စစ်ခေါင်းဆောင်အတွက် ဒေါ်လာရှာပေးခဲ့သည့် ဗဟိုဘဏ်ဥက္ကဋ္ဌ သန်းသန်းဆွေ ရာထူးမှ ဖယ်ရှားခံရပြီး ပါမောက္ခချုပ်ဟောင်း ဒေါက်တာ ခင်နိုင်ဦးကို အစား ထိုးခန့်အပ်ရန် မင်းအောင်လှိုင် အဆိုပြု

ဧပြီလ ၈ ရက်

အကြမ်းဖက်စစ်ခေါင်းဆောင် မင်းအောင်လှိုင်အတွက် ဒေါ်လာရရှိရေးနှင့် ငွေကြေးကဏ္ဍ ပြုပြင်ပြောင်းလဲရေး တာဝန်များကို အစွမ်းကုန် ထမ်းဆောင်ခဲ့သော်လည်း ဗဟိုဘဏ်ဥက္ကဋ္ဌ သန်းသန်းဆွေသည် အကြမ်းဖက် အစိုးရအဖွဲ့သစ်တွင် ပါဝင်ခွင့် မရတော့ဘဲ ရာထူးမှ ဖယ်ရှားခံလိုက်ရသည်။

၎င်း၏နေရာတွင် အငြိမ်းစား ရန်ကုန်စီးပွားရေးတက္ကသိုလ် ပါမောက္ခချုပ်ဖြစ်၊ စာရင်း စစ်ချုပ်လည်းဖြစ်သူ  ဒေါက်တာ ခင်နိုင်ဦးကို အစားထိုးရန် အကြမ်းဖက်စစ်ခေါင်းဆောင်က အဆိုပြုလိုက်သည်။

စစ်အာဏာသိမ်းပြီးနောက် သန်းသန်းဆွေ၏ အခန်းကဏ္ဍ
-------------------------------------------------------

၂၀၂၁ ခုနှစ်၊ ဖေဖော်ဝါရီလ ၁ ရက်နေ့ စစ်အာဏာသိမ်းချိန်တွင် နိုင်ငံခြားဝင်ငွေ ပြတ်တောက်မှုနှင့် ဘဏ္ဍာရေးကဏ္ဍ ကမောက်ကမဖြစ်မှုတို့ကြောင့် စစ်ခေါင်းဆောင် မင်းအောင်လှိုင်သည် အကျပ်အတည်းနှင့် ရင်ဆိုင်ခဲ့ရသည်။

ထိုအချိန်တွင် ဗဟိုဘဏ်၌ ဝန်ထမ်းဘဝဖြင့် တောက်လျှောက် အမှုထမ်းလာခဲ့သည့် ညွှန် ကြားရေးမှူးချုပ် သန်းသန်းဆွေကို ၂၀၂၁ ခုနှစ်၊ ဖေဖော်ဝါရီလ ၄ ရက်နေ့တွင် ဗဟိုဘဏ် ဒုတိယဥက္ကဋ္ဌအဖြစ် လည်းကောင်း၊ ၂၀၂၂ ခုနှစ်၊ ဩဂုတ်လ ၁၉ ရက်နေ့တွင် ဗဟိုဘဏ်ဥက္ကဋ္ဌအဖြစ် လည်းကောင်း အဆင့်ဆင့် တိုးမြှင့်ခန့်အပ်ခဲ့သည်။

စစ်တပ်အတွက် အလုပ်အကျွေးပြုခဲ့မှုများ
-----------------------------------------

သန်းသန်းဆွေသည် ဗဟိုဘဏ်ဥက္ကဋ္ဌ တာဝန်ယူစဉ်အတွင်း စစ်တပ်အတွက် ဒေါ်လာရရှိရေး၊ ဘဏ်စနစ်နှင့်ငွေကြေးကဏ္ဍ တည်ငြိမ်ရေးနှင့် စစ်တပ်၏ ဘဏ္ဍာရေး ခိုင်မာစေရေးတို့အတွက် နည်းလမ်းမျိုးစုံဖြင့် ကြိုးစားပေးခဲ့သူဖြစ်သည်။

ပုဂ္ဂလိက ဘဏ်များကို ထိန်းချုပ်ရာတွင်  ပုဂ္ဂလိကဘဏ်များအားလုံး စစ်တပ်၏ ထိန်းချုပ်မှုအောက် အပြည့်အဝ ရောက်ရှိစေရန် သူက ဆောင်ရွက်ခဲ့သည်။

ယင်းအပြင် ပြည်သူမျာုက တော်လှန်ရေးဘက်တော်သားများထံသို့ အလှူငွေပေးပို့သည့် ဘဏ်အကောင့်များကို ပိတ်ပင်ခဲ့ပြီး၊ ထိုသို့လှူဒါန်းသူများကို ဖမ်းဆီးနိုင်ရန်အတွက် လူ ထု၏ အချက်အလက်များကို စစ်တပ်ထံသို့ ပေးပို့စေခိုင်းခဲ့သူမှာ သန်းသန်းဆွေပင်ဖြစ်သည်။

စစ်တပ်နှင့် အကြီးအကျယ် ပူးပေါင်းခဲ့မှုကြောင့် ၂၀၂၂ ခုနှစ်၊ ဧပြီလ ၇ ရက်တွင် ၎င်း၏ နေအိမ်အတွင်း သေနတ်ဖြင့် ပစ်ခတ်လုပ်ကြံခံခဲ့ရသော်လည်း အသက်မသေဘဲ လွတ် မြောက်ခဲ့ပြီးနောက် စစ်တပ်အတွက် ဆက်လက် အလုပ်လုပ်ပေးခဲ့သည်။

ငွေကြေးစနစ် ပြုပြင်ပြောင်းလဲမှုနှင့် FATF အမည်ပျက်စာရင်း
------------------------------------------------------------

သန်းသန်းဆွေသည် ငွေစက္ကူအမြောက်အမြား ရိုက်ထုတ်ရမှုကို လျှော့ချရန်အတွက် ဒီဂျစ်တယ်ငွေပေးချေမှု မြန်မာကြူအာ (MMQR) စနစ်ကို ၂၀၂၄ ခုနှစ်အတွင်း တွန်းအားပေး အကောင်အထည်ဖော်ခဲ့သည်။ အဆိုပါစနစ်ကို သုံးစွဲစေခြင်းဖြင့် ဘတ်ဂျက်လိုငွေပြမှုနှင့် စစ်ကောင်စီဝန်ထမ်းများ၏ လစာပေးချေမှုများတွင် ကျင့်သုံးစေခဲ့သည်။

ထို့ပြင် ကမ္ဘာ့ငွေကြေးခဝါချမှု စောင့်ကြည့်ရေးအဖွဲ့ (FATF) က မြန်မာနိုင်ငံကို အီရန်၊ မြောက်ကိုရီးယားတို့နှင့်အတူ "ဘဏ္ဍာရေး အမည်ပျက်နိုင်ငံ" (Blacklist) အဖြစ် သတ်မှတ်ခဲ့ရာ ယင်းစာရင်းမှ လွတ်မြောက်ရေးအတွက် FATF အစည်းအဝေးများသို့ သွားရောက်ကာ အကြိတ်အနယ် တင်ပြတောင်းဆိုခဲ့သော်လည်း စစ်တပ်၏ လုပ်ရပ်များကြောင့် အောင်မြင်မှု မရရှိဘဲ အမည်ပျက်စာရင်းတွင် ဆက်လက် ထားရှိခြင်း ခံခဲ့ရသည်။

ဘဏ်များနှင့် စီးပွားရေးလုပ်ငန်းရှင်များအပေါ် ဖိနှိပ်မှု
---------------------------------------------------

စစ်တပ်အတွက် ဒေါ်လာရရှိစေရန် ပို့ကုန်တင်ပို့သူများကို ၎င်းတို့၏ ရငွေဒေါ်လာများအားလုံး စစ်တပ်ထံ ပြန်သွင်းရန် စနစ်ကို ကျင့်သုံးခဲ့သည်။ ဒေါ်လာမသွင်းသည့် စီးပွား ရေးသမားများနှင့် ကုမ္ပဏီများကို အမည်ပျက်စာရင်းသွင်းခြင်း၊ ထောင်ချခြင်းနှင့် ပိုင်ဆိုင်မှု သိမ်းဆည်းခြင်းများ ပြုလုပ်ခဲ့သည်။

ရိုးမဘဏ်ဥက္ကဋ္ဌ ဦးသိမ်းဝေကိုပင် ငွေကြေးခဝါချမှုဖြင့် ထောင်သွင်းအကျဉ်းချနိုင်သည်အထိ စစ်တပ်အလိုကျ လုပ်ဆောင်ပေးခဲ့သည်။


ဗဟိုဘဏ်ဥက္ကဋ္ဌသစ်နှင့် အဖွဲ့ဝင်သစ်များ
----------------------------------------

ဆက်လက်ဖတ်ရှုပါရန် - ⤵️⤵️

တောင်သာမြို့နယ်တွင် စစ်ကြောင်းထိုးနေသည့် စစ်တပ်က ကျေးရွာများကို ဆက်တိုက် မီးရှို့နေပြီး ဒရုန်းဖြင့်လည်း စစ်ရှောင်ပြည်သူများကို လိုက်လံ ဗုံးကျဲ တိုက်ခိုက်နေ

ဧပြီလ ၈ ရက်

မန္တလေးတိုင်း၊ တောင်သာမြို့နယ်တွင် စစ်ကြောင်းထိုးနေသည့် အကြမ်းဖက် စစ်တပ်က ကျေးရွာများကို ဆက်တိုက် မီးရှို့နေပြီး ဒရုန်းဖြင့်လည်း စစ်ရှောင်ပြည်သူများကို လိုက်လံ ဗုံးကျဲ တိုက်ခိုက်နေကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဧပြီလ ၈ ရက်နေ့ နံနက် ၇ နာရီကျော်ခန့်တွင် တောင်သာမြို့နယ်၊ ပန်းပေါင်းရွာဂိတ်တွင် တပ်စွဲထားသော အကြမ်းဖက် စစ်တပ် စစ်ကြောင်းသည် မဲတောရွာကို ဝင်ရောက်စီးနင်းပြီး ပြည်သူပိုင် နေအိမ်များကို မီးရှို့ဖျက်ဆီးခဲ့ခြင်းဖြစ်ကြောင်း၊ ထို စစ်ကြောင်းသည် ကျေးရွာများကို မီးရှို့ဖျက်ဆီးသွားပြီးနောက် ပန်းပေါင်းရွာဂိတ်ကို ပြန်လည် ဆုတ်ခွာသွားကြောင်း သိရသည်။

