خبر عاجل بالمناره.
حسين مددهه الزياره

يستمر يوم اربعيني الى استشهاد الرسول

……..

عوفو المواكب والخيم ياخدام
هاي الزياره تختلف عن كل عام

حسين للعباس ناده. انطي للخادم زياده
مدّد ايام المشي

بلغ الخدام كلهم. خلهه منصوبه خيمهم
شكو زاير خل يجي

لو سنه ماتكفي ادري
اوسع من الدنيا كبري

خلهه منصوبه المواكب الى استشهاد الرسول

………

اهل المواكب والخدم مشكورين
عباس شكراً گلهم يكول حسين

شهر صار وماكو راحه. من السهر ماكو استراحه. كفو يانعم الزلم

من مثلهم عنده سفره. تعزب العالم بأسره. بالعزوبيه ونعم

الشافهه يصبح كلامه
زياره لو يوم القيامه

اني احب هالخدمه تبقه الى استشهاد الرسول

……

هاي السنه بيهه العجايب تحله
شفنه احنه بيهه جنون عابس كله

خادم يحشم بخادم. بالعشك صارو طلاسم. جننتهم بالعشك

الديره اذا فرغت شفتهه. تروح للديره البعدهه. ذوله خدامي الصدك

اني راعي الخدمه هايه
بالدول رفعولي رايه

ظالين بثوب الاسود. الى استشهاد الرسول

……..

واهس العدهم بالعشك اهل الحب
وللجنه ايد بأيد كل احنه نطب

حرس بالليل ونشامى. وبالنهار اهل الخدامه. وثلث تنعام وكفو

بشّرو امي الغوالي. مو غريب حسين تالي. حضن صارولي ودفو

ياسلام الله عليهم
تعبتهم ادري بيهم

وهالتعب الله يعوضه الى استشهاد الرسول

……..

العوده يربي كل سنه لخدامي
بشوفتهم اني تروه كلبي الضامي

حيلكم بالخدمه ينشد. من اربعيني لحد محمد. شدو الحزام بصبر

العوض من امي الزچيه. اني حاضر بالمنيه. اني احضر بالكبر

من الحسين لمحمد
ماتقصرون الله يشهد

عامره تظل الشعائر الى استشهاد الرسول


…….

نسالكم الدعاء
حسين صادق العقابي

قصيدة لشهادة الرسول الاعظم ص


بفاطمه سورة الكوثر نازله
الدنيا ليش وياهه صارت مايله

افأن مات محمد.
ايدهه ودمعتهه عالخد

......

الله اللي خصهه برحمته. هالطاهره تربيته
من نوره خالق فاطمه. ونعجنت بحنيته
هالليله ماتلهه وطن. چانت عزيزه ابيته
من النفس صارت تلچم. هيج الوضع تاليته

فاطمه بلايه اخو من عاشت
زغيره وامهه يتمتهه وماتت

الليله بيهه الدمعه تشتد
ايدهه ودمعتهه عالخد

....

شمعه ويضمهه من الهوه. كل خوفه لايطفوهه
بنيته الوحيده ولاقبل. بحچايه لو اذوهه
من غمضت عيونه شعجب. ضلع وكلب كسروهه
منعوهه حتى من البچي. والشجره هم كطعوهه

ياعلي بره المدينه الزهره
خلهه تطلع غاد تشبع حسره

بيت الاحزان الهه يشهد
ايدهه ودمعتهه عالخد

.....

كل بيت يبقه بلا ابو. تخيم عليه احزانه
كل كعده بي ماتنحمل. موحش يظل مچانه
من عنده يبقه اعله المتن. شبكه واثر ذرعانه
حكهه تموت من البچي. بنيته تره وانسانه

الابو يدفن بنته كون بأيده
ولاتظل مكسوره بعده وحيده

للابو من تشوف مرقد
ايدهه ودمعتهه عالخد

.......

محضره حضنهه والمهد. شكد للطفل مشتاكه
المحسن انباكت ضحكته. وشكد بجت لفراكه
صبت دمعهه ونادته. يم والدي نتلاكه
محروم من شم الهوه. ودر اللبن ماضاكه

تلولي ظلت بس حضنهه الخالي
الموت اخذ چم غالي منهه وغالي

والنظر للمهد لو صد.
ايدهه ودمعتهه عالخد

.....

بعدك يبويه نادته. من بلوه اطيح ابلوه
يالخذت وياك شكثر. كل ذكرياتي الحلوه
بالباب عصروني وكمت. بفراشي بويه اتلوه
وحسين كاسر خاطري. وبكلبي مدري شسوه

من ارد اكوم وانه طايح حيلي
حسين يركض هوه اليتچيلي

ولو مشت تحتاج مسند

.......

