بەرهەمەکانی حاتەم مەرزەنگ

Forwarded from بەرهەمەکانی حاتەم مەرزەنگ (حاتەم مەرزەنگ)

بەرگێکی تر لە بیرەوەرێکانی سەراو

گوندی چەوگالی،زێدی دەنگ خۆشی ناودارو نیشتمان خۆشەویستی کورد سمایل ئاغای عەباسێ.ئەو گوندە لە 10کیلومێتری و ڕۆژهەڵاتی سەراو و لە بڵیندایی هەڵکەوتۆ،ئەوێ زەمانان پتر لە 60 بنەماڵەی لێ نیشتەجێ بوون،ئاوی گوندەکە لە کانێک لە داوێنی گوند بە پتر لە دوو ئینج ئاوەوە دابین دەبوو،بێجگە لەوە لە پشت قەڵاکەی کاکە حەمەی باوکی سمایل ئاغا چاوەیەکی ئاوی لێ بوو بۆ کاری وەرزێری و مەڕو ماڵات کەڵکی لێوەردەگیرا.
مستەفا ماچ ماچ یان ماچەکە یەکێک لە دانیشتوانی ئەو گوندە بوون،خات نازەنینی خێزانی کاک مستەفا خاتوونێکی تەشک و داوێن جوان و خاوێنی سەردەمی خۆی بوو.لە بەراوەرد کردنی باری فکری و ڕۆشن بیری بە پێوەری ئەوێ دەورە منداڵانی کاک مستەفاو خات نازەنین زۆر پێشتر لە پێش هاوچاخەنی خۆیان بوو،جا لە بەر ئەو ڕوانینە ڕووناکبیرێ کەش و هەوا وفەزای چەوگالی هێندێ بۆوان بەر تەسک بوو.کوڕانی خات نازەنین ساڵی 1355 هاتنە سەر ئەوەی کە مالیان بێننە گوندی سەراو سەنتەری ڕوناکبیری ئەوی دوکان لە هەموو ناوچەی ئاڵەشین هەڵبەتە گوندی ڕەحیمخانیش ئەوێ سەردەم خەڵکانی چاوەکراوە و خوێندەوارو وەرزیشکاری زۆری تێدا بوو.

ماڵی خات نازەنین لە گوندی چەوگالێوە سەعاتی دەی پێش نوێژی نیوەڕۆی ڕۆژی پێنج شەممۆی ساڵی 1355ی هەتاوی گەیشتنە ئاوایی سەراو.
لە دەرکی قەڵای کاکە ڕەحمانی حەیدەرێوە کە مەیدانێکی گەورەیه و شێرە ئاو و حەوزێکی چکۆلە و تەپۆڵکە خۆڵە مێشێکی تەندووری لێیە ،ڕاست بە دەرکی ماڵی سۆفی عەوڵادا کە ئەو ڕۆژە بە ماڵی شاعیری نەخوێندەوارو مەجلیس ئارای سەراو کاک حەمە حوسێنی شکوهپوور ناسراو بە هەڵۆ دەناسرا،کۆڵانێکی بەر تەسک بە رەو مزگەوت ڕاکشابوو، لە گۆشەی خوارێی وەتاغە دوو نهۆمەکانی ماڵی سۆفی سەفەر ڕاست ڕووبەڕووی ماڵی مستەفا شوان شێرەیەکی ئاو هەبوو، لە گۆشەی ئەو مڵکەی سۆفی سەفەر کۆڵانێکی تەنگەبەر دەگەڕاوە بەرەو سەنتەری گوندە و لای دوکانەکانی میرزاحەسەن و نەنە نێرگس و خاڵە ئەهەدو ئەحمەدی مام ڕەحمان و سەید جەغغەر، هەڵبەتە بەرەو گەرەکی سەرێ سێ دوکانی تریش هەبوون.
ڕووبەڕووی ماڵی مستەفا شوان ماڵی مینە شوان و مرێم گاوەخانی خێزانی بوو،مرێم گاوەخان کاری ددان کێشان و هەرەشتەبرینەوەو و جاروبارەش مامانی گوندەکەی بە ئەستۆ وە بوو.
(بۆ خۆم زۆر بەباشیم دیمەنی ئەو کەسانە نایەتەوە بەرچاو.)
لە خوار ماڵی مینە شوان،ماڵی موحەمەدی خات گوڵێ بوو کە ئەو ماڵە هێستا ببوو بەماڵی خات نازەنینی دایکی وێسب و عەلی ماچ ماچی برای.
عەلی ماچ ماچ یەکێک لەو کەسانەیە کە تا ئەوڕۆش لەلای خەڵکی سەراو خۆشەویستە و بە دیدەی حورمەت لێی دەڕوانن.
لای من عەلی ماچ ماچ یادگارێکی زۆر بە نرخی نێو بیرەوەرێکانمە.وێسب وعەلی برای زۆر زوو بوونە خۆشەویستی خەڵکی سەراو،هەر دوو لە لاوانی زۆر مێرخاس و دیاری ئەوێ سەردەم بوون.
لە خوار ماڵی عەلی ماچ ماچ یانی دەستی چەپی کۆڵانەکە ماڵێکی تریش هەبوو وەک لە بیرم مابێ ماڵی ڕەسووڵی مام خاڵند بوو.
دەستی بەرانبەریش ماڵی مستەفا شوان بوو، لە خوار ماڵی مستەفا شوان مەیدانێک هەبوو کە دەبۆ دەرکی ماڵی عەبەمیرزا و وەستا ڕەحمانی بازیارو بابەعەلی زاهیدی عەلێ کەچەڵ و ساڵەی مام مستەفا کە ساڵە گولیشیان پێدەگوت.ئەو مام ساڵەیە لە تایەفەی بینەندەکان بوو،مام ساڵەم وەک خەونێک دێتەوە بەر چاو، مام ساڵە ژوورێکی چکۆلەو ئەسپ و داشقەشی هەبوو. لەو مەیدانەدا،دوکانی عەبەمیرزا،بابە عەلی،خەیاتی وەستا ڕەحمان و دوکانی مام ساڵەشی لێبوو.
هەزاران جار یادی ئەوێ دەوران بەخێر.

درێژەی هەیە حاتەم

👍1

81 views07:55