ထို့ပြင် ဧပြီလ ၇ ရက်နေ့ ညနေပိုင်းကလည်း ရွှေမန်းဇရပ် အနီးတပ်စွဲထားသော အကြမ်းဖက် စစ်တပ်သည် စစ်ဘေးရှောင် ပြည်သူများနေထိုင်ရာ ရွှေစမ်းချောင်း ကျေးရွာဘက်ကို ဒရုန်းဖြင့် ဗုံးကျဲ တိုက်ခိုက်ခဲ့သောကြောင့် ပြည်သူ ၂ ဦး ထိခိုက်ဒဏ်ရာရရှိခဲ့ကြောင်း သိရှိရသည်။

"စစ်ခွေး စစ်ကြောင်းက ပန်းပေါင်းရွာဂိတ်မှာ တပ်စွဲပြီးတော့ အနီးအနားကရွာတွေကို စစ်ကြောင်းထိုးမီးရှို့နေတာ ဒီနေ့လည်း မဲတောရွာအရှို့ခံလိုက်ရတယ်။ စစ်ဘေးရှောင်ပြည်သူတွေကိုလည်း စစ်ခွေးတွေက ဒရုန်းတွေနဲ့ ဆက်တိုက် ဗုံးလိုက်ကျဲလို့ ပြည်သူတွေ ထိခိုက်မှုရှိတယ်" ဟု ဒေသပြည်သူတစ်ဦးက ပြောဆိုသည်။

အလားတူ ဧပြီလ ၅ ရက်နေ့ကလည်း အကြမ်းဖက် စစ်တပ်၏ မိတ္ထီလာလေတပ်မှ တက်လာသော စက်တပ်လေထီးများက ပန်းပေါင်းရွာကို ၂ ကြိမ် ဗုံးကျဲ တိုက်ခိုက်ခဲ့သောကြောင့် ကျေးရွာနေပြည်သူ အသက် ၆၀ ကျော်အရွယ် ဦးကြည်လှိုင်၊ ဒေါ်မြကြည် တို့ ဇနီးမောင်နှံနှင့် သမီးဖြစ်သူ ကိုယ်ဝန်ဆောင် အမျိုးသမီး အသက် ၃၂ နှစ်အရွယ် မထားထားဦး တို့ ပွဲချင်းပြီးသေဆုံးခဲ့ကြောင်း သိရသည်။

ထို့နောက် ဧပြီလ ၆ ရက်နေ့တွင် မြေပြင် စစ်ကြောင်းသည် ပန်းပေါင်းရွာကို ဝင်ရောက် စီးနင်းခဲ့ပြီး နေအိမ် ၆၀၀ ကျော်ကို မီးရှို့ဖျက်ဆီးကာ ပြည်သူပိုင် ပစ္စည်းများအပါအဝင် ကျေးရွာဘုန်းကြီးရှိ ဆရာတော်များ၏ ဖုန်းများပါ ခိုးယူသွားကြောင်း သိရှိရသည်။

ဓာတ်ပုံ - အကြမ်းဖက် စစ်တပ် မီးရှို့ဖျက်ဆီးခဲ့သော တောင်သာမြို့နယ်၊ ပန်းပေါင်းရွာ
#KTM
#HlaingInfo

CNG အိုးသက်တမ်း ၅ နှစ်ကျော်သည့် ယာဉ်များကို စာရင်းမှပယ်ဖျက်မည်ဟု စစ်ကော်မရှင်ထုတ်ပြန်၊ ဧပြီလကုန်အထိသာ နောက်ဆုံးထားစစ်ဆေးရမည်

ဧပြီလ ၈ ရက်

CNG အသုံးပြုနေသည့် မော်တော်ယာဉ်ပိုင်ရှင်များသည် လာမည့် ဧပြီ ၃၀ ရက်နေ့ နောက်ဆုံးထား၍ ဆလင်ဒါအိုးများ၏ လုံခြုံမှုအခြေအနေကို စစ်ဆေးခံရမည်ဖြစ်ပြီး၊ သက်တမ်း ၅ နှစ်ကျော်လွန်နေသည့် ယာဉ်များကို CNG သုံးစွဲမှုစာရင်းမှ အပြီးတိုင် ပယ်ဖျက်မည်ဖြစ်ကြောင်း စစ်ကော်မရှင်လက်အောက်ခံ စွမ်းအင်ဝန်ကြီးဌာနက ယနေ့ ဧပြီ ၈ ရက်တွင် ထုတ်ပြန်သည်။

အဆိုပါ သတ်မှတ်ရက်အတွင်း စစ်ဆေးမှုခံယူခြင်းမရှိသော ယာဉ်များနှင့် သက်တမ်း ၅ နှစ်ကျော် လွန်သည့် CNG ယာဉ်များကို မေလ ၁ ရက်နေ့မှစတင်ကာ CNG ယာဉ်စာရင်းမှ အပြီးအပိုင် ပယ်ဖျက် သွားမည်ဖြစ် ကြောင်း စစ်ကော်မရှင်က ဆိုထားသည်။

"တက္ကစီတွေနဲ့ လိုင်းကားတွေက CNG ကိုပဲ အဓိကအားကိုးနေရတာ။ အခု ဆီဈေးတွေတက်နေတော့ အားလုံးက CNG ပဲ တပ်ချင်နေကြတာ။ အခုလို အိုးဟောင်းတွေ ပယ်ဖျက်လိုက်ရင် အသစ်တွေအတွက် နေရာပြန်ရလာမလားတော့ မသိဘူး။ ဒါပေမဲ့ လက်ရှိသမားတွေအတွက်တော့ အလုပ်ရှုပ်ပြီး ဖိအားပေးခံရသလို ဖြစ်နေတာပေါ့" ဟု ရန်ကုန်ရှိ တက္ကစီယာဉ်မောင်းတစ်ဦးက ဧရာဝတီတိုင်းမ်ကို ပြောသည်။

ထို့ပြင် CNG အိုးသက်တမ်း ၅ နှစ်အောက် ယာဉ်များထဲမှ စစ်ဆေးမှုသက်တမ်း တစ်နှစ်ကျော်လွန်ပါက ဓာတ် ငွေ့ဝယ်ယူခွင့် (၃) လ၊ နှစ်နှစ်ကျော်လွန်ပါက (၆) လ စသဖြင့် ပြစ်ဒဏ်အလိုက် ဓာတ်ငွေ့ရောင်းချမှု ရပ်ဆိုင်းခံရမည်ဟုလည်း ထုတ်ပြန်ချက်တွင် ပါရှိသည်။

ထိုသို့လုပ်ဆောင်ရခြင်းမှာ CNG အိုးများ ကြံ့ခိုင်မှုမရှိခြင်းနှင့် ဓာတ်ငွေ့ယိုစိမ့်မှုများကြောင့် ဖြစ်ပေါ် လာနိုင်သည့် မီးလောင်ပေါက်ကွဲမှု အန္တရာယ်များကို ကာကွယ်ရန်ဖြစ်ကြောင်း စစ်ကော်မရှင်က အကြောင်းပြထားသည်။ထို့ ကြောင့် ယာဉ်ပိုင်ရှင်များအနေဖြင့် ဧပြီလအတွင်း မော်တော်ယာဉ်သုံး သဘာဝဓာတ်ငွေ့ဌာန (CNG) သို့ သွား ရောက်စစ်ဆေးခံရမည်ဖြစ်ပြီး CNG ဝယ်ယူခွင့်စာအုပ်နှင့် ကတ်သစ်များကို ထုတ်ယူရမည်ဖြစ်သည်။

လက်ရှိတွင် CNG အရောင်းဆိုင်များကို ရန်ကုန်၊ မန္တလေး၊ ပလိပ်၊ ချောက်နှင့် ရေနံချောင်းမြို့တို့တွင် ဖွင့်လှစ်ရောင်းချပေးလျက်ရှိသည်။

ဓာတ်ပုံ - ဧရာဝတီတိုင်းမ်
#AYAT
#HlaingInfo

သံဖြူဇရပ်မြို့နယ်၊ ထင်းရူးကျေးရွာရှိ စစ်တပ် စခန်းကို ဝင်ရောက်တိုက်ခိုက်မှု စစ်သား ၆ ဦးသေဆုံး

ဧပြီလ ၈ ရက်

မွန်ပြည်နယ်၊ သံဖြူဇရပ်မြို့နယ်၊ ထင်းရူးကျေးရွာရှိ အကြမ်းဖက် စစ်တပ် စခန်းကို ဝင်ရောက်တိုက်ခိုက်ခဲ့ရာ စစ်သား ၆ ဦးသေဆုံးခဲ့ကြောင်း RMA-Ramonnya Mon Army အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။

ဧပြီလ ၇ ရက်နေ့ နံနက် ၄ နာရီခန့်တွင် သံဖြူဇရပ်မြို့နယ်၊ ထင်းရူးကျေးရွာရှိ အကြမ်းဖက် စစ်တပ် စခန်းကို ရာမညမွန်တပ်တော်မှ ရဲဘော်များက ဝင်ရောက် တိုက်ခိုက်ခဲ့ကြောင်း၊ အဆို တိုက်ခိုက်မှုအတွင်း အကြမ်းဖက် စစ်တပ်ဘက်မှ စစ်သား ၆ ဦးသေဆုံးကာ ၈ ဦးထိခိုက် ဒဏ်ရာရှိခဲ့ကြောင်း သိရှိရသည်။

