သက်ဆိုင်ရာ ပြည်နယ်တွေမှာ ရှိတဲ့ EROs တိုင်းရင်းသားတော်လှန်ရေးအဖွဲ့တွေနဲ့ ပြည်သူ့ကာကွယ်ရေးတပ်ဖွဲ့တွေ ပူးပေါင်းတိုက်ပွဲဝင်တဲ့အတွက် ဘာတွေ ဘယ်လောက် အကျိုးဖြစ်ထွန်းခဲ့လဲ။

သက်ဆိုင်ရာ ပြည်နယ်တွေက EROs တွေနဲ့ လက်တွဲ တိုက်ပွဲဝင်နေတဲ့အတွက် နံပါတ် (၁) အတွေ့အကြုံရတယ်။ နံပါတ် (၂) လက်နက်ရပါတယ်။ စစ်ရေးမှာ အတွေ့အကြုံရှိမှု မရှိမှုက စကား အများကြီးပြောပါတယ်။ အထူးသဖြင့် ထုအင်အားနဲ့တိုက်တဲ့ မဟာဗျုဟာမြောက်ထိုးစစ်တွေမှာ ပါဝင်ခွင့်ရတာက PDF ရဲဘော်တွေအတွက် တန်ဖိုးမဖြတ်နိုင်ပါဘူး။ ဒီအတွေ့အကြုံကလည်း အောင်ပွဲအလီလီရတဲ့ အတွေ့အကြုံဖြစ်တဲ့အတွက် အရေးကြီးပါတယ်။ လက်နက်ရတယ်ဆိုတာမှာ လက်နက်ငယ်သာမက PDF အဓိက လိုအပ်နေတဲ့ လက်နက်ကြီးပါ ပါဝင်ပါတယ်။ PDF တပ်မတော်ဆင်နွှဲရမယ့် မဟာဗျုဟာ ထိုးစစ်တွေအတွက် အထောက်အပံ့ကောင်း ဖြစ်တယ်လို့ ယုံကြည်ပါတယ်။

EROs တိုင်းရင်းသားတော်လှန်ရေးအဖွဲ့တွေနဲ့NUG အကြား ဆက်ဆံရေး ဘယ်လိုရှိလဲ။

ဒီနှစ် ဇန်နဝါရီ (၃၁) ရက်က ထုတ်ပြန်ခဲ့တဲ့ K3C-NUG ဘုံသဘောထားရပ်တည်ချက်က အထူး အရေးကြီး ပါတယ်။ တော်လှန်ရေးကာလသာမက တော်လှန်ရေးအလွန်ကာလမှာပါ ထားရှိရမယ့် အခြေခံမူတွေ၊ လုပ်ငန်းစဥ်တွေကို ညှိနှိုင်းသဘောတူခဲ့တာ ဖြစ်ပါတယ်။ ၂၀၂၀ ရွေးကောက်ပွဲ ရလဒ်ပေါ် ဘယ်လိုသဘောထားကြမလဲ၊ နိုင်ငံတကာတိုက်တွန်းနေတဲ့ Dialogue ဆိုတဲ့ ကိစ္စပေါ် ဘယ်လို သဘောထားကြမလဲ၊ ပြည်နယ်တွေ သတ်မှတ်ဖွဲ့စည်းရေး၊ ပြည်နယ်တခုချင်းရဲ့ နယ်မြေ၊ နယ်နမိတ်များ ပိုင်းခြားသတ်မှတ်ရေး ကိစ္စတွေကို ဘယ်အချိန်မှာ ဘယ်လိုနည်းနဲ့ကိုင်တွယ်ဖြေရှင်း ကြမလဲ စတဲ့ အရေးကြီးတဲ့အချက်တွေ ပါဝင်ပါတယ်။ K3C နဲ့ NUG အကြား ရှေ့ဆက်လုပ်ငန်းစဥ် တွေအတွက် ပုံမှန်ဆွေးနွေးညှိနှိုင်းမှုတွေလည်း ဆက်ရှိနေတာ ဖြစ်ပါတယ်။

