Dhimma armaan olitti (☝️☝️☝️) dhoobame) kana gabaabinaan yoo ilaallu:

✅Himannaa jalqabaa keessatti iyyataan ammaa himannaa Qaama Kabbachiisaa Dambii Waajjira Waamamaa ammaa irratti dhiyeessee tureen qabiyyee lafaa kiyya irratti jeequmsa uume akka narraa dhaabu kan jedhe yemmuu ta'u, waajjirri (qaamni) duraan himatamee ture kun: iyyataan ammaa qabiyyee jedhame irraa mirga hin qabu; seeraan ala weeraree qabate; kaartaa sararaa kaafamee turenis ijaarsi irra hin turre; qabiyyee mootummaati jechuun falmee ture. Kana booda manni murtii duraan dhimmicha ilaalee ture waa'ee qabiyyichaa qaama ilaallatu irraa qulqulleeffatee qaamni ilaallatu lafichi amma duwwaa ta'ullee duraan kaartaa qilleensaatiin wayita ilaalamu ijaarsa kan ofirraa qabu ta'uu isaa hubatee qaamni himatame jeequmsa akka dhaabu jedhee murteessee ture.

✅Himannaa isa haarayaa kanaan immoo himataa ta'ee kan dhiyaate Waajjira Bulchiinsa Misooma Lafaa Kutaa Magaalaa Kolfee Qaraaniyoo (Bulchiinsa Mag.Finfinnee) yemmuu ta'u namni galmee duraanii irratti himataa ture (Malkaamuu Biraanuu) immoo himatamaa ta'eera.

✅Himannaa haarayaan kun immoo: Himatamaan (iyyataan ammaa) qabiyyee mootummaa seeraan ala waan qabateef, bara 1997 irraa eegalee hanga 2013tti kaartaa qilleensaafi sararaa kaafamee ture irrattis qabiyyichi kan iyyataa ammaa ta'uunis ta'e ijaarsa ofirraa qabaachuun kan mirkanaa'e waan hin taaneef, qabiyyeen kun qabiyyee mootummaati jedhamee akka naaf murtaa'u, akkasumas ijaaarsa karaa seeraan alaatiin irratti ijaares diigee qabiyyicha akka nu harkaan gahu kan jedhudha.

✅Manni Murtii Sadarkaa Duraatiin Dhimmicha ilaaleefi Manni Murtii Oliyyannoo himannaan duraa himannaa jeequmsaa, himannaa haarayaan ammaa immoo himannaa mirga abbaa qabiyyummaa waan ta'eef himannaa haarayaan bu'uura sdfs kwt 5tiin kufaa ta'uu hin qabu jedhaniiru.

✅Haa ta'u malee falmichi dhaddacha Ijibbaataa gahee, Dhaddachi Ijibbaataa MMWF kun immoo murtii dhaddacha gaafa 03/02/2018 (Ji'uma kana keessa) Lakk.Ga.263422 irratti kenneen (kan hin maxxanfamne): Mata dureen himannaa duraaniifi ammaa garaagar ta'ullee, qabiyyeen himannaawwan lamaaniifi ijoon dubbii wal fakkaataa waan ta'eef himannaan ammaa bu'uura sdfs kwt 5tiin dhimma dursee murtii argatee turedha (Resjudicata) jedhamee cufamuutu irra ture jechuun gudunfeera.

👉Kunis kan agarsiisu seerummaan gaafatame garaagar ta'ullee firiiwwan dubbii amma falmii keessatti ka'aniifi kan duraanii tokko taanaan 'Resjudicata' jedhamuu kan danda'u ta'uudha.

❓Mee Isin Murtii kana akkamitti ilaaltu? Resjudicata jedhamuuf dhimma duraanii keessatti dhimmi mirga abbaa qabiyyummaa ifatti ijoo dubbii ta'ee qabamee murtii argachuu hin qabuu? Gareewwan falmiihoo? (Waajjirriifi qaamni (dhaabbanni))

      Join:-@desberofMM

            Desalegn B.

Ragaan Dhaaltummaa Kennamuun, Namni Biroon Bifa Birootiin 'Namoonni Ragaa Dhaaltummaa Fudhatan Kun Ijoollee Du'aa Irraa Dhugumatti Dhalatan Miti' Jechuun Namoota Ragaa Fudhatan Kana Irratti Falmii Akka Hin Kaasne Ni Taasisaa (Dhorkaa)?