"စစ်ခွေး အင်အားကတော့ ခန့်မှန်းခြေ ၅၀ ဝန်းကျင်လောက်ရှိပါတယ်။ စစ်ခွေးတွေက ၆ ဦးသေဆုံးပြီး ၈ ဦး ထိခိုက်ဒဏ်ရာရတယ်။ ထိခိုက်ဒဏ်ရာရတဲ့ ၈ ဦးထဲမှာက ၃ ဦးက ပြင်းထန် ထိခိုက်ဒဏ်ရာရရှိတယ်။ စစ်ခွေးဘက်က လက်နက်ခဲယမ်းတွေ သိမ်းဆည်းရမိတာမျိုး မရှိပါဘူး"ဟု RMA-Ramonnya Mon Army အဖွဲ့မှ တာဝန်ရှိသူကပြောဆိုသည်။

အဆိုပါ တိုက်ခိုက်မှုကို ရာမညမွန်တပ်တော်မှ ရဲဘော်များက လုပ်ဆောင်ခဲ့ခြင်းဖြစ်ပြီး အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။

အလားတူ ဧပြီလ ၅ ရက်နေ့ကလည်း မုဒုံမြို့နယ် အမှတ် ၈ ကားလမ်းမကြီး၊ ရောင်းဒေါင်းနှင့် ကွမ်လှာ ကျေးရွာ အကြားရှိ ဇရပ်တစ်နေရာတွင် နေရာချထားသည့် အကြမ်းဖက် စစ်တပ်ကို ရာမညမွန်တပ်တော် (RMA) က ဝင်ရောက် တိုက်ခိုက်ခဲ့ရာ စစ်သား ၁ ဦး သေဆုံးခဲ့ပြီး ၃ ဦး ထိခိုက်ဒဏ်ရာရရှိခဲ့ကြောင်း သိရသည်။

#KTM
#HlaingInfo

ကာကွယ်ရေးဝန်ကြီးဌာနရဲ့ ကွပ်ကဲမှုခံယူထားတဲ့ အမျိုးသားလွတ်မြောက်ရေးတပ်တော် (NLA)ကို တမူးခရိုင်ကွပ်ကဲရေးကနေ ကားတစ်စီးထောက်ပံ့

ဧပြီလ ၈ ရက်

အမျိုးသားညီညွတ်ရေးအစိုးရ ၊ ကာကွယ်ရေးဝန်ကြီးဌာန(MOD)ရဲ့ ကွပ်ကဲမှုခံယူထားတဲ့ အမျိုးသား လွတ်မြောက်ရေးတပ်တော် (NLA)ကို တမူးခရိုင်ကွပ်ကဲရေးကနေ ကားတစ်စီးထောက်ပံ့ပေးလိုက် တယ်လို့ ထုတ်ပြန်ပါတယ်။

အမျိုးသားလွတ်မြောက်ရေးတပ်တော် (NLA) က ပြီးခဲ့တဲ့ မတ် ၂၀ရက်မှာ MOD အမှတ်(၁) စစ်ဒေသရဲ့ကွပ်ကဲမှုခံယူတာဖြစ်ပြီး တမူးခရိုင်အမှတ်(၆)တပ်ရင်းအဖြစ် ဖွဲ့စည်းထားတာပါ။
NLA တပ်ဖွဲ့ရဲ့ ထောက်ပို့အဖြစ် အသုံးပြုဖ်ို့ ကားတစ်စီး ထောက်ပံ့ပေးတဲ့သတင်းကို တမူးခရိုင် ကွပ်ကဲရေးက ဒီနေ့ ဧပြီ ၈ရက်မှာ ထုတ်ပြန်ခဲ့ပါတယ်။

ဒါအပြင် တမူးခရိုင်က PDF တပ်ရင်းတွေကို ပြည်သူလူထုက လှူဒါန်း‌တဲ့ ငွေတွေနဲ့ ကားတစ်စီးစီအပြင် ကျည်ကာနဲ့ Equipment တွေ ကို တမူးခရိုင်ကွပ်ကဲရေးက ပေးအပ် တပ်ဆင်ပေးခဲ့ပါတယ်။

NLA က ၂၀၂၁ ခုနှစ်၊ ဩဂုတ်လ (၂၃) ရက်နေ့မှာ Myanmar Federal Army (MFA) အမည်နဲ့ ပထမဆုံးသော တိုက်ပွဲကို တိုက်ခိုက်ခဲ့ပြီး အမျိုးသားလွတ်မြောက်ရေးတပ်တော် (National Liberation Army-NLA) အဖြစ် ၂၀၂၃ ခုနှစ်၊ မတ်လ (၅) ရက်နေ့မှာ စတင်ပြောင်းလဲဖွဲ့စည်းခဲ့ကာ ဒီနေ့အချိန်မှာ PDF တပ်ရင်းများအဖြစ် ဆက်လက်တိုက်ပွဲဝင်နေပြီ ဖြစ်ပါတယ်။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက ကွပ်ကဲမှု‌အောက် မရောက်ရှိသေးတဲ့ ဒေသကာကွယ်ရေးတပ်ဖွဲ့တွေကို ကွပ်ကဲမှု‌အောက် တာဝန်ထမ်းဆောင်ဖို့ ဖြစ်‌စေ၊ ကွပ်ကဲမှုအောက်ရှိ တပ်ရင်း၊ တပ်ဖွဲ့များနဲ့ စစ်ရေး ပူးပေါင်းဆောင်ရွက်နိုင်ဖို့ဖြစ်‌စေ အစဉ်အမြဲ ကြိုဆိုနေကြောင်း သတင်းထုတ်ပြန်ထားပါတယ်။

‎
#PVTV
#HlaingInfo

ရွှေကျင်နှင့် ဆားလင်းကြီး မြို့နယ်ရှိ ကျေးရွာများကို စစ်တပ်က လေယာဉ်၊ စက်တပ်လေထီးဖြင့် ဗုံးကျဲ တိုက်ခိုက်မှု ပြည်သူ ၁ ဦးသေဆုံးပြီး ကလေးငယ်များ အပါအဝင် ပြည်သူ ၅ ဦး ထိခိုက်ဒဏ်ရာရ

ဧပြီလ ၈ ရက်

ပဲခူးတိုင်း၊ ရွှေကျင်မြို့နယ်ရှိ ကျေးရွာများကို စစ်တပ်က လေယာဉ်ဖြင့် ဗုံးကျဲ တိုက်ခိုက်ခြင်းကြောင့် ပြည်သူ ၁ ဦး သေဆုံးပြီး ၃ ဦး ထိခိုက်ဒဏ်ရာရရှိခဲ့ကြောင်း KNU ဗဟိုက ထုတ်ပြန်ထားသည်။

ဧပြီလ ၄ ရက်နေ့တွင် ရွှေကျင်မြို့နယ်၊ ညောင်ပင်ကြီးရွာသစ် အတွင်းကို အကြမ်းဖက် စစ်တပ်က ဂျက်ဖိုက်တာ ၁ စီးဖြင့် ပေါင် ၂၀၀ ဗုံး ၃ လုံး ကျဲချ တိုက်ခိုက်ခဲ့ရာ ကျေးရွာနေပြည်သူ စောမင်းသူ ဗုံးစထိမှန် သေဆုံးခဲ့ပြီး အသက် ၃၀ နှစ် အရွယ် မောင်သောင်တာ၊ အသက် ၃၀ နှစ်အရွယ် စောမောရေထူးနှင့် အသက် ၂၅ နှစ်အရွယ် စောဒဲလေး တို့ ၃ ဦး ထိခိုက်ဒဏ်ရာရရှိခဲ့ကြောင်း သိရသည်။

အကြမ်းဖက် စစ်တပ်သည် ညောင်လေးပင်ခရိုင်အတွင်း မြို့နယ် ၃ ခုကို လက်နက်ကြီး၊ ဒရုန်း၊ လေယာဥ်များဖြင့် နေ့စဥ် ပစ်ခတ် တိုက်ခိုက်နေခြင်းကြောင့် ပြည်သူများ စိုးရိမ် ထိတ်လန့်ကြောက်ရွံ့မှုများစွာဖြင့် အသက်ရှင်သွားလာနေထိုင်နေကြရကြောင်း သိရှိရသည်။

အလားတူ စစ်ကိုင်းတိုင်း၊ ဆားလင်းကြီးမြို့နယ်ရှိ ကျေးရွာများကို အကြမ်းဖက် စစ်တပ်က စက်တပ်လေထီးဖြင့် ဗုံးကျဲ တိုက်ခိုက်ခြင်းကြောင့် ကလေးငယ် ၁ ဦးနှင့် မိခင်ဖြစ်သူတို့ ထိခိုက်ဒဏ်ရာရရှိခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဧပြီလ ၈ ရက်နေ့ မွန်းလွဲပိုင်းတွင် ဆားလင်းကြီးမြို့နယ်၊ ဝဲကြီးရွာနှင့် ဝဲကွဲရွာ အကြားကို အကြမ်းဖက် စစ်တပ်က စက်တပ်လေထီးဖြင့် ဗုံးကျဲ တိုက်ခိုက်ခဲ့ကြောင်း၊ ထို ဗုံးကျဲ တိုက်ခိုက်မှုအတွင်း ကလေးငယ် ၁ ဦးနှင့် မိခင်ဖြစ်သူတို့ ထိခိုက်ဒဏ်ရာရရှိခဲ့ကြောင်း သိရသည်။

"ဒီနေ့ မွန်းလွဲပိုင်းက ဆားလင်းကြီးမြို့နယ်၊ ဝဲကြီးရွာ နဲ့ ဝဲကွဲရွာ အရှေ့ဘက် မြစ်ကမ်းစပ်ကို ဗုံး ၁ လုံး နဲ့ မြစ်ကမ်းပေါ်က ငှက်ပျောခြံထဲ ကို ဗုံး ၁ လုံးကျတယ်။ စစ်ခွေးတွေက စက်တပ်လေထီးနဲ့ ဗုံး ၂ လုံး ကျဲချသွားတာ အဲတာ လသားအရွယ်ကလေးနဲ့ မိခင်ဖြစ်သူ ထိခိုက် ဒဏ်ရာရတယ်လို့ သိရတယ်" ဟု ဒေသပြည်သူတစ်ဦးက ပြောဆိုသည်။

