محدث و فقیہ محمد بن موسی رحمہ اللہ کہتے ہیں:

مجھے ایک نیک شخص نے بتایا کہ:
میں کافروں کے شہروں میں گرفتار تھا ، ( اللہ انھیں ذلیل کرے ) میں جس شہر میں تھا وہاں کے بادشاہ یا اس کے بھائی کا ایک بحری جہاز آیا تو انھوں نے تمام قیدیوں کو اکٹھا کیا ، ( کہ جہاز کو پانی سے نکال کر کنارے تک لے آئیں ) ان قیدیوں کی تعداد تین ہزار سے زیادہ تھی ، لیکن جہازا تنابڑا تھا کہ سارے مل کر بھی اسے سمندر سے نہ کھینچ سکے ۔
آخر ایک شخص بادشاہ کے پاس آیا اور کہنےلگا:
اس جہاز کو صرف مسلمان نکال سکتے ہیں ، لیکن شرط یہ ہے کہ وہ ( جہاز نکالتے وقت ) جو بھی کہیں انھیں روکا نہ جائے ۔

انھوں نے ہمیں جمع کیا اور کہا جو چاہے کہو ( لیکن ہمارا بحری جہاز کنارے لگادو ) ۔
ہم ساڑھے چار سو لوگ تھے ، ہم نے مل کر " یا رسول اللہ ! " کہا اور ایک ہی ہلے میں جہاز کو کھینچ کر خشکی پر لے آئے ، ببرکۃ استغاثنا باالنبی ﷺ یہ ساری برکت سرکار ﷺ سے مدد مانگنے کی تھی ۔

( مصباح الظلام فی المستغیثین بخیر الانام‌ علیہ الصلاۃ والسلام فی الیقظۃ والمنام ، ص114 ، 115 ، دارالکتب العلمیۃ بیروت )

آج بھی اگر کوئی اپنے نبی ﷺ سے مدد مانگتا ہے تو وہ اللہ کی عطا سے اس کی مدد فرماتے ہیں ۔
آپ کے مدد فرمانے کے بےشمار واقعات ہیں جو صحابہ ، تابعین اور ائمہ دین کے علاوہ ہم جیسے گناہ گار آج بھی ملاحظہ کرتے رہتے ہیں ؎

فریاد اُمَّتی جو کرے حالِ زار میں
ممکن نہیں کہ خیرِ بشَر کو خبر نہ ہو 😢

✍️لقمان شاہد
24-3-2022 ء

https://m.facebook.com/story.php?story_fbid=3410696422543856&id=100008105947430

میں قربان اپنے رب کی محبت پر ۔۔۔۔۔۔۔۔ وہ ہمارے متعلق اپنے حبیب پاک سے فرماتاہے:
وَاخْفِضْ جَنَاحَكَ لِلْمُؤْمِنِیْنَ
اور مسلمانوں کو اپنی رحمت کے پروں میں لے لو ۔ ( سورۃ الحجر ، 88 )

اللہ اللہ کیا انداز محبت ہے !

حضور ! ہمیں اپنی رحمت کے پروں میں چھپائے رکھنا ، جیسے پرندہ اپنے بچے کو چھپا کے رکھتا ہے ؛ حضور ! خدا کے لیے ہمیں اپنے سے ایک لمحہ بھی جدا نہ کرنا ۔

https://m.facebook.com/story.php?story_fbid=3411079605838871&id=100008105947430

حرم پاک کے خدمت گزار شُرطوں ( پولیس والوں ) کی ویسے بڑی ہمت ہے ۔۔۔۔۔۔ لوگ تو انھیں تنگ کرنے میں کوئی کسر نہیں چھوڑتے ۔
مطاف میں دوعورتیں بیٹھی تھیں ، شرطہ ان کے پاس آیا اور بار بار کہا کہ نماز کا وقت ہونے والا ہے آپ عورتوں والی طرف چلی جائیں ، لیکن کیا مجال وہ ٹَس سے مَس ہوں ؛ پھر دوسرا ، تیسرا ، چوتھا شرطہ آیا اور انھیں اٹھنے کاکہتارہا لیکن وہ وہیں ڈٹی رہیں ؛ اب شرطے نہ تو عورتوں کو ہاتھ لگا سکتے ہیں ، نہ دھکے مار سکتے ہیں ۔۔‌۔۔۔۔ زیادہ سے زیادہ تالی بجائیں گے یا چیخیں چلائیں گے ۔

