‏مقطع صوتي من مدد مولاتي يا زهراء

قصيدة للامام الهادي ع


يالهادي يظل صوت الغياره
مادام الهوه يمر بالمناره
مانترك ابد هاي الزياره
يمولاي..... يمولاي

………..

ياعلي الهادي بحياتك
كل نفس جان بصلاتك
للهدايه

انت مدرسة الكرامه
درس للعز والشهامه
انته رايه

كلوب الحياره سيدي توكف على اعتابك
ماخاب كلمن يعتني بحاجه ويدك بابك
بالمرقد الليله تسولف دمعة احبابك

سامره تضل سلطان بيهه
يجد المهدي وانته الفخر ليهه
مانترك ابد هاي الزياره
يمولاي..... يمولاي

..........................

من تميل الدنيا بينه
تلمنه انته وتحتوينه
بالزياره

بوصله وبيهه الدلاله
لربنه سبحانه وتعالى
للحياره

العابد الزاهد والتقي وهنياله من زارك
ونسمة ظهور المنتظر نشتمها يم دارك
تامرنه يابو العسكري جنود احنه وانصارك

انته محلي سامره وارضهه
تظل بكلوبنه انته ونبضهه
مانترك ابد هاي الزياره
يمولاي..... يمولاي

.........................

الحبل بين الله وعباده
انت ياروح العباده
ياذخرنه

يا ابو الروح الحنينه
يارزق ما بين ادينه
يااملنه

يالهادي ياعاشر ضوه من فاطمه الزهره
ياصوت مايسكت ابد تشهدله سامره
الحمد لله والشكر مرجعنه للعتره

امان الدنيا والناس اعله بابك
عطر الجنه يالهادي بترابك
مانترك ابد هاي الزياره
يمولاي..... يمولاي

............................

بصحنك تلوذ البريه
ياابو النفس الابيه
والحنينه

ياجمال الله اعله كاعه
منك انريد الشفاعه
ياولينه

ياجامع أصناف البشر من كل بلد رايه
وصدورنه ندكهه الك منطينك حچايه
ياعلي الهادي بكل وكت ذوله احنه وفايه

دخيلك سيدي هالليله صحنه
حسن العاقبه بالخدمه ردنه
مانترك ابد هاي الزياره
يمولاي..... يمولاي

.........................

طلبه عدنه الليله يمك
نحلفك بفاطمه امك
وعلي ونوره

المهدي لوزاك اليله
ياعلي الهادي اندعيله
في ضهوره

خل يترس الدنيا عدل الظلم ماليهه
عدوان عدنه بكل زمن والمهدي يدريهه
والحق يرد لهله بعد يالهادي تاليهه

هاي الامنيه وبس هيه عدنه
يشيل الرايه مهدينه ويلمنه
مانترك ابد هاي الزياره
يمولاي..... يمولاي

………….

نسألكم الدعاء
حسين صادق العقابي

قصيدة للامام الكاظم ع

رساله. من طوامير السجن
رساله. انكتبت بدمعه وحزن

ابتدت بالحمد لله والشكر
تحچي عن موسى ابن جعفر والصبر
رساله. رساله

.........................

الصبر مفتاح الفرج. واليصبر الله يعينه
يتحمل آلام وغصص. ودوم الدموع بعينه
الموت ارحم من سجن. بالضيم تكضي سنينه
والمنسجن تحت الارض. نتعجب مكيدينه

دعائه. من كلب ينكط دمه
دعائه. يوصل لسابع سمه
الليله ياقصة عذاب المنكسر
تحچي عن موسى ابن جعفر والصبر
رساله. رساله

........................

اول رساله من گلب. يشكر الباري هوايه
صار السجن مسجد اله. واعبايته مصلايه
لسانه رطب من الذكر . أيه وتگود بآيه
الطاموره بالكاظم صفت. كبه ومناره ورايه

صلاته. رغم كيده بكل وكت
صلاته. دوم وي روحه اخت
والصلاة الكلهه روحيه الفجر
تحچي عن موسى ابن جعفر والصبر
رساله. رساله

..........................

من القصر جابو جاريه. للسجن وبلاحشمه
وتوقعو بيها الذنب. يتغلب اعله العصمه
لكنها صارت عابده. ومتحجبه ومتعلمه
وصلَّت ورا فرض الستر. ودلاهه درب النعمه

حياته. رغم جدران الحبس
حياته. النه بيها چم درس
سنين عمره لله خلاهه نذر
تحچي عن موسى بن جعفر والصبر
رساله. رساله

........................