بهيده يأم 18. بالبچي شويه شويه
هيكل بقيتي من الحزن. ياشجرة الحنيه
باچر تسمعين الخبر. بحسين والمسبيه
يموت العزيز من السحك. بلافاتحه ولطميه

زينبچ لو درتي الهه الناظر
ابد متعرفيهه من العاشر

والمصايب لا متنعد

.....

نسألكم الدعاء
حسين صادق العقابي

قصيدة للامام الرضا ع

صلى الله عليكْ. ياعلي موسى الرضا

………..

قال مولانا الرضا. الزارني وبيه حضه
اني ازوره بالقيامه شافع احضرله ومعين

عالصراط المستقيم. وعندَ ميزان القويم
ويوم تتطاير كتبهه عالشمال وعاليمين

بالحشر اني ارتجيك. ياعلي موسى الرضا
……

سيدي اعليك السلام. الرضا ياعلي المقام
رايد اتعنه وازورك. كافي ازورك من بعيد

ثلث حوائج لليزور. ومن اجي بگلبي شعور
الخدمه وولاية علينه. وحسن عاقبتي اريد

خدمتي مابين اديك. ياعلي موسى الرضا

………

شرف لهلي وللعمام. من اخدمك يا امام
واكنس الحضره برموشي. والله يصبح حالي حال

عبد اوكف بين اديك. ديرة دموع من اجيك
ومن يسألوني اكلهم. انته بس رزقي الحلال

خادم بدمعي اجيك. ياعلي موسى الرضا
……..

عمري خلص اشتياق. بينك وبين العراق
ساعه الك اشتاق ساعه للحسين وكربله

كون عمري بس سهر. وبس محطات وسفر
بالمجالس والمواكب والمشي عمري حله

بيدي رايه واعتنيك. ياعلي موسى الرضا

……..

يبن موسى ياعلي. انت حبي الاولى
بقامة التطبير كلبي ينشلع لو حب سواك

للعطاشى انته ماي. المايخدمك ماله راي.
المايشوفك اعمه كلبه. نگله بس الله يهداك

ما لدي من ما لديك. ياعلي موسى الرضا

………

كون الك يوم اربعين. ونعتنيلك سائرين
وراية المشايه تعله وطوس تشبه كربلاء

هلا بالزاير نصيح. احنه خدام الذبيح
ونكتب اعله الدرب لوحه. من هنا درب السماء

كعبه نتعنه اليك. ياعلي موسى الرضا

…..

نسألكم الدعاء
حسين صادق العقابي

استشهاد الامام العسكري ع

بداية غيبتك بيهه ابتدت رحلة غيابي
بأمان الله رحت وانه اكتبت قصه عذابي

يسامره الحبايب. يعاصمة المصايب

………

ماظال كلشي من الدمع. ياوالدي وروحيتي
بينك وبين الطف كضت. من ضيمي كل عافيتي
بسامره ذبحولي حلم. وبكربله امنيتي
اعله كبوركم صحت بهضم . يادنيتي شخليتي

طواريك تهد خيل واحس بيهه بضلوعي
وماي دموعي خلص وبدمه تنزل دموعي.

انه الفاكد كواكب. يعاصمة المصايب

……..

ياهو الغريب بدنيته. مثلي ومثل احزاني
لا والد ولاعندي اخو. هيج الوكت خلاني
البكّاء من كثر البچي. والدنيا دار احزاني
من مثلي عماته انسبن. ومتغيرات الواني

انه العرفو اسم عمته وحبل خلو بديهه
انه ابن العايله الحركو خيم كلهن عليهه

صرت من ضيمي شايب. يعاصمة المصايب

……..

يابيت اهلنه بلا ابو. ولاصوت للحنيه
هالليله ميتلي وطن. ودعت الانسانيه
خليتني بعمر الورد. بس الله يدري شبيه
نعشك احس هودج سبي. وروحي المشت مسبيه

كضو اهل الله والباقي انه وغربة زماني
مناره بديره مهجوره ومنو اليسمع اذاني

اعله دهري شكد اعاتب. يعاصمة المصايب
………

فوك الجتاف جنازتك. وكل خطوه عثره بدربي
مااحس حفرولك كبر. يحفرون احس بكلبي
جوه الترب صار الضوه. والهوه الچان بگربي
صحت ان وعد الله حق. يادمعه بالخد كتبي

انه وعمري ووجع روحي وعشرتي وذكرياتي
بثامن وبربيع اول. خلر موت امنياتي

شفت بيه العجايب. يعاصمة المصايب

……..

