မင်းဘူးမြို့နယ် မုန်တောင်ရဲစခန်းကို တိုက်ခိုက်မှု ရဲနှင့် စစ် သားများအား လုံး ထွက်ပြေးသွား၍ ရဲစခန်းကို သိမ်းပိုက်နိုင်ခဲ့ပြီး မီးရှို့ရှင်းလင်း

ဇန်နဝါရီလ ၃၀ ရက်

မကွေးတိုင်း၊ မင်းဘူးမြို့နယ် မုန်တောင်ရဲစခန်းကို ဝင်ရောက် တိုက်ခိုက်ချိန် ရဲနှင့် စစ်သား အားလုံး ထွက်ပြေးသွား၍ ရဲစခန်းကို သိမ်းပိုက်နိုင်ခဲ့ပြီး ရဲစခန်းကို မီးရှို့ရှင်းလင်းခဲ့ကြောင်း မင်းဘူးခရိုင် အမှတ်-၆တပ်ရင်း မှ တာဝန် ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။

ဇန်နဝါရီလ ၁၆ ရက်နေ့ မင်းဘူးမြို့နယ် အနောက်ပိုင်းရှိ မုန်တောင်ရဲစခန်းကို မကွေးတိုင်း စစ်ဌာနလက်အောက်ရှိ မင်းဘူးခရိုင် စစ်ဌာန ကွပ်ကဲမှုဖြင့် မင်းဘူးခရိုင် အမှတ် ၆ တပ်ရင်းမှ ရဲဘော်များက ဝင်ရောက် တိုက်ခိုက်ခဲ့ကြောင်း၊ ထိုသို့ စတင်တိုက်ခိုက်ချိန်ကပင် ရဲနှင့် စစ်သား အားလုံးထွက်ပြေး သွား၍ ရဲစခန်းကို ၁၅ မိနစ်အတွင်း သိမ်းယူနိုင်ခဲ့ကြောင်း၊ စခန်းအတွင်း ရှိ ရဲအသုံးအဆောင်ပစ္စည်းများ ပြည်သူလူထုထံမှ လုယက်ယူထားသည့် ပစ္စည်းတချို့သိမ်းဆည်းရမိခဲ့ပါကြောင်းသိရှိရသည်။

အဆိုပါမုန်တောင်ရဲစခန်းမှာ ပြည်သူများကို နည်းလမ်းမျိုးစုံသုံးကာ ငွေညှစ်ခြင်း၊ ဖမ်းဆီးခြင်း၊ လူငယ်များကို ပေါ်တာဆွဲခြင်းများ ပြုလုပ်နေခြင်းကြောင့် ဝင်ရောက် တိုက်ခိုက် သိမ်းပိုက်ရခြင်း ဖြစ်ကြောင်း မင်းဘူးခရိုင် အမှတ်-၆တပ်ရင်း မှ တာဝန်ရှိသူက ရှင်းပြသည်။

"ကျနော်တို့ သေနတ်စပစ်ကတည်းက ထွက်ပြေးကြတာ ရဲက ၂ ယောက်ဒဏ်ရာရတယ်။ အဲဒီမှာ စစ်ခွေး အင်အား ၁၂ ယောက်ရှိတယ်။ လက်နက်တွေ သိမ်း ဆည်းရမိတာမရှိဘူး။ အဲဒီကောင်က တန်းပြီးထွက်ပြေးကြတာ ပြည်သူတွေကို စစ်တပ်တွေ အနားမနေကြဖို့ဘဲ တိုက်တွန်းချင်ပါတယ်"ဟု မင်းဘူးခရိုင် အမှတ်-၆တပ်ရင်း မှ တာဝန်ရှိသူကပြောဆိုသည်။

အဆိုပါတိုက်ခိုက်မှုကို  မင်းဘူးခရိုင်၊အမှတ် ၆ တပ်ရင်းက လုပ်ဆောင်ခဲ့ခြင်းဖြစ်ပြီး တပ်ရင်းအနေဖြင့် လုပ်ငန်းရှင်များအပါ အဝင် မည့်သူတစ်ဦးတစ်ယောက်ထံမှ အလှူခံခြင်း၊ ခြိမ်းခြောက်ငွေတောင်းခံခြင်းလည်း မရှိကြောင်း၊ မင်းဘူးမြို့နယ်အတွင်းရှိ ပြည်သူများအနေဖြင့် စစ်ကော်မရှင်တပ်သားများ၊ ရဲများနှင့် စစ်စခန်းများအနီးတွင် မနေထိုင်ကြရန် မင်းဘူးခရိုင် အမှတ် ၆ တပ် ရင်းက အသိပေး နှိုးဆော်ထားသည်။

#KTM
#7starmyaing

မြိုင်မြို့နယ်၊ ရွာသစ်ကြီးရွာကို စစ်တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲ တိုက်ခိုက်မှု အမျိုးသမီး ၃ ဦး ထိခိုက်ဒဏ်ရာရပြီး ၁ ဦး စိုးရိမ်ရ

ဖေဖော်ဝါရီလ ၆ ရက်

မကွေးတိုင်း၊ မြိုင်မြို့နယ်၊ ရွာသစ်ကြီးရွာကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲ တိုက်ခိုက်ခြင်းကြောင့် အမျိုးသမီး ၃ ဦး ထိခိုက်ဒဏ်ရာရပြီး ၁ ဦး စိုးရိမ်ရကြောင်း မြိုင်မြို့နယ် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ ဖေဖော်ဝါရီလ ၆ ရက်နေ့ ညနေပိုင်းတွင် အကြမ်းဖက် စစ်တပ်က မြိုင်မြို့နယ်၊ ရွာသစ်ကြီးရွာကို တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကျဲ တိုက်ခိုက်ခဲ့ကြောင်း၊ ထို လေကြောင်းတိုက်ခိုက်မှုအတွင်း ကျေးရွာနေ ပြည်သူ အမျိုးသမီး ၃ ဦး ထိခိုက်ဒဏ်ရာရရှိကာ ၁ ဦးမှာ စိုးရိမ်ရပြီး နေအိမ်များလည်း ပျက်စီးခဲ့ကြောင်း၊ လက်ရှိချိန်တွင် ထိခိုက်ဒဏ်ရာရရှိသူများကို မြိုင်မြို့နယ် ပကဖ က ဆေးကုသမှု ပေးနေကြောင်း သိရသည်။

"ဘာတိုက်ပွဲမှ မရှိဘဲနဲ့ စစ်ခွေးတွေက လေယာဉ်နဲ့ ဗုံးကျဲ တိုက်ခိုက်သွားတာ အမျိုးသမီး ၃ ဦး ထိခိုက်ဒဏ်ရာရတယ်။ ၁ ဦးကတော့ စိုးရိမ်ရတယ်။ နေအိမ်တွေလည်း ပျက်စီးသွားတယ်" ဟု မြိုင်မြို့နယ် ပကဖ မှ တာဝန်ရှိသူ တစ်ဦးက ပြောဆိုသည်။

အလားတူ ဖေဖော်ဝါရီလ ၄ ရက်နေ့ကလည်း မြိုင်မြို့နယ် မြောက်ဆည်ရွာအနီးကို အကြမ်းဖက် စစ်တပ်က ဂျက်ဖိုက်တာ ၁ စီးဖြင့် လေကြောင်း တိုက်ခိုက်မှု ၄ ကြိမ် ပြုလုပ်ခဲ့ပြီး ပြည်သူ ၁ ဦး ထိခိုက်ဒဏ်ရာရရှိခဲ့ကြောင်း သိရသည်။

#KTM
#7starmyaing

ပေါက်မြို့နယ်တွင် စစ်ကြောင်းကို ကြားဖြတ် တိုက်ခိုက်မှု စစ်တပ်ဘက်မှ ၂၃ ဦးသေဆုံးပြီးနောက်  လေကြောင်းတိုက်ခိုက်မှုများ ဆက်တိုက်လုပ်

ဖေဖော်ဝါရီလ ၁၀ ရက်

မကွေးတိုင်း၊ ပေါက်မြို့နယ်တွင် စစ်ကြောင်းကို ကြားဖြတ် တိုက်ခိုက်ခဲ့ရာ စစ်သားနှင့် ပျူစောထီး ၂၃ ဦးသေဆုံးပြီး  စစ်ကြောင်းတစ်ခုလုံး အထိနာ၍ လေယာဉ်ဖြင့် ဆက်တိုက် ဗုံးကျဲနေကြောင်း မြိုင်မြို့နယ် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

ဖေဖော်ဝါရီလ ၄ ရက်နေ့ နံနက် ၇ နာရီမှစ၍ ညနေ ၅ နာရီ အချိန်အထိ ပေါက်မြို့နယ်တောင်ပိုင်း၊ သီး ချောက်ကျေးရွာအနီးတွင် တိုက်ပွဲ ၂ ကြိမ်ဖြစ်ပွားပြီး စစ်သား ၅ ဦးသေဆုံးကာ ၂၀ ဦးခန့် ထိခိုက် ဒဏ် ရာရရှိခဲ့ကြောင်း၊ ထိုသို့ တိုက်ခိုက်ခံရပြီး အထိနာသွားသော စစ်ကြောင်းက ယင်းနေ့  ညနေ ၅ နာရီ ၃၀ မိနစ်ခန့်တွင် ပျူစောထီး ကျေးရွာများအတွင်းသို့ ပြန်လည်ဝင်ရောက်သွားကြောင်း သိရသည်။

ဖေဖော်ဝါရီလ ၄ ရက်နေ့ တိုက်ပွဲအတွင်း အကြမ်းဖက်စစ်တပ်၏ ကပစ ၂၄ မှ လက်နက်ကြီးများဖြင့် ၆ ကြိမ် ပစ်ခတ်တိုက်ခိုက်ခဲ့ပြီး  လေကြောင်းဖြင့် ၂ ကြိမ် ဗုံးကျဲတိုက်ခိုက်ခဲ့သဖြင့် ပေါက် မြို့နယ်ပကဖမှ ရဲဘော်တစ်ဦး မစိုးရိမ်ရ ဒဏ်ရာရရှိခဲ့ကြောင်း သိရသည်။

