دموع احزان هالليله اجرها
وصفت حسره بثر حسره اجرها
علي الهادي اله شيعه اجرها
عله الزهره وعلي حامي الحميه

....
..
شعجب گلب الزمان اعليك لاحن
وسهام الحزن للروح لاحن
علامات الحزن عالهادي لاحن
ونصبت مأتم احزان الزجيه..

....
...

تعيل الدنيه لو داور سكنها
والي ونه ولا واحد سكنها
عله اللي برض سامره سكنها
علي الهادي اندفن بيها وابيه
.
.
.
عدنان الحمامي
@hussien889

قصيدة لاستشهاد الامام الهادي ع


بين العيون. چم غالي مدفون
من المدامع. مشيبات الجفون

.......

ما اسولف والتسولف دمعة العين
بدنيتي شيبن كلبي ذني الاثنين
الماي من اتحسسه ياخذني لاوين
وتربة مصلايتي تبچيني لحسين

بدمعات المصاب. بللت الثياب
والهادي ميت. من دفعة الباب

........

شما اشوفن انه علويه بخواتي
اذكر انه زينب وتوكع عباتي
ولو شفت كدامي يتمشن بناتي
يارقيه اصرخ واموت بذكرياتي

طفلي من انظره. مادامي نحره
وبمهده دافي. وماي اعله كتره

........


ويه اخواني اذا نلتم سويه
اذكر الظل ظهره خالي بلا خويه
وصاح ياعباس ما تلحك عليه
وصوت من المشرعه طاحن اديه

بعيونه حسره. وبظهره كسره
ولخيامه خالي. رد يبچي مهره

.......

انه كل قصة عذابي من محرم
منين ما اقراهه عيني تنترس دم
تهون كلهه والصعب حرك المخيم
والشمر كدام زينب من تحزم

ظل ساكت الجود. والتحچي الكيود
وتصرخ چفيلي. شيردك ردود

.........

الموت ارحم من سوالف تهدم الحيل
بلا ولي عماتي ظلت من اجه الليل
لجدي الحسين الدمه من مدمعي يسيل
عدل بعده وبي نفس من داسته الخيل

من يا الم مات. كلهن جراحات
والاصعب اعليه. كدامه شمات

.......

كلفت نسمة هوه تحمل كلامي
الهادي طاح بضيج بلغي حسين امامي
من الغريب وللغريب ابعث سلامي
بجبدتي سم وذْكرت جبدك الضامي

ياكلبي ومنين. بيا حال الحسين
البضلعه حافر. يتنفس منين

.......

نسألكم الدعاء
حسين صادق العقابي
@hussien889

#الامام_علي_الهادي

للامام علي الهادي عليه السلام...

دم أحمر عليه الجفن .......... دارآه
الهادي امست خليّه وسف ... دارآه
عله الجبله اضن ابيوم ........ دارآه
ابنه العسكري شاف المنيه. . . . . .

وبلسان حال ولده الامام العسكري...

اون والليل احسنّه ....... ون وياي
زماني ابد ما مره ...... ونه اوياي
الكل تمشي مع الوالد .. وأنه اوياي
جسد متسمم اوچبده فريّه ...

الروح اتريد راحه .. ما تبه سّمّ
لچنّ الهادي عمره .. ما تبسّم
اويلي اشچان ذنبه .. مات بسّم
وناره بالگلب ضلت سريّه ..... .

عجيبه الدنيا ما مش ... راحه منها
الخير البيها راح ...... راح امنها
الهادي ابچبد ذايب ...... راح منها
عليه ون العرش هاي المسيه .......

وبلسان حالي انا ..

يمن ذكر الله ما يوگع .. ..... من اشفاه
وحگ چبد اللذي امأيس .... ..من اشفاه
دمع عيني عله امصابك ..... ما نشفاه
الا اتراب گبري ايهل عليه ........



ابو فاطمة الطائي
@hussien889

ميمر
يالهادي صبت جم عين لمصيبتك هاليله
**************
اليوم الشمس مكسوفه لجل امصابك
والدنيه مولاي اظلمت بغيابك
حته التراب ايشم يريد اترابك

وتكدر اليوم الكون والفكدك انهد حيله
**************
ناده المنادي الهادي يا عالم مات
ومثل المطر نزلت عليك الدمعات
حرنه نشيعك لو نشيع الايات

ينزف كتاب الله اعليك والباري ضل يشكيله
*******************
غيمت وندار الفلك سكانه
ودين الله هاليوم انهدم بنيانه
والعسكري صله وحضن جثمانه

الاكبر امن الكاع اشلون يا كبر راح ايشيله
********************






الشمت قميصه اتحسر اشجم يعكوب
ومن الصبر مل وجزع جم ايوب
مثل الحمامه ابابك الروح اذوب