#KTM
#HlaingInfo

ရန်ကုန်လေဆိပ်၌ ပြေး ၄ ပြေး စစ်ဆေးမှု မနက်ဖြန် စမည်

ဧပြီလ ၈ ရက်

ရန်ကုန်အပြည်ပြည်ဆိုင်ရာလေဆိပ်မှတဆင့် ပြည်တွင်း ပြည်ပ ဒေသအသီးသီးသို့သွားရောက်မည့် ခရီးသည်များ၌ စစ်ပြေး၊ ရဲပြေး၊ တပ်ပြေး၊ ထောင်ပြေး စသည့် ပြေး ၄ ပြေးများ မပါရှိစေရေး ခရီသည်မှတ်ပုံတင်ပါ အချက်အလက်များအား တိုးမြှင့်စစ်ဆေးမှုကို မနက်ဖြန်မှစ၍ ပြုလုပ်သွားမည်ဟု သိရသည်။

ဧပြီ ၉ ရက်မှစ၍ အပြည်ပြည်ဆိုင်ရာလေဆိပ်များမှ ပြည်တွင်းနှင့် ပြည်ပထွက်ခွာမည့် ခရီးစဥ်အားလုံးအတွက် သက်ဆိုင်ရာ လေဆိပ်အာဏာပိုင်များအနေဖြင့် ခရီးသည်အချက်အလက် စစ်ဆေးမှုများကို တိုးမြှင့်ဆောင်ရွက်သွားမည်ဟုလည်း အပြည်ပြည်ဆိုင်ရာမြန်မာလေကြောင်းလိုင်း (MAI)က ယနေ့ အသိပေးထုတ်ပြန်လာသည်။

ထုတ်ပြန်ချက်တွင် မြန်မာနိုင်ငံသား ခရီးသည်များအနေဖြင့် လေယာဥ်လက်မှတ် Booking ပြုလုပ်ရာ၌ မှတ်ပုံံတင် အချက် အလက်များ မှန်ကန်စွာဖြည့်သွင်းပေးရန်၊ Check-in ပြုလုပ်ရာတွင် မှတ်ပုံတင် အချက်အလက်စစ်ဆေးမှုများ အသေးစိတ် ပြုလုပ်သွားမည်ဖြစ်ပြီး ခရီးစဥ်နှောင့်နှေးမှုကြန့်ကြာမှုများ မဖြစ်စေရန်နှင့် စစ်ဆေးရေးလုပ်ငန်းစဉ်များအတွက် လုံလောက် သောအချိန် ရရှိစေရန် သတ်မှတ်ချိန်ထက် ကြိုတင်ရောက်ရှိရန် မေတ္တာရပ်ခံထားသည်။

ရန်ကုန်လေဆိပ်မှတဆင့် ပြည်တွင်း ပြည်ပဒေသအသီးသီးသို့ သွားရောက်ကြမည့် ခရီးသည်များတွင် တရားဥပဒေစိုးမိုးရေး ထိခိုက်ပျက်ပြားစေမည့် ပြေး ၄ ပြေး မပါရှိစေရန် ခရီးသည်များ၏ မှတ်ပုံတင်အချက်အလက်များ စိစစ်ဆောင်ရွက်မှုအား ပြည်တွင်း၊ ပြည်ပ ထွက်ခွာလက်မှတ်စစ်ကောင်တာများနှင့် ပြည်ပ ဆိုက်ရောက် လေကြောင်းရဲတပ်ဖွဲ့ ကောင်တာများတွင် လေကြောင်းရဲတပ်ဖွဲ့မှ စိစစ်ရန် လေဆိပ်ပူးပေါင်း ညှိနှိုင်းဆောင်ရွက်ရေးကော်မတီက ဧပြီ ၂ ရက်စွဲဖြင့် ထုတ်ပြန်ထားခြင်း ဖြစ်သည်။

လေတပ် CDM များ ပါဝင်သည့် မြန်မာ့စစ်ဘက်ရေးရာနှင့်လုံခြုံရေးဆိုင်ရာလေ့လာရေးအဖွဲ့ (MDSI)၏ တာဝန်ရှိသူ ဗိုလ်မှူး နောင်ရိုးက “အရင်က ကုန်းလမ်းကြောင်းတွေမှာ Tablet နဲ့ ကိုယ်ရေးအချက်အလက်တွေ စစ်နေတဲ့ဟာတွေက စစ်ပြေး၊ ရဲပြေးတွေကို အဓိကစစ်ဆေးနေတာ။ ကိုယ်ရေးအချက်အလက်၊ ဓာတ်ပုံ၊ မှတ်တမ်းတွေ အကုန်ထည့်ထားပြီးတော့။ အခု လေဆိပ်ကိုပါ ဒါတွေနဲ့စစ်တော့မှာ” ဟု ပြောသည်။

လေဆိပ်များအထိ ပြေး ၄ ပြေး စစ်ဆေးမှု ပိုမိုတင်းကျပ်လာခြင်းသည် စစ်အစိုးရအဆက်ဆက်မှ နိုင်ငံရေးအပြောင်းအလဲ ပြုလုပ်ချင်လာသည့်နောက်ပိုင်း လုပ်လေ့ရှိသည့်အတိုင်း CDM အပါအဝင် နိုင်ငံရေးလှုပ်ရှားမှုများတွင် ပါဝင်သူများကို ဖြေ လျှော့မှုပြုလုပ်သွားနိုင်ပြီး ပြေး ၄ ပြေး အုပ်စုကိုသာ အဓိကပစ်မှတ်ထားတော့မည်ဟု ယူဆနိုင်ကြောင်းလည်း ၎င်းက ဆိုသည်။

ဓာတ်ပုံ - MAI
#TIR
#HlaingInfo

လှိုက်စားနေသော အတွင်းမီးကို မငြှိမ်းသတ်နိုင်လျှင် နွေဦးတော်လှန်ရေး လေဖြတ်သွားမည်ဟုဆို

ဧပြီလ ၈ ရက်

လှိုက်စားနေသော အတွင်းမီးကို မငြှိမ်းသတ်နိုင်လျှင် နွေဦးတော်လှန်ရေးသည် လေဖြတ်ပြီး ကြွက်သားများ သိမ်’ သွားလိမ့်မည်ဟုNUGကာကွယ်ရေးဝန်ကြီးဌာန၊ PDFစစ်ရုံးချုပ်၊ ဒုတိယစစ်ဦးစီးအရာရှိချုပ် ဒေါက်တာစိုးသူရဇော်က ပြောသည်။

ယနေ့(ဧပြီ၈ရက်)ညဦးပိုင်းတွင် ဒေါက်တာစိုးသူရဇော်က ၎င်း၏ ဖေ့စ်ဘွတ်ခ်စာမျက်နှာမှနေ၍ တော်လှန်ရေးအတွင်းမီးပြဿနာ ကြီးမားပုံကို အထက်ပါအတိုင်း ရေးသားခဲ့ခြင်းဖြစ်သည်။

“အားမနာတမ်း ပြောရရင် လူထုကို မျက်နှာမမူတဲ့ အကျင့်ပျက် ငို့ဘများသည်ပင်လျှင် ရန်သူ စကမ နဲ့ တစ်ဂိုဏ်းတည်းပင်ဖြစ်ပါတော့တယ်။ လူထုကို မျက်နှာမမူတဲ့ ဘယ်သူ့ကိုမဆို မိမိတို့ ဆန့်ကျင် ကြရပါလိမ့်မယ် ။ တာထွက်မှာ Size ကြီးကြီးနဲ့ စတင်ခဲ့တဲ့ လက်နက်ကိုင်တော်လှန်ရေးဟာ အချိန် ကာလ ကြာလာတော့ မူလ အရွယ်အစားထက် သေးငယ်လာပါတယ် ။ဒီလို သေးငယ်လာမှုမှာ လမ်း ကြောင်း နှစ်ခုကို ဦးတည်စေတယ် ။နံပါတ်တစ်ကတော့ ကိုယ်ရည်စစ်သွားပြီး မာကျောမှု၊ ကျစ်လျစ် မှု ဂုဏ်ဒြပ် နဲ့ ပြည့်စုံသွားတာဖြစ်ပါတယ်။ ဘယ်လို ချေဖျက်ဖျက် မကြေပျက်နိုင်တော့ဘူး။ နံပါတ် ၂က တော့ ဆေးပညာအခေါ်အဝေါ်အရ Atrophy လို့ခေါ်တဲ့ သိမ်’ သွားတာ ဖြစ်ပါတယ်”ဟု ၎င်းက ပြောသည်။

လက်နက်ကိုင်တော်လှန်ရေး ၅ နှစ် ပြည့်ခါနီးတွင် မည်သူက ငါး၊မည်သူက ဖားဆိုသည်ကို ပြည်သူလူထုကလည်း တဖြည်းဖြည်း သိမြင်လာပြီဖြစ်ကြောင်းလည်း ဆိုသည်။

“အခုကာလကတော့ တော်လှန်ရေးအတွက် အင်မတန်အရေးကြီးတဲ့ အချိန်ကာလဖြစ်ပါတယ် ။ရန် သူရော မိမိပါ အချိန်ကို လုပြီး အလုပ်လုပ်နေရတဲ့ကာလဖြစ်ပါတယ် ။ နှစ်ဖက်စလုံး ဇွဲခတ်ပြီး အလုပ် လုပ်နေရတဲ့အချိန်မှာ အတွင်းမီးကြောင့် ဖြစ်တဲ့ပြဿနာတွေကို ရင်ဆိုင်ဖြေရှင်းရတာက အားတွေ ကုန်စေတယ်” ဟုလည်း ဒေါက်တာစိုးသူရဇော်က ဆိုသည်။

တော်လှန်ရေးခေတ်ဦး ညီအစ်ကို မသိတသိအချိန်တွင် မည်သူက ဘာလဲဆိုသည်ကို အကဲခတ်ရတာ ခက်ကြောင်း အကဲခတ် အဖြေထုတ်ပြီးချိန်မှာတောင် မိမိတို့အတွင်းကျကျ သိရှိလာသော အဖြေနှင့် ပြည်သူလူထုအမြင်တွင် မြင်၊ သိ၊ လက်ခံနေသည့် သရုပ်သကန်ကလည်း မတူသည့်အတွက် အထူး သတိကြီးကြီးထားပြီး ချဉ်းကပ်ခဲ့ရခြင်းများရှိကြောင်းလည်း ဆိုသည်။