အလားတူ ဖေဖော်ဝါရီလ ၆ ရက်နေ့ မွန်းလွဲ ၂ နာရီခန့်အချိန် စစ်တပ်က  တိုက်ပွဲအတွင်း ထိခိုက်ဒဏ်ရာရရှိခဲ့သော စစ်သားများနှင့် ပျူစောထီးများကို ခေါ် ဆောင်ကာ အင်အား ၁၇၀ ခန့်ဖြင့် ကပစ ၂၄ သို့ ထွက်လာစဉ် ဆင်ဇာကျေးရွာတောတိုက်အကျော် ပေါက်ချောင်းအောက်စု ကျေးရွာဘက်အရောက် တော်လှန်ရေး တပ်ဖွဲ့များက ထပ်မံတိုက်ခိုက်ခဲ့ကြောင်း၊ အပြန်အလှန် ပစ်ခတ် တိုက်ပွဲ ၃ နာရီခန့်ဖြစ်ခဲ့ပြီး စစ်သား ၁၈ ဦး သေဆုံးခဲ့ကြောင်း သိရသည်။

ထို့နောက် အကြမ်းဖက် စစ်တပ် စစ်ကြောင်းက ဖေဖော်ဝါရီလ ၆ ရက်နေ့ ည ၉ နာရီအချိန် ပေါက်မြို့နယ် ကပစ ၂၄ အတွင်း ဝင်ရောက်သွားပြီး လူနာများကို ပေါက်မြို့နယ်ပြည်သူ့ဆေးရုံသို့ ပို့ဆောင်ခဲ့ကြောင်း၊  စစ်သားများ တက်ရောက်နေသည့် ပြည်သူ့ဆေးရုံကို စစ်တပ်က ပိတ်ဆို့ထားပြီး ပြည်သူများကို ဝင်ခွင့်မပေးကြောင်း သိရှိရသည်။

"တိုက်ပွဲမှာ စစ်ခွေးတွေ တော်တော်အထိနာလို့ အခုချိန်ထိ ကျေးရွာတွေထဲကို လေယာဉ်နဲ့ ဆက်တိုက်ကို ဗုံးကျဲနေတယ်။ ဒီနေ့ နံနက်ပိုင်းကလည်း ဂျက်ဖိုက်တာ ၂ စီးနဲ့ ကျဲသွားတယ်။ အခုလည်း လေယာဉ်တွေ ဝဲနေတုန်းပဲ စစ်ခွေးစစ်ကြောင်းမှာ ထိခိုက်ဒဏ်ရာရတဲ့ စစ်ခွေးတွေ ပေါက်မြို့နယ်ပြည်သူ့ဆေးရုံမှာ ကုသနေတယ်လို့ သိရတယ်။ မြေပြင်မှာ တိုက်ပွဲမရှိဘူး။ သူတို့ အထိနာလို့ ရွာတွေကို ဗုံးလိုက်ကျဲနေတာ" ဟု မြိုင်မြို့နယ် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

အဆိုပါ တိုက်ခိုက်မှုများကို ပြည်သူ့ကာကွယ်ရေးအဖွဲ့ ပေါက် - ပကဖ နှင့် မြိုင် ပကဖ တို့ ပူးပေါင်း တိုက် ခိုက်ခဲ့ခြင်းဖြစ်ကြောင်း ၊ယင်းစစ်တပ်စစ်ကြောင်းသည် တပ်မ ၉၉ ပေါက်မြို့နယ်တောင်ပိုင်းရှိ ကျေး ရွာများမှ ပျူစောထီးများ ပူးပေါင်းကာ စစ်ကြောင်းထိုးလာခြင်းဖြစ်ကြောင်း သိရသည်။

ဓာတ်ပုံ-မြိုင်ပကဖ၏ တိုက်ခိုက်မှုကြောင့် သေဆုံးခဲ့သော စစ်သားတချို့။ (ပုံအဟောင်းကို အသုံးပြုထားပါသည်။)
#KTM
#7starmyaing

ပေါက်တွင် စစ်တပ်က ကျေးရွာများကို စစ်ကြောင်းထိုးပြီး ရိက္ခာများ လိုက်လံ ခိုးယူနေ၍ ထောင်နှင့်ချီသော ပြည်သူများ တိမ်းရှောင်နေရ၊

▪️ ချက်ကန်ရွာကို စစ်တပ်က ဗုံးကျဲတိုက်ခိုက်မှု လူငယ်များ အပါအဝင် ပြည်သူ ၅ ဦးသေဆုံး

ဖေဖော်ဝါရီလ ၁၁ ရက်

မကွေးတိုင်း၊ ပေါက်မြို့နယ်တွင် အကြမ်းဖက် စစ်တပ်က ကျေးရွာများကို စစ်ကြောင်းထိုးပြီး ရိက္ခာများ လိုက်လံ ခိုးယူနေ၍ ထောင်နှင့်ချီသော ပြည်သူများ တိမ်းရှောင်နေရကြောင်း ပေါက်မြို့နယ် လူသားစာနာဌာန ထုတ်ပြန်ချက်နှင့် ဒေသပြည်သူများက ပြောဆိုသည်။

ဖေဖော်ဝါရီလ ၄ ရက်နေ့တွင် ပေါက်မြို့နယ် ကပစ ၂၄ စက်ရုံမှ ထွက်လာသော အင်အား ၂၀၀ ခန့်ပါ အကြမ်းဖက် စစ်တပ် စစ်ကြောင်းသည် သစ်ချိုကုန်းပျူစောထီးရွာကို ရောက်ရှိလာပြီး သစ်ချိုကုန်းပျူစောထီးရွာမှတဆင့် အနီးအနားရှိ ကျေးရွာများကို စစ်ကြောင်းထိုးလာသည့်အတွက် ပြည်သူများ ထွက်ပြေးတိမ်းရှောင်နေရခြင်းဖြစ်ကြောင်း သိရသည်။

ထို စစ်တပ် စစ်ကြောင်းသည် ကျေးရွာများကို ဝင်ရောက် စီးနင်းပြီး ပြည်သူပိုင် စားနပ်ရိက္ခာများကို လိုက်လံ ခိုးယူနေ၍ ပေါက်မြို့နယ် ဇုန်-၁ နှင့် ဇုန် - ၃ နယ်မြေတို့ရှိ ကျေးရွာ ၁၁ ခုမှ ပြည်သူ ၅၀၀၀ ခန့်သည် နီးစပ်ရာကျေးရွာများနှင့် တောတောင်များအတွင်း စစ်ဘေးတိမ်းရှောင်နေရခြင်းဖြစ်ကြောင်း သိရှိရသည်။

"ပြည်သူတွေကတော့ အခုထိ စစ်ရှောင်နေရတုန်းပဲ စစ်ခွေးတွေက ရွာတိုင်းကို ဝင်ရောက်စီးနင်းပြီး စားနပ် ရိက္ခာပစ္စည်းတွေကို လိုက်လံ ခိုးယူနေတာ စားနပ်ရိက္ခာတွေလည်း အရေးပေါ် လိုအပ်နေတယ်" ဟု စစ်ဘေးရှောင် ပြည်သူတစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

ထိုစစ်တပ် စစ်ကြောင်းကို တော်လှန်ရေးတပ်ဖွဲ့များက ဖေဖော်ဝါရီလ ၄ ရက်နေ့နှင့် ၆ ရက်နေ့တို့တွင် ကြားဖြတ် တိုက်ခိုက်ခဲ့ရာ စစ်သား ၂၃ ဦးသေဆုံးခဲ့ကြောင်း၊ သို့သော် ကျေးရွာနေပြည်သူများသည် စစ်ကြောင်း ထပ်မံ ဝင်ရောက်လာမည်ကို စိုးရိမ်သောကြောင့် လက်ရှိချိန်ထိ တိမ်းရှောင်နေရဆဲဖြစ်ကြောင်း သိရသည်။

ထို့ပြင် မကွေးတိုင်း၊ ပေါက်မြို့နယ်၊ ချက်ကန်ရွာကို အကြမ်းဖက် စစ်တပ်က လေယာဉ်ဖြင့် ဗုံးကျဲ တိုက်ခိုက်ခြင်းကြောင့် အသက် ၁၆ နှစ်နှင့် ၁၉ နှစ်အရွယ် လူငယ် ၃ ဦး အပါအဝင် ၅ ဦးသေဆုံးခဲ့ကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။

ဖေဖော်ဝါရီလ ၁၀ ရက်နေ့ နံနက် ၁၀ နာရီ ၄၈ မိနစ်ခန့်တွင် မကွေး လေတပ်မှ တက်လာသော အကြမ်းဖက် စစ်တပ်၏ ဂျက်ဖိုက်တာ ၃ စီးသည် ပေါက်မြို့နယ် ချက်ကန်ရွာကို လေကြောင်း တိုက်ခိုက်မှု ပြုလုပ်ခဲ့ကြောင်း၊ ထို တိုက်ခိုက်မှုအတွင်း ပြည်သူ ၅ ဦးသေဆုံးပြီး ထိခိုက်ဒဏ်ရာရရှိသူ ၄ ဦးရှိကြောင်း သိရသည်။

ထိုလေကြောင်း တိုက်ခိုက်မှုအတွင်း အသက် ၄၇ နှစ်အရွယ် ဒေါ်ရွှေဝင်း၊ အသက် ၅၄ နှစ်အရွယ် မချိုကြီး၊ အသက် ၁၉ နှစ်အရွယ် ကိုမိုးကျော်၊ အသက် ၁၉ နှစ်အရွယ် တင်မိုးခိုင်နှင့် အသက် ၁၆ နှစ်အရွယ် တင်မိုးလှိုင် တို့သေဆုံးခဲ့ကြောင်း၊ ထို့ပြင် အသက် ၃၇ နှစ်အရွယ် မမာခင်၊ အသက် ၇၂ နှစ်အရွယ် ဒေါ်အုန်းငွေ၊ အသက် ၆၅ နှစ်အရွယ် ဒေါ်သန်းခင်နှင့် အမည်မသိ အမျိုးသား ၁ ဦး ထိခိုက်ဒဏ်ရာရရှိခဲ့ပြီး နေအိမ် ၃ ပျက်စီးခဲ့ကြောင်း သိရှိရသည်။

