بعيداً عن الطاقة الإيجابية الي احاول اطمن روحي بيها
احس اني حالياً واصلة لـ لبة الفشل
أعمق مرحلة ممكن الانسان يوصلها
لدرجة اشوف روحي كلشي مااستاهل .
اني الي سويت بروحي هيج .

ماادري اذا محاولاتي اليوم جانت كافية او لا
ماادري اذا اُعتبر حاولت أصلاً
كل الي أعرفه هو اني سويت الي اكدر عليه .

..
الشي الي حاولت اتخطاه صارلي فترة
الشي الي كسرني وضيع تعبي وداس ببطني
بعد ما غصبت روحي اتخطاه لأن هو شي مراح يأثر عليه ولا على حياتي ولا مستقبلي ، شي تافه بس يوجع
اليوم رجع كسرني
بس ميخالف
لأن ماكو شي اسمه "ضاع تعبي"
الله راح يعوض هذا التعب الي محد يشوفه غيره .
بعدني اكدر ، وراح اكدر .

يلا نحاول مرة ثانية

مرات اكول ..
"ماسويت هواي اليوم"
"جان لازم احاول اكثر"
"تعبج ضاع"
"يارب راح أحصل الي اريده؟"
بس ..
﴿وَأَن لَّيْسَ لِلْإِنسَانِ إِلَّا مَا سَعَىٰ﴾
﴿وَلَيُبَدِّلَنَّهُم مِّن بَعْدِ خَوْفِهِمْ أَمْنًا﴾.
﴿وَلَسَوْفَ يُعْطِيكَ رَبُّكَ فَتَرْضَىٰ﴾
‏﴿أُجِيبُ دَعْوَةَ الدَّاعِ إِذَا دَعَانِ﴾

اكو هواي ظروف تخلي الانسان يوكف بمكانة .
شكد ما يحاول يتحرك مَيكدر
بس شكد ناوي تضل واكف بمكانك ؟
الدنيا دتمشي ، وانتَ بعدك .

صَعب اكول "ضاع تعبي"
لأن ادري ماكو شي يضيع عند رب العالمين
بس مع هيج ، يزعل ويحز بالخاطر لمن تحاول بكل جهدك وتوكع ، وترجع تكوم وتحاول
وترجع توكع مرة ثانية وثالثة وعاشرة .
بس
تبقى فكرة "ماكو شي يضيع عند رب العالمين"
هي الشي الوحيد الي يشيلني ويخليني اكمل .

تذكير سريع :
اليوم هم سويت الي عليك والي تكدر عليه
لتنسى تشكر روحك الي بعدها تقاوم رغم كلشي .

السلام عليكم

توكل على رب العالمين وكمل وسوي كل الي تكدر عليه ، لتوكف علمود شي سواء جان صغير او جبير .. ركز على المستقبل .
و
خلي عندك ثقة بروحك

معسلامة

صباح الخير
كمية الهوسة الي بعقلي مو طبيعية
احس الوقت مجاي يسعفني
ماكو شي جاي يسعفني .

2024/12/26
اليوم ، حاولت اكتب الي احس بيه ، مشاعري .
بس .. مجاي اكدر الكه الكلمات الي تعبر عن وضعي عن نفسيتي ، عن واقعي .
هاي هي اسوء ايامي
عيوني مجاي تساعدني ابد .. عقلي كل شوية يذكرني بشي قديم وطبعاً كلش مؤذي
كل سنة بهذا اليوم اطلب شي من رب العالمين ، اعفاء نجاح اروح لفلان مكان أحصل هيج شغلة .
بس هاي السنة .. اتمنى من كل كلبي اروح لمكان أحن عليه من هنا .
راح أعتبر الشي الي شفته اليوم ، والمشاعر الي حسيتها .. هدية رب العالمين الي بعيد ميلادي . وممكن وياها كفخة ادراك
كلش عشوائي مو ؟
هذا عقلي حالياً .

صباح الخير
الحمدلله لأن شهدنا يوم جديد نكدر نحاول بيه مرة ثانية ونعوض الي فات .

احب روحي الي تكوم وتحاول مرة ثانية
حتى اذا جانت تمر بأسوء فترة بحياتها .
بيوم من الايام
راح اخلي هاي الروح فخورة ، وعد .