“ဖွတ်ကြီးထွက်နေတာကို မြင်နေပါလျက်နဲ့ ကာလ၊ဒေသ၊ ပယောဂ မကိုက်ညီလို့ အရေးယူမှု မလုပ် နိုင်ဘဲ ထိန်းကျောင်းမှုပဲ ပြုခဲ့ရတာမျိုးတွေလည်း ရှိပြန်ပါတယ်”၎င်းက ဆက်လက်ပြောသည်။

နွေဦးတော်လှန်ရေးအောင်မြင်ရန် လူထုကို မျက်နှာမူပြီး ပြတ်ပြတ်သားသား ရှေ့ဆက် ဆောင်ရွက် ကြ ရမည်ဖြစ်ပြီး ပြည်သူများကလည်း နွေဦးတော်လှန်ရေးကို ဆက်လက်အားပေးကူညီ ထိန်း ကျောင်းကြရန် ၎င်းက မေတ္တာရပ်သည်။

ဓာတ်ပုံ- ဒေါက်တာစိုးသူရဇော် ဖေ့စ်ဘွတ်ခ်, တိုက်ပွဲဝင် ဒေါက်တာစိုးသူရဇော်
#MPA
#HlaingInfo

နတ်မောက်နှင့် မြို့သစ်မြို့ နယ်တို့တွင် စစ်တပ် စစ်ကြောင်းများကို ၂ ရက်ဆက် တိုက်ခိုက်မှု စစ်သား ၁၀ ဦးသေဆုံး

ဧပြီလ ၈ ရက်

မကွေးတိုင်း၊ နတ်မောက်မြို့နယ်ရှိ ကျေးရွာများကို စစ်ကြောင်းထိုးရန် ထွက်လာသော အကြမ်းဖက် စစ်တပ်ကို မိုင်းဆွဲတိုက်ခိုက်ခဲ့ရာ စစ်သား ၈ ဦးသေဆုံးခဲ့ကြောင်း နတ်မောက်ဂဠုန် PDF အဖွဲ့မှ ဗိုလ်အောင်ဒင်က ရန်ကုန်ခေတ်သစ်သတင်းဌာနထံသို့ပြောဆိုသည်။

ယနေ့ ဧပြီလ ၈ ရက်နေ့တွင် နတ်မောက်မြို့နယ်ရှိ ကျေးရွာများကို စစ်ကြောင်းထိုးရန် ထွက်လာသော အကြမ်ဖက် စစ်တပ်ကို မြို့သစ်မြို့နယ် ကျေးရွာတစ်ရွာအနီးတွင် တော်လှန်ရေး တပ်ဖွဲ့များက မိုင်းဆွဲ တိုက်ခိုက်ခဲ့ကြောင်း၊ ထိုတိုက်ခိုက်မှုအတွင်း အကြမ်းဖက် စစ်တပ်ဘက်မှ စစ်သား ၈ ဦး သေဆုံးကာ ထိခိုက်ဒဏ်ရာရရှိသူများပြားပြီး တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းသိရှိရသည်။

"ဧပြီလ ၄ ရက်နေ့ မွန်းလွဲ ၃ နာရီလောက်က နေပြည်တော်တပ်ရင်း ၉၀၃ စခန်းကို မီးရှို့သွားတဲ့ စစ်ခွေး စစ်ကြာင်းကို ဒီနေ့မှာ ကျွန်တော်တို့ မဟာမိတ် ပူးပေါင်းအဖွဲ့တွေက မိုင်းဆွဲတိုက်ခိုက်ခဲ့ပါ။ စစ်ခွေး အင်အားကတော့ ၈၀ လောက်ရှိတယ်။ စစ်ခွေး သေစာရင်းကတော့ ခန့်မှန်းခြေ ၈ ဦးလောက်သေတယ်။ စစ်ခွေး သေဆုံးတဲ့ ၈ ဦးထဲမှာ မြို့သစ်မြို့နယ် နယ်ထိန်း ဒညင်း ဆိုတဲ့ကောင်လည်း ပါတယ်လို့သိရတယ်။ ထိခိုက်ဒဏ်ရာရှိသူတွေလည်း များပြားတယ်" ဟု နတ်မောက်ဂဠုန် PDF အဖွဲ့မှ ဗိုလ်အောင်ဒင်ကပြောဆိုသည်။

အဆိုပါ တိုက်ခိုက်မှုကို နေပြည်တော်တပ်ရင်း ၉၀၃ နှင့် တပ်ရင်း ၉၀၂ တို့ ပူးပေါင်းဆောင်ရွက်ခဲ့ခြင်းဖြစ်ပြီး၊ တော်လှန်ရေးရဲဘော်များဘက်မှ အထိအခိုက်မရှိဘဲ ဘေးကင်းစွာ ဆုတ်ခွာနိုင်ခဲ့ကြောင်း သိရှိရသည်။

အလားတူ မကွေးတိုင်း၊ နတ်မောက်မြို့နယ်နှင့် မြို့သစ်မြို့ နယ်အစပ်ကို စစ်ကြောင်းထိုးရန် ထွက်လာသော အကြမ်းဖက် စစ်တပ်ကိုလည်း မိုင်းဆွဲတိုက်ခိုက်ခဲ့ရာ စစ်သား ၂ ဦးသေဆုံးခဲ့ကြောင်း မြို့သစ်မြို့နယ်ပြည်သူ့ကာကွယ်ရေးအဖွဲ့ မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။

ဧပြီလ ၇ ရက်နေ့ ညနေ ၃ နာရီ ၃၀ မိနစ်ခန့်တွင် နတ်မောက်မြို့နယ်နှင့် မြို့သစ်မြို့ နယ်အစပ် မိုးထိတောင်ဘက်သို့ စစ်ကြောင်းထိုးရန် ထွက်လာသော အင်အား ၂၀၀ ခန့်ပါ စစ်တပ်ကို တော်လှန်ရေး တပ်ဖွဲ့များက မိုင်းဆွဲ တိုက်ခိုက်ခဲ့ကြောင်း ၊ ထို တိုက်ခိုက်မှုကြောင့် အကြမ်းဖက် စစ်တပ်ဘက်မှ စစ်သား ၂ ဦးသေဆုံးကာ ၅ ဦး ထိခိုက်ဒဏ်ရာရှိခဲ့ကြောင်း သိရှိရသည်။

"ဒီနေ့ မြို့သစ်နယ် ကပစ ၁၇နဲ့ ၁၃ မိုင်ဝေးတဲ့ ပုလင်းပြားကြီးရွာအနီး MPT တာဝါတိုင်ဘက်တဝိုက် ၃ ကြိမ် တိုက်ပွဲဖြစ်ပါတယ်။ ဒဏ်ရာရနဲ့ သေတဲ့ စစ်ခွေးတွေကို ကပစ ၁၇ ထဲ နွားလှည်းနှင့်သယ်သွားပါတယ်။ စစ်ခွေးဘက် လက်နက်ခဲယမ်းတွေ သိမ်းဆည်းရမိတာမျိုး မရှိသေးဘူး။ မိုင်းဆွဲ တာအဓိကထားပြီး ၅ မိနစ်လောက်အပြန်အလှန် ပစ်တာရှိတယ် "ဟု မြို့သစ်မြို့နယ်ပြည်သူ့ကာကွယ်ရေးအဖွဲ့ မှ တာဝန်ရှိသူက ပြောဆိုသည်။

အဆိုပါတိုက်ခိုက်မှုကို မြို့ သစ်မြို့နယ်ပြည်သူ့ကာကွယ်ရေး အဖွဲ့နှင့် မဟာမိတ်(၉၀၃)တပ်ရင်းတို့က ပူးပေါင်းလုပ်ဆောင်ခဲ့ခြင်းဖြစ်ကာ၊ ပြည်သူများအနေဖြင့် ကျွန်ုပ်တို့ တော်လှန်ရေးရဲဘော်များကို ကူညီကြပါရန် သတင်းအချက်လက်များအချိန် မှီပေးပို့ရန် မကွေးတိုင်းဒေသကြီးမြို့သစ်မြို့နယ်ပြည်သူ့ကာကွယ်ရေးအဖွဲ့ မှ မေတ္တာရပ်ခံကြောင်းသိရှိရသည်။

ယနေ့ ဧပြီလ ၈ ရက်နေ့ နံနက်ပိုင်းတွင်လည်း မြို့သစ်မြို့နယ် တစ်နေရာတွင် တိုက်ပွဲများဖြစ်ပွားခဲ့ပြီး ဒေသပြည်သူများ တိမ်းရှောင်နေရကြောင်း၊ နတ်မောက်မြို့နယ်နှင့် မြို့သစ်နယ်မြို့နယ်တဝိုက်တွင် အကြမ်းဖက်စစ်တပ် နှင့် တော်လှန်ရေးတပ်ဖွဲ့များ မကြာခဏထိတွေ့ တိုက်ပွဲများ ဖြစ်ပွားနေပြီး စစ်ရေးတင်းမာနေသောကြောင့် ဒေသပြည်သူများ သတိထားပြုသွားလာကြရန် မြို့သစ်မြို့နယ်ပြည်သူ့ကာကွယ်ရေးအဖွဲ့ က အသိပေးပြောဆိုထားသည်။

#KTM
#HlaingInfo

စစ်ခေါင်းဆောင် မင်းအောင်လှိုင်က သမ္မတအဖြစ် ပုံဖမ်းနေသော်လည်း စစ်တပ်အာဏာကို လူယုံများ ဖြင့် ဆက်လက်ထိန်းချုပ်ထား

ဧပြီလ ၈ ရက်

အမည်ခံ "သမ္မတ" အဖြစ် ကျမ်းသစ္စာကျိန်ဆိုရန် ပြင်ဆင်နေသည့် အာဏာသိမ်းစစ်ခေါင်းဆောင် မင်းအောင်လှိုင်သည် ၎င်းတို့၏ ရွေးတုလွှတ်တော်မှတစ်ဆင့် အရပ်သားအစိုးရပုံစံ ဖမ်းနေသော်လည်း စစ်တပ်အာဏာကိုမူ လက်လွှတ်ခြင်းမရှိဘဲ ဆက်လက်ထိန်းချုပ်ထားဆဲဖြစ်ကြောင်း သိရသည်။