من سدو ابواب السجن. كلبه فتح بيبانه
ودوم التسامح والعفو. ما يوكع من لسانه
اول سجين بهيبته. حيَّر عقل سجانه
السجان يبچي بكل فرض. كلما سمع آذانه

صفاته. الرحمه والحب والعدل
صفاته. يفرح بلم الشمل
الشيعه باچر بانتظاره اعله الجسر
تحچي عن موسى بن جعفر والصبر
رسالة. رسالة

..........................

كل محب واكف عالجسر. وبالامل ينتظرونه
اليتلاگه وي وجه النبي. بشوفته يكحل عيونه
لكن اجه بوسط النعش. وبس اربعه يحملونه
هذا إمام الرافضه. صاحو لليحبونه

نهايه. للظلم ولكل الم
نهايه. المهدي لو شال العلم
رايته ترفرف بثارات ونصر
تحچي عن موسى بن جعفر والصبر
رسالة. رسالة

………….

نسألكم الدعاء
حسين صادق العقابي

ياعلي

دمه بعروكي اسمك وتجاره
يراس المال حبك وتجاره
ربح من هوه جارك وتجاره
منو اليوصل حمه حامي الحميه

افراح شعبان. ولادات الائمة الاطهار. ع


فرحانه املاك السمه بشعبان وهلاله
مولد اقمار لحيدره والفرحه تحلاله

وياي. صلو اعله النبي
وياي. صلو اعله النبي

……

ياعلي. ياعلي. مبروك هاي الليله
ياعلي. ياعلي. حتى الفرح شد حيله
ياعلي. ياعلي. الله الوحي يناديله
ياعلي. ياعلي. خمسة اقمار اهديله

وتعنه جبريل ونسيم الجنه بجناحه
وبابك يحيدر مبتسم وهوايه افراحه

وياي. صلو اعله النبي

…….

نبتدي. نبتدي. بصفكه وفرح وزياده
نبتدي. نبتدي. بحسينك وميلاده
نبتدي. نبتدي. ياهلا بجد الساده
نبتدي. نبتدي. عسانه من عواده

هالليله دار ام الحسن بالفرحه معموره
بصف المهد ناده النبي فاطمه مشكوره

وياي. صلو اعله النبي

…….

ياقمر. ياقمر. ساقي عطاشه حسينه
ياقمر. ياقمر. من جودك تروينه
ياقمر. ياقمر. شمع الفرح بيدينه
ياقمر. ياقمر. مولدك خير اعلينه

اربع ائمة قبّلو چفك يبو الغيره
ياتارس الدنيا ضوه من ديره ولديره

وياي. صلو اعله النبي

…….

بالورد. بالورد. والياس تارس مهده
بالورد. بالورد. حسين ابتسامه بخده
بالورد. بالورد. مولد حليف السجده
بالورد. بالورد. لاذت الدنيا بسده

بزين العباد ومولده يفرح كلب زينب
ياقاب قوسين لگلب والده المهذب

وياي. صلو اعله النبي.

……

بالفرح. بالفرح. مولد الاكبر يحله
بالفرح بالفرح. صوت القصايد يعله
بالفرح. بالفرح. يا ابن ثالث قبله
بالفرح. بالفرح. لاصار بعده وقبله

بوجهه جمال من النبي وحسين يدعيله
بالمهد قرآن الطفوف بأذنه يحچيله

وياي. صلو اعله النبي

…….

ياشمس. ياشمس. منقذ الانسانيه
ياشمس. ياشمس. واحلامنه الورديه
ياشمس. ياشمس. ندعي العجل يوميه
ياشمس. ياشمس. ضوه الكره الارضيه

نترسلك الدنيا هلا وتعجل بثارك
وتلكانه يا ابن الحسن كل احنه انصارك

وياي. صلو اعله النبي


نسألكم الدعاء
حسين صادق العقابي

ولادة الامام المهدي عج

كلبي بحبك نبضه يدك
يالمهدي يا اجمل عشك
حبيتك ياحبي الصدك


………

نبدي بسم الله وخل ندعيله
تختلف هالليله عن كل ليله
خمسطعش شعبان نرفع رايه
إنولد صاحب زماني دخيله

بالفرح نتشارك. بالولاده امبارك
المهدي هل هلاله. ياهلا بحادينه

تشرفت دنيانه. شيعتك فرحانه
الليله اجمل ليله. ونولد والينه

كل العالم بيك ابتشر
وفرحان بجية المنتظر
حبيتك ياحبي الصدك

..................

