Ацы хъусынгӕнинаг дӕ бахъӕудзӕн:

🔸 Тугъанты Махарбеджы номыл музейы байгом равдыст «События, судьбы, люди». Баст у Ирыстон Уӕрӕсӕимӕ куы баиу, уый 250 азы, Дзӕуджыхъӕуӕн бындур ӕвӕрд куы 'рцыд, уый 240 азы ӕмӕ Цӕгат Ирыстоны автономийыл 100 азы кӕй ӕххӕст кӕны, уыимӕ. Экспозицийы фенӕн ис куыд тематикон, афтӕ ирон нывгӕнджыты куыстытӕ.

🔸 Дзӕуджыхъӕуы райдыдтой Цӕгат Кавказы Федералон зылды чемпионат ӕмӕ ерыстӕ фехтованийӕ. Цӕудзысты 14-ӕм маймӕ Дзарасаты Саукуыдзы номыл спортивон комплексы. Ерыстӕ алы бон дӕр райдайдзысты 10 сахатыл. Программӕ базонӕн ис ам.

🔸 Дзӕуджыхъӕуы цӕрджыты ӕмӕ уазджыты хонынц дидинджыты равдыстмӕ. Уыдзӕн Национ музейы 8-ӕй 12-ӕм маймӕ. 10 сахатӕй 19 сахатмӕ дзы кусдзӕн консультацион центр. Амондзысты равдысты цы дидинджытӕ ис, уыдонмӕ куыд зилын хъӕуы, уый. Фӕстаг бон та уыдзӕн бӕрӕгбоны лотерейӕ. Бӕлвырддӕр информаци базонӕн ис ам.

🔸 Дзӕуджыхъӕуы сӕ тӕмӕны сты Уӕрӕсейы ерыстӕ боксӕй. Ӕдӕппӕтӕй ерыстӕм ссыд 620 спортсмены Уӕрӕсейы 82 регионӕй. Сӕ тыхтӕ дзы фӕлварынц ӕртӕ къорды: 17-18 азы онг юниортӕ, 17-18 азы онг чызджытӕ ӕмӕ 19-22 азы онг чызджытӕ. Ерысты фӕтк базонӕн ис ам.

Къам: @fotoleela

⚫️ Уæхи «СапÆ»-йыл бафыссут

Йӕ сыхаг хуытӕ кӕй дары, уый тыххӕй Цӕгат Ирыстоны цӕрӕг бахъаст кодта Генералон прокуратурӕмӕ

🔻Ольгинскӕйаг Бузарты Кубурӕ хъаст кӕны йӕ сыхаг Саламты Аланыл хуытӕ кӕй дары, уый тыххӕй. Сылгоймаг «Сапӕ»-йӕн куыд радзырдта, афтӕмӕй хъӕуы цӕры 8 азы ӕмӕ уал азы йӕ бон нӕдӕр сыгъдӕг уӕлдӕфӕй улӕфын нӕу, нӕдӕр цӕхӕрадоны куыст кӕнын. Йӕ цӕхӕрадон ын хуытӕ ныннӕмынц ӕмӕ скъахынц. Йӕ бон быхсын нал у ӕмӕ Генералон прокуратурӕмӕ ныффыста уавӕр равзарыны курдиат.

💬 «Нӕ сывӕллӕтты уынгмӕ нӕ уадзӕм, уымӕн ӕмӕ… Сӕхи хъыбылтыл куы нӕ ауӕрдынц, уӕд гыццыл сывӕллӕттыл бацауӕрддзысты?» — зӕгъы Кубурӕ.

Хъӕуы хицау Кокайты Тимурӕн уавӕр ӕнӕзонгӕ нӕу. Цӕмӕй йӕ хуыты уынгмӕ ма уадза, уый тыххӕй фермерӕн цалдӕр хатты загъта. Суанг ма йӕм участокмӕ цӕстдарӕг пъӕлицӕйаджы дӕр арвыста.

Уый хыгъд, Саламты Алан куыд зӕгъы, афтӕмӕй Кубурӕ йӕ фарсмӕ дыууӕ азы размӕ ӕрцард. Йӕ хъуыдымӕ гӕсгӕ, йӕ ныхмӕ у ӕндӕр диныл хӕст кӕй у, уый тыххӕй. Фермер ма нын радзырдта, фарон ӕм 140-150 сӕры кӕй уыд. Уӕд ын йӕ архайдмӕ цӕстдарӕг оргӕнтӕ ӕркастысты. Сӕ хатдзӕгтӕм гӕсгӕ, хуыты нымӕц цас ӕмбӕлы, уымӕй гыццыл фылдӕр у.

