مولا علی پاک‌ کی شان میں لکھے گئے بہت سارے قصیدے پڑھے ، منقتیں ، مخمس ، سلام ، رباعیاں ، قطعے ، فرد دیکھے ۔۔۔۔۔۔۔۔ لیکن جو لطف رسول اللہ ﷺ کی زبان پاک سے کی گئی " مدح مرتضیٰ " میں آیا ، وہ کہیں نہیں ملا ۔

کَکھ سواد نہ مِصری اندر ، کَھنڈاں وی چَکھ ڈِٹھیاں
ایناں ساریاں چیزاں نالوں گلاں سَجن دِیاں مِٹھیاں

جب حضور کہتے ہیں میرا علی ایسا ہے ۔۔۔۔۔۔ تو وجد آجاتا ہے ۔
اللہ اللہ ، سید الانبیا ﷺ جس ہستی کی تعریف کریں ، کون ان کی شان بیان کرسکتا ہے ۔۔۔۔۔۔۔۔۔ !!

رسول اللہ ﷺ کا حضرت علی سے ایک انداز محبت ملاحظہ کریں ۔

سیدنا جابر رضی اللہ تعالیٰ عنہ کہتے ہیں:

میں رسول اللہ ﷺ کے ساتھ ایک خاتون کے ہاں گیا ، اُنھوں نے ہمارے لیے بکری ذبح کی ۔

حضور نے فرمایا: ( ابھی ) ایک جنتی شخص آئے گا ۔
تو حضرت ابوبکر تشریف لے آئے ۔

پھر فرمایا: ایک جنتی شخص آئے گا ، تو حضرت عمر آگئے ۔

پھرفرمایا:

ایک ( اور ) جنتی شخص آئے گا ، اَللّٰھُمَّ اِنْ شِئْتَ فَاجْعَلْہُ عَلِیًّا ۔ اےاللہ ! تُوچاہے تو اُس ( آنے والے ) کو علی بنا دے ۔

سیدنا جابر کہتے ہیں: پھر جو تشریف لائے ، وہ حضرت علی ہی تھے ۔

( المستدرک علی الصحیحین ، ج 3 ، ص 104 ، ر 4704 ، ط دارالکتاب العربی بیروت ‌، س 1419 ھ ۔

قال الحاکم: ھذا حدیث صحیح الاسناد ۔
وافقہ الذھبی رحمہ اللہ )

میں کیوں نہ اِس اندازِ محبت پر سو بار قربان ہوجاؤں ، کہ:

" اے میرے اللہ اگر تو چاہے تو اسے علی بنادے ۔! "

مطلب: میرے مالک سب کچھ تیرے اختیار میں ہے ، میں تیرا حبیب ہوں ۔۔۔۔۔۔۔۔ اورمیرا دل چاہتا ہے کہ ان دو جنتیوں ( ابو بکر و عمر ) کے ساتھ اپنے پیارے علی کو بھی دیکھوں ؛ تو میری مان لے ، اور آنے والے کو علی کردے ۔

رسول اللہ ﷺ کے ان جملوں میں پائی جانے والی شدت محبت صرف محسوس کی جاسکتی‌ ہے ، بیان نہیں کی جاسکتی ؛ بھلا کیفیت محبت کو بھی کوئی لفظ بیان کرسکتا ہے ۔۔۔۔۔۔۔۔۔!

اے میرے آقا و مولا علی ، اَعلیٰ و اَولیٰ علی ، وَالا و بالا علی ، اَکْرَم و مُکَرَّم علی ، اَکمل و مُکمل علی ۔۔۔۔۔۔۔۔۔۔۔ واللہ آپ حضورﷺ کے تھے ، اور حضور آپ کے ۔۔۔‌‌‌‌۔۔۔۔۔۔ !!