အာဏာရှင်စနစ်အောက်ကနေ ဘယ်ပြည်နယ်၊ ဘယ်ဒေသတွေ အရင်ဆုံး လွတ်မြောက်လာမလဲ။

စစ်ရေးရော နိုင်ငံရေးပါ အားကောင်းတဲ့ ပြည်နယ်တွေ ဒေသတွေကတော့ အရင်ဆုံး လွတ်မြောက် ကြမှာပါပဲ။ အခုကို ပြည်နယ် (၇) ခုလုံးရဲ့ အဓိကအစိတ်အပိုင်းတွေဟာ လွတ်မြောက်နေပြီလို့ ပြောနိုင်တဲ့ အနေအထားပါ။ အလားတူ ပြည်မမှာလည်း ကိုယ်ပိုင်အုပ်ချုပ်ရေးနဲ့ကိုယ်ပိုင် လွတ်လပ်မှုနဲ့ နေထိုင် နေကြတဲ့ မြို့ရွာတွေ အမြောက်အမြား ရှိနေပါပြီ။

ပြည်သူ့ကာကွယ်ရေးအဖွဲ့၊ ပြည်သူ့အုပ်ချုပ်ရေးအဖွဲ့၊ ပြည်သူ့လုံခြုံရေးအဖွဲ့တွေ အကြောင်း ပြောပြပေးပါဦး။

စစ်ရေးက ပြည်သူ့စစ်မဟာဗျုဟာကို အားပြုရတာ ဖြစ်တဲ့အတွက် တဖက်မှာ PDF တပ်မတော်ကို ထူထောင်သလို တဖက်မှာလည်း ပြည်သူ့ကာကွယ်ရေးအဖွဲ့(ပကဖ)တွေကို ရပ်ကျေးအဆင့်ထိ ဖွဲ့စည်းတည်ထောင်ခဲ့ရတာ ဖြစ်ပါတယ်။
စစ်ရေးနဲ့အုပ်ချုပ်ရေးဆိုတာ တော်လှန်ရေးမှာ ဘယ်လက်နဲ့ညာလက်လိုပါပဲ။ လက်နှစ်ဖက်လုံး အားကောင်းဖို့ လိုပါတယ်။ စစ်ရေးအရ နယ်မြေစိုးမိုးနိုင်ပြီဆိုတာတဲ့ ဒီနယ်မြေတွေမှာ အုပ်ချုပ်ရေး လေဟာနယ်မဖြစ်စေဖို့၊ မင်းမဲ့ဒေသမဖြစ်စေဖို့၊ အုပ်ချုပ်ရေး ထူထောင်တာ ပအဖဖွဲ့စည်းတာ ကိုလည်း တပြိုင်တည်း ဆောင်ရွက်ရတာ ဖြစ်ပါတယ်။ ပလဖဆိုတာတော့ ရဲလုပ်ငန်း ဆောင်ရွက်တဲ့ အဖွဲ့ပါ။

မကြာခင် မဟာဗျုဟာမြောက် ထိုးစစ်တွေ ပေါ်ပေါက်လာတော့မလား။

PDF တပ်မတော်အနေနဲ့ဆိုရင် ထုအင်အားတည်ဆောက်ပြီး မဟာဗျုဟာထိုးစစ်ဆင်ဖို့ ပြင်ဆင် နေတဲ့ ကာလလို့ ပြောနိုင်ပါတယ်။ ထိုးစစ်က ခံစစ်ထက် ပိုပြီး အချိန်ယူရပါတယ်။ ပိုပြီး အရင်းအနှီး စိုက်ထုတ်ရပါတယ်။ ရှေ့မှာ ပြောခဲ့သလို ရန်သူကို အနိုင်ယူနိုင်မယ့် နည်းလမ်း ကျွန်တော်တို့ ရဲဘော်တွေမှာ ရှိနေပါပြီ။ ပွဲမြန်မြန်ဖြတ်နိုင်ဖို့ ကျွန်တော်တို့ အားလုံး အစွမ်းကုန် ကြိုးစားနေတယ် ဆိုတာ အသိပေးလိုပါတယ်။

#MOD
#HlaingInfo