مالت الدنيه بفركاك وياهو اليعدل الميله
*********************
اليوم الامام المهدي معصوب الراس
ويصيح واسوني اعله جدي يا ناس
السامره بالرايه تعنه العباس

يم النعش ضل اينوح والمهدي اجه ايتجيله
**************
انته السفينه وبيك صار المعبار
وكلمن يحبك ما تمس جسمه النار
ملهوفه يم كبرك تطوف الزوار

وبلا ثمن تنطي امراد والكاصدك تدعيله
***************
تمت
تحسين الخفاجي
@hussien889

لمولاي علي الهادي عليه السلام

يابن الجواد..ادموعي لاجلك هامله
يابن الجواد..فگدك جرح سيد الملا
عمرك خلص نوح وحزن
لمصابك يهل الجفن
يابن الجواد

لفكدك تبجي سامرا...وفاطم تبجي وياهه
اجتك شيعتك مولاي ..كوم انهض تلكاها
المهدي لشوفتك مشتاك ..يمك روحه خلاها
ايتام الخلك مولاي بعدك يانسل طه
باب المراد ..بابك يضنوة حيدره
يابن الجواد ..لاجلك يون حته الثرى
ودموعه هلت عالچفن
لمصابك يهل الجفن
يابن الجواد

ياعاشر وصي ومعصوم..اصلك بالشرف بادي
الله اختارك وسماك..باسمك ياعلي الهادي
خصكم الله بالتنزيل..وطه يردد اولادي
دنيه لشتتكم ليش ..وكل معصوم في وادي
رب العباد...رادك امير عله الخلگ
يابن الجواد.. صرت انت ايه وللعشگ
ياحب على مر الزمن
لمصابك يهل الجفن
يابن الجواد

عمرك حسره يامولاي..جفنك ماهدا ولانام
عينك من تغمض ليش تشاهد بالمنام خيام
ماتهدا وتفز مرعوب..تصرخ يامصاب الشام
آه يمصيبة الراحت..فوگ النوگ وي ضّلام
مااظنه راد..ذاك الخدر بيد الكفل
يابن الجواد.. عمتك غريبه عله الهزل
يالحيلك يهدّه الضعن
لمصابك يهل الجفن
يابن الجواد

دمعة غايب العترة ..تجرح وجنته وعينه
خلصت روحه بالحسرات..بس ماخلصت سنينه
يبجي لفاطمه الزهراء..ويبجي مصيبة حسينه
ويذكر عثرة الحوراء..ويظل يلطم عله جبينه
وزين العباد..عالناكه مجتوف بحبل
يابن الجواد.. مصايبكم الماتنحمل
يل هدك صواب المتن
لمصابك يهل ا لجفن
يابن الجواد

جفنك اسود من الضيم..يالمهدي ودماك خضاب
لو راد الله عندك بيت.. يمته نقبل الاعتاب
مااصدگ تطب للدار..دومك تبجي يم الباب
تذكر طكت البسمار..وجرحه الي ابد ماطاب
السبع الشداد...طاحن لا ظلت سمه
يابن الجواد..لمصيبة امك فاطمه
فوگ الترب دومك تون
لمصابك يهل الجفن
يابن الجواد

علي طعمه البطاط


الفاتحه لوالدي رحمه الله
@hussien889

شور لعبد الله الرضيع ع


تعال وضامتلك شوگ يا هيله ،
راس الرمح حار وما ألك حيله
يمه انت وحيدي شلون راحت هيچ ؟
ضحكاتك الحلوه التارسه الشيله

عبد يمه _ سواليفك خذتني وحيرتني
عبد يمه _ شحلاتك من جنت تغفه اعله متني
عبد يمه _ مهدك خالي هاي العذبتني ،
________________________
ها يربات حضني شبَعَدَك عني ، ،
موت الماخذك ياريته ياخذني ،
يايمه بغيابك يبس ريج الخير ،
هيچ انطاك گلبك يمه تلچمني ،

عبد يمه _ رفيف عوينتك لسه اعله بالي
عبد يمه _ ومهدك گمت اهزه وهوه خالي ،
عبد يمه _ يلوموني واگول وليدي غالي ،
________________________
شحلاتك تضحك امن تلاعبك سكنه
ويشاقنك واگلهن لا تبچنه ، ،
اهل الطف عتابي وياكم بجرحين ،
انا الضايعتلي بگاعكم جنه ، ،