💬 «Ӕрбацыди мӕм ӕмӕ мын дзырдта, зӕгъгӕ — не 'мбӕлы, тӕригъӕдыл нымад у. Хъӕуы фос се 'ппӕт дӕр дарынц. Ӕз сӕ уӕй кӕнын, уыимӕ сын сӕ нымӕц тынг фӕкъаддӕр кодтон, аиппытӕ иууылдӕр аиуварс кодтон. Йӕ фӕндонмӕ гӕсгӕ сӕ куыд скуынӕг кӕнон. Ныртӕккӕ мӕм дзӕргъытӕ уӕвгӕ дӕр нӕй», — зӕгъы Алан.

⚫️ Уæхи «СапÆ»-йыл бафыссут

Дзӕуджыхъӕуы уыд ирон ӕвзагыл киноныв «Авд сау гӕххӕтты» премьерӕ

🔻Ӕвдыст дзы сты Цӕгат Ирыстоны 1942 азы цаутӕ. Премьерӕйы рӕстӕг киноныв ӕвдыстой кинотеатр «Алания Синема»-йы ӕппӕт залты, сӕ иуы дӕр уӕгъд бынат нӕ уыд. Ӕрбацӕуджыты дисы бафтыдтой Ирыстоны ӕрдзы рӕсугъд нывтӕ, музыкӕйы зӕлтӕ, актерты архайд ӕмӕ цы сурӕттӕ сарӕзтой, уыдон.

Киноныв истой Цӕгат Ирыстоны аст хъӕуы, сӕйраг фӕз уыд Къӕмынтӕйы.

💬 «Сфӕлдыстадон къорд куыд бакуыста, уымӕй тынг разы стӕм, ӕз мӕхӕдӕг уӕлдайдӕр. Кинонывы сӕ удтӕ бауагътой, ӕхсӕвыгӕтты фынӕй дӕр нӕ кодтой. Ныр се 'ппӕты дӕр хонӕм киноныв фенынмӕ. Фӕнд ӕй кӕнӕм Хуссар Ирыстоны дӕр равдисын», — радзырдта «Сапӕ»-йӕн кинонывы генералон продюсер Сохъуырты Алан.

Киноныв саразджыты фарс рацӕхынмӕ ӕрбацыд республикӕйы культурӕйы министр Фидараты Сослан дӕр. Раздӕры актер, съемкӕтыл цас фыдӕбон ис, уый хорз зоны.

💬 «Тынг хорз сюжет у, актертӕ зӕрдиагӕй ӕмӕ тынг хорз ахъазыдысты. Куы кастӕн, уӕд раст цыма уӕды рӕстӕджы Ирыстоны февзӕрдтӕн, мӕхи афтӕ ӕнкъардтон. Кинонывыл чи бакуыста, уыдоны хъуыды мӕ зӕрдӕмӕ фӕцыд. Лӕппутӕн ма иу хатт зӕгъын бузныг. Фӕнды мӕ цӕмӕй дарддӕр исой кинонывтӕ, уымӕн ӕмӕ сын уайы. Ӕмӕ сын бирӕ бантысӕд», — загъта премьерӕйы фӕстӕ Фидараты Сослан.

➡️ 9-ӕм майӕ фӕстӕмӕ «Авд сау гӕххӕтты» ӕвдисдзысты Дзӕуджыхъӕуы ӕппӕт кинотеатрты, Алагиры ӕмӕ Ӕрыдоны. Киноныв ист у ӕмӕ йӕ ӕвдисдзысты ирон ӕмӕ уырыссаг ӕвзӕгтыл.

⚫️ Уæхи «СапÆ»-йыл бафыссут

«Азӕй азмӕ нын хуыздӕр уайы»: Цхинвалы Уӕлахизы парады архайдзӕн сылгоймӕгты цалдӕр къорды

🔻Хуссар Ирыстоны цӕттӕ кӕнынц Фыдыбӕстӕйы Стыр хӕсты Уӕлахизы 79 азы бон сбӕрӕг кӕнынмӕ. 9-ӕм майы Цхинвалы уыдзӕн парад. Барабанты ӕмӕ фугӕнӕн оркестры цагъдмӕ разамонджытимӕ трибунӕты раз ацӕудзысты Хъахъхъӕнынады, Мидхъуыддӕгты ӕмӕ Ӕнӕнхъӕлӕджы цауты министрадты службӕгӕнджытӕ.

