کال نہ سننا 📲

ایک دوست مجھے باربار کال کرتے رہے لیکن میں اُن کی کال نہ سن سکا ، تو فرمانے لگے:

" آپ کا اس بندے کے بارے میں کیا خیال ہے جس کا دروازہ بار بار کھٹکھٹایا جائے اور وہ اندر ہوتے ہوئے بھی نہ کھولے ؟ "

میں نے عرض کی:

اس بندے کے بارے میں میرا یہ خیال ہے کہ وہ معذور ہے ‌، اس کے بارے میں حُسن ظن رکھنا چاہیے ، اور ناراض ہوئے بغیر واپس لوٹ جانا چاہیے ۔

سیدناابوموسی اشعری رضی اللہ تعالی عنہ ایک دفعہ سیدنا فاروق اعظم رضی اللہ عنہ سے ملنے کے لیے گئے اور ان کے دروازے پر تین بار سلام کر کےاجازت طلب کی ، لیکن دروازہ نہ کھلا تو واپس لوٹ آئے ۔
سیدنا فاروق اعظم نے اپنے معمولات سے فارغ ہوکر آپ کو بلایا اور بغیر ملاقات کیے واپس چلے جانے کا سبب پوچھا تو کہنے لگے:

میں نے رسول‌اللہ ﷺ سے سناہے:

اذا سلم احدكم ثلاثا ، فلم يجب فليرجع ۔

جب تم میں سے کوئی‌( کسی‌ سے ملنے جائے ، اور اس کے دروازے پر اجازت لینے کے لیے ) تین بار سلام کرے ، تو اگرجواب نہ ملے تو ( بغیر ناراض ہوئے ) واپس لوٹ جائے ۔

( ملخصاً: مصنف عبدالرزاق ، کتاب الجامع ، باب الاستئذان ثلاثا ، ر 19423 )

🌸 مجبوری اور مصروفیت ہر انسان کے ساتھ ہوتی ہے ، کال اور میسج کرنے والے نے تو اپنے وقت کے مطابق رابطہ کرلیا ۔۔۔۔۔۔۔ اسے کیا معلوم جس سے رابطہ کیا ہے وہ اس وقت کس حال میں ہے !
اس لیے دینِ فطرت پر عمل کیجیے اور ایسی چھوٹی چھوٹی باتوں پر اپنی بے لوث محبتیں قربان نہ ہونے دیجیے ۔
موبائل فون رکھا ہی کال سننے کے لیے ہوتاہے ، دوسرے کام تو ضمنی ہوتے ہیں ؛ اب اگر کسی کی کال نہ سننی ہو تو یہ رکھنے کا مطلب ہی نہیں ۔

✍️لقمان شاہد
3-7-2021

https://m.facebook.com/story.php?story_fbid=3199399527006881&id=100008105947430

🕌 امام مسجد کے لیے 🕌

🌺 امام مسجد کو زندہ دل اور ہنس مکھ ہونا چاہیے ، مقتدیوں کو دیکھ کر اس کا چہرہ کِھل اٹھے ، مرجھاہٹ طاری نہ ہوجائے ۔

🌺 یہ خواہش نہ کرے‌ کہ مقتدی میرے ہاتھ چومیں ، مجھ سے سلام میں پہل کریں ، میرے ساتھ آکر مصافحہ کریں ۔
بلکہ ہوسکے تو مقتدیوں کو خود سلام میں پہل کرے کہ اس کا اجر زیادہ ہے ، اور آگے بڑھ کر پرتپاک طریقے سے اُن کے ساتھ مصافحہ و معانقہ کرے ، حال احوال دریافت کرے ۔

🌺 امام کی چال ڈھال اور حرکات و سکنات میں ٹھہراؤ ہونا چاہیے ، اس کا دل پُرسکون اور چہرہ مطمئن ہونا چاہیے ، تاکہ یہ نعمتیں مقتدیوں کو بھی نصیب ہوں ۔

🌺 امام جیسے ہی کسی مسجد میں تعینات ہو ، اپنے مقتدیوں کی نماز اور عقائد کی اصلاح شروع کردے ، اور یہ سلسلہ جاری رکھے ۔
اس سے ایک فائدہ تو یہ ہوگا کہ اِس کے نامہ اعمال میں نا ختم ہونے والا اجر لکھاجاتا رہے گا ، اور دوسرا فائدہ یہ ہوگا کہ مقتدیوں کے دلوں میں اِس کی جگہ بن جائے گی ۔

🌺 امام مقتدیوں کو دینی مسائل ، ان کی زبان میں سمجھائے ( وہ پنجابی ہو ، اردو ہو ، فارسی ہو ، انگریزی ہو ، ہندی ہو یاسندھی ۔) تاکہ انھیں مسائل اچھی طرح ذہن نشین ہوجائیں ۔

مجھے یاد پڑتا ہے ایک دفعہ دعوت اسلامی کے مدنی قافلے کے ساتھ پٹھانوں کے علاقے بیگو خیل اور کاکا خیل میں گیا تھا ۔
وہاں ہم نماز کے بعد اگر اردو میں اعلان کرتے تھے تو پٹھان کم بیٹھتے تھے ، لیکن وہی اعلان جب پشتو میں کیا جاتا تو کافی سارے لوگ بیٹھ جاتے ، اور بیان سنتے تھے ۔
میں نے یہ صورت حال دیکھ کر وہاں کے ایک پٹھان اسلامی بھائی سے کہا‌:
مجھے بھی پشتو میں اعلان یاد کروادیں تاکہ میں بھی اردو کے بجائے پشتو میں اعلان کیا کروں ۔
تو انھوں نے مجھےاعلان یاد کروایا:

" خوږو خوږو اسلامى رونړو اوس د مانځه نه بعد د سنتو نه ډک بيان به کيګى تاسو ټول تشريف راوړۍ او ډير زيات ثوابونه حاصل کړۍ."

