آج شہرِمدینہ کے ایک رہائشی کو ساتھ لیا اور صحرائے طیبہ کی زیارت کے لیے نکلے ؎

رنگِ چمن پسند ، نہ پھولوں کی بُو پسند
صحرائے طیبہ ! ہے دلِ بلبل کو تُو پسند

ہم نے اس راستے کا انتخاب کیا جہاں سے رسول اللہ ﷺ گزرا کرتے تھے ، اور مولا علی پاک بھی اسی راستے یَنْبُع جایا کرتے تھے ۔

کاش ہم اس راستے کی خاک ہوتے اور قدمین شریفین کے بوسے کا شرف پاتے رہتے ۔۔۔۔۔۔ 😢

دیگر زیارات کے علاوہ ۔۔۔۔۔۔۔۔ سیدِ عالم ﷺ کی گزر گاہ میں آنے والے مبارک کنویں دیکھے ، ستر انبیاے کرام علیھم السلام کی گزر گاہ دیکھی ، جنتی پہاڑ جبل وَرِقان دیکھا ، قبیلۂ سیدنا ابوذر غفاری کے آثار دیکھے ؛ مقام بدرحاضری دی ، جبال الملائکہ دیکھے ، اور شہدائے بدر رضوان اللہ علیھم اجمعین کوسلام پیش کیا ۔
بدر شریف میں یہ دیکھ کر خوشی ہوئی کہ یہاں قبرستان پر جو لال رومال والے مسلط رہتے تھے اور زائرین کو بے جا تنگ کیا کرتے تھے ، وہ اب نہیں ، نہ ان کا دفتر موجود ہے ؛ زائرین پوری عقیدت و محبت سے آتے ہیں اور بغیر روک ٹوک سلام و دعا کرتے ہیں ۔
یہی حال اب الحمدللہ روضہ اقدس پر ہے ، آپ بغیر روک ٹوک سلام پیش کرسکتے ہیں ، اور لوگوں کے راستے کا خیال رکھتے ہوئے کعبۂ کعبہ ﷺ کی طرف چاہیں تو گھنٹوں رُخ کرکے بیٹھ سکتے ہیں ، کوئی لال رومال والا آپ کو اِدھر پشت کرنے پر مجبور نہیں کرسکتا ۔

یہاں ہر جگہ میں نے ایک دعا کی ہے ، دعا فرمائیں اللہ کریم اسے شرف قبولیت عطا فرمائے !

✍️ لقمان شاہد
19-3-2022 ء

https://m.facebook.com/story.php?story_fbid=3407204642893034&id=100008105947430

شہرِ مدینہ میں آپ کو کسی کا نام نہ آتا ہو تو اُسے محمد کہہ کر مخاطب کرسکتے ہیں ، اور مدینے والے بھی ہر اجنبی کو محمد کہہ کر ہی پکارتے ہیں ۔۔۔۔۔۔۔۔

شاید یہاں قیامت تک آنے والے "محمد " کہہ کر ہی پکارے جاتے رہیں گے ........ کیوں آقا محمد کریم ﷺ نے جو اس شہر کو شرف بخشاہے !!

https://m.facebook.com/story.php?story_fbid=3408613996085432&id=100008105947430

آج خواب میں عظیم مفسر و محدث علامہ غلام رسول سعیدی رحمہ اللہ کی زیارت ہوئی ، آپ علما کے جھرمٹ میں مسجد شریف میں داخل ہورہے تھے ۔
سبحان اللہ ، ایسا نورانی چہرہ تھا کہ زیارت کر کے دل خوش ہوگیا ۔

حیاتِ ظاہری میں تو آپ کی زیارت و ملاقات سے محرومی رہی ، لیکن مدینۃ النبی میں یوں آپ سے ملاقات ہوجانا میرے لیے باعث سعادت ہے ۔۔۔۔۔۔۔ اللہ کریم ﷻ آپ کے طفیل انشراح صدر عطافرمائے !

