#جہیز_سے_بھی_زیادہ_مہلک_عناصر

تحریر : عبد الرحمن پٹیل مصباحی

بات صرف جہیز کی نہیں، اصل پرابلم وہ فضا ہے جو نصف صدی سے موجودہ نسل کے گرد بنائی گئی ہے اور دن بہ دن نوجوان اس کے دلدل میں دھنستے چلے جا رہے ہیں. کرائم پیٹرول جیسے ٹی وی شوز میں دکھائی جانے والی حسین ترین خود کُشیوں سے لے کر درجنوں سِیریَلوں میں پیش کیے جانے والے محبت کے غلیظ ترین ڈھونگ تک اور وہاں سے لے کر عشقیہ فلموں کی ناکام محبت کے نتیجے میں برپا ہونے والے سوسائڈ سِین تک؛ موجودہ نسل کے چاروں طرف ایسے مواد کا ڈھیر لگا ہوا ہے جو ان کی ذہنیت کو مسلسل مجروح کر کے انہیں احساس کمتری کے گہرے کنویں میں دھکیل رہا ہے. فلمی ایکٹروں کے ذریعے کی جانے والی روز مرہ کی خود کشیاں جلتی پر تیل کا کام کرتی ہیں، اور اِس طرح کمزور نفسیاتی بیک گراؤنڈ رکھنے والی نئی نسل بڑی آسانی سے خود کشی کی حماقت کو نجات کا ذریعہ سمجھ لیتی ہے. جہیز جیسی دو چار رسمیں کھائی کے کنارے کھڑے انسان کو چھلانگ لگا کر جان ہلاک کرنے کا موقع ضرور فراہم کرتی ہیں مگر سوسائڈ کو حقیقی جواز بلکہ مقبولیت اور آگے بڑھ کر کہا جائے تو رواج دینے میں سب سے بڑا ہاتھ ان فلمی اور ڈرامائی تعلیمات کا ہے جو ہمارے گھروں میں داخل ہو چکی ہیں. رہی سہی کسر اسٹینڈ اپ کامیڈی میں بیان ہونے والی بے ہودہ محبت اور مشاعروں میں پڑھی جانے والی جان لیوا شاعری پوری کر دیتی ہے.

ایک طرف تو پرانی نسل نے سماج کا بُت کھڑا کیا ہوا ہے جہاں ہر اچھا برا مناسب نامناسب کام صرف اس لیے کیا اور کرایا جاتا ہے کہ سماج کا دیوتا برا نہ مان جائے، حالاں کہ سماج کے بہت سے واہیات رسم و رواج نہ تو شرعی تقاضوں کو پورا کرتے ہیں نہ ہی عام اخلاقیات سے اس کی تائید ممکن ہوتی ہے. دوسری طرف نئی نسل "ہم لے کے رہیں گے آزادی" کے کھوکھلے نعروں سے ایسی مرعوب ہو چکی ہے کہ اسے اپنے ہر داخلی و خارجی اور ذاتی و سماجی پرابلم کا واحد حل مغرب پرستی اور اس کی نمائندگی کرنے والے اداکاروں کی اندھا دھند تقلید میں نظر آتا ہے. اب نئی نسل کو کون سمجھائے کہ جو مغرب اپنی آزاد روش کے نتیجے میں یورپ سے لے کر امریکہ تک اخلاقی پسماندگی، نفسیاتی ہیجان، خاندانی ٹکراؤ، سیاسی کرپشن اور روز مرہ کی خود کُشیوں کا جہنم بن چکا ہے اس کی پیروی کر کے اپنی زندگی کو جنت نما بنانے کا تصور؛ ڈراؤنے خواب کے سوا کچھ بھی نہیں. ساتھ ہی پرانے لوگوں کو بھی چاہیے کہ اپنے خود ساختہ سماجی ڈھانچے پر دوبارہ غور کریں اور تمام غیر ضروری بندشوں کو یک قلم مسترد کر دیں تاکہ نئی نسل چند گھسے پٹے رواجوں کی وجہ سے ہمیشہ کے لیے اپنے بڑوں سے متنفر ہو کر ان کے تجربات کی روشنی سے محروم نہ ہو جائے.