اني مو سلبية .. اني زعلانة من الدنيا
اني مو كئيبة .. اني خايفة
اني مجاي اخذ دور الضحية .. اني متأذية ومجاي اعرف شلون اداوي روحي
بكل ليلة احط سماعاتي بأذني .. وأعلي الصوت لآخر درجة بس حتى يختفن الاصوات الي بعقلي
بكل مرة مخدتي تبللت من الدموع
بكل لحظة جبرت روحي اكوم واكمل
جنت خايفة .
انمحت كل الذكريات الحلوة الي صارت بـ24 .. حققت انجازات صغيرونة وجبيرة ، ضليت احاول لحد اخر لحظة ، حبيت نفسي اكثر بهاي السنة ، وعيت اكثر بهاي السنة .. بس
ختام هاي السنة حيكون دموع .
اتمنى تكون سنة 25 حنونة عليكم وعليه .

مرات استغرب من كمية الثقة الي عندي لمن اكول الله راح يعوضني
ماادري شوكت وشلون وليش بس متأكدة رب العالمين راح يجبرني بالنهاية
حتى من افكر واكول وذنوبج ؟ واخطائج ؟ وووو ؟
اني عبد كلش خَطّاء ، بس هذا الامل الي بداخلي بعده موجود .

قاوم
لحد اخر دقيقة تبقالك
لتستسلم .. الموضوع مو صعب مثل ما انت متخيل
خلي عندك ثقة بروحك .

التعب الي تعبته على شي معين بيوم من الايام
ونتيجتة ماطلعت وحسيت تعبك ضاع
راح يرجعلك ، بيوم من الايام راح يتعوض هذا التعب ومراح يروح
كلشي تتعلمه راح يبقى بعقلك
كلشي تحاول علمودة راح يساعدك بيوم من الايام
كل الي صار هو نتيجة تعبك ماطلعت بوقتها .
لتيأس ، دائما اكو فرص ثانية .

تذكر دائماً :
من تتعب وتضغط على روحك وتحاول بكل طاقتك ولحد اخر لحظة تبقالك ،
اعترف بجهودك هاي ، بمحاولاتك
لتكول مو كافية ، او "ماحاولت بشكل كافي اليوم"
خلي ببالك ﴿لَا يُكَلِّفُ اللَّهُ نَفْسًا إِلَّا وُسْعَهَا﴾.
هون على روحك الي جاي تحاول تسوي كل الي تكدر عليه .

بطريق الرجعة وانت تمشي وتفكر بالي صار ، ليش ؟ شنو الغلط ؟ اني مو حاولت ؟ اني مو تعبت ؟
ذكر نفسك بـ‏﴿وَإِلَيهِ يُرجَعُ الأَمرُ كُلُّهُ فَاعبُدهُ وَتَوَكَّل عَلَيهِ﴾
ضوج ، ابجي ، ازعل
بس وراها كوم وكمل الي بديته
الي يتوكل على رب العالمين ميوكفه شي
روح حاول ، واغلط وتعلم من غلطك .
لتستسلم ، اكو فرصة ثانية .

"مو دائماً كلشي يصير نفس توقعنا"
ممكن أنت تريد شغلة، تشتغل على شغلة، عاجبتك شغلة بس بعدين فجأة تلكه عندك شي أحسن مِن هاي الشغلة الي ردتها
وأحياناً لا
ممكن تطول وتحس بالظلم وتضل تسأل نفسك ليش ؟
كل انسان ممكن يمر بهيج حالة ، الشي الوحيد الي يختلف شلون كل واحد يتعامل وياها .
إذا تريد شي ضل اسعى اله
اذا حاولت ومَتوفقت جرب طريقة ثانية
رب العالمين مراح يحط رغبة معينة بنفسك الا وهو يدري انت راح تكدر .
شنو قيمة الحياة بدون محاولات ؟

يمكن النصف الأول من وحدة من الخطوات الي تخطيها تجاه شي معين ماتكون مثل ماتخيلت .
يمكن جانت اصعب عليك ، او ممكن ماحسيت بيها .
بكل الأحوال أنت كدرت تكمل نص الطريق .
بغض النظر عن شلون راح يكون النصف الثاني
لتنسى الله وياك وحواليك ، مثل ما ساعدك وغمرك برحمته ولطفه بالبداية راح يكمل وياك .
كافئ نفسك واشكرها على محاولاتها .. حتى تكمل الي بديت بيه وتوصل للمكان الي رب العالمين كاتبة الك .