( ہر سچا خواب سب کے سامنے بیان کرنے والا نہیں ہوتا ۔۔۔۔۔ لیکن بعض خوش کُن خواب بیان کردینے چاہییں ، ان کا بیان کرنا بھی خوشی سے خالی نہیں ہوتا ؛ صحابہ کرام علیھم الرضوان بھی اپنے بعض خواب بیان فرمایا کرتے تھے ۔ )

خاک راہِ حجاز
✍️ لقمان شاہد
21-3-2022ء

https://m.facebook.com/story.php?story_fbid=3408732512740247&id=100008105947430

بندے کو اپنے رب کے قریب کرنے والا بہترین عمل ۔۔۔۔۔۔۔ محبت ہے ؛ ایسی محبت جو کسی کے ساتھ رب تعالیٰ کے لیے کی جائے ۔

اس محبت کا اللہ کے ہاں کیا مقام ہے ، اور کیا اجر ہے ۔۔۔۔۔۔۔۔۔ یہ جاننے کے لیے محدث ابن قدامہ رحمہ اللہ کا یہ رسالہ پڑھیں ۔

رب تعالیٰ حضرت مصنف اور مترجم دونوں کو جزائے خیر عطافرمائے !

https://m.facebook.com/story.php?story_fbid=3409472822666216&id=100008105947430

رب تعالیٰ توفیق دے ، آپ مکہ مکرمہ حاضر ہوں تو یہاں کثرت سے طواف کریں ، کیوں کہ یہ وہ نیکی ہے جو صرف یہیں ہوسکتی ہے ، روئے زمین پر کسی اور جگہ نہیں ہوسکتی ۔

ہوسکے تو پچاس طواف کریں ، سید عالمﷺ فرماتےتھے:
جس نے بیت اللہ شریف کے پچاس طواف کیے وہ گناہوں سے اس طرح نکل گیا جیسے اس کی والدہ نے اسے جنم دیا تھا ( تو وہ گناہوں سے بالکل پاک تھا ) ( ترمذی ، ر866 )

نفلی طواف کے لیے احرام باندھنا ضروری نہیں ہوتا ، عام کپڑوں میں بھی طواف کیا جاسکتا ہے ، اور اگر احرام باندھ کر کرنا چاہیں تب بھی کرسکتے ہیں ( کیوں کہ آج کل کپڑوں میں نیچے مطاف کی طرف نہیں جانے دیتے ، صرف احرام والوں کو جانے دیتے ہیں ) لیکن اس میں طواف کرتے وقت کندھا ننگا نہیں کرنا ہوتا ، کیوں کہ‌کندھا اس طواف میں ننگا کرتے ہیں جس کے بعد صفا مروہ کی سعی کرنی ہو ، اور نفلی طواف میں سعی نہیں کرنی ہوتی ۔

اس کا مسنون طریقہ یہ ہے کہ:

آپ باوضو بیت اللہ شریف کے پاس آئیں ، اور حجر اسود کے سامنے کھڑے ہوکر استلام کریں ( یعنی حجر اسود کو چوم لیں ، یا اس کی طرف ہاتھ کا اشارہ کریں ) اور بِسْمِ اللہِ وَاللہُ اَکبر پڑھیں ۔
متبع سنت صحابی ، سیدنا عبداللہ بن عمر استلام کے وقت یہی پڑھا کرتے تھے ۔ ( مسند احمد ، ر 4316 )
اس کے بعدطواف شروع کردیں ، اور معمول کی رفتار سے بیت اللہ شریف کے گرد چلنا شروع کردیں ، اور جو بھی ذکر و درود چاہیں پڑھتے رہیں ؛ رسول اللہ ﷺ نے طواف کے دوران ہمیں مخصوص اذکار اور دعائیں پڑھنے کا پابند نہیں کیا ۔
طواف کرتے کرتے جب رکن یمانی ( یعنی کعبۃ اللہ شریف کے حجر اسود سے پہلے والے کونے ) کے پاس آئیں تو اس کا بھی استلام کریں ، جان عالم ﷺ اس کا بھی استلام کیا کرتے تھے ، اور فرماتے تھے:
حجر اسود اور رکن یمانی کا استلام کرنے سے گناہ معاف ہوتے ہیں ۔ ( مسنداحمد ، ر 4339 )