دو نسلوں کی دو طرفہ ہٹ دھرمی اور ان کے گرد چو طرفہ فلمی و ڈرامائی آلودگی سے جو ماحول پیدا ہوا ہے اس سے جنریشن گِیپ وجود میں آیا ہے. یہ حقیقت ہے چاہے ہم اس سے خبر دار ہوں یا نہ ہوں. یہ چیلنج ہے چاہے ہم اس سے آنکھیں بند کر کے پھر غفلت کی نیند سو جائیں، چاہے دو چار گالیاں جہیز کو دے کر آنکھیں چرانے کی کوشش کریں یا پھر آنکھوں میں آنکھیں ڈال کر اس کے مقابلے پر آمادہ ہو جائیں. بہر حال چیلنج ہمارے سامنے ہے، اپنے رد عمل کا تعیّن ہمیں خود کرنا ہے.

در اصل موجودہ انسانی سماج بزدل بن چکا ہے. یہ اپنی غلطی کا اعتراف کر کے نئی شروعات کی طرف نہیں بڑھتا بلکہ اپنی ہر غلطی کا کوئی جائز یا ناجائز، معقول یا غیر معقول سبب تلاش کر کے سارا وبال وہاں ڈال دیتا ہے اور اطمینان سے پھر اسی ماحول میں مست ہو جاتا جس کے نتیجے میں پہلا حادثہ پیش آیا تھا پھر دوسرا پھر تیسرا اور پھر نہ جانے کتنے.......یہاں تک کہ عائشہ.
A. R. Patel
17.07.1442
01.03.2021

https://www.facebook.com/388280455075812/posts/873170709920115/

#کیا_ادب_ایمان_سے_بڑھ_کر_ہے؟

تحریر : غلام مصطفےٰ نعیمی
رکن - روشن مستقبل، دہلی

پچھلے دنوں ایک معروف خانقاہی شیخ کی ایک ویڈیو نگاہ سے گزری جس میں موصوف خانقاہ ومدرسے کے مابین غیر ضروری تقابل کرتے ہوئے یوں فرماتے نظر آئے:
"مدرسہ سے پوچھا جائے کہ ارکان اسلام کتنے ہیں تو جواب ملے گا پانچ، لیکن خانقاہ سے پوچھا جائے تو جواب ملے گا چھ، مدرسے کی ترتیب میں سب سے پہلے توحید ہے اس کے بعد نماز روزہ حج اور زکواۃ ہے۔لیکن خانقاہی ترتیب میں سب سے پہلے ادب ہے پھر توحید اور دیگر اعمال ہیں۔"

پیر صاحب کی گفتگو سے انکشاف ہوا کہ ارکان اسلام پانچ نہیں چھ ہیں۔جس میں سب سے اہم رکن ادب ہے۔جو نہ صرف ایمان سے الگ ہے بلکہ ایمان سے پہلے بھی ہے۔

اب سوال یہ پیدا ہوتا ہے کہ اہل مدارس ارکان اسلام کی تعداد پانچ کیوں بتاتے ہیں، کیا انہیں ارکان اسلام طے کرنے کا حق حاصل ہے، کہ وہ جتنی چاہیں تعداد بیان کردیں؟
لیکن یہ بات آفتاب سے زیادہ روشن ہے کہ ارکان اسلام کی تعداد کسی مولوی یا مدرسے کی نہیں بلکہ نبی کریم ﷺ کی بیان کردہ ہے۔حضرت عبد اللہ ابن عمر رضی اللہ عنہما فرماتے ہیں:
قَالَ النّبِي ﷺ :بُنِيَ الإِسْلَامُ عَلٰی خَمْسٍ : شَهَادَةِ أنْ لَّا إِلٰهَ إِلَّا اﷲُ وَأنَّ مُحَمَّدًا رَسُوْلُ اﷲِ، وَإِقَامِ الصَّلَاةِ، وَإِيْتَاءِ الزَّکَاةِ، وَالْحَجِّ، وَصَوْمِ رَمَضَانَ۔(بخاری شریف کتاب الایمان رقم الحدیث:8)