9-ӕм майы Театралон фӕзы нӕлгоймӕгты ӕмрӕнхъ рӕнхъытӕй цӕудзысты сылгоймӕгтӕ дӕр. Алы министрадӕй фӕйнӕ сӕрмагонд хайы, хонынц ӕй коробкӕ, зӕгъгӕ. Уыдон дӕр, нӕлгоймӕгты ӕмхуызон, сӕхи ӕнӕхъӕн мӕй цӕттӕ кодтой, ахуыр кодтой раст цӕуын, куыстой сӕ хъӕндзинӕдтыл. Архайынц иннӕтӕй хуыздӕр уӕвын.

Мидхъуыддӕгты министрады сӕрмагонд къорд парады архайы ныр 8 азы. Елхъанты Иринӕйы уырны, раст рӕгътӕй цы сылгоймӕгтӕ фӕцӕуынц, уыдон нӕлгоймӕгтӕй дӕлдӕр ӕмӕ ӕвзӕрдӕр кӕй нӕ вӕййынц, уый.

💬 «Алы хатт нӕхицӕй разыйӕ баззайӕм. Иу афӕдзӕй иннӕмӕ хуыздӕр фӕцӕуӕм. Кӕд сылгоймӕгты фылдӕр хай ахӕм рӕнхъытӕй, ома къоппӕй, никуы цыдысты, уӕддӕр нын хорз уайы. Республикӕйы президент ӕмӕ нӕ нӕ разамынд кӕддӕриддӕр раппӕлынц», — зӕгъы Иринӕ.

Ӕдӕппӕтӕй Парады архайдзӕн 600 адӕймаджы. Тырыса хӕссӕг къорды фӕстӕ цӕудзысты Кадетты училищӕйы барабантыл цӕгъдӕг чызджытӕ. Се 'хсӕн Пуштаренкова Анастасия. Куыд зӕгъы, афтӕмӕй Парады архайын нымайы хӕстонтӕн кад дӕттыныл.

💬 «Махӕн ивгъуыды зынаргъ мысинӕгтӕ сты. Мӕ хиуӕттӕй дӕр иу хӕсты уыд. Хаста хӕцӕнгзӕрзтӕ. Ӕгасӕй ӕрыздӕхт», — зӕгъы Настя.

⚫️ Уæхи «СапÆ»-йыл бафыссут

«Нӕ сыхаджы бирӕ хӕттыты куырдтам цӕмӕй сын хӕринаг ма дӕтта»: Мӕздӕджы дзӕгъӕл куыйтӕ фӕлӕбурдтой 9-аздзыд чызгмӕ

🔻Сывӕллон уынджы йӕ велосипед ферох кодта ӕмӕ йӕм куы рацыд, уӕд ӕй куыйтӕ сӕ быны скодтой — радзырдта «Сапӕ»-йӕн хъыгдардбаййафӕг чызджы мад Айгуль Маматова. Фыдбылыз ӕрцыд Некрасовы уынджы.

Куыйтӕ фӕхӕцыдысты чызджы фарсыл. Уайтагъд ӕй рынчындонмӕ фӕхӕццӕ кодтой. Сывӕллонмӕ базылдысты ӕмӕ йын ӕрра низӕй прививкӕтӕ рафыстой. Ныртӕккӕ скъоладзау ис хӕдзары.

💬 «Чызг тынг фӕтарстис. Хорз ӕмӕ хӕстӕг уыдыстӕм ӕмӕ йӕ хъӕрмӕ ратахтыстӕм», — зӕгъы Айгуль.

Йӕ ныхӕстӕм гӕсгӕ, Некрасовы уынджы цӕрӕг сылгоймаг куыйтӕн хӕринаг фӕдӕтты, сахуыр сӕ кодта. Ныр уынджы бирӕгӕйттӕй ӕмбырд кӕнынц.

💬 «Ӕз дӕр, сыхӕгтӕ дӕр ын цалдӕр хатты загътам, цӕмӕй сӕ ма ахуыр кӕна. Ацы куыйтӕ адӕймагмӕ фыццаг хатт нӕ фӕлӕбурдтой: уый размӕ мӕ зонгӕтыл, мӕхицӕн дӕр тӕссаг уыд. Ӕрмӕст мах уынджы 3-4 сты. Аллейӕмӕ куы рацӕуай, уӕд уым бирӕ сты. Сывӕллӕтты бон скъоламӕ ӕдасӕй цӕуын нӕу. Раст дзугтӕй цӕуынц, кӕдӕм ма бахъаст кӕнӕм, уый нал зонӕм», — радзырдта сылгоймаг.