الدنيا شكبرهه والبشر. يابويه ادري هوايه
هل من مناصر لو صحت. ياهو اليشيل الرايه
محد يجاوب صرختي. بس اسمع اني حچايه
لبيك يامهدي علت. من الخدم والمشايه

صبراً ياخدم راجع واعيد الغاضريه
وعلم ثار الحسين ارفع. ويثار امي الزچيه

مع الوقت المناسب. يعاصمة المصايب

………

نسألكم الدعاء
حسين صادق العقابي

قصيدة لاستشهاد الزهراء ع

بين الباب وبين الحايط. طف بلا عباس
بيت الزهره مثل الخيمه.وفزعة نار الناس

بدمعه المهدي يتاني. ياعاشور الثاني

…….

من ادم لحد محمد. تاريخهه بي علامه
ماكو مثل ام ابوهه. فاطمه ليوم القيامه

دين الله المحبس والزهره شذره وهيه محليته
ولو نفرض ما خالقهه الله. چا محد صله ابيته

فاطم چلمة لا للظالم. تتجدد كل عام
فاطم دين الانسانيه. وللكرار حزام

ياقاموس احزاني. ياعاشور الثاني

…….

تبت يداهم اثيمه. وتبت يداه الخليفه
عباس لو بيهه حاضر. يهدم اعليه السقيفه

والمتآمر ضد الزهره. نعرف اصله ومضمونه
ابن الما اكدر احچيهه. المدري شچان يسمونه

ابنادم نعرف عقله براسه. ويصبح صاحب دين
لو شفته ينزلن دمعاته لمصاب ام حسين

ياتسبيح لساني. ياعاشور الثاني

………

دوسة البيت نعرفهه. عند العرب والله زحمه
والزلمه اذا يرفع ايده. عالحرمه نعتبره حرمه

مكرم يالسامع عن اسمه. ونعرف كلنه بموضوعه
منكر يارب كون بكبره. يكسر يوميه ظلوعه

مانهتم لليبغض اعمه. وينكر حرك الدار
بس المحسوب اعله الشيعه. ليش يجامل صار

كعبة كل اشجاني. يا عاشور الثاني

……

المنجل يخلص حياته. ذباح ونعرفه قاتل
تاليهه يعمه نشوفه. والصيت بس للسنابل

رادو صوت الزهره يموت الصاير شو عكس الواقع
صارت ثوره وصارت ثايه مثل اذان البالجامع

وداعة ذيچ السبحة البيدچ. والمحسن والباب
والله بكل مجلس تلكينه. چن تربه بمحراب

متوسط وجداني. ياعاشور الثاني

……..

عاشور ثاني نقيمه. لم زينب بكل روايه
والحلوه بالفاطميه. مابيهه فصل النهايه

من الباب ليوم المهدي جيل لجيل يخدموهه
الله الخالق خدام الهه. وتحبهم ويحبوهه

باجر من يظهر مهدينه. يرد ويا عباس
ومرقد يبني لامه الزهره. وليه تحج الناس

ضد كلمن شيطاني. ياعاشور الثاني.

……..

نسألكم الدعاء
حسين صادق العقابي

نعي

امام مشيبات هدوب عينه
من شاف العطش ماخذ سكينه
حين الشافه حماي الضعينه
رجف من الزعل سيفه بيمينه
كصد عباس يترخص حسينه
كله شلون ياعباس بينه
من تروح ياهو اليظل لينه
خاف تروح ياخويه من ادينه
وتدري الخيل لو هجمت علينه
نسمع بالحچي الماسامعينه



من چلچل عليهه الليل. تعاتب رادت اخوتهه
رادت تشتكي وتبچي. والخنكتهه عبرتهه
تدور والجثث كثره. ومحد سمع ونتهه
تمشي بخاطر المكسور. تبچي الصخر حالتهه

.....

عالخوه تدور هناك. رادت تعرف مچانه
وكفت واعرفت بالحال. ريحة غيرته هنانه
مسرعه وخايفه تمشي. وجهه اتغيرت الوانه
كبل ماتوصل لعباس. لن عثرت بذرعانه

.....

نحر عباس صاح بصوت. المن طالعه بهالليل
يأذوني اخافن بيج. وعليج اتصير فزعه الخيل
وشوفة عينج انه هنا. لاجفيني لاظل حيل
ارجعي سكينه مرعوبه. ونشفي دموعهه من تسيل

........