သမ္မတ အိပ်မက်အတွက် ၁၅ နှစ်တိုင် ဆုပ်ကိုင်ထားသည့် ကာကွယ်ရေးဦးစီးချုပ်ရာထူးကို ၎င်း၏ လူယုံတော် ဗိုလ်ချုပ်ကြီး ရဲဝင်းဦးအား လွှဲပြောင်းပေးခဲ့သော်လည်း စစ်ဗိုလ်ချုပ်များဖြင့်သာ ဝန်ကြီး အဖွဲ့ကို ဖွဲ့စည်းကာ နောက်ကွယ်မှ အုပ်ချုပ်ရန် စီမံထားကြောင်း CDM အရာရှိများက ထောက်ပြသည်။

"မင်းအောင်လှိုင်က စစ်တပ်ကို ဆက်ပြီးတော့ ထိန်းချုပ်ထားဆဲပဲ။ ဘာလို့လည်းဆိုတော့ သူ့ရဲ့ငယ်နိုင် ရဲဝင်းဦးကို ထားခဲ့တယ်။ နောက်တစ်ချက်က တပ်ချုပ် (ရဲဝင်းဦး) ထက် စီနီယာကျတဲ့ ဗိုလ်ချုပ်ကြီး ထွန်းအောင်ကို ကာကွယ်ရေးဝန်ကြီးအဖြစ် ခန့်ထားတယ်" ဟု လုပ်သက်ရင့် CDM ဗိုလ်ကြီးဇင်ယော်က ဧရာဝတီတိုင်းမ်ကို ပြောသည်။

စစ်ခေါင်းဆောင် အာဏာသိမ်းမှုတွင် အဓိကအခန်းကဏ္ဍမှ ပါဝင်နေသော တပ်ချုပ်သစ်ဖြစ်လာသူ ဗိုလ်ချုပ်ကြီး ရဲဝင်းဦး (OTS-77) သည် လက်ရှိ စစ်ကော်မရှင်အဖွဲ့ဝင်နှင့် ကာကွယ်ရေးဝန်ကြီးဖြစ်သူ ဗိုလ်ချုပ်ကြီး မောင်မောင်အေးနှင့် ဆွေမျိုးတော်စပ်သူ ဖြစ်သဖြင့် စစ်ခေါင်းဆောင်သည် ၎င်း၏ လက်ရင်းလူယုံ အသိုင်း အဝိုင်းဖြင့်သာ အာဏာကို ခွဲဝေကိုင်တွယ်နေခြင်း ဖြစ်သည်။

၎င်းနှင့်အတူ လူယုံတော်တစ်ဦးဖြစ်သည့် ဗိုလ်ချုပ်ကြီး ထွန်းအောင်မှာ အာဏာသိမ်းမှုအတွင်း စစ်ကော်မရှင်၏ လေကြောင်းတိုက်ခိုက်မှုကို ကိုင်တွယ်ရသော လေဦးစီးချုပ်ဖြစ်ပြီး စစ်တက္ကသိုလ် အပတ်စဉ် (၂၉) ကျောင်းဆင်းဖြစ်ကာ လက်ရှိတွင် စစ်အစိုးရ၏ ကာကွယ်ရေးဝန်ကြီးအဖြစ် စစ်ခေါင်းဆောင်က ခန့်အပ်ထားကြောင်း သိရသည်။

"ယူနီဖောင်းဝတ် ဝန်ကြီးနှစ်ယောက်နဲ့ စစ်တပ်ကို ထိန်းကျောင်းလို့ရအောင် လုပ်ထားတဲ့အနေ အထားမျိုးလို့ ကျွန်တော်တို့ တွေ့ရတယ်။ အဲဒီတော့ မင်းအောင်လှိုင်ရဲ့ အစီအမံအတိုင်း ဆက်သွားရမယ့် အနေအထားမျိုးပဲ။ နောက်တစ်ချက်က တပ်ချုပ်ဓာတ်ပုံတွေ ပြောင်းလဲမှု မရှိသေးဘူး" ဟု CDM ဗိုလ်ကြီးဇင်ယော်က ဆက်လက်ဆိုသည်။

ယင်းအပြင် ပြည်ထဲရေးဝန်ကြီးကိုလည်း တပ်ဖွဲ့စည်းပုံအရ အဆင့်သုံးနေရာဖြစ်သော ညှိနှိုင်းကွပ်ကဲ ရေးမှူး (ကြည်း၊ရေ၊လေ) ဗိုလ်ချုပ်ကြီး ကျော်စွာလင်းထက် စစ်ရေးအတွေ့အကြုံရင့် စစ်တက္ကသိုလ် အပတ်စဉ် (၃၆) ကျောင်းဆင်း ဒုဗိုလ်ချုပ်ကြီး ညွန့်ဝင်းဆွေအား ရွေးတုလွှတ်တော်မှတဆင့် အဆိုပြုခန့်အပ်လိုက်ကြောင်း သိရသည်။

အဆိုပါ ညှိ/ကွပ် ဗိုလ်ချုပ်ကြီး ကျော်စွာလင်းသည် စစ်တက္ကသိုလ် အပတ်စဉ် (၃၅) ကျောင်းဆင်းဖြစ်ပြီး စစ်လုံးဝ မတိုက်ဖူးသော်လည်း စစ်ထောက်ချုပ်အဖြစ် ခန့်အပ်ခံရကာ ၎င်းနှင့် ဒုဗိုလ်ချုပ်ကြီး ညွန့်ဝင်းဆွေတို့မှာ စစ်ခေါင်းဆောင်၏ လူယုံတော်များဖြစ်၍ ကိုင်တွယ်ကစားရန် နေရာပေးထားခြင်း ဖြစ်ကြောင်း CDM အရာရှိများက ဆိုသည်။

လက်ရှိတွင် သမ္မတနေရာ ရယူထားသည့် စစ်ခေါင်းဆောင်က ၎င်းတို့ လိုသလိုပုံဖော် ရေးဆွဲချုပ်ကိုင် ထားသော ၂၀၀၈ ဖွဲ့စည်းပုံ အခြေခံဥပဒေ၏ ပြဋ္ဌာန်းချက်များကို ကျော်လွန်၍ စစ်ဘက်ဆိုင်ရာ ဗိုလ်ချုပ်မှူးကြီး ရာထူးအား စွန့်လွတ်ခြင်းမရှိဘဲ ရယူသုံးနှုန်း ဖော်ပြနေသလို ရွေးတုလွှတ်တော်သို့ တက်ရောက်ခြင်းလည်း မရှိကြောင်း သိရသည်။

"လက်ရှိအထိ စစ်ဘက်ရာထူးဖြစ်တဲ့ ဗိုလ်ချုပ်မှူးကြီးဆိုတဲ့ ရာထူးကို ခေါ်နေတဲ့အပေါ်မှာ (စစ်ခေါင်းဆောင်) မင်းအောင်လှိုင်ရဲ့ အာဏာတပ်မက်မှုက ဘယ်လောက်အထိ များပြားတယ်ဆိုတာ ကျွန်တော်တို့ အကဲဖြတ်လို့ရပါတယ်" ဟု ဥပဒေပညာရှင် တရားလွှတ်တော်ရှေ့နေ စောဘဦးလေးက ဧရာဝတီတိုင်းမ်ကို သုံးသပ်ထောက်ပြသည်။

စစ်ကော်မရှင်၏ ထုတ်ပြန်ချက်အရ ‌ရွေးတုလွှတ်တော်သို့ စစ်အစိုးရအဖွဲ့အတွက် စစ်ခေါင်းဆောင်က အဆိုပြုခန့်အပ်သော ဝန်ကြီးဌာနနှင့် ဝန်ကြီးများ၊ သက်ဆိုင်ရာ တိုင်း/ပြည်နယ် ဝန်ကြီးချုပ်များ စသည့် ရာထူးများအပေါ် အမတ်တချို့ ဆွေးနွေးမှုများနှင့် ပတ်သက်၍ ၎င်းတက်ရောက် ရှင်းပြမည် ဆိုသော်လည်း စာ‌ပေးပို့မှုသာ ရှိလာခဲ့သည်။

ထို့အပြင် စစ်ခေါင်းဆောင်က ဝန်ကြီးများ၊ တိုင်း/ပြည်နယ် ဝန်ကြီးချုပ်များ ခန့်အပ်ရာတွင်လည်း လူယုံတော် စစ်ဗိုလ်ချုပ်များ၊ စစ်ဘက်အရာရှိဟောင်းများအပါအဝင် ၎င်းနှင့်အတူ အာဏာသိမ်းရာ၌ ပါဝင်လာသူ လက်ရှိတာဝန်ထမ်းဆဲ ဝန်ကြီးအများစု ထည့်သွင်း၍ ဝန်ကြီးဌာန (၃၁) ခု၊ တရားရေးပိုင်းနှင့် စသည်တို့ကို ဖွဲ့စည်းထားသည်။

ဆက်လက်ဖတ်ရှုပါရန် - ⤵️⤵️

သုံးစွဲသူအချက်အလက်များ စစ်ကောင်စီထံ လွှဲပြောင်းပေးခဲ့မှုဖြင့် တယ်လီနောကုမ္ပဏီကို မြန်မာသုံးစွဲသူများက နော်ဝေနိုင်ငံ၌ သမိုင်းဝင် တရားစွဲဆို

ဧပြီလ ၈ ရက်

၂၀၂၁ ခုနှစ် စစ်အာဏာသိမ်းပြီးနောက်ပိုင်း သုံးစွဲသူတို့၏ ကိုယ်ရေးကိုယ်တာ အချက်အလက်များကို စစ်ကောင်စီထံသို့ ပေးအပ်ခဲ့မှုနှင့်ပတ်သက်၍ မြန်မာနိုင်ငံမှသုံးစွဲသူများက တယ်လီနောကုမ္ပဏီကို နော်ဝေနိုင်ငံ၌ တရားစွဲဆိုလိုက်ပြီဖြစ်သည်။