عبد يمه _ بمچان البوسه سهمك كض رگبتك
عبد يمه _ ليش تفارگ عيوني اعله بختك ،
عبد يمه _ تعال بحظني مشتاگه لضحكتك ،
________________________
ها ياضحكة سنيني وتعب ليلي
ها يالطيحتك باگت ثلث حيلي ،
يمه العافيه بلا وجهك بلا لون ، ،
يامن چنت أشكيلك وتشكيلي ،

عبد يمه _ هاي الدنيا كسره وانت واهس ،
عبد يمه _ لسانك چي متت عطشان يابس ،
عبد يمه _ وباچر تنذكر بين المجالس ،
________________________

- علي مهدي المالكي ،@hussien889

قصيدتي في رثاء الامام الهادي (ع)

دمـع الـفركـة يـاجدي
غيابك بيه ظل يحدي
عليك المناية اتحوم
ياجد رحت مسموم
***********************
انا الغايب عشت الالام حزني يشرح اخباري
عالفكدك جرة دمعي بحسرة تدمي اعباري
ياجد ذابـت جفوني الفركة عاشت اشـعاري
يـاريـحة ابـوي الـبيـك ارجـع كـحل انـظاري

تسمع وني واشجاني
ذبلت بعدك اغصاني
عالخد الدمع مرسوم
ياجد رحت مسموم
•••••••••••••••••••••••••••••••••••
بسم النايبة امصابك وانـه الـحسرة تـبرالي
ياخيمة الهدمها الموت بوحشة دارك الخالي
الـفارك يـوحشـة لـيلـه الا بشـوفـت الـغالي
شـينـوم الـفكد روحة عالـخد دمعتة تـلالي

بيش يداوي لجروحة
الفاكد سلوتة وروحة
صار البعد محتوم
ياجد رحت مسموم
•••••••••••••••••••••••••••••••••••••
سامره الحزن بيها تجدد جمرة امصابك
و احزاني جمر تلهب ميتم حالي بغيابك
واواسي العسكري الليلة زاير واكف ابابك
اسلم دمعي يسبگني ودمعي يسمع جوابك

ابنك وانه خطارك
جدي يتمت دارك
كلبي تعرفه مالوم
ياجد رحت مسموم
•••••••••••••••••••••••••••••••••
الله يـساعد الـوالد بـعـدك مـنـهدم حـيـلـة
اشـوف الـعسكري مالوم جفنة ماغـفة لـيلة
ذابت جبدتة بالسم يسولف دمعه الايسيلة
الوالد خيمة الاضمنة بعدك طاحت احجيلة

الله يساعد الفاكد
من ايده رايح الوالد
كلبة بحسرتة ملجوم
ياجد رحت مسموم
••••••••••••••••••••••••••••••••••••
يودع رايح الهادي شلونه حالته تهضمه
الشيع والدة بروحة اكثر موقف يألمة
بيده يدفن احلامة اتمنه لحده اليضمة
ماتحمل هجر روحه بوية ابنك اميتمة

مضيع كل ضوة عينة
الفاكد الله اليعينة
رافكني الهظم لليوم
ياجد رحت مسموم
•••••••••••••••••••••••••••••••••••
يادنية العشتها اجروح طعم الفرح ماجاني
تنوح لنوحي سامره وصاير حزني نيشاني
عالهادي بجيت ادموم مصابه والله أذاني
ياجدي لفاك البين وانه همومي عنواني

صعبة فركت الاحباب
وانطر جيت الغياب
يلغالي متت مظلوم
ياجد رحت مسموم


خادم الحسين/ علي القزاز
@hussien889

(قصيدة عن معناة السيدة زينب ع مع تضمين شعر التراث)

سلام الله على زينب. على زينب سلام الله

......

يطول المستحه اشسوه الدهر بيچ
يا أم الخجل شنهو اليبچيج
لأن ابلا اخو ومحد يباريچ
لو صوتچ طلع هل صعبت اعليچ

( طولي الچان ماينشاف شافوه
وصوتي الچان ماينسمع سمعوه
اذا طارش اكو لعباس ودوه
يكله اختك اسمهه اليوم عرفوه).

من العباس. سلام الله على زينب. سلام الله

...........

اضنچ خايفه من صحتي يمه
وحشة ليل خوف ودنيه ظلمة
وكفيلج راح وشكد صحتي بسمه
بكثر ما صاحت الايتام عمه

(تعالي يم حسن يمي تعالي
وشوفي كربله اشسوت بحالي
انه المحد نظر يمه لخيالي
توني اتذكرت عزي ودلالي)


من الزهراء. سلام الله على زينب. سلام الله


...........

صدك كدامج العطشان ذبحوه
وجبينه بالحجر يم عون صابوه
وعاري بلا هدم يالحره خلوه
صدك بالخيل كبل الموت داسوه

(سمعتي الزهره من صاحت بالاحزان
انه الوالده والكلب لهفان
ادور عزه وليدي وين ماچان
اويلاه اعله ابني المات عطشان)

اعله خدر الله. سلام الله على زينب. سلام الله

...........