یہ طریقہ بہت نامناسب ہے ، حرم پاک کے خادموں کو ایسے تنگ کرنا بڑی جسارت ہے ۔
ہونا تو ایسے چاہیے کہ یہ جب کہیں اٹھ جاؤ ، تو اٹھ جانا چاہیے ۔۔۔۔۔۔۔ راستہ چھوڑنے کا کہیں تو چھوڑ دینا چاہیے ۔۔۔۔۔۔۔ چلنےکا کہیں تو چل پڑنا چاہیے اور رکنے کا اشارہ کریں تو رک جانا چاہیے ؛ یہ سب تدبیریں یہ لوگ ہماری آسانی کے لیے کرتے ہیں ، ہمیں ان کے ساتھ ہر طرح سے تعاون کرنا چاہیے ۔

ہم گناہ گار یہاں اپنے گناہ بخشوانے آتے ہیں ، یہاں کے دربانوں کو تنگ کرنے نہیں آتے ؛ حرمین طیبین کے باسی ہمارے ساتھ اگر ناروا سلوک بھی کریں ، تب بھی ہمارے لائق صبر ہی ہے ۔۔۔۔۔۔۔۔ ان کا گلہ شکوہ بھی ہمیں زیب نہیں دیتا ۔

یہاں کی خاک پاک بھی ہماری آنکھوں کا سرمہ ؎

اپنی آنکھوں کو عقیدت سے لگا کے رکھ لی
تیری دہلیز کی مِٹی تھی ، اُٹھا کے رکھ لی !

خاکِ راہِ حجاز
✍️ لقمان شاہد
25-3-2022 ء

https://m.facebook.com/story.php?story_fbid=3411877245759107&id=100008105947430

حضرت عمر فاروق رضی اللہ تعالی عنہ کے دور میں لوگوں پر قحط پڑھ گیا ۔
ایک آدمی نبی کریم صلی اللہ علیہ وآلہ وسلم کی قبر مبارک پر آیا اور کہا:
یا رسول اللہ ! اللہ عز وجل سے اپنی امت کے لیے بارش طلب کریں ، یہ ہلاک ہو رہی ہے ۔
رسول اللہ صلی اللہ علیہ وآلہ وسلم اُس آدمی کے خواب میں تشریف لائے ، اور فرمایا: عمر کومیرا سلام کہنا ، اور اسے خبر دینا کہ بارش ہوگی ۔

( حج و عمرہ اور عقائد ونظریات ، ص 299 ۔ علامہ قسطلانی رحمہ اللہ کہتے ہیں: اس کی سند صحیح ہے ۔ )

اگر آج بھی کوئی سیدِ عالم ﷺ کی تُربتِ اطہر پر حاضر ہوکر اپنا عریضہ پیش کرتا ہے تو سرکار اُسے جواب عنایت فرماتے ہیں ، اور اُس کی دست گیری بھی کرتے ہیں ؎

گوشِ شہ کہتے ہیں فریاد رَسی کو ہم ہیں
وَعدۂ چشم ہے ، بخشائیں گے گویا ہو کر

ہے یہ امّید رضاؔ کو تِری رحمت سے شہا
نہ ہو زِندانیِ دوزخ ، تِرا بندہ ہو کر !