ဤအမှုသည် ပုဂ္ဂိုလ်ရေးဆိုင်ရာ အချက်အလက် လုံခြုံမှုထက်မကဘဲ၊ စစ်အာဏာရှင်၏ အကြောက်တရားအောက်တွင် အရေးကြီးအချက်အလက်များ ထုတ်ဖော်ခံရခြင်းကြောင့် ဖြစ်ပေါ်လာသည့် ဖမ်းဆီးခံရမှု၊ နှိပ်စက်ညှဉ်းပန်းမှု၊ နိုင်ငံရေးအရဖိနှိပ်မှုနှင့် ဘဝများစွာ ပျက်စီးခဲ့ရမှုတို့အတွက် တရားစွဲဆိုလိုက်ခြင်းဖြစ်သလို၊ တာဝန်ခံမှု၊ ဂုဏ်သိက္ခာနှင့် တရားမျှတမှုတို့အတွက် တယ်လီနောသုံးစွဲသူ မြန်မာပြည်သူတို့၏ တိုက်ပွဲတစ်ခုလည်း ဖြစ်သည်။

တယ်လီနောမြန်မာအနေဖြင့် စစ်တပ်၏တောင်းဆိုမှုများအတိုင်း သုံးစွဲသူတို့၏ အရေးကြီးသော အချက်အလက်များကို လွှဲပြောင်းပေးခဲ့ကြောင်း၊ နော်ဝေနိုင်ငံအခြေစိုက် Telenor ASA အနေဖြင့်လည်း ဤသို့လုပ်ဆောင်ခြင်း၏ အန္တရာယ်များကို သိရှိခဲ့ပြီး အခြေအနေအရပ်ရပ်ကို ပုံမှန်အစီရင်ခံမှု ရရှိခဲ့သည့်အပြင် အချို့သောကိစ္စရပ်များတွင် လိုက်နာဆောင်ရွက်ရန်ပင် အကြံပြုခဲ့ကြောင်း အဆိုပါအမှုတွင် စွပ်စွဲထားသည်။

ဤတရားစွဲဆိုမှုကို ယနေ့၊ ဧပြီလ ၈ ရက်တွင် စတင်တင်သွင်းခဲ့ခြင်းဖြစ်ပြီး၊ တရားမျှတမှုနှင့် တာဝန်ခံမှုဆိုင်ရာ ဦးဆောင်လှုပ်ရှားမှု (Justice and Accountability Initiative - JAI) အဖွဲ့က Centre for Research on Multinational Corporations (SOMO) နှင့် Open Society Justice Initiative တို့၏ ပံ့ပိုးကူညီမှုဖြင့် သုံးစွဲသူများကိုယ်စား ဦးဆောင်တရားစွဲဆိုခဲ့ခြင်း ဖြစ်သည်။

ဤတရားစွဲဆိုမှုသည် အချက်အလက်များ ပေါက်ကြားစေမှု သက်သက်ကြောင့် ပေါ်ပေါက်လာခြင်း မဟုတ်ပေ။ နိုင်ငံတွင်း စစ်တပ်က မတရားဖမ်းဆီးခြင်း၊ နှိပ်စက်ညှဉ်းပန်းခြင်း၊ သတ်ဖြတ်ခြင်း၊ လျှို့ဝှက်တရားစီရင်ခြင်းနှင့် နိုင်ငံရေးအရ ဖိနှိပ်ခြင်းများကို ကျူးလွန်နေသည့် မြန်မာနိုင်ငံတွင် စစ်တပ်၏လုပ်ရပ်များကို သိသိနှင့် ထိုသို့အချက်အလက်များ ပေးအပ်ခဲ့ခြင်းကြောင့်သာ ဖြစ်ပေါ်လာရသည့် ဆိုးကျိုးများကြောင့်ပင်ဖြစ်သည်။

အဆိုပါ တရားစွဲဆိုချက်အရ အနည်းဆုံး ဖုန်းနံပါတ် ၁,၂၅၃ ခုနှင့် ဆက်စပ်နေသော ဖုန်းအချက်အလက်များ ထုတ်ဖော်ခံခဲ့ရသည်ဟု ဆိုသည်။ ယင်းသို့ အချက်အလက်များ ပေါက်ကြားခဲ့ခြင်းကြောင့် အာဏာသိမ်းမှုကို ဆန့်ကျင်သည်ဟု သံသယရှိခံရသူများသည် စောင့်ကြည့်ခံရခြင်း၊ ဖမ်းဆီးထိန်းသိမ်းခံရခြင်း၊ တရားစွဲဆိုခံရခြင်းများ ကြုံတွေ့ခဲ့ရပြီး အနည်းဆုံး အမှုတစ်ခုတွင် သေဒဏ်ပေးခံရသည်အထိ ဆိုးရွားသောအကျိုးဆက်များကို ရင်ဆိုင်ခဲ့ရကြောင်း တရားလိုများက ထောက်ပြထားသည်။

မြန်မာပြည်သူအများစုအတွက်မူ ဆင်းမ်ကတ်တစ်ခုသည် ဖုန်းနံပါတ် သက်သက်မျှသာ မဟုတ်ပေ။ ၎င်းသည် လူတစ်ဦးတစ်ယောက်၏ နေရပ်လိပ်စာ၊ သွားလာလှုပ်ရှားမှု၊ အဆက်အသွယ်များ၊ ဘဏ္ဍာရေးအခြေအနေနှင့် နိုင်ငံရေးအရ အန္တရာယ်ရှိနိုင်မှုတို့နှင့် တိုက်ရိုက်ချိတ်ဆက်နေသည်။

တယ်လီနောက ကောက်ယူသိမ်းဆည်းထားသည့် အချက်အလက်များထဲတွင် အမည်များ၊ နေထိုင်ရာလိပ်စာများ၊ ဖေ့စ်ဘွတ်ခ်နှင့် ဘဏ်အကောင့်များ၊ အီးဝေါလက် (e-wallets) များ၊ မှတ်ပုံတင်နံပါတ်များ၊ တည်နေရာပြ အချက်အလက်များနှင့် ဖုန်းခေါ်ဆိုမှု မှတ်တမ်းများ ပါဝင်ကြောင်း တရားစွဲဆိုမှုတွင် ဖော်ပြထားသည်။ စစ်အာဏာရှင်စနစ် ကြီးစိုးနေသည့် နိုင်ငံတစ်နိုင်ငံတွင် ယခုကဲ့သို့သော အချက်အလက်များသည် အရပ်သားပြည်သူများကို ဒုက္ခပေးမည့် လက်နက်တစ်ခုအဖြစ် အလွယ်တကူ ဖြစ်လာနိုင်သည်။

ထို့ကြောင့် ဤအမှုသည် တယ်လီနောဆိုသည့် ကုမ္ပဏီတစ်ခုတည်း၏ ပြဿနာထက် များစွာပို၍ အရေးပါနေခြင်းဖြစ်သည်။ အကယ်၍ ဤတရားစွဲဆိုမှု အောင်မြင်ခဲ့မည်ဆိုလျှင် အာဏာရှင်စနစ်အောက်တွင် သုံးစွဲသူများ၏ အချက်အလက်များကို ကာကွယ်ပေးရန် ပျက်ကွက်ခဲ့သည့် ဆက်သွယ်ရေး ကုမ္ပဏီတစ်ခုအနေဖြင့် ဥပဒေအရ တာဝန်ခံရမည် ဟူသော နိုင်ငံတကာအတွက် အရေးကြီးသည့် စံနမူနာကောင်းတစ်ခု ဖြစ်လာနိုင်ပေသည်။

ဆက်လက်ဖတ်ရှုပါရန် - ⤵️⤵️

မြန်မာနိုင်ငံတစ်ဝန်း စစ်ကောင်စီတပ်ဖွဲ့ဝင် ၁၇ ဦးသေဆုံး

ဧပြီလ ၈ ရက်

မြန်မာနိုင်ငံတစ်ဝန်း ဧပြီလ ၈ ရက်နေ့ ရရှိထားသော အချက်အလက်များအရ စစ်ကောင်စီ တပ်ဖွဲ့ဝင် ၁၇ ဦး သေဆုံးကြောင်း ပြည်သူ့ကာကွယ်ရေးတပ်ဖွဲ့များ၏ ထုတ်ပြန်ချက်နှင့်ပြောဆို ချက်များအရ သိရှိရသည်။

ရန်ကုန်ခေတ်သစ်အနေဖြင့် နေ့စဉ် စစ်သား သေဆုံးမှု စာရင်းများကို ထုတ်ပြန် ရာတွင် ဒေသကာ ကွယ်ရေးတပ်ဖွဲ့များ၏ ထုတ်ပြန်ချက်များနှင့် ပြောဆိုချက် များကို စုစည်းဖော် ပြရခြင်းဖြစ်ပြီး မြေပြင် အခြေအနေတွင် အမှန်တကယ် စစ်သားများ သေဆုံးမှု ရှိ၊ မရှိ ကွင်းဆင်း အတည်ပြုနိုင်ခြင်း မရှိသည်ကို သိစေအပ်ပါသည်။

#KTM
#HlaingInfo

‼️ ဧပြီလ ၈ ရက်နေ့ ၊ နေ့စဉ် သတင်းအကျဉ်းချုပ်‼️

01-အာဏာသိမ်း စစ်ကော်မရှင်ရဲ့ မွန်ပြည်နယ်အစိုးရအဖွဲ့သစ် ဝန်ကြီးချုပ်နဲ့ ဝန်ကြီးနေရာ အများစုကို စစ်တပ်နဲ့ ပြည်ထောင်စု  ကြံ့ခိုင်ရေးနဲ့ ဖွံ့ဖြိုးရေးပါတီ ကိုယ်စားလှယ်တွေက ရယူခဲ့ပါတယ်။

02-အကြမ်းဖက် စစ်ခေါင်းဆောင် မင်းအောင်လှိုင် သမ္မတရာထူး လုယူလိုက်မှုကြောင့် ဒဏ်ခတ်ပိတ်ဆို့အရေးယူမှုအသစ်များ တိုးမြှင့်လာနိုင်၍ ပြင်ဆင်မှုများ လုပ်ဆောင်ရန်  သြစတြေးလျအခြေစိုက် ရင်းနှီးမြှုပ်နှံမှုဆိုင်ရာ ဒေတာပလက်ဖောင်းတစ်ခုဖြစ်သည့် Meyka AI PTY LTD ၏  Meyka က ဧပြီလ ၆ ရက်နေ့တွင် ဆန်းစစ် သတိပေးချက်ထုတ်ပြန်သည်။

