شهادة ام البنين. ع

ناديت يحسين بدمع. وانه اعله بابك
ماكلت هاي الخادمه. تموت بغيابك
لو دهري ذبني. حاچيني يبني

.......

شعندي ييمه بدنيتي. بس الله وانته
خليت وجهي والكلب. سكته اعله سكته
وياك يايمه العمر. اتمنه اخذته
بشيباتي احلفك والبخت. بداعة شبابك

لو دهري ذبني. حاچيني يبني

......

زينب شفتهه تحضرت. وشفت المحامل
حضرت انه هدومي لچن. ظل دمعي نازل
من كتله اروح شكد بچه. كبالي بو فاضل
ياكلبي نيتهم اظل. ظل بعذابك

لو دهري ذبني. حاچيني يبني

......

بلحظات الوداع الهظم. تارسني بالباب
وكل لحظه زينب تلتفت. لكن بله جواب
ومابينهه وبيني بكن. دمعات العتاب
ياوجهي ظل سابح دمع. لصبح خضابك

لو دهري ذبني. حاچيني يبني

.......

خطوه اعله خطوه والضعن. يبعد عليه
لو صوتي طالع چا صحت. شماحيل بيه
مو عاده تنسون الخدم. يبن الزچيه
بالبيت ماظل بس عطر. ريحة ثيابك

لو دهري ذبني. حاچيني يبني

.........

ميموت كلبي من السفر. واحمل همومه
مو انته كايلي كبل. كلمن ويومه
تاليهه ردالي الخبر. عالغبره نومه
عالنفَس اعتب ماوكف. ساعة مصابك

لو دهري ذبني. حاچيني يبني

.....

بعد العشيره ولاكو چف. يغمض عيوني
يحشمون بالغربه الي. من شيعوني
وحشه الجنازه والولد. چنهم نسوني
والحمد لله هالعمر. چان بثوابك

لو دهري ذبني. حاچيني يبني

......

نسألكم الدعاء
حسين صادق العقابي

افراح شعبانية

قصيدة بمناسبة ولادات الاقمار المحمدية



فرحانه املاك السمه بشعبان وهلاله
مولد اقمار لحيدره والفرحه تحلاله

وياي. صلو اعله النبي
وياي. صلو اعله النبي

……

ياعلي. ياعلي. مبروك هاي الليله
ياعلي. ياعلي. حتى الفرح شد حيله
ياعلي. ياعلي. الله الوحي يناديله
ياعلي. ياعلي. خمسة اقمار اهديله

وتعنه جبريل ونسيم الجنه بجناحه
وبابك يحيدر مبتسم وهوايه افراحه

وياي. صلو اعله النبي

…….

نبتدي. نبتدي. بصفكه وفرح وزياده
نبتدي. نبتدي. بحسينك وميلاده
نبتدي. نبتدي. ياهلا بجد الساده
نبتدي. نبتدي. عسانه من عواده

هالليله دار ام الحسن بالفرحه معموره
بصف المهد ناده النبي فاطمه مشكوره

وياي. صلو اعله النبي

…….

ياقمر. ياقمر. ساقي عطاشه حسينه
ياقمر. ياقمر. من جودك تروينه
ياقمر. ياقمر. شمع الفرح بيدينه
ياقمر. ياقمر. مولدك خير اعلينه

اربع ائمة قبّلو چفك يبو الغيره
ياتارس الدنيا ضوه من ديره ولديره

وياي. صلو اعله النبي

…….

بالورد. بالورد. والياس تارس مهده
بالورد. بالورد. حسين ابتسامه بخده
بالورد. بالورد. مولد حليف السجده
بالورد. بالورد. لاذت الدنيا بسده

بزين العباد ومولده يفرح كلب زينب
ياقاب قوسين لگلب والده المهذب

وياي. صلو اعله النبي.

……

بالفرح. بالفرح. مولد الاكبر يحله
بالفرح بالفرح. صوت القصايد يعله
بالفرح. بالفرح. يا ابن ثالث قبله
بالفرح. بالفرح. لاصار بعده وقبله

بوجهه جمال من النبي وحسين يدعيله
بالمهد قرآن الطفوف بأذنه يحچيله

وياي. صلو اعله النبي

…….

