شهادة مولاتي #زينب عليها السلام
.

عسى ومامش جنازة ولاكو تشييع
يكـون بغـربة تغمض عين اخيتك
بـموتي ردّت چـفك يومـي توديع
وچـذبّت امنـياتي بيــوم شـفـتك

چثة اعلى الوطية
بـحـرّ الغاضـريـة
اجتك خيل وانت
درت عينك عليـه

گبل لا تغمض جفوني ، بعيوني
صورّك خوية مرّن
شفتك خوية باليمنى ، ساترنا
وبرد دلالي وحنّ
ومرّت صورة باليسرى ، عالغبرة
طحت وتصيح اعذرن

يا خوية .. يا خوية .. يا خوية

.

بالشام اندفن ما چان عالبال
ردّت وياك تخلص كل حياتي
من الباب للخيـمة وللحبـال
ردّت او ما ردّت ميتة امنياتي

حرام الدنيا چنّها
اطلب خوية منها
ماتت خوية زينب
بعيدة عـن وطنها

عن گبرك بعد گبري ، وبعمري
يمك چنت اريده
بحيث الشوگ لو مرّني ، ياخذني
الكافل ليك بيده
بس كل هاي ما صارت ، واندارت
وصفت زينب بعيدة

يا خوية .. يا خوية .. يا خوية

.

دمعة عيني من تطيح عالخدّ
تحفر بالگلب حـفر المـعاول
بآخر ساعة ادوّر مامش احدّ
منكم ظهره من مصابي مايل

ولا واحـد لـگـيتـه
حاضر موت اخيته
نزيز الگاع والغـيم
ما باچي البچـيتـه

بالعاشر چنت يمكم ، انظركم
موتى بلا مناحر
وبچيت المات واعذرته ، اوّدعته
بدمعة وگلبي حاير
وهسة الموت يم راسي ، يا ناسي
دمي ودمعي فاير

يا خوية .. ياخوية .. يا خوية
.


حسـين وداعـة الحـيرة وكسرتك
مشتـاگه اردّ اشم عطرك واموتن
تعال انـت وگمـر هاشـم لأختـك
بـراحـة لو اجيـتوا لگـبري افـوتن

بـآخـر سـاعة الـيـه
مـا اريـد الـسـبـيـة
اريد اسمعها منكم
زينـب هـاشـمـيـة


اريد عيوني لو غمّضن ، ينسدّن
بوجهكم والدمع هامل
الغربة والسبي وياها، انساها
لو يمي انت والكافل
تعالوا بداعة دموعي ، بضلوعي
جمر خيمة ومشاعل

يا خوية .. ياخوية .. ياخوية

مرتجى موعود

#اللهم_عجل_لوليك_الفرج

مولاتي يم الخدر
........
ارد اسولف عن مره وبيها ارد ازود
والخلك خل تستمع لفعالها
مره محد شافها ومخوفه جيش
والزلم تتراجف من اخيالها
تكفلت زينب شكو اطفال ونساء
لمن طاح اعله الترب كفالها
زينب زينب.
وعلي ماجنها مره
زينب زينب
جنها سبع الكنطره
زينب زينب
صار اسمه المفخره
......
خلفتها فاطم الذيج الطفوف
وعلي قتال العرب واليها
كون مسموح المره تكض السيوف
كلبت الطف سافله بعاليها
وجان صاحت انني اخت الحسين
زينب اليوم الركب افنيها
زينب زينب
امها فاطم زينب
زينب زينب
لعليًُ تنسب
زينب زينب
اتعب وما تتعب

........
ماتو اخوتها وبقت تمشي بشموخ
خذت ذيج الهيبه من عباسها
يمها السبعين الف صارو هلال 
روسهم طخت وماطخ راسها
علي يم الله  يسولف بيها كام
وفاطمه تتفاخر بنوماسها