✍️لقمان شاہد
19-2-2021 ء

https://m.facebook.com/story.php?story_fbid=3093017144311787&id=100008105947430

میں ایک قریب المرگ بزرگ کے پاس گیا تو وہ کہنے لگے:

قاری صاحب ! میرا اللہ بڑا مہربان ہے ، وہ مجھے بخش دے گا ۔

اُن کی یہ بات سن کر میری آنکھوں میں آنسو آگئے ، اور میں نے دعا مانگی:
اے میرے مالک ! دم نزع مجھے امیدِ رحمت سے محروم نہ کرنا ۔

انھوں نے کلمہ شریف پڑھا اور اللہ کو پیارے ہوگئے ۔

وہ کہتے تھے:

میں بڑا گناہ گار ہوں ، ساری عمر گناہوں میں گزری ہے ، صرف ایک نیکی کی ہے جو شاید میری بخشش کا سبب بن جائے ۔

اور وہ یہ کہ:

ایک دفعہ سردی کے موسم میں ، رات کے وقت کسی کے گنے چوری کر کے لارہا تھا ، بارش بڑی تیز برس رہی تھی ۔
میں نے دیکھا ، ایک کُتیا کے بچے پانی میں تیر رہے ہیں اور ان کی ماں چیخ چلا رہی‌ ہے ۔
مجھے ان پر بہت ترس آیا ، میں نے فوراً گنے پھینکے ، اور کتوروں کو جھولی میں ڈال کر گھر کی طرف چل پڑا ، کتیا بھی پیچھے پیچھے آگئی ۔

گھر آکر میں نے آگ جلائی تاکہ ان کی سردی دور ہو ، اور انھیں حلوہ بنا کر کھلایا تو وہ پرسکون ہوگئے ۔
پھر انھیں گھر میں ہی رکھ لیا اور ان کی دیکھ بھال کرتا رہا ۔
بس یہی ایک نیکی ہے جس پر امید کی جاسکتی ہے کہ اللہ کے حضور کام آجائے گی ۔

✍️لقمان شاہد
19-2-2021 ء

https://m.facebook.com/story.php?story_fbid=3093224717624363&id=100008105947430

ابھی ایک دعوتِ ولیمہ پر ہوں ، سارا ہال کھانے کا منتظر ہے ، عنقریب چمچوں کا کھڑاک ایک ماحول پیدا کردے گا ۔
سارے اپنے اپنے مزاج کے مطابق کھائیں گے ، لیکن میں کیسے کھاؤں گا ؟ یہ بتادیتا ہوں ۔

صبر و تحمل اور سمجھ داری سے اپنی پلیٹ میں حسبِ ضرورت سالن ڈالوں گا ۔
کوشش کروں گا کہ سینے ، گردن یا دستی کی بوٹیاں میسر آئیں ۔۔۔۔۔۔ ایک تو سنت ادا ہوجائے گی ، دوسرا جانور کے اگلے حصے ( سینے سے لے کر گردن تک ) کا گوشت کھٹا نہیں ہوتا ۔
پھر ہڈی والی بوٹی کوترجیح دوں گا ، کیوں کہ ہڈی والی بوٹیاں دانتوں میں کم پھنستی ہیں اور لذیذ زیادہ ہوتی ہیں ۔
اور انھیں بھی دانتوں سے کھاؤں گا ، ہاتھوں سے نہیں ؛ کیوں کہ:
ہڈی والا گوشت کھانے کا صحیح مزہ تب آتا ہے جب ہاتھوں کے بجائے ، دانتوں سے کھایا جائے ۔

سیدنا صَفْوَان رضی اللہ تعالی عنہ کہتے ہیں:
مجھے رسول اللہ ﷺ نے دیکھا کہ میں ہاتھ کے ساتھ گوشت کو ہڈی سے اتار رہا ہوں ، تو فرمانے لگے:

اے صفوان ! میں نے عرض کی لَبَّیک ( حضور میں حاضر ہوں ) ۔

فرمایا: گوشت کو منھ کے قریب لے جاؤ ( اور ہاتھ کے بجائے ، دانتوں کے ساتھ ہڈی سے اتار کر کھاؤ ) تمھیں زیادہ مزہ آئے گا ، اور ہضم بھی جلدی ہوجائے گا ۔

( انظر: الترغیب والترھیب للمنذری ، کتاب الطعام ، باب الترغیب فی اکل الخل والزیت ونھس اللحم ۔۔۔۔۔۔۔ الخ )

ویسے اِدھر دیگر کھانے بھی ہوں گے ، لیکن اب چوں کہ کھانے لگ رہے ہیں اس لیے آج اتنا ہی کافی ہے ۔۔۔۔۔۔ بریانی ، سلاد ، رائتے اور حلوے وغیرہ کا طریقہ پھر سہی 😀😀😀

✍️لقمان شاہد
20-2-2021 ء

https://m.facebook.com/story.php?story_fbid=3094003720879796&id=100008105947430