غالباً هي هاي النهاية
نهاية جزء من حياتي مااضن راح اكدر انساه
نهاية الجزء الي ختمته بكلمة اني كدرت اكمل ، بس ما كدرت أوصل للي ردته
نهاية الجزء الي كلت بيه ميخالف يمكن مو هنا تبين نتيجة تعبي ،
هلمرة مراح اكول ميخالف ، حاولي مرة ثانية ، لتستسلمين ... كل الي اتمنى اسويه هو انو الزم روحي واحضنها بدون حجي ولا مثاليات .
اني كدرت اكمل لآخر نفس
بس فعلياً ... ماكدرت انجز شي ثاني غير هذا .
الحمدلله

المُحاولات ماانتهت
واني بعدني اكدر
اذا مو بهاي بغيرها

صباح الخير
﴿وَكَانَ سَعْيُكُم مَّشْكُورًا﴾
ما المشكور السعي أم النتيجة ؟
السعي ... !
لو سعيك حقيقي فأنت حصلت على النتيجة خلاص .

المعركة ماخلصت
المُحاولات ماكفت
التعب ماتعوض
وزهراء راح تكدر

شُكراً يارب
على كل صغيرة وجبيرة صارت بيومي الهادئ ، على كل بلاء رُفع عني ، على كل قوة وامل انطيتنياهم بوقت اني ضعيفة وفاقدة الامل .

مو كلشي يريده الانسان يتحقق
هذا شي ثابت بالدنيا
بس الي يهون هذا الشعور المزعج
"الي ليش هيج صار وبشنو غلطت"
هو أنك حاولت ،
سعيت ومااستسلمت من أول مرة .
هون على نفسك
الدنيا أكبر من هيج ، الفرح ممكن ينوجد بكومة شغلات متخطر على بالك .
والاهم من كل هذا
انو عندك رب كلش حنون على عباده ومراح يضيع التعب ولا الجهد ولا السعي الي سعيته .
ميخالف ، راح تمر .

ميأست من عندك يارب
رغم ماكو شي مشى مثل ماردت ولا مثل مااتوقعت
بس بعدني مؤمنة بيك ومنتظرة عوضك الي ،
منتظرة تحاوطني حنيتك ولطفك عليه يارب.
‏﴿إِذ يَقولُ لِصاحِبِهِ لَا تَحزَن إنّ الله مَعنا﴾.

السلام عليكم
صارلي ساعتين صافنة بالسگف
تذكرت اليوم نتائج القبولات
“جان المفروض أكون من بين الي دينتظرون“
هذا الشي الوحيد الي دااردده
بس هسة اني حايرة شلون حألم الكيمياء بيومين
واثناء هذا التفكير
ذكرياتي كفختني
تذكرت الصورة الي صورتها واني شادة راسي وحاطة سطل چاي ودااقرا بنص الليل
تذكرت كم مرة رجعت من المدرسة واني ماعندي ذرة طاقة اكمل بس كملت
تذكرت كلشي ، كل موقف ، كل مرة رجعت بيها من المدرسة والهواجيس تاخذني بالطريق ، كل البجي والسهر والزعل وكل المُحاولات الي راحت هباءً منثورًا .
الزعل رجع ياكل بكلبي رغم كل المواساة الي داواسي روحي بيهن .
مااعرف شتمنى ومااعرف شريد
مداتخيل روحي بأي مكان
احس كل هذا كابوس وحكعد منه بأي لحظة
زعلانة من كلشي وعلى كلشي
وماادري اذا كدرت لو لا .

ما بقت شغلة مالهيت بيها روحي بالفترة الأخيرة
بس بالاخير
ارجع لنقطة الصفر
شعور انو متعرف مصيرك مو حلو ويأذي بكد الدنيا
شعور من ماحصلت لا الفرح الي يناسبك ولا السعادة خيمت على بيتك حالك حال غيرك يأذي
كلشي جنت احلم بيه تبخر
كلشي جنت اصبر روحي علمودة راح
وحتى وان عرفت وين حتكون وجهتي ، بكل الأحوال حكون فاقدة شكو لحظة سعادة جنت استحقها واتمناها .
محاولاتي تبخرت وبالأخير ماكدرت .