⚫️ Уæхи «СапÆ»-йыл бафыссут

«Радио парахат нал у»: «Нӕ уылӕн»-ы раздӕры директор радзырдта радиостанцӕтӕн цы нӕ фаг кӕны, уый тыххӕй

🔻Радиойы бон Хъоцыты Руслан «Сапӕ»-йӕн радзырдта, Хуссар Ирыстоны дзыллон информацион фӕрӕзты ацы хуыз цы уавӕры ис ӕмӕ дзы хи радиостанцӕтӕ цӕуыннӕ ис. Ӕнӕпаддзахадон радиойы раздӕры хицауы хъуыдымӕ гӕсгӕ, 20 азы размӕ дӕр ма радио тынг парахат уыд. Фӕлӕ интернет алцы йӕ быны бакодта ӕмӕ дзы ныр цыфӕнды ссарӕн ис.

💬 «Адӕймагӕн цымыдисаг цы у, ӕрмӕст уымӕ кӕсы. Радиойы дӕр хъуамӕ уыцы фадат уа. Адӕм алыхуызон сты ӕмӕ иунӕг радиостанцӕйы бон нӕу алкӕй фӕндон ӕххӕст кӕнын. Дыккаджы та, радиойы ӕрмӕгыл бирӕ куыст ис, ӕрмӕст хабӕрттӕм хъусын никӕй фӕнды. Бирӕ хъуыддӕгтӕ дзы ис, суанг ма дзы бирӕ ӕвзӕгтыл программӕтӕ куыд уой, афтӕ».

Хъоцыты Русланы хъуыдымӕ гӕсгӕ, радиостанцыл бирӕ хӕрдзтӕ ис. Цӕмӕй парахат уа, уый тыххӕй та хъӕуы паддзахады ӕххуыс.

💬 «Радиомӕ хъӕуы куыд егъау паддзахадон информацион фӕрӕз, афтӕ кӕсын. Ивгъуыд рӕстӕг ын паддзахад йӕ ахадындзинад ӕмӕ нысаниуӕг кӕронмӕ бамбӕрста: эфиры цыдӕртӕ дзурынц ӕмӕ дзурынц. Ӕмбӕлгӕ цӕстдард ӕм куы цыдаид, уӕд ныры онг дӕр йӕ нысаниуӕг нӕ фесӕфтаид. Фӕлӕ уыцы ӕмвӕзадмӕ нӕма бахӕццӕ стӕм. Чи сырӕзт, уыдон та йӕ ӕмбарынц фӕрӕзтӕ кӕй хъӕуынц, уый. Уымӕй уӕлдай ӕхца куы уа, уӕддӕр хъӕугӕ специалисттӕ зын ссарӕн сты», — йӕ хъуыдытӕ загъта Хъоцыты Руслан.

➡️ Хуссар Ирыстоны радиойы истори райдыдта 1932 азы. Уӕд Хуссар Ирыстоны Автономон облӕсты хицауады уынаффӕмӕ гӕсгӕ сфидар кодтой радиойы комитет. Ныртӕккӕ республикӕйы ис иунӕг паддзахадон радиостанцӕ «Ир» ӕмӕ цалдӕр уӕрӕсейаг станцӕйы.

⚫️ Уæхи «СапÆ»-йыл бафыссут

Абоны цаутыл афӕлгӕсгӕйӕ, уӕ цӕст цавӕр ныхӕстыл ӕрхӕцыд?

➡️ Ацы изӕр уӕ зонгӕ кӕнӕм ног дзырдимӕ — хъӕндзинад.

⚫️ Уæхи «СапÆ»-йыл бафыссут

🔻Абайты Владимиры мысинӕгтӕй: «Нӕ фыццаг фембӕлд ӕнӕнхъӕлӕджы рауад. Уый уыд 1902 азы ирон аргъуаны кӕрты. Аргъуан ис сахары ӕппӕты бӕрзонддӕр ран. Ардыгӕй горӕт тынг рӕсугъдӕй зыны, Кавказы хӕхты рӕгъ та уӕлдайдӕр. Аргъуаны тӕккӕ фарсмӕ уыд скъолайы дыргъдон, иу быру сын уыдис. Уыцы аз ӕз, раздӕры Святополковскийы уынджы, ирон скъолайы фӕстаг къласы ахуыр кодтон.