كدامج صدك ضربو رقيه
وباكو من اذنهه احله هديه
وصحتي بصوت ماتحمل اذيه
وعليهه حسين وصه هواي بيه

وينه اللي يواسيني يهالناس
وين الله ويجيني هسه عباس
حلم والله رقيه اليوم تنجاس
هاي الچانت من الايد تنباس

بحزن وبآه. سلام الله على زينب. سلام الله

.......

مشيتي بدرب مابي بس شماته
وراح الچان يفرشلك عباته
عمرچ چان بالخوه شحلاته
وحيده الليل صحتي شلون اباته

بكيت محيره واصفج بالايدين
لاعباس يبرالي ولا حسين
اختكم وينهه او وين الدواوين
ماتلحك عله ابنيتك يبو حسين

سلام الله على زينب. سلام الله

.......

نسألكم الدعاء
حسين صادق العقابي
@hussien889

يخوية الموت مايرحم... بيا حال
صعب فرگاك ما ينحل ... بيا حال
بدرب الشام راح امشي... بيا حال
وذبحتك وشلّت حيلين بية

لوّن منصف صدگ هالدهر ...چفاك
مــني،وماخذك چن مــاي .... چفاك
گــطعــــوا عالنــــهر عباس ... چفاك
وأنة مني انشلع گلبي و ادية

علي هادي الخزعلي
@hussien889

زينب باخر انفاس..تندب وين عباس
راعي الجود..يمته يعود ..بعيوني اشوفه

رته اليوم يقرالي العديله
واسمع ونته ودمعه يسيله
تمنيته عدل نعشي يشيله
وتراب اللحد بيده يهيله
يحضر بالجنازه..ولاضلن بعازه
اخوي الحيد..ليش بعيد..مكطعوعه جفوفه

اريد احجيله واطيه الوصيه
وكله انسى اخيتك هاشميه
زينب يالنفل صارت سبيه
خلافك خيمتي احتركة عليه
سلتني النوايب..يخيال الحرايب
تربي العين..اعلى الزنين..مااعرف ضروفه

رتك تحضر بلحظات الوداع
واشمن ريحتك ياحلو الاطباع
تعال بجيتك تمحيها الاوجاع
ماتمشي السفينه بغير الشراع
يابد الهواشم..رد لاتضل نايم
اليوم انخاك..واترجاك..اريدنك تشوفه

يخويه امنيتي تنجمعون يمي
حيدر مايجيني وراحت امي
الحزن ينشال وتنسوني همي
متغيره يخويه وراح رسمي
تذكرني الشماته..بحسين اومماته
ابكلبي النار..امن البسمار..والطف وحتوفه

وحيده بموتي موبس بحياتي
مر فركاك فطرلي لهاتي
اشوف النار مستعره بعباتي
ذيج الليله ذبحوا امنياتي
انظر للشريعه..وعيالي صريعه
خويه اليل..ويه الخيل..خله بكبي خوفه

كريم الجياشي
@hussien889

متت سكته وطفيت بليله مطفيه
ولا واحد اجاني ولا بجه اعليه
............
خلص عمري واجاني واخذ روحي الموت
وتضيگ اعليه گامت خشبة التابوت
وحشه جازتي لا صرخه لا زاتوت
جنازه بلايه اخو ما بيها حنيه
..........
مسبيه بكفاي الوادم يصيحون
والشمات يم النعش ويضحكون
محد صاح راحت من ادينه ام عون
كلها تصيح هاي الحرمه مسبيه
..................
كلها تصيح زينب موتي بحزانج
ولا واحد اجاج ولا تعنالج
شنهو اليوجعج ماكالو اخوانج
غير الحايط يطيح اعله اهاليه
.............
صدك والله يروحي اتريضي وهونج
صار سنين انه ما سامعه شلونج
ومحد كالي اعله الغربه خي عونج
ولا واحد حضر دفنة العلويه
.............
ولا واحد حضر منكم يخواني
وليش الما اعرفه يصير دفاني
شكبرها لو اخوي بلحدي خلاني
ويذب اعمامته ويبقه يشم بيه
............
للعبد عباس الفرطوسي الكربلائي
@hussien889