✍️ لقمان شاہد
25-3-2022 ء

https://m.facebook.com/story.php?story_fbid=3412141642399334&id=100008105947430

ایک واقعہ‌🌹

( یہ ایسا واقعہ ہے جس کے متعلق امام احمد بن حنبل اپنے شاگردوں سے فرمایا کرتے تھے:
اسے بیان کیا کرو ، اسے یاد کرلو یہ بڑا فائدے مند ہے ۔ )

امام احمد بن حنبل رحمہ اللہ کا ایک ہمسایہ بڑا فاسق فاجر تھا ، ایک دن اس نے آپ کی مجلس میں آ کر سلام کیا تو آپ نے اسے صحیح طرح سے جواب نہ دیا اور اس سے بے رخی کا اظہار کیا ۔
وہ کہنے لگا: اے ابوعبداللہ ! مجھ سے کیوں نالاں ہیں ؟
آپ کو میرے ( برے اعمال کے ) متعلق جو کچھ معلوم ہے ، ایک خواب دیکھنے کے بعد میں اُس سے توبہ کر چکا ہوں ۔
امام صاحب نے فرمایا: تُو نے کیا خواب دیکھا ہے؟
کہنے لگا: میں نے خواب میں رسول اللہ ﷺ کی زیارت کی ہے ۔۔۔۔۔ آپ زمین کے ایک بلند حصے پر تشریف فرما تھے اور بہت سارے لوگ نیچے بیٹھے ہوۓ تھے ۔
ان میں سے ہر بندہ اٹھ کر بارگاہِ اقدس میں عرض کرتا:
حضور! میرے لیے دعا فرمادیں ، تو آپ دعا فرمادیتے ۔‌‌‌‌۔۔۔۔۔۔ یہاں تک کہ میرے سوا کوئی باقی نہ رہا ۔
میں نے کھڑے ہونے کا ارادہ کیا لیکن اپنے برے اعمال کی وجہ سے مجھےحیا آگئی ۔ ( کہ‌ کہاں میں ، اور کہاں یہ بارگاہ ! 😢 )
سرکارنے مجھے فرمایا: اے فلاں ! تو اٹھ کر مجھ سے کیوں سوال نہیں کرتا ، کہ میں تیرے لیے بھی دعاکروں ؟

۔ میں نے عرض کی : یا رسول اللہ ! میرے عمل بہت برے ہیں جن کی وجہ سے مجھے حیا آرہی ہے ۔

ارشاد فرمایا: اگر ( گناہوں کی ) حیا تجھے کھڑا ہونے سے روک رہی ہے تو میں تجھے کہتا ہوں کھڑا ہو جا اور سوال کر ، تاکہ میں تجھے دعا دوں ۔۔۔۔۔۔۔۔۔
" فانک لاتسب احدا من اصحابی "
کیوں کہ تُو میرے کسی بھی صحابی کو برا نہیں کہتا ۔
میں ( حضور کی اس شفقت سے ) اٹھ کھڑا ہوا تو آپ نے میرے لیے دعا فرمادی ۔
جب میں بیدار ہوا تو مجھے سب برائیوں سے نفرت ہو چکی تھی ۔

( طبقات الحنابلۃ للقاضی ابی یعلی ، ت جعفر بن محمد بن شاکر ، ج 1 ، ص 338 ، ر151 )

( آج مسجدالحرام شریف میں بیٹھ کر یہ واقعہ پڑھا تو بے ساختہ آنسو نکل آئے ۔
ترجمہ کرکے آپ کے سامنے پیش کردیا ہے ، آپ بھی اسے یاد کرلیں ۔۔۔۔۔۔ ہم جیسے بھی ہیں لیکن بے ادب نہیں ؛ رب تعالی ہمیں اپنے حبیب پاک کی برکتوں سے کبھی محروم نہیں فرمائے گا ۔ 😢)

خاکِ راہِ حجاز
✍️ لقمان شاہد
25-3-2022ء

https://m.facebook.com/story.php?story_fbid=3412278865718945&id=100008105947430

حافظ ابن بی الدنیا رحمہ اللہ نے ایک کتاب لکھی ہے جس میں اُن لوگوں کے واقعات جمع کیے ہیں جن کی دعائیں قبول ہوئیں ، مشکلیں حل ہوئیں ، اور مرادیں بر آئیں ۔
یہ کتاب پڑھنے کے لائق ہے ۔۔۔۔۔ اسے پڑھ کر یقین مزید مضبوط ہوجاتا ہے ؛ اور جب یقین مضبوط ہوتا ہے تو دعائیں شرف قبولیت بھی پالیتی ہیں ۔