"اسلام کی بنیاد پانچ چیزوں پر ہے : یہ گواہی دینا کہ اللہ تعالیٰ کے سوا کوئی معبود نہیں اور یہ کہ محمد ﷺ اللہ تعالیٰ کے رسول ہیں، اور نماز قائم کرنا اور زکوٰۃ ادا کرنا اور بیت اللہ کا حج کرنا اور رمضان المبارک کے روزے رکھنا۔"

اس حدیث پاک سے ثابت ہوجاتا ہے کہ پیغمبر اسلام نے ہی ارکان اسلام کی تعداد پانچ بتائی ہے۔اب اہل مدرسہ پر اعتراض کا کوئی محل نہیں رہ جاتا کہ وہ تو نبی اکرم ﷺ کا ہی فرمان نقل کرتے ہیں۔اگر کسی کو اس تعداد پر اعتراض ہے تو وہ اعتراض مدرسے پر نہیں بلکہ سیدھا حدیث رسول پر پڑتا ہے۔بات صرف یہیں نہیں رکتی بلکہ یہاں دو سوال اور بھی اٹھتے ہیں:
1-کیا کسی فرد کو حدیث رسول پر اضافہ کرنے کا حق حاصل ہے؟
2-کیا ادب کا مقام توحید ورسالت سے بڑا ہے؟

چند اہم نکات بھی ذہن میں رکھیں جو معاملہ سمجھنے میں معاون ثابت ہوں گے:
🔹ارکان اسلام میں پہلے نمبر پر عقیدہ توحید ورسالت ہے۔بقیہ چار ارکان نماز ،روزہ ،حج اور زکواۃ کا تعلق اعمال سے ہے۔
🔹عقیدہ توحید ورسالت بیج اور درخت کی مانند ہے جس پر قائم رہنا ہمیشہ لازم وضروری ہے۔اگر کسی مسلمان کو توحیدو رسالت کے بعد بقیہ ارکان اربعہ میں کسی پر بھی عمل کا موقع نہیں ملا تب بھی وہ مومن مانا جائے گا۔
🔹عقیدہ توحید ورسالت کی اہمیت اس سے بھی واضح ہے کہ اگر کوئی صاحب ایمان، نماز روزے وغیرہ سے دور ہو تب بھی وہ گنہگار تو ہوگا لیکن رہے گا مومن ہی۔اس کی عملی کمزوریاں قابل مغفرت ہیں۔رب کی رحمت، شفاعت رسول یا سزا کے بعد وہ بخشش کا حقدار ہوگا۔
🔹کوئی شخص عقیدہ توحید قبول نہ کرے بھلے ہی ادب وتہذیب اور احترام واکرام کا پیکر ہو مگر وہ مسلمان نہیں ہوسکتا۔
🔹قبر کی زندگی اخروی زندگی کا پہلا زینہ ہے۔قبر میں انسان سے جو سوالات کئے جاتے ہیں وہ عقائد سے ہی متعلق ہیں۔ تمہارا رب کون ہے؟ تمہارا دین کیا ہے؟ تمہارے نبی کون ہیں؟
اگر کوئی عمل عقیدہ توحید سے بڑھ کر ہوتا تو سوالات قبر میں ضرور شامل ہوتا۔

نبی اکرم کا طریقہ تبلیغ:

حضور پر نور ﷺ جب بھی دعوت دین پیش کرتے تو اس طرح فرماتے:
يا أيها الناس قولوا: لا إله إلا اللّه تفلحوا۔(أخرجه الإمام أحمد في مسنده:15448 وأخرجه ابن حبان في صحيحه)

"کہ اے لوگو! کہہ دو کہ اللہ کے سوا کوئی معبود نہیں ہے تا کہ تم فلاح پاؤ۔"

آپ ﷺ نے سیدنا معاذ بن جبل رضی اللہ عنہ کو یمن کی طرف روانہ کیا تو ارشاد فرمایا:
وَإِنَّكَ تَأْتِي قَوْمًا مِنْ أَهْلِ الْكِتَابِ ، فَلْیَکُن اَوَّلَ، مَاتَدْعُوْھُم إِلَیہ شَھَادَۃُ أَنْ لَا إِلَهَ إِلَّا اللَّهُ، وفی روایۃ:إِلَى أَنْ يُوَحِّدُوا اللَّهَ۔

