"يا اللي ندهْك الوعد وأبطيت كالعادة
‏أوجَع من أنّك نسيت؛ أن كنت مترَدّد

‏ما ياكل إلَّا [ الكلام ] أن فات ميعاده..
‏شفني قليلٍ بقى .. مِن شخص متبدّد

‏عـامٍ يعوْد الزمن .. موته ـــ وميلاده
‏ليـله هو إيّاه ـــ عيَّـا عنْك يتجدَّد

‏ما هو جديدٍ عليّ هالليل ــ معتاده
‏ نفسه، من آخر ثلاث سنين يتمدَّدّ"

"فمان الله يا حبٍ وقف ما كمّل المشوار
‏عرفنا مفرق الدربين ما يحتاج تكميله

‏بقت بس المعزّة بيننا ، ما كن شيء صار
‏و صرنا أغراب عقب الود : يا دنيا من أنتي له ؟"

"حبيبي يوم تجرحني تراك اقديت
‏ ومن قال انّك المخطي فـ انا خصمه

‏عسى يغفر لك الله حتى لو اخطيت
‏ماغير الانبياء اللي لهم عصمه

‏فدتك النفس لو سويت ماسويت
‏بنفسٍ بعْد صدّك شبْه منفصمه

‏سنين احاول اتخطّاك بس ازريت
‏فراقك كان وقعه للظهر قصمه

‏عرفت من البشر فـ غيابك ، وحبيت
‏لكن انت الوحيد اللي ترك بصمه"

"لا تساومني وانا ما عندي اغلى من بلادي
‏من يضحّي في بلاده لو يوقف معك كبّه"

"من عادتي ما احب قطف العناقيد
‏لو ما تهيّا ، موعدي .. مو نصيبي

‏ما بين عذري والرضا ، ارجع اعيد
‏عذب القصايد لين تطفي لهيبي

‏على امل .. من بعد ليل التناهيد
‏افرح واقول لشمس الاحزان غيبي

‏الله يزينها .. ولو زانت .. العيد
‏عيدين يصبح لو رجع لي حبيبي .."

جليّس البال ؛ هذا العيد مرّ ولا بعد مرّيت !
لك الله شوفنْي أدوّر صورك وميلة عقالك !

إذا ما جابتك لهفه ، ولا جابك بعد توقيت
عزايّ ان الغلا بقلبي ، ولا مره يجي ببالك ،

تظن إن المحبه ماهي بصوبك ! لذا لدّيت
تراك بـ قلبي الأول .. تراك بـ قلبي لحالك .

‏"كلّ ما زاد المطر والقاع تقبل صبّه
‏قلت: ياربّي ، وانا عبدك ولا تخلّيني

‏احفظ اللي والله إنّ اموت وانا أحبّه
‏واغفر ذنوبي وخلّه لي ولا تشقيني"

" رغمًا عن اللي حصل فيك وحصل فيني
كبييير ياقلبي اللي مانفذ صبره

ف إن قلت يرضيك؟ لا والله مايرضيني
-لكن ما فالعين غالي مارخص قدره-

بيروح مثله مثل من راح .. ويجيني
انا اعرف الواحد اليا اخطى على عمره

لا تشغلك غربتي عن ضحكة سنيني
قد طاول الحزن نفسي واحتسبت أجره

مدري وش اسم الشعور اللي يبكيني
بس ادري انه يجي .. من فتره لفتره

متوقع اعداي ، وش دخل محبيني ؟
يوم الجمل طاح من حملٍ قسم ظهره

ياليتها وقفت على سكاكيني
انا اتحداك تلقى بي مغزّ أبره

ماتشعر ان الدموع اجراء روتيني
الا ليا عشت بالدنيا على الفطره

على كثر حاجتي للدمع ياعيني
-ماشفت من يستحق ابكي على صدره- "

‏"مَحَد يدري انّي من فراقك غديت حْطام
‏اكابر على نفسي ، وانا ابخص بها وادرى

‏تبي الصدق لو تدري بي الناس عادي .. دام
‏كلامي معك ماله نتيجه .. وبـ الأحرى

‏تصدّق بي العَذّال ، وتفرّح النمّام
‏غريب .. وعليك افكار فـ البال ما تطرا

‏تركت اليقين ورحت لـ الشك ، والاوهام
‏وسلّمت نفسك .. حالتك حالة ( الأسرى )

‏مع انك على عِرْف بـ غلاتك ، وعلمٍ تام
‏ولكن عسى بـ مفارقي ، ذمّتك تبرا

-‏يكفّيني انّك كنت يومٍ من الأيام
‏حبيبي .. ولك في قلبي جروح ما تبرى -

‏احبّك .. وصاير منّك استعذب الألام
‏تجيني بجرح ، وكنّك تزّف لي بُشرى "

‏" عصي البوح شيمتك السكوت وطبعك الكتمان
‏ تحاصرك الطواري و الهواجس حارمتك النوم

‏يبكيك المطر .. ومداعب النسمات للأغصان
‏وفي صدرك كلام وفي عيونك لـ أبتسمت علوم

‏ تداري عن عيون اللي يشوفك ندبة الحرمان
‏وللحرمان في وجهٍ يصد مْن العيون وسوم

‏خذلك الظن يا موهوم لا تشره على الخلان
‏غفت عين العتب من بعد ما سالت دموع اللوم

‏ هي الأيام ، هذا طبعها من سالف الأزمان
‏من المؤسف بعد رغد الطموح تدوّر المقسوم

‏ یا ندمان السهر: ما فيه كاس ينسي الندمان!
‏ قصيدة! سالفة! بُشرى تسلي خاطر المهموم

