دوستان عزیز با درود

لطفا وارد لینکهای ارسالی از طرف بندە‌ نشوید، تلفون و تیلگرام بندە حک شدە است.

کەچەڵ خان و غەریبە

لە ساڵانی زوودا لە گوندێکی دوورە شار کابرایەکی کەچەڵ دەژیا،کەچەڵ یەکێکی،درێژی کزی سەرچکۆلەی دەست و لوولاک ڕەقی قوون ڕەقی تا خوا حەز دەکا ناشیرین بوو.
کەچەڵ ئۆغڵان کۆتری بوو، ئەو ساڵانەی کە کۆتر باز بوو کەمتر توخنی نێو ئاوایی دەکەوت،گەپەجاڕی زاری ئەمو ئەو بوو،هەموو سات و کاتی لەگەڵ کۆترەکانی دەگوزەرا، دەنا دەچۆ مەزراو و مووچەی باوکی و بەم شێوە دوورە ئاوایی و دوورە خەڵک بوو.
ساڵانێکی زۆر ئابەم تەرزە ڕۆژگار دەهات و دەڕۆی لە پڕ هەموو شت گۆڕا،ئاڵ و گۆڕ بە سەر هەموو دەوەرو وڵاتا هات.
کەچەڵ ئۆغڵان کۆترەکانی نەما،قوونی ڕەقی گۆشتی گرت،کڵاوی بەنی مەرەزی عەسڵی کڕی،کەواوپاتۆڵ،چارەوێ و گاو جووت و کەڵ وعەڕابە،کەچەڵ ئوغڵان بوو بە پیاوێک لە نێو پیاوان،دەرک و دەروازەی گەورە.
لەو ساڵانە دا گوندەکە نەهامەتی شانی گرت،هەموو کویخا و کەیخودا و پیاوماقوڵانی مردن و کەسی وا تێدا نەما ئەگە بڵێی ئەوە پیاو عاقڵی گوندە. کەچەڵ ئۆغڵانیش هەرچی مۆرەی دەهاویشت جووت شەشی دەهات،.
هاتی لە هات بوو،بەخت ڕووی تێکردبوو، ئەوەی لەو دونیایەش دا پێی بڵێن هونەر و قسەزانی تێیدا نەبوو،ئەمما کەچەڵ ئوغڵان دەوڵەمەند ببوو
خۆی بە نۆ سەر ڕەشەوڵاغ نەدەگۆڕێوە، کەچەڵ ئۆغڵان لای وابوو لەو گوندو ناوچەیەدا کەس لەو باڵا دەستتر نێ، دەگەیشتە هەر کەس نێو نیتکەی لێ هەڵئەدا و پلاری تەوس و نوانجی تێدەگرت،زۆری پێنەچوو بۆ خۆی فتوای دا کە ئیتر لەوە بەولاوە من خانی ئەو گوندو مەڵبەندم.
کەچەڵ ئۆغڵان ئێواران دەستی لە بەر پشتێندی دەنا و دەورێکی گەڕەکی لێدەدا.
کەچەڵ وایلێهات خانی هیچ کوێی بە کاردار نەدەگرت،هەموو ڕۆژ دەچۆ بەر ئاوێنە بەسەر قەدو باڵای خۆیدا هەڵدەگوت:
چەندە شۆخ و قۆزو جوانم
ئۆغڵانە کەچەڵ نیم خانم
خاوەن مڵکم،خان نەماون
خۆم خانم ئەو خەڵکە خاون
هەرچی ئەمن نەیکەم نابێ
بڵێم ئاسن خوار بە دادێ
کڵاوی مەرەزم کڕیوە
جلی کەچەڵیم دڕیوە.