"မနေ့က စစ်ခွေးတွေ လာရောက်ဗုံးကျဲတဲ့ အချိန်မှာ ပျောက်ဆုံးနေသူတွေလည်းရှိတော့ ရှင်းလင်းရေးလည်း မလုပ်နိုင်လို့ ပြည်သူ ၁၀ ဦး သေဆုံးတယ်လို့ သတင်းထွက်လာတာဖို့ ရှင်းလင်းရေး ပြန်လုပ်နိုင်ချိန်မှာတော့ သေဆုံးသူ ၅ ဦးပဲရှိတယ်။ အမျိုးသမီး ၄ ဦးနဲ့ အမျိုးသား ၁ ဦးသေဆုံးတယ်။ ထိခိုက်ဒဏ်ရာရတာကလည်း ၄ ဦးရှိတယ်။

#KTM
#7starmyaing

ရေစကြိုနှင့် ဒီပဲယင်းမြို့နယ်တို့တွင် စစ်တပ်က တိုက်ပွဲဖြစ်ပွားခြင်းမရှိဘဲ  လေကြောင်းတိုက်ခိုက်မှု  ပြည်သူ ၃ ဦးသေဆုံးပြီး နေအိမ်အများအပြား မီးလောင်ပျက်စီး

ဖေဖော်ဝါရီလ ၁၃ ရက်

မကွေးတိုင်း၊ ရေစကြိုမြို့နယ် ချင်းယားကုန်း ကျေးရွာများကို အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ရာ ပြည်သူ ၂ ဦးသေဆုံးခဲ့ကာ ပြည်သူ ၂ ဦး ထိခိုက်ဒဏ်ရာရရှိခဲ့ကြောင်း ဒေသပြည်သူများက  ရန်ကုန်ခေတ်သစ်သတင်းဌာနထံသို့ပြောဆိုသည်။

ယမန်နေ့ ဖေဖော်ဝါရီလ ၁၂ ရက်နေ့ ညနေ ၅နာရီ ၅၃မိနစ်ခန့်အချိန် ပခုက္ကူ တပ်မ ၁၀၁ မှ တက်လာသော စက်တပ်လေထီးဖြင့် ရေစကြိုမြို့နယ် ချင်းယားကုန်းကျေးရွာသို့  တိုက်ပွဲဖြစ်ပွားခြင်းမရှိဘဲ လေ ကြောင်းတိုက်ခိုက်ခဲ့ကြောင်း၊ အဆိုပါလေကြောင်းတိုက်ခိုက်မှုကြောင့် ပြည်သူ ၂ ဦးသေဆုံးကာ အခြားပြည်သူ ၂  ဦး ထိခိုက်ဒဏ်ရာရရှိခဲ့ကြောင်းသိရှိရသည်။

"စစ်ခွေးတွေ တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့တာပါ။ သေဆုံးတာကတော့ ပြည်သူ ၂ ဦးသေဆုံးတယ်။ သေဆုံးတဲ့ ပြည်သူ ၂ ဦးနဲ့ ထိခိုက်ဒဏ်ရာရတဲ့ ပြည်သူ ၂ ဦးကတော့ ချင်းယားကုန်း ကျေးရွာကလို့သိရတယ်။ စစ်ခွေးတွေက ဗုံး ၂လုံး ကျဲသွားတာပါ။ "ဟု ဒေသပြည်သူတစ်ဦးကပြောဆိုသည်။

အလားတူ ဖေဖော်ဝါရီလ ၁၁ ရက်နေ့ ည ၉ နာရီ ၂၀ မိနစ်အချိန် စစ်ကိုင်းတိုင်း၊ ဒီပဲယင်းမြို့နယ်၊ ဘုတ္တန်းကျေးရွာသို့ စစ်တပ်က လေကြောင်းတိုက်ခိုက်ခဲ့ရာ  ပြည်သူ ၁ ဦးသေဆုံးခဲ့ကြောင်း ဒီပဲယင်းမြို့နယ်၊ ပြည်သူ့အုပ်ချုပ်ရေးအဖွဲ့ထံမှ သိရှိရသည်။

စစ်တပ်က တိုက်လေယာဉ် ၂ စီးဖြင့် ဒီပဲယင်းမြို့နယ် ဘုတ္ထန်းကျေးရွာအတွင်းသို့ အကြောင်းမဲ့လေကြောင်းတိုက်ခိုက်သဖြင့် ဘုတ္ထန်းကျေးရွာမှ အသက် ၃၇ နှစ်အရွယ်အမျိုးသား ၁ ဦး သေဆုံးခဲ့ကြောင်း၊ လေကြောင်းတိုက်ခိုက်မှုအတွင်း နေအိမ် ၃ လုံး မီးလောင်ပျက်စီးခဲ့ရပြီး နေအိမ် ၁၀ လုံးမှာလည်းဗုံးဒဏ်ကြောင့်  ပျက်စီးသွားကြောင်း၊ အခြား  နေအိမ် ၁၆ လုံးခန့်မှလည်း ဗုံးစများထိမှန်ထိခိုက်ပျက်စီးခဲ့ရကြောင်း သိရှိရသည။

#KTM
#7starmyaing

“PDF တံဆိပ် အတုတွေနဲ့ ပေါ်ပေါ်ထင်ထင် အိုးနင်းခွက်နင်း ဝါဒဖြန်နေ့ရတဲ့ စစ်တပ် အလိမ်အညာဖြန့်ချိရေး ယန္တရား”

By မင်းခေါင်-MK

စစ်ကောင်စီရဲ့ ဝါဒဖြန့်ချိရေးယန္တရားဟာ ဒီဘက်ခေတ်မှာတော့ ဟာသတစ်ခုလို ဖြစ်လာခဲ့ပါပြီ။ အထူးသဖြင့် PDF တွေ "အလင်းဝင်" တယ်ဆိုတဲ့ လုပ်ဇာတ်ကို ကပြရာမှာ အခြေခံအကျဆုံးဖြစ်တဲ့ တပ်ဖွဲ့တံဆိပ် (Badge) တွေကိုတောင် တူအောင် မတုပနိုင်ဘဲ အရောင်လွဲ၊ စာလုံးလွဲတွေနဲ့ ထုတ်ပြနေတာဟာ သူတို့ရဲ့ ညံ့ဖျင်းမှုကို သက်သေပြနေတာပဲ ဖြစ်ပါတယ်။

တောထဲတောင်ထဲမှာ တကယ်တိုက်ပွဲဝင်နေတဲ့ PDF ရဲဘော်တွေရဲ့ ဝတ်စုံတွေဟာ ရာသီဥတုနဲ့ ပတ် ဝန်းကျင်ဒဏ်ကြောင့် အရောင်လွင့်တာ၊ နွမ်းဖတ်တာတွေ ရှိစမြဲပါ။ သူတို့ဖော်ပြလာတဲ့ပုံထဲက ခုမှဝယ်လာသလို အသစ်စက်စက် ဝတ်စုံတွေဟာ ဝါဒဖြန့်ဖို့အတွက် စီစဉ်ထားတဲ့ အထောက်အထားပဲ ဖြစ်ပါတယ်။

ဒီလောက် ဒေါ်လာသန်းပေါင်းများစွာ အကုန်ခံထားတဲ့ ဝါဒဖြန့်ယန္တရားက အခြေခံ တံဆိပ်လေးတောင် တူအောင် မလုပ်နိုင်တာဟာ သူတို့အောက်ခြေက လူတွေက သခင့်အပေါ် သစ္စာမရှိတာလား၊ ဒါမှမဟုတ် တကယ်ပဲ ဉာဏ်ရည်နိမ့်ပါးနေတာလား" ဘာပဲဖြစ်ဖြစ် တံဆိပ်အတုနဲ့ တံဆိပ်အစစ် ကွဲပြားခြားနားအောင်လုပ်ပေးတာအတွက်တော့ ကျေးဇူးတောင်တင်ရမဲ့ သဘောပဲ။

ဘာဖြစ်လို့လဲဆိုတော့ သူတို့ရဲ့ ပေါ့လျော့မှုတွေကြောင့် ပြည်သူတွေဟာ ဘယ်ဟာက သတင်းအစစ်၊ ဘယ်ဟာက ဝါဒဖြန့်သတင်းတုဆိုတာကို ခွဲခြားဖို့ ပိုလွယ်ကူသွားစေလို့ပါပဲ။ PDF တပ်ရင်းတပ်ဖွဲ့အသီးသီးမှာ သတ်မှတ်ထားတဲ့ တံဆိပ်ပုံစံ၊ အရွယ်အစားနဲ့ လက်မောင်းမှာ တပ်ဆင်တဲ့ အနေအထားတွေ ရှိပါတယ်။ စစ်ကောင်စီ ဝါဒဖြန့်ပုံတွေမှာပါတဲ့ PDF တံဆိပ်တွေဟာ အရွယ်အစား မညီမညာဖြစ်နေတာ၊ စာလုံးပုံစံ (Font) မှားယွင်းနေတာနဲ့ တပ်ဆင်တဲ့နေရာ လွဲမှားနေတာတွေကို တွေ့နိုင်ပါတယ်။

ဒီလို အမှားအယွင်းတွေဟာ စစ်ကောင်စီအတွင်းပိုင်းမှာလည်း "မင်းတို့ ဝါဒဖြန့်တာက ငါတို့ကို ပိုသိက္ခာကျစေတယ်" ဆိုတဲ့ အပြန်အလှန် အပြစ်တင်မှုတွေနဲ့ ယုံကြည်မှု ပျက်ပြားစရာ အကြောင်းရင်းတစ်ခု ဖြစ်လာနေပါပြီ။

