O‘zbekistonda 15-may — Xalqaro oila kuni munosabati bilan jamiyatda oilaning o‘rni va nufuzini yanada mustahkamlash, qadriyatlarimiz davomiyligini ta’minlash hamda oilalarda sog‘lom ma’naviy muhitni qo‘llab-quvvatlash maqsadida “Oila muqaddas” shiori ostida madaniy-ma’rifiy tadbir tashkil etildi.

Mazkur nufuzli tadbirda respublikamizning turli hududlaridan tashrif buyurgan, yillar davomida ahil-inoq yashab, jamiyatda mehr-oqibat, sadoqat va o‘zaro hurmat muhitini saqlab kelayotgan, shuningdek, farzandlari tarbiyasi va hayotiy sabr-toqati bilan barchaga chinakam o‘rnak bo‘layotgan eng namunali va ziyoli oilalar jam bo‘ldi.

Tadbir Toshkent davlat transport universiteti jamoasi uchun ham quvonchli lahzalarga boy bo‘ldi. Xususan, o‘zining ilmiy va pedagogik faoliyati bilan bir qatorda, oilaviy hayotda ham ko‘pchilikka ibrat maktabi bo‘la olgan universitetimiz vakillari — “Ijtimoiy fanlar” kafedrasi mudiri Jumaniyoz Ramatov, “Chet tillar” kafedrasi dotsenti Latofat Xalikova, “Ko‘priklar va tonnellar” kafedrasi dotsenti Jumagul Turg‘unbayeva hamda Mirzaqulovlar oilasi tantanali ravishda “Ibratli oila” ko‘krak nishoni bilan taqdirlandi.

Ushbu yuksak mukofot ustozlarimizning nafaqat kasbiy fidoyiligi, balki jamiyat tayanchi bo‘lgan oila mustahkamligiga qo‘shgan munosib hissalarining yorqin e’tirofidir. Universitet jamoasi ushbu e’tirof bilan ustozlarimizni qizg‘in qutlab, ularning sermazmun hayoti yosh talabalarimiz va kelajak avlod uchun munosib namuna bo‘lib xizmat qilishini ta’kidlaydi.