"تم اہل کتاب کی ایک قوم کے پاس جا رہے ہو۔تم انہیں سب سے پہلے اس بات کی دعوت دینا کہ اللہ کے سوا کوئی معبود نہیں۔دوسری روایت میں ہے کہ تم انہیں سب سے پہلےاس بات کی دعوت دینا کہ وہ اللہ تعالیٰ کی توحید کا اقرار کر لیں۔"

یعنی آپ ﷺ سب سے پہلے دعوت توحید پیش فرماتے اور صحابہ کو بھی اسی منہج وطریقے کی تلقین فرماتے۔اگر توحید سے پہلے کوئی اور رکن ہوتا تو حضور ضرور بالضرور توحید سے پہلے اسی کی دعوت دیتے۔

ادب اور توحید ایک جائزہ

ادب کی تعریف میں کئی اقوال ملتے ہیں مختصراً اتنا سمجھ لیں:

حسین لہجے، خوب صورت پیرایہ میں بات کرنے، متانت وسنجیدگی ، عزت واحترام، اخلاق وتہذیب ، عجز وانکساری اور شرم وحیا وغیرہ کو ادب میں شمار کیا جاتا ہے۔یعنی بہرحال ادب کا تعلق انسانی اعمال سے ہے عقیدے سے نہیں۔
دوسری جانب توحید ورسالت دنیا کی سب سے بڑی اچھائی اور کمال کا نام ہے۔اس سے بڑھ کر کوئی کمال نہیں حضرت سفیان بن عبد اللہ ثقفی بیان کرتے ہیں:
قُلْتُ: يا رَسُولَ الله، قُلْ لي في الإِسْلاَمِ قَوْلًا لاَ أَسْأَلُ عَنْهُ أَحَدًا غَيْرَكَ، قَال: "قُلْ: آمَنْتُ باللهِ ثُمَّ اسْتَقِمْ۔(صحیح مسلم کتاب الایمان 1/65 رقم الحدیث38)
"یا رسول اللہ مجھے اسلام کے متعلق کوئی ایسی بات بتادیں کہ میں آپ کے بعد کسی سے نہ پوچھوں۔آپ نے فرمایا کہ یوں کہو کہ میں اللہ پر ایمان لایا اور اس پر قائم رہو۔

الفاظ حدیث پر غور فرمائیں کہ حضرت سفیان بن عبداللہ ثقفی وہ بات جاننا چاہتے ہیں جو سب سے افضل ہو، جواب میں حضورﷺ انہیں توحید کے اقرار اور اس پر قائم رہنے کی تلقین فرماتے ہیں۔اگر ادب عقیدہ توحید سے بڑھ کر ہوتا تو نبی رحمت ﷺ توحید ورسالت کی بجائے ادب کی تلقین فرماتے۔

یہاں یہ نکتہ بھی ذہن نشیں رکھیں کہ اگر کوئی غیر مسلم مسلمان ہونا چاہے تو حکم یہ ہے اسے پہلی فرصت میں توحید ورسالت کا اقرار کرایا جائے۔قبول اسلام کرانے میں ذرا سی تاخیر بھی جائز نہیں۔اعلیٰ حضرت امام احمد رضا فرماتے ہیں:
"جو کافر تلقین اسلام چاہے اسے تلقین فرض ہے اور اس میں دیر لگانا اشد کبیرہ بلکہ اس میں تاخیر کو علما نے کفر لکھا۔"
(فتاوی رضویہ 21/172)

پیر صاحب کی مانی جائے قبول اسلام کو آنے والے کافر سے یہ کہا جائے گا پہلے ادب سیکھو اس کے بعد مسلمان بنایا جائے گا۔اگر ادب سیکھنے دوران وہ مر جائے یا اس کا ارادہ بدل جائے تو اس کے کفر کی ذمہ داری کس پر عائد ہوگی؟