زينب زينب
سوت الماصاير
زينب زينب
ابحزنها اتكابر
زينب زينب
علي بيها اتفاخر 
.......
دخلت القصر ال اميه بكبريا
وكالت انا حيدر الرباني
ما اطخ راسي لهبل والمشركين
علي بهايه علي وصاني
ابو فاظل طاح بالطف تدري هاي
اليوم اصيرن ابو فاظل ثاني
زينب زينب
خذت دور الكافل
زينب زينب
صارت ابو فاظل
زينب زينب
بيها كلشي كامل
........
ماهتمت للزلم اخت الشجاع
بل شجاعه صارت وفايه
الرايه طاحت بالطف بامر الاله
وزينب بهمه خذتها الرايه
حسين جنها واكفه بنص الرماح
وجنها حيدر مامثنيه احجايه 
زينب زينب
زينب الوفايه
زينب زينب
كملتها الايه
زينب زينب
جفها شال الرايه
...................................
اللهم عجل لوليك المنتقم الفرج

ماهر فؤاد العسكري
محرم زينب 1445

#ابوذية

اخوتي احيود شيالت عوالي
ومايرضون لو سمعو عوالي
بيهم روسنه جانت عوالي
هبطن من هوو فوك الوطيه

منقول

#اللهم_عجل_لوليك_الفرج

..

گوم اوياي .. نخيتك .. گوم اوياي
ماضل رأي .. لخيتك .. ماضل رأي
خويه ابهالبراري ابنص شمات
شلون انبات .. گوم اويـاي
هاي شلون .. يخويه .. هاي شلون
انه أم عون .. واحشّم .. انه أم عون
ما ننـدل دربـنه وبـس نيـران
عالنسـوان .. گـوم اويــاي

انه اسمي الحبيبه .. شو صار الغريبه
ولا ضلـتلـي هيـبه .. ولا حماي
عينه الحادي صلفه .. واحنه اهل الله عفه
مــن ايسبنه كلـفه .. شلون ابهاي

فزعتك وچف ايدي عالرأس
مشـوّنه نـدبـي ابـيـن الـنـاس
ولا خيـمـه عنـدي ولا عبـاس

•••••••••ـ

شدّت حيل .. حربكم .. شدّت حيل
جاني الليل .. غـريبه .. وجاني الليل
هيمه وتهنه بيهه وعدنه أيتام
بيهه الآلام .. شدّت حيل
حگه ايشيب .. دليلي .. حگه ايشيب
شلون ايغيب .. گمرنه .. شلون ايغيب
جا ياهو اشتگيله وغربه الناس
مني الرأس .. حگه ايشيب

انه الهاشميه .. ومچتوفات اديه
كلهه تصد عليه .. ودربي ابعيد
غربه وكلهه أذيه .. ولاعدهم حميه
طگوني اعله أديه .. وبيدي الاگيد

گمت التفت للحومه والروح
مذبـوح ويلي شـلـون مذبوح
خلــونه نركـض ليـش تـروح

•••••••••ـ

من عالنوگ .. واشوفك .. من عالنوگ
يالمسحوگ .. تــنـــازع .. يالمسـحـوگ
ثوبك بالحـوافـر راح انـشـوف
بينه الخوف .. من عالنوگ
ما رحمـوك .. يـويـلي .. ما رحمـوك
من داسوك .. يضامي .. من داسوك
دمك بالبراري انطش ويــلاه
صحت احاه .. ما رحموك

وابدرب المنايه .. نمشي بلايه رآيه
لا ضلت حمايه .. بس شمات
يالـنـايم مشينه .. گوم الحگ علينه
يا وسفه انسبينه .. علويات

عالـغــبـره نـايـم مــا مـرتـاح
ما ضل عـظــم ويــلاه ماراح
يعني انته هسه ابلايه اصفاح

•••••••••ـ

للـديــوان .. دربــنه .. للـديــوان
عالتـربــان .. نعوفك .. عالتـربان
ورأسك عالرمح من يمشي اوياي
عالي اهواي .. للـديــوان
والعـزّ راح .. حسافه .. والعـزّ راح
ما نـرتــاح .. انا ادري .. ما نـرتــاح
كل لحضه ورقيه تريدك گوم
كافي النوم .. والعـزّ راح

ما گـالـوا خطيه .. من طگوا رقيه
أصغر وحده هيه .. تبچي العين
يا خويه انولينه .. درب الشام مشينه
يبن أمي انتهينه .. آه يحسين