‌مطلب: میٹھے میٹھے اسلامی بھائیو ! ابھی نماز کےبعد سنتوں بھرا بیان ہوگا ، آپ تشریف رکھیے اور ڈھیروں ثواب کمائیے ۔

🌺 جب کوئی نمازی ایسا فقہی مسئلہ پوچھے جو لوگوں میں غلط مشہور ہو تو اسے دلیل کے ساتھ سمجھائیں اور مطمئن کریں ، دو لفظی ہاں ، ناں میں جواب نہ دے دیں ۔
اسی طرح عقائد کے متعلقہ مسائل کو بھی دلیل صحیح سے واضح کریں ۔

✍️لقمان شاہد
3-7-2021

( جاری ہے )

https://m.facebook.com/story.php?story_fbid=3199649893648511&id=100008105947430

دوسری قسط

🕌 امام مسجد کے لیے 🕋

🌺 امام مسجد کو خود دار اور باوقار‌ ہونا چاہیے ، مقتدیوں کے سامنےاپنی معاشی حالت کارونا روتے رہنا یا ان کے ساتھ لغو گفتگو کرنا ، خود داری اور وقار کوبری طرح مجروح کرتاہے ۔

🌺 اپنا مشاہرہ بڑھانے کا کبھی تقاضا نہ کریں ، معاشی حالات کی بہتری کے لیے الگ سے کوئی چھوٹا موٹا کاروبار شروع کرلیں ۔
اس کا ایک‌فائدہ تو یہ ہوگاکہ آپ اپنے پاؤں پر کھڑے ہوجائیں گے ، کسی کی محتاجی نہیں رہےگی ؛ اور دوسرا فائدہ یہ ہوگا کہ مقتدیوں کی نظر میں آپ کی عزت مزید بڑھ جائے گی ۔
جو پیش امام ، مسجد کے چھوٹے موٹے کام اپنی جیب سے کروادیتے ہیں ، یا کبھی کبھار مقتدیوں کی ( بہ نیت ثواب ) دعوت کردیتے ہیں ، مقتدی ان کے خلاف پروپیگنڈے کم کرتے ہیں ۔

🌺 میت والے گھر کا کھانا فقرا و مساکین اور مسافروں کے لیے ہوتا ہے ، امام مسجد کو اس سے پرہیز کرنا چاہیے ۔
مفسرقرآن مفتی احمدیارخان نعیمی رحمہ اللہ میت والے گھر کاکھانا کھانے سے اپنے شاگردوں کو سختی سے منع کیا کرتے تھے ۔
سیدی اعلی حضرت رحمہ اللہ فرماتے تھے:

" یہ تجربہ کی بات ہے ( کہ طعام المیّت یمیت القلب ‌۔ طعامِ میّت دل کو مردہ کردیتا ہے ) اور اس کے معنٰی یہ ہیں کہ:
جو طعامِ میّت کے متمنی رہتے ہیں ، ان کا دل مرجاتا ہے۔
ذکروطاعت الہٰی کے لیے حیات وچُستی اس میں نہیں رہتی ، کہ وہ اپنے پیٹ کے لقمہ کے لیے موتِ مسلمین کے منتظر رہتے ہیں ؛ اور کھانا کھاتے وقت موت سے غافل ، اور اس کی لذت میں شاغل ۔ "

🌺 آپ کہیں ختم شریف یا دعا کے لیے جائیں تو کسی قسم کا لالچ طمع نہ کیا کریں ۔
آپ کا رازق اللہ ہے ، وہ آپ کو ایسی ایسی جگہوں سے رزق حلال دے گا جہاں سے آپ کا گمان بھی نہیں ہوگا ۔

🌺 تقریبا ہر مسجد میں کچھ مقتدی یا منتظم ایسے بھی ہوتے‌ہیں جو خواہ مخواہ امام سے الجھتے رہتے ہیں ۔
امام کو چاہیے کہ ایسوں کے ساتھ شفقت سے پیش آئے اور گاہے گاہے انھیں کوئی نہ کوئی تحفہ دیتا رہے ، انشاءاللہ ﷻ ایک دن آئے گا کہ اُن کے دلوں میں بھی محبت پیدا ہوجائے گی ۔

🌺 امام‌ کو قائدانہ صلاحیتوں کا مالک اور مقتدیوں کی نفسیات سمجھنے والا ہونا چاہیے ، اور یہ چیزیں تقریبا ہر امام میں ہوتی‌ ہیں بس انھیں استعمال کرنے کی‌ضرورت ہوتی ہے ، جس کے لیے کسی تجربہ کار ، معاملہ فہم اور جہاں دیدہ امام سے رہنمائی لینی چاہیے ۔
( اور یہ رہنمائی فون کے بجائے براہ راست ملاقات کرکے لینی چاہیے ۔)

🌺 امامت بہت بڑا دینی منصب ہے ، اسے اللہ کے لیے خالص کردیں ؛ اچھی نیت اور حسن تدبیر سے اسے نبھانے کی کوشش کریں ، اللہ آپ کا حامی و ناصر ہوگا ۔

لقمان شاہد
4-7-2021

https://m.facebook.com/story.php?story_fbid=3200048420275325&id=100008105947430