آه يازينب

وين يتحصل دمع گــد مستواچ
وهاي ياعين الجروحچ تتســع

صار مألوف الدمع مو بس عليچ
يختلف عن كلها رايــدلچ دمــع

دمعه سمره توگع ابلون الرمــاد
ودمعه خرسه الصوتچ المامنسمع

وشايطه دمعه مثل خوفت يتيم
يركض وسوط بگفا واهگ لسع

ودمعه بيضه بلون نيتچ بالدعاء
ربي اقبل مني نحره المنگطع

ودمع تلزم بالرمش عن لاتطيح
الفوگ هزله ابلاوطاء بيا وضع

تشبگ بظهر الهزيله من تميل
من اقل هويه الضعيفه تندفع

رايد ابگ مستحاتچ ابچي حيــل
الرادو ايچتفون اديها وتمتــنع

اب آه كافل والهزل مرت عليه
حسره وبصدر الگمر من تنجمع

الرايه خلف الجود لاذت مستحات
وچف يلــوذ ابچفه ثاني المنگطع

الزينب انه اوّيني اوين الونين
الغــربتِچ ياقابلــيه التــتسع

گد حجم منزلتچ ابگلب الحسين
ابعــقل ماتتــصور اولا تنجمع

من علي الاكبر اعز خدرچ علــيه
وشقّت الجيب اغله من كسر الضلع

ماكو هظمه امن الطم ابخدي عليچ
مو غريبه ابچفي خدي منصــفع

لابقت دمعت اخو توگــع وراچ
لا ولد ناصبله ماتــم منفجــع

ونعشج الكزبر خجل من شيعوه
مستحي اعله امتون غربه ينرفع

وين يتحصل دمع گد مستواچ
وهاي ياعين الجروحچ تتــسع

ثائر الربيعي
@hussien889

مقطوعه نعي
خادمكم الأقل علي محسن الزيادي

اي يزينب غمض جفنج واستراح
وحّده من غمّض احّد غمّضها
ماكو حتى برؤيا اخوتج مااجوج
تنعقل هذا الجرح حيدر نساه
فاطمه اتدّور مجالس ماتجيج
حگها ام مذبوح واتدورلها اه
متّي عطشانه شربتي اشويه ماي
متنج ايخر دمّه واحد ضمّداه
جسمج اتغسل اكو بالجربه ماي
من ضربتي المحمل الدم غسلاه
جفن ماظلّج امن اهدوم الحسين
لو بذيج الحمره لفوج العباه
ظهر مكسور وغريبه اوحيده ليش
صدك نعشج من مشه محد وراه
اعتب اعله المرتضى لو عالكفيل
حسين معذور وبجالج دم قفاه
كلهم اعتذروا عمت عيني عليج
خبر هذا الشامت بروحه اشتراه
عمرج الخلص هضم ناحل اكيد
الحفر كبرج ضيّكَاه لو وسّعاه
هاي هيه انتهت ايام الدموع
لو رقيه اتلجمج بياابتاه.


علي محسن الزيادي
@hussien889

خطاب زينب للعباس ع


شني شگتلها حته تعشگك الگاع ،
شني چا هيج عندك فرگتي اتهون ،
الطف هوسة چثث وشلون الاگيك ،
سهم گلولي عدك فوگ العيون ، ،
وبعدني مضيعه بس اذكرت ها ،
علگ شدتلك امك فوگ المتون ، ،
يعباس السمه مدخنه _==_ الخيم ماتت
يعباس الهوه يباوع _==_ على الفاتت ، ،
طحت والرايه يم چفك _==_ گبل طاحت ،
________________________
لگيت ( القل هو ) بلا صوت الاذان ،
ولگيت البسمله المابيهه تجويد ، ،
واباوع لليتامه اعيونهم ليك ، ،
وسكنه تباوع من ابعيد لبعيد ، ،
والدخان سود مسوي الچفوف ،
شما تعتب ونين الفاگده يزيد ،
يعباس الرمل يحرگ _==_ جدم بتنه ،
يعباس وترف كلش _==_ جدم سكنه ،
يا عباس مدري شلون _==_ ما متنه ؟ ،
________________________
لگيت الرايه شامرها الهوه ابعيد ، ،
ولگيت المحبس الضايع بالاتراب
ولگيت المشرعه معصبها فرگاك ، ،
ولگيت الماي لابس لجلك انگاب ،
تره مو هينه كلش طيحت الحيد ،
ظلمه الدنيا لو بيهه الگمر غاب ،
يعباس السمه تسولف _=_ حزن غيمه ،
يبو فاضل تره يتّعب _=_ مشي الهيمه ،
يعباس وتعال الحگ _=_ يبو الخيمه ، ،
________________________
لگيت ازنود بيهن تعب السنين ،
ولگيت الحچي البي يتنومس الماي ،
طحت بس كبريائك لايح الغيم ،
و ما خليتنه انمر بيك حفاي ، ،
عن الخيمه لو عن چويي الاجدام ،
عن ياهي ارد اسولف صارن هواي ،
يعباس الوكت يقهر _=_ شكو حچايه ،
يعباس الخدر طايح _=_ على الرايه ،
يعباس الوفه امفرهد _=_ يوفايه ،
________________________