( اگرکوئی فاضل دوست اس کتاب کا اردو ترجمہ کردیں تو بہت سارے اہل اردو کا بھلا ہوجائے گا ۔ )

اس کتاب میں اپنے زمانے کے طبیب حضرت عَبدُ المَلِک بن اَبْجَر تابعی رحمہ اللہ کا ایک واقعہ لکھا ہے کہ:

آپ کے پاس ( علاج کے لیے ) ایک شخص آیا تو آپ نے اس کا پیٹ چیک کرکے کہا: تمھیں ایک لا علاج مرض ہے ۔
اس نے پوچھا : وہ کیا ؟

کہنے لگے: دُبَیْلَہ ( یعنی تیرے پیٹ میں ایک خاص قسم کا پھوڑا ) ہے ۔
وہ شخص ( یہ سن کر ) واپس آیا اور ( اپنے رب کے حضور فریاد کرتے ہوئے ) کہنے لگا:

اللہ ، اللہ ، اللہ ، میرا رب ہے ؛ میں اس کا کسی کو شریک نہیں ٹھہراتا ۔
اے اللہ! میں تیری طرف تیرے نبی محمد پاک علیہ الصلاۃ والسلام کے وسیلے سے متوجہ ہوتا ہوں ، جو رحمت والے نبی ہیں ۔
یامحمد ! میں آپ کے وسیلے سے آپ کے اور اپنے رب کی طرف متوجہ ہوتا ہوں ، وہ ﷻ میری بیماری میں مجھ پر رحم فرمائے ۔۔۔۔۔ مجھے ایسی رحمت کی ضرورت ہے جو مجھے اس کی رحمت کے علاوہ ہر رحمت سے مستغنی کردے !

تین دفعہ یہ دعا مانگ کر وہ شخص دوبارہ حکیم عبدالملک رحمہ اللہ کے پاس جب گیا تو آپ نے اس کا پیٹ دبا کر کہا: تم ٹھیک ہوچکے ہو ، اب تمھیں کوئی مرض نہیں رہا ۔

( مجابوالدعوۃ ، دعاء من مرض فی بطنہ ، ص 136 ، مکتبۃ القران القاھرۃ )

صدق یقین سے اپنے نبی کا وسیلہ پیش کرنے والا بارگاہِ الہی سے کبھی خالی نہیں لوٹایا جاتا ۔

خاکِ راہِ حجاز
✍️ لقمان شاہد
27-3-2022 ء

https://m.facebook.com/story.php?story_fbid=3413466708933494&id=100008105947430

میری‌ تمنا تھی کہ رسول اللہ ﷺ کے شہرِ مدینہ کا طالب علم بن جاؤں ۔۔۔۔۔۔۔۔۔ اللہ کریم نے کرم نوازی فرمائی اور مدینہ طیبہ میں مقیم قاہرہ ( مصر ) کے ایک استاد میسر آگئے ؛ جو فن قرات کے بہترین عالم‌ ہیں ۔
الحمدللہ اُن سے کتاب اللہ شریف ( بروایۃ حفص عن عاصم من طریق طیبۃ النشر ، بروایۃ قالون عن نافع من طریق الشاطبیہ ) پڑھنے کی ابتدا کی ؛ آج سورت بقرہ شریف ختم ہوگئی ہے ، اللہ تعالی سارا قرآن پاک اخلاص سے سنانے کی توفیق بخشے !
اللہ کرے اس کے بعد طیبۃ النشر اور حرز الامانی پڑھنے اور یاد کرنے کی بھی توفیق مل جائے ۔
( علم قرات میں حرز الامانی کو وہی حیثیت حاصل ہے جو علم‌حدیث میں بخاری شریف کو ہے )