03-ကရင်နီပြည်နယ်မှာ စစ်ဒေသတွေသတ်မှတ်ပြီး တပ်ရင်းတွေ ပေါင်းစည်းတော့မယ်လို့ ကရင်နီအမျိုးသားများကာကွယ်ရေးတပ်(KNDF) တာဝန်ရှိသူက လူထုနွေဦးကို ပြောပါတယ်။

04-မြန်မာနိုင်ငံအတွင်းရှိ နှစ် ၂၀ သက်တမ်းရှိ ယာဉ်အိုယာဉ်ဟောင်းများကို အပ်နှံခိုင်းပြီး လျှပ်စစ်ကား (EV) များ အစားထိုး တင်သွင်းခိုင်းမည့် စစ်ခေါင်းဆောင်၏ အစီအစဉ်မှာ မင်းအောင်လှိုင်မိသားစု အပါအဝင် EV ကားတင်သွင်းခွင့် ရရှိထားသူများအတွက်သာ အကျိုးအမြတ် ရှိစေမည်ဖြစ်ပြီး ဂျပန်တစ်ပတ်ရစ်ကားများ ပိုင်ထားသော အခြေခံလူထုအတွက်မူ ပိုင်ဆိုင်မှုများ ဆုံးရှုံးနစ်နာစေမည်ဖြစ်ကြောင်း မော်တော်ယာဉ်ဈေးကွက် ကျွမ်းကျင်သူများက ဝေဖန်ထောက်ပြလိုက်သည်။

05-အာဏာသိမ်း စစ်ခေါင်းဆောင်ရဲ့ သမ္မတဖြစ်ချင်မှုကို စစ်ရေးအရ ကျားကန်ပေးတဲ့ မြေပြင်တိုက် ခိုက်ရေးအင်အားအတွက် နည်းမျိုးစုံ စုဆောင်းခံခဲ့ရတဲ့ စစ်မှုထမ်းအများစုဟာ အကျဆုံးများခဲ့တယ်လို့ CDM တပ်အသိုင်းအဝိုင်းက သုံးသပ်နေကြပါတယ်။

06-စစ်ကိုင်းတိုင်း၊ ကလေးမြို့၊ မော်လိုက်အကျဉ်းထောင်တွင် အကျဥ်းကျနေသည့် ချင်းလူမျိုး လေးဦးအပါအဝင် နိုင်ငံရေးအကျဉ်းသား ငါးဦး လွတ်ရက်စေ့ဖြင့် ပြန်လည်လွတ်မြောက်လာကြောင်း ထောင်နှင့် နီးစပ်သူများထံမှ သိရသည်။

07-အမျိုးသားညီညွတ်ရေးအစိုးရ၊ တရားရေးဝန်ကြီးဌာန၊ ကြားကာလတရားစီရင်ရေးဆိုင်ရာ ဦးစီးဌာနန နဲ့ မြို့နယ်တရားသူကြီးတွေ တွေ့ဆုံဆွေးနွေးပွဲ အမှတ်စဉ်(၂/၂၀၂၆) ကို ဧပြီ ၄ ရက် မနက် ၁၀ နာရီမှာ ပြုလုပ်ခဲ့ကြပါတယ်။

08-ရခိုင်ပြည် မင်းပြားမြို့နယ် ပုလဲတောင်ကျေးရွာနှင့် အနီးတစ်ဝိုက်ကို အကြမ်းဖက် စစ်ကောင်စီက ယနေ့ ဧပြီလ ၈ ရက် နံနက်ပိုင်းတွင် လေကြောင်းဗုံးကြဲတိုက်ခိုက်ခဲ့ကြောင်း ဒေသခံများထံမှ ကနဦး သတင်းရရှိသည်။

09-AAPP ရဲ့ ဧပြီ၇ရက်နေ့အထိ ထုတ်ပြန်ချက်အရ မြန်မာနိုင်ငံတဝှမ်းလုံးမှာ စစ်အာဏာသိမ်းမှုကာလ (၁၈၉၂) ရက်အတွင်း ပြည်သူ (၇၉၆၆) ဦးအထိ အကြမ်းဖက်သတ်ဖြတ်ခံခဲ့ရကြောင်း သိရပါတယ်။

10-လူထုခေါင်းဆောင် ဒေါ်အောင်ဆန်းစုကြည်ရဲ့ လုံခြုံရေးတာဝန်ထမ်းဆောင်ခဲ့သူ နိုင်ငံရေးအကျဉ်းသားဟောင်း ကိုမျိုးဇော်သိန်း (ခ)ကိုဘိုဘို (ခ)ကိုဘီလားဟာ ဧပြီ ၇ရက် ညနေပိုင်းက ကွယ်လွန်သွားခဲ့ပါတယ်။

11-မြန်မာနိုင်ငံတစ်ဝန်းရှိ မြို့နယ်အုပ်ချုပ်ရေးအဖွဲ့များတွင် အဖွဲ့ဝင်များ အဖြစ် တာဝန်ယူထားသည့် စစ်တပ်မှ ဗိုလ်မှူးများက သက်ဆိုင်ရာ မြို့နယ်လုံခြုံရေးနှင့်အုပ်ချုပ်ရေးခေါင်းဆောင် များဖြစ်လာပြီး သက်ဆိုင်ရာမြို့နယ်ဥက္ကဋ္ဌ ထွေ/အုပ်အုပ်ချုပ်ရေးမှူးအရာရှိများက မလွန် ဆန်ရဲဘဲ ကြောက်နေရကြောင်း ပြည်ထဲရေးသတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။

12-မြစ်ကြီးနားမြို့၊ ရွှေစက်ရပ်ကွက်ရှိ  ဆီဂို‌ဒေါင်ရှိခြံဝန်းတစ်ခုတွင် ယနေ့နံနက် ၈ နာရီခန့် မီးလောင်မှုဖြစ်ပွားခဲ့ကြောင်း သိရသည်။

13-၀ပြည်သွေးစည်းညီညွတ်ရေးပါတီ(UWSP/UWSA)ဌာနချုပ်ပန်ဆန်း(ပန်ခမ်း)မြို့အပြင် ၊ယောင်းပတ်းရွာမှာ တရုတ်နိုင်ငံသားပိုင် ယမ်းချက်စက်ရုံ မီးလောင်ပေါက်ကွဲပြီး သေဆုံးထိခိုက်သူများပြားခဲ့တယ်လို့ ဒေသခံ သတင်းရင်းမြစ်က ပြောပါတယ်။

14-တရားမဝင်ရွှေ့ပြောင်းဝင်ရောက်ခဲ့တယ်ဆိုတဲ့စွပ်စွဲချက်နဲ့ မြန်မာ ၃၅ဦးနဲ့သူတို့ကို လက်ခံထားတဲ့ မြန်မာအိမ်ရှင်ကိုဖမ်းဆီးခဲ့ကြောင်း ထိုင်းရဲတပ်ဖွဲ့က ထုတ်ပြန်ခဲ့ပါတယ်။

15-ရခိုင်ပြည်နယ်၊ မင်းပြားမြို့နယ်အတွင်းကို အကြမ်းဖက် စစ်တပ်က စစ်လေယာဉ်များဖြင့် ဗုံးကျဲတိုက်ခိုက်ခဲ့ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ပြောဆိုသည်။

ဆက်လက်ဖတ်ရှုပါရန် - ⤵️▪️

ခိုင်မာသော စိတ်ဓာတ်များကို အခြေခံ၍ လွတ်လပ်ခြင်း၊ ငြိမ်းချမ်းခြင်း၊ တရားမျှတခြင်း နှင့် တန်းတူညီမျှခြင်းတို့အတွက် တိုင်းရင်းသား ပြည်သူလူထုအပေါင်းတို့နှင့်အတူ ဆက်လက်တိုက်ပွဲဝင်သွားမည်ဖြစ်ကြောင်း Hlaing Info ဝိုင်းတော်သားများမှ ကတိပြုပါသည်။

ခေတ်အဆက်ဆက် အာဏာရှင်တော်လှန်ရေးတို့တွင် အသက်သွေးချွေးများ စွန့်လွှတ်အနစ်နာခံ၍ ဘဝများ ရင်းနှီးပေးဆပ်ခဲ့ကြသည့် အာဇာနည် သူရဲကောင်းများ၏ ဝိညာဉ်များကို အောက်မေ့သတိရတိုင်တည်လျက်  လေးနက်စွားကတိသစ္စာပြုအပ်ပါသည်။

မိဘပြည်သူများ ရန်သူမျိုးငါးပါးမှ အမြန်ဆုံးကင်လွတ်နိုင်ကြပြီး အမြဲတစေ ကျန်းမာချမ်းသာကြပါစေဟု  Hlaing Info ဝိုင်းတော်သားများမှ ဆုတောင်းမေတ္တာပို့သအပ်ပါသည်။🙏🙏🙏

သတင်းတင်ဆက်မှုကို ဒီမှာတင်ရပ်နားပါမည်။

Good night ပါခင်ဗျာ။

#HlaingInfo

မင်္ဂလာနံနက်ခင်းပါ....
ကျန်းမာရွှင်လန်းကြပါစေ....

ပူပင်သောကတွေ ကင်းဝေးပီး
ပျော်ရွှင်ချမ်းမြေ့သော
နေ့ရက်လေး ဖြစ်ပါစေ....

စိတ်ဆင်းရဲခြင်း
ကိုယ်ဆင်းရဲခြင်းတို့မှ ကင်းဝေးပီး
ကိုယ်စိတ်နှစ်ဖြာ ကျန်းမာ ချမ်းသာစွာဖြင့်
မိမိတို့၏ ခန္ဓာ့ဝန်ကို လွယ်ကူစွာ
ရွက်ဆောင်နိုင်ကြပါစေ....

ဘေးရန် ရောဂါ ကင်းစင်ကွာ၍
လိုရာဆန္ဒတွေ ပြည့်ဝကြပါစေ....

Hlaing Info အဖွဲ့သားများမှ ဆုတောင်းမေတ္တာပို့သလိုက်ပါသည်။🙏🙏🙏

#HlaingInfo