والحادي لا مو خوش حداي
گـدامي خـويه ايطشر الـماي
حاچيني گلي شـلـون ابـهـاي

•••••••••ـ

- خيري الصفراني ✍️

هذا الشام و هذا السوگ
طبيناا و احنة اعلة النوگ
و الغربة التموا كلهم
يبن امي و حچيي الشمات
كاسر گلب العلويات
نسوان احنة و شنگلهم

عود آنه زينب و اختك يخوية
تاليهة اروحن وي الغرب
و من عالهزيلة ايصيحن يبوية
سكنة و رقية طول الدرب
و التبچي خوية ايسكتوهة گوة
و لو صحتك آنه حيل انضرب

يحسين شلون...و اهواي اعيون
شافتني خوية ابكربلة
و النوب بالشام...و ابيا دين و اسلام
اتنام ابخرابة العايلة
ضعنك متعوب...خوية و منهوب
و اليحدي ضعنك حرملة
♕♕♕♕♕♕♕♕♕♕♕♕♕♕♕♕
اشصار ابزينب يدري المات؟
وگفوني اباب الساعات
و الوادم كلهة اتباوع
آنه الما طالعلي اخيال
تاليهة اركب فوگ اجمال
ضعن حسين اهنا ضايع

وين انطي وجهي الوياية غربة
و ما بيدي كلشي بس البچي
يبن امي شفنة الما شافة واحد
الصار اعلة اخيتك ما ينحچي
ابنص الخــرابة و لو ردت انامن
اعلة اچفوف ادية خوية انتچي

صرت ابلا راي...و لا في لا ماي
فوگ الهزيلة اتلوعت
حرمــونة انّام...و چمــــلني الشام
چم حسرة خوية امن ادخلت
وينك يحسين...لحّـــــگ يحسين
برض الغرب عندك أخت
♕♕♕♕♕♕♕♕♕♕♕♕♕♕♕♕
من ياهي ابدي و هنة اهواي
من حَرگت صيواني و هاي
خلتني اطلع للهيمة
لو من فَزعت ذيچ الخيل
الخلتني اركض و ابلا حيل
و ناس اليمي ابلا شيمة

و تاليهة عالتل زينب تحــشم
يهل الحمية الوادم دنت
يم الخيام و نسواني تركض
بين الحوافر ذيچ الأجت
الهيمة ابكبرهة ركضنهة كلهة
گوموا الحرمكم يهل البخت

شچاية الفيت...و گــــــوة اتعنيت
ابلا حيل يخواني اكبرت
مهظومة اهواي...و هد حيلي الماي
و ابجيتي حيل اتعثرت
ترضــــون ابهاي؟...محــــــد وياي
و مسبية عد غــربة صرت
♕♕♕♕♕♕♕♕♕♕♕♕♕♕♕♕
لو ميتة اوياكم يحسين
و انعد خوية امن الميتين
و اخلص من ضيم الناگة
و اخلص من شوغات الشام
اليمتة و گلب اختك ينضام
و اهواي الكم مشتاگة

ضيم الهزيلة حسين اشيحملة
و هظمة الغريب ابضعنك حدة
كسرولي خاطر و آنه العقيلة
و ما ينحمل يبن امي السدة
اعلة اختك يخوية و وحدي ابغربتي
و دمعي اعلة خدي ايصب ما هدة

أمشي ابلا روح...و عفتك مذبوح
و رحت اوية ذباحك غصب
و حتى الدمعات...شابت من فات
ضعني ابوسط ديرت غرب
من چفك ذاك...لحبال اعــــــداك
رد للضــــعن ما ظـــل گلب

الشاعر ..حسين الزهيري

#اللهم_عجل_لوليك_الفرج

تانيت شكثر جيه💔...