كالتله ارد شلون. خويه وما اشوف حسين
راحت شافت بصدره. الحوافر داست الكترين
يردنك بناتك كوم. ابونه يناشدن چاوين
ساعة طحت خويه الخيل. هجمت عالخيم صوبين


نسألكم الدعاء
حسين صادق العقابي

شهادة ام البنين ع

يحسين اجيت اسألك القبول
بشرني اروح وياكم شتكول

بظنوني خاف اضيع. متعوده عالرضيع

………

لوجهه الصافن فدوه . وذيج الشيبه الحلوه. واخر ليله هنا
شفته وگلت اسم الله. من يناغي لعبد الله. التمينه احنه ويا

كال للطف باچر نشد الركاب
شفته من زينب حسب حد الرباب
واني من خوفي رحت شلت الرضيع
ورحت يمه وأيست ماكو جواب

درت الوجه ما يحچن البنات
ياليلى احچي احنه مو خوات

بس ظلت الدموع. من عيني للظلوع


…….

واحد واحد اسأل. بدموعي واتوسل. من يحچي اويه حسين
كل ساع اوصل يمه. واتأمل لو كلمه. وخلص دمع العين

والله خدمه من العمر ويا كضيت
وفاتح بكلبه الي حسيته بيت
عالصبر والفركه يحچي ويايه ليش
وردت اكله وياك اروحن واستحيت

وبعيوني صاحت دمعة الحنين
مو عاده تنسون الخدم حسين

ماترضه يالحبيب. خادم يظل غريب

…….
شفت الضعن تحضر. موّت كلبي المنظر. ولحسين تعنيت
ماروح اني شبيه. تموتني الحنيه. بوحشة هذا البيت

كال يم عباس چا كتلج تعاي
والعليله من يصبرهه وراي
الوادم البالطف تحب كسر الضلوع
وانتي اسمج فاطمه وكل خوفي هاي

مبريه ذمتج يمه من نروح
وعذراً لكلبج سببت جروح

خافن يجيني موت. ذكريني بالقنوت

……..

يوميه باحلامي. چن انظر كدامي. اطفال بلاماي
چن جود بلا مايه. وچف طايح والرايه. وخيام بلا راي

وانظر اعله التل مره وكفت تصيح
تلحك اعله الخيم لو طايح ذبيح
وشفت اخوهه كوه كام من السهام
ينتهض ومن العطش يرجع يطيح

ياربي سترك هالحلم عجيب
بس لا وحيد حسيني ظل غريب

چن الزمن يريد. يكطعلي چم وريد

……….

اوكف دمعه ابابي. اسأل عن احبابي. بالرايح والراد
محد يدري شبيهم. صحت اسم الله اعليهم. دهري شضم وشراد

نذر لو من افتح الباب واشوف
يجي حسين وما يمر بكلبي خوف
وجاي عباس ويگود سكينه كون
بحنة القاسم احنيهه الچفوف


حققلي ربي حلمي الاخير
خلصان كلبي ليا حزن يصير

قصة عذابي هاي. تخلص لونه جاي
…….

نسالكم الدعاء
حسين صادق العقابي

قصيدة للسيدة زينب ع

مو عجيبه. جبريل كايد ناگتج
مو عجيبه. كل الكرة الارضيه الچ

علم يرف ليل نهار
اختك يبو راس الحار

……..

عدنه ثابت. بالعقائد. بسم ابوچ الارض هاي الزايله.
انحنيتي. كالو انتي. عدله انتي الدنيا چانت مايله

هزي ايدج ذوله ناس الشرف عدهم مشكله
همه بيت العنكبوت وانتي سورة زلزله


همه كالو . اذينه زينب بالسبي
احنه كلنه. هذا الشموخ الزينبي

كل خطوه زود واصرار
اختك يبو راس الحار

…….

انتي بالطف. ياعظيمه. مثل ابوج المايثني حچايته
الدنيا خافت. هواي منچ. مثل ابو فاضل اذا هز رايته

انتي بحزامين للطف يالعقيله محزمه
انتي صبرج خله حتى العلكمي شابع ضمه

انتي آيه. من الكهف للمنذبح
والقراهه. حسين اخوج اعله الرمح

جامعة كل الاسرار
اختك يبو راس الحار

…….