انولد ويشع نوره عالمعموره
الكمر من شافه خجل ضم نوره
حاير برمشه وجمال عيونه
الله خالق حسنه بأجمل صوره

بقدرة الله العالي.. صار مهدي الغالي
شكراً البارينه.. انطانه أجمل قائد

الليله فرحت هاشم.. اجه المهدي القائم
الدنيا هاي بناسهه.. ما يشبهه اي واحد

اهلا يا يوسف فاطمه
فرحانه املاك السمه
حبيتك ياحبي الصدك

..................

فرحت الليله الكره الارضيه
ياهلا ومية هلا بهل جيه
الورد ناثر عطره لبن الزهره
وفتحّت بالدنيا كل جوريه

الطير فوك اغصانه.. رفرف ابجنحانه
غرد احله انغامه.. والفرح بعيونه

هايه أجمل بشره.. فرحت امنه الزهره
المهدي هيبه بزغره.. الروح بي مفتونه

شدة ياس وحنه وشمع
وهوسات المحفل تنسمع
حبيتك ياحبي الصدك

.....................

هذا امان الدنيا طال افراكه
والارواح الشوفته مشتاكه
كل سنه نفرح يجي ميلاده
يمته ويا من صدك نتلاكه

المهدي هوه الرحمه. المهدي اعظم نعمه
چم نبي من يظهر. اله يقدم خدمه

عجل الله امره. فدوه احنه لعمره
ومن جمال عيونه. لو نحصل نضره

وينك يامفتاح الامل
ندعيلك يامهدي العجل
حبيتك ياحبي الصدك

………

نسألكم الدعآء
حسين صادق العقابي

ولادة علي الاكبر ع

اجه نور العين
وفرحان حسين

علي الاكبر. بي تبشر. فرحان حسين

………

الليله فرحه الليله كل الكون ازهر
والحسين بچفه شايل علي الاكبر
اشبه الناس بمحمد مولده اليوم
واشبه الناس بشجاعة جده حيدر

فرحتنه بهالليله. لحسين نوديله. احلى الكلمات
بالاكبر هنياله. ومبارك صحناله. باحلى الهوسات

ندعي بكل يوم
هالفرحه ادوم

اجه الاكبر. غصنه خضر. فرحان حسين

………….

ياوجه مثل النبي وبدر بكماله
ولا جمال اليوسفي يوصل جماله
من الحسد غطو براية ابو فاضل
وصاح حيدر صلو عالمختار واله

كل هاشم مسروره. شع الاكبر نوره. يضوي بشعبان
نازل من الجنه. طير الحب يتغنه. لاجمل انسان

ملهوفه الروح. يم مهده تروح

علي الاكبر. چنه حيدر. فرحان حسين

………..

فرحه من العمر اجمل فرحه هايه
على الاكبر صار اليخوف المنايا
من الزغر وعيونه للعباس دارت
ويبتسم لمن يشوف بچفه رايه

وحسين يناغيله. والكافل يدعيله. وفرحان هواي
يافتشة عين امه. هوه ومهده تضمه. هلا بالوفاي

ياخير وجاي. ياطعم الماي

علي الاكبر. والله منظر. فرحان حسين

…………..

هلا بالشايل الهم من كلب الحسين
هلا بالصاحتله زينب كرة العين
مولد الاكبر امان لكل الگلوب
وبشهر شعبان اعياد المواليين

فرحة جد الساده. هالليله بميلاده. ميلمهه الكون
وياهم فرحتنه. بالمحفل جمعتنه. والكل يدعون

شكراً لله. ابنه شمحلاه
علي الاكبر. وجهه ازهر. . فرحان حسين.

