(٩)
يا صبرنه ابتعد ..... ماتت الوالده
وانه طبع الورد ..... عايش عله الندى
▪️▪️▪️▪️▪️
امي قبلة و اني اتوجه عليها
احلى ما بالدنيا شوفتها و حجيها
همي كله يروح من لمسة ايديها
رحمة الله و رأفته موجودة بيها
ما اظن باللحد .... تهجع الفاقدة
و انه طبع الورد ... عايش عله الندى
▪▪▪▪▪
امي يا جلمة هلا الينقط ملحها
تبتسم كلها الي و تضم جرحها
امي دنيا و الظهر ذبحوا صبحها
يا فراشة من السمه و كسروا جنحها
راحت و اعتقد .... للعرش صاعدة
و انه طبع الورد .... عايش عله الندى
▪▪▪▪▪
اني الحسين و شفت كسرة ضلعها
و ادعي يا رب انتقم من الصفعها
بوية يا حيدر صحت انظر وضعها
شافت الوالد اجى و مسحت دمعها
للضلع يستعد ... حيدر و شاهده
و انه طبع الورد ... عايش عله الندى
▪▪▪▪▪
انتظر حيدر يجي و ندخل سوية
جنت احس فضة تضم سرها عليه
فاطمة طول الوقت تشتاق الي
اني استغني عنها تدري بيه
فضة شو ما ترد... انت متأكدة
و انه طبع الورد ... عايش عله الندى
▪️▪️▪️▪️▪️
من رحت ليها صحت يحبيبة قعدي
و النبي مشتاق الج جم زهرة عندي
انت ما ترضين اظل بالدنيا وحدي
يمة قليلي هلا و بوسيلي خدي
يالمرتّي الجبد ... لسة متوسدة
و انه طبع الورد ... عايش عله الندى
▪▪▪▪▪
ونت عالمغتسل امي اسمعتها
اتقدمت خطوة و طحت لمن شفتها
يمة حاجيني بمحمد حلّفتها
فتحت الذرعان اليَّ و اشبقتها
يالعليج اعتمد ... مر عذابج بدا
و انه طبع الورد ... عايش عله الندى
▪▪▪▪▪
انه شابق امي و دموعي اهلها
والدي يرفعني عنها و ارجع الها
اسمع املاك السمه نادت بعلها
يا علي هالمعضلة انت التحلها
يا علي و القصد ... ادفن العابدة
و انه طبع الورد ... عايش عله الندى
▪▪▪▪▪
سيد عبد الخالق المحنه


https://t.me/httpsm80100000

📜قصيدة: ماتت يادهر أمي
✒️للشاعر: السيد عبدالخالق المحنه
📌 : الليالي الفاطمية


ماتت يادهر أمي بعد شنهي التريده
والأقرب إلي مني عليّ صارت بعيدة
وأتنفس مصيبة .. بفراگ الحبيبة
▪️▪️▪️▪️▪️
انا سنيني سفينة وغرگت ابهمي
عليه اسهام دهري من الزغر ترمي
تره ابكلمة إن آني احترگ دمي
ولا عيني تنام وأمي مو يمي
من زغره التموت امه يون والله اليعينه
وحشة مگبرة الدنيا بعد عين الحنينة
من زغره مشيبه .. بفراگ الحبيبة
▪️▪️▪️▪️▪️
بعد ضي الحنينه اتمادت الظلمه
وآنه جروحي تفز ابچلمة اليمه
تروح أمي واعيش اللوعة والهضمه
أمانة جدي رجعت بالوجه لطمه
وين أمي وتشاهدني إذا تمسي المسية
تحفر دمعتي ابخدي وأنادي يالمنية
يا ريتج قريبة .. بفراگ الحبيبة
▪️▪️▪️▪️▪️
شلي ابعمري ييمه وعينج امغمضه
هو بيا بديل الفارگج يرضه
آنا حسينج واطلبج ردي بس لحظة
يگلبي انتي العجيبة ما وگف نبضه
معقولة اللحد حنينة عن ابنها
معقولة بقت عيني ولا يوگع جفنها
ما ميت عجيبة .. بفراگ الحبيبة
▪️▪️▪️▪️▪️
إذا اعثر ييمه ينشده بالي
ولا اسمع اسم الله يبني يالغالي
بعد عينج هموم الدنيا تبرالي
تعالي فرگتج ما ترحم ابحالي
چن اضلوعي تتكسر إذا ضلعج اذكره
نار الدار اشاهدها كأن خيمة مسعرة
يا گلبي ولهيبه .. بفراگ الحبيبة
▪️▪️▪️▪️▪️
آنا وزينب نون ونصيح يم بابج
رحلتي يالزجية وضاعوا احبابج
وحگج لو جبل چا ذاب بمصابج
واهو الجاب الشمس للحين ما جابج
كلما ضاگت الدنيا اشوفج ابتسامة
واللي ايصافح ابوجهج أمان الله وسلامه
يا صبري اشيجيبه .. بفراگ الحبيبة
▪️▪️▪️▪️▪️
بلا تشييع أمي ابليل شالوها
كأن وردة ابنعش ذبلانة دفنوها
إذا فعلاً صحابة ليش هضموها
لأن گالت علي الأول يقتلوها
شيگول الذي ينظر كسر ضلع الشريفة
وايشوف القتل أمه على المنبر خليفة
ما ينفع نحيبه .. بفراگ الحبيبة
▪️▪️▪️▪️▪️
ثگيل افراگ أمي وظهري ميحمله
وأبو الحمله اشوفه اينازع ابحمله
يـخلة والدة وما تنسد الخلة
يجرح الـ بالدِليل ومحد ايشله
مو مثل النسه أمي وهضيمتها هضيمة
هي الينكسر حيدر لجلها اشگد عظيمة
والدمعة نصيبه .. بفراگ الحبيبة
▪️▪️▪️▪️▪️
بعد چم عام اشوفج يا ضوه اعيوني
تجيني الكربله لمّن يذبحوني
ابحوافر خيل أمية من يسحگوني
تغطيني ابعباتج من يسلبوني
نتلاگه بعد فرگه ابرمال الغاضرية
وابذاكه الوكت زينب يسموها السبية
يا روحي الغريبة .. بفراگ الحبيبة
▪️▪️▪️▪️▪️
#اللهم_عجل_لوليك_الفرج

https://t.me/httpsm80100000