کیسے منائیں عید ،،،
ملت کی حالت زار پر یہ اشعار نہیں آنسو ہیں جو بے ساختہ نکل پڑے، اللہ تعالی امت مسلمہ پر رحم فرمائے

https://m.facebook.com/story.php?story_fbid=862829231629536&id=100037074020905

حالت ہماری زار ہے ، کیسے منائیں عید
دل پر غموں کا بار ہے کیسے منائیں عید

ساری مسرتوں کی ہے بنیاد ، اتحاد
ملت میں انتشار ہے کیسے منائیں عید

اسلام کو مٹانے کی جاری ہیں سازشیں
ظالم کا اقتدار ہے کیسے منائیں عید

بڑھتی ہی جارہی ہیں مسلماں پہ سختیاں
چاروں طرف سے وار ہے کیسے منائیں عید

ہیں اہل حق پہ سازش وظلم وستم کے تیر
جاری لہو کی دھار ہے کیسے منائیں عید

پردہ عِناد کا ہے عدالت کی آنکھ پر
مومن ہیں ، تختِ دار ہے کیسے منائیں عید

الحاد نے بچھادییے ہر سمت اپنے جال
اور نوجواں شکار ہے کیسے منائیں عید

تہذیبِ نو سے دخترِ ملت ہے بے ردا
بے شرمی کا غبار ہے کیسے منائیں عید

اپنے عراق و شام و فلسطیں لہو ہوئے
ملک یمن نَزار ہے کیسے منائیں عید

قبضہ ہے آج قبلۂ اول پہ غیر کا
امت یہ دلفگار ہے کیسے منائیں عید

جو پاسباں حرم کے ہیں غدار دیں ہیں وہ
سب پر یہ آشکار ہے کیسے منائیں عید

عیسائ اور یہودی ہیں قابض حجاز پر
دشمن ہی رازدار ہے ، کیسے منائیں عید

اپنوں کی ہی کمی ہےتو غیروں کو کیا کہیں
دامن ہی تار تار ہے کیسے منائیں عید

یارب تو بھیج کشتئ ملت کا ناخدا
بھاری یہ انتظار ہے ، کیسے منائیں عید

اَسلاف جس کو لائے خزاں سے گزار کر
پَژمُردہ وہ بَہار ہے، کیسے منائیں عید

ملتی تھیں کَل جہاں پہ فریدی ! مسرتیں
اب ظلم کا دیار ہے کیسے منائیں عید

نَزار ... کمزور... ناتواں

ازفریدی صدیقی مصباحی بارہ بنکوی ، مسقط عمان 0096899633908

*پیامِ عید*
جملہ احباب کو عید کی مبارکبادیاں، نیک تمنائیں اور دعائیں ، جو غمگین ہیں انکی زندگی میں مسرتیں لوٹ آئیں ... آمین ثم آمین

https://m.facebook.com/story.php?story_fbid=862707478308378&id=100037074020905

اپنے کردار میں اخلاص کی خوشبو رکھیے
کھول کر سب کیلیے حلقۂ بازو رکھیے

عیدکےساز میں شامل ہو غریبوں کا بھی سوز
اپنی پُرنور حویلی میں بھی جگنو رکھیے

نہیں معلوم کہ مقبول ہوئے یا مردود
جشن میں خوفِ الٰہی کےبھی آنسو رکھیے

عید ، انعامِ الٰہی کا حسیں جلوہ ہے
اِس مسرت میں عبادت کا بھی پہلو رکھیے

یہ رَوِش ، قوم کا ہر درد مٹا سکتی ہے
کام ہر ایک کے آنے کی سدا "خُو" رکھیے

عید میں فرطِ مسرت سے نہ بہکیں جذبات
خواہش و فکر و خیالات پہ قابو رکھیے

رب کے دربار سے خیراتِ کرم پانے کو
دستِ حاجت میں سدا کاسۂ " تُوبُوا " رکھیے

راحت و غم میں تَوازُن ہے کمالِ ہستی
اِسی معیار پہ اپنے قد و گیسو رکھیے

سیکھ لیں کوئ زباں، کوئ بھی فن آپ مگر
طفلِ جاں کے لیے گہوارۂ اردو رکھیے

اے فریدی کبھی بدلے نہ مزاج و انداز
خندہ دل ، اورکشادہ یونہی ابرُو رکھیے
🌹🌹🌹
از فریدی صدیقی مصباحی بارہ بنکوی ، نوری مسجد مدینۃ العرفان، مسقط عمان
0096899633908

مومن کی عید
ایک سچے مومن کی عید کیسی ہونی چاہیے، موجودہ حالات کو مد نظر رکھتے ہوئے ایک اہم پیغام قوم کے نام

https://m.facebook.com/story.php?story_fbid=862324431680016&id=100037074020905

غریبوں کی نصرت مری عید ہے
یتیموں پہ شفقت مری عید ہے
مرا کام ہے راحتیں بانٹنا
خلائق سے الفت مری عید ہے
نبی نے عطا کی یہ طرز حیات
معافی ، مُرَوَّت مری عید ہے
اندھیرے دلوں میں اجالا کروں
یہ کوشش یہ محنت مری عید ہے
پڑوسی سے رہتاہوں میں باخبر
کہ ان کی مَسرت مری عید ہے
نئے کپڑے کوئ ضروری نہیں
خطا سے طہارت مری عید ہے
کروں غم کے ماروں کی چارہ گری
کہ تقسیمِ راحت مری عید ہے
رضاۓ الٰہی کی ہردم تلاش
عبادت ، ریاضت مری عید ہے
نہیں صرف رمضان تک میری حد
ہمیشہ اطاعت ، مری عید ہے
رہے مومنوں میں سدا اتحاد
پیامِ اُخوَّت ، مری عید ہے
سبھی اہلسنت کا میں خیر خواہ
سبھی کی اعانت مری عید ہے
ستم اہلِ باطل کریں مجھ پہ لاکھ
سدا استقامت ، مری عید ہے
بلالی ہوں میں اورحسینی ہوں میں
شجاعت ، شہادت مری عید ہے
شب و روز ہے فکرِ ملت مجھے
کہ دیں کی اشاعت مری عید ہے
چلو آو ! مل کر عبادت کریں
کہ نیکی کی دعوت مری عید ہے
سبھی متحد ہوں تو بن جاے کام
یہ رَبطِ جماعت مری عید ہے
نبی کی وفا میں گزرتے ہیں دن
کہ تعمیلِ سنت مری عید ہے
اگر رد ہوۓ ہیں تو مجھ کو وعید
عمل کی اجابت مری عید ہے
نہ ہو کوئ احساس ، تو میں ہلاک
خطا پر ندامت ، مری عید ہے
میں بچتاہوں جھوٹےسےاور جھوٹ سے
فروغِ صداقت مری عید ہے
بَتانے سے پہلے عمل بھی تو کر
کہ خود کو نصیحت مری عید ہے
فریدی خلوصِ جگر یونہی رکھ
یہ رنگِ طبیعت مری عید ہے،،

از فریدی صدیقی مصباحی مسقط عمان 0096899633908