Dhaddachi Ijibbaataa MMWF hiikkoo seeraa dirqisiisaa dhaddacha gaafa 29/03/2015 ooleen Lakk.Ga.228124 ta'e (kan hin maxxanfamne) irratti kenneen:

"Akka qorannettis, gaaffii murtiin keessa deebiin akka ilaalamuuf iyyattoonni bu'uura sdfs kwt 6tiin dhiyeessan kan bu'uureffate, ragaa dhaaltummaa waamamtoonni ijoollee Awugichoo Abbabaa osoo hin ta'in mucaa isaati jechuudhaan mana murtii irraa fudhatan irratti ijoollee du'aa ta'uu dhabuun isaanii galmee mana murtii birootiin mirkanaa'eera waan ta'eef bu'uura kwt 6tiin nuuf haa ilaalamu jechuun dhiyeessanidha. Akkuma beekamu, ragaan dhaaltummaa ragaa namni tokko dhaaltuu du'aa ta'uu isaa mirkaneessuun mana murtiitiin kennamu ta'ullee, manni murtii ragicha kan kennu namni ragaan sun kennameef dhugumatti dhaaltuu ta'uufi dhabuu isaa ilaalchisee falmii gareewwan falmii dhiyeessan irratti hundaa'ee, ijoo dubbii qabateefi qorate akka hin taane ni beekama. Ragaan dhaaltummaa namni tokko dhaaltuu du'aa ta'uu isaa mirkaneessuuf malee akkaataa sdfs kwt 3tti akka murtiitti kan hin lakkaawamneefi dhaaltummaadhaan walqabatee falmii mana murtiitti taasifamuun ragaa faallaa dhiyaatuun fashalaa'uu kan danda'udha. Dhaddachi Ijibbaataa MMWFs galmee lakk.18576fi galmeewwan biroo irratti hiikkoo seeraa kenneera.

Gama birootiin, gaaffiin bu'uura sdfs kwt 6tiin murtiin keessa deebiin naaf haa ilaalamu jedhu kan dhiyaatu murtii dursee kenname jijjiirsisuuf yemmuu ta'u, caaseffamni tumaa seerichaas falmii bittaafi mirgan dhiyaate irratti hundaa'uun ijoon dubbii qabamee, falmiin taasifamee, ijoo dubbii murtiin irratti kenname jiraachuu kan hubannoo keessa galche ta'uu isaa qabiyyee tumaa seerichaa irraa hubachuun ni danda'ama. Gaaffiin akkasii fudhatama argachuuf ulaagaa seerichaan taa'e guutuu qaba....jedhee....ulaagawwan kwt 6 jalatti tarreeffaman erga tarreessee booda.....dhimma amma harkaa qabnu keessatti, waamamtoonni dhaaltuu du'aa ta'uu isaaniitiif ragaan kan kennameef ta'ullee dhugumatti du'aa irraa dhalachuu ykn dhalachuu dhabuu isaanii ilaalchisee falmiin gaggeeffamee, ijoon dubbii qabamee, qoratamee murtiin dhumaa kan irratti hin kennamne waan ta'eef, iyyattoonni haala biraadhaan falmii isaanii dhiyeeffatanii carraan mirga isaanii kabachiifachuu ni qabu. Kanaaf iyyannoo iyyattoonni bu'uura sdfs kwt 6tiin dhiyeessan qabiyyeefi kaayyoo tumaa seerichaa waliin hin deemu jechuun kufaa taasiseera.

            Desalegn B

Himatamaan Akka Beeku Osoo Hin Taasifamin (Ex-Parte) Ajajni Dhorka Yeroo (Temporary Injunction) Kennamuu Ni Danda'aa? Haala Kamiin?

=====°°°°°=======°°°°°°°°====

Beeksisa Garee Walfalmitootaa Isa Tokkoof Kennamu
 
Ajaja dhorkaa osoo hin kennin turuun miidhaa kan qaqqabsiisu fakkaatee yoo isatti mul’ate malee, Manni Murtii ajajicha osoo hin kennin dura garagalcha iyyannoo dhimma kanaaf dhiyaate garee faallaa iyyannichi akka qaqqabsiifamu ni taasisa.
  (Sdfs kwt 157)

ላንደኛው ተከራካሪው ወገን ስለሚሰጥ ማስታወቂያ

የማገጃው ትእዛዝ ሳይሰጥ መዘገየቱ ጉዳትን የሚያስከትል መስሎ ካልታየው በቀር ፍርድ ቤቱ ትእዛዙን ከመስጠቱ በፊት ስለዚሁ ጉዳይ  የቀረበው ማመልከቻ ግልባጭ ለአመልካቹ ባላጋራ እንዲደርሰው ያደርጋል ።
  (የፍ/ብ/ሥ/ሥ/ሕግ አንቀጽ 157)

Tumaan kun kan agarsiisu:
👉Akka qajeeltootti, osoo himatamaa hin beeksisinifi yaada gama isaatiin jiru hin dhagahin dhorka kennuun sirrii akka hin taane;
👉Haala addaatiin garuu dhimmichi kan yeroo hin kennisiisnefi beeksisuun kaayyoo dhorkichi kennamuuf kan gatii dhabsiisu yoo ta'e, manni murtii battalatti yaada himatamaa osoo hin dhagahin (ex-parte) ajaja dhorka yeroo kennuu danda'a. Haalli kun yoo jiraate manni murtii 'Emergency Procedure' hordofa jechuudha.