- تمت
-- علي مهدي المالكي ، ✏@hussien889

ميمر
زينب بخت لحسين اخت
والله ونعم خادم صرت
للحورا والمجلس هاذ نواسي الكفيل بأ اخته
*
الليله نواسي الكافل بهل محنه
ماتت الحره اوحيده نذكرها احنه
ونطلب حوائجنه ومنو يرجعنه

بجاه الخدر وام الصبر
التتنخه بي ما يعتذر
الحلفهم بزينب راح ثق تنكضي سالفته

شمحلاها وانت تواسي بامصيبتها
وتهل دمعتك علوجن جمرتها
شكدها وحياتك تنكضي بخدمتها

هيج انرسم بورقه وقلم
واتسجلت وي الخدم
وين البخت واسمك هيج بالدفتر مسجلته
*
باجر شنو بيوم القيامه عذره
الماحاضر بمجلس عزه للحورا
جا ياهو باجر من يموت يحضره

وسط الكبر ويوم الحشر
اليحضر ابد ماينتظر
مرتاح من دون الناس الخادم نصيبه السكته

فرق اليجي يواسي وفرق علكاعد
ترجيه بذنك حطها والله الشاهد
الحسين يعرف ربعه واحد واحد

من بين الف مبين عرف
من ينذكر كلبه يرف
الامه تنذره لحسين واعله البجي معلمته
**
ويله اليعوف اولاد حيدر ويله
ياهو مثلهم يسوه حته امشيله
احزام ظهر الكون هذا وحيله

هم العشك حبهم صدك
ونكصد تره من نختنك
عدنه اليشم الشباج مايرد بالخانكته
*
لو ساوموني بمال ماعوفنهم
اولادي واهلي فدوه راحو الهم
وانه شنو وخلوني خادم عدهم

هم الوطن وكت المحن
شمحلاها يم ابو الحسن
واليندفن يمه اهناك هنياله واحنه ابخته
*
زيد عدنان الزيدي
@hussien889

قصيدة بحق باب الحوائج
الامام الكاظم عليه السلام

انكسر ضلع الصبر واللون مصفر
وعله بيت الرساله الحزن يفتر
واويلاه ياسيدي
###############
الحك يابو الرضا ناصب عزائه
شاجر وأبد مابطل بكائه
ماينوصه جرحه بكد ولائه
وعبرته ابصدره بالحركه اتكسر
###############
السناسل بجت وتواسي بالمصاب
وحياطين السجن والسكف والباب
جرح ظل بالعرش ينزف ولاطاب
وكون الله بأسى لجله تغير
###############
وكل ظنهم احبابه بيوم ايطلعوه
امام الجعفريه عدل يلكوه
مكيد بالسناسل حين شافوه
الوحي جبريل لجله بحزن كبر
###############
انهد حيل الشرع ساعة منيته
ولطم وجه الاسلام ويهل بيته
ريته الليل ماينكظي ريته
بمناحه وفاجعه بعده تصور
###############
حقك يالرضا امنتنوح وبجيت
الابو خيمه انوصف عامو للبيت
اليتم اكبر جرح ودموع هليت
من حكه الكلب لاع وتفطر
###############
الابو محد يعوضه بهل الدنيه
راحة وغانمه وهيبه وتجيه
الابو ايقدم العمر كله هديه
وكل ليل اليمر عالعيله ينطر
###############
اليفكد يحس بالفاكد يمولاي
من كل كلبه يبجي موش بهداي
مو بالزاد ايغص مهظوم بالماي
يعيش العمر راحه شلون يكدر
###############
خادمك عبدالمعين الشمري
@hussien889

