အပစ်ရပ်မယ်ဆိုတဲ့ စစ်ကောင်စီတပ်က ‎မိုးဗြဲမှာ တိုက်ပွဲဖြစ်ပွားခြင်းမရှိဘဲ လက်နက်ကြီး၊လေကြာင်းနဲ့ တိုက်ခိုက်မှုပြုလုပ်ခဲ့တာကြောင့် ဒေသခံ ၅ ဦး သေဆုံး

ဧပြီလ ၅ ရက်

‎ကရင်နီပြည် မိုးဗြဲနဲ့ လွိုင်ကော်ကြားက ပီကင်းကောခူရွာကို တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က အကြောင်းမဲ့ လက်နက်ကြီး ၊ လေကြောင်းတို့နဲ့ တိုက်ခိုက်မှု ပြုလုပ်ခဲ့တာကြောင့် ဒေသခံ (၅) ဦး သေဆုံးခဲ့တယ်လို့ KNDF က ဒီနေ့ ဧပြီ ၅ ရက်နေ့မှာ ထုတ်ပြန်လာပါတယ်။
‎
‎မနေ့ ဧပြီ ၄ ရက် မနက် ၁၁ နာရီက မိုးဗြဲမြို့အခြေစိုက် ခမရ (၄၂၂) တပ်ဖက်မှ မြို့တွင်းနဲ့ အနီးဝန်းကျင်က ရွာတွေကို တစ်နေကုန်နီးပါး လက်နက်ကြီး‌တွေနဲ့ရမ်းသမ်းပစ်ခတ် တိုက်ခိုက်ခဲ့တာကြောင့် ပီကင်းကောခူရွာထဲက ဒေသခံ အမျိုးသား (၁)ဦး ထိမှန်သေဆုံးခဲ့ပါတယ်။
‎
‎"လက်နက်ကြီး တွေနဲ့ပစ်တော့ ရွာကလူတစ်ယောက်ထိပြီးသေသွားတာ။ သေသွားတဲ့ အဲအလောင်းကို သွားကောက်တုန်း စစ်တပ်က လေယာဉ်နဲ့ ပြန်လာပစ်တာ အဲမှာဘဲ နောက်ထပ် ‌၄ ယောက် ပွဲချင်းပြီးသေသွားတာ။ သူတို့ရဲ့ ကိုယ်ရေး အချက်အလက်တွေတော့ မသိရသေးဘူး" မြေပြင် အခြေအနေ သိရှိသူတစ်ဦးက ရွှေဖီမြေကို ပြောပါတယ်။
‎
‎မနေ့ နေ့လယ် ၂ နာရီကျော်အချိန် ပီကင်းကောခူကျေးရွာသို့ စစ်ကောင်စီတပ်က တိုက်လေယာဉ်နဲ့ ဗုံး (၂)လုံး ကြဲချတိုက်ခိုက်ခဲ့ပြီး ကျေးရွာတွင်းရှိနေအိမ်တွေ ထိမှန်ကာ အလောင်းသွားကောက်တဲ့ အမျိုးသား (၄) ဦး သေဆုံးခဲ့တာ ဖြစ်ပါတယ်။
‎
‎နိုင်ငံတစ်ဝန်း သဘာဝဘေးသင့်နေချိန် စစ်ကောင်စီဘက်က ယာယီ အပစ်အခတ်ရပ်စဲထားမည်ဟု ဧပြီလ (၂)ရက်နေ့မှာ ထုတ်ပြန်ထားပေမဲ့ ကရင်နီပြည်နယ်အတွင်းကို ဧပြီလ (၂) ရက်နေ့မှစပြီး ဒီနေ့ထိ လေကြောင်းတိုက်ခိုက်မှုကို ဆက်တိုက်လုပ်ဆောင်လျက်ရှိနေတယ်လို့ ထုတ်ပြန်ချက်မှာ ဖော်ပြထားပါတယ်။
‎
‎အလားတူ မြန်မာနိုင်ငံမှာ ငလျင်ဘေးသင့်ခဲ့တဲ့ မတ်လ (၂၈) ရက်နေ့ မှစ ဒီနေ့ထိ ကရင်နီပြည်နယ်အတွင်းကို စစ်ကောင်စီက လေကြောင်းတိုက်ခိုက်မှု (၃) ကြိမ်တိုင်တိုင် လုပ်ဆောင်ခဲ့ပြီး လက်နက်ကြီး ပစ်ခတ်
မှု‌တွေလည်း နေ့စဉ်နီးပါးလုပ်ဆောင်လျက်ရှိနေတယ် ဆိုပါတယ်။
#ဓာတ်ပုံ - KNDF

#SPM
#HlaingInfo