…………

نسألكم الدعاء
حسين صادق العقابي

متباركين بولادة الامام الحسين ع


يحسين ياعنوانه وهيبتنه
انته ابو الخير وانته ابو نعمتنه
هليوم باب الفرح بسمك مفتوح
ياجامع الخدام ياخيمتنه
ياسيد الحب وانت اجمل محبوب
ياشيخنه المهيوب ياكشختنه
نحبك وفوك الحب نحبك مولاي
انجنينه بيك وياهو اليعقلنه
يحسين وين تريدنه نروح وياك
بوصلة هاي كلوبنه وكعبتنه
كبلك ابد چان الفرح ماموجود
من 3 شعبان وبدت قصتنه
نضيع احنه بالدنيا والدروب هواي
والف انعم الله لجفك اللازمنه
مكابلنه وي كل فرض دمك يحسين
بالتربه من نفرش مصلايتنه
عشرة اذان وجامع العشره وياك
ودمك اذان بكل وكت جامعنه
للموت وياك ولما بعد الموت
عدلين ميتين احنه بسمك صحنه

((اني مع الله ما دام الحسين معي ))

يَا سَاكِنَ القَلْبِ وَالأَفْكَارِ فِي أَدَبِي
وَضُوعَ أَقْلَامِي مَا أُمْلِيتُ فِي كُتُبِي

يَا مَقْصِدَ الحُبِّ فِي حَزْمِي لِامْتِعَتِي
يَا نَغْمَةَ العِشْقِ فِي صَوْتِي وَفِي عُرُبِي

تِلْكَ الدِّمَاءُ الَّتِي لِلشَّمْسِ قَدْ وُهِبَتْ
خُيُوطُهَا أَلَقًا فِي لَوْنِهَا الذَّهَبِي

وَمَنْزِلُ القَلْبِ كَانَ اللهُ سَاكِنَهُ
وَالْوَجْهُ بِالنُّورِ يَحْكِي عَنْ جَمَالِ نَبِي

أَنْتَ الحُسَيْنُ حَبِيبًا أَمْ حَنِينُ أَبٍ
قَارَنْتُهُ بِأَبِي قَدْ فَاقَ قَلْبَ أَبِي

يَا قَابَ قَلْبَيْنِ بَلْ أَدْنَى إِلَى شَغَفِي
يَا رَاحَتِي فِي زَوَايَا مَوْطِنِ التَّعَبِ

أَنْتَ الحَبِيبُ الَّذِي مَنْ عِشْتُهُ أَمَلًا
حَتَّى المَشِيبِ وَلَكِنْ لَا أَزَالُ صَبِي

يَا حَبْلَ وُدِّ اللهِ مُسْتَمْسِكًا بِيَدِي
إِلَى طَرِيقِ الهدى يَا أَوَّلَ السَّبَبِ

يَا بْنَ العَلِيِّ الَّذِي مَنْ كَانَ مُبْغِضَهُ
قَدْ سِيقَ لِلنَّارِ مَغْلُولًا إِلَى الرُّكَبِ

إِنِّي مَعَ اللهِ مَا دَامَ الحُسَيْنُ مَعِي
قَدْ قُلْتُهَا فِيكَ وَانْزَاحَتْ بِهَا الحُجُبِ


حسين صادق العقابي

قصيدة للسيدة خديجة ع


ياديان روحي شيوفي دينك
تسوه الدنيا واهل الدنيا عينك
خديجه وحصلت نظره
صرت ام فاطمه الزهره
......................

شما تتقادم الايام. والتاريخ من يمتد
شفت الدنيا رحلة موت والانفاس حل وشد
شكراً لله من اختار لحبيبه المصطفى احمد
ومن كل النساء أصبح شريكه لطه واتفرد

ام المؤمنين اصبح مقامي
اسمي اختاره من بين الاسامي
وصار بهالأمر فكره
صرت ام فاطمه الزهره
.......................

مو بس مال ناصرتك بنيتي الصافيه وكلبي
تبعتك عطش رايد ماي وصرت عيوني البدربي
شمااتعب امن الدنيا. بكلامك يختفي تعببي
يوميه شكر اسجد تدوم النعمه ياربي

تعبني التعب وياك راحه
يمداوي كلب عاش بجراحه
تالي التعب والعشره
صرت ام فاطمه الزهره
........................

شفتك للمضيع الرأي دين وراي بي فكره
ما اوفيك يامولاي لو اعلكلك العشره
عافوني اعلمودك ناس الهم بيتي مد سفره
وكلت العوض بالله تهون. سالم يا ابو الزهره

خل الدنيا تزعل وانته ارضه
اليمشي بهالدرب الله اليعوضه
العوض من الله وشكبره
صرت ام فاطمه الزهره
.......................