لەو سەرو بەندەدا ڕۆژێک لە ڕۆژان پیاو عاقڵێک،ژیرێک،زانایە بە هەڵکەوت ڕێی کەوتە ئەو گوندە،لە نێو ئاوایی تووشی کەچەڵ ئۆغڵان بوو،کەچەڵ ئۆغڵان کەبرای خوڵق کرد بۆ چای خواردنێک لاداتە ماڵ و دەرک و دیوانی ،کابرا کوتی کاری بەپەلەم هەیەو ناتوانم،کەچەڵ کوتی وادیارە من ناناسی من خانی ئەو گوندەم،نێوم ئەمەر خانە،کابرا کوتی ئەمەر خان ئەمن زۆر ساڵان لەوەی پێش هاتوومە ئەو گوندە و خانی ئێرە زۆر بە دێمەن و ڕێک و پێک بوون و کڵاویشیان لە سەر دانەبوو،ڕەنگە ئەو تایەفە نەمابن وا جەنابت بوویەتە خانی ئێرە، کەچەڵ ئۆغڵان کە زۆری خۆ لا بە قەدر بوو و پێی وا نەبوو کەس لەو بەرچاوترە بە تۆسنی کوتی غەریبە بزانە چی دەڵێی، لە پڕ گێژەڵووکەیەکی توند هەڵی کردێ،کڵاوی کەچەڵ ئۆغڵان با بردی،سەری ناحەزی کەچەڵی بەقەت مازۆک وەدەر کەوت،کابرای غەریبە کوتی:

کەچەڵ خان خانی گوندی
بۆ دەمدوێنی بە توندی
سێستمت بۆ خان نابێ
تەقدیر بۆ لێدوان نابێ
دەنا تۆو خان لە دێدا
کەوشی وێڕنی لە پێدا
بڕۆوە بەر ئاوێنە
دەستێ بە خۆ دابێنە
دەورو دوکان گۆڕاوە
گۆیا هەر کەچەڵ پیاوە
ئای لەو چەرخە چەپ گەڕە
لەو دوکانە بەدفەڕە
خانی مەڵبەندن کەچەڵ
شێری مەیدانن چەقەڵ.

18 ی خەزەڵوەری 1402ی هەتاوی
حاتەم سەراوی
شەوی پێنج شەممۆ لە سەر هەینی سەعاتی 8

https://t.me/Hatam_marzang

هەر لە دڵمدای

چۆن لە ڕابردوو تەرە بم؟
با دیلی ئەو لەچەرە بم
چۆن شەوەکانی دڵداری
ڕۆژەکانی پڕ بەختیاری
بخەمە ژێر خۆڵی زەمان؟
بەو دڵەی پڕ لە تاسەمان؟

زۆر دوور نێ چەن ساڵ لەمەوبەر
پاکیم نووسیون لە دەفتەر
کاتی شەوژوان و دەس بازی
دەتریقاینەوەو لێک ڕازی
بێ خەم،بێ دەرد،بە پێکەنین
دەچووینە نێو شیرنایی ژین

لە بەر ترسی فڕەی نەفەس
هەناسەمان دەنا قەفەس
دەستێ پڕ لە جوانی خوایی
پێی دەبەخشین دڵنیایی
هێستا چۆن فەرامۆش دەکرێن؟
ئەو دەفتەرانە چۆن دەدڕێن؟

دوای ئەو هەمۆ ساڵە جوانێ
خواوەند شاهیدە دەزانێ
دەنگت هەر خۆشترین سازە
نازت جوانترین ئاوازە
گوێچکەم پڕن لە دەنگی تۆ
چاوم پڕن لە ڕەنگی تۆ

گیانە هێستاش خەندەی لێوت
شکڵ و ڕەنگی جووتەی شێوت
کوڵمی پڕ خوێن و پاراوت
نێزەکانی موژەی چاوت
ئاخە چۆن ون بن لە چاوم؟
کاتێ خۆم هەر دیلی داوم.