صحیح بات یہ ہے کہ پیر صاحب جوش غضب میں نہایت کمزور بات کہہ گئے جس کی زد سیدھے فرمان رسول پر پڑتی ہے۔حقیقت یہ ہے کہ ادب عقیدہ توحید ورسالت کے بعد کا درجہ ہے جیسا کہ فرمان خداوندی ہے:
لِّتُؤۡمِنُوۡا بِاللّٰہِ وَرَسُوۡلِہٖ وَتُعَزِّرُوۡہُ وَ تُوَقِّرُوۡہُ ؕ وَ تُسَبِّحُوۡہُ بُکۡرَۃً وَّ اَصِیۡلًا۔(سورۃ الفتح:9)
"تاکہ اے لوگو تم اللہ اور اس کے رسول پر ایمان لاؤ اور رسول کی تعظیم و توقیر کرو اور صبح و شام اللہ کی پاکی بولو۔"

یٰۤاَیُّہَا الَّذِیۡنَ اٰمَنُوۡا لَا تَرۡفَعُوۡۤا اَصۡوَاتَکُمۡ فَوۡقَ صَوۡتِ النَّبِیِّ۔(سورۃ الحجرات:2)
"اے ایمان والو اپنی آوازیں اونچی نہ کرو اس غیب بتانے والے (نبی) کی آواز سے۔"

ان آیات میں توحید ورسالت کے بعد ہی تعظیم وتوقیر رسول کا حکم دیا گیا، تعظیم و تکریم ادب کا ہی نام ہے۔جیسا کہ صدرالافاضل فرماتے ہیں:
"یعنی جب حضور کی بارگاہ میں کچھ عرض کر و تو آہستہ پست آواز سے عرض کرو ، یہی دربار رسالت کا ادب و احترام ہے۔"

نبی کریم ﷺ فرماتے ہیں:
الإيمان بضع وسبعون شعبة، فأفضلها: قول لا إله إلا الله، وأدناها: إماطة الأذى عن الطريق، والحياء شعبة من الإيمان۔(بخاري شریف، كتاب الإيمان)
"رسول اللہ ﷺ نے فرمایا: ایمان کی ستر سے کچھ زیادہ شاخیں ہیں جن میں سب سے افضل لَا إِلٰهَ إِلَّا ﷲ (یعنی وحدانیتِ الٰہی) کا اقرار کرنا ہے اور ان میں سب سے نچلا درجہ کسی تکلیف دہ چیز کا راستے سے ہٹا دینا ہے۔اور حیا بھی ایمان کی ایک (اہم) شاخ ہے۔

درج بالا حدیث میں حیا(ادب) کو ایمان کی شاخ قرار دیا گیا ہے یعنی ادب خود ایمان کی شاخ ہے۔شاخ کتنی ہی اچھی اور بڑی ہوجائے مگر اپنی جڑ اور اصل سے کبھی نہیں بڑھ سکتی اور نہ اس سے پہلے ہوسکتی ہے۔
ادب کو توحید سے پہلے ماننا ایسا ہی ہے جیسے شاخ کو درخت اور اولاد کو باپ سے پہلے مانا جائے جو ناممکن ہے۔اصل چیز یہ ہے کہ ادب اہل ایمان کا زیور اور مشرب ہے۔یعنی اصل ادب ملتا ہی ایمان کے بعد ہے۔ایمان سے پہلے جو بھی ادب ہے وہ بس نمائشی اور کاغذی ہے۔عقیدہ توحید ورسالت کو چھوڑ کوئی ادیب منشی پریم چند اور شیکسپیئر تو ہوسکتا ہے لیکن مخدوم سمناں اور امیر خسرو نہیں ہوسکتا۔