عشت وياك حفنه سنين بس تاريخ محسوبه
عشت راحة ضمير وبال ومن جاراتي متعوبه
جنت احچيلهن عنك اليحبه يطيحن ذنوبه
محسوده بقسمتي وياك واجمل قسمه مكتوبه

ياعافية دنيا واخره انته
العالم من تسولف يبقه سكته
الله بحكمته وأمره
صرت ام فاطمه الزهره
.........................

من تفائلت بالخير لكيتك يا ابو القاسم
الليلة الموت دك الباب اعوفك وارتحل لازم
هذا العام عام أحزان وصيتي من كلب هايم
اوصيك اني بالزهراء من الظلم والوادم

بامان الله اروح وهاي هيه
الباقي اعليك سويت العليه
اروح واني مفتخره
صرت ام فاطمه الزهره


الشاعر حسين صادق العقابي

قصيدة لشهادة الامام علي ع


اخر محطه الموت
وحيدر يصيح بصوت
فزت ورب الكعبه صوت جروحه
خلصانه من الدنيا طلعت روحه
.......................

يخلص محطات العمر. وابنادم يشد حيله
وانفاسه خطوات الاجل ليله تگود بليله
والدنيا قصه من الوهم حيدر عرفها دخيله
دار الها ظهره وماسمع اي كلمه من تحچيله

للدنيا شد الحيل
ومن عنده شافت ويل
حچايه الها چانت دوم ما مسموحه
خلصانه من الدنيا طلعت روحه
......................

حيدر الاول ينحسب. بالموقف وبالعشره
بمعركة توحيد وصنم. متحضر ودك صدره
هو الفتى وعين النبي چانت تشوفه شكبره
يرعب اذا ويا مشه. وشد العمامه الخضره

من طه يمشي وياه
حيدر علي شمحلاه
العالي جفه وجان كلشي يلوحه
خلصانه من الدنيا طلعت روحه
........................

كل اعوج بوكت النبي. ينعدل لو يتبدل
ورجع الناس التايهه.تعبد الرب الاول
والذي چان اعمه كلب. فقاره خلا يندل
وخله الرؤوس اليابسه. يم النبي تتوسل

ارواح قفره هواي
سير عليهم ماي
ومن تمم لدين الله سيفه اطروحه
خلصانه من الدنيا طلعت روحه
..........................

حيدر صبر حد ما جزع. منه الصبر وتكتر
حيدر ابو الگلب الگوي. اليم اليتيم تكسر
ياموت فجئه البالحرب. والشافه يصبح اصفر
ياكفو للزهره وابد. ماكو بديل لحيدر

حيدر اله انجاز
بكلشي اله اعجاز
بمحرابه طاح وماتطيح سفوحه
خلصانه من الدنيا طلعت روحه
.......................

من شد حيازيمه ومشه. واكف الموت ابابه
وبإن وعد الله حق. يقره بدمع محرابه
تهدمت اركان الهدى. جبريل ينعه مصابه
ومن رجع سابح بالدمه. شاف الايتام احبابه

صاح الحسن لچمات
حيدر يرد هيهات
ومن علي نزلت دمعته المسفوحه
خلصانه من الدنيا طلعت روحه

……..

حسين صادق العقابي

يدنيا سهمج اعله الصدر وجهي
بكلبي اشما تزيد النار وجهي
ابد مادرت بس لحسين وجهي
يحفظ ماي وجهي بكل عطيه

قصيدة لفاجعة البقيع


كلشي بالدنيا بديك
ياسلام الله عليك
يابو صالح والبقيع يريد ثاره
ارسم انته الخارطه ونبني المناره
...................

بعينك تباوع يبو گلب الچبير
رحه الموت بشيعتك كامت تدير
ماكو شيعي بالارض عاش بأمان
وماكو غيرك باقي بالعالم نصير

فاجعة هدم القبور
ذكره تحفر بالصدور
سيدي من دونك الشيعه حياره
ارسم انته الخارطه ونبني المناره
...................

هذا حكنه ومانخلي الحك يضيع
احنه شراية مواقف مانبيع
نبني حضره تكفي كل العالمين
جنودك احنه بامرتك نبني البقيع

ليش سووها تراب
ثوره عرفو بالقباب
ويجي يوم الثوره وحنه بنتضاره
ارسم انته الخارطه ونبني المناره
......................