ئاوایی سەراو،سەعاتی شەشی بەیانی
27ی خەزەڵوەری ساڵی 1402ی هەتاوی.
حاتەم مەرزەنگ

https://t.me/Hatam_marzang

حاتەم مەرزنگ

دوو چاوم جۆگەلەی خوێنن لە ئەشقی ڕوومەتی ئاڵت
دڵم هەنگێکی سەر مەستە لە سوێنگەی شیلەیی خاڵت
بڵێ با بەس لەجەرگی ئاشقی دەن تیری پڕ جەوهەر
کەماندارانی بێ ڕەحمی قەهاری دیدەیی کاڵت
نەسیمی سوبحگاهی بۆنی عەتر و عەنبەری هێنا
ئەمن ئەو کۆترە جەڵدەم کە دێمە سوانەیی ماڵت
بە سەر کوێستان و مێرغوزارو دەشت و چەمەنا سوڕام
نەجاتیم هەر نەبوو گیانە لە داوی زولفی تاڵ تاڵت
لە بەر تینی فیراقی جانسوزت چوون پەرو باڵم
فیدای تۆ بن سەرو ماڵم ئەتۆ شاد بن پەڕو باڵت
گوڵم گەردو غوباری کەوشەکانت دێنێ سەد مەروا
گەزۆیە بۆ منی شەیدات قسەی ناشیرین و تاڵت
لە سەر جێگای پشووی دواین نەفەس دابم ئەگەر تۆ بێی
بە چاوت دێمەوە سەر پێ بپرسی چۆنە ئەحواڵت
2ی سەرماوەز ساڵی 2723 کوردی
حاتەم مەرزەنگ

https://t.me/Hatam_marzang

ئەی هەورە باراناوێکان
ئەگەر هاتوو بە هەڵکەوت
ڕێتان کەوتە ئاسمانی نیشتمانم
ئیستێ بگرن
لەم وڵاتە بێ بارانێ
زەوی تونێ،درخت تونێ،زەمان تونێ
سەمۆرە تونێ،مەل تونێ
ژیان لێرە ،لەم ویشکە ڕۆیە زۆر تاڵە
ڕێوی دزە،چەقەڵ دزە
مامر دزە،هەڵۆ دزە
تەنانەت شێریش
هەر بە دزی سەر قاڵە
هەرچی هەیە هەر نا ڕوونێ
ئیستێ بگرن
با گرمە شینێ بگێڕین
گوڕو تینێ بۆ گیانلەبەران بنێرین
ئیستێ بگرن
با چڵک و چڵمی ئەندێشە چەق بەستۆکان
بشوێنەوە
ئەگەر هاتوو پێ مل نەبوون
وێکڕا دەبین بەو تۆفانەی
یاغی دەبن لەو دارانەی
ملی غرووریان داناخەن
بێ سێبەرن
سفرەی داهاتیان ڕاناخەن.

حاتەم مەرزەنگ
8ی سەرماوەزی 1402

https://t.me/Hatam_marzang

تاوان


ئەوین تاوانە،تاوان
باوانەکەم
ئەوین بە بارستای ئازادی جورمە
ئەوین خەتی سوورە،بڤەیە
لێرە جستانی ئەوینە،سەهۆڵبەندانە
بادەوەیە
گژەیە
تۆفە
باوانەکەم
لێرە نێوی دڵدار و دڵبەر بێنی
شوێنت هەڵدەگرن
هەزارو دوولایش بکەی دەتدۆزنەوە
لێرە ڕاوچی هاوخوێن و هاوڕەگەزتن
بە تەماڵت هەڵدەستێنن
باوانەکەم
ئێرە وڵاتی نووشتە و فاڵی قاوەو سیحرو شاڵە
ئێرە وڵاتی مەرگی تارو عودو ڕوباب و شمشاڵە
باوانەکەم
هەر چۆنێک بێ نەمامی ئەو خۆشەویستێ
لە سەر لوتکەی قەڕەوڵخانە دەچێنم
چاوەڕوانی بەهار دەبم
یا لە ڕێگای عەشقا دەمرم
یا دەس لە باڵات وەردێنم.

18ی سەرماوەزی 1402
حاتەم سەراوی