‏يداويني كلام وفي مُراعاة الشعور إحسان
‏ عسى بعض الكلام اللي على هيئة حياة يدوم

‏ تبي مني شْفوفي ما يبي كسرى من النعمان
‏ عزيز النفس عن دربٍ يورده الهوان يشوم"

"‏نديم البال .. سلّم كل ما مريتني في البال !
‏مثل ما الليل مندوب الصباح ؟ الشوق مندوبي

‏تمهل خطوتك عجلة مساري والمساء مازال
‏عليك الله وامانه ما يجيك الضيم من صوبي

‏معي كلمه تقال .. وكلمتينٍ مستحيل تقال
‏لا لاعبها الهوى قامت تجنّى ، دوبها دوبي

‏مجفلك الكبر ، ولا من اول ؟ مايجيك جفال
‏تمثنى سيرتي .. كنك تمثنى في طرف ثوبي !

‏مشاعرك القديمه .. كانت تساعد للاسترسال
‏ومشاعرك الجديده .. صارت تبين لك عيوبي

‏تكلم ، عطني علومك و سولف ! قول كيف الحال
‏معاك ادنى الحروف العابرات .. تجيب مطلوبي

‏قبالً ما تبسم فيه وجهك .. ما يصير قبال
‏و طرقً ما يميز ضحكتك ما ميز اسلوبي !

‏احس ان البشر بلحالهم و احسك انت لحال
‏على كثر الوجيه الا انت محبوبي يا محبوبي !"

"ما عشت لك صدفة ، ولا عشت تخمين
‏ مَعْك الليالي فوق حلمي عطنّي

‏تحبك اللي تقسم العمر نصّين
‏ و تحنّ لك من غير ما تقولّ : حنّي

‏قمراك لو تقسى من الوقت و تلين
‏ ماطالها غيرك سوى بالتمنّي ..

‏حبك بدون شلون ؟ او كمّ ، و لـ وين ؟ ..
‏ و مافيه بعد الحب كلمة : ( لإنّي )"

"في رجا الشوق وإن غابت مواعيده
‏مامحى الوقت رسمٍ لك على بالي

‏وإن شكى القلب من همّه وتسهيده
‏ترضي الغالي ، الضحكة من الغالي

‏سمّ وآمر : على الخفاق ياسِيده
‏مستخفّه عليك الروح من تالي

‏عيّد الخاطر اللي شوفتك عيده
‏يابعد من رسايلهم بجوالي "

جليّس البال ؛ هذا العيد مرّ ولا بعد مرّيت !
لك الله شوفنْي أدوّر صورك وميلة عقالك !

إذا ما جابتك لهفه ، ولا جابك بعد توقيت
عزايّ ان الغلا بقلبي ، ولا مره يجي ببالك ،

تظن إن المحبه ماهي بصوبك ! لذا لدّيت
تراك بـ قلبي الأول .. تراك بـ قلبي لحالك .

‏"تعال نكسر حاجز الصمت بالصمت
‏و نقول بعيون اللقا.. أي حاجة

‏راحت ثلاث سنين من كبت في كبت
‏وعيّت علينا هالظروف انتواجه"

‏"ماكان ( صح ) اللي أسويه وياك
‏لكن عشانك كنت أشوف الخطاً : صح

‏( مارحت ) من كيفي وخليت دنياك
‏الين قلت بصوتك العذب لي : رح

‏( ضحيت ) بسنيني عساها فداياك
‏ما قلت لي بس الغلا قال لي : ضح"

"لو تاخذك مني طوال المسافات
‏موجود بزجاجة عطر وبشطر بيت

‏ما هو صحيح أن كل متوقعٍ آت
‏ياما توقعتك تجي وأنت ما جيت"

‏"عن اغلا الرسايل والمشاوير والساعي
‏تغاضى وخلّ جروحك الباقيه يقسَن

‏انا اللي رجعت ورجعتي مالها داعي
‏لو اني مكمل خطوة الهجر كان احسن"

‏"تطمن يا نهاية عامي .. ويا عامي اللي حل
‏تراك أنت السنين وعمري اللي عايشه كله

‏أنا يوم إنّي أسميك (عمري) ما لساني زل
‏وش الأيام لو ماهي "غلاك" وشمسه وظله

‏أحبك كل ما قالوا بدأ قلب الحبيب يمل
‏وأحبك كل ما قلت اسكتوا . لا يمكن أمله

‏وأحبك وأنت لا قلبك ولا قلبي لحقهم ذل
‏حبايب والقلوب نظاف، ما بنفوسنا علة

‏لقيتك والضياع أعمى عيوني.. لين صرت أدل
‏ودليت الطريق اللي قبل لقياك ما أدله

‏تخيرتك وأنا مالي خيار إلا أنت.. مو من قل
‏ولكن كنت ما تشبه أحد من بد خلق اللّٰه ..!"