17 رجب المرجب 1442ھ
2 مارچ 2021 بروز منگل

https://www.facebook.com/388280455075812/posts/873403433230176/

ائمہ مساجد یہ کام کریں
جیسا کہ آپ تمام حضرات کو معلوم ہوگا کہ اس وقت پوری دنیا میں مسلمانوں کے حالات دن بہ دن دگرگوں ہوتے جا رہے ہیں۔ یہاں بھارت میں بھی حالات سنگین ہوگئے ہیں۔
دوسری طرف باطل فرقے اور نظریات ہماری نوجوان نسل کو گمراہ کرکے اہل سنت و جماعت سے کاٹ کر اپنے فرقے میں شامل کرتی جارہی ہے۔
اس کے لیے ملت کے ہر طبقے کو قوم و ملت کے عقائد و نظریات کے تحفظ اور فلاح و بہبود کے لیے آگے آکر کام شروع کردینا چاہیے۔ امت کا سب سے اہم مسئلہ ہے تعلیم کی کمی۔ دینی دنیاوی علم نہ ہونے کی وجہ سے ہم ہر جگہ پیچھے نظر آتے ہیں۔۔۔
ائمہ مساجد اگر ان نکات پر عمل شروع کردیں تو مسلمانوں میں عقائد کی مضبوطی آجائے اور امت کی اصلاح بھی ہوسکتی ہے۔
۱۔ ہر امام صاحب روز کسی مخصوص نماز کے فورا بعد صرف دو منٹ عوام کو شرعی مسائل سے واقف کرائیں۔ یاد رہے صرف دو منٹ سے زیادہ نہ ہو۔ اکثر عوام وضو، غسل، طہارت، نماز، روزہ، زکوۃ وغیرہ سے واقف نہیں ہوتے۔۔۔ اسی طرح عقائد کے متعلق بھی بتاتے رہیں۔ اللہ تعالی کے بارے، حضور صلی اللہ علیہ وسلم کے بارے، ایمان مجمل، ایمان مفصل کی تشریح۔ ۔۔۔ ان باتوں کا علم نہ ہونے سے ہی لوگ گمراہ ہوتے ہیں ۔

۲۔ روزانہ بعد نماز عشا تفسیر بیان کرے۔ یہ بھی صرف ۱۵ سے ۲۰ منٹ۔ تمہید میں وقت نہ لگائیں ۔۔ بہت ساری تفاسیر کی کتب دستیاب ہیں۔ ان سے استفادہ کیا جا سکتا ہے۔
۳۔ خطبات جمعہ میں خاص بیان ہو۔ روشن مستقبل کا خطبہ سنانا کافی ہے۔ ساتھ میں حالات حاضرہ پر مختصر تبصرہ بھی ضروری ہے۔
۴۔ ائمہ حضرات نوجوان طبقے کا خصوصی خیال رکھیں۔ ان سے سلام دعا کرتے رہیں۔ ان کو مسائل کے جواب بتانے کی بھرپور کوشش کریں۔ اگر مسئلہ نہ معلوم ہو تو کتاب یا دیگر عالم سے معلوم کرکے نوجوانوں کی تشفی کی جائے۔۔۔
۵۔ سوشل میڈیا پر نظر رکھیں۔ آج ساری دنیا پر اس کے اثرات مرتب ہورہے ہیں۔ اپنے بیانات میں سوشل میڈیا پر پھیلائی جانے والی غلط خبروں اور بد گمانیوں کی تردید کریں اور اصلاح کا کام کرتے رہیں۔
۶۔ علاقے میں اثر رکھنے والی شخصیات سے روابط بنائیں، مقصد یہ ہو کہ وقت پڑنے پر ان سے تعاون مل سکے۔
۷۔ لوگوں سے مسکرا کر ملیں اور ان کے کام آنے کی کوشش کریں۔ اس طرح لوگ خود بخود آپ کے بھی کام آئیں گے۔
۸۔ ہفتے میں تین سے چار روز ائمہ اپنے مقتدیوں کے گھر جائیں اور صرف تیس منٹ ان سے بات کریں، دو تین پڑوسیوں کی پوری فیملی ہو۔ مرد باہر امام صاحب کے ساتھ اور عورتیں گھر میں پردے کے ساتھ جمع ہوں، اور دینی، تعلیمی ضروریات پر بات کریں، حالات حاضرہ پر تشویش کا اظہار کریں.
پہلے ہی سے یہ خبر بھی کہلا دیں کہ چائے کا بھی اہتمام نہ ہو، پانی بھی نہ پئیں گے، تاکہ عوام خرچ کی وجہ سے بلانا نہ چھوڑے، اور یہ بھی کہلا دیں کہ جو اہتمام کرے گا اس کے یہاں دوبارہ نہ جائیں گے.۔۔۔
ان نکات پر عمل کی ضرور کوشش کریں۔ ان شا اللہ دین دنیا میں کامیابی ملے گی اور مستقبل روشن ہوگا۔۔۔

✒️۔۔۔ محمد زبیر قادری
روشن مستقبل

https://www.facebook.com/388280455075812/posts/873770349860151/