگے عطافرماتا ہے ۔

رب تعالی ہمیشہ خلوص نیت ، محبت اور شوق سے قرآن پڑھتے رہنے کی توفیق بخشے ، اور اس کے طفیل ہمیں بھی رخ زیبا کی دید نصیب فرمائے !

✍️ لقمان شاہد
29-4-2022 ء

https://m.facebook.com/story.php?story_fbid=pfbid01UG5k1sZwZxQfFDoNAhQp1Rn2RHN53HvSSGWuWcBhSpdnZiEBf2NUzRpYuWFN3hdl&id=100008105947430

مغرب سے پہلے حرمِ نبوی میں حاضر تھا ، میرے ساتھ بیٹھے دو عراقی مجھ سے بار بار دلائل الخیرات شریف کا تقاضا کرنے لگے ، لیکن میرے پاس موجود نہیں تھی میں نے انھیں کہا:
ابھی تو نہیں ہے ، انشاءاللہ جب عراق آیا تو آپ کے لیے لیتا آؤں گا ۔
اُن کی حسرت اور تقاضا دیکھ کر میرے دل میں خیال بھی آرہا تھا کہ کاش میرے پاس ابھی ہوتی تو انھیں تحفہ دے دیتا ۔

مغرب کے بعد میں حرم شریف سے نکلا ہوں تو ایک اللہ کے بندے سے ملاقات ہوئی ہے ، انھوں نے میرے تقاضہ کیے بغیر ہی مجھے دلائل الخیرات دی ہے اور کہا ہے:
ابھی میرے پاس آپ کے لیے یہی تحفہ ہے ، اسے قبول کریں ۔

حضور کی بارگاہ کے کیا کہنے ، یہاں سوال سے پہلے ۔۔۔۔۔۔ خیال پر بھی عطاہوجاتاہے ؎

منگتا کا ہاتھ اُٹھتے ہی داتا کی دَین تھی
دُوری قبول و عرض میں بس ہاتھ بھر کی ہے

خاکِ راہِ حجاز
✍️ لقمان شاہد
30-4-2022 ء

https://m.facebook.com/story.php?story_fbid=pfbid0yphcKTacBid5EPfQguYTDHLP6W7aFjURyBKEjZEzV5mn8uDGRaYofgMjLpL6cPGZl&id=100008105947430

سیدنا امام جعفر صادق رضی اللہ تعالی عنہ بڑے ہنس مکھ تھے ، مسکراتے رہتے تھے ۔۔۔۔۔۔ لیکن جب ان کے سامنے رسول اللہ ﷺ کا ذکر پاک کیا جاتا تو ( ہیبت و محبت رسول کی وجہ سے ) آپ کا رنگ زرد ہوجاتا ؛ اور ( ادب کا یہ عالم تھا کہ ) بغیر وضو حضور کا ذکر پاک نہیں کیا کرتے تھے ۔ 😥

( انظر: مصباح الظلام فی المستغیثین بخیر الانام‌ علیہ الصلاۃ والسلام فی الیقظۃ والمنام ، ص 236 ، دارالکتب العلمیۃ بیروت )

اللہ پاک ہمیں بھی ایسا کردے !!

✍️ لقمان شاہد
1-5-2022 ء

https://m.facebook.com/story.php?story_fbid=pfbid0AwUhsESAiJ7ESfbozZKwaV4EsMnSvo6tuQxXufXjEv4amEYrRmSDyvXbhwgoUxWel&id=100008105947430

صبح میری زندگی کی پہلی عید ہوگی جسے میں عید کہ سکوں گا ، حضرت امیر خسرو نے کہا تھا ؎

عید گاہِ ما غریباں کوئے تو
انبساط عید دیدن روئے تو

صد ہزاراں عید قربانت کنم
اے ہلالِ ما خمِ ابروئے تو

( مفہوم: میرے محبوب ! میری عیدگاہ تیرا کوچہ ہے ، اور میری عید کی خوشیاں تیری زیارت میں ہیں ۔
اے میرے چاند مانا کہ عید کی رات کا چاند خم دار ہوتا ہے اور اس کا خم بڑا حسین ہوتا ہے ، لیکن اس کے خم کا تیرے خمِ ابرو سے کیا مقابلہ ۔۔۔۔۔۔۔ میں سو ہزار عیدیں تیرے اَبرو کے خم پر قربان نہ کر دوں ! )

https://m.facebook.com/story.php?story_fbid=pfbid02XicR5gg7gHkugh6FgNLdFEK3CdKJHTdVDAihUPgmbAUT7rxGTxPZ1fYdudBTtNaJl&id=100008105947430