تانيت شكثر جيه من اخواني بالشام
ما گالو گلب زينب لأخوة زينب احتام
شكبرها هضمه المغرب من دلالي ينضام

من تفگد ابوها البت تبگه بعازة اخوان
لا والد ولا اخواني چا وين اهلي الحنان
كلشي يهون بعيوني وجرح الغربه ما هان

محد اجه وگال أشجره؟ بعدوني عن بناتي
يا من يرد بيه لهلي هاي اكبر امنياتي
سوگ و سبي ونار الخيم خنگني ذكرياتي


༺༺༻༻༺༺༻༻

هلي المتعوبه رادتكم مرو لو على الطيف
هلي لا گاعي لا ناسي وادم تكره الضيف
محاچي هواي هضمتني من حبالي والسيف

يـ أهل زينب اناديكم غريبه زينب اليوم
بين الما يرحموني ما يرغد الي نوم
مر يا كافل ضعونك بدلالك شمتت الگوم

وين الكفل ضعن الخدر ضعنه مشه اساره
تانيـتك بگلبي جمر وما هودتله ناره
اباب القصر تالي العمر يا وگفة الحياره

༺༺༻༻༺༺༻༻

وصلني الموت واحتاريت أموتن وانه مشتاگه؟
صفنت و غورگت عيني وذكرت اليحدي بالناگه
وذكرت السالفه الحلوه لمن چنه نتلاگه

ذكرت حسين وايامه لمن چنه بالدار
وكعدتنه و محاچينه لحد الخيمه والنار
هاي ابيا وكت صارت بموته الميت احتار

موقف صعب بي ينجمع شوگ وحزن غريبه
بس الأشد من اقتنع هذا آخر المصيبه
محد يجي من الاهل بجنازه الحبيبه


༺༺༻༻༺༺༻༻


اموتن خاف بالغربة وموت الغربه مو شاني
هلي لحگو على بتكم تراني الموت حاطاني
هلي كلشي ولا موتي بعيد من اهلي و اوطاني

بعد ما ضل نفس بيه ركد كل حيلي و شوفي
هلي هلمره اسمعوني ثگل حزني وثگل خوفي
هلي الغربه تسد بابي خافن من تجي ضيوفي

باجر صعب زاير يجي و بالموسم الزياره
لمن يجي يضوگ الغرب من شوفة المناره
بگلبه ألم وحسره وندم ودمعه عَليّ تجاره


༺༺༻༻༺༺༻༻

بعد گبري على احبابي ودربي موحش وضلمه
متت مهضومه يخواني الموته بالغرب هضمه
اخ الشام ما ينراد زلم متجرعه مو حرمه

تعالو لو صعب دربي جيتكم تسد وحشه
الغريب بعازه اخوانه يهضمه بالغرب نعشه
وادخلو للصحن بدموع وصياح و ثگل ممشه

ما ينحمل موت الغرب يا حسرتي وعذابي
مرو عَلي يا شيعتي و سدولي اغترابي
موكب خدم و رفة أمنيتي اعله بابي


༺༺༻༻༺༺༻༻

تانيت شكثر جية

قصائد استشهاد السيدة زينب ١٤٤٥ هجري

ابو نوح الكناني

#اللهم_عجل_لوليك_الفرج

مثل حال العليله....ويزوار العقيله
وعلي كلبي يفض ساعات الوداع

اطلع ذكرياتي...واكتب امنياتي
وكلهم فدوه طشوهن على الكاع

وابچی عيوني يمهم...وبضيمي اكلهم
هاي ادموعي حطوهن بالمتاع

بلكت الله ...ام عون تقبلني واروحن
بلكت الله...الزم  الباب وانوحن
بلكت الله...اوصل الشام بحسرتي
بلكت الله...اوصل وابجي واموتن

...............
لیلي ماااا انامه...جن عيشت يتامه
وعلي مخلصه بجي للباب الاخضر

تخلصني لمدامع....ونام ابضيمي شابع
على هل حاله انا وعمري يكبر

البعد ماخله حيله ... انا اليكضي ليله
النفس كوه اجره  الله واكبر

باب الاخضر ...من اذكره تمرني عله
باب الاخضر...خله بيه حسره خله
باب الاخضر... اخ ياب النوايب
باب الاخضر ... انا المغيرله شكله

.........................
دخيلك يابو فاضل...سهلها يكافل
اختك بالغرب ماعدها وليان

رايد امشي يمها ...وحزن من حزنها
وضوكن غربة الماعدها خوان

واسولف عا العلاوي  ...وكثرلها النعاوي
على الضل بالشمس والغبره عطشان

والله حيره ...رايد امشي وهاي حيره
والله حيره ... بت علي هيه الجبيره
والله حيره ... اعليه مكتوب الغريبه
والله حيره ...لهسه بيد الغربه اسيره
........................