ياشمس. ياشمس. منقذ الانسانيه
ياشمس. ياشمس. واحلامنه الورديه
ياشمس. ياشمس. ندعي العجل يوميه
ياشمس. ياشمس. ضوه الكره الارضيه

نترسلك الدنيا هلا وتعجل بثارك
وتلكانه يا ابن الحسن كل احنه انصارك

وياي. صلو اعله النبي


نسألكم الدعاء
حسين صادق العقابي

قصيدة لولادة الامام الحسن ع

الدنيا تضحك بميلاده
اكتبنه ربي من عواده
والفرح فرح وزياده
يالحسن غالي
……..

بابه بالكرم مفتوحه. يكرم بهلا وبروحه. ياضوه الفجر ميلاده. شعة الانوار
فاطمه وعلي يدعوله. بسورة الحمد يقروله. فتشة الكلب للزهره. جامع الاسرار

ياهوه العذب. تهنئة محب. يبعث الكلب سلامي
كلبي الك يدك. اية العشك. بس الك بقه اهتمامي

ايامي واحلامي. تعنيتك. بچفي شمعه وياس
ياروحي. وجروحي. حبيتك. حب مايصح بالناس

اني عاشكك سموني
يحله هالعشك بعيوني
والفرح فرح وزياده

يالحسن غالي

……..

للمهد اجه يتبارك. للفرح حظر يتشارك. ليلة السعد بصيارك. وابتده الترتيل
تهنئة فرح للساده. الفاطمه النجوم كلاده
والعرش بدت اعياده. وابتشر جبريل

وجهك السمح. اية الصبح. منهه يتضح جمالك
يردد الزمن. قل هوه الحسن. منهو يمتلك خصالك

فرحانه. دنيانه. بعيونك. شايل جمال الكون
محلاهه. وتتباهه. هليله. بيك العرش مفتون

يانبض كلب للزهره
اجمل الفرح والبشره
والفرح فرح وزياده

يالحسن غالي

…….

حيدر ابتسم من شافك. وقبّلك عشك بشفافك. داره بالفرح معموره. واجمل الايام
خوة الصدك لحسينك. راية الفخر بيمينك. يا ولي العهد للوالد. تحقق الاحلام

ياوطن دفو. يالاخو الكفو . توأم الكرم جفوفك
رايتك ترف. كلبك الترف. يمته نوصلك ضيوفك

مشايه. عنايه. زوارك. يافرحة الملهوف
تلاكينه. تحيينه. بالمرقد. بشوك وهيام نطوف

امنيه الخدم تتعنه
والحسن طريق الجنه
والفرح فرح وزياده

يالحسن غالي

……

يصفك الفرح بجناحه. يالحسن صرت مفتاحه. فرحة السمه بهليله. ويشهد المعبود
باحلى مولد واطلاله. الكواكب بهالحاله
نسألك الاهي العوده. وكل محب موجود

ياشمس تشع. ياضوه وشمع. منك القرب سلامه
يادرب عدل. مو صعب سهل. ياعقيدة الامامه

يازاهد. ياعابد. ياعالم. ياشعلة الاسحار
ياواضح. ياناصح. بمضمونك. تتحير الاشعار

لفاطمه وعلي بهالمولد
شكراً الخدم وتردد
والفرح فرح وزياده

يالحسن غالي

……..

نسألكم الدعاء
حسين صادق العقابي

قصيدة لولادة الامام الحسن ع


بلايه بيبان. باقي ديوانه
والحسن هاك. چلمة بلسانه

....

چفوفه خبزه للفقير. بالكرم هوه الامير. اي والنعم
بحلكه بس چلمة هلا. والدلال معدله. فخر الزلم.

وينه حاتم لو شافه
يوكع حيله من اچتافه
تبرد سالفت شفافه
والله يعزل ديوانه(هوسه)

هوه عنوان. محله عنوانه
الحسن هاك. چلمة لسانه

......

ناره ماتطفه ابد. تلوح للجاي وكصد. هذا الحسن
تلث ليالي ماقبل. بكيفه خطار النزل. بيته الوطن


ضيفه مايرجع خالي
معزب ديوانه العالي
واكف عباس الغالي
بالهاك تارس خطاره(هوسه)

ثلث تنعام. والله مولانه
الحسن هاك. چلمة لسانه

.....