هاي القناة جانت شاهدة على كل محاولاتي وكل مشاعري
اذا خلص هذا الكابوس فـ هي كذلك حتخلص ، وهذا الي اتمناه .
واتمنى تذمري مديأثر على احد
بس داكمل الي بديت بيه وداوثق مشاعر هاي المرحلة المؤذية بهاي القناة .

اني كدرت
صفحة سودة انطوت
وبعون رب العالمين الصفحات الجاية حتكون مليانة الوان
الحمدلله حتى يبلغ الحمد منتهاه ♥️

القصة ماخلصت
المُحاولات ماخلصت
كل مااطوي صفحة افتح صفحة جديدة احلى من الي قبلها ... مليانة بـ “اني اكدر“

راح يمر
كل شعور مو حلو تحس بيه
كل موقف سيء مريت بيه
كل زعل ملىء كلبك
كل وجع يأذيك
كل فترة تحس بيها وكأنو اكو جبل كاعد على صدرك
راح يمر ويخلص ،
الفرج جاي يعني جاي ، بس اصبر ولتستسلم .

العثرة لا تمنع المحاولة
الحياة بيها هواي عثرات
كل صفحة جديدة تكتبها بحياتك
كل محاولة تحاولها علمود توصل ومتوكف بمكانك ، حيكون بيها عثرات
وبس الشاطر الي يكمل ويكوم بعد هاي العثرات
اما الي راح يوكع وميشيل روحه ، محيكدر يشوف رب العالمين شضاملة .

العام الي فات كتبت هاي الرسالة واني بقمة اليأس والزعل
بس جان عندي امل
عرفت انو رب العالمين مراح يعوفني وديسمعني
وبعد مرور سنة وبنفس التاريخ
اني كاعدة بنص المكان الي رب العالمين كتبه الي ، واني سعيدة ومرتاحة واكول الحمدلله .
عسى اعوامي كلها تكون بهذا الهدوء والراحة
والحمدلله 🤍.

من تشوف الشي الي تريده هواي وضال بنفسك يبتعد عنك لأسباب تافهة ، ابتعد ووكل امرك لرب العالمين
ويااما راح يصير ، او يجيك الاحسن منه
رب العالمين ميخذل الي يتوكل عليه .

“ التعب مايضيع “
جُملة جنت أسمعها بكثرة وأحياناً أرددها بداخلي بكُل مرة أدخل بأقصى مراحل اليأس ... جنت مستغربة ، شلون يعني التعب مايضيع ؟ اذا أني رسبت بالامتحان الي درستله ؟ واذا أني ماحصلت علىٰ النتيجة الي ترضيني ؟ .
بعدين ... بنص لحظة السعادة والراحة ، بنص لحظات تأملي لأجمل عطايا رب العالمين إلي ... تذكرت كُل لحظات التعب وكُل الجهُد الي حسيته ضاع .
رب العالمين يقدر السعي ، وينطي صاحب السعي بكد السعي مالته وفوكاه حبة مِسك ،
لأن الانسان ما يأس من ربه وتوكل عليه وخلى كُل ثِقته بيه .
﴿‏وَأَن لَيسَ لِلإِنسانِ إِلّا ما سَعى۝وَأَنَّ سَعيَهُ سَوفَ يُرى﴾
ورب العالمين مَيخلف بوعده .

ادري بيوم من الايام هاي النِعم راح تزول لان ماكو شي دائم بالدنيا ،
بس اتمنى من رب العالمين ينطيني الاحسن منها one day .
And I know he will do 🤍.

كلشي بهاي الدنيا زائل وماكو شي راح يدوم
فـ عيش حياتك بدون ندم .