Иу хатт переменӕйы рӕстӕг бӕлӕсты бын куы хъазыдыстӕм, уӕд чидӕр ныхъхъӕр кодта, Къоста аргъуаны кӕрты ис, зӕгъгӕ. Хистӕркъластонтӕй алцыдӕр ферох, иууылдӕр бырумӕ ныййарц сты. Аргъуаны кӕрты ног къахт ингӕны цур лӕууыдысты нӕлгоймӕгтӕ, се 'хсӕн Къоста. Иу дӕр нӕ дзурынхъом нал уыд, иууылдӕр бандзыг стӕм, Къостайӕ нӕ цӕстытӕ нал истам. Нӕ уарзон поэтмӕ кӕсынӕй нал ӕфсӕстыстӕм, йӕ алы ныхасмӕ дӕр ӕнхъӕлмӕ кастыстӕм, ахстам ӕй ӕмӕ йӕ, стыр хӕзнайау, нӕ зӕрдыл бадардтам…»

📄 Чиныг «Коста Хетагуров и его время»

⚫️ Уæхи «СапÆ»-йыл бафыссут

Цӕгат Ирыстоны хӕстон намысы цыртдзӕвӕнтыл сӕвӕрдтой дидинджытӕ

🔻Цӕгат Ирыстоны сӕргълӕууӕг Сергей Меняйло ӕрхъуыды кодта Фыдыбӕстӕ хъахъхъӕнджыты нӕмттӕ Намысы Мемориалы. Кадджын мадзалы архайдтой бӕрнон оргӕнты, республикон ведомствоты ӕмӕ тыхы структурӕты минӕвӕрттӕ. Ӕрбацӕуджытӕ минут ӕдзӕмӕй алӕугӕйӕ, ссардтой ӕдзард хӕстонты нӕмттӕ, сӕ номыл цыртдзӕвӕнтыл сӕвӕрдтой дидинджытӕ. Хъӕбатырты кадӕн айхъуыст хӕцӕнгӕрзты ӕмӕхст.

➡️ Официалон хайы фӕстӕ райдыдтой бӕрӕгбоны мадзӕлттӕ. Республикӕйы цӕрджытӕн бацӕттӕ кодтой концерт, скодтой дзы ӕфсӕддон цӕлгӕнӕн дӕр.

⚫️ Уæхи «СапÆ»-йыл бафыссут

Хуссар Ирыстоны фронты фӕсчъылдым архайджытӕн уыдзӕн Уӕлахизы парады архайыны фадат

🔻Фыдыбӕстӕйы Стыр хӕсты архайджытӕй республикӕйы иу дӕр нал ис. Фӕстаг ветерантӕ сӕ цардӕй ахицӕн сты 2022 азы. Хуссар Ирыстоны ветеранты Советы сӕрдар Гаглойты Арон куыд радзырдта, афтӕмӕй ныртӕккӕ организацийы хыгъды сты фронты фӕсчъылдым архайджытӕ ӕмӕ ветеранты идӕдзтӕ.

💬 «Ӕдӕппӕтӕй нӕ хыгъды ис 48 адӕймаджы. Фронты фӕсчъылдым архайджытӕ сты 27. Уыдонӕй 16 сты нӕлгоймӕгтӕ, 11 та сылгоймӕгтӕ. Идӕдзтӕ сты 21. Азтӕ сыл сӕ уаргъ ӕруагътой ӕмӕ сӕ фылдӕр рынчын сты. Уый аххосӕй сӕ бон парады бацархайын нӕ уыдзӕн», — радзырдта «Сапӕ»-йӕн Гаглойты Арон.

➡️ Хуссар Ирыстоны ветеранты Советы сӕрдарӕн йӕхиуыл 83 азы цӕуы. У Мидхъуыддӕгты министрады ӕмӕ ӕфсады ветеран. 9-ӕм майы Уӕлахизы Парады архайдзысты Хъахъхъӕнынады, Мидхъуыддӕгты ӕмӕ Ӕнӕнхъӕлӕджы цауты министрадты службӕгӕнджытӕ.

⚫️ Уæхи «СапÆ»-йыл бафыссут

Хӕсты быдыртӕй хаста цӕфты: Беслӕны 99-аздзыд ветеранӕн йӕ хӕдзары раз сарӕзтой парад

🔻Мысыкаты Мария (Карпенко) — районы иунӕг ветеран у. Ацы аз сбӕрӕг кӕндзӕн йӕ 100 азы юбилей. Абон ын йӕ хӕдзары раз сарӕзтой парад — Рахизфарсы районы кадеттӕ дзы цыдысты раст рӕнхъытӕй. Бынӕттон культурӕйы галуаны хъомылгӕнинӕгтӕ та бацӕттӕ кодтой концерт: зарыдысты хӕстон зарджытӕ, кафыдысты вальс. Лӕппутӕ ӕмӕ чызджытӕ парадмӕ сӕхи мӕйы бӕрц цӕттӕ кодтой.