نعي
بحق الامام الكاظم عليه السلام
دين الله علفكده بلهفته ايلوع
ولبس ثوب السواد وهل الدموع
من حكنه عليك انهشم ضلوع
يموسى الكاظم بونه حزينه
@@@@@@@@@@
بسناسل كيدته كوم الانذال
انكسر ظهر الاسلام الهيبته ومال
ياحال البكه من سمهه ياحال
الجبد ويلاه كله اموذرينه
@@@@@@@@@@
وحك عمتك اسكينه ودمع الايتام
عله حالك الشيعه تنوح بالام
بكبر الكون جرحك صعبه يلتام
وآلامه ابد ماتهده بينه
@@@@@@@@@@
حك مو دمعه حك تبجونهه العين
بكل جسمه اثر ظلت نياشين
من ثكل السناسل يامحبين
انسل جسمك يبو روح الحنينه
@@@@@@@@@@
وهارون الرشيد ابعث السندي
وخله جروحنه مولاي تبدي
الك ثار البقى بركبت المهدي
ينتظره بقى مشبوحه عينه
@@@@@@@@@@
وعمتك زيينب بدمعه جريه
عله مصابك تواسي الكاظميه
من جرحك يلوج الالم بيه
مثل المجتبى الطشرو سنينه
@@@@@@@@@@
ياباب الحوائج شرف سموك
الف وسفه الظلاله ابرخص سموك
انهدم ركن الرساله بيوم سموك
الملائك بالسمه نصبت عزيه
@@@@@@@@@@
دمع عيني سنه هود سناسل
وسنه اتعافه احس عودب سناسل
اصد للسجن بس جومة سناسل
وثياب امدده فوك الوطيه
@@@@@@@@@@
احبابك لاتظن جرحك يسرها
العكس من مثلك امكيد يسرها
الشاهد يبقى يالوالي يسرها
الك ارواح من صاغت هديه
@@@@@@@@@@
زغير اعظم مصايب علي حيطان
وعله راسك طيور الكدر حيطان
الهظيمه اكظيت عمرك بين حيطان
الشمس متشوفهه يبن الزجيه
@@@@@@@@@@
خادمكم عبدالمعين الشمري
@hussien889

ثكيل
لمصاب مولانا الكاظم ع


والسجن ذبّل الورده الهاشميه
طاحت بديره أسمها الكاظميه ،
والسجن مابي حنان == مو مچانك هالمچان
_________________________
وعمامة السيد الخضره شبيهه
يمكن تراب السجن غطه عليهه ،
لو هالسلاسل ترجع لماضيهه ، ،
اي هيه شدت زينب من ايديهه ،
-- يابو طلبه اعله الجسر چم رايه ،
---- اترفرف وتستقبل المشايه ، ، ،
ما رحم بيك الزمان == مو مچانك هالمچان
ترجع الگعده بعد لو هاي هيه
والسجن ذبّل الورده الهاشميه
_________________________
يابو الرضا ارزقني النحيب شويه ،
حد ما يغرگ وجهي دمعي البيه ،
ضعنك مثل ضعن المره العلويه ،
وتشبه غربتك غربة المسبيه ، ،
-- يا معين وعيني اعله امصابك ، ،
-- كون اذب روحي اعله عتبة بابك
اسمك شگد بي امان == مو مچانك هالمچان ،
والورد ندري بمچانه المزهريه ،
والسجن ذبّل الورده الهاشميه
_________________________
وعين السمه الصبت دمع للصعبه ،
خلص عمركم غربه تشبه غربه ، ،
والكاظم بسجنه ومصابه بگلبه ،
من صله شذرة گاع خله التربه ،
-- جرحك ايراوي التعب للوادم ، ،
-- وانت خلصت العمر ما نايم ، ،
يا مفاتيح الجنان ، == مو مچانك هالمچان
والسوالف بينه ضلت هيه هيه ،
والسجن ذبّل الورده الهاشميه ،
_________________________
يالراهب شماله الجسر ما شالك ،
هاشمي وحال الضيم صاير حالك ،
اسوالف سبي العلويه لسه ابالك ، ،
چي ظلمه سجنك ما تشوف اخيالك ،
-- تفرش اجروحك اتنام اعليهه ، ،
-- مگبره الزنزانه نايم بيهه ، ، ،
يعينك الله اعله الزمان ==مو مچانك هالمچان
ضعنك يسولف سبايه الغاضريه
والسجن ذبّل الورده الهاشميه ،
_________________________

-- علي مهدي المالكي ،
@hussien889

سهام .. ظلام .. خيام .. اشوفك
سجين .. حزين .. أنين .. طفوفك
تشـابه بالقضيه
طفوف وكاظميه
ـــــــــــــــــــ
سنين عمرك بالسجن بيهن عجايب
انتو چم طف عدكم وكلهن نوايـب
العمره يوم ويقره بيك يصير شايب
هيچي جرحك ينزف متانيله غايب

نحيب * حبيب * قريب * يزورك
دمــاء * عــزاء * رثــاء * شعورك
يجامعهن سويه
طفوف وكاظميه
ـــــــــــــــــــ
الما يشوفك طف ولا يبچيك حسره
هذا اكـــيد الزهـــره باچر ما تعـذره
والـ لطم عينه عليك ابدال صــدره
هذا لموفــقه علـــي وباچر يشكره

الهواك * بچاك * رجاك * طبيبه
القراك * لگاك * نواك * حبيبه
يكاتب بالهويه
طفوف وكاظميه
ـــــــــــــــــــ
الشايلك بعيونه دمعه ويبچي بيها
هذا غالي دموع وانته التشتريها
العنده عين ونــذر للكاظم بچيها
هذا خدينه النمــل يســجد عليها