يا مؤسس كربله. يامسار القافله. بيك ابتده
وليدك القاسم ضوه. بي حضرت لنينوى. بروحك حده

هذا القاسم ورسومه
داخت من زوده الحومه
زينب صاحت ونعومه
عباس چنه بصولاته(هوسه)

فرحت اليوم. الزهره ويانه
الحسن هاك. چلمة لسانه

.....

الحسن شايل فكر. يكشف اوراق القصر. يوم الصلح
للحسين وثورته. راد بالطف نهضته. يبني الصرح

كاتب للخوه ابئيده
عزّب ونطاه وليده
يسلم لحسين عضيده
لولاه چا مات حسينه(هوسه)

العنده ايمان. انته ميزانه
الحسن هاك. چلمة لسانه

.......

هالدرس نتعلمه. شلون ربه قاسمه. وبحسينه ذاب
چان سالوفة عرس. عافهه واصبح درس. نعم الشباب

ناجح في درس الطاعه
رافع للحك شراعه
عمره بالطف بس ساعه
مشكور صاحاله حسينه(هوسه)


طفه لشموع. تعنه ميدانه
الحسن هاك. چلمة لسانه

......

نسألكم الدعاء
حسين صادق العقابي

قصيدة لاستشهاد امير المؤمنين علي ع

وداعاً ينبضه بدليلي
تخليني دمعه ويه ليلي
ادور يعافيتي وينك. يبويه ياعلي

.......

هالليله علي تارس ضوه بيت الاميره
حلوه عمامته وطوله الحلو شيخ العشيره
لكن مو على بعضه وشفت بعيونه حيره
نظراته تگلي زينب الليله الاخيره

يزينب ابد ماكو راحه
ولادنيا بيهه استراحه

الاهي كلتله اليعينك. يبويه يا علي

....

الوالد لو كعد يم بنته الله شحلاته
تعيش مأمّنه منّ الوكت وبفي عباته
شكد يرفع جفوفه بالدعاء الهه بصلاته
لبنيته وطن دافي يصير من الشماته

يمتعوب كضه كل حياته
يشمعه وضواهه لبناته

يالمغطي بيتك حنينك. يبويه ياعلي

......

عله طوله مشه للمسجد بكل هيبه رايح
وبس أذن سمعت انه علي بمحرابه طايح
يتچوله اجوني بوالدي وبدمه سابح
والعباس اجه بعمامته وبهمومه سارح

وكع كلبي مني وندبته
يبويه سلامات صحتله

حرامات تغمضهه عينك. يبويه ياعلي

.......

شخبارچ سألني ودنكت ودموعي تجري
من الطبره لحد اخر دوه وميفيده ندري
كتله شيوجعك گلي السبي باچر يذخري
عطشان انته جاوَب بويه لا يوجعني نحري

يأشر للحسين اشوفه
ولخوي الكمر ولچفوفه

كضن ياحسافه سنينك. يبويه ياعلي

.......

خلاني جرح من طبرته للغاضريه
لا ام لا ابو هذا السبي الاول عليه
يوميه الي غالي يموت ابين اديه
من الزهره لحد ما بالحضن ماتت رقيه

سلاماً على الفاركوني
وداعاً يهلنه الماخذوني

يكلبي شيخلص ونينك. يبويه ياعلي

......

نسألكم الدعاء
حسين صادق العقابي

قصيدة ولائية لامير المؤمنين علي ع

امر من السماء. عاجل مايلي
بلغ يالرسول. وارفع چف علي

.......
بسم الله جاءت ايه وتخص الامير
ايه تحدد لدين الله ياطه المصير

شيجازي علي وسيفه. الله اختاره وبكيفه
ارفع چفه رايه وخل ترف فوك الرؤوس

لچف المرتضى ارفع. خلي الاقنعه توكع
والله العاصمك من تعترض مرضه النفوس

من الله اختيار. بس حيدر ولي
مسك الاوصياء. ارفع چف علي

.......

من صار ابتهال وبي علي نفس الرسول
ونشوف النصارى تحيرت منهه العقول

طه وحيدره بكتره. شمس مكاوده الكمره
ترافك ويمحمد حيدره جسم وخيال
لو راد النبي رايه. يفزع حيدر حچايه
يخلي الميمنه عالميسره كبل السؤال

والامر الخطير. بسيفه ينجلي
ولهاي الله گال. ارفع چف علي

.......