🧐Kanaan walqabatee seerichi gaalee "...turuun miidhaa kan qaqqabsiisu fakkaatee yoo isatti mul’ate malee.." jedhuuf ibsa kenne hin qabu. Kanaaf, tursiisuun yoom miidhaa dhaqqabsiisa? (Qabeenyichi akka badu taasisuu) Yoom immoo hin dhaqqabsiisu? kan jedhus dhimma sochii himatamaan taasisaa jiru ilaalchisee firiiwwan dubbii himataan dhiyeessu irraa ka'amee mana murtiitiin madaalamuu qabudha. Ajajni akkasii mirga qabeenyaa himatamaa waan daangessuuf, haalli addaa olitti ibsame jiraachuun yoo mirkanaa'een ala, yaada himatamaas dhagahuun barbaachisaadha.

👁️ Fakkeenyaaf, himatamaan qabeenya (addaa) falmiif sababa ta'e battalatti gurguruuf qophaa'eera yoo ta'e; ykn qabeenya manaa falmiif sababa ta'e battalatti diiguuf karoorfateera yoo ta'e, ajajni dhorka yeroo osoo himatamaan hin beeksifamin kennamuu danda'a.

✅Muuxannoowwan biyyoota biroo akka agarsiisanitti, sababa kennamuu dhabuu dhorkaatiin miidhaan himataarra gahu sababa kennamuu dhorkaatiin danqaa himatamaarra gahu kan caalu yoo ta'e, dhorki yeroo ni kennama. (Furmaatni kwt kanaan taa'e furmaata addaa (Extraordinary remedy) waan ta'eef, gocha himatamaan raawwate ykn raawwachuuf jedhamee iyyannoo keessatti ibsame of eeggannoofi madaallii cimaadhaan kan ilaalamuu qabudha)

✅Gaaleen seericha kwt 154 jalatti "ተከሣሹ ለሌላ ሰው አሳልፎ ለመስጠት ለመሸጥ ወይም በሌላ ዘንድ በተሰጠ ውሳኔ ንብረቱን ያለገባብ አዛውሮ ለመስጠት ወይም ለመሸጥ ያቀደ መሆኑ የታወቀ እንደሆነ" jedhus dhorki yeroo kennamuuf karoorri himatamaa jecha kakuu ykn ragaa biroodhaan hubachiifamuu kan qabu ta'uu agarsiisa.

✅Ajajni bu'uura sdfs kwt 154tiin kennamu (kan nama ilaallatu) ajaja bu'uura kwt 151tiin (Attachment before judgement) kennamu (kan qabeenya ilaallaatu) irraa adda ta'uun isaas beekamuu qaba. (Qabatamaatti walitti makanii ilaaluun ni mul'ata)

      Join:-@desberofMM

              Desalegn B.

Dhaddachi Ijibbaataa Mana Murtii Waliigalaa Federaalaa Jildii 23ffaa Lakkoofsa Galmee 153228 ta'e irratti "ragaan tokko yeroo poolisiin qorannoo dhimma yakkaa irratti gaggeessu jechi ragaan sun sadarkaa qorannootti kenne,akka adeemsa hojii abbaa seerummaa(judicial) yookiin hojii abbaa seerummaa fakkaatu qabu(quasi-judicial) biratti dhugaa dubbachuuf kakuu raawwatee jecha ragummaa inni Galmee qorannoo poolisii irratti kenne,sababa qaama abbaa seerummaa(Mana Murtii) yookiin qaama abbaa seerummaa fakkaatu qabu dhihaatee jecha isaa jijjiireef,jechi sobaa kam akka ta'e sirriitti ragaa biraatiin osoo hin mirkanaa'in(hin qulqullaa'in) jechi ragaa gara gara ta'eef qofa ragaa gochuun ragaan sun jecha ragaa sobaa kennuutiin yakkaan isa gaafachiisu bu'uurri seeraa kan hin jirre ta'uu" hiikoo dirqisiisaa kennee ture.