حزن كلبي شيفضه ...وانا عمري ركضه
اموتن خايف وما زاير ام عون

مشو ربعي وخوتي...وانا اتمنى موتي
شما ودع قوفله  اليزورون

جا ليش انا ضليت ...كاعد وحدي بالبيت
اوصلو زينب اليمي يكعدوون

يمته ازورن ...يمته اشوفنها المناره
يمته ازورن... وبالصحن اقرا الزياره
يمته ازورن ...وكلبي يمته يكضي ضيمه
يمته ازورن ...يمته اسوي لروحي جاره

................................

اللهم عجل لوليك المنتقم الفرج

ماهر فؤاد العسكري

محرم زينب 1445

موش السوط لاچمني ولا شام الحرگ دمي
بس هاظمني اجاني الموت ليش اخواني مو يمي
غريبة الوادم تگلي من عدهم كرهت اسمي
غربة تشيل الجنازة هاي الكبرت همي

غريبة جنازتي وغربة اليشيعون
وسكتة الفاتحة ولا ناس يبچون
هظيمة يصير سكتة موادع ام عون

لابوج لا عمج حضر يسكينة
ولانگعت تابوتي دمعة عينة
بسرعة الغريب الوادم مودعينة
----------------------------------------------------------------
العزيز اليبطي تشيعة وتشيعي الخلص ركضة
بدربة هواي توگف ناس بس تودعة مو عرضة
هيج يصير تشيعي يبن امي شعجب ترضة
ثاري الموتة سلعة سوگ هم كل واحد وحضة

العزيز الشالك يهزك يتابوت
لا هزوك لا يمك طلع صوت
بلاية دموع مايرهم ترئ الموت

لاثوب ينشگ لاصريخ تسمعة
والمو عزيز الناس گوة تودعة
لتشيع زينب رايدين الفزعة
-----------------------------------------------------------
جي غربة اليشيعوني تضحك لو عثر نعشي
ومن گد الوجع ياناس ردت اوگف واگوم امشي
هو حسين كلشي الچان بس مات وخلص كلشي
جان براسي يطلع شيب هسة بنعشي وبرمشي

المتنها من السياط مجرح شلون
خايف تلچم من اليغسلون
حتئ بموتها وتتألم ام عون

واتوسل اعلة الماي خلصت گوة
جنازة وبلاية خوان ابد مو حلوة
هاي العليها الثوب ينشگ تسوة
------------------------------------------------------------
گلت بلكي اوصل الگبري وتتلگاني اخوتي هناك
لو ادريك ماتحضر جا بالطف متت وياك
وين الله انزل بگبري واديرن وجهي خوية الگاك
هاي التكسر الخاطر اعله شوفة وجهك انه انخاك

اعلة شوفة وجة اخوتي انخاهم تصير
حتئ بموتها وزنيب ترئ تحير
عگب وجه اخوتي ولاشايفة الخير

انة اعلة شوفة وجه اخوتي اتوسل
والشام غربة وجدمي ماضن يندل
بموتي اذا ماجيت يحسين ازعل
---------------------------------------------------------

هلووا فوگ جسمي تراب وانة اتنطر الجية
شوية گام يضيگ ياخوية الگبر بية
اخوتي بكربلة ياناس وانة بغربة مسبية
ترضة الغربة خوية حسين تدفن جسد علوية

غطاني التراب وانت ماجاي
وبالمعطشك يرشون الگبر ماي
وياي خواني هسة الغربة وياي

تكسر الخاطر زينب الوحدها
لا خوة لاضلت گرايب عدها
بجفوفك محسبة الجنازة تشدها
----------------------------------------------
#علي حالوب العگيلي

#اللهم_عجل_لوليك_الفرج

درب السبي كلش كسرها