شجون * عيون * جفون * تنوحك
رماد * ضماد * مــداد * جروحك
يبو چفوف السخيه
طفــوف وكاظميه
ـــــــــــــــــــ
الشال بالشريان حبك بالمجالس
هذا عند حسين يشبه دور عابس
السلب عمرك يبن جعفر هذا بائس
هذا من احسين باگ شگد محابس

عجيب * رهيب * غريب * أنينك
تريب * خضيب * سليب * سنينك
فقط . عوزك رقيه
طفوف وكاظميه
ـــــــــــــــــــ
الشالك إبـاله تشيل اسمه اعله بالك
القاري حزنك هذا چـم مقتل قرالك
الذاب حسره بنص حضرتك لو اجالك
عينه تضحك بالحشر . بس البچـالك

فقيه * وجيه * شبيه * محمد
صبور * غيور * ينور * مسدد
متت بس باقي بيه
طفــوف وكاظميه
ـــــــــــــــــــ
الـ شد علگ بيده بعزاءك حاجه عنده
عالصراط يريد إيــدك ما تهـــــدّه
واليزورك حزنه جابه وحــزنه رده
الدمعه عالشباچ الك ينويها ورده

مُناه * عــزاه * لگـــاه * بتـــرابك
يطوف * يشوف * طفوف * عتابك
رزيه ابصف رزيه
طفوف وكاظميه
ـــــــــــــــــــ


مهدي التقي
@hussien889

قصيدة بداية المجلس بحق باب الحوائج الامام موسى الكاظم عليه السلام

( سيدي ياموسى الكاظم )

###############
ترعرع بالمأسي وبيه كومه جروح
وأبد ماهاد كلبه من الهظم والنوح
كظه عمره بسجن يرتاح مامسموح
هارون الرجس جمع ملاعينه
@@@@@@@@@@
ظكت طعم الحزن لكن صرح صبرح
بكرامه بلامذله اكظيته كل عمرك
امكيد بالسناسل بس كبر قدرك
كظمت الغيظ لجل المصطفى ودينه
###############
اشباه الرجال تراقبك كل حين
شافو صوره منهه هواي منذهلين
من تسجد خشوع ايسجدن حياطين
السكف من سجدتك ظلت تهل عينه
###############
يامولاي اعظم دور من أديت
كلهه سنين عمرك للوصي طشيت
كل هذا وتكول بعمري ماوفيت
حكنه شيعتك لمن تباهينه
###############
الرضا بفكدك يون ظكه الهظم مالوم
لمن نظر حالك سيدي مسموم
يويلي اخلاف ابوي النايبات تحوم
ونيران المصاب ابحركه تجوينه
###############
خادمك عبدالمعين الشمري
@hussien889

نزله
للامام موسى بن جعفر (عليهما السلام)

صاحب السجده الطويله
كظه بقيود الثجيله
@@@@@@@@@@
جان امامك صرخه تنصر للعبيد
شما يزيد الظلم اصراره يزيد
بالصبر ذل فكر هارون الرشيد
مثل جده حسين للعالم نشيد
صرخة الحق بزمانه
بكل فخر ماصح مثيله
@@@@@@@@@@
يوم ظاكت بي امام المتقين
بدمعه وبحركه وألم ناجه المعين
يا اللهي يامخلص الجنين
خلص ابن الزهره من سجن اللعين
اقسم عليك بضلعهه
وبصبر عمتي العقيله
@@@@@@@@@@
من السناسل والضرب جسمه خوى
تختنك ريته وصعب شم الهوى
بكأس سمهم صاحب السجده ارتوى
وبجمر احقادهم من انجوى
ابمصابه الكون حاير
والعرش مهدوم حيله
@@@@@@@@@@
اربع احماميل وضعوه عالجسر
نور وجه سطع للعالم بدر
بحالته ايات وسور تنعصر
بالسناسل كيدوه اهل الغدر
لا أهل تحضر تشيعه
ولاكرابه ولاقبيله
@@@@@@@@@@
آه واويلاه عله ابن المرتضى
الساك مهشوم وجفوفه امرضرضه
فوك هذا بجبدته السم من مضه
حك تلطمون الصدر يارافضه
وكل غيور عله أمامه
واجب المدمع يسيله
@@@@@@@@@@
راهب العتره يعرفونه الرجس
بلا سبب من كظه عمره منحبس
مثل جده نوره واضح كالشمس
اخذ من عمته العقيله اعظم درس
اتشيب الاطفال قصته
المنعرف روح الوسيله
@@@@@@@@@@
خادمك عبدالمعين الشمري
@hussien889