Фыдыбӕстӕйы Стыр хӕст куы райдыдта, уӕд Марияйыл 17 азы цыд. Райгуырд Стъарапойлаг хъӕу Солдатово-Александровскийы. Хӕсты фыццаг бонты ацыд йӕ хомӕ, Минводтӕм, уым каст фӕцис медицинон курсытӕ дӕр. Куыста Железноводскы ӕфсӕддон госпиталы, фӕстӕдӕр та Георгиевскы поликлиникӕйы. 1944 азӕй фӕстӕмӕ фронты фӕстӕ цыд медицинон эшелон: цалцӕг кодтой хидтӕ ӕмӕ ӕфсӕнвӕндӕгтӕ. Ацы эшелоны кодтой операцитӕ, салдӕтты-иу фӕстӕмӕ сӕ къӕхтыл слӕууын кодтой. Мария та дзы уыд медицинон хо. Уӕдӕ хӕсты быдырӕй дӕр цӕф хӕстонты иу ӕмӕ дыууӕ хатты нӕ рахаста.

1945-ӕм азы 9-ӕм майыл сӕмбӕлд Берлинмӕ 27 километры нӕ бахӕццӕ уӕвгӕйӕ. Хорзгонд у «Хъӕбатырдзинады тыххӕй» ӕмӕ «Германийыл фӕуӕлахизы тыххӕй» майдантӕй.

➡️ Хӕсты рӕстӕг Мария базонгӕ йӕ цардӕмбал Мысыкаты Абдурахманимӕ дӕр — уыд поезды хицауы хӕдивӕг. Фыдыбӕстӕйы Стыр хӕсты фӕстӕ сын райгуырд 3 сывӕллоны. 60-ӕм азты бинонтӕ ссыдысты Беслӕнмӕ. Ныртӕккӕ Мысыкаты Мария цӕры йӕ фырты бинонтимӕ.

⚫️ Уæхи «СапÆ»-йыл бафыссут

Дзӕуджыхъӕуы 46-ӕм скъолайы байгом кодтой хӕстон намысы музей

🔻Музейы ис Фыдыбӕстӕйы Стыр хӕсты рӕстӕджы 200 экспонаты. Се 'хсӕн советон хӕстонтӕм хи раттынмӕ кӕм сидынц, уыцы фашистон агитацион гӕххӕттытӕ. Музейы ма фенӕн ис Советон Цӕдисы уӕлдӕр хӕрзиуджыты къопитӕ. Ӕппӕт экспонаттӕ ссардтой скъолайы агурӕн къорд «Наследие»-йы уӕнгтӕ.

💬 «Нӕ къорд 4 азы размӕ сарӕзтам. Ныртӕккӕ 20 адӕймаджы бӕрц стӕм — иууылдӕр хистӕркъласонтӕ. Мидхъуыддӕгты министрады республикон къордимӕ иумӕ ацӕуӕм экспедициты. Фӕлӕ нӕ музейы цы экспонаттӕ ис, уыдон Дзӕуджыхъӕуы бынмӕ ӕмӕ Елхоты цур агурӕн куыстыты рӕстӕг нӕхӕдӕг ссардтам. Сӕ сыгъдӕг ӕмӕ се 'сног кӕныныл дӕр нӕхӕдӕг бакуыстам», — радзырдта «Сапӕ»-йӕн скъолайы ахуырдзау Балашвили Давид.

Экспонаттӕ сты QR-кодтимӕ. Сӕ фӕрцы ӕрбацӕуджыты бон у алы дзаумайы тыххӕй бӕлвырд информаци базонын.

Музейы ис макеттӕ дӕр — скъоладзаутӕ сарӕзтой Фыдыбӕстӕйы Стыр хӕсты рӕстӕг тохтӕ. Скодтой блиндажы халдих дӕр, сӕвӕрдтой дзы фронты архайджытӕ цӕмӕй пайда кодтой, уыцы дзаумӕттӕ ӕмӕ мигӕнӕнтӕ.

Скъоладзутӕ сарӕзтой экскурсион программӕ дӕр. Сӕ фыццаг уазӕг Милдзыхты Вячеслав дзы разыйӕ баззад.

💬 «Тынг бузныг уӕ дӕн. Стыр ӕмӕ биноныг куыст бакодтат. Мӕ зӕрдӕ уын зӕгъы ноджы фылдӕр ӕнтыстдзинӕдтӕ. Ӕхсызгон мын у республикӕйы фидӕн сымах хуызӕн рӕсугъд ӕмӕ разӕнгард кӕстӕрты къухы кӕй ис, уый», — загъта мэр.