တကယ်တမ်း အလင်းဝင်လာသူတွေဆိုရင် သူတို့ရဲ့ နောက်ခံသမိုင်း၊ ဘယ်တပ်ရင်း၊ ဘယ်ဒေသကလဲဆိုတာ တိတိကျကျ မဖော်ပြနိုင်ဘဲ ဝေဝေဝါးဝါးသာ ပြောဆိုနေတာဖြစ်ပါတယ်။ ထို့အပြင် ပုံထဲကလူတွေရဲ့ ကိုယ်နေဟန်ထားနဲ့ လှုပ်ရှားမှု၊ ဆံပင်ပုံစံနဲ့ အနေအထားတွေဟာ စစ်သားအသစ်တွေ ဒါမှမဟုတ် ပိုက်ဆံပေးငှားထားတဲ့သူတွေ ဖြစ်နေတာကို သတိထားကြည့်ရင် သိနိုင်ပါတယ်။

PDF ဆိုတာ ပြည်သူ့ရင်ခွင်က ပေါက်ဖွားလာတဲ့ အဖွဲ့အစည်းဖြစ်ပြီး တကယ့်မြေပြင်က ရဲဘော်တွေရဲ့ စိတ်ဓာတ်နဲ့ ဂုဏ်သိက္ခာကို ဘယ်ကရှာထားမှန်မသိတဲ့ ဝတ်စုံအသစ်တွေ၊ တံဆိပ်အတုတွေနဲ့ အစားထိုးလို့ မရနိုင်ပါဘူး။

စစ်ကောင်စီရဲ့ ဝါဒဖြန့်အဖွဲ့က ဘယ်လောက်ပဲ ဇာတ်ညွှန်းတွေ ရေးပါစေ၊ မြေပြင်မှာ သူတို့ တကယ် တမ်း ရှုံးနိမ့်နေတယ်ဆိုတာကိုတော့ ဒီလို "တံဆိပ်အတု" လုပ်ဇာတ်တွေက ဖုံးကွယ်ပေးနိုင်မှာ မဟုတ်ပါဘူး။

ပြည်သူတွေအနေနဲ့ ဒီလိုသတင်းမှားတွေကို တွေ့ရင် Like, Share မလုပ်ဘဲ Report ထုဖို့ ဒါမှမဟုတ် သတင်းမှားမှန်း သိအောင် ပြန်ပြီး Comment ရေးဖို့ တိုက်တွန်းလိုက်ပါတယ်။

(မင်းခေါင်-MK သည် လက်ရှိနွေဦးတော်လှန်ရေးတွင် ရှေ့တန်းမှ ပါဝင်နေသော တော်လှန်ရေးရဲဘော်တစ်ဦးဖြစ်သည်။)
#KTM
#HlaingInfo

မြိုင်မြို့နယ်၊ ကံနက်ကျေးရွာကို စစ်တပ်က စစ်ကြောင်းထိုးဝင်ရောက်ပြီး ပြည်သူ ၄ ဦးကို ဖမ်းဆီးကာ ပြည်သူပိုင် ပစ္စည်းများကို မီးရှို့ဖျက်ဆီးသွား

မတ်လ ၂၉ ရက်

မကွေးတိုင်း၊ မြိုင်မြို့နယ်၊ ကံနက်ကျေးရွာကို စစ်တပ်က စစ်ကြောင်းထိုး ဝင်ရောက်ပြီး ပြည်သူ ၄ ဦးကို ဖမ်းဆီးကာ ပြည်သူပိုင် ပစ္စည်းများကို မီးရှို့ဖျက်ဆီးသွားကြောင်း မြိုင် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။

ယနေ့ မတ်လ ၂၉ ရက်နေ့တွင် မွန်းလွဲပိုင်းတွင် မြိုင်မြို့နယ်၊ ကန်နီပျူစောထီးရွာမှ ထွက်လာသော အကြမ်းဖက် စစ်တပ်နှင့် ပျူစောထီးများသည် ကံနက်ကျေးရွာကို ဝင်ရောက်စီးနင်းပြီး ပြည်သူပိုင် ပစ္စည်းများကို စိတ်ကြိုက် ခိုးယူခဲ့ကြောင်း သိရသည်။

ထို့နောက် စစ်ကြောင်းက ကျေးရွာအတွင်းရှိ ပြည်သူ ၄ ဦးကိုလည်း ဖမ်းဆီးခေါ်ဆောင်သွားကာ ၎င်းတို့ ယူဆောင်လိုခြင်းမရှိသော ပစ္စည်းများကို မီးရှို့ဖျက်ဆီးသွားကြောင်း၊ ထို့ပြင် ပြည်သူပိုင် နွားများ ဆန်၊ ဆီ၊ ဆားနှင့် စားနပ် ရိက္ခာများကို ယူဆောင်သွားကြောင်း သိရှိရသည်။

"ကန်နီပျူစောထီးတွေက သူတို့ ရိက္ခာလည်း နည်းနေတော့ ရွာတွေကို ပတ်နေတာ ပြည်သူပိုင် ပစ္စည်းတွေယူ မီးရှို့ပြီးတော့ ပြည်သူ ၄ ဦးကို ဖမ်းသွားတယ်။ ပြည်သူပိုင် ပစ္စည်းတွေကို မီးရှို့သွားတာ ပြီးတော့ နွားတွေ ဆန်၊ ဆီ၊ ဆား အကုန်လုံးကို ယူဆောင်သွားတယ်" ဟု မြိုင် ပကဖ မှ တာဝန်ရှိသူ တစ်ဦးက ပြောဆိုသည်။

ထို့ပြင် ယနေ့ မတ်လ ၂၉ ရက်နေ့ မွန်းလွဲပိုင်းကလည်း အကြမ်းဖက် စစ်တပ်က မြိုင်မြို့နယ်၊ မကျီးကန်ရွာကို တိုက်ပွဲဖြစ်ပွားခြင်းမရှိဘဲ ဂျက်ဖိုက်တာ ၁ စီးဖြင့် ဗုံးကျဲ တိုက်ခိုက်ခဲ့ကြောင်း၊ ထို ဗုံးကျဲ တိုက်ခိုက်မှုအတွင်း ပြည်သူများ ထိခိုက်မှုမရှိသော်လည်း နေအိမ်များ ပျက်စီးခဲ့ကြောင်း သိရှိရသည်။

#KTM

Mar 29 , 8:35PM
#7starmyaing
📬သတင်းပေးပို့ရန်
@myaing3starbot

ပခုက္ကူမြို့နယ်အတွင်း စစ်ကြောင်းထိုးလာသော စစ်တပ်ကို ဒရုန်းဖြင့် တိုက်ခိုက်မှု စစ်သား ၅ ဦး ထိခိုက်ဒဏ်ရာရပြီး တိုက်ပွဲများ ဆက်လက် ဖြစ်ပွားနေ

ဧပြီလ ၁ ရက်

မကွေးတိုင်း၊ ပခုက္ကူမြို့နယ်အတွင်း စစ်ကြောင်းထိုးလာသော စစ်တပ်ကို ဒရုန်းဖြင့် တိုက်ခိုက်ခဲ့ရာ စစ်သား ၅ ဦး ထိခိုက်ဒဏ်ရာရပြီး တိုက်ပွဲများ ဆက်လက်ဖြစ်ပွားနေကြောင်း ပခုက္ကူခရိုင်စစ်ဌာန အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။

ယနေ့ ဧပြီလ ၁ ရက်နေ့ နံနက် ၇ နာရီ ၂၀ မိနစ်ခန့်တွင် ပခုက္ကူမြို့နယ်၊ ငွေသောင်ရွာ စာသင်ကျောင်းအနီး စစ်ကြောင်းထိုး ရောက်ရှိလာသော အင်အား ၅၀ ခန့်ပါ အကြမ်းဖက် စစ်တပ် စစ်ကြောင်းကို တော်လှန်တပ်ဖွဲ့များက ဒရုန်းဖြင့် ဗုံး ၆ လုံးကျဲချ တိုက်ခိုက်ခဲ့ကြောင်း သိရသည်။

ထိတိုက်ခိုက်မှု အတွင်း အကြမ်းဖက် စစ်တပ်ဘက်မှ ၅ ဦး ထိခိုက်ဒဏ်ရာရရှိကာ ဒဏ်ရာရ စစ်သားများကို သယ်ထုတ်ပြီး ချမ်းသာကြီးရွာအတွင်းသို့ ပြန်လည်ဆုတ်ခွာသွားကြောင်း၊ ထို စစ်ကြောင်းကို ပခုက္ကူခရိုင် တပ်ခွဲ ၁ မှ တော်လှန်ရေး ရဲဘော်များက လိုက်လံ တိုက်ခိုက်နေဆဲဖြစ်ကြောင်း သိရှိရသည်။

"ခရိုင်စစ်ကြောင်း တပ်ခွဲ ၁ က စစ်ခွေးတွေကို ဆက်လက်တိုက်ခိုက်နေပါသေးတယ်။ စစ်ခွေး ၅ ဦးက ထိခိုက် ဒဏ်ရာရတယ်။ ဒဏ်ရာရတဲ့ စစ်ခွေးတွေကို ပြန်ပြီး သယ်ထုတ်သွားတာ ဒရုန်းဗီဒီယိုဖိုင်မှာ မြင်ရပါတယ်" ဟု ပခုက္ကူခရိုင်စစ်ဌာနအဖွဲ့မှ တာဝန်ရှိသူက ပြောဆိုသည်။

အဆိုပါ တိုက်ခိုက်မှုကို ပခုက္ကူခရိုင် အမှတ် (၈)တပ်ရင်း နှင့် နယ်မြေ(၁) ဒရုန်း အဖွဲ့များက ပူးပေါင်းလုပ်ဆောင်ခဲ့ခြင်းဖြစ်ပြီး တော်လှန်ရေး ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းသိရှိရသည်။