كلت زينب. وهذا كافي. للسبي مو كوه رحتي وخايفه
بكيفج ادري. من مشيتي. تاخذين بثار اخوتج حالفه

العدهه مثل لسان ابوهه ماتخاف من القصر
چنتي بالشام انتي قاضي ولكراسيهم گبر

شكد سماحه. بوجهج الشايل زعل
شكد فصاحه. بلسانج كبال الجهل

صحتي انه بت حامي الجار
اختك يبو راس الحار

………

انتي افضل. ماقرينه. انتي عنوان النساء الناجحه
طعم بالطف. صرتي زينب. شلون بالقرآن طعم الفاتحه

يلي ماعفتي صلاتج رغم مابيدج حبل
بسبحتچ بالحمدُ لله صاعده فوك الهزل

بالحقيقه. ميته بدونج كربله
رحتي ثوره. فوك الهزل بالعايله

بالشام صار الما صار
اختك يبو راس الحار

……..

الشام ماتت. موش زينب. والله والتاريخ
اخوج الكاتبه
ثورة الدم. النصر الهه. الماحچه الحك بس ابوج يحاسبه

مانسولف عن سياط ولا متن وكت السبي
اليوم احنه نكول زينب صعدت اعله التل نبي

بالختام. احنه اجينه بدعوتج
بالختام. شكراً ينادي خادمج

كل مجلس يظل تذكار
اختك يبو راس الحار

…….

حسين صادق العقابي

قصيدة للسيدة زينب. ع

شيخة الغاضريه. صارت المرجعية. بعد اخوهه
واعله عكازة امهه. تمشي والكل خدمهه. من سبوهه


ياراس غيره مكبع بشيلتهه كلش عالي
ترحون فدوه لخرزه من سبحتهه بت الغالي
عالرمح عباس بسبيهه والظهر مو خالي
اخت اللي صاح اعله الشمر متبري منك خالّي

بيهه شارة محمد. يمهه مايكرب احد. بت ابوهه
ياظهر غيره ورد. براية الكافل انشد. بت ابوهه

.....

التاريخ يمكن بي خطأ. وبمتن زينب چذب
زينب مثل طبع الشمس. يحترك كلمن يكرب
من كال ضاربهه الشمر. لا حاشا لله تنسب
صح الشمر يضرب طفل. ويم بت علي يتأدب

الهه دور الكفاله. والشمر وي رجاله. بيهه حارو
تمشي چنهه الصميده. والسوط تكسر ايده. بيهه حارو

.........

يكيدون اديهه محتمل. والشاره شيكيدهه
ياهيله كلما تنضنك. يطلع عطر من عدهه
چم بخت وي زينب مشه. لامامشت وحدهه
وحسين شيلتهه كبل. عكدة بخت عاكدهه

تمشي ويه العبايه. مو مره چنهه رايه. مايهمهه
حتى سبعين الفهم. تهز اديهه لعددهم. مايهمهه

......

من مشت رسمت خارطه. بكل ديره تنصب مأتم
وجبريل ينزل للعزه. شادودهه ويتحزم
17 منحر عزبت. للشام لا ماتهتم
تكول اليجي من الله حلو. چم زلمه منهه تعلم

عدهه فصل الخطابة. چنهه ابوهه بشبابه. من تسولف
الخطبه چانت عظيمه. بيهه الهم هزيمه. من تسولف

........

بالقصر لا ما طولت. سولفت چم حچايه
كسّرت رجلين العرش. بالشام دكت ثايه
وصلت ركعتين الشكر. ودموعهه مصلايه
ترست مواقفهه الدهر. وتطلب الدنيه هوايه

وي ضعنهه بسلامه. ردت اويه اليتامه. بس رقيه
عالظلم تبقه شاهد. طفله محتاجه والد. يارقيه

.......

لولا الاعلام الزينبي. چا كربله ماصارت
هالليله زينب مولدچ. من كال زينب ماتت
دولة ورئيس وعسكره. بحچايه منچ طاحت
خدامچ الليله بفخر. مشكوره زينب صاحت

غيرة الهاشميه. تبقه هيه الهويه. زينبيه
الليله يمچ امانه. اللطمه هاي وعزانه. زينبيه

.......

نسألكم الدعاء
حسين صادق العقابي

ابوذيات للسيدة زينب ع

نخيت شكثر حيلي منتخالي
يطف والمن ابكه منتخالي
يبو فاضل عفتني منتخالي
دخذني وياكم الوحشه اذيه

……..

آنه اللي ندبته ونخيته
وردت عباس يسمع ونخيته
صحت والله هظيمه وآنه خيته
حرمه وزلم غربه تحيط بيه

…….

متى بجروحي ياخويه تراييف
ومن كثر البچي دمعي تراييف
ضعف مو خوف أنه چفوفي تراييف
اختنك بالحبل دم اطراف اديه


…….

حسين صادق العقابي