⚫️ Уæхи «СапÆ»-йыл бафыссут

Цхинвалы районы къӕвдатӕ кӕй бахордтой, уыцы фӕндӕгтӕ сцалцӕг кӕныны фадат нӕма ис

🔻Къӕвдаджын рӕстӕг кӕй хӕссы, уый аххосӕй хъӕутӕ Гром, Арцеу ӕмӕ Бихъармӕ фӕндӕгтӕ цалцӕггӕнӕн куыстытӕ нӕ цӕуынц. Синоптикты бӕрӕггӕнӕнтӕм гӕсгӕ, сабаты дӕр къӕвда уардзӕн ӕмӕ хуыцаубонӕй раздӕр сӕ бон кусын нӕ уыдзӕн. Уый дӕр цавӕр боныхъӕд уа, уымӕ гӕсгӕ. Уый тыххӕй «Сапӕ»-йӕн радзырдта Цхинвалы районы разамонӕг Бӕззаты Инал.

💬 «Нӕ тӕхникӕ дӕр тӕссаг уавӕры ис. Абон иу экскаватор сцалцӕг кӕндзыстӕм ӕмӕ йӕ райсом Громмӕ арвитдзыстӕм: иу ран дзы фӕндаг метры бӕрц ныккалд. Къуырисӕры та Бихъармӕ ацӕудзыстӕм», — радзырдта Инал.

➡️ Къуыри размӕ Хуссар Ирыстоны тыхджын къӕвдатӕ уыд. Дон бахордта Цхинвалы ӕмӕ Ленингоры районы иуӕй-иу хъӕуты 'хсӕн фӕндӕгтӕ, уый аххосӕй транспортон бастдзинад фӕкъуылымпы.

⚫️ Уæхи «СапÆ»-йыл бафыссут

Абоны цаутыл афӕлгӕсгӕйӕ, уӕ цӕст цавӕр ныхӕстыл ӕрхӕцыд?

➡️ Ацы изӕр уӕ зонгӕ кӕнӕм ног дзырдимӕ — цыртдзӕвӕн.

⚫️ Уæхи «СапÆ»-йыл бафыссут

Уӕлахизы 79 азы боны кадӕн Дзӕуджыхъӕуы уыд парад

🔻Фӕткмӕ гӕсгӕ Сӕрибардзинады фӕзыл маршӕй ацыдысты ӕфсӕддонтӕ, ӕвзонг армионтӕ, кадеттӕ, тыхы структурӕты ӕмӕ ведомствоты минӕвӕрттӕ. Ӕдӕппӕтӕй 1 000 адӕймаджы бӕрц ӕмӕ ӕфсӕддон техникӕйы 20 иуӕджы.

Фыццаг хатт Парады ацыд танк Т-90 «Прорыв» — нырыккондӕр танктӕй иу. Парады рӕстӕг цагъдта ӕфсӕддон оркестр.

Республикӕйы цӕрджытӕн ӕмӕ уазджытӕн бӕрӕгбоны арфӕтӕ ракодта Цӕгат Ирыстоны сӕргълӕууӕг Сергей Меняйло. Зӕххыл цыфыддӕр хӕст ӕрцыд, уый амӕттӕгты ном ссардтой минут ӕдзӕмӕй алӕугӕйӕ.

💬 «Нӕ хистӕрты хъӕбатырдзинад рох никуы уыдзӕнис. Нӕ адӕм цы лӕгдзинад, уды фидар ӕмӕ иудзинад равдыстой, уый ӕнустӕм баззайдзӕн хъайтардзинад, намыс ӕмӕ кады дӕнцӕгӕй. Нӕ бӕстӕйӕн ацы бон ахсджиаг у! Мӕ зынаргъ ӕмзӕххонтӕ, бӕрӕгбоны арфӕ уын кӕнын. Уӕлахизы 79 азы бон уын мӕ зӕрдӕ зӕгъы сабырдзинад. Сыгъдӕг цъӕх арвы бын куыд цӕрӕм», — загъта Сергей Меняйло.

⚫️ Уæхи «СапÆ»-йыл бафыссут

Дзукъаты Илья Исахъы фырт (1903 — 1943)

🔻Нӕ бӕстӕйы ахӕм бинонтӕ нӕй ӕмӕ хӕсты цӕхӕр кӕй нӕ басыгъта. Адӕмы цӕвӕгау карста. Се 'хсӕн бахауд мӕ бабайы фыды 'фсымӕр Дзукъаты Илья дӕр.

Зонын ӕй ӕрмӕстдӕр мӕ нанайы ныхӕстӕй, афтӕмӕй йын сарӕзтон йӕ сурӕт. Илья уарзта чингуытӕ кӕсын, алыхуызон цымыдисаг цаутӕ ӕмӕ хабӕрттӕ арӕх дзырдта. Цардуарзон уыдис, кадджын адӕймаг ӕмӕ-иу ӕй хистӕрӕн арӕх сбадын кодтой.