#KTM

Apr 1, 7:39PM
#7starmyaing
📫သတင်းပေးပို့ရန်
@myaing3starbot

ပခုက္ကူနှင့် ရေစကြိုမြို့နယ်အစပ်ရှိ ညောင်ပင်ရွာကို စစ်တပ်က မီးရှို့ဖျက်ဆီးမှု နေအိမ် ၇၅ လုံးပြာကျ၊ ကျေးရွာ ၇ ခုမှ ပြည်သူ ၇၀၀၀ ကျော် ဘေးလွတ်ရာကို ထွက်ပြေး တိမ်းရှောင်နေရ

မေလ ၁၂ ရက်

မကွေးတိုင်း၊ ပခုက္ကူမြို့နယ်နှင့် ရေစကြိုမြို့နယ်အစပ်ရှိ ညောင်ပင်ရွာကို အကြမ်းဖက် စစ်တပ်က မီးရှို့ဖျက်ဆီးခြင်းကြောင့် နေအိမ် ၇၅ လုံး မီးလောင်ပြာကျခဲ့ပြီး ကျေးရွာ ၇ ခုမှ ပြည်သူ ၇၀၀၀ ကျော် ဘေးလွတ်ရာ ထွက်ပြေးတိမ်းရှောင်နေရကြောင်း ဒေါင်းသွေးနီ ပြောက်ကျားတပ်ဖွဲ့ - YSO အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ပြောဆိုသည်။

ဧပြီလ ၂၄ ရက်နေ့မှ စတင်ပြီး ပခုက္ကူ တပ်မ ၁၀၁ မှ ထွက်လာသော အင်အား ၃၀၀ ခန့်ပါ အကြမ်းဖက် စစ်တပ် စစ်ကြောင်းသည် ပခုက္ကူမြို့နယ်နှင့် ရေစကြိုမြို့နယ်အစပ်ရှိ ညောင်ပင်ရွာကို ဝင်ရောက် စီးနင်းခဲ့ပြီး နေအိမ် ၇၅ လုံးကို မီးရှို့ဖျက်ဆီးခဲ့ကြောင်း၊ ထို စစ်တပ် စစ်ကြောင်းသည် ဆက်လက် စစ်ကြောင်းထိုးနေ၍ ပြည်သူများ ဘေးလွတ်ရာ တိမ်းရှောင်နေရဆဲဖြစ်ကြောင်း သိရသည်။

လက်ရှိချိန်တွင် စစ်တပ် စစ်ကြောင်းကြောင့် မကျည်ပင်ပုရွာ ၊ နန်းတဲရွာ၊ ရွှေဒါးရွာ၊  ညောင်ပင်ရွာ ၊ ဇယမရွာ ၊ ဆင်ကြို့ရွာနှင့် ကြူရွာတို့မှ ပြည်သူ ၇၀၀၀ ကျော်သည် ဘေးလွတ်ရာ တိမ်းရှောင်နေရကြောင်း သိရှိရသည်။

"စစ်ခွေး စစ်ကြောင်းက ညောင်ပင်ရွာ ကိုတော့ မီးရှို့သွားတယ်။ နေအိမ် ၇၅ လုံးကို မီးထဲပါသွားတယ်။ စစ်ခွေး စစ်ကြောင်းက ဧပြီလ ၂၄ ရက်နေ့က မီးရှို့ခဲ့တာပါ။ လက်ရှိမှာ ပခုက္ကူမြို့နယ်နှင့် ရေစကြိုမြို့နယ်အစပ်မှာရှိတဲ့ ကျေးရွာ ၇ ခုက ပြည်သူ ၇၀၀၀ ကျော် တိမ်းရှောင်နေရတယ်။ စစ်ခွေး စစ်ကြောင်းက ကျောက်လှေးခါးရွာနဲ့ ပန်းတိုင်းခြုံ ရွာတို့မှာ ရှိနေသေးတယ်"ဟု ဒေါင်းသွေးနီ ပြောက်ကျားတပ်ဖွဲ့ - YSO အဖွဲ့မှ တာဝန်ရှိသူက ပြောဆိုသည်။

ထိုစစ်တပ် စစ်ကြောင်းကို တော်လှန်ရေးတပ်ဖွဲ့များက ညောင်ပင်ရွာအနီးတွင်လည်း ကြားဖြတ်တိုက်ခိုက်ခဲ့ပြီး စစ်သား ၆ ဦးသေဆုံးကာ ၃၀ ဦးခန့် ထိခိုက်ဒဏ်ရာရရှိပြီး တော်လှန်ရေးရဲဘော် ၂ ဦးလည်း (မစိုးရိမ်ရ) ဒဏ်ရာရရှိခဲ့ကြောင်း သိရသည်။

#KTM
#Threestarsmyaing

မြိုင်နှင့် ပေါက်မြို့နယ်အစပ်ရှိ လက်ပံတိုရေနံမှော်ကို စစ်တပ်က Gyrocopter ၃ စီးဖြင့် ဗုံးကျဲ တိုက်ခိုက်မှု စျေးဆိုင်နေအိမ် ၁ လုံး ပျက်စီး

မေလ ၁၈ ရက်

မကွေးတိုင်း၊ မြိုင်မြို့နယ်နှင့် ပေါက်မြို့နယ်အစပ်ရှိ လက်ပံတိုရေနံမှော်ကို  အကြမ်းဖက် စစ်တပ်က တိုက်ပွဲဖြစ်ပွားခြင်းမရှိဘဲ Gyrocopter ၃ စီးဖြင့် ဗုံးကျဲ တိုက်ခိုက်ခဲ့သောကြောင့် စျေးဆိုင်နေအိမ် ၁လုံး ပျက်စီးခဲ့ကြောင်း  အညာမြေအရပ်ဖက်လူမှုအဖွဲ့အစည်း-မြိုင် အဖွဲ့မှ ဆရာထွေးက ရန်ကုန်ခေတ်သစ်သတင်းဌာနထံသို့ပြောဆိုသည်။

ယနေ့ မေလ ၁၈ ရက်နေ့ နံနက် ၁၀ နာရီ ၃၀ မိနစ်ခန့်တွင် အနောက်မြောက်ပိုင်းတိုင်းစစ်ဌာနချုပ်မှ တက်လာသော Gyrocopter ၃စီးက မြိုင်မြို့နယ်နှင့် ပေါက်မြို့နယ်အစပ်ရှိ  လက်ပံတိုရေနံမှော်ကို တိုက်ပွဲဖြစ်ပွားခြင်းမရှိဘဲ ၂ ကြိမ်ဗုံးကျဲ တိုက်ခိုက်ခဲ့ကြောင်း သိရသည်။

ထိုဗုံးကျဲ တိုက်ခိုက်မှု အတွင်း ပြည်သူများ ထိခိုက်မှု မရှိဘဲ စျေးဆိုင်နေအိမ် ၁လုံး ပျက်စီးသွားခဲ့ကြောင်း၊ သို့သော် စစ်တပ်က လေကြောင်း တိုက်ခိုက်မှုများ ထပ်မံ ပြုလုပ်မည်ကို စိုးရိမ်သောကြောင့် ပြည်သူများ တိမ်းရှောင်နေရကြောင်း သိရှိရသည်။

"စစ်ခွေးတွေက တိုက်ပွဲဖြစ်ပွားခြင်းမရှိဘဲ လေကြောင်းတိုက်ခိုက်ခဲ့တာပါ။ အဲ့ဘက်တွေမှာ စစ်ကြောင်းတွေ တိုက်ပွဲတွေ မရှိတဲ့နေရာပါ။ စစ်ခွေးတွေက ၂ ကြိမ် ချတာပြောတယ်။ ပြည်သူတွေ ထိခိုက်ဒဏ်ရာရတာမျိုးမရှိဘူး။ စျေးဆိုင် ၁လုံးတော့ ပျက်စီးသွားတယ်လို့သိရတယ်။ အိမ်ဆိုင်လေးပေါ့။ ပြည်သူများအနေဖြင့် စစ်ကြောင်းနှင့် လေကြောင်း အန္တရာယ်တို့ကို သတိပြုနေထိုင်ချဖို့ ပြောချင်ပါတယ်"ဟု  အညာမြေ အရပ်ဖက်လူမှုအဖွဲ့အစည်း-မြိုင် အဖွဲ့မှ ဆရာထွေးက ပြောဆိုသည်။

အလားတူ ဧပြီလ ၄ ရက်နေ့ကလည်း မိတ္ထီလာရှမ်းတဲလေတပ်မှ တက်လာသော ဂျက်ဖိုက်တာ ၂ စီး၊ မကွေးလေတပ်မှ တက်လာသော ဂျက်ဖိုက်တာ ၃ စီးက မြိုင်မြို့နယ်နှင့် ပေါက်မြို့နယ်အစပ်ကို လေကြောင်းတိုက်ခိုက်မှု ၁၁ ကြိမ် ပြုလုပ်ခဲ့သေးကြောင်း သိရသည်။

#KTM
#7starmyaing

ဆိပ်ဖြူမြို့နယ် ကပစ ၂၁ မှ လေယာဉ်ဗုံးများ တင်ဆောင်လာသည့် စစ်ယာဉ်တန်းကို ၂ ရက်ဆက် မိုင်းဆွဲတိုက်ခိုက်မှု စစ်သား ၈ ဦးသေဆုံးပြီး စစ်တပ်၏ ကား ၂ စီး မီးလောင်ပျက်စီး

မေလ ၂၀ ရက်

မကွေးတိုင်း၊ ဆိပ်ဖြူမြို့နယ်ရှိ အမှတ် ၂၁ ကာကွယ်ရေးပစ္စည်းစက်ရုံ (ကပစ ၂၁) မှ ပေါင် ၂၅၀ လေယာဉ်ဗုံးများ တင်ဆောင်လာသည့် စစ်ကောင်စီ စစ်ယာဉ်တန်းကို တော်လှန်ရေးပူးပေါင်းတပ်ဖွဲ့များက ၂ ရက်ဆက်တိုက် မိုင်းဆွဲတိုက်ခိုက်ခဲ့ရာ စစ်သား ၈ ဦး သေဆုံးပြီး စစ်တပ်၏ ကား ၂ စီး မီးလောင်ပျက်စီးခဲ့ကြောင်း ပခုက္ကူခရိုင်အမှတ်-၁၉ တပ်ရင်းမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။

