مَيخالف
على كُل لحظة حسيت بيها بقساوة الدنيا
على كُل شعور مُزعج ومُأذي حسيت بيه
على كُل تَنهيدة طلعتها وأَنت تحاول تلزم الدمعة
رَب العالمين مَراح يعوفك وولا راح يأذيك
راح يعوضك بالوقت المُناسب وبالمكان المُناسب

دائماً جنت اكول
"حتى اذا وكعت كوم ، حتى اذا تعثرت ضل واكف وكمل ، حتى اذا رجلك كامت متشيلك ازحف ، المهم تكمل ..."
وبعدني عند رأيي هذا
بس

يمكن كل الضربات والوكعات جانن لاشيء ، واجتنا ضربة اقوى من هذني كلهن وتكسرت رجلينا

بس لتنسون ، احنا الي جنا نردد "يارب خليني بالمكان الي تشوفه مناسب إلي"
"علينا السعي وعليك النتيجة"
"اني راضي بالي رب العالمين يكتبه الي"

لعد ليش هسة زعلان ؟
مو اتفقنا ماكو تعب يضيع عند رب العالمين ؟
مو اتفقنا الله كاتبلنا شي احلى بمليون مرة من توقعنا ؟
مو احنا الي توكلنا على رب العالمين وسلمنا امرنا اله ؟
رب العالمين ميخذل ، رب العالمين ميضيع التعب ، رب العالمين حنون ، رب العالمين ميزعل عبده الي توكل عليه .

لتيأس من رب الكون .

يارب
أجبر بخاطري هاي المرة يارب

بالرغم من كل اليأس الي جاي ينهش بعظمي
بالرغم من كل الزعل والوجع الي بكلبي
بالرغم كلمة " ضاع تعبي " الي جاي تتردد بداخلي مليون مرة
بعدني واثقة بيك ياربي
تكسرت رجليناتي ومداكدر حتى ازحف .

كل ما الخوف يسيطر عليك
كل ما اليأس ينهش گلبك
كل ما تحس الدنيا انسدت بوجهك
تذكر انو كل هاي المشاعر والافكار وقتية
ماكو تعب يضيع
وكل ماينسد بوجهك باب ، حينفتحلك الف باب بداله.

وضلَ يلحُ على اللّٰه ويتحدى بأسّه
حتى غلب دعاؤه قدره فأستجيب له .

انك تتحدى يأسك وضعفك وقلة حيلتك حتى تكمل هو شي عظيم
وانك ترد على الصوت الي يكول "ماراح تكدر" بصوت أعلى "راح اكدر" هو شي اعظم
عدم استسلامك يعني عدم ندمك بالمستقبل
حاول حتى لو نتفة بس حتى بعدين تكول اني تحديت نفسي الي جانت تريد تستسلم وكدرت اكمل .
حاول ، ورب العالمين مراح يضيع محاولاتك سدى .

نفس المشاعر
نفس الزعل
نفس التساؤلات
بس هلمرة ماكو فرصة ثانية ...

غالباً هي هاي النهاية
نهاية جزء من حياتي مااضن راح اكدر انساه
نهاية الجزء الي ختمته بكلمة اني كدرت اكمل ، بس ما كدرت أوصل للي ردته
نهاية الجزء الي كلت بيه ميخالف يمكن مو هنا تبين نتيجة تعبي ،
هلمرة مراح اكول ميخالف ، حاولي مرة ثانية ، لتستسلمين ... كل الي اتمنى اسويه هو انو الزم روحي واحضنها بدون حجي ولا مثاليات .
اني كدرت اكمل لآخر نفس
بس فعلياً ... ماكدرت انجز شي ثاني غير هذا .
الحمدلله

المُحاولات ماانتهت
واني بعدني اكدر
اذا مو بهاي بغيرها

صباح الخير
﴿وَكَانَ سَعْيُكُم مَّشْكُورًا﴾
ما المشكور السعي أم النتيجة ؟
السعي ... !
لو سعيك حقيقي فأنت حصلت على النتيجة خلاص .