سیدنا عبداللہ بن عمر کہتے تھے:
ہم نے جب سے حضور کو حجر اسود اور رکن یمانی کا استلام کرتے دیکھا ہے ، تب سے تنگی ہو یا آسانی ۔۔۔۔۔۔۔ اِن کا استلام نہیں چھوڑا ۔ ( مشکوۃ ، ر2586 )

رکن یمانی کے استلام کے بعد پھر حجرِ اسود شریف کا استلام کریں اور اسی طرح سات چکر مکمل کریں ؛ یہ ایک طواف ہوجائے گا ۔
اس کے بعد مقام ابراہیم کے قریب دو نفل پڑھیں ، اور ان کی پہلی رکعت میں سورت کافرون اور دوسری میں سورت اخلاص پڑھیں ؛ سرکار دوعالم ﷺ نے طواف کے نوافل میں یہی دو سورتیں پڑھی تھیں ۔ ( مسند احمد ،ر4387 )

پھر اتباعِ سنت میں یہ آیت پڑھیں:

وَاتَّخِذُوْا مِنْ مَّقَامِ إِبْرَاھِیْمَ مُصَلًّی

سیدنا جابر بن عبداللہ کہتے ہیں ، رسول اللہ ﷺ نے طواف کے دونفل پڑھے تھے اور ان کے بعد یہ آیت پڑھی تھی ۔ ( ایضاً )

اگر آپ کا مکہ پاک میں ایک ہفتہ قیام ہے تو روزانہ طواف کریں ۔
معروف تابعی امام حسن بصری رحمہ‌اللہ نے حدیث نقل کی ہے کہ:

جو بندہ ایک ہفتہ بیت اللہ شریف کا طواف کرتا ہے اللہ تعالی اس کے ہر قدم پر سترہزار درجات بلند فرماتا ہے ، اور اسے ستر ہزار نیکیاں عطافرماتا ہے ، اور اسے ستر ہزار شفاعتیں عطا ہوتی ہیں ، کہ اپنے اہل خانہ میں سے جس مسلمان کی چاہے شفاعت کرے ؛ چاہے تو دنیا ہی میں اسے بدلہ مل جاتا ہے اور اگر چاہے تو آخرت کے لیے ذخیرہ کر دیا جاتا ہے ۔
( فضائل‌مکۃ والسکن فیھا ، مترجم ، ص 38 )

سید عالم ﷺ فرماتے تھے:
کثرت سے طواف کرو ، اس سے پہلے کہ تمھارے اور اِس کے در میان رکاوٹ آ جاۓ ۔
بے شک میں حبشہ کے ایک ٹیڑھی ٹانگوں اور چوڑی پیشانی والے گنجے آدمی کو دیکھتا ہوں جو کعبہ معظمہ کے درپے ہو گا ، اور اس کو منہدم کر کے ریزہ ریزہ کر دے گا۔ ( ایضاً ، ص39 )

رب تعالی اس گھر کی برکتوں سے ہمیں کبھی محروم نہ کرے !

حضورِ کعبہ حاضر ہیں حرم کی خاک پر سر ہے
بڑی سرکار میں پہنچے مقدر یاوَری پر ہے

خبر کیا ہے بھکاری کیسی کیسی نعمتیں پائیں
یہ اونچا گھر ہے ، اس کی بھیک اَندازہ سے باہر ہے

تصدق ہو رہے ہیں لاکھوں بندے گرد پھر پھر کر
طوافِ خانۂ کعبہ عجب دلچسپ منظر ہے

✍️ لقمان شاہد
23-3-2022 ء

https://m.facebook.com/story.php?story_fbid=3410112912602207&id=100008105947430