မေလ ၁၆ ရက်နေ့နှင့် မေလ ၁၇ ရက်နေ့တို့တွင် ဆိပ်ဖြူမြို့နယ် ကပစ ၂၁ မှ ပေါင် ၂၅၀ လေယာဉ်ဗုံးသီးများ တင်ဆောင်လာသည့် ယာဉ်အပါအဝင် စစ်ကား ၁၃ စီးပါဝင်သော စစ်ယာဉ်တန်းကို တော်လှန်ရေးတပ်ဖွဲ့များက ဆော-ဆိပ်ဖြူ လမ်းပိုင်းတွင် မိုင်းဆွဲတိုက်ခိုက်ခဲ့ခြင်းဖြစ်သည်။

ထိုမိုင်းဆွဲတိုက်ခိုက်မှုအတွင်း စစ်ကောင်စီဘက်မှ စစ်သား ၈ ဦး သေဆုံးကာ၊ ၃ ဦး ပြင်းထန်စွာ ထိခိုက်ဒဏ်ရာရရှိခဲ့ပြီး စစ်ကား ၂ စီးလည်း မီးလောင်ပျက်စီးသွားခဲ့ကြောင်း သိရသည်။

ပခုက္ကူခရိုင်အမှတ်-၁၉ တပ်ရင်းမှ တာဝန်ရှိသူက  “မေလ ၁၆ ရက်နေ့မှာ စတင်ထွက်လာတဲ့ ကပစ ၂၁ က ထွက်လာတဲ့ လေယာဉ်ပစ်ဗုံးသီးတင်တဲ့ကားကို စတင်ဆွဲခဲ့တာပါ။ မေလ ၁၆ ရက်နေ့မှာ တစ်ကြိမ် မိုင်းဆွဲခဲ့တယ်။ မေလ ၁၇ ရက်နေ့မှာက တစ်ကြိမ် ပြန်လာတဲ့ကားကို မိုင်းဆွဲခဲ့တာပါ။ ၂ ကြိမ်တိုင်တိုင် မိုင်းဆွဲတိုက်ခိုက်ခဲ့တာပါ။ ဆိပ်ဖြူမြို့နယ် ကပစ ၂၁ က ထွက်လာတဲ့ လေယာဉ်ဗုံးသီးတင်လာတဲ့ စစ်ကောင်စီကားတွေက မကွေးလေတပ်စခန်း၊ မိတ္ထီလာနဲ့ နေပြည်တော်ကို အဓိကပို့နေပါတယ်။ တစ်ပတ်ကို ၂ ကြိမ်နဲ့အထက် ပို့နေတာပါ။ မကွေးတိုင်း ဆိပ်ဖြူမြို့နယ် ဆော-ဆိပ်ဖြူလမ်းပိုင်းမှာ မိုင်းဆွဲတိုက်ခိုက်ခဲ့တာပါ။ စစ်ကောင်စီကားအင်အား ကားအစီးရေ ၁၃ စီး တက်လာတယ်။ စစ်သား ခန့်မှန်းခြေ ၁၅၀ ခန့်နဲ့ အထက်ရှိပါတယ်။ ၂ ရက်ပေါင်း စစ်ကောင်စီဘက်က သေဆုံးတာ ၈ ကောင်သေဆုံးတယ်။ ၃ ဦး ထိခိုက်ဒဏ်ရာရတယ်လို့ သိရတယ်။ စစ်ကား ၂ စီးကတော့ မီးလောင်ပျက်စီးသွားတယ်။ စစ်ကောင်စီလက်နက်ခဲယမ်း သိမ်းဆည်းရမိတာမျိုး မရှိပါဘူး။ လက်ရှိမှာ စစ်ကောင်စီတွေက လောလောဆယ် ဆော-ဆိပ်ဖြူလမ်းမှာ ကင်းယူနေပါတယ်။ ယခုချိန်ထိတော့ လက်နက်ကြီးနဲ့ ရမ်းသမ်းပစ်ခတ်နေပါတယ်”ဟု ရှင်းပြသည်။

အဆိုပါ စစ်ယာဉ်တန်းတိုက်ခိုက်မှုကို ပခုက္ကူခရိုင်အမှတ်-၁၉ တပ်ရင်းနှင့် ပခုက္ကူခရိုင် တပ်ရင်း ၄ တို့က ပူး ပေါင်း လုပ်ဆောင်ခဲ့ခြင်း ဖြစ်သည်။

မိုင်းဆွဲတိုက်ခိုက်မှုအပြီးတွင် တော်လှန်ရေးရဲဘော်များအားလုံး ဘေးအန္တရာယ်ကင်းရှင်းစွာဖြင့် အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း သိရှိရသည်။

#KTM

မြစ်ခြေရဲစခန်းကို PDF တပ်များက ၁ နာရီအတွင်း တိုက်ခိုက် သိမ်းပိုက်မှု စစ်သား ၂ ဦး သေဆုံးပြီး တပ်ဖွဲ့ဝင် ၁၄ ဦးကို လက်နက်ခဲယမ်းများနှင့်အတူ စစ်သုံ့ပန်းအဖြစ် ဖမ်းဆီးရမိ၊ ရဲစခန်းကို အပြီးတိုင် မီးရှို့ရှင်းလင်း

ဇွန်လ ၁၀ ရက်

မကွေးတိုင်း၊ ပခုက္ကူမြို့နယ်ရှိ မြစ်ခြေရဲစခန်းကို ပြည်သူ့ကာကွယ်ရေးတပ်မတော် (PDF) က ယနေ့ ဇွန်လ ၁၀ ရက်နေ့ နံနက်ပိုင်း အပြီးတိုင် ထိုးစစ်ဆင် တိုက်ခိုက်သိမ်းပိုက်လိုက်ကြောင်း ပြည်သူ့ကာ ကွယ်ရေးတပ်မတော် (PDF) စစ်ရုံးချုပ်က သတင်းထုတ်ပြန်လိုက်သည်။

ယနေ့ ဇွန်လ ၁၀ ရက်နေ့ နံနက် ၄ နာရီတွင် အဆိုပါ မြစ်ခြေရဲစခန်းကို မကွေးတိုင်းစစ်ဌာနကွပ်ကဲမှုအောက်ရှိ ပခုက္ကူခရိုင်စစ်ဌာန၏ ဦးဆောင်ကွပ်ကဲမှုဖြင့် ဝင်ရောက်စီးနင်းတိုက်ခိုက်ခဲ့ရာ၊ တိုက်ပွဲဖြစ်ပွားပြီး တစ်နာရီအကြာ နံနက် ၅ နာရီတွင် စခန်းတစ်ခုလုံးကို အပြီးသတ်ချေမှုန်း တိုက်ခိုက်သိမ်းပိုက်နိုင်ခဲ့ခြင်း ဖြစ်သည်။

မေလ ၁၀ ရက်နေ့မှ ဇွန်လ ၂ ရက်နေ့အထိ မြစ်ခြေမြို့ရှိ ပြည်သူလူထုပိုင် နေအိမ်အဆောက်အအုံပေါင်း ၁,၀၀၀ ကျော်ကို မီးရှို့ဖျက်ဆီးပြီး၊ ဒေသခံပြည်သူ ၂၄ ဦးကို ရက်ရက်စက်စက် မီးရှို့သတ်ဖြတ်ကာ စစ်ရာဇဝတ်မှုများ ကျူးလွန်ခဲ့သည့် အကြမ်းဖက်စစ်ကောင်စီတပ်ကို လက်တုံ့ပြန်သည့်အနေဖြင့် ချေမှုန်းခဲ့ခြင်းဖြစ်သည်ဟု PDF စစ်ရုံးချုပ်က သတင်းထုတ်ပြန်သည်။

တိုက်ပွဲအတွင်း စစ်ကောင်စီဘက်မှ တပ်သား ၂ ဦး ကျဆုံးခဲ့ပြီး ၁၄ ဦးမှာမူ လက်နက်ချအညံ့ခံခဲ့သဖြင့် စစ်သုံ့ပန်းအဖြစ် ဖမ်းဆီးထိန်းသိမ်းနိုင်ခဲ့ကြောင်း၊ ဖမ်းဆီးရမိသည့် စစ်သုံ့ပန်းများကို နိုင်ငံတကာစစ်ဥပဒေများနှင့်အညီ ထိန်းသိမ်းထားရှိပြီး၊ ၎င်းတို့အနက် စစ်ရာဇဝတ်မှုကျူးလွန်သူများကို စစ်ဘက်ဆိုင်ရာဥပဒေများနှင့်အညီ စိစစ်ဖော်ထုတ်ကာ စစ်တရားရုံးတင် စစ်ဆေးအရေးယူဆောင်ရွက်သွားမည်ဟု PDF စစ်ရုံးချုပ်က ဆိုသည်။

မြစ်ခြေရဲစခန်းကို သိမ်းပိုက်ပြီးနောက် ရန်သူ့တပ်ထံမှ လက်နက်ခဲယမ်း အမြောက်အမြားကိုလည်း သိမ်းဆည်းရရှိခဲ့ပြီး G-3 သေနတ် ၁၈ လက်၊ 79 သေနတ် ၁ လက်၊ ခြောက်လုံးပြူး ၂ လက်၊၆၀ မမ ကွန်မန်ဒိုစိန်ပြောင်း ၁ လက်၊ လက်လုပ်လေသေနတ် ၁ လက်၊ G-3 ကျည်ဘောက် ၂၇ ဘောက်၊ G-3 ကျည် ၁,၉၀၈ တောင့်၊ ကျည်ကာဦးထုပ် ၇ လုံး တို့ပါဝင်ကြောင်း သိရှိရသည်။

#KTM
#7starmyaing

မင်းအောင်လှိုင်၏ ရက် ၁၀၀ စီမံချက်ဖြင့် တစ်နိုင်ငံလုံး လမ်းဘေးစျေးသည် ရှင်းလင်းရေး စီမံချက် လုပ်ဆောင်ခဲ့သော်လည်း