Райгуырдис 1903 азы Хуссар Ирыстоны. Ахуыр дӕм уым скодта, фӕстӕдӕр куыста заводы.

Хӕсты фыццаг бонты йӕ акодтой фронтмӕ. Хистӕр лейтенант Дзукъаты Илья хъазуатонӕй тох кодта. Знагӕн йӕ Фыдыбӕстӕйы иунӕг зӕххы гӕппӕл дӕр нӕ лӕвӕрдта. Ильяйӕн саккаг кодтой Фыдыбӕстӕйы Стыр хӕсты II-ӕм къӕпхӕны орден. Хъыгагӕн, 1943 азы хӕстытӕй иуы йӕ ӕрыгон уд аскъуыд.

Йӕхӕдӕг нал ис, фӕлӕ йӕ фӕстӕ баззадысты йӕ хӕрзиуджытӕ ӕмӕ йӕ цардӕмбалмӕ фыстӕджытӕ. Гӕххӕтт йеддӕмӕ ницы сты, фӕлӕ сӕ куы кӕсай, уӕд зӕрдӕмӕ хъарынц ӕмӕ цӕссыгӕн бауромӕн нал вӕййы. Нӕ фарсмӕ нӕй, фӕлӕ йын йӕ уддзӕф ӕнкъарын. Уыцы фыстӕджытӕ сты йемӕ бастдзинад, йемӕ ныхас, нӕ зӕрдӕты кӕй ис ӕмӕ рох кӕй нӕу, уый ӕвдисӕн.

(Дзукъаты Ланӕ)

#Сапæ_уидӕгтӕ

⚫️ Уæхи «СапÆ»-йыл бафыссут

Дзӕуджыхъӕуы цӕрджытӕ бӕрӕг кӕнынц Уӕлахизы бӕрӕбон

🔻Кӕд «Ӕнӕмӕлгӕ полк» нӕ уыд, уӕддӕр бирӕтӕ уынгтӕм рацыдысты сӕ хиуӕттӕй хӕсты чи архайдта, уыдоны къамтимӕ.

💬 «Мӕ мад Гулько Мария Иваны чызг. Фыдыбӕстӕйы Стыр хӕсты рӕстӕг 18-аздзыд чызгӕй ацыд фронтмӕ. Йӕ хайад цыд ӕфсады фӕстӕ, хӕстонтӕн дзултӕ фыхтой. Уый стыр ӕмӕ ахсджиаг хъуыддаг у», — радзырдта йӕ мады тыххӕй Марина Лаврова.

Маринайы мад куыд дзырдта, афтӕмӕй йӕ хайадимӕ фӕцыдысты Дзӕуджыхъӕуӕй Польшӕмӕ. Уӕлахизыл дӕр уым сӕмбӕлдысты.

💬 «Йӕхӕдӕг куыд дзырдта, афтӕмӕй йӕ царды ӕппӕтӕй хуыздӕр бӕрӕгбон уыд. Цӕрӕнбонты йӕ йӕ зӕрдыл дардта. Йӕ цардӕй дӕр 9-ӕм майы ахицӕн», — радзырдта Марина.

Дзӕуджыхъӕуы уыдысты бӕрӕгбоны мадзӕлттӕ: сарӕзтой тематикон фӕзтӕ, ӕфсӕддон цӕлгӕнӕны саходӕн, хи къухтӕй аив ныв скӕнын, ӕнӕниздзинад сбӕрӕг кӕнын.

💬 «9-ӕм май цыдӕр ӕнахуыр, диссаджы рухс бӕрӕгбон у ӕмӕ йӕм се 'ппӕт дӕр фенхъӕлмӕ кӕсынц. Мах нӕ хӕстонты куы нӕ хъуыды кӕнӕм, нӕ дадатӕ ӕмӕ уыдоны хистӕрты лӕгдзинад зӕрдыл куы нӕ дарӕм, уӕд ӕй нӕ кӕстӕртӕ куыд зондзысты. Горӕты алыхуызон мадзӕлттӕ кӕй цӕуынц, уый мын тынг ӕхсызгон у. Кӕстӕртӕм фыдыбӕстӕмӕ, сӕ хистӕртӕм, хӕстонтӕм уарзондзинад гуырын кӕнынӕн ахъаз сты», — загъта «Сапӕ»-йӕн Инна Увижева.

⚫️ Уæхи «СапÆ»-йыл бафыссут