دعا فرمائیں رب تعالی مرتے دم تک شہرِ نبی کا طالبِ علم رکھے ، اس مقدس شہر میں سکونت عطافرمائے اور اسی شہر مبارک میں زندگی کی انتہا ہوجائے ؎

رہیں اُن کے جلوے ، بسیں اُن کے جلوے
مِرا دل بنے یادگارِ مدینہ

مِری خاک یارب نہ برباد جائے
پسِ مرگ کردے غبارِ مدینہ 😢

خاکِ راہ حجاز

✍️ لقمان شاہد
28-3-2022ء

https://m.facebook.com/story.php?story_fbid=3414664882147010&id=100008105947430

ایک ( یمنی ) شخص نے سیدنا عبداللہ بن عمر رضی اللہ عنھما سے حجرِ اسود کے استلام کے متعلق پوچھا ، تو آپ نے فرمایا:

میں نے رسول اللہ ﷺ کو اس کا استلام کرتے اور بوسہ لیتے دیکھا ہے۔
وہ کہنے لگا:
اگر میں لوگوں کے ہجوم میں پھنس جاؤں اور استلام سے عاجز آجاؤں تو کیا کروں؟
آپ رضی اللہ عنہ نے فرمایا:

اِس اگر مگر کو جاکر یمن میں رکھو ، میں نے تو رسول اللہ صلی اللہ علیہ وسلم کو حجراسود کا استلام کرتے اور اسے چومتے ہی دیکھا ہے ۔
( صحیح البخاری ، ر 1611)

اللہ اللہ ، جب محبت کی بات آجائے تو کوئی اگر مگر نہیں چلتا ۔۔۔۔۔۔۔۔۔ بس وہی ہوتاہے جو محبوب کی رضا ہو ؎

مکتبِ عشق میں وامقؔ نے یہ پائی تعلیم​
عینِ ایمان ہے فدائے رُخِ جاناں ہونا ​!

✍️ لقمان شاہد
30-3-2022 ء

https://m.facebook.com/story.php?story_fbid=3415932338686931&id=100008105947430

سیدِعالم ﷺ کی خواب میں زیارت کرنا بہت بڑا شرف ہے ۔۔۔۔۔۔ زندگی بھر کی نیکیاں اس ایک نیکی کا مقابلہ نہیں کرسکتیں ۔

اس سعادت کا فقط نیکوں کے حصے میں آنا ضروری نہیں ، بعض گناہ گار بھی نواز دیے جاتے ہیں ۔۔۔۔۔۔ البتہ اتنا ضرور ہے کہ زیارت کا سبب اُن کے کرم کے ساتھ ، نیکیاں بھی بنتی ہیں ۔

اِس لیے طالبِ دیدار کو گناہوں سے بچنا چاہیے اور کثرت سے نیکیاں کرتےرہناچاہیے ۔

بالخصوص: اپنا دل مسلمانوں کے بغض سےپاک رکھنا چاہیے ، کسی مسلمان کی ( چاہے وہ فاسق و فاجر ہی کیوں نہ ہو ) غیبت نہیں کرنی چاہیے ، چغلی نہیں کھانی چاہیے ، کسی مسلمان کو نقصان نہیں پہنچانا چاہیے ، نہ کسی کا برا سوچنا چاہیے ۔

رسول اللہ ﷺ کو اپنی امت بہت پیاری ہے ، اتنے بچے ماں کو پیارے نہیں ہوتے جتنے حضور کو اپنے امتی پیارے ہیں ؛ آپ کی امت سے ، آپ کی خاطر جتنی محبت کریں گے اتنا ہی آپ ﷺ کا قُرب نصیب ہوگا ۔

جسے حق کے دِیدار کی آرزو ہو
وہ دیکھے مِری جان ! چہرہ تمھارا

خدا ہم کو بخشے وہ چشمِ خدا بِیں
رہے کچھ نہ پردہ ہمارا تمھارا 😢

خاکِ راہِ حجاز
✍️ لقمان شاہد
31-3-2022 ء

https://m.facebook.com/story.php?story_fbid=3416567275290104&id=100008105947430