▪️တရုတ်ကို ကြောက်၍ ရန်ကုန်၊ လသာ ၁၉ လမ်း တရုတ်တန်းကို အထူးအခွင့်အရေးဖြင့် ပြန်လည် ဖွင့်လှစ်ပေးရ၊ တရုတ်တန်းမူလစျေးသည်မှလွဲ၍ အခြားလမ်းဘေးစျေးသည်များ စျေးရောင်းချခွင့်ပိတ်

ဇွန်လ ၁၂ ရက်

ရန်ကုန်မြို့၊ လသာမြို့နယ်အတွင်းရှိ တရုတ်တန်းကို စစ်ခေါင်းဆောင်  မင်းအောင်လှိုင်၏ ရက် ၁၀၀ လမ်းဘေးရှင်းလင်းရေး စီမံချက်ဖြင့် ပြီးခဲ့သည့် မေလ ၂၅ ရက်နေ့မှစတင်၍ ပိတ်ပင်ရှင်းလင်းခဲ့သော်လည်း၊ ၁၅ ရက်အကြာ ဇွန်လ ၉ ရက်နေ့တွင် တရုတ်မီးပုံးများချိတ်ဆွဲကာ နှစ်သစ်ကူးပွဲတော်အလား ခမ်းခမ်းနားနား ပြန်လည်ဖွင့်လှစ်ပေးလိုက်ရသည်။

ရန်ကုန်၊ မန္တလေးနှင့် နေပြည်တော် အပါအဝင် တစ်နိုင်ငံလုံးတွင် ရက် ၁၀၀ စီမံချက်ဖြင့် လမ်းပေါ်ဆိုင်ခင်းရောင်းချခွင့်များကို တင်းကျပ်စွာ ပိတ်ပင်ထားဆဲဖြစ်သော်လည်း တရုတ်ကို ကြောက်၍ ရန်ကုန်၊ လသာမြို့နယ်၊ တရုတ်တန်း ၁၉ လမ်းရှိ လမ်းဘေးစားသောက်ဆိုင်များကိုမူ အထူးအခွင့်အရေးအနေဖြင့် ပြန်လည်ဖွင့်လှစ်ပေးခဲ့ခြင်း ဖြစ်သည်။

ရန်ကုန် လသာ တရုတ်တန်း ၁၉ လမ်းညစျေးတန်းကို စစ်ခေါင်းဆောင် မင်းအောင်လှိုင်က ပြန်လည်ဖွင့်လှစ်ပေးသည့်အပြင် စစ်တပ်ဦးပိုင်၏ မြန်မာဘီယာကို အသွင်ပြောင်းထားသည့် Keen ဘီယာအမှတ်တံဆိပ်ကပါ စပွန်ဆာပေး၍ လှလှပပ ပြင်ဆင်ပေးထားကြောင်း တွေ့ရသည်။

မင်းအောင်လှိုင်က "လမ်းဘေးစျေးသည်များ မမြင်ချင်ဘူး" ဟု အမိန့်ပေးထားခြင်းကြောင့် ရန်ကုန်မြို့တစ်မြို့လုံး လမ်းဘေးစျေးသည်များ ရှင်းလင်းရေးလုပ်ဆောင်ရာတွင် တရုတ်တန်း ၁၉ လမ်းလည်း အပါအဝင်ဖြစ်ခဲ့သည်။

ထိုသို့ ပိတ်ပင်ခံရသည့်အတွက် တရုတ်တန်းရှိ တရုတ်စျေးသည်များက ၎င်းတို့၏ စားဝတ်နေရေးအတွက် ရန်ကုန်မြို့ရှိ တရုတ်သံရုံးသို့ သွားရောက်တိုင်ကြားခဲ့ကြကြောင်း စုံစမ်းသိရှိရသည်။

နိုင်ငံတကာတွင် တရုတ်တန်းရှိသော်လည်း မြန်မာပြည်တွင် တရုတ်တန်း ဖျောက်ဖျက်ခံရတော့မည်ဟု တိုင်တန်းမှုများကြောင့် နေပြည်တော်နှင့် ရန်ကုန်ရှိ အာဏာပိုင်များထံသို့ တရုတ်သံရုံးက တရားဝင်မေးမြန်းစုံစမ်းမှုများ လုပ်ဆောင်လာချိန်တွင် မင်းအောင်လှိုင်တို့က တရုတ်တန်းကို ပြန်လည် ဖွင့်လှစ်ပေးရခြင်းဖြစ်ကြောင်း မြန်မာပြည်ဖွား တရုတ်စီးပွားရေးလုပ်ငန်းရှင်တချို့ထံမှ စုံစမ်းသိရှိရသည်။

ထိုသို့ တိုင်ကြားမှုကြောင့် တရုတ်သံရုံးဘက်ကတစ်ဆင့် မေးမြန်းဖိအားပေးလာမှုကြောင့်  စစ်တပ်က ၁၉ လမ်းကို ချွင်းချက်အနေဖြင့် ပြန်လည်ဖွင့်လှစ်ပေးလိုက်ရခြင်း ဖြစ်သော်လည်း မင်းအောင်လှိုင်၏ ရက် ၁၀၀ စီမံချက်ဖြင့် လမ်းဘေးစျေးသည် ရှင်းလင်းရေး စီမံချက်မှာ ဆက်လက် လုပ်ဆောင်နေဆဲဖြစ်သည်ဟု သိရှိရသည်။

လက်ရှိတွင် တရုတ်တန်း ၁၉ လမ်း၌ မူလဆိုင်ခန်းဖွင့်ထားသည့် တရုတ်စျေးသည်များမှလွဲ၍ ပြင်ပမှ လမ်းဘေးစျေးသည်များ ဝင်ရောက်ရောင်းချခွင့်ကိုမူ ဆက်လက်ပိတ်ပင်ထားဆဲ ဖြစ်သည်။

မြန်မာပြည်သူအများစုဖြစ်သည့် အခြားလမ်းဘေးစျေးသည်များမှာမူ ရက် ၁၀၀ စီမံကိန်းအကြောင်းပြချက်ဖြင့် တစ်နိုင်ငံလုံးတွင် လမ်းဘေး၌ စျေးရောင်းချခွင့် လုံးဝမရရှိဘဲ စားဝတ်နေရေး အခက်အခဲများနှင့် ရင်ဆိုင်နေရဆဲဖြစ်ကြောင်း စုံစမ်းသိရှိရသည်။

ဓာတ်ပုံ- တရုတ်နှစ်သစ်ကူး တက်ရောက်ခဲ့သော မင်းအောင်လှိုင်၊ မိန်းမ ကြူကြူလှ နှင့် ရန်ကုန်၊ လသာ ၁၉ လမ်း တရုတ်တန်းကို ဇွန်လ ၉ ရက်နေ့ ပြန်လည် ဖွင့်လှစ်ပွဲ အခမ်းအနားပုံများဖြစ်ပါသည်။

#KTM
#HlaingInfo

Breaking News- မကွေးတိုင်းအတွင်း အကြမ်းဖက်စစ်တပ်၏ Mi 17 ထောက်ပို့ရဟတ်ယာဉ်ကို ပစ်ချ

ဇွန်လ ၂၃ ရက်

မကွေးတိုင်းအတွင်း အကြမ်းဖက်စစ်တပ်၏ Mi 17 ထောက်ပို့ရဟတ်ယာဉ်ကို ယနေ့ ပစ်ချလိုက်ကြောင်း မကွေးပြည်သူ့ကာကွယ်ရေးတပ်မတော် Magway - PDF ၏ ထုတ်ပြန်ချက်နှင့် တော်လှန်ရေး သတင်းရင်းမြစ်၏ ပြောဆိုချက်အရ သိရှိရသည်။

ယနေ့တွင် Mi 17 တစီးကို တော်လှန်ရေး မဟာမိတ်အင်အားစုများ ပူးပေါင်း၍ မကွေးဖက်ဒရယ်ယူနစ် ၊ ပခုက္ကူခရိုင် ၊ မြိုင်နယ် တနေရာမှာ  ပစ်ချနိုင်ခဲ့ကြောင်း၊  အသေးစိတ်ကို ဆက်လက်ထုတ်ပြန်သွားမည် ဖြစ်ကြောင်း မကွေးပြည်သူ့ကာကွယ်ရေးတပ်မတော် Magway - PDF ကသတင်းထုတ်ပြန်သည်။

"ဒီနေ့ ပစ်ချနိုင်ခဲ့တာပါ။ မြိုင်နယ်တနေရာမှာပါ။ ထိခိုက်သေဆုံးတာတွေကို မြေပြင် စစ်ကြောင်း အခြေအနေရှင်းတာနဲ့ အသေးစိတ်ထုတ်ပြန်မှာပါ" ဟု Magway People's Defense Force - Magway PDF မှ တာဝန်ရှိသူက ရန်ကုန်ခေတ်သစ် သတင်းဌာနထံသို့ ပြောဆိုသည်။

မကွေးတိုင်းသို့ စစ်ကူလာပို့သည့် စစ်ရဟတ်ယာဉ်ပျက်ကျသွားကြောင်း အကြမ်းဖက်စစ်တပ်၏ ဆက်သွယ်ရေးကွန်ရက်များတွင် ပြောဆို အတည်ပြု အကြောင်းကြားသော သတင်းအချက်အလက်များ ရရှိထားကြောင်း တော်လှန်ရေးသတင်းရင်းမြစ်တစ်ခုကလည်း အတည်ပြုသည်။ 

"ကျနော်တို့သိသလောက်တော့  ကိုယ့်ဘက်က ဆော်လိုက်တာ ရဟတ်ယာဉ်လည်း ပျက်ကျတယ်။ ပစ်ချလို့ ပျက်ကျတာတော့သေချာတယ်။ Mi-17 ရဟတ်ယာဉ်ပါ" ဟု တော်လှန်ရေး သတင်းရင်းမြစ်က ပြောဆိုသည်။