المعركة ماخلصت
المُحاولات ماكفت
التعب ماتعوض
وزهراء راح تكدر

شُكراً يارب
على كل صغيرة وجبيرة صارت بيومي الهادئ ، على كل بلاء رُفع عني ، على كل قوة وامل انطيتنياهم بوقت اني ضعيفة وفاقدة الامل .

مو كلشي يريده الانسان يتحقق
هذا شي ثابت بالدنيا
بس الي يهون هذا الشعور المزعج
"الي ليش هيج صار وبشنو غلطت"
هو أنك حاولت ،
سعيت ومااستسلمت من أول مرة .
هون على نفسك
الدنيا أكبر من هيج ، الفرح ممكن ينوجد بكومة شغلات متخطر على بالك .
والاهم من كل هذا
انو عندك رب كلش حنون على عباده ومراح يضيع التعب ولا الجهد ولا السعي الي سعيته .
ميخالف ، راح تمر .

ميأست من عندك يارب
رغم ماكو شي مشى مثل ماردت ولا مثل مااتوقعت
بس بعدني مؤمنة بيك ومنتظرة عوضك الي ،
منتظرة تحاوطني حنيتك ولطفك عليه يارب.
‏﴿إِذ يَقولُ لِصاحِبِهِ لَا تَحزَن إنّ الله مَعنا﴾.

السلام عليكم
صارلي ساعتين صافنة بالسگف
تذكرت اليوم نتائج القبولات
“جان المفروض أكون من بين الي دينتظرون“
هذا الشي الوحيد الي دااردده
بس هسة اني حايرة شلون حألم الكيمياء بيومين
واثناء هذا التفكير
ذكرياتي كفختني
تذكرت الصورة الي صورتها واني شادة راسي وحاطة سطل چاي ودااقرا بنص الليل
تذكرت كم مرة رجعت من المدرسة واني ماعندي ذرة طاقة اكمل بس كملت
تذكرت كلشي ، كل موقف ، كل مرة رجعت بيها من المدرسة والهواجيس تاخذني بالطريق ، كل البجي والسهر والزعل وكل المُحاولات الي راحت هباءً منثورًا .
الزعل رجع ياكل بكلبي رغم كل المواساة الي داواسي روحي بيهن .
مااعرف شتمنى ومااعرف شريد
مداتخيل روحي بأي مكان
احس كل هذا كابوس وحكعد منه بأي لحظة
زعلانة من كلشي وعلى كلشي
وماادري اذا كدرت لو لا .

ما بقت شغلة مالهيت بيها روحي بالفترة الأخيرة
بس بالاخير
ارجع لنقطة الصفر
شعور انو متعرف مصيرك مو حلو ويأذي بكد الدنيا
شعور من ماحصلت لا الفرح الي يناسبك ولا السعادة خيمت على بيتك حالك حال غيرك يأذي
كلشي جنت احلم بيه تبخر
كلشي جنت اصبر روحي علمودة راح
وحتى وان عرفت وين حتكون وجهتي ، بكل الأحوال حكون فاقدة شكو لحظة سعادة جنت استحقها واتمناها .
محاولاتي تبخرت وبالأخير ماكدرت .

هاي القناة جانت شاهدة على كل محاولاتي وكل مشاعري
اذا خلص هذا الكابوس فـ هي كذلك حتخلص ، وهذا الي اتمناه .
واتمنى تذمري مديأثر على احد
بس داكمل الي بديت بيه وداوثق مشاعر هاي المرحلة المؤذية بهاي القناة .

اني كدرت
صفحة سودة انطوت
وبعون رب العالمين الصفحات الجاية حتكون مليانة الوان
الحمدلله حتى يبلغ الحمد منتهاه ♥️