الذبح والذباح مل من الرگاب
وتعب حتى الموت من دم الشباب
وبميادين الذبح مولاي راح
مستطاب بأثر سيد مستطاب

لو وكع شيعي شهيد
الف يطلع من جديد
كلهم انصار والك رهن الاشاره
ارسم انته الخارطه ونبني المناره
.....................

ابعيد كالو صحنه مهدينه قريب
يامجيب المضطر ونعم المجيب
والله لو نجمع دماء الشهداء
يصير بحر من الدمه لا موعجيب

اضهر الدم بعده حار
شيعتك بالانتظار
الصيحه منتظريها يالمهدي بحراره
ارسم انته الخارطه ونبني المناره
.................

الكثره تاخذ كالو بنهج القتال
لچن عدنه يختلف طبع الرجال
الشايل بكلبه زعل من الكفيل
واحد يكابل معسكر بالنزال

حيدريه وللممات
ومن علي هذا الثبات
للشهاده نروح وبلايه استخاره
ارسم انته الخارطه ونبني المناره
........................

الفرج ندري بطلعتك مو مستحيل
ياهواي واحنه كدامك قليل
ربي كن للمهدي ندعي بالقنوت
الناصر الحافظ الاهي والدليل

عجل الله الظهور
ضاقت هواي الصدور
من ظهورك يبتدي يوم الحضاره
ارسم انته ونبني المناره

…………

نسألكم الدعاء
حسين صادق العقابي

چانو اخوتي سلف
وازلام ديرتنه
بالليل نار الهلا
ترحب بكل اليجي
للضيف عادتنه
وديوانهم كل صبح
بهلن وسهلاً ترف
كدامه رايتنه
لحد ما اجت كربله
وبتده فرض الذبح
وبتدت قصتنه
لاخر نفس بالنحر
وحسين لمن وكع
وانطفت شمعتنه
ظليت انه التفت
بلكي الله احصل ذبح
من خلصت اخوتنه
يذبحلي كون العطش
ويعوفلي العلكمي
يوصل لخيمتنه
ويذبح الخوف الذي
روع اطفال شكثر
ويرحم بحالتنه
وين الكه بالطف ذبح
يذبح المايستحي
والباك فرحتنه

قصيدة للامام الصادق ع

صاحت الدار...كافي يانار
الصادق شيحمل بعد كلبه
تصحه عينه وتغمض بغربه
كافي يانار
.....................

الدنيا ماترحم طبعها بس غدر من زمن ادم
راحه ماموجوده بيها.وبيها طاري الفرح ماتم
الصادق ومن شاف داره. ذكّره بحرك المخيم
شكال من اطفاله ركضت. الله بس بكلبه اعلم

كلشي آلام... چنها الخيام
للمواقف من يصد صعبه
تصحه عينه وتغمض بغربه
كافي يانار
.......................

دار بس حچايه الله. تنسمع منه بروايه
دار منها الدنيا تخشع. لو يرتل بيها ايه
بيهه اصول الدين كلهه. وكل فروعه والهدايه
المايعرفك مايثمنك. والله يادار الولايه

تالي الاحزان. الها عنوان
من علن ضيم الوكت حربه
تصحه عينه وتغمض بغربه
كافي يانار
.....................

صوره من عاشر محرم. دار صارت چنهه خيمه
سولف الدخان بيها وصار فوك عياله غيمه
ودمعه مو لاطفاله نزلت. ذكر زينب والهظيمه
وموسى ابن جعفر يشاهد والده وبالكلب ضيمه

ناده بالاه. حسبي الله
من المصايب يعثر بدربه
تصحه عينه وتغمض بغربه
كافي يانار
....................

دمعه تنزل حسره تطلع. يكفكف دموعه بعباته
النار ماتحرك بكلبه. تحرك بكلبه الشماته
نزلت دموعه وتذكر. من جمع ولده وبناته
وصار كدامه ابو اليمه وغربته وغربة خواته

ظلت العين. تبجي لحسين
الكل اخوته طاحت بگربه
تصحه عينه وتغمض بغربه
كافي يانار
......................


عاش وي وادم تريده يتعب من الضيم نبضه
صابر ومحتسب ناده. اخذ يارب حتى ترضه
تالي جازو كلبه بالسم. احر من السيف وامضه
مدرسه للعلم بيته. وعمره يشهد لحظه لحظه

مدري شبساع. صار الوداع
فوك جسمه انهالت التربه
تصحه عينه وتغمض بغربه
كافي يانار

…………..
نسألكم الدعاء
حسين صادق العقابي