#KTM
#7starmyaing

မြိုင်မြို့နယ်၊ တွင်းမကျေးရွာတွင် ဒရုန်းဖြင့် တိုက်ခိုက်ခံရ၍ လုံးဝပျက်စီးသွားသော Mi-17 ရဟတ် ယာဉ်ကို တစစီဖြုတ်ကာ တပ်မ ၁၀၁ သို့ ယာဉ်တန်းဖြင့် ပို့ဆောင်နေ

ဇွန်လ ၂၇ ရက်

မကွေးတိုင်း၊ မြိုင်မြို့နယ်၊ တွင်းမကျေးရွာတွင် ဒရုန်းဖြင့် တိုက်ခိုက်ခံရပြီး လုံးဝပျက်စီးသွားသည့် Mi-17 ရဟတ်ယာဉ်မှ အစိတ်အပိုင်းများကို စစ်ကောင်စီတပ်က ဖြုတ်ယူကာ ပခုက္ကူမြို့ရှိ တပ်မ ၁၀၁ သို့ စစ်ကားယာဉ်တန်းဖြင့် ပြန်လည်ပို့ဆောင်နေကြောင်း ဒေသခံများထံမှ သိရသည်။

ဒေသခံများ၏ ပြောကြားချက်အရ ဇွန်လ ၂၄ ရက်နေ့တွင် ပခုက္ကူမြို့ တပ်မ ၁၀၁ မှ ထွက်ခွာလာသော စစ်ကား ၇ စီးပါ ယာဉ်တန်း  မြိုင်မြို့နယ်တောင်ပိုင်း၊ တွင်းမပျူစောထီးကျေးရွာသို့ ရောက်ရှိခဲ့ပြီး ဒရုန်းတိုက်ခိုက်မှုကြောင့် ပျက်စီးသွားသည့် Mi-17 ရဟတ်ယာဉ်မှ အစိတ်အပိုင်းများကို ဖြုတ်ယူကာ ပခုက္ကူမြို့ရှိ တပ်မ ၁၀၁ သို့ ပြန်လည်သယ်ဆောင်သွားကြောင်း သိရသည်။

ယင်းအပြင်ယနေ့  ဇွန်လ ၂၇ ရက်နေ့ နံနက်ပိုင်းမှစတင်၍ မြိုင်မြို့ စက်မှု ၂ အခြေစိုက် စစ်ကောင်စီတပ်မှ စစ်ကြောင်းတစ်ခု ထွက်ခွာလာပြီး ကုန်းရွာအနီးသို့ ရောက်ရှိလာသဖြင့် အနီးဝန်းကျင်ရှိ ကျေးရွာ ၃ ရွာမှ ဒေသခံပြည်သူ ထောင်နှင့်ချီ ဘေးလွတ်ရာသို့ ထွက်ပြေးတိမ်းရှောင်နေရကြောင်း ဒေသခံများက ပြောသည်။

ဒေသခံတစ်ဦးက “အခုထွက်လာတဲ့ စစ်ကြောင်းက မြိုင်စက်မှု ၂ က ထွက်လာတာပါ။ Mi-17 နဲ့ လူ အင်အားထပ်ဖြည့်ပြီး စစ်ကြောင်းစထွက်လာတာ ဖြစ်တယ်။ အခုချိန်ထိတော့ ကုန်းရွာနားမှာ ရောက်နေပြီး ကျေးရွာ ၃ ရွာက ပြည်သူတွေ အားလုံး ဘေးလွတ်ရာ ထွက်ပြေးတိမ်းရှောင်နေကြရပါတယ်” ဟု ရန်ကုန်ခေတ်သစ်သတင်းဌာနသို့ ပြောကြားသည်။

ဒေသခံများ၏ အဆိုအရ အဆိုပါ စစ်ကြောင်းမှာ မေလ ၂၄ ရက်၊ ၂၅ ရက်နှင့် ၂၆ ရက်နေ့များအတွင်း စက်မှု(၂) အနီးရှိ ကုန်းရွာမှ နေအိမ် ၂၀ ကျော်နှင့် ဝက်ပုတ်ကျေးရွာမှ နေအိမ် ၄၅ လုံးကျော်ကို မီးရှို့ဖျက်ဆီးခဲ့ပြီး ပြည်သူ ၂ ဦးကိုလည်း ဖမ်းဆီးသတ်ဖြတ်ခဲ့သော စစ်ကြောင်းဖြစ်သည်ဟု သိရှိရသည်။

ထို့ပြင် တွင်းမကျေးရွာအခြေစိုက် ပျူစောထီးများနှင့် စစ်ကောင်စီတပ်ဖွဲ့ဝင်များကလည်း သာစည်ကျေးရွာမှ အသက် ၆၁ နှစ်အရွယ် ဦးဝင်းရွှေ၊ နှမ်းဆီကန်ကျေးရွာမှ အသက် ၅၆ နှစ်အရွယ် ဦးမြင့်ဦး၊ မြေရင့်ကျေးရွာမှ စိတ်ရောဂါဝေဒနာခံစားနေရသည့် အသက် ၄၀ နှစ်အရွယ် ကိုကျော်လွင်၊ မိတ္ထိလာကျေးရွာမှ အသက် ၃၂ နှစ်အရွယ် ကိုနေဇော်နှင့် အသက် ၃၃ နှစ်အရွယ် ကိုမင်းမင်းဦးတို့ကို ဖမ်းဆီးသတ်ဖြတ်ခဲ့ကြောင်းလည်း ဒေသခံများက ပြောဆိုထားသည်။

#KTM

ပေါက်မြို့နယ် ထောက်ရှာပင်ကျေးရွာ အနီးတဝိုက်ကို စစ်တပ်က ၁၄ ကြိမ်တိုင် လေကြောင်းတိုက်ခိုက်မှု ပြည်သူ ၅ ဦး ထိခိုက်ဒဏ်ရာရှိပြီး နေအိမ်များပျက်စီး

ဇူလိုင်လ ၅ ရက်

မကွေးတိုင်း၊ ပေါက်မြို့နယ် ထောက်ရှာပင်ကျေးရွာ အနီးတဝိုက်ကို အကြမ်းဖက်စစ်တပ်က ၁၄ ကြိမ်တိုင်တိုင် လေကြောင်းတိုက်ခိုက်ခဲ့ရာ ပြည်သူ ၅ ဦး ထိခိုက်ဒဏ်ရာရရှိကာ၊ နေအိမ်များ ပျက်စီးခဲ့ကြောင်း အညာမြေ အရပ်ဖက်လူမှုအဖွဲ့အစည်း-မြိုင်အဖွဲ့မှ ဆရာထွေးက ရန်ကုန်ခေတ်သစ်သတင်းဌာနထံသို့ ပြောဆိုသည်။

ဇူလိုင်လ ၄ ရက်နေ့တွင် ညနေ ၄ နာရီ ၁၀ မိနစ်ခန့်မှစပြီး ညနေ ၅ နာရီ ၂၆ မိနစ်ခန့်အထိကို တံတားဦးလေတပ်မှ တက်လာသော Y-12 စစ်ထောက်ပို့၊ ဗုံးကျဲလေယာဉ် ၁ စီးဖြင့် ပေါက်မြို့နယ် ထောက်ရှာပင်ကျေးရွာ အနီးတဝိုက်ကို အကြမ်းဖက်စစ်တပ်က ၁၄ ကြိမ်တိုင်တိုင် ဗုံးကျဲတိုက်ခိုက်ခဲ့သည်။

ထိုသို့အကြမ်းဖက်စစ်တပ်၏ လေကြောင်းတိုက်ခိုက်မှုအတွင်း အသက် ၅၀ ကျော်အရွယ် အမျိုးသား ၂ ဦးနှင့် အသက် ၄၀ ကျော်အရွယ် အမျိုးသား ၁ ဦး၊ အသက် ၁၈ နှစ်အရွယ် အမျိုးသမီး ၁ ဦးနှင့် အသက် ၃၀ ကျော်အရွယ် အမျိုးသား ၁ ဦးတို့ ထိခိုက်ဒဏ်ရာရရှိခဲ့ကာ၊ နေအိမ် ၅ လုံး ထိခိုက်ပျက်စီးခဲ့ကြောင်း သိရှိရသည်။

"စစ်ရှောင်တွေထိတာပါ။ စစ်ကောင်စီစစ်ကြောင်းက ပေါက်မြို့နယ် ထောက်ရှာပင်ကျေးရွာ အနီးတဝိုက်မှာ ရှိနေလို့ လေယာဉ်ဖြင့် ဗုံးလာကျဲတာပါ။  နေအိမ် ၅ လုံး ပျက်စီးခဲ့တယ်။ ဗုံးက ၁၄ ကြိမ်လောက် ချတယ်" ဟု အညာမြေ အရပ်ဖက်လူမှုအဖွဲ့အစည်း-မြိုင်အဖွဲ့မှ ဆရာထွေးက ပြောဆိုသည်။

အလားတူ ဇွန်လ ၁၃ ရက်နေ့ကလည်း ပေါက်မြို့နယ်မြောက်ပိုင်းရှိ ကျေးရွာများကို မကွေးလေတပ်မှ တက်လာသော ဂျက်ဖိုက်တာ ၁ စီးနှင့် နေပြည်တော်လေတပ်မှ တက်လာသော ဂျက်ဖိုက်တာ ၁ စီးက လေကြောင်းတိုက်ခိုက်မှု ပြုလုပ်ခဲ့ကြောင်း၊ ထိုလေကြောင်းတိုက်ခိုက်မှုအတွင်း ထိခိုက်မှုအခြေအနေကို အတည်ပြုနိုင်ခြင်း မရှိသေးကြောင်း သိရသည်။

ဓာတ်ပုံ- အကြမ်းဖက်စစ်တပ်၏ တိုက်ခိုက်မှုကြောင့် ပြည်သူများနေထိုင်သော နေအိမ်ကျေးရွာများ ပျက်စီးနေစဉ်။ (ပုံအဟောင်းကို အသုံးပြုထားပါသည်။)
#KTM