منهو بخاتمه اتصدق اذا سائل اجاه
عن الفقره لا ماينشغل حتى بصلاه

طه بكلبه كل لحظه . صايرله علي نبضه
يبياض الوجه دومه يگله بكل لقاء

ميزان الزلم هوه. الحرب بدونه ماتسوه
والعباس اخذ هالشمره لو شال اللواء

حيدر بالنزال. صوته المعتلي
ودعوات السماء. ارفع چف علي

......

منو مثله انولد واستشهد ابيت الاله
وبس الله ومحمد عرفو بسر محتواه

بعرش الله علي شذره. هوه المعجزه الكبرا
يأشر للشمس ترجع عشك وتگله صار

كلش عشكته الكعبه. انطاهه علي رتبه
صارتله مهد وانشق اله منهه الجدار

وتستشهد اكيد. في بيت العلي
ويظل النداء. ارفع چف علي
.......

يخلص كل قلم حبره اذا سولف عليه
شيسولف اذا ارض وسمه باسن اديه

طيّب الله انفاسه. الدنيا تحلف براسه
يلطبعك جبل ومتعّب الشايله فاس

گله الله تستاهل. من انطاه ابو فاضل
والسبعين الف يوم الطفوف تشدله راس

ابداً مايموت. يبقه الاولي
الله موصي بيه. ارفع چف علي

........

نسألكم الدعاء
حسين صادق العقابي

قصيدة للخدمة. الليلة الاولى

بمر السماوات. كل العزاءات
يا ايها الناس. بالخدمه مقياس.

......

من الذر تره صحنه. القالو بلا احنه. عالحب تجمّعنه. وحسين قسمنه
كلمن اخذ دوره. واكتملت الصوره. وحسين عاشوره. بي احنه آمنه

الله يحسين الخلقنه من تراب طفوفك
احنه فدوه نروح والله لخنصر من چفوفك
شمس انت واعمى هذا سيدي الميشوفك

عد عميه الگلوب. شو كلشي مكلوب
الماعدهه الحسين. بالخدمه مقياس

........

ليهمك شكالو. يالخادم وصاحو. ذوله البشر مالو. عن درب ابو اليمه
هالدنيا غرتهم. وباعو عقيدتهم. بالخدمه جاوبهم. شما بيك من همه

ياحسين إن الذين امنو خدامك
كون ترجع كربلاء ويوم من ايامك
ضلوع فوك ضلوع نوكع سيدي كدامك

والنحره مكطوع. يظل راسه مرفوع
والثابت الراي. بالخدمه مقياس

......

من حسين ابو الاكبر. دين الله ظل يكبر. دمه عشك خضر. يظل تاج عالهامه
الماناصر الخدمه. شكد ماصبح علمه. نگله احنه هالكلمه. نبقه احنه لطامه

احنه اولاد اليضحي للحسين بروحه
الينطي چفه وراح زاير وبتسم لجروحه
ولو وصل لحسين صاح وياك أنه للوحه

اهل الشعارات. كافي ادعاءات
ولو فكرو زين. بالخدمه مقياس

........

باجر ابو صالح. لا والله ميسامح. مايقبل يصافح. جف الطعن ظهره
كلمن تره ودينه. ودين الله بحسينه. والحاربه وينه. تالي صفه بحفره

التعله اسكت وخله لاتكبر راسه
حكه ماچاويته جمره من الخيم بحساسه
ولا اظن دخان خيمه مسير اعله انفاسه

خلهم يكولون. تاليهه يرحون
ميزان الافعال. بالخدمه مقياس

.......

نبقه احنه عالفطره. ويه اللطم عشره. وما ينمحي ذكره. زينب الكالتهه
خله يرد ايزيد. لا ما نمد الايد. شما يذبح احنه نزيد. والعين شافتهه

هالشعائر هيه ديني ومذهبي من احييهه
امداهه الدنيا والله حسين لو مابيهه
انعذره ماضايك طعمهه الدمعه من اجريهه

والعندهه وسواس. ماعنده عباس
والمحشر يصير. بالخدمه مقياس

...